Ka Nupepa Kuokoa, Volume XLI, Number 12, 20 March 1903 — Page 5
| This text was transcribed by: | Ursula Chappell |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, MARAKI 20, 1903.
______________________________________________________________________________
Nuhou Kuloko.
_____
Ua hooholoia a ua lilo i kanawai e heoliloia ka hae Hawaii i hae teritori me ka Teritori nei.
_____
Ke hoeueu mai nei o Halemaumau i keia manawa a ke hou la na alelo uia e ke ahi mawaho o kona waha.
_____
Omaimai ke Kiaaina i keia mau la a ne keia kumu aole oia i hiki kino aku @oko o ka hoolewa o ke keikialii Albert Kunuiakea.
______
Ua huli hoi mai nei o W. O. Kamika mai Amerika Huipuia mai maluna o ka mikuahi Siberia a he maikai no kona ola kino.
_____
I keia pule ae e oili aku ai ka mooielo o na milionaea i lawe a huna ma@a ia. E hea mai i keia malihini a e hookipa aku iaia.
_____
Ke kau hou mai nei ka ouli o ke kaua ma na paeaina o Pilipine a ke hoeueu ia na koa kipi kokoke ma ke kulanakauhale o Manila.
_____
Ua haalele aku o Mrs. Kahoano i kana kane me ke kumu ole, a ke puka aku nei ka hoolaha a kana kane i keia pule e pili ana nona.
_____
Eia aku na miliona dala ma ke ula ke ahai ia mai la no Hawaii nei no ka uku ana i na koi poho pauahi malalo o ka malumalu o Lessan.
_____
Ua lawe aku nei ka mokuahi Ventura he $30,000 Hawaii i Amerika Huipuia no ka panai ana mai ma ko lakou hakahaka i mau dala aeko hou.
_____
Ma ke ahiahi Poalima i hala la 13, ua hooheno ae na keiki puhi ohe o ke aupuni i ka lakou mau mele mawaho o Kamaki Kuea. Nui ka nani.
_____
Ma ka po Poalua nei i hala ua malama ae na keiki o Irelana i ka la o ka mea hemolele, St. Patrick. Nui na hana hauoli i malamaia i kela po.
_____
Ma ka Poalua i hala aku nei la 17 ua ku mai ka mokuahi Siberia ke kaeaea o ka moana Pakipika a ua kamoe loa aku kona alahele no na aina o ka hikina.
_____
Ua huli hoi mai ka luna nui o na hana hou Mr. Kupa, aole nae i maopopo iaia ke kumu o kona makemake ia. Ua kauoha ia aku nei oia e ka ahaolelo.
_____
Hanohano ka hoolewa o ke keikialii Kunuiakea ma ka Lapule i hala he h@olewa e poina ole ai na makaainana ikona nani ame kona hiwahiwa. E moe oia me ka maluhia.
_____
Ma ka Poaono o ka pule i hala ua hanau mai o Mrfs. David Kawananakoa he kaikamahine ma ka hora 2:30 p.m. Maikai no ke ola kino o ke kaikamahine ame ka makuahine.
_____
Ma ka Poalima o ka pule i hala ua hepu ia aku he elua mau Iapana no ka moekolohe e Ilamuku Hendry malalo o ke kanawai a Edmund a ke paa ia nei laua. e komisina Gill.
_____
Ke hopuhopu nei na Iapana ame na Pake i na i’a liilii me na upena makika ke kumu e emi nui nei i’a o kakou a he mea maikai e hooholoia ke kanawai e hoopakele ana i na i’a liilii.
_____
Ke kuai nei ka Sunrise Bakery eono amoamo palaoa no 25 keneta. Ua hiki no ia oe ke kuai i na kikiki palaoa. He kaa ko keia Bakery i keia manawa e lawe ana i ka palaoa ma kela ame keia home. Ina oe e makemake ana i na palaoa maikai loa, mai poina i ka Sunrise Bakery.
________________________________________________________
Ua Pololei ke Kauka.
Ina e malama pono ia kanaka me ke akahele loa, a ina lakou he malama pono i na kanawai o ka malama ola ana alaila aole e ikeia ka laha o keia mea he ma’i ke kumu hoonawaliwali kino.” O ka pane keia a kekahi kauka kaulana. A i ka hoolohe ana he maikai maoli no a he ano maalahi ke malamaia. Aka, o ka hapanui o kakou he poe i malama pono ole i na ola, oiai, he poe lakou i hooikaika iloko o na luhi ma na manawa apau e loaa ana ia lakou he manawa. Nolaila, aole i nele ko kakou loaa i na ehaeha, - o kekahi mau ehaeha maiwaho mai a o kekahi mailoko ae no ma ke ano kuluma.
O na ano maikai ole i loaa iloko o ke keko kekahi kumu e loaa ai i ka @wa;a mai kekahi mau ano e ae no hoi e loaa ai i ka ma’i numonia ame na ma’i kumau e ae. O na ma’i kekahi pili i ka opu ame na paahana apau o loko ame na ma’i o ka ili mamuli o na pilikia i loaa iloko o ke koko. Ma ka kakou ai ana ame ka inu ana e loaa ai kakou i na pilikia like ole a kakou e hiki ole ai ke alo ae, ina pela, alaila aia i’o no kakou ma ke alanui pohihihi@ ka nui o na ke’ake’a o ke ola ana: I mea e pakele ai kakou e pono no e loaa ia kakou na makaukau e pale aku ai ia mau ino. O ka lawe ana i ka laau lapaau
WAMPOLE’S PREPARATION
ma ka manawa no e ikeia aku ai ka hoailona mua o ke ano onawaliwali, oia ka mea e hala ole ai ka oihana hoola a ka laau me ka hoohewahewa ole. He mana ko keia laau e hiki ai ke haha a hoola i ka hapanui o na ma’i e puka mai ana mai ka hapanui mai o na ano pilikia maa mau.
He ono keia laau i ka ai ana, ano like me ka hone, nona hoi kekahi mau ano maikai o ka mana hoola mai ka Pure Cod Liver Oil mai (Aila maemae o ke Akepaa o ka i’a cod) i loaa mai ai mai ke akepaa mai o ka i’a cod i hoohuihuiia me ke Compound Syrup o ka : Lypophosphites ame ka Extracts of Malt and Wild Cherry. He hiki loa keia laau ke hoopau i na pilikia a hoihoi mai i ke ano mau e ke kino.
iEia ka Kauka G.G. Murray pane pili i keia laau:
“He hauoli nui ia no’u o ka hooia@o aku i ko’u hoohana ana i keia laau i ka’u poe @na’i. Ua loaa i keia laau ka mana hoola apau a he maalahi loa, ma ka ai ana.’
He loaa ke ola i ka oolopu mua no. Aole oe e hoohokaia e keia laau. He kuaiia keia laau ma na wahi apau a na poe kuai laau apau no hoi e kuai aku nei.
MEA HOU O KA HALE AHAOLELO.
(Mai ka aoao 4 mai)
bila kalana e like me keia malalo iho : E waiho ia na kula malalo o ka hoomalu ana a ke kalana; e kohoia na lunakanawai apana; e waihoia na kauka aupuni malalo o ka malumalu o ke kalana, aka e ukuia e ka Teritori e hoohuiia na keena o ka luna hua helu auhau ame ka luna ohi; e hoopaaia ka uku o ka Papa Luna Hooponopono; e hoopaa ka ahaolelo i ka auahu ana;na lawehala i hoopaahaoia malalo o umi makahiki e paa ia no lakou iloko o na halepaahao o ke kalana, a oi aku maluna o umi makahiki ma ka halepaahao o Oahu; aole e kupono ka lunahooponopono no kekahi oihana e ae a o na mea paa oihana koe na kumukula o na halekula kiekie ame na kauka aupuni i piha ole ekolu makahiki ko lakou noho ana i keia aina.Waihoia i ke komite kalana.
Hoike mai o Balauina ma ka aoao o ke komite o na ala ame na loaa e kue ana i ka haawi laikini ia o na halekuai no ke kuai ana i ka waiona a waihoia no ka noonoo ana me ka bila.
Na Balauina no he hoike e uku ia na kiure he umi keneta o ka mile hookahi aole hoi i hapaumi wale no a waihoia no ka noonoo ana me ka bila.
Hoike mai o Senatoa Brown o ke komite aha hookolkolo a waihoia ka hoike no ka noonoo ana me ka bila.
Na C. Brown he noi e holoiia ka itamu o $1,200 no ka luna nana uwila a hoohoia.
Hapaiia mai ka noonoo ana i ka haawina dala o ka mahiai ame ka ululaau a waihoia i ke komite kuikawa. Hoopaneeia ka senate.
HALE O NA LUNAMAKAAINANA.
La hana 21, Maraki 13. – He hoike na ke kiaaina ua kakauinoa oia i ka bila sente helu 3 e pili ana i ka haawina dala koi poho pauahi.
Hoike na ka aha senate e pili ana i ka hooholoia ana o kekahi mau bila e like me keia malalo iho: He kanawai no ka lakini ana i ke kuai liilii ana i ka waiona lahilahi; he kanawai e pili ana i na lunakanawai apana ame na lunakanawai aha kaapuni; ame ke kanawai e pili ana i ka hoolaha.
Hoike na ke komite pai e pili ana no kekahi mau bila i paiia a waihoia ma ka pakaukau o na laia apau o ka Hale.
Na Kumaiae, he olelo hooholo e kauoha ana i ka luna nui o na hana hou e huli hoi mai oia iloko o ke kulanakauhale no ka hoakaka ana i kekahi mau mea e pili ana i ka waihona dala o na Pake a hooholo lokahiia.
Na puiaa he olelo hooholo hui e haawi hou ia ka pono kuleana i na kanaka i hoopaaia a i ole hookuuia paha mailoko mai o na halepaahao a e loaa ia lakou ka mana koho ma keia hope aku a hooholo lokahiia.
Hoike na ke komite aha hookolokolo e pono ana i kekahi mau bila, ka bila a ka papa loio no kekahi mau hoololi iloko o ke komisina houluulu kanawai ame $6,000 no keia haha. Ua waiho ia ka hoike a ke komite maluna o ka pakaukau.
Hookomo mai o Vida i kana bila e pili ana i ka laikini opiuma ame ka papa ana i ka hale puhi opiuma a hooholoia ma ka heluhelu mua.
Na Kealawaa he olelo hooholo i haawina dala o $14,000 no ka hoomau ana i ka bana o Hilo, a waihoia i ke komite pili i ka oihana kaua.
Na Kealawaa he olelo hooholo hou no na ka ae ana i na Hawaii e lawelawe i ka oihana lapaau me ka laikini ole a waihoia i ke komite o ka papa ola.
Na Kupihea he olelo hooholo e pili ana no kekahi mau komisina ekolu e hoounaia aku ai ma ka hoikeike o Sana Lui a waihoia i ke komite waiwai.
Hookomo mai o Harris i kana bila e pili ana i ka hiki i ka lunakanawai apana e hoopuka i komisina e hoohemo mai mai ka oihana aku.
Noi mai o Wright i $6,500 no ka pono o ka lehulehu loko o na pa-ka ame kekahi mau wahine e ae.
Na Nakaleka he olelo hooholo e uku ia ke kanaka malama kukui o Kaunakakai, Molokai i $1,200 a i $200 no ka hale noho.
Na Oili he mau bila kanawai hale noii pili i ka baketiria (bacteria) ma Kalihi; ka hoomalu ana i ka hooponopono paipu ana ame ke kulai ana i ka ino o na ano apau, a hooholoia ma ka heluhelu mua.
Na Haia he olelo hoohoio i $2,500 i halekula ma Hana, Maui, a i $3,000 no ke kauka aupuni.
Na Paele he noi i $2,000 i alanui mai Kulakula aku a hiki i ke kai.
Waiho mai o Damiana i kana bila e pili ana no ka hoomalu ana i ke koho balota ame ke ano o ka lawe ana o ka olelo hoohiki.
Hoike na ka lunahoomalu Bekele o na memoriala ame na olelo hooholo e noonoo wale ia no ia ma ka Poakahi mahope aku o keia la a mahope o kekahi mau ninaninau ana e pili ana i na bila i paiia ua hoopaneeia ka Hale.
AUWINA LA.
Noho hou ka Hale me Kiliniwoki ma ka noho a noonoo ia ka bila haawina dala no na pilikia kuikawa.
Hapai mai o Keliinoi i kana pakui o $16,500 no na alanui ame na alahaka o Maui a mahope o kekahi mau walaau ana ua hooholoia.
Hapai hou ia mai ka itmu o $1,500 no na paipu ma Honolulu a hooholoia.
Hooholoia ka itamu o $4,500 no ka hooponopono hou ana i ka hale aupuni.
Hooholoia ka haawina dala o $ 500 no na lako o ka hale aupuni a mailoko mai o keia huina e kuai i paku.
O ka haawina dala o $10,000 no na alanui ame na alahaka o keia mokupuni ua hooholo lokahiia.
O ka haawina dala o $5,000 no na awapae ame na boe o Hawaii ua hooholo lokahiia.
O ka haawina dala o $9,000 no ka hooholopono ana i ka palewai o Hilo ua hooholoia.
O ka haawina dala o $5,000 no ka hoopau pono ana i ke alanui Huehue, ma Kona akau ua hooholoia.
O ka haawina dala o $5,000 no ke alanui mawaena o Ookala ame Kukaiau ua hooholoia me ka huina i hoonuiia i ka $20,000 i alanui hou mawaena o keia mau wahi.
O ka haawina dala o $1,500 i uwapo ma Waimea, Kauai ua hooholoia.
NA HANA O KE AHIAHI.
Noonooia ka pakui a Harris i ka bila haawina dala o ka manawa pilikia kuikawa e hookaawale ana i $13,000 no ka hooponopono ana i ke alanui Waialae a hooholo lokahila.
Hapai mai o Kupihea e hookawaleia i $5,500 no ka haliii unu ana i ke alanui Moi, Kamehameha ame Kalihi a hooholo lokahiia.
O ka haawina dala o $24,000 no ka halekuia hoopololei ua hooholo lokahiia.
O ka itamu o $1,000 i mau buke ame kekahi mau hoolilo e ae no ke keena hoonaauao ua hooholo lokahiia.
O ka tamu o $1,000 no na hoolilo laula a ka Papa Ola ua hooholo lokahiia.
O ka itamu o $110 no na mea paniku i na ma’i ua hooholo lokahiia.
O ka itamu o $4,200 no na hoolilo puhi kukepele ana ua hooholoia.
O ka itamu o $18,000 no ka hookaawale ana a malama ana i na lepera ua hooholoia.
O ka itamu o $18,250 no ka aha kiekie ame ke aha kaapuni ua hooholoia.
O ka itamu o $300 no ka uku ana i na maheleolelo ua hooholoia.
Na Kupihea he olelo hooholo e pili ana i ke ano o ka hooponopono ana o kanikau maluna o na koa aupuni a waihoia ma ka pakaukau.
Hoopaneeia ka Hale a noho ma ke kakahiaka Poakahi hora 9.
AHA SENATE.
La hana 21, Maraki 13.
Hoike mai ka peresidena i na inoa o ke komite no na mea e pili ana i ka wai ma Pauoa, Isenberg, Cecil Brown, J.T. Brown, Dickey ame Kaiue.
Waiho mai o senatoa Dickey he mau palapala noi mai Hamakuapoko a mai Kula mei e noi ana e hooliloia o Wailuku i poo aupuni no Maui.
Na Paris he hoike e apono ana i ka bila haawina uku o eono mahina.
Na Dickey he noi o na palapala noi iloko o na kope aole ia e heluhelu piha ia ma keia mua aku.
Na Achi he manao hookomo kanawai e hoololi ana i ke kanawai e pili ana i ka palapala hookuu kino ame ka hookolokolo o na mea uwao.
Na Crabbe he manao hookomo kanawai e pili ana i ka auhau kuloko.
Na Woods he manao hookomo kanawai e kue ana i ka hoohuihuiia o na mea ai ame na laau. Ua kauohaia keia mau bila apau loa e paiia.
Hapai hou ia mai ka bila haawina dala o na uku o na keena like ole o ke aupuni no eono mahina a mahope o kekahi mau kamailio ana ua hooholoia.
Noi mai o Achi e ukuia ke poo kiekie o ka Papa Ola $1,200 a hooholoia.
Noi hou mai o Achi e uku ia ka luna kakau i $1,000 a hooholoia.
Na Brown he noi e uku ia ka luna nana i’a i $380 a hooholoia.
Hooholoia e uku i ke kokua luna nana i’a i $300.
Hapai hou ia mai ka haawina dala o $ 10,140 no ka uku o na kauka aupuni a nui no hoi na olelo wela i uleleia a ma ke noi a Wilikoki ua waihoia keia kumuhana iloko o ka lima o kekahi komite.
O ka itamu e pili ana no na kaikamahine himeni o ka bana ua hoololiia i $ 300.
Hooholoia ka uku o ka luna hooia e like me ia i hoaiai ia oia hoi i $2,250.
Ua heluheluia mai la ua bila nei a ua hooholo lokahiia ma ka heluhelu elua ana.
O ka bila e pili ana i ka lawelawe ana i na hana karaima ame ka hoonee ana i ka hana imua ua hooholoia ma ka heluhelu ekolu ana.
O ka bila e ae ana i ka hoohuila o na hui no ka paniku ana i na hanakupono ole maluna o na keiki ua hooholo lokahiia.
AUWINA LA.
O ka bila e haawi ana i ka uku i na lunakanawai kaapuni ua hooholoia ma ke heluhelu elua ana.
O ka bila e pili ana i ka ganisi o na loaa aupuni ua hooholo elua ia.
O ka bila e pili ana no ka uku ana i na lala o ke kiure i umi keneta o ka mile ua hooholoia ma ka heluhelu elua ana.
O ka bila e haawi ana i ka laikini i na hale kuai no ke kuai ana i ka waiona ua waihoia maluna o ka pakaukau.
O ka bila no ka hoohui ana i ke kulanakauhale ua waihoia iloko o kekahi komite e koho ia aku ana keia mua aku.
O ka bila kope ame ka bila e pili ana i ka uku auhau kuloko ua waihoia i ke komite o na ala ame na loaa.
O ka bila pili i ka huki ana i ka niho ua hooholoia ma ka heluhelu elua ana.
O ka bila e pili ana i ka hoike no na halawai o ka papa hoopaa a kakau hoi ua hooholoia ma ka heluhelu elua ana.
Na Crabbe he manao hookomo bila e hookuuia ka Hui Kaauwila o Pakipika Haiki mai ka auhau mai no elima makahiki.
Na Paris he hoike ma ka aoao o ke komite o na ala ame na loaa e hoaiai ana e aponoia ka bila e auhau ana i $5 maluna o na kaa mahu (automobles) ame elua dala maluna o na kaa hehiwawae.
Hoopaneeia ka senate.
AHA SENATE.
La hana.22. Malaki 14.- Waiho mai o senatoa Dickey he ekolu mau palapala mai Hawaii ame Kauai mai e kue ana i na hoololi e pili ana i na kula, a waihoia i ke komite o ke kalana.
NaMcCandles he palapala mai Kalihi mai e noi ana e hooloihi ia aku na kukui uwila a hiki i ka hale hoomomona ame ke alanui Kamehameha awaihoia i ke komite maluna o na aina aupuni.
Na Dickey he hoike e apono ana i ke noi o $1,200 no Koolau, Maui.
Hooholoia ka itamu o $600 na ka mea poo kakau.
Na C. Brown he noi e haawiia mai i ke komite o ke kalana i elima la alaila waiho mai i ka lakou mau hoike.
Na Paris he noi e haawiia mai i ke komite maluna o na hoolilo lehulehu i manawa.
Na Kalauokalani he olelo hooholo e waiho mai na komite apau i ka lakou mau hoike maluna o na bila iloko o umi la a hooholoia.
Na Wilikoki he noi e okomoia iloko o ka itamu i $13,000 i mau alanui na Hanalei, Kauai.
O ka bila e pili ana i ka uku ana i ka bona no na koi poho pauahi ua hooholoai ma ka heluhelu elua ana.
Waiho mai ka peresidena i na inoa o ke komite maluna o ka bila kulanakauhale: Achi, Dickey ame J. T. Brown.
Ma ke noi a C. Brown ua hoopaneeia ka senate no ka hoomanao ana i ka make o ke Keikialii Albert Kunuiakea.
HALE O NA LUNAMAKAAINANA.
La hana 22 Maraki 16. – Na ke Kiaaina he leka e hoike mai ana i ke kakauinoaia ana o ke kanawai hae no ka Teritori.
Na ke Kakauolelo nui White o ke Keena o na Hana Aupuni he hoike piha o ia Keena pii i na loaa ame na mea like. Unuhila no ka noonoo aku.
Na ke Kakauolelo o ka Senate he hoike pili i ka heluhelu ekolu ia o elua bila, helu 66 ame 77.
He noi na ko Hilo poe i $35,000 halepaahao, hale hookolokolo ame kahi o na makai. Na lakou no he noi no ko lakou bana puhi ohe. Waihoia i ke komike paikau. He noi pili i ka paka kekahi.
No Honomu mai he noi aina homehookuonoono. Waihoia i ke komike aina aupuni.
No Waiakea, Hilo he noi e maheleheleia na aina hoolimalima i ka hui Waiakea Mill Company i mau apana pa-hale; $10,000 no ke alanui Luapele, a no Hilo no he mau noi hooponopono pili i ka bila kalana me ke noi ana e hooholoia ia bila i keia kau.
Na ko Kona Hema mai he noi $9,000 hoakea alanui. Waihoia i ke komike aina.
Na Joseph Kalina (Joseph Green) he noi na ka uku ana i kona poho mamuli o ka pauahi bubonika.
Na Wright he noi mai Kau mai no $73,500 no ke alanui.
Hoike komike a Knudsen pili i ke pa’ila o na rula. E hoike ana i ka nui loa o na hemahema Kauohaia e hoihoi no ka hooponopono hou.
Hoike komike hooponopono Papa Ola a Kiliniw@ki.
Na Kupihea he olelo hooholo e a’oia ka lunahoomalu o ke komike hookolokolo e noii pono ia na kanawai auhau ame laikini o ka Teritori o Hawaii. Aponoia me ka pakui.
Na Long he hoolaha manao hookomo bila pili i ka hookuu wale i ka puhi rama ame ka hoopau loa i na kanawai papa puhi rama.
Hoike komike hookolokolo no ka bila hookohu Lunahooponopono waiwai. Waihoia ma ka papa.
Na Kupihea he bila hookukulu hou i ka Papa Ola.
Na Pulaa he olelo hooholo pili i na auhau maluna o na ukana moku. E koho ke Kiaaina i komike a na lakou e hoike mai i ke kau ahaolelo e hiki mai ana.
Na Kealawaa he olelo hooholo paniku a hoopau i ka hale lio makai o Kakaako mamuli o ka hohono ino e hoopilikia ana i na kanaka olaila. Waihoia i ke komike ola.
Na Nakaleka he olelo hooholo e hookomoia i itamu o $1,020 no ka ukuhana o ka poe o Molokai i hoohanaia e ka Papa Ola i ke kau puhiahi bubonika.
Na Haia he olelo hooholo e hukiia ka hae Hawaii no kona welo aku iluna o ka Halealii i kela ame keia la o na e noho ai ka Hale. Hooholo lokahiia.
Na Kealawaa he manao hookomo bila pili i na aha hookolokolo apana.
Na Kupihea e manao hookomo bila pili i ka hoike haawina o na eneginia.
Ma keia manawa ua noonooia ke kanawai kalana eia nae ua hoopneeia no ka noonoo hou ana. Mahope o keia ua laweia mai keia mau bila:
Bila 81, 40, 94, 103, 104, 105, 114, 125, 82, 87, a o ka bila 47 ua heluhelu elua ia bila 64 ua waihoia i ke komike.
Noonoia ka bila helu 5 a hoihoi hou ia no ka hooponopono ana; a pela no hoi ka bila helu 30 mamuli o ka nui hemahema ua hoopanee hou ia ka noonoo ana.
Noonoo hou ia ka bila haawina o na pilikia kuikawa nona ka huina o 205,- 820. Ma keia wahi ua noonoo hou ia ka itamu o $1,500 i haule ai pili i ka huli ana a hoihoi mai i ka poe luna aupuni i holo malu. Me ka nui kamailio ua hooholoia ua huina la ke kumu i piha ai ka heluna nui o $207,230.
Ma ka olelo hooholo ua waihoia ka bila aupuni kulanakauhale i ke komike o 7 lala.
Hoopanee ka Hale a noho hou.
MA KA HALE O NA SENATE.
La hana 23, Maraki 16. – Na Paris he noi na ko Kaua poi i haawina dala halekula ame uwapo.
Na Kaiue he noi na ko Maui poe i haawina dala alanui o $2,400.
Na C. Brown ame McCandless he mau hoohalahala pili i ke kapae ana i ka luna nana uwila a ka nupepa Advertiser i hoolaha ai.
Na Kaiue he noi i mau haawina dala o $133,350 no Wailuku, pili i na alanui ka hapanui o keia huina nui: $2,400 no na alanui ame $10,000 halekula.
Na Baldwin he hoike komike o na Ala ame Loaa ku-e i ka manao hoopau i ke kanawai auhau maluna o na loaa. Ma ke noi ua waihoia ka hoike a noonoo hou ia me ka bila kalana.
Na Dickey he hoike komike noi huikau kokua pili i ka papa kakauinoa.
Na Dickey no he noi na 24 poe kumukula o Hawaii e ku-e ana i ka hoololiia o na rula o ka oihana hoonaauao.
Na Woods he olelo hooholo e kahea ana i ke Kiaaina e hoike mai i na mea apau e pili ana i na koi a na Pelekane Waihoia i ke komike.
Na Achi he hoolaha hookomo bila pakui Kanawai 64 o na kanawai o 1896 e ae ana e kuai ia ka waiona iloko o na hotele.
Na Achi no he olelo hooholo haawina dala o $5,000 no ke alanui i Kalihi. i Waihoia i ke komike Aina Aupuni.
Na Paris he olelo hoohole e haawi laikini hou i ka hui malama hale lio o Kohala.
Na Crabbe he bila pakui kanawai auhau.
Holo ka bila oihana kauka huki niho.
Na McCandless he kanawai hooponopono pili i ke Keena o ka Luna Nui o na Hana Hou.
Na C. Brown he noi mai a Henry Smith mai e noi ana e hoihoi mai ka Ahaolelo i ka $24.43 auhau oi kaulele wale aku maluna o ka aina o 64,900 kapuai kuea, oiai no nae he 51,325 kapuai kuea wale no kona wahi kuleana.
Na Dickey he mau bila pili i ke kakau kope ame ka hoopaa ana i na kuleana aina, he kanawai pili i na hui kuwaho, he kanawai pili i na hui ame hoa hui ame na hui banako. Heluhelu akahiia na bila a kauohaia e pa’i.
Na Woods he hoolaha no ke kanawai e aeia ke puhi akea ana i ka waiona ame ka hoopau ana i na kanawai paniku puhi rama.
Holo ka haawina pakui o $500 no na lunakanawai kaapuni, mahope nae o kekahi mau papaleo ana.
Na Paris he noi pakui itamu o $500 no ka Apana Kaapuni Eha. Ma ka noonoo ana ua hooholoia ka bila haawina uku o na lunakanawai kaapuni me ka pakui, oia hoi, $1,000 no Honolulu a he $500 no na apana e iho.
Holo ka bila helu 70 ame ka bila helu 73.
Hoopanee ka aha a noho hou.
HALE O NA LUNAMAKAAINANA.
La hana 23, Maraki 17. – Holomua na hana a maikai no hoi. Holo kekahi mau bila. Laweia mai a noonoo ka bila o na pilikia kuikawa mai ke komike mai a i ka hala ana o kekahi manawa loihi mai ke kakahiaka a auwi ka la ma ka noonoo ana, a hookomokomo pakui ana, a ma ke noi ua hooholoia ua bila la.
Heluhelu eluaia na bila helu 70 ame 50 a holo mahope o ka hala ana o ka nui noonoo ana.
Hapaiia mai ka bila helu 38 pili i ka huna keiki a hooholoia me ka hoopaapaa ole ma ka heluhelu ekolu.
Hapaiia mai ka bila helu 42 a hooholoia mahope o ka noonoo ana.
Bila helu 43 kekahi i hapaiia mai no ka noonoo ana a ma ke kuka ana ua hooholoia.
Bila helu 44 pili i ka waiwai aihueia ua aponoia me ka holopono.
Hoomoeia ka bila helu 45 ma ka papa.
Bila helu 46 ame ka bila helu 47 ua hooholoia me ka holopono.
Bila helu 48 pili i ka aihue ua hooholoia me ka hoopaapaa ole.
Ka bila pili i ka opiuma ua hooholoia a mahope o ka holo ana ua hoopaneeia ka Hale.
KA AHA SENATE.
La hana 24, maraki 17. – Na ka Hale o na Lunamakaainana he leka e hoike ana i ka olelo hooholo kahea i ke Kiaaina e huikala i a paahao no ka haawi ana i ko lakou pono kivila. Waihoia i ke komike hookolokolo.
Hoike komike ola ame hoonaauao a Wilikoki ku-e ana i ka hoololi rula hooponopono kula. Waihoia ka hoike a noonoo pu ia me ka bila lalana.
Na Wilikoki no he hoike o ia komike no e kakoo ana i ke noi e kukuluia i kula pokii, a i haawina dala o $3,300. Waihoia a noonoo pu me ka bila haawina.
Na Wilikoki no he bila pili i ka bila Senate helu 37 e pili ana i ka Peresidena o ka Papa Ola. Waihoia ka hoike a noonoo pu me ka bila pili ia kumuhana.
Na Paris he hoike komike kuikawa no na itamu haawina dala, $6,000 no na haukapila a pela no hoi ka haawina o na kauka ame ko ka hale pupule.
Na McCandless he hoike o ka hapauuku pili no ke kumuhana a ka hapa nui. Waihoia keia mau hoike a elua ma ka papa a noonoo pu me ka bila haawina.
Na C. Brown he hoike komike kuikawa pili i ka bila kalana a na Repubalika no ka hooholo loa ana me kekahi mau pakui. Ma ka noonoo ana ua hooholoia a kakau mikiniia i eono kope ma ka olelo Hawaii no ka hoolawa ana i na hoa Home Rula.
Na Achi he hoolaha hookomo bila pili i ka hookumu papa uku-ukana.
Na AChi he olelo hooholo hookomo itamu o $10,000 iloko o ka bila haawina no ka uku ana i ka hui kalepa no ka hoohana ana ia J. G. Pratt no ka hooholo ana i ka bila koi poho pauahi i hanaia mai nei i Wakinetona.
Holo ka bila auhau kaa otomobila$5 ame auhau kaa hehi-wawae o $1.
Holo ka bila pili i ka uku mile o na kiure.
Holo ka bila pili i na bona koi pohe pauahi.
Make ka bila pili i ka hoopau i na auhau maluna o na loaa.
Na Achi he hoolaha hookomo pakui kanawai auhau maluna o na loaa.
Heluhelu elua ia ka bila pili i na hoolaha e haawiia ana e na Papa Hoopaainoa.
Waihoia ka bila ululaau i ke komike mahiai.
Bila Senate helu 90, 91, 93, 95, 96, 97, 98, 99, 100, 101, 102, 103, 106, 107, 109, 10@ ame 115 ua waihoia i na komike ma ka heluhelu elua ia ana.
Heluhelu elua ia ka bila hookuu auhau o kekahi mau waiwai lewa.
Na McCandless he olelo hooholo e kohoia i komike e ike ai i ka Luna Nui o na Hana Hou pili i ka hoohanaia o na kaa. Aponoia a o McCandless, Dickey ame Wood ke komike.
Waihoia ka olelo hooholo a ka Hale maluna o na uku ukana i ke komike aina Aupuni.
Hoopanee ka aha a noho hou.
HALE O NA LUNAMAKAAINANA.
la hana 24, Maraki 18. – Na ke Senate he mau bila i hooholoia e lakou a mahope o ka noonoo ana ua hooholoia ma ka heluhelu ekahi ana.
Na ka Makai Kiekie he kono i na hoa o ka Hale e hele e nana paikau a na makai mawaho o Kapiolani i ka auwina la Poaono hora 2:30 p.m.
Hoike komite waiwai e kakoo ana i ka hoopanee loa i ka noonoo ana i ka olelo hooholo a Kaniho pili i kekua i na hui mokuahi holo pili aina.
_____________________________________________________________________________________
(E nana ma ka aoao a)
E MALAMA i kou Ili
KE ANO O K AMALAMA, HOOMAEMAE ME KA HOOUI ANA I KA II
A ME KA HELEHELENA.
No ka malama, hoomaemae a me ka hooui ana i na ili, i ole ai e loaa i ka huehue, ili pohaka, ili akaakaa wale, kolekole, lena, hou nui, ili nakakaka, ili lahilahi, a i na ano kinaunau lehulehu wale o ka ili, aole loa kekahi kopa ili a helehelena paha e hiki ke hoohalikeia me ke KOPA KUTICURA, na ka mea, aohe kopa e ae e hiki ai ke imi aku a loaa na kumu penei: ka puakiki, @pehupehu a hoopaaia paha o na pukapuka o ka ili.
E Malama i kou Lauoho
KE ANO O KE PALE ANA I KA LAUOHO HELELEI, NA EHAEHA O
KA ILI POO ME KE KEPIA.
E holoi pono i ke poo me ka lauoho me ka wai KOPA KUTICURA pumehana, holoi i ke kopa me ka wai pumehana, hoomalo maikai, alaila, hamo malie me ke KUTICURA, ka laau hamo maemae loa, ke komi malie ia a komo iloko o ka ili o ke poo. O keia wahi laau hoonui lilo ole, iloko o kona ano ole, he oi aku o ka maikai no ka hoomaemae ana i ka ili o ke poo, a e pau ana ka ekaeka o ka lauoho me ka ili, a me ke kepia, e oluolu ana na aai eha, ka wewela, a e hooikaika ana i na kumu lauoho, e hoolawa ana i naa me na mea kupono e ulu ai, a e ilu auanei ka lauoho maluna o ka ili maemae, a ole maikai no hoi, ma kahi i nele ai i na laau e ae a pa@.
E Malama i kou Lima
KE ANO O KA HANA ANA I NA LIMA A PALUPALU ME KE AIAI I KA
PO HOOKAHI.
E holoi a lumai i na lima i ka wa e makaukau ai e moe, iloko o ka huahua KOPA KUTICURA manoanoa hoi i hoopumehanaia. Hoomaloo pono a hamo puni me ke KUTICURA HAMO, ka laau hoola ili oi loa, a o ka oi aku no hoi o ka laau hamo maemae loa. E komo i mikilima alualu i ka po, me ka hana nae i mau pukapuka ma na manamana. No na lima ula, kalakala, a mokumoku, maloo, nakakaka, maneo, owelawela o na pholima, maiao kekee, me na manamana hu’i, o keia lapaau ana no hookahi po wale no ka mea kupanaha loa, a he mea hoopomaikai no hoi i ka poe a pau i eha, mokumoku. kalkala a lahilahi paha o na lima.
O POTTER DRUG AND CHEM.COMP., Boston, U.S.A., na Oaa o na laau CUTICURA a pau loa.
_________________________________________________________________________________
Na
Mea
PAANI AME HOOIKAIKA KINO
Ma
Kahi o
Pearson & Potter Co.,
LIMITED
ALANUI HOTELE ME UNIONA.
______________________________________________________________________________
Eono Omoomo Palaoa Maikai i ka 25c.
MA KA HALEKUAI PALAOA
SUNRISE BAKERY
Alanui Nuuanu, kokoke i Alanui Vineyard.
He palaoa maikai loa keia iloko o ke Kulanakauhale nei.
He kaa ko makou a ua hiki loa ia makou ke hoolawa aku i ko oukou mau hale pakahi iho ke waihoia mai na kauoha Palaoa ia makou. @ hoao mai ia makou a e hookoia no e like me ke kauoha. Ua hiki ia makou ke hoolawa aku ia oukou me ka Palaoa oi ae ka maikai mamua o ko na wahi e ae.
Maanei pu ka Meaono ame ka Hau ono (Ice cream) ame na Pai.