Ka Nupepa Kuokoa, Volume XLI, Number 18, 1 May 1903 — Page 4
| This text was transcribed by: | Kaui Sai-dudoit |
| This work is dedicated to: | Ia oe e kuu keikikane eha: Hilinaʻiikaponoaupunioumialiloa Sai-Dudoit |
Ka Nupepa Kuokoa
KE KILOHANA POOKELA NO KA LAHUI HAWAII.
4. NUPEPA KUOKOA, MEI 1, 1903.
"Ua hiki iaʻu ke hana i na hana apau e pili ana i keia pepa, a koe wale no ka hoopanee ana i ke paʻi ana i ka nupepa," wahi a Chalmers. "He hiki no nae iaʻu ke hana i kela mea in a ia, he mea e hoomama ae ai i kou pilikia e uhi nei maluna ou."
No keia mau olelo Chalmers, ua pii ae la ka ula ma na papalina o ua kaikamahine nei, a hoomaopopo ae la he pololei na mea apau i kamailioia mai e ke kanaka opio, ka mea hoi a Mr. Van Horne i hilinai ai e noho ma kona wahi.
"O keia ke noi hope loa aʻu e makemake ai e noi ma keia honua," wahi a Miss Carmody me ka haikea ana ae o kona helehelena. "E Mr. Chalmers," wahi a Miss Carmody i hoomau mai ai me ka leo haalulu, "E haʻi aku no au i koʻu mau popilikia apau ia oe e like me koʻu haʻi ana aku ia Mr. Van Horne. Ua kamaaina au ia Mr. Van Horne no na makahiki he loihi. He hele mau oia ma ka hale o koʻu makuakane, a i ka nalowale ana o koʻu makuakane, ua manao au e noi aku e kokua mai oia iaʻu. Ua make koʻu makuahine, a ua ili mai ke koʻikoʻi o keia mea maluna oʻu, ke keiki hookahi a Mr. Carmody. Ke hele mau nei na makaikiu ma ko maua wahi a ua kokoke au e pupule i ko lakou ninaninau mau iaʻu. Ma ka lakou ninau iaʻu, me he mea la owau kekahi mea i komo pu iloko o keia hana e lawe a huna malu i koʻu makuakane. Pela no hoi me koʻu poe hoaloha, kokoke e like ko lakou ino me na makaikiu. Hele mai lakou e haawi mai i ko lakou kaumaha no na mea i hanaia. Ke makemake nui nei au e loaa koʻu makuakane, a aohe hoi he wahi hilinai iloko oʻu i na makaikiu, ame ka lakou mau kumuhana e lawelawe nei."
Ua kuu iho la kana kamailio ana no ka noonoo ana i na olelo kupono e hoopuka aku ai oia no kana kumuhana o ka hele ana mai. Ua hoolohe pono mai la o Mr. Chalmers.
"He piha hilinai koʻu i ka pomaikai o kekahi nupepa e like me ko ka Record ano," wahi a ua kaikamahine nei," a ma koʻu manao ua oi aku ka maikai o hookahi kanaka nupepa maikai mamua o umi-kumamalua makaikiu. He manaoio koʻu aohe e loaa ana i na makaikiu na kanaka nana i lawe a huna malu i koʻu makuakane, he mea oiaio he hihia huna malu keia. He makemake koʻu e waiho i kekahi huina dala me ka Nu Ioka Record, a e hoohanaia aku hoi kekahi o keia puu dala i haawi makana no ka hoihoi ana mai i na kanaka i huna malu ia, a o kekahi hapa hoi, malalo o kau hoohana ana no ia kumu hookahi no."
Ua mino aka iho la o Chalmers, wehe ae la i ke pani o kona pakaukau a haawi mai la ia Miss Marmody i kekahi kope hou loa i paʻiia, a e heluhelu ana penei:
Hookahi Haneri Tausani Dala Makana.
E haawi makana no ka Nu Ioka Record i keia huina Dala no ka Hoopakele ana i na Onamiliona i Nalowale ame ka Hopu ana i ko lakou Poe nana i Huna.
Ua hookomoia aku ma ka Banako Lahui Ekahi he Bila i Hooiaioia no $100,000.
I ko Miss Carmody ike ana i keia mea ua olioli loa kona manao a ua hauoli kona nanaina.
"Eia nae, mai hana oe e like me keia," wahi a Miss Carmody, "Aole he pono ike keia haawi ana ou i keia puu dala nui no ka poe au i maopopo pono ole ai, eia nae, he poe au i ike ai he malama i ke kanawai o ka aina. Ua maopopo no paha ia oe he kanaka waiwai koʻu makuakane. Ma koʻu inoa ponoi he nui ka puu dala i waihoia mai e koʻu makuakane, a he hiki hoi iaʻu ke kii i na wa apau aʻu e makemake ai. He mea pololei, e hoihoi mai no koʻu papa i koʻu mau lilo no ka hoao ana e imi iaia. E ae mai oe e waiho aku au i keia puu dala. He makemake koʻu e haawi makana, ma o ka Record la, he $250,000,000, a e haawi mai hoi kou poe hana i ko lakou kokua ana malalo no nae o kaʻu mau hoolilo ana. E ike no lakou he haku maikai au. He makemake no nae koʻu aole e hoikeia ae keia mea i ke akea. ua hookomo no au i kekahi huina dala no ka imi ana i ka poe nalowale me ko lakou mau ohana, eia nae, aohe oʻu hilinai iki i ka holopono o na hana a na makai, a no ia kumu au e lawe nei i keia alahele. Mai hoole mai oe iaʻu. Mai poina oe i kau olelo i olelo mua mai nei," a i ka pau ana o kana kamailio ana ua pii ae la ka ula ma kona mau papalina, a he ui maoli no hoi kona helehelena.
Aole i maopopo pono o Miss Carmody i ke ano o Mr. Charlmers, a ma kona ano maoli, he kanaka oia e hiki ole ke hoololiia in a ua paa kona manao no ka hana ana i kekahui mea, a ua ikeia keia mea e na mea apau o loko o ke keena o ka record ana e noho poo nei. He mea olioli nona in a i hoopiiia ka makana i hookahi miluiona dala in a no nae he mea hiki iaia ke hana pela. Ua hoao oia e ae mai o Mis Carmody e pono e haawiia i $350,000,000 ka huina o ka makana i $100,000,000 ho na ka Herald a $250,000,000 na Miss Carmody. Ua hoole paakiki loa o Miss Carmody i keia mea, a no ka manawa mua loa o kona ola ana, akahi no oia a rulaia mai e kekahi mea mawaho mai.
"Eia ka kakou mea e hana ai," wahi a Chalmers me kona hoomaopopo pono ana i ko lakou kulana i keia wa. "He nui ko makou poe kokua, aole no nae i lehulehu no ka hana ana i keia apana hana.
E hookohu no au i umi o ko makou poe akamai no keia hana, a e kii ana no hoi au i umi-kumamalua kanaka hou ae mai kekahi mai o na nupepa o keia kulanakauhale. He makaikiu kakau nupepa no hoi kekahi aʻu i maopopo e noho nei ma Kikako, e kii kakou ia lakou. E imi kakou a puni ka aina nei no ka poe akamai loa ma ka oihana makaikiu. Owau ponoi ka mea nana e hoolala na hana, a e hooko aku hoi. E holopono ana no kakou, ua maopopo e puka ana ka kakou hoolala ana."
I ka lohe ana o Miss Carmody i keia mau mea, ua paʻipaʻi ae la oia i kona mau lima no ka olioli ame ka hoihoi. Ua pau ae ia na nanaina o ek kaumaha maluna o kona helehelena. Ua ku koke ae la oia iluna, a haawi aku i kona lima ia Chalmers. Aole keia he hana mahaoi ma ko ke kaikamahine aoao, aka, he hana keia e hoike mai ana i kona mahalo no ka Chalmers mau hoolala naauao ana, a no kona haawi ana mai hoi i kona kokua.
"Maikai maoli oe!" wahi a ua kaikamahine nei me ka hauoli, "Aole he hiki iaʻu ke haawi pono aku i koʻu mahalo ana nou. Ua pololei oe, e loaa ana no o papa ia kakou. O, in a he mea e hiki iaʻu ke hana! Eia nae, e hana ana no wau e like me ka mea hiki iaʻu. E hoike mai no nae oe i na mea apau e hanaia ana, aole anei pela e Mr. Chalmers?"
"Ina oe e haawi mai ana i kou ae, e hana no au i Kelepona no kaua wale no mai keia keena aku a hiki i kou wahi noho," wahi a mr. Chalmers i pane aku ai.
"He manao maikai loa kela," wahi a Miss Carmody, "ma ia hana ana aole wau e iho mau mai i kou keena e hoopau wale ai i kou manawa e like me kaʻu e hana nei ano."
"Mai ae oe e hoopilikia kou noonoo ana no ia mea," wahi a Chalmers me ka minoaka ana ae. I keia manawa he mau hoa hui kaua no ka hana ana i kekahi apana hana, eia nae, e mahaoi aku au i ke noi aku i oe e ae mai iaʻu--ka mea e ku nei ma kahi o Mr. Van Horne--e hele aku e ike ia oe in a he mea pono no ia hana ana i hiki hoi iaʻu ke haʻi aku ia oe i na mea apau loa e pili ana i ka hana, a he mea hoi e hiki ole ai ke oleloia ma ke kelepona."
"He mea makehewa wale no koʻu haawi ana aku i koʻu ae," wahi a Miss Carmody. "Ua noe kou hele ana ae e ike iaʻu i na wa apau e pili ana i ka hana a kaua i kamailio iho nei."
(Aole i pau.)
----------------------------------------
NA ALOHA ELUA
i ka
IPO HOOKAHI.
MOKUNA XLIX
KA SIR KILINETONA HAI AKAKA ANA MAI
I KONA HEWA.
I ka wa o Daisy i wehe aku ai i ka ipuka, ua wehe aku oia me ke akahele loa, a i ka wa i hamama ae ai ua ike aku ia oia i na mea apau e waiho mai ana mamua on a. He wahi luma uuku no keia wahi lumi o Lede May e luana ai i na kakahiaka apau, aka, he uuku nae i muimuiia e ka nani ame ke onaona; he mau ipuka aniani nunui a haahaa kona e hamama ana i kekahi pa hale uuku e pili pu mai ana, ame he mea la i ka hoomaopopo aku i ke ano o na pua apau o loko o ia pa aohe on a kau e pua ole ai, o ka pua mau iho la no ia o ka pua a puni ka makahiki. A ma kahi o ka ipuka aniani ua ike aku la oia i kekahi mau kino elua--o kana kane ame Lede May--e ku ana kana kane iluna me ka nanaina kaumaha maluna o kona helehelena, aka nae, me he mea la aia iloo o kona mau maka e hoike mai ana oia e hoea mai ana kekahi mea iaia e nana iho ana maluna o kela helehelena e huli papu ae ana iluna. E kau iho ana kekahi lima palupalu maluna o kona poohiwi. Me he mea la i ka wa iho mamua ua kamailio aku o Lede may iaia me on a manao kupaa o kona aloha maluna ona. Ai ka wa i hamama ai o ka ipuka ua huli like mai la laua a i elua. Ua nana mai la o Lede May me ka piha pahaohao i keia wahine opio ui e ku aku nei me na maka i piha, i ka inaina.
Ua hooho ae o Sir Kilinetona i kekahi leo uwe uuku. Ua lohe aku laua e olelo ana penei: "E kuu Akua!" alaila, nee iki mai la oia he hookahi kikoo ana imua.
"Daisy!" wahi a Sir Kilinetona i hooho mai ai, "ma ke ano hea oe i hiki mai nei ia nei?"
Ua oi loa mai la ko Lede May nana ana me ka haohao a ua ano puiwa maoli no oia. Owai la hoi keia? Ua nee mai la oia imua no ke kamailio pu ana me Daisy, a nana aku la o daisy i ke kaikamahine loihi me ka helehelena onaona ame ka oiwi kino hiehie, ka mea hoi nona ka lole silika e halii ana iluna o ka papahele.
"Owau anei kau makemake?" wahi a Lede May i ninau mai ai. "O Lede May Terevelina koʻu inoa."
"Ae," wahi a Daisy i olelo aku ai: ʻua makemake au e kamailio pu me oe."
"Daisy," wahi a Sir Kilinetona i hooho hou aku ai, "heaha keia mau ano hana au? No keaha oe i ukali mai nei mahope oʻu a hiki i keia wahi?"
"No ka imi ana i pono kaulike," wahi a Daisy i pane aku ai--"i pono kaulike, aole no ke aloha, aole no hoi no ka hooko ana i ka makemake--aka, ua makemake au i ka pono kaulike!"
Ia wa ua nana aku la o Lede May ia Sir Kilinetona a pau nana ae la ia Daisy me ka piha pahaohao loa? Owai la hoi keia mea i aa mai nei e kamailio i kela mau huaolelo ia Sir Kilinetona--ka mea hoi i hopohopo ole i ka hoopuka ku mai i kona manao? Alaila huli ae la oia a nana aku la i kana ipo aloha. Ua hele ae la kona helehelena a haikea--no ke ano e loa o kona helehelena ua komo iho la ka pihoihoi iloko ona nona. Owai la oia? heaha la keia mau ano hana? Ua ike aku la oia i kana ipo e hoao ae ana e kamailio, aka, aole nae he hiki. Alaila kamailio hou mai la o Lede May, a papa pono aku la kona le i ko Daisy ma mau pepeiao, a huli like mai la laua, a nana iaia.
"Ua makemake oe iaʻu," wahi a lede May i olelo mai ai. "Ua makaukau au i na wa apau no ka luana kamailio pu ana me oe--aohe oʻu hoomanao mai ua ike au ia oe."
"Aole loa oe i ike iaʻu mamua," wahi a Daisy i oleo aku ai. "He malihini au ia oe--a o kuu kane kau i kamaina o Lede Mau Adea au."
Aole hookahi huaolelo mai ka waha mai o ke kanaka i hokaumahaia kona manao.
Ua nana ae la o Lede Mauy iluna me ka nanaina huhu maluna o kona helehelena.
"O Lede Adea oe!"wahi ana i hoopuka hou aku ai i kela mau huaolelo. "E kala mai oe iaʻu, ua maopopo pono no anei ia oe aole kau he olelo kuhihewa i olelo mai nei?"
"Ua maopopo pono iaʻu ia mea me ke kanalua ole," wahi a Daisy i pane aku ai; "a o kuu kane o Sir Kilinetona, aole hiki iaia ke hoole mai ia mea. E ninau aku oe iaia, in a aohe ou manaoio i kaʻu mea e kamailio aku nei ia oe.
"Aohe oʻu manaoio i kau mea e kamailio mai nei,ʻ ʻwahi a Lede May i olelo mai ai. "Ina no oe e hoohiki mai ana aohe no ia he mea noʻu e manaoio aku ai."
"Hoopii ae oe i kau olelo hooholo ia Sir Kilinetona,ʻ ʻwahi a Daisy i olelo aku ai.
Ia wa laua a i elua i huli aku ai a nana iaia.
"Caro," wahi a Daisy i olelo aku ai," e kamailio mai hoi oe--owau anei kau wahine a i ole ia aole paha?"
"Kilinetona," wahi a lede mau i olelo mai ai," e hai mai oe iaʻu in a he mea oiaio keia?"
Ia wa oia i hapai ae ai i kona mau lima iluna a hooho ae la i kekahi leo uwe me ka walania, alaila, hookuu iho la oia ilalo a kau iho la iluna o ke pakaukau, a palulu mai la oia i kona mau maka a paa, a meha pu iho la lakou apau ekolu aohe pane leo. Ua nana aku la a nana mai keia mau wahine opio ia laua iho, o Daisy hoi me ka nanaina huhu maluna o kona helehelena, a o Lede May hoi me ka naau haahaa me he moiwahine la. I ka nana aku i ko laua ano me he mea la e imi hala aku ana a imi hala mai laua i kekahi--e noonoo ana hoi kahi i ka uʻi o kahi iloo iho on a a pela no hoi kahi iloko iho ona. Alaila, me ka mino aka ano hoohiehie ua olelo mai la o Lede May:
"Aia, ike oe aole on a pane mai i kau ninau."
A pane aku la o Daisy: "Aole hiki iaia ke hoole mai ia mea."
"He manaoio koʻu," wahi a Lede mau i olelo mai ai, "ua ano opulepule ia kou noonoo. He manaoio koʻu ua hewa loa oe, ua wahahee a ua koho wale--ua hele lalau na mea apau o ke ao nei--aka, aole loa au e manaoio ana i kekahi huaolelo e kue ana i ka inoa hanohano a hoopono o Sir Kilinetona Adea."
"A noʻu iho," wahi a Daisy i olelo aku ai, ke manaoio nei au i na Lani, aka, he wahi hilinai uuku koʻu no ke kanaka i keia wa a no--e like me Sir Kilinetona Adea. Owau kana wahine; aole hiki iaia ke hoole ia mea."
Alaila, ku ae la ua kanaka la i hoehaehaia kona naau iluna, a hoomohala aku la kona mau lima ia Lede May.
"Aole au e aa ana i ke noi ana aku ia oe e kala mai iaʻu," wahi a Sir Kilinetona i olelo aku ai; "aia kuu hewa mawaho o ka pelena hiki ole ke kala la; aohe aʻu olelo pale kupono e haawi aku ai."
Ia wa o Lede May i nana pono loa mai ai iaia, a olelo mai la oia:
"Aole au e lawe mai ana i ka na poe e ae apau e olelo mai ai iaʻu, aka o kau hookahi wale no e Sir Kilinetona. He oiaio anei ka keia lede e koi mai nei?
"Ae,ʻ ʻwahi a Sir Kilinetona i pane aku ai; alaila meha pu hou iho la no ua poe nei.
"Alaila, he oiaio ia mea!" wahi a lede May i olelo mai ai, ʻhe oiaio io ka ia mea! I kou wa i hiki hou mai nei ia nei, ua manao na poe apau o oe ana kaʻu ipo, a eia ka ua hala mua ka puulena aia i Hilo. E, Kilinetona, he mea hiki ole ia ke hooiaio ia! Ua oi aku ka hikiwawe o koʻu manaoio ana ua wahahee na Lani, ua opulepule ia koʻu noonoo mamua o ka hooiaio ana aku he kipi oe. Aole hiki kela mea ke hooiaio ia!"
"He oiaio ia mea, e kuu ipo aloha, wahi a Sir Kilinetona i olelo aku ai.
I ko Daisy wa i lohe koke ai i kela olelo ua nana ae la oia iluna me na maka huhu.
"Aohe kuleana o kuu kane e hea akuai ia oe, e Lede May, he ipo aloha," wahi a Daisy i olelo aku ai. "Naʻu oia, aole nae."
"Ua pololei oe," wahi a ke kaikamahine opio uʻi i olelo mai ai me ka malie. "He oiaio e Kilinetona--o ka mea oiaio maoli anei kau i olelo mai nei?"
"Na na Lani e kokua mai ia kakou, e May, o ka mea oiaio maoli ia! He kanaka hohe wale au--he kanaka kumakaia. Ke hoonaukiuki nei au iaʻu iho, ke hoopailua pu nei au iaʻu iho. Ae he mea oiaio ia."
Alaila, me ke kamailio ole aku i hookahi huaolelo hou, ua huli aku la o Lede Mau ma kahi e mai ka nana ana mai ia laua. Ua hoi aku la oia ma kahi o ka ipuka aniani kahi hoi ana i ku mua ai me na manao hilinai a pau o ke aloha o na manao kaumaha e like me ka haawina i loaa ai ia Lede May ia wa. Ua kulou hou iho la ko Sir Kilinetona poo ilalo, a palulu ae la no i ko Lede May helehelena kaumaha.
O ka hooilina wahine opio, ka wahine hanohano, ka mea hoi i hoole i kekahi poe kane hanohano o Enelani i noi mai ai iaia i wahine--oia no hoi ka ui Lede May--ua ku malie loa iho la oia me ka ekemu ole, aka, aia nae iloko ona na manao ehaeha like ole e lou ae ana e umili mai ana, a e lalawe ana a puni kona nui kino, a ua oi ae ka walania o ka loaa ana iaia o ia ehaeha mamua o na ehaeha i loaa i kekahi poe wahine e ae--ua oi ae no hoi ia mamua o ka make.
Ina o Daisy he wahine manao ino me nei ua ike pono o Sir Kilinetona i kona hopena--me nei ua kauwale aku oia i na hoahewa ana ame na olelo ino ana maluna ona--a noke aku no hoi i ka nuku iaia. Aole loa oia i hana i kekahi o keia mau ano hana. Ua hooilihia mai ka hana maalea a kana kane iaia; ua hookaumaha ia oia e kana mau hana hoopunipuni; aka, maluna ae o na ehaeha apau, maluna ae no hoi o na manao huhu no ka hoopai ana aku, ua kau mai la mamua on a kona aloha no kona ola makamae. Ua loaa iaia na kumu lehulehu e huli mai ai a pehi i na huaolelo awahia maluna ona, a lehulehu pu no hoi me na hana e ae e hana aku ai maluna on a, aka, ua nana ae hoi oia, o kana aloha hoi ia o kona mau la naaupo, ua hoopepe ia oia e kana mau hana ehaeha, ua hehihehi ia ilalo, hoohaahaaia, a hoohilahila pu ia no hoi. Ua kaumaha loa oia nona iho, aka, ua oi aku nae hoi kona kaumaha, i kona nanaina wiwo, ame kona manao pihoihoi--o ke kumu o kona hoopipili hou ana aku i kana mea i aloha ai he mea la i ike ole ia, a eia nae aole loa oia i hoopuka aku la kekahi mea e pili ana no ke aloha iaia; alaila hoomanao mai la o Lede May, oiai o Sir Kilinetona i huli hoi hou aku ai i Enelani, aole oia i hele aku e imi iaia, aka, oia kai hele mai e huli iaia--oia kai kukuli iho ilalo, me ke apo ana mai o kona mau lima palupalu iaia, a kahea mai la oiai iaia i na ano inea aloha apau ana e hiki ai ke hoomanao; oia ka mea nana i hoao e kaili iaia a lilo loa nana. Malia paha ua manao loa no oia i kona wa e hoi hou mai ai i Enelani aole oia e ike hou ana iaia--malia paha ua manao oia e hookaawale loa ana no oia iaia iho mai iaia mai. Ua hoomanao mai la o Lede May i na wa ana e hoao mau mai ai e hoopukapuka iaia no na la i hala ae aka, ua hoole loa aku oia aohe on a makemake e hoolohe ia mau mea. A mahope komo iho la no ka manao iloko on a nona no ka hewa. I na la mamua, he mea nui oia iaia, a ua aloha maoli no oia iaia, aka, na kana mau hana haakei no a hookiekie oia ka mea nana i hookaawale aku iaia mai iaia aku, a eia oia i keia wa ua lilo hou ae nei iaia. ua hoi hou mai la i on a la na la i hala ae me ka moakaka loa, a ike iho la oia aia no ke koikoi o ka hewa ma kona aoao. Ia wa ua komo mai la kela mano koa iloko ona--a kapae ae la oia i kona mau manao pono ole apau.
Ua haalele iho la oia i kahi ana e ku ana ma ka ipuka aniani a hele mai la oia a hiki ma kahi o Sir Kilinetona. Ua hoopalahalaha mai la oia i kona mau lima imua on a a olelo mai la:
"Kilinetona, noʻu keia hewa, aohe nou."
Ia wa o Sir Kilinetona i nana koke ae ai iluna iaia me na maka li-o.
"E kuu aloha e--!" wahi ana i hooho mai ai me ka leo malie.
"Uoki!" wahi a Lede May i olelo aku ai me ka leo oluolu; "aole oe e pono e kamailio mai i kela mau huaolelo iaʻu--ua kupono la i kau wahine, Kilinetona, noʻu no ka hewa. Nolaila, mamua o ka hooi loa ana aku i ka hewa e hele imua, e pono kakou e lapaau koke ae ia maʻi.
Ua kau iho la ua Lede May la i kekahi lima on a iluna o ke poo o Sir Kilinetona no ka hapa minute, ana i kulou mai ai me ka haahaa imua on a, ame he mea la ua lawe ia aku ke aloha apau oloko o kona puuwai i kela wahi hoopa wale ana aku no ana iaia.
"Kilinetona, e nana ae hoi paha iluna; e lapaau ae kakou i keia hewa apau ae. E hoomanao oe naʻu oe i imi aku--aole nae i imi mai. E kamailio ae au ia Lede Adea."
Ua nana mai la ua Sir Kilinetona nei i ka helehelena uʻi e ku aku ana; ua hoao mai la oia e kamailio iaia; aka aole nae he hiki. Alaila hele aku la o Lede May ia Daisy. Ua haawi aku la oia i kona mau lima iaia me ke aloha, a olelo aku la.
"E pono kaua e kokua ae ia ia nei, e Lede Adea; ua kaumaha loa ia kona noonoo."
U analohia aku ka manao kekeue a me ka hoonaukiuki mai ia Daisy aku ia wa; aole no laua i komo kuhohonu loa iloko o kona naau; nolaila, ma kahi o ia mau makalua, ua komo mai la ke aloha pumehana.
"Aohe no oʻu makemake e hana i ka hana lokoino," wahi a Daisy i olelo aku ai; "aka, ua makemake au e loaa ka pono kaulike--i pono kaulike noʻu a me kuu keiki."
Ua ano kuemi hope iho la ko Lede May manao no ka hapa minute, ame he mea la e umii ia ae ana oia e kekahi eha walania loa a kona helehelena i hoike mai ai.
"He keiki!" wahi a Lede May i olelo ai ai." He keiki anei kau, e Lede Adea.
"Ae," wahi a Daisy i pane aku ai; "he keiki kane uuku kaʻu; aka, aohe aloha o Sir kilinetona iaia; a, aole no hoi ona aloha iaʻu--aohe mea e ae ana i aloha ai iloko o keia ao, aka, o oe hookahi wale no, a aohe ia he hana maikai, aohe no hoi ia he hana pono."
"Ua pololei maoli oe e olelo mai la e like me ia," wahi a Lede May i olelo mai ai; "aohe iʻo no ia he hana maikai, aohe no hoi he hana pono. E loaa ana ia oe ua pono kaulike piha la, e Lede Adea."
Ua uumi malie iho la oia i kona mau manao ehaeha, i kona aloha apau malalo o kona mau kapuai wawae, a e kana wale no e noonoo ana, o ka hana maikai aku i kana mea i aloha ai. Ua ike oia, o ka hana pono ana e hana ai o ka hoolaulea mai me keia wahine opio ui e ku aku nei mamua on a.
"E pono kaua e kokua mai ia ia nei," wahi a Lede May i olelo mai ai me ka leo nui, "ua hele oia a kaumaha loa a ua nui no hoi na ehaeha i loaa iaia."
"ua kaumaha loa oia i kona mare ana iaʻu," wahi a Daisy i olelo aku ai. "Aole hiki iaʻu ke huna iho ia mea, aole hiki iaʻu ke noonoo ae heaha la ke kumu o kona hana ana ia hana.
I koʻu hoomaopopo iho me he mea la, o oe wale no kana i aloha ai."
"Ua aloha maoli io no oia iaʻu," wahi a Lede May i olelo mai ai me ka hunahuna ole. "Owai la hoi ka inoa uʻi aʻu i lohe iho nei i ko kane e kahea ana ia oe--"ua ano haalulu ae la kona leo iaia i hoao ae ai e kamailio--"ua lohe aku nei paha au la i ko kane e kahea ana o Daisy? Oia anei kou inoa?"
"Ae," wahi a Lede Adea i pane aku ai, "o Daisy koʻu inoa."
"Nolaila, e Daisy," wahi a Lede May i olelo mai ai, "e pono kaua e lilo i mau hoaloha, aole hoi i mau enemi. Aole anei oe e hele mai ana me aʻu ma kekahi wahi i hiki iaʻu ke kamailio aku ia oe? He nui loa kaʻu mau mea e makemake nei e kamailio aku ia oe. E hookaawale kaua mai ia Sir Kilinetona mai, i hiki ia kaua ke kamailio e pili ana nona me ka holo lea--he mea hoi i hiki ole ia kaua ke kamailio ae mamua o kona alo."
"Ua ae au e hele pu me oe ma na wahi apau au e olelo mai ai," wahi a Daisy i olelo aku ai.
Ua hoomaka mai la o loko o kona naau e aloha i keia wahine ui i like loa kona leo me ka leo nahenahe o kekahi mele. Ua hele aku la oia a ma kahi o kana kane e noho ana a kau aku la, oia i kekahi lima on a maluna o kona poohiwi.
"Caro," wahi ana i olelo ai, "ua huhu anei oe iaʻu?"
"Aole," wahi a kana kane i pane mai ai me ka leo uuku; ʻmalia paha o ka oi iho la ia o ka hana maikai. Aole au i huhu, e Daisy. Ua ike no na Lani aohe wahi hakahaka i koe iloko o koʻu naau no kekahi mea e ae, aka, no ka hilahila wale no."
Me ka hoopuka hou ole ia i mau huaolelo hou, ua haalele iho la ua mau lede la a i elua i ka lumi a puka aku la iwaho, me ka haalele ana iho ia Sir Kilinetona e noonoo i kona mau manao a pau me ke akahele.
(Aole i pau.)
----------------------------
Moolelo o ka Ahahui o ka Mokupuni o Kauai.
--------
Halawai ma ka luakini o Lihue, Kauai, i ka hora 9:30 a.m. Aperila 10, 1903.
Malamaia ka manawa haipule, noho mai ka Peresidena H.K. Kahele, ame ke kakauolelo S.W. Kauanoe.
Na hoa i hiki mai, Waioli, S.W. Kauanoe, K.K.S; S.U. Kaneole Elele, Koolau, G.W. Mahikoa, K.K. S, a oia no ka elele; Kapaa, Iosua Kapea elele, Lihue Mrs. Rice, K.K.S.W. Ellis elele; Koloa, D. Kapahee, Elele; Hanapepe, J.K. Maliekai Elele; Waimea, G.L. Kopa, Elele. W. Ellis K.K.S.N. o Kauai Komohana ame na hoa o ka Aha Makua, koho ka Peresidena i na komite. 1 komite no na hana hou, J.M. Lydgate, E.S. Timoteo, ame J.B. hanaike. 2. Komike o na palapala J.B. Kahaleole, I.K. Kaauwai ame S.K. Kaulili, ma ke noi a J. Kakina, e lilo na hoa e ae i mau hoa kuka, aponoia.
Koho ana i na Luna Nui o keia Aha. 1. Koho ana i ka Peresidena, lokahi ka hale ma ke apono ana i ke kakauolelo e hookomo i hookahi Balota, no H.K. Kahele, i Peresidena. Aponoia 2. Koho ana i ke K.K.O. Elua inoa i waihoia mai W. Ellis ame S.W. Kauanoe; Ma ka balota ana, ua koho hou ia o S.W. Kauanoe i kakauolelo.
Hoike mai ke komite o na hana hou 1. Lulu o ka waihona nui o ka Pae aina 2. E kohoia i hope kahu Kula Sabati Nui, 3. Na Kula Sabati o na lahui e, 4. Ka lulu no ke Kia hoomanao, o G.B. Meheula, 5. E noiia ka Ahahui K.S. o ka Paeaina, e noho ma Kauai nei, i ka M.H. 1904, 6. Na hana hoeueu, 7. Koho ana i na elele, ame na omite a keia Aha i ka Aha Pae Aina., 8. Kula hanai, 9. Koho ana i na K.K.S.N. ame na hope, 10. Hooponopono Kumukanawai ame na Rula. 11. Na olelo hoalohaloha, 12. Kahi ame ka wa e halawai hou ai keia Aha. Aponoia ka hoike a ke Komike.
Na hana kumau o keia Aha.
Na ke K.K.O. i heluhelu ka Hoike a ke K.K.S.N. o Kauai, Hikina a na W. Ellis K.K.S.N. o Kauai Komohana, i kana hoike, na S.W. Kauanoe i kana hoike papa helu o Waioli. Noi mai o G.L. Kopa, e kapae i ka rula 11 aponoia. Na G.W. Mahikoa i kana hoike Papa helu o Koolau.
Na ke K.K.O. i heluhelu na hoike papa helu eha ko Kapaa, Koloa, Hanapepe, ame Waimea. Na Mrs. Rice i kana hoke papa helu no Lihue, waiho ia ma ka lima o ke komite o na palapala. Na S.U. Kaneole i kana hoike elele no Waioli, na G.W. Mahikoa i ko Koolau, na Iosua Kapea i ko Kapaa, na W. Ellis i ko Lihue, na ke K.K.O. i ko Koloa, na J.K. Malie i ko Hanapepe, ame G.L. Kopa i ko Waimea, waihoia i ke komike. Kumuhana 1. Lulu o ka waihona nui o ka Pae Aina kauoha ka Peresidena i na Kula Sabati apau, elua dala pakahi. Aponoia Loaa haawi ia J.M. Lydgate. Kumuhana 2. E kohoia i hope K.K.S.N. aponoia, e waiho a hiki i ke kumuhana. 9. Kumuhana 3. Na Kula Sabati o na lahui e. Na E.S. Timoteo he olelo hooholo, hooholoia, mamuli o ke ala ana mai o na lahui e iloko o na hana Kula Sabati; nolaila, e pono no e hoohuiia mai lakou me kakou, ma ke ano, he elele i keia Aha, me na hoike pakahi mai a lakou mai aponoia. Nana mai no e hoomaha ka hale a ka hapalua hora 1, me ka pule a Kopa.
Auwina la hora 1:30 p.m. hoomaka hou na hana me ka pule a ka Peresidena.
Kumuhana 4. Ka lulu Dala no ke kia Hoomanao o G.B. Meheula. Na J.M. Lydgate i hoakaka mai no na dala i loaa ma kona lima he (27.00) nui na hoa i kamailio. Aponoia e hoomauia no ia komite. Waiho mai o Timoteo he Olelo hooholo. Hooholoia. Oiai ke kamailio nei kakou no ke kia hoomanao o Meheula, nolaila, e wehe keia Aha i Aha Mele lulu Dala no keia hana a o na loaa e lilo no keia hana ame kekahi mau haawina e ae.
Mai a iaia mai no e kohoia i komite na lala, Timoteo, Kaulili, ame Kapahee aponoia. Kumuhana 5. E noiia ka Ahahui Kula Sabati o ka Pae Aina e noho ma Kauai nei, i ka M.H. 1904. Aponoia. Noi mai o Timoteo e hoomana ia ka Peresidena e hana i palapala noi i ka Ahahui Pae Aina o Iune nei. Aponoia.
Kumuhana 6.--Na hana hoeueu. Na Timoteo i hoakaka mai i kekahi mau hana hoeueu, ame kekahi mau hoa e ae. Kumuhana 7. Koho ana i na elele a me na KOmike i ka Aha Pae Aina.
S.U. Kaneole, komite o na hana o ka aha o W. Ellis komie o na palapala.
Ka uku moku o na elele e loaa no ia mailoko ae o ka loaa o ka Aha Mele aponoia. He $15.00 pakahi ka uku moku o na elele. Noi mai o J. Kakina e hoolawa like ia no na K.K.S.N. na K.K.S. apana e hele ana i ka Ahahui. Pakui mai o J.M. Lydgate oia ka puuku malama i na Dala i loaa mai ke komite huli dala mai, no na elele, na K.K.S. ame na kahu kula Sabati apana. Aponoia.
Kumuhana 9. Koho ana i na K.K.S.N., a o G.W. Mahioa kona hope no Kauai Hikina. Kohoia o W. Ellis K.K.S.N. a o D. Kapahee kona hope no Kauai Komohana. Aponoia. Kumuhana 10. Hooponopono Kumukanawai ame na Rula. Aponoia, e waiho ma ka lima o ke komite, H.K. Kahele, Kaulili ame Kaauwai. Kumuhana 11. Na Olelo Hoalohaloha. Noi mai o Emerson i elima lala o ke komite hoalohaloha, Timoteo, Kopa, Kaulili, Kahele ame Kauanoe, a haawi aku i na hoomaikai aloha a keia aha ia Mrs. J.B. Atherton me ka ohana, a o kekahi kope iloko o ka Nupepa Kuokoa. Aponoia:
Na J.B. Kahaleole komite o na palapala i kana hoike aponoia.
Noi mai o Timoteo e hoopanee keia Aha, a ka pule ekolu o Okatoba, ma Lihue. Aponoia. Heluhelu ia ka moolelo a aponoia. Hookuuia me ka pule a ka Peresidena.
S.W. KAUANOE,
Kakauolelo.
-------------------------
KA IUBILE O KA HOOMANA NAAUAO.
-----------
E oluolu mai e ka Lunahooponopono o ka Nupepa Kuokoa. Ma ka la 16 o Apr. 1903, hora 10 a.m. ua akoakoa ae he anaina nui o na hoahanau o keia Hoomana ame na makaikai, ma ka luakini o Kealaula o Kamalau, no lakou ka nui i aneane e piha ka eono haneri, no ka hoolohe ana i ka moolelo o ka Hoomana mai ka mahele mua o na hana a ka mahle elua.
I ka manawa i heluhelu mai ai ka Makua Rev. J. Kekipi i ka moolelo o keia ekalesia e Hoomaka ana mai ka la 16 o Aperila A.D. 1853, a hiki i ka la 16 o Aperila 1903, ua piha iho la ke kanalima makahiki o kona ku ana maluna o keia Paeaina ma ka poohiwi ponoi o ke kanaka Hawaii, he ku maoli no i ka makemake na hana i hanaia.
Ma keia la, a ma ka ke Sabati o ka la.
--------------------
Ka Hui Banako Hoahu Malama Dala o Hawaii.
(KAUPALENAIA.)
--------
Huina i hoahuia $250,000.00
Peresidena Kikiia Baraunu
Hope Peresidena W.P. Robikana
Puuku W.G.Cooper
Keena Hana Nui:
Alanui Papu, kokoke i Alanui Kalepa.
Keena lala ma Hilo, Hawaii.
E lawelawe ana i ka Oihana Banako Hoahu Dala ma Honolulu a me Hilo
E laweia mai no na huina hoahu me ka haawiia o na ukupanee no na hoahu makahiki ma ka huina o 4 1/2 pakeneta no ka makahiki. E loaa no na Rula a me na hooponopono ana ke ninau ae ma ke Keena Hoahu.
2828-1yr.
----------------
KAUKA T. MITAMURA
Alanui Kukui Ololi Helu 68, Honolulu.
Na Hora Hana:
Hora 8 a 10 kakahiaka; hora 1 a 3 ame hora 6 a 7:30 p.m. Sabati: Hora 6 a 8 p.m.
Telepone White 152. P.O. Box 842.
-----------
KAUKA GEO. W. BURGESS,
Keena hana ame kahi noho Helu 240 S. Alanui Moi,--10 a.m. a 3 p.m. ame 7 p.m. na hora hana.
Telepone--Main 128.
--------------------------
KAUKA GEO. J. AUGUR
--------
Keena Hana 431 Alanui Beretania.
Telepona Hleu 1851. Hora Hana 10-12 a.m., 3:30--10:30 a.m.
-----------------
D. KALAUOKALANI, JR.
Loio ma ke Kanawai me T. McCants Stewart
Loea ma ke Kanawai
Halepohaku o McIntyre, kihi o Alanui Papu ame Moi.
Pahu leta 569 Telepona 181 Honolulu.
T.H.
------------
LEWERS & COOKE
LUI A ME KUKE, Kaupalenaia
Na Mea Hookomo mai a Kuai aku i na
LAKO HANA HALE
O Kela ame Kena Ano.
Malaila e loaa ai na mea malalo iho:
-------------
NA PAPA N.W., NA PAPA HOLE, PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.
NA PENA LIKE OLE AME NA HULU PENA, NA ANIANI, NA PEPA HALE, PALE PUKA ANIANI, MOENA, ETC.
O na kauohba pono hale apau loa e hiki mai ana ia makou e hooko koke ia no me ka eleu ame na KUMUKUAI HAAHAA LOA.
LEWERS & COOKE
-----------
Bro. Benjaminʻs Herbalo
HE MAIKAI NO!
E hoola no ia oe--E hoao. Ke kuai ia nei e
HOBRON DRUG CO.
Alanui Papu : : : : Honolulu, T.H.
------------------------
19 ae no, ua malamaia he Ahaaina Berena Iubila, a oiai oia ka mua loa o na hana Ahaaina i malama ia no ka Iubile, a ma ia po iho hora 7 p.m. ua malamaia ka hoike kula Euanelio Iubile, a he ku iuka nani na hana o na Kula Euanelio i malamaia ma ia po mawaena mai o na Papa Kula Euanelio i hoikeia. E hoomanao aku i ka Haae Maikai i mea e ulu nui ai ka oiaio o ka ekalesia o ka Hoomana Kristiano Naauao.
Kekahi Makaikai Iubile.
J.K.