Ka Nupepa Kuokoa, Volume XLI, Number 31, 31 July 1903 — Page 3
This text was transcribed by: | Inger Hojfeldt |
This work is dedicated to: | Daughters of Hawaii |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, IULAI 31, 1903. EKOLU
HOOLAHA KUMAU
Ka Hui Banako Hoahu Malama Dala o Hawaii
(KAUPALENAIA.)
-a
Huina i hoahuia $250,000.00
Peresidena Kikila Baraunu
Hope Peresidena W.P. Robikane
Puuku W.G. Cooper
Keena Hana Nui:
Alanui Papu, kokoke i Alanui Kalepa
Keena Lala ma Hilo, Hawaii.
E lawelawe ana i ka
Oihana Banako Hoahu Dala ma Honolulu a me Hilo
E laweia mai no na huina hoahu me ka haawila o na ukupanee no na hoahu makahiki ma ka huina o 4 ½ pakeneta no ka makahiki. E loaa no na Rula a me na hooponopono ana ke ninau ae ma ke Keena Hoahu.
2828-1yr.
KAUKA T. MITAMURA
Alanui Kukui Ololi Helu 68, Honolulu.
Na Hora Hana:
Hora 8 a 10 kakahiaka; hora 1 a 3 ame hora 6 a 7:30 p.m. Sabati: Hora 6 a 1 p.m.
Telepone White 152. P.O. Box 842
LEWERS & COOKE
LUI A ME KUKE, Kaupalenaia
Na Mea Hookomo mai a Kuai aku
i na
LAKO HANA HALE
O kela ame Kena Ano.
Malaila e loaa ai na mea malalo iho
NA PAPA N.W., NA PAPA HOLE PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.
NA PENA LIKE OLE AME NA HULU PENA, NA ANIANI, NA PEPA HALE, PALE PUKA ANIANI MOENA, ETC.
O na kauoha pono hale apau loa e hiki mai ana ia makou e hooko koke ia no me ka eleu ame na KUMUKUAI HAAHAA LOA.
LEWERS & COOKE
KAUKA GEO. J. AUGUR
Kauka Kuluwai Liilii.
LAAU MOMONA AOLE MULEA
Keena Hana 431 Alanui Beritania. Telepona Helu 1851. Hora Hana 10-12 a.m., 3-4 ame 7-8 p.m.
Sabati 9:30-10-30 a.m.
JOHN M. KEA.
He Notari no ka Lehulehu; he mea hana i na Palapala Kanawai, a he mea huli i na kuleana aiaa. O na kauoha mai na mokupuni mai e hookoia no me ka pololei.
Keena Hana: Ma ka Loio Kuhina, Hale Mana Hooko.
Honolulu, Mei 22, M.H. 1903.
Ua Hiki ke Holo i Luna Kalana
I ka hoopanee ana iho nei o keia kau ahaolelo, ua hoopuka ae kekahi mau hoa he makemake ko lakou e holo i mau luna kalana, a ma ka oleloia, aia ma Oahu nei he eha mau hoa ahaolelo i manao e holo i mau luna kalana.
Mamua o ka hoopanee ana iho nei o ka ahaolelo, ua loaa mai he manao mai ke Keena Loio Kuhina mai o ka Teritori i na lala o ka ahaolelo e olelo ana ua hiki no ia lakou ke holo luna kalana. Ua huna malie na hoa i keia manao.
Ma ka Pauku 16 o ke Kanawai Panalaau, ua oleloia "Aole e hiki ke koho ia kekahi lala o ka Ahaolelo iloko o ka manawa i kohoia ai oia e hookohuia a e kohoia paha ma kekahi oihana o ka Panalaau o Hawaii, a maluna o keia pauku i manao ai o kokua Loio Kuhina Weaver, ka mea nana i kakau ka manao, e kuhikuhi wale ana no keia pauku no na keena oihana o ka Teritori, a aole hoi i komo ma keia manao e pili ana i ke aupuni kalana, a maluna o keia manao i manao iho ai na lala o ka Hale ua hiki no ia lakou ke holo i mau luna kalana.
Aole i like ko Kiaaina Dole manao me ko ke Keena Loio Kuhina maluna o ka manao o keia pauku, a no keia like ole ke kumu i noiia aku nei o Loio Kuhina Knox o Amerika Huipuia e waiho mai i kona manao maluna o keia mea.
Aohe i loaa mai ka pane maluna o kela mea i kel a wa, eia nae, ke hoomakaukau nei no ua poe lala ahaolelo @ no ka holo luna aupuni kalana.
-HE MOOLELO NO-
RODERIKA O KILADEA
KA NAITA KUPAA MAHOPE O KA MEA ANA I ALOHA AI.
-:AME:-
KATE MAKAMURAGA.
KA UʻI NOHEA A HOOILINA OIAIO O KALELOGA.
(Unuhiia e S.K. Nawaa.)
MOKUNA III.
Ia Hiu no e kamailio ana, ua ike ia aku la kekahi lio me kona mea hooholo e holo mai ana, a iloko o ka wa pokole ua ku koke ae la na koa iluna. Ua ike koke aku la o Roderika i ka mea hoohololio he kanaka Pelekane, nolaila ua hele aku la oia me ka awiwi no ka halawai ana me ia.
"Ma ka inoa o ke Akua ola mau loa," wahi a ke kanaka hoohololio iaia i kaohi mai ai i ka holo o kona lio, "owai oukou?ʻ
"Mai Kiledea mai nei makou," wahi a ka opio i pane aku ai.
"Alaila, o oukou ko makou mau hoaloha. Ke mano nei wau o Sir Roderika keia, ke ole no nae hoi e hoike hewa mai ko'u mau maka i ka'u mea e ike nei."
"Ua pololei oe, e ka hoaloha. Ua loaa ae ia makou ka lohe eia o Baraina Duna ke imi mai nei i ko kakou mau ola, a ua hele mai nei makou e halawai aku me ia."
"Ma ka inoa o na lani, mai hookaulua hou iho. Ua kokoke mai ua mau powa la, a malia paha ua hiki ae nei lakou i kahi e noho la na kanaka no ka malama ana i ko lakou mau ola. Ua loaa mai ia makou ka ike no ka hele ana mai o keia mau powa, mai kekahi mai o ko makou kanaka i noho iloko o ka ululaau i keia po."
Me ke kali hou ole iho, ua kauoha koke ae la o Roderika i kona mau koa no ka nee ana aku, a holo aku la no hoi oia mamua o lakou. He elua wale no mile mai keia wahi aku a hiki i St. Anaru, a ia lakou i hiki aku ai maluna o ka puu e huli ana a nana aku ia St. Anaru, ua ike koke aku la lakou i ka hoea ana mai o kekahi kaoo nui o na kanaka hihiu mai loko mai o ka ululaau, a mai kekahi aoao mai hoi e huli pono mai ana i o lakou nei. O keia no na kanaka o Baraina Duna, a e hele ana ua alakai la o na powa mamua o kona mau kanaka me ka hiehie nui. Ia lakou e hele mai ana e uaua ana lakou me na leo nui no ka holopono o ka lakou mea e manao nei, me ka ike ole mai eia ka mea nana e hoopuhili aku i ka lakou mau hana pakaha.
"E hoomaikai ia ke Akua, ua hiki mai kakou i ka wa kupono," i hooho ae ai o Roderika me ka unuhi pu ana ae i kana pahikaua, a hoomalo mai la no hoi oia i ke kaula kaohi o kona lio no ka hoomakaukau ana e lele kana aku i na enemi. "E na kanaka o Kiledea, aia ka enemi i ike ole ia mea he aloha. E hoomanao ia Dunamoa!"
"No ke Akua ame Kiledea!" i hooho like ae ai na koa o Roderika, a holo aku la lakou me ka mama nui me ka wehe ana ae i ka lakou mau kakaka ame na pua no ka pana ana aku maluna o na enemi.
MOKUNA IV.
NA PAIO O WELA KA HAO.
"He aloha o Kaneana, ka home o makou,
Makuekue ka moena, pililakeke ka uluna.
Oni aku no oni mai, pupu hoolei loa,
Ka wehena mai a ke ao, ike ia ke alaula."
I na powa i nee mai ai ua makaukau maoli no lakou e hooko i ka lakou mau hana menemene ole i manao ai e hooko aku maluna o na kupa o St. Anaru, aka no ke ku pale ana mai i ka kakou koa opio me kona mau kanaka, ua hemahema lakou. Iloko no oia ike ana o Baraina Duna i kona hemahema, aole oia i hoopau iho i kona manao no ka lele kaua ana aku i na kamaaina o St. Anaru, oiai ua piha kona puuwai me na haawina makona, a e like me ia manao paa ana ona, pela oia i hoonohonoho iho ai i kona mau kanaka no ke ku pale ana aku.
"Aole wau i manao mua e hoea mai ana keia kuia," wahi ana i pane aku ai i kona mau kanaka iaia e hoonohonoho ana ia lakou ma ko lakou mau wahi pakahi iho no ke ku pale ana mai i ka kakou koa opio. "Ke manao nei wau aia kekahi mea nana i hoike aku i ko lakou hele ana mai. Aole no nae hoi oia ka kakou e noonoo ai i keia manawa. Aia ke hele mai la o Roderika o Kiledea, a aole hoi i oi aku ka nui o kona mau kanaka mamua o ka hookahi haneri. Mai maka'u oukou i kela mau lio e kuu mau keiki. E kau aku i ka oukou mau ihe imua, a e hookuu aku ia lakou e holo mai iloko o ka oi o ka oukou mau mea kaua. He elua ia hookahi ko kakou kulana, a ina kakou e ae aku ana e lanakila lakou maluna o kakou aole loa e loaa ana ia kakou ka pono. O ka mua e pepehi kakou i keia mau Nomana-Saxona, alaila e nana aku kakou i ka kakou mau mea e manao ana e lawe mai mai na kamaaina o keia wahi. Ina kakou no ka make, maanei kakou e haulehia ai e like me ka poe koa, e aho ia mamua o ko kakou make ana i ka pololi."
I keia manawa ua hoomakaukau ae la o Roderika i kona mau koa ma ke kukulu ana aku i iwakalua o kona mau koa mamua, oiai ke koena iho e nee aku ana ma ke kulana poepoe me ka lakou mau mea kaua me ka makaukau e lele kaua aku i ka wa e mahae ae ai na powa. Ua aneane aku i ka hookahi haneri ka nui o na powa iloko o ka laina hookahi, a ke nee mai nei lakou iloko o na laina paa elua, me ka makaukau me ka lakou mau ihe loihi e ku pale mai i keia hoonee kaua a ko kakou koa opio; aka ua loaa iho la ia lakou na manaolana poho. Ua hoaahuia na lio o na koa o ka kakou naita opio me na kapa kila, a ua hoonaauaoia lakou ma ka lakou hana o ke kaua, nolaila ua holo aku la lakou iwaena o na powa a maheleia ae la ko lakou mau laina paa iloko o na mahele elua, hookahi ma ka aoao akau a hookahi ma ka aoao hema. I ka wa koke no i mahae ae ai o na enemi, oia no ka manawa i lele like aku ai na pua a na koa o ka kakou naita opio. No kekahi manawa ke ku ana mai o keia mau powa e paio, aka aole i lawa ko lakou ikaika no ka paa ana iho i ko lakou mau kulana, nolaila ua puhee aku la kekahi poe o lakou iloko o ka ululaau.
I kinohi no ua kau aku la na maka o Roderika ma kahi a Baraina Duna e alakai mai ana i kona mau kanaka, a i ka wa i loaa ai iaia ka manawa kupono, ua imi koke aku la oia no ka paio ana me ke alakai o na powa. Ua ike iho la oia ua kaa mai la ka hanohano o keia hooili kaua ma kona aoao, a oiai o Hiu e alakai ana i kona aoao hema, ua komo koke mai la ka manao iloko ona e hoopau ae i ke kumu o ke ino ma ka pepehi ana aku i ke alakai nui o na powa, a oiai no hoi o Baraina no ka mea nana e hana mau nei i na hana hoomainoino, he mea pono e hoopau ia kana hana ma ka pepehi ana aku iaia.
Aole i loaa aku keia ike i ke alakai o na powa no ka manao o ka kakou opio, aole no hoi oia i makemake e halawai me ka kakou opio. I kona wa i ike ai na hoopuehu liilii ia kona mau kanaka, ua ku ae la oia ma kahi e hiki ai ia Roderika ke ike aku iaia. Aia oia ia manawa iluna o ka lepo, a o ka mea kaua wale no me ia he wahi pahikaua oi lua. Ua ku ae la oia ma ka aoao o kekahi kumulaau oka, a kukulu iho la oia i kana pahikaua ma ke kumu o ka laau, a hopu iho la oia i kekahi pahikaua pokole a paa iho ma kona mau lima, a i ka wa i kokoke aku ai ka kakou naita opio, oia no kona wa i wala mai ai i kana pahikaua pokole. Aole oia i kaulono aku i kona pahikaua maluna o ka opio, aka ma na wawae o ka lio, oiai ua maopopo iaia ina oia e hana ana pela e alo ana ka kakou opio; aole hoi oia i kaulono aku i kana pahikaua no ka umauma o ka lio oiai ua paa ia wahi i ke kapa kila. I ka wa i lele aku ai o ka pahi, ua lele pololei aku la ia a ku ana ma na ami o ka wawae, a mamuli oia kumu ua hiki ole i ka opio ke nee aku me kona lio imua, a ua lele koke iho la oia ilalo a nee aku e hui me kona hoa paio.
"Ano, e Roderika o Kiledea," wahi a Baraina me ka lalau ana iho i kana pahikaua, "ua like alike ko kaua kulana i keia manawa, a maanei hoi kaua e ike ai i na mea o kaua e lanakila ana. Ke manao nei wau ua lawa kou hoohaulehia ana i ko'u mau kanaka."
"Mai hoopau i ka manawa ma ka aolelo," wahi a ka opio i pane aku ai oiai aia ka uwila iloko o kona puuwahi kahi i ume ai i na olona o kona mau lima.
"E hana ia aku no e like me kou makemake, e ka opio. E hoolohe mua mai no nae hoi oe i ka'u mau olelo; ina he mau kauoha kau e makemake ana e haawi ia aku i kou ohana, o ka manawa kupono wale no keia."
"Aid a hiki mai ia manawa alaila oia ko'u wa e haawi aku ai i ka'u mau olelo. E hai aku no wau i na wahine ame na keiki o St. Anaru, ua pepehi aku wau i ko lakou enemi ino loa."
"Ha! pela anei oe e hai aku ai? Ina pela, ma ka inoa o na mea hemolelo loa, eia mai!"
He oiaio ua ike iho la ka opio ua oi pakela aku na olona o kona hoa paio mai kona aku a pela no hoi me kona mau iwi, aka ua hilinai iho la oia maluna o kona makaukau oia ka mea nana e hoohaulehia i kona hoa paio. Ua huikau ae la ka laua mau pahikaua, a mahope o na hauna pahi o elua manawa, ua nee aku la o Baraina Duna i hope, me ka pane ana mai:
"Ua makaukau kau lawelawe ana i kau pahikaua, e kuu opio."
Ua mino aka iho la o Roderika, a nee koke aku la oia imua no ka lawe ana ae i ke kahua i haalele ia iho la e kona hoa paio. He ekolu manawa a Baraina i ku mai ai a he ekolu no hoi manawa i nee aku ai i hope,a o ka hope loa ua hiki aku la oia ma ka'e o ka ululaau, a maanei oia i ku iho ai no ka ha o ka manawa a paio mai i ka kakou opio.
"E ka hoohewale!" i hooho ae ai o Roderika, "ke hoao nei oe e holo aku mai ia'u aku. Ina oe he kanaka makua, e ku mai a paio."
"Ke koho nei wau i ko'u kahua, e Sir Roderika. Ha! eia keia kumulaau ma ko'u wahi." Me keia mau huaolelo, ua lele aku la ua powa la a mamao mai kahi aku ana i ku mua ai, a pane mai la i ka opio:
"Ano, e ke keiki, ina oe e makemake ana e make, maanei kaua e paio ai."
Me ka loaa ole o ka noonoo i ka naita opio e hana ia mai ana kekahi hana apiki maluna ona, a ua noonoo iho la no hoi oia aole i lawa ka ike o keia powa e paio mai ai iaia, ua lele koke aku la oia imua a hoomau aku la i ka paio ana. Ua hoomaka iho la keia e haawi pau i kona makaukau, a o ka manawa hoi ia ana e ike ana ua hiki mai ka manawa e haawi aku ai i kona enemi i ka manawa hope loa nona e ola ai ma keia ao mauleule, ia manawa no ua hookuu iho la oia i kona lima ilalo mamuli o ka uhiia ana iho o kona poo me kekahi lole a nalo aku la ka ike a kona mau maka. Ua huki koke ia iho la oia a hina ana ilalo, a hooikaika iho la no hoi oia e hemo mai na umii ana a kona mau hoa kimopo, aka aole i lawa kona ikaika e hakoko aku ai me kona mau enemi. Ua nakinakiia iho la kona mau lima, a ua hoopaa loa ia iho la ka lole iluna o kona poo a me keia ano iho la i kaikaiia aku ai ka kakou opio e kekahi mau kanaka kino ikaika. Ua hoopiha ia iho la ko ia nei waha i ka lole, nolaila aole i hiki iaia nei ke kuhea aku i mau kokua nona. Ma ke ano o ka hele ana a na mea nana oia e lawe ana ame ka ooi mau mai o na lala laau i kona mau papalina, ua hoomaopopo iho la keia eia oia ke lawe ia nei noloko o ka ululaau. Ua hiki no iaia nei ke lohe aku i ka haluku mai o na mea kaua a kona mau koa, eia nae ua koliuliu loa mai kona wahi e lawe ia nei. Ke hoomaopopo pu la no hoi keia ma ke ano o ka haluku ana e lohe nei, eia kona mau koa ke uhai nei i ko lakou mau hoa paio, a on ia mea aole lakou e noonoo koke ana no ko lakou alakai opio a hiki i ka wa e pau ai ka paio ana.
Ua hoomau aku la lakou nei i ka hele ana no hapalua hora, a ia manwa i komo hou mai ai he eha kanaka no ke kaikai ana iaia nei. Ua hoao ae la o Roderika e haawi i na hoailona e hoike aku ana e wehe ia ae kona puloulou, aka aole he nana mai o kona mau enemi i kana mea e makemake nei. Ua hoao iho la oia e pekupeku i kona mau wawae, a ike iho la oia he mea makehewa ka hana ana pela oiai ua oi pakela aku kona umii ia e ka poe nana oia e lawe nei.
Mahope o ka hala ana he hookahi hora ma ka hele awiwi ana ua hookuuia iho la ka kakou naita ilalo o ka lepo, a wehia ae la kona puloulou. Ike iho la oia ua hiki aku lakou i kahi o kekahi punawai e hoopuniia ana e na pali kiekie, a e ku poaipuni ana hoi na kanaka he umi a oi o ko Baraina Duna mau koa; he poe nanaina hihiu wale no apau loa.
"Well, e Sir Roderika, ke ike nei oe i ka loli ana o ka poino ma kou aoao," wahi a Baraina i pane aku ai i ka opio me ka nana ana aku maluna o ka opio me kona mau maka huhu.
"Ke ike nei wau ua kimopo ia mai wau a ua fulu mai no hoi oe ia'u."
"Aole pela, e kuu hoa opio. Ke ae aku nei wau ua hana wau i ka hana kimopo no ko'u makemake e hopu pio aku ia oe. Ua ike no wau e huli mai ana oe ia'u, nolaila wau i hana ai i mea nou e paa ai. Ke hai aku nei wau ia oe, ua pakele wale no kou ola no ko'u makemake ole e make oe. He nui na manawa a'u i hiki ai ke mahele hapalua iho i kou poo, aole no nae wau i makemake e hana aku pela."
"Pela anei?" wahi a ka naita i ninau aku ai me ke ku awiwi ana ae iluna.
"Ae."
"Ina oe he koa oiaio e pono ia oe e hooiaio mai i kau mau olelo. E wehe ae i ko'u mau lima a e haawi mai i pahikaua na'u. Aole he poe nana e keakea mai ia kaua koe wale no kou poe kanaka. E ae mai ana anei oe i keia?"
"Aole maanei-aole hoi i keia manawa," wahi a Baraina i pane aku ai me ka luliluli pu ana mai o kona poo. "Aole wau i mano e hopu pio aku ia oe no kekahi kumu ole. He manao ko'u i nana ai i keia hana a aia a hooko ia ua manao la o'u, alaila noonoo ae wau no ka pepehi ana ia oe."
"Malia paha e hai mai ana oe i ua manao la ou."
"Aole i keia manawa, e Sir Naita. Ehiki mai ana ka manawa au e ike ai. Ke lohe nei wau i ka hele ana mai o ko kakou mau lio, a ke ike nei wau ke kokoke loa mai nei lakou. E ike ana oe i ua manao la o'u, e kuu keiki koa lua ole, i keia manawa nae e pono ia oe e ae mai e noho i pio na'u."
Aole i luliluli iho ai kona poo, ua hoea mai la kekahi poe maluna o na lio, a oiai ua ike aku la oia i kekahi o keia poe ma ke kahua kaua, ua ike iho la keia, ua hele mai keia poe powa a maloko o ka ululaau waiho iho i ko lakou mau lio a hele wawae aku no ka lele kaua ana aku ia St. Anaru.
"A, Kanakuka," i hooho ae ai o Baraina i ka wa i hoea mai ai ke alakai o na kanaka i lawe mai ai i na lio, "pehea ka paio i keia la?
"Aole i loaa mai kekahi poino ia makou i ka wa a makou i haalele aku ai i ke kahua kaua, aka ua oi aku ka nui o ka poino i ka wa a kakou i paio aku ai. Ua aneane i ka hapalua o ko kakou heluna i hele mai nei e waiho la i hope, aole hoi e lawelawe hou ana i na mea kaua. O kela mau pua a na Nomana ua like me na laau make."
"Ua haalele anei na enemi i ka uhai ana mai ia kakou?"
"Ae."
"Ua hoi aku nei anei lakou i hope?"
"Ae."
"A mahea ko kakou poe i hele aku nei?"
"Ma kahi au i kauoha ai ia lakou."
"Ua hiki anei ia oe ke hai mai i ka nui o na enemi i make??"
Ua ku nana iho la kona lukanela me ka pane ole mai.
"E hai koke mai i ka haina o ka'u ninau, e Kanakuka."
"O ka mea oiaio, e Baraina, aole i nui kahi hana i hana ia e ko kakou poe. I ka wa no i noha ai ka laina, oia no ko lakou wa i holo koke aku ai noloko o ka ululaau, a o ka wa no hoi ia i komo mai ai na pua a na kanaka Nomana ma na kua o ko kakou poe."
"Ke hiki mai i ka wa kupono, e hoihoi aku no kakou i ka lakou hana i hana mai nei maluna o ko kakou poe. Ke hoohiki nei wau ma ka Pohaku o Tara, e ike no keia poe haowale i ko kakou aina aole kakou he poe kauwa loa."
(Aole i pau.)
HOOLAHA KUMAU
Hui Alahao ame Ainao Oahu
MANAWA HOLO
Mei 1, 1903.
MAI HONOLULU AKU
No Waianae, Waialua, Kahuku ame na wahi hoolulu ma ke alahao-*9:15 a.m, *3:30 p.m
No Pearl City, Ewa Mili, ame na wahi hoolulu ma ke alahao-+7:30 a.m., *9:15 a.m., *11:05 a.m., *8:15 p.m., *3:20 p.m., +4:15 p.m., *5:15 p.m. #9:30 p.m., +11:15 p.m.
MAI WAHO MAI.
Ku i Honolulu ma Kahuku, Waialua, ame Waianae mai *8:36 a.m., *5:31 p.m.
Ku i Honolulu mai Ewa Mili ame Pearl City mai-+6:50 a.m., +7:46 a.m., *3:36 a.m., *10:38 a.m., *2:05 p.m., *4:31 p.m., *5:31 p.m., *7:40 p.m.
*$5:31 p.m., *7:40 p.m.
*Kela ame keia la.
#Sabati wale no.
+Koe ke Sabati.
G.P. DENISON,
Lunahoohana.
F.C. SMITH,
G.P. & T.A.
Kakela me Kuke
(KAUPALENAIA)
Poe Kalepa ma ke Komisina
::A HE::
POE LAWELAWE KOPAA
Poe Agena no na Mahiko Lehulehu.
Ina e makemake oe e hoomakau-
lii i kau loaa e hele
oe e kuai
PALEPALE, PALEILI ame na
mea like nou i ka halekuai o
S. OZAKI,
Helu 178 Alanui Hotele,
He maikai a ano hou mau ka
makou mau waiwai a he
kaawale mai na pi-
likia mai o ke
ahi ame ka
wai.
Ina He Makemake
-KOU I KA-
Lauoho Maikai
E HELUHELU I KEIA.
Malia paha ke pau nei kou lauoho i ka helelei, a koe kakaikahi. E kau i ka laau mamua o ka pau loa ana i ka halelei, e hana i laau e ulu hou ai. O ka laau
"Laau Hooulu Lauoho a Ayers"
ka mea e ulu hou ai. He nani ka lauoho ke ulu mai, a he nui hoi.
Ina he nawali ka ulu ana o kou lauoho, o ka
"Laau Hooulu Lauoho a Ayers"
ka mea e manoanoa ai ka ulu ana, a ke loaa i keia laau pau loa ka helelei ana. I na he piha kou poo ke Kepia, o ka
"Laau Hooulu Lauoho a Ayers"
ka laau e pau ai a maemae kou poo. Ke loaa i keia laau e hoi hou ana ka ulu ana o kou lauoho a like me ko kou wa bebe.
Hoomakaukau ia e Kauka J.C. Ayer & Company, Lowell, Mass., U.S.A.
E loaa no keia mau Huaale ma ka hale Kuai Laau o Hollister, alanui Papu.
He Hoohikilele Bele Pauahi
No ka nui o ka uwahi maloko o ka hale hoomo'a puaa hame o ka makeke Metropolitana ma Alanui Moi, oia ke kumu i puiwa ae ai ke oeoe pauahi ma ke ahiahi Poalima o keia pule iho nei.
O ke kumu o ka punonohu ana o ka uwahi maloko o keia wahi, oia no ka haule ana o kekahi apana puaa hame iloko o ke ahi o kahi hoomo'a uwahi, a i ke kaalo ana ae o kekahi mea ma keia wahi a ike aku la i ka punonohu o ka uwahi me ke kololio pu mai o ke ala puaa i kona mau pukaihu, ua puiwa ae la oia a manao kuhihewa ae la he "paea hauki" nui ko keia wahi. Ua holo koke aku oia e wili i ka pahu hoopuiwa pauahi, a iloko o na minute pokole, ku ana na kaa iliwai ame elua tausani mau kanaka e kuku ana ma na kapa-alanui.
Eia nae, ua poho wale ka holo ana mai o na kaa wai. Ia lakou e holo mai ana, ua komo aku kekahi Pake maloko o keia wahi a hoopioia iho ia ua ahi nei me ka @ ana i kekahi mau pakeke wai, a o ka hopena ia o na hana.