Ka Nupepa Kuokoa, Volume XLI, Number 32, 7 August 1903 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

EHA   NUPEPA KUOKOA, AUGATE 7, 1903.

 

HE MOOLELO NO

RODERIKA o KILADEA

KA NAITA KUPAA MAHOPE O KA MEA ANA I ALOHA AI.

AME

KATE MAKAMURAGA.

KA U'I NOHEA A HOOILINA OIAIO O KALELOGA.

(Unuhiia e S. K. Nawaa.)

MOKUNA IV.

NA PAIO A NA WELA O KA HAO.

 

            "Ke makemake nei wau e ike, owai la keia mau haowale au i olelo ae nei?" wahi a ka opio i ninau aku ai ma ke ano kahamaha. 

            Ua nana pono aku la o Baraina i ka naita me kona mau maka huhu, a no kekahi manawa kona noho mumule ana, ua pane aku la oia:

            "Ina ke hoomanao nei oe ia Dunamoa, e hai aku no wau i kekahi mau mea na kou mau kanaka e hoomanao ai.  Aole a kakou mea e noho iho ai maanei, aole hoi keia he manawa e hoolilo wale ai ma ke kamailio ana.  He lio ka makou e haawi aku ai nou, e Sir Naita, a ua hiki no ia oe ke kau aku maluna o ka noho a hele aku a i ole e hiki ia no oe a paa; aia no nae i kau mea e makemakie ana."

            Ua pii koke ae la ka inaina o Roderika no keia hana hoohaahaa i hanaia aku maluna ona, aka aole i nalo aku kona noonoo maikai.  Eia oia iloko o na lima o ka poe hihiu me ka nele i ka mea kana, a ua paa hoi kona mau lima i ke kupee ia.  Ina hoi e hana aku ana i na hana no ka hoopakele ana ae iaia, ua like ia me ka hana kamalii ana; nolaila ua hoike aku la oia he pio io no oia, a e hele no oia ma ia ano a e noho hoi ma ia ano a hiki i ka wa e loaa mai ai o ka uku no kona hookuu ia ae, a i ole loaa mai hoi na kokua ana.

            Ua apono mai la o Baraina me ka mino aka ana iho, a ku koke ae la oia iluna a haawi aku la i ke kauoha no ka hoomakaukau ana no ka hoi ana aku.  Ua ike aku la o Roderika i na mino aka, a hoomaopopo iho la oia he mau mino aka ia o ka manaolana ole e lanakila ana.  Ua nana mai la hoi na kanaka iaia nei, i kona wa i hoopuka ai no ka uku ia mai, me na maka o ka hauoli.

            "E Baraina Duna," wahi a Roderika i ka wa i lawe ia mai ai o kona lio, "owau kau pio."

            "Ke manao nei wau pela," wahi a Baraina i pane mai ai me ke kunou pu ana mai o kona poo.

            "Ke manao nei wau e hana ia mai ana wau e like me ke ano mau o na pio i lilo ma ke kahua kaua."

            Ua nana hou mai la o Baraina Duna me kona mau maka huhu ame kela mino aka a Roderika i makemake ole ai, ua pane koke mai la oia:

            "E haawi no wau ia oe i na mea apau i kupono ia oe, e Sir Roderika, nolaila mai noonoo nui oe no ia mau mea."

            "Ihea oe e makemake nei e lawe aku ia'u?"

            "E ike no oe ke hiki aku kakou ilaila."

            Ua hoopau koke ae la ka kakou koa opio i kana mau ninau ana a i ka wa i makaukau ai na mea apau no ka hele ana aku, ua kaikaiia ae la keia a kau ana iluna o kona lio.  Ua hele aku la o Baraina mamua o ka huakai, a mahope aku ona he ekolu poe, a o ke pio aku no hoi, a mahope mai he poe e helewawae ana a o lakou na kiai o ka hapa hope.

            Ua kokoke aku i kau wahi o ke awakea oia ka wa a lakou nei i haalele iho ai i kahi a lakou i noho ai, a hele aku la no ka hikinahema e hoomau ana hoi i ka hele ana no kekahi mau hora a hiki aku la lakou nei i kahi e ku ana kekahi lalani kuahiwi, a hoomaopopo iho la o Roderika eia lakou ma na pali o Dysart.  Ma keia wahi aku ua hele loa aku la ke alanui i ka inoino e pii ana iluna a ilalo, e komo ana hoi iloko o ka hihipea o na laau a mawaena aku hoi o na pohaku ooi ame na lae pohaku e oioi mai ana iwaho, a i ka hope loa ua pii aku la lakou nei iluna o kekahi puu e ulu nui ia ana e na laau, a maluna hoi o ke kiekiena o ua puu la e ku mai ana kekahi mau paia hale pohaku me kekahi puo'a kiekie i like aku me ka hana ana a ka lahui Poinikia.  Ma ka nana ana i ke ano o ka hana ia ana o na pohaku aole i like aku me na hana ana a ka poe naauao.  Me ia apuupuu no o ka pohaku a pili ana ma kona wahi i kau ia ai, a o kahi wale no o ka paa aia wale no maluna o ke kaumaha o kela ame keia pohaku.  Aole no i oi aku ke kiekie o na paia pohaku maluna o ka umi kapuai a pela no hoi me ka manoanoa, ua uhiia iho hoi ke kaupoku me ka lepo paakiki i hoohuihuiia me ka nahelehele.  Iloko o ka pa e hoopuni ana i ua hale la, e ku ana kekahi mau hale lio ame na hale hoahu mea ai, ua hanaia hoi lakou me na pohaku: o na hale hoahu ai nae, ua hanaia o lalo a nui kupono no ka noho ana o kekahi heluna kanaka nui, a ua eliia hoi iloko o ka paia pali he mau lua e noho ai na kanaka he nui.

            "E Sir Roderika Fizigerela," wahi a Baraina mahope o ke alakai ia ana aku o ke pio malalo o kekahi pi'o nui, "he mau manawa i hala ae nei, ua poni ia iho na alii o Irelana nei iloko o Hale Tara.  Aole oe i ike ole ia mea."

            "Ua hiki wau ilaila a ua ike wau i ka pohaku i poni ia ai na 'lii," wahi a Roderika i pane aku ai.

            "Ano ma Tara Hale," wahi a Baraina i pane hou aku ai me ka leo kaumaha, "ua pau ka iho ana iho o ke kalaunu maluna o ko makou mau alii.  E like me kona nalo ana aku, pela no hoi i nalo pu aku ai ka nani o na puu e poai ana iaia, a ke waiho nei ia wahi he luahi no na hana pakaha i kau ia mai maluna o makou.  Ua pau hoi ke kani hou ana o na mea kani e hoohauoli ana i na la o ka hauoli, a ua kuu aku hoi i ka make mau loa na maka o na kini i kilohi hope aku ai i ka hehee ana iho o kona mau mea nani.  Aka, "i hoomau aku ai o Baraina me ka loli ana ae o kona leo a na ia leo i hoopuiwa aku i ka kakou koa opio, "e nana ma kou mau aoao a e hai mai heaha la kau mau mea e ike nei."

            Ua ike aku la oia i keia hale i hana hooponopono ole ia; a e ku mai ana hoi apuni na kanaka o ka helehelena huhu.

            "Ke ike nei oe," wahi hou a Baraina i pane aku ai me ke kali ole iho a loaa aku ka pane a ka opio, "i na paia o Wela Ka Hao; a o keia ana hoi ka Tara Hale o Irelani nei.  E like me ka oiaio ana o ka nana ana iho o keia mau paia lani maluna iho o keia mau puu, pela ana no hoi ka oiaio, maanei ana e poniia ai na alii o Irelani nei ma keia mua aku.  E kapae ae na noonoo ana no ko na Nomana aihue, aina, ame na hana pakaha a na Savona, a e noonoo iho e hiki mai ana ka manawa e pau ai ko lakou noho hookano ana maluna o keia mau aina kuleana.  Ua haalele iho ko oukou alii o Pelekane i kona aupuni no ka paio ana ma ka Aina Hemolele; a iaia e hele ana me ka ukali ia e ko oukou mau naita ikaika, he mea kupaianaha ke hiki ole ia makou ke hoihoi hou ole mai i na mea o makou i lilo aku ia oukou."

            "Ke kamailio mai nei oe no ka hoopilikia ana aku i na barona," wahi a Roderika i pane aku ai, "oia mau olelo ana au he hoopau wale ana no ia ou i kou hanu malaila.  E hiki ana paha ia oe ke hana aku i kau mau hana hoopilihua i na kauwa, a e hiki ana no ia oe ke pepehi hoomainoino i ka poe e hiki ole ana ke ku pale mai no ko lakou mau ola, a e puhi aku hoi i ke ahi i na hale hoomana ame na hale noho; aka aole loa oe e aa mai ana e kaua ku-e mai i kekahi o ko makou mau kakela."

            "Aole e aa aku!" i hooho ae ai o Baraina ma ka li-o ana ae o kona mau maka.  "Ina aole oe i hui mua mai me makou, ina ua ike oe ia makou e ku aku ana mamua o na paia o Kiledea, a ina no hoi ua haawi aku makou i ka paio hahana au i ike ole ai mamua."

            "Pela paha!" i hooho ae ai ka naita opio me ka aka hoohenehene ana aku.  "Ina oukou i hiki ae nei ilaila, ina ua ike oukou i ka hiki ole ia oukou ke paio mai, me ka nana ole ae i ka nui o kou mau koa e lawe ae ai no ke ku-e ana mai i ka barona o Kiledea."

            "Alaila, ua hoomakaukau mua oukou no ko makou hiki ana aku," i pane aku ai ke alii o na powa me ka noonoo ole ae i ke kulana kuoo maoli o ka kakou koa.          

            "He oiaio ua makaukau mua makou, a ke manao nei wau, ina oukou i hiki ae nei ilaila, ina ua pau oukou i ka mama ia a e loaa ana hoi he haawina maikai na oukou e noonoo ole hou ai e kipa hou mai e hoopoino ia makou."

            "Alaila, ua hai ia aku ia oukou i ko makou hele aku."

            Ua ike koke aku la o Roderika i kahi e hihi la o ka ia la kaunao'a, a noonoo koke ae la oia e hai ole aku i na mea e pili ana ia Culena Kilala.

            "He mea oiaio ua lawe ia ae ka lono o ko oukou hiki ae a hoomakaukau iho la makou."

            "Alaila na kekahi o ko makou poe i lawe aku nei ia lono."

            "E kahi kamipulu, mai manao oe he poe makapo na kiu o Kiledea.  I ka wa i loaa ai ia lakou na hooia no ko oukou hiki ae, ua hookaulua ole iho lakou i ka lawe ana mai i ka lohe ia makou."

            "Alaila e hoomaopopo mai ana oe ia'u na kekahi no o ko oukou poe i lawe aku i ka lono ia oukou."

            "Ke haawi aku nei wau i ko'u hoomaikai ia oe e Baraina Duna no ka nui o kou maalea ma kau mau kamailio.  Eia wau imua o kou alo, he pio, a ke makemake nei oe e hoonieniele mai ia'u a e hookani hoi i kau lira imua o ko'u alo.  E hele oe pela a e hoike ae i kou noonoo kanaka makua."

            "E kuu keiki, aole i oi aku kou maalea e huna iho ai i ka mea oiaio.  Ua hana oe i kau hana a oi aku mamua o ka mea kupono.  Ua pau ae la keia.  Ke manao nei wau ua hiki no ia'u ke hai aku i ka inoa o keia mea nana i hana mai i keia hana kipi, a e hiki mai ana i ka manawa e ike ia ai o ka oiaio a e kau ia aku ai ka hoopai kupono maluna ona.  Ano, e Roderika o Kiledea, ke alakai aku nei wau ia oe i kou wahi e paa ai a e hoomaha iho ai hoi."

            Ua kahea aku la o Baraina i elua o kona mau kanaka, a mahope o kona kauoha ana e alakai mai i ka lakou opio, ua hele aku la oia no kahi e ku ana o ka hale pohaku.  Ua alakai ia aku la keia iloko o kekahi alanui lua loihi a hiki aku la i kekahi wahi uwapo uuku, a malaila aku no kahi e ku ana o ka puo'a-iho aku la he mau anuu alapii-ilalo-ilalo lilo loa o ka lua-a hiki i ko lakou nei hiki ana i kahi i manao ia ai e hoopaa iho i ka kakou koa opio.

            "Ke Akua aloha wale" i hooho ae ai o Roderika i ka wa i pa mai ai o na ea puanuanu o ua lua la.  "Maanei anei oe e hoopaa ai ia'u?"

            "Ae, aole no nae paha hoi e loihi loa ana."

            "Ina owau ma kou wahi, aole loa wau e hoopaa iho i kekahi ilio ma kekahi wahi e like me keia."   

            "Aole no hoi wau e hana ana pela," wahi a Baraina i pane aku ai.  "Aka, mai hoao oe e ku-e mai i keia.  E loaa ana ia oe kau mau mea ai; a ina ua kupono ole keia mau pohaku no kou moe ana iho, ua hiki no ia oe ke moe iho ma ka pili ana i ka paia."

            Me keia mau olelo, ua huli ae la o Baraina a haalele iho iaia nei, a iaia no i hala aku ai, oia no ka manawa i lewa ae ai ke pani puka pohaku maluna o na ami e paa ana iaia, a ai a ka paa, ai a ka puka i ka lakaia, a noho iho la ka kakou opio e noonoo e like me ke kuailo o kela mau lalani mele a na keiki o Ewa e kau ae la i ka hookumu ana o keia mokuna.

 

MOKUNA V.

KA HIU HUAKAI.

 

"Kuhi paha oe a he bosi wau,

I kau koikoi hana maoole.

Eia wau la he ole sanana,

A he pulumi alanui no ke kapitola."

 

            Ua hoomau aku o Hiu Kapena i ka uhai ana i na powa e auhee ana a hiki i ko lakou komo ana aku iloko o ka ululaau kahi i hiki ole iaia ke hoomau hou aku i ka uhai ana, a ia manawa i haawi aku ai oia i ka hoailona no ka houluulu ana mai i kona mau hoa.  Ua hui mai la na poe apau a koe aku hoi ka kakou naita opio.  Ua huli ia aku la kona wahi i ike hope loa ia ai, a pela no hoi me na poopoo; he ole no nae ka loaa.  No ka hope loa ua halawai aku la o Hiu me kekahi o na powa e waiho mauleule ana ma kahi i ike ia ai ko Roderika hele ana aku e paio me Baraina Duna, a nana i hoike mai me ka hauoli i ka nuhou kaumaha o ko Roderika laweia ana aku.

            "E huli wale no oukou i ko oukou alakai aole nae ia e loaa ana," wahi a ua kanaka la i pane aku ai.  "Aia oia iloko o ka lima o ka haku o Wela ka Hao, a aole hoi oukou e ike hou ana i kona kino ola.  Ua ike aku wau i kona haulehia ana ame kona hoopaaia ana i ke kaula."

            "He mea hiki ole loa i ke hana ia," wahi a Hiu i panai aku ai.  "Aole loa he hiki i kou haku ke lanakila maluna o ka Naita o Kiladea."

            "Aole o kuu haku wale no.  Ua kokua aku kekahi mau kanaka iaia.  Ua hiki no iaia ke pepehi aku i ko oukou alakai, aole no nae oia i manao pela.  Ha, ha-aia o Roderika o Kiledea ma kahi a oukou e ike hou ole aku ai iaia."

(Aole i pau.)

 

HE MOOLELO WALOHIA

NO NA

ONA MILIONA

I LAWE A HUNA MALU IA MA KA AINA MEHAMEHA.

 

            Ma ka hikina hema hoi, ua pii mai la a uhi paa ae la kekahi ao hakumakuma i ke kukulu hikina-hema, a na keia mea i hookomo mai ka manao ia Sidane ma e kii koke i ko laua mau hoa mamua o ka hiki ana mai o ka ino, a i ko laua kau ana aku iluna o ka lana, ua emi loa iho la ka makani.  Eia nae, ua mau ae la no ka pii ana o ke ao hakumakuma a paa na lewa lani.

            Ma ka hora ewalu, ua hiki aku la o Sideane ame Kent me ka lana ma kahi a lakou i hooholo ai e hui hou lakou ma ka hora elima.  Ua ki ae la o Sidane i kana pu raifela elua manawa me ka uwa pu ana ae.  Aole he pane i loaa mai, ua ki like ae la laua i ka laua mau pu a uwa hou no hoi.  Ua pii aku la o Sidane no luna o ka pali a kahea ae, aohe no nae he paneia mai.

            I keia wa ua lohe aku la oia i ka owe a ke kai, a i ka huli ana aku a kona mau maka i ka moana, ua ike aku la oia i na aie huhu e haki ana ma na kumu pali ame na aekai, a o na kumu laau hoi e ku ana lakou me ka oni ole o na lau laau.

            "E nana aku oe i ka pii mai o ke kai!" wahi a Kent i hooho ae ai.  "O, e nana aku paha oe!"

            Ua kuhi aku la kona lima i ke kaikuono, a i ka nana aku, ua ike aku ia laua i kekahi aie nui a mahope ua ike aku la laua i ke keokeo ana mai o ka aekai ma kekahi aoao o ke kaikuono.

            "E lele mai oe i kula nei!  He kai mimiki keia!" wahi a ua Sidane nei i uwa aku ai i kona hoa.  Ia wai i ike aku ai laua i ka nee mai o ka ale me he ale la i mahaeia ae e ka ihu o ka mokuahi.  I ke komo ana mai o ua alo nei iloko o ka loko, ua ano emi aku kona oolea, oia nae, aole nae i nawaliwali loa, no ka mea, i ka loaa ana mai o kahi lana laau, ua kokoke loa e naponapo liilii i ka hooku'ila ana aku me ka pohaku.  Ua ku'ila aku ua wahi lana nei e Sidane ma a hukiia a kau loa i kula.  Ua hoomaka mai la ke kai e pii he hookahi kapuai i ka minute, a ua like hoi ka haki ana a nanalu me he hekili la, eia nae, aohe he wahi mea a pa makani iki.

            Ua ike aku la laua i ke ku mai o ka poe i koe aku i ka hale ma keia aoao mai o ke kaikuono e peahi mai ana e hoi aku.  Ua hapalua hora i iaia o ka hora ekolu keia wa, a o ka lakou aelike, no ka hora elima ko laua wa e hiki ai ma ka aekai hema.  Ua hooloho iho la laua e kali no Vincent ame Pence, a ua ha'oha'o loa iho la laua i ka nalowale loa o keia mau mea.

            Ua kau pono iho la ua ao hakumakuma nei maluna pono o ua mokupuni nei, a ua hoomaka iho la e uhi ka pouli maluna o ka aina, a ua like ka nanaina o na ao kaalelewa me he mau moo la e oni hele ana i ka lewa.

            Ua hoomaopopo koke ae la o Sideane i ka pa ana mai a kekahi kikiao makani wela, a ua lohe aku la no hoi oia i ka nu mai a na nalu e po'i ana ma ka aekai.  Ike aku la no hoi oia i kekahi kumu niu he ekolu haneri kapuai ka mamao e ku kaawale ana mai ia laua aku e momoe ana na lau no ke komohana.

            "E holo mai maanei!" wahi a Sidane i hooho aku ai i kona hoa me ka paa pu ana aku i kona lima a holo aku la malalo o kekahi pohaku e oioi mai ana ma ke kumu pali, a aole i li'uli'u iho, ua pa mai la ka makani me ka ikaika.

            Ua pa iho la keia makani maluna o ka mokupuni me ka piha ikaika, a o kekahi kumulaau i loihi na makahiki a i paa hoi i na makani ino mua, ua ulaaia ae ia mai kona mau aa ae a puhiia iloko o ka loko.  He mau minute mahope iho o ka hiki ana mai o ka ino, ua pouli loa iho la me he mea la ua uhi mai ka po.

            Mai ka Sidane ma wahi e noho ana, aohe he hiki ke ikeia na hana a ka ino, a o ka laua mea hoomaopopo, oia ka nakeke o na laau a me ka hu o ka makani.  Mai ka hikinahema mai kahi i pa ai ka makani, a kaa ae la maluna o ko laua mau poo.  Mai luna mai hoi o ka pali, e iho mai ana ka wai ame na pohaku kakaa o ka pali, a he mea paakiki hoi i kekahi kino kanaka ke noho a loaa hou ka malamalama o kekahi la ae iaia ke loaa pono oia i keia ino.  E anapu ana no hoi ka uwila, a ia wa i hooikaika loa iho ai ka ino, a me he mea la e a-ia ana ka honua e ke ahi.  I ke kuu ana iho a ka hekili, ua nakolokolo ae la na pali pohaku a me he mea la e hanee iho ana.  O ka poe i ike i na ino e like me keia ma na wahi o ka aekai, ua hiki ole ia lakou ke wehewehe i ka weliweli o keia ino me ka hoohalike ana me na ino o ia mau wahi e noho paa ia ana e na hau anuanu.

            Ia po iho ua hooi loa ia ae ka weliweli ame ka ikaika o ka ino, a ua manaoia iho la aohe e ike ola hou ia ana o Vincent ame Pence.  Ia po a ao, ua pue maile laua malalo o ka pohaku: pulu ke kino holookoa, pololi a inoino ka manao no ka pakele.  O ko @ua ike ana aku i ka ulaaia o na laau mai ka honua ae, ka halulu o na pohaku e olokaa ana mai ka pali mai, ka nakolokolo o ka hekili, ka iho makawalu iho a na paka ua, ka olapa a ka uwila a lalapa na paia lewa, he mau mea keia i hoopaaia ma ko lakou mau noonoo a aohe mea nana e holoi ae a poina.

            Ma ka hora elima ua ano akakuu mai ka uhi ana a ka ino, a ua puka iki mai na kukuna o ka la, a aole nae i loihi, iho hou iho la ka ino me ka piha ikaika, a i ka mao ana ae, ua kala'e loa ae la a puka maikai mai la ka malamalama o ka la mawaena o na ao o ka lewa.  Ua pa nahenahe mai la ka makani, a me ka emo ole, ua papa pono iho la na kukuna o ka la maluna o na mea ulu o ka aina.

            I ka mao ana ae o ka ino, ua puka mai la o Vincent ame Kent mai ka laua wahi mai i pee ai, a ma ka nana aku, ua piha laua i ka lepo a ua anu hoi.  Ua pau ko laua paa lole keokeo i ka lepo a ua makahiamoe hoi laua.  Ua holoi iho la laua i ko laua mau lima maloko o ka lokowai, a pii aku la maluna o ka puu, kahi hoi a laua e ike pono aku ai i ke kaikuono.       

            Ia laua malaila ua hoonauoliia laua i ka ike ana aku i na hoa he eha i noho aku i ka hale e ku mai ana ma kekahi aoao o ke kaikuono.  Ua peahi aku la o Vincent me kona papale a ua uwa mai la ua poe nei a ua papae aku la no hoi o Sidane ma i ka lakou hoooho.

            Ia wa ua hoomaka koke iho la ua poe nei e hana i lana laau hou, a i ka paa ana, ua kau iho la ua poe nei apau, a aole hoi i liuliu mahope mai, ua hoe aku la lakou no kahi a Sidane ma e ku mai ana.

            "Auhea o Pence ame Vincent?" ka ninau mua a Morton i ke kokoke ana aku o lakou e pae i kuia.

            "Aohe laua i hoi mai." ka inaina a Sidane.  "Ke manao nei wau ua poino laua i ka ino."

            Aohe i hoolohe o Sidane i ke koi a kona mau hoa e hoi oia e hooluolu, aka iloko no o ka pulu ame ka pololi, ua hui aku la oia me Morton no ka hele ana e huli no na hoa i nalowale, a ua hauoli oia i ka lohe ana ua maikai na mea apau o kauhale, a aohe hoi he nui o ka poino i loaa aku i ka hale.

           

MOKUNA XVIII

LOAA KE GULA LA PENCE.

 

            Me ka hana nui, ame ka paupauaho pu no hoi, ua kau aku la o Simon Pence maluna o ke kiekiena e nana ana i ka moana, me ka haawi ana mai o Vincent i ke kokua ana i kona hoa.  Ua nana mai la o Pence i hope me ke ano kanalua, a hoomaka aku la e ukali i ka meheu o kona hoa opiopio no ka ulunahele e ku mai ana ma ko laua aia.  Ua loaa iho ia ia laua he maalahi ka hele ana ma ka lihi pali e kokoke ana i ka moana, a ma ia aia, ua holomua ka laua huakai.  Ma kekahi mau wahi ua hookauluaia laua i ka iho ame ka pii ana i na awaawa, aka nae, ua hoomau aku no laua i ka hele ana ma ke aia no ka hema.

            Mahope iho o ke kani ana o ka hora umi-kumamalua o ke awakea, ua noho iho la laua e ai i ko laua ainaaawakea maluna o kekahi wahi puu pohaku e nana ana i ka moana.  He elua mile i ka hema, e ku mai ana kekahi puu e oioi ana iloko o ke kai, a ma kela aoao aku o ua puu nei, aohe he ikeia aku o ka aina.  Ua hooholo iho la laua e pii no luna o keia puu me ka manao e ike maopopo ia no ka aekai hema mai keia wahi aku, a malie paha, e maopopo pono no ka waiho ana o ka aina.

            He hihipe'a ka ulu ana a na mea ulu o keia ala a laua i lawe ai, a o Pence ka mea mamua.  Me ka hikiwawe, ua uwa ae la oia a walawala ana ilalo i kona hooku'i ana mai ia Vincent i kona holo ana mai i hope.

            I ko laua nana ana aku, e ku pono mai ana ma ko laua ala he mea i like loa me ke kino kanaka, e kau ana na lima iluna, a e keke mai ana hoi na niho, a he pupuka ka nanaina o na helehelena.  Me ke kanalua ole, ua nana pono aku la o Vincent a ike iho la he kii pohaku keia, a ua kahea hou aku la oia i kona hoa e hele mai, aohe he waiwai o ka makau ana.

            Ma kekahi wahi oneanea e ku mai ana mamua o laua nei, ua ike aku la laua nei i na paia helelei o kekahi luakini kahiko, a pela pu no hoi me na kahua hale i helelei o na halealii o ke au kahiko loa, ke au hoi i komo ole ma na moolelo o ke ao nei: Ua hoomaopopo iho la o Vincent he kahua keia o kekahi kulanakauhale kahiko.

            He mau eka ka i uhiia e keia mau mea, a he 100 i-a wale no ke kaawale mai ka pali mai e kokoke ana i ke kai.  Ua hoomaopopo iho la laua nei i kekahi mau punawai nani o na la i hala i uhiia e ka lepo o na keneturla he nui wale. 

            Iwaena konu o keia kulanakauhale helelei, e ku ana kehahi puu me he piradima la, a maluna iho o keia, e waiho mokaki ana na pono o kekahi hale nani o na la i kaahope aku.  Ua pii aku la o Vincent maluna pono o ka puu a nana ae la ma o a maanei o ua kulanakauhale nei me ka pina eehia, a ua ike ma ka papahele pohaku o keia luakini kahiko.  Ma kekahi kuono, ua haneeia ka papahele, a na ia mea i hoike mai i kekahi ala malalo o ka honua i maopopo ole ka nui ame ka loihi.

            Ua hookuukuu iho la o Vincent a hiki i ka papahele malalo.  I kinohi aohe he hiki iaia ke ike pono, aka, i kona maa ana iho i ka nana ana iloko o ka pouliuli, ua ike iho la oia, nana ae la ma-o a maanei, a hoomaka aku la e hele ma kekahi aia e waiho mai ana ma kona aoao hema.

            Ua kahea iho ia o Pence mai luna iho, a ua pane ae le o Vincent, a ma ka Pence hoolohe iho, me he mea la, mai loko ae ia leo o kekahi lua kupapau.  I kona hiki ana aku i ka palena pau o ua ala nei, ua ike aku la oia ua paa ka puka e komo aku ai iloko o kekahi wahi keena uuku i ke panihapa ia e kekahi pohaku i olokaa mai luna iho.  Ua ho-a ae la oia i kekahi ahi a komo aku la no loko.  Ua uluia na paia o ua wahi lumi nei e na mea ulu limu o na ano like ole, a mahope, ua ike aku la oia i ke kakau mai o kekahi mau kii ma na paia ekolu o ua wahi lumi nei.

            He mau kii hoomanamana keia, a he pupuka hoi ke nana aku, a he piha hoomaka'uka'u, a ina e laweia kekahi o

HE PUPUKA HOI I KA NANA AKU.

keia mau kii iwaena o na pegana hoomanakii, e haule no lakou me na alo ilalo o ka honua a hoomana i keia mea me ka naau apau.  Ua kau lalani ia keia poe kii maluna o kekahi papa pohaku palahalaha, lalau aku la o Vincent i kekahi kii a nana pono iho la me malamalama o ka la.  I kona hapai ana ae, ua kahahaia oia i ke kaumaha, a ua manao iho la oia he kii keleawe paha kela, a ua hapa'upa'u hoi no ka waiho loihi loa me ka hoohinuhinu ole ia.  Ua ike aku la o Vincent i ke ku mai o Pence maluna me ka manao ole e hele mai ilalo i kahi a Vincent e ku ana.

            "E nana mai paha oe i keia kii i loaa ae nei ia'u," wahi a Vincent me ka haawi pu ana aku i ua kii nei ia Pence.

            "He wahi kii pupuka maoli no hoi keia, wahi a Pence, me ka lalau ana mai me ke ano akahele.  Kaumaha maoli.  Heaha la keia mea i hanaia ai keia mea?"

            I keia wa ua puka mai la o Vincent mai loko mai o ka lua a hoomaka iho la e hoopuehu i ka lepo e pipili ana i kona lole.  Ua hoomau iho la o Pence i ka nana ana i ke kii.  He ano hauli ka hooluu, a he laumania hoi ke haha iho.

            "Kaumaha ano e maoli keia mea!" wahi hou a Pence i olelo ae ai.  Ua kakaa ae la kona mau maka a ano pihoihoi hoi.   

            "E haawi mai oe i ko pahi ia'u," wahi a Pence.  Ua nao iho la o Vincent iloko o kona pakeke a wehe ae la i kana pahi pakeke.  Ua onou aku la o Pence i ka oioi o ka pahi iloko o ka pukaihu o ke kii a wili ae ia, a i kona wehe ana mai, e waiho ana kekahi mau apana liilii hinuhinu.

            "He gula keia!" wahi ana i hooho ae ai.  Gula!  He gula maikai loa keia!  He umi paona hoi a oi ke kaumaha!"

            Ua loli ano e ae la ko Pence nanaina ia wa.  I ka ike ana o ua onamiliona nei i kela mau apana gula ma kona-li-ma, ua pau loa ae la kona makou a ua pii ae la kona manao alunu dala, e like hoi me kona ano mau, i ke pi.  Ua pea iho la ola i ke kii me na manamanalima e upiki ikaika ana, a nana mai la me ka helehelena piha alunu a kuemi aku la a kaawale.

            "Ihea kahi i loaa ai o keia mea ia oe?" wahi a ua Pence nei i ninau mai ai ia Vincent me ka piha pihoihoi a haalulu hoi.

            "Iloko o ka lua," wahi a Vincent, me ke kuhi pu ana i kona lima iloko o ka lua.  "He nui loa o kena ano kii maloko o laila i koe aku nei."

            "Ea, e lawe aku oe ia'u ilaila!" wahi a Pence me ka leo malie ano hoomalimali, a ua nana ae la oia ma-o a maanei me ka manao paha o ikeia a loheia mai paha e kekahi poe okoa.

            "No kaua keia mau waiwai apau." wahi a ua onamiliona hapauea nei hoomau mai ai i ke kamailio ana kona hoa, me ka hamohamo ana mai ke kua o Vincent.  "No kaua keia, lohe oe, no kaua keia waiwai gula. I kaua i loaa ai, ia oe ame a'u.  No kaua wale no keia aole no keia poe e ae.  I kokua mai oe ia'u i hiki aku au no iaia o ka lua.  He makemake ko'u e ike he mea oiaio auanei he nui loa o keia ano kii malaila?  Malia paha ua like ole kii lakou ano me keia.  O, ua oi ae ka nui mamua o keia,  Aia ihea?  Mahea ke ala e hiki aku ai?  Poeleele maoli lalo nei!  Ea, e paa mai hoi oe i ku lima!"

(Aole i pau.)

 

O KE

Koko Ino ka mea loaa ai na Pillikia ma ke Kino.

E Heluhelu i keia mau Manao.

O KA LAAU AYER'S SARSAPARILLA

KA

laau nana e hookaawale na ma'i @ mai kou koko aku.  He laau hoonoo@ ai, a he laau e hooikaika ana i k@ mau iaia apau.  O ka Laau Ayer's Sarsaparilla ka laau kaulana loa a pu@ ke ao holookoa.  Ina e hoomau ia lawelawe ana i keia laau e loaa ana ke ola kino maikai a me ke koko maemae, hoi hou mai ka ula o kou malehelehe, pu'ipu'i maikai kou mau papalina, a loaa ke kulana ola kino maikai.

            He loaa na pu'u paa o ke kino i laau Ayer's Sarsaparilla, e hoopakana mai ka ma'i puu paa (Bright's Disease) ame na ma'i oia ano.  Ke l@ ikaika aku nei makou e lawe ia k@ ano laau ma kahi i ike ia na ma'i P@ paa apau.

            Hoomakaukau ia Kauka J. C. Ayers.

            E loaa no keia mau Huaale ma ka hale kuai laau apau.