Ka Nupepa Kuokoa, Volume XLI, Number 33, 14 August 1903 — Page 6
| This text was transcribed by: | Naomi C. Losch |
| This work is dedicated to: | Hughbert W. Clarke |
Ka Nupepa Kuokoa
KE KILOHANA POOKELA NO KA LAHUI HAWAII.
EONO NUPEPA KUOKOA, AUGATE 14, 1903.
_______________
Ke Alahao o Hilo-Kohala
_____________
Ma ka po o ka Poakahi i hala i noho ai ka Hui Alahao o Hilo-Kohala, a kakauinoaia me ka hooiaio pu ia o ka aelike i hana koke ia iho nei, a no ka hoonee ana i na hana imua, a i ka Poalua ae i koho ia ai na luna nui hou, ka poe na lakou e hoonee aku i ke alahao imua.
O keia aelike i kakauinoaia a i hooiaioia ua mana ia mamuli o na pulima a hoa o ka Papa Hooko o ua hui la, a o na luna nui hou i kohoia oia keia mau keonimana malalo ino:
Peresidena, Philip Peck o Hilo, Hope-Peresidena Akahi, John T. Moir o Hilo, Hope-Peresidena Alua, Jacob F. Brown, Puuku, George H. Robertson o Honolulu, Kakauolelo, A. Lewis, Jr., o Honolulu, Luna Hooia, J. A. Gilman o Honolulu.
Na lala o ka Papa Hooko oia no na luna nui i hoike mua ia ae nei pakui pu ia aku me keia mau keonimana, Adam Lindsey o Hilo, August Ahrens o Waipahu, ame John J. Grace o Hilo.
O ke keena nui o keia e kukuluia no ia i Honolulu a he wahi keena kekahi no Hilo. O kahi e ku nei kona keena no keia manawa aia i Judd Hale, Honolulu, a ua oleloia ae ua hala aku o Mr. Peck no Hilo no ka hoonioni ana i na hana o ua hui nei no ka nee ana imua.
Ua manaoia e pau ana i ka hoomoeia he hookahi haneri mile mai Hilo aku a Mahukona iloko o elua makahiki ame ka hapa. He mea maopopo no ia o ka hooholo mua ia o na kaaahi oiai no e hoomau ana i ka hoomoe alahao, aka o ka umi-kumamalima mile mai Hilo a Hakalau ke hoomoe mua ia ana.
_________________
Halawai a ke Komite-waena
_______________
Mahope o ke kali loihi ana i na hoa ua noho ae la ka halawai a ke Komike Kuwaena Repubalika o ka Teritori o Hawaii ma ke keena o ia aoao kalaiaina i ka Poaono la 1 o keia mahina.
Ma ka hoea ana ae o umi-kumamawalu lala o ke komike ua noho hoomalu ae la o Mr. Crabbe, ka Peresidena, a mahope o ke kaheainoa ana a Kakauolelo W. H. Coney ua hoomaka koke na hana.
O ka hana mua i laweia mai a noonoo oia no ka palapala waiho lala komike kuwaena repubalika o ka Teritori o Hawaii mai a Curtis P. Iaukea mai o ka Apana Elima. A ma ka noonoo ana aole i holopono, no ka mea, he elua wale no lala o ke komike mai ka Apana Elima mai kahi hoi o ka hana e hoopiha makalua ia ai. A no ka lawa ole ua lilo ia i mea e hala loa aku ai mawaho o ka lohe o ka hapanui o na lala komika o ia apana.
Ma keia manawa ua hoike mai la o Peresidena Crabbe i ka manao nui o ke kaheaia ana o ka halawai, oia no ka noonoo ana no ke kukulu hana o ke koho balota o na luna aupuni kalana. Ua hooikaika ke komike mana hooko no keia hana a no ia kumu ke kahea ia ana o keia halawai.
O ka hana i hoolalaia oia ke kukulu ana i komike no kela ame keia kalana o na elele e like no ka nui me ka mahelehele ana o ka poe koho balota Repubalika o ke kau koho i hala aku nei. Aia he noi i loaa mai iaia mai ka poe mai o ka Apana Elima e hoike mai ana ua palapala noi nei he mau olelo hooholo i hanaia a o ke kahua nui o ua palapala noi la oia no ke koho ana i hookahi elele maiwaena mai o iwakalua-kumamalima poe koho balota no ka noho ana aku i ka aha elele kalana o na Repubalika.
Ua hoike ae ka Peresidena i kona manao aole i loaa ke kuleana i ka Peresidena ame ke Kakauolelo ka hooko ana i keia mau noi no ke kukulu halawai koho o keia ano. Ma kona manao maoli iho nona iho, ua manao oia o ka hoopalanaiki mai i na hana hoolalelale o ke kau koho luna aupuni kalana ame ka uwai ana aku a kokoke i ka manawa koho e hoolale ai oia ka maikai ame ka hooluhi hana ole i ka lehulehu.
Na Puuku Kepoikai mai he hoike manao maluna o ka Keola mau manao pili i na hana koho ame na manao maoli ae no o ka Puuku e hoike ana, e pono o Iaukea ke kanaka hope e hoolele i kona aoao; a mahope o keia mau hoike manao ua hooikaika hou mai la ka Peresidena e hooneeia ke kumuhana imua.
Ma ka Mr. Aylett hooaiai ua hoike ae oia i ka lokahi o kona manao maluna o ka manao e kohoia i hookahi iwaena o iwakalua-kumamalima. Mahope o na wehewehe manao ana e kakoo ana i ko Aylett manao ua heluhelu mai la ke Kakauolelo ma o ke noi a ka Lunahoomalu i ka palapala no.
E noi ana na olelo hooholo e aponoia i mau halawai no na kalapu o na mahele ma ka la 28 o Augate no ke koho ana i na elele ma na aha e koho elele ai i loaa ai na elele no ka halawai koho luna kalana nui e malamaia ai i --------------ua waiho hakahaka ia ka manawa e malamaia ai ua mau halawai nui la o na kalana.
Ma ka noonoo ana i ua palapala noi la, ua nui no na manao i haawiia maluna o na olelo hooholo, a o ka panina o ia mau kukai olelo ana oia ka hooholo aponoia ana o ke kumuhana a ma ka pakui ua loaa keia ike e noho na halawai wae inoa i ka Poalima la 28 o Augate, a o ka Poaono ae la 29 o Augate e kohoia ai na elele ma na halawai koho elele i loaa na elele e noho aku ai i na halawai kalana o Sepatemaba 14, oia ka Poakahi, no ke koho ana i na luna aupuni kalana.
_______________________
Ua Nalohia aku Kona Anapa ana
____________
Ua waiho ae o Robert Slaughter i ka lohe i ke keena makai ma ka Poaono nei e pili ana i ka aihueia ana o kona pihi palule daimana nona ka waiwai io o kekahi mau haneri dala.
Ma kana olelo, ua weheia keia mau daimana mai kona palule ae oiai no maloko o kona hale a ua hoohuoi oia na kona Kepani lawelawe paha i hana keia mea, eia nae, aole e hiki ke hooiaioia.
______________
Ka Pa Hoomalu ma Waiakamilo
__________
Ma ka nupepa "Adavataisa" o ke kakahiaka Poalima nei, Augate 7, i puka ae ae he leka na kekahi ku a o ka Apana Elima e ninau ana i ka lunahooponopono o ia pepa e ha'i mai i kana mau ninau e pili ana i ke Kahua Hoomalu Waiakamilo ma Kalihi. Eia iho ka unuhi ana:
Lunahooponopono Adavataisa: E oluolu anei oe e hooakaka mai ia'u i ke kupono ame ka pomaikai o ka malama ana i ke Kahua Hoomalu Kalili e kapaia nei? Ua maopopo no ia kakou apau loa ua kukuluia ia mea no ka haawi ana i wahi e malu ai a no ka hoomalu ana hoi i kekahi mahele nui o ka poe noho o Paketaona, i ka wa hoi i hooneleia ai lakou me na home i ka pauahi nui, ke ahi ana i ai kekahi hapa o ko kakou kulanakauhale he eha ae nei makahiki i hala.
Mahope mai, i ka wa a na kanaka i hookuuia ae ai a kakaikahi hoi na hale hoolimalima a pii ka uku hoolimalima, ua aeia kekahi mau kanaka oiwi ame kekahi mau kanaka Asia kakaikahi e noho malaila me ka uku ole a mahope mai, kakiia i $1.00 o ka mahina no ka hoomau ana i ka hooholo ana i keia wahi, he hana hoi i lawa ole no ka hoomau ana a poho no hoi.
Ua maikai no ke kulana o keia mau hana a aole hoi i ku-eia e kekahi mea a hiki wale no i ke kukulu hou ia ana o kekahi mau hale emi a i keia wa he nui na hale hoolimalima e waiho wale mai nei, he mau lumi e lilo ana me ka uku haahaa e lealea ai ka ona, me na lumi maikai, e like me ko ka poe o ke Kahua Hoomalu o Kalihi e noho nei, no ka $2 a $3 o ka mahina.
Nolaila, ina o keia ae la ke kulana heaha la ka mea i hooholo ai ke aupuni i kekahi hale hoolimalima me ka uku ole ia e ku-e ana i na ona hale hoolimalima, ka poe i uku i na laikini, o ka oi loa aku no nae, me ka maopopo pono he hana poho keia, a heaha la ke kumu i noho ai ke kanaka oiwi ilihune maanei oiai ua oi aku kona lilo kaa mai keia wahi mai mamua o ka uku hoolimalima o kekahi lumi a hale paha iloko o ke taona?
He mea huna i puka ae nei i ke akea a he mea maopopo lea hoi eia ke hoohana a ke nohoia nei ke Kahua Hoomalu o Kalihi no na hana koho baloka, aia hoi ka hookele ana malalo o ka poe makee oihana aupuni ame ka poe ake e loaa kahi hana, he poe hoi aole i loaa ke kulana kanaka maikai, a ma ko'u manao, he hana hoopaewaewa keia i kupa manao pono ame koho balota o ka Apana Elima i ka ae ana e malamaia keia mea.
He moe-wela kalaiaina keia o na Home Rula me na aahu hoonalonalo Repubalika, he poe e hoike mai ana i ka papa haahaa o na kanaka mai na wahi like ole mai o ke kulanakauhale e mimino ana a e pehu ae ana hoi i na wa e makemakeia ai, no ka hoohauhili a hooauhee ana i na manao kalaiaina a nolaila hoi e lanakila mau ana a holopono ole hoi ka manao Repubalika oiaio ame ke aupuni maikai.
Ina he makemake ko ke aupuni e hookele i hale ilihune heaha ka mea kukala ole ae a kahea ma ia inoa, a e malamaia e like me ia aole hoi i wahi e hoopunana ai no na hana kalaiaina.
Ke ku-e loa nei wau, he Repubalika a mea noho hoi o ka Apana Elima, i ka hoomauia ana aku o keia wahi, he mea hoi e hooweliweli ana i ke ola o ka lehulehu a he mea hoi e hooikaika ana i ka pono o na kupa kuokoa ame ka poe koho balota.
J. H. SCHNACK.
________________________
Eia ka pane a ka "Adavataisa" i keia leta i kekahi la ae, Augate 8:
Ke manao nei ke Aupuni malia paha e hiki mai ana ka wa e hoohana hou ia aku ai keia wahi e like me kona mea i kukuluia ai, a ia wa hookahi no hoi aole i ku-e i ka loaa ana mai o kekahi mau uku hoolimalima.
Eia iho na kumu ku-e i waihoia mai: Malia paha e lilo ae ana keia wahi i wahi na ka ma'i e puka ae ai a aole hoi he puuhonua; (2) aole hoi he pono i ke aupuni e komo ma ka oihana hoolimalima hale no ka holo ku-e ana aku i ka poe i loaa na laikini a uku i na auhau no ia oihana; (3) he wahi hoolulu keia no ka poe koho balota naaupo, a he poe Home Rula ka hapanui.
O ka hopena o keia kumuhana, oia no ke pani ana i keia wahi, hoomaemae a hookomo iloko o ke kulana maikai, a waiho malie no ka wa e hiki mai ana no ka hoohanaia i wahi e hoomalu ai.
_____________________
Ua kuai aku Oia i ka Bebe
___________
Mai ka Nupepa Maui News mai,--Ma ka pule i hala i Kula ua haalele iho la kekahi wahine Kepani i kana kane ame ka laua wahi bebe. A o ke kane hoi i kona ike ana aole i lawa me ia na haawina hana no ka home ame kahi bebe, nolaila, ua kuai hoolilo aku la oia i kahi bebe i kekahi Pake ame ka wahine a ka Pake i komo ohohia aku kona noonoo no kahi kamaiki.
O ka wahine Kepani haalele kane hoi, i ka manawa ona i lohe ai no keia hoolilo ia ana o kahi bebe ana, ua hoala manao aku la oia i kona mau hoa o ka lahui hookahi e kokua iaia ma ka hoihoi ana mai i ka bebe iaia.
Ua lanakila io ka wahine ma keia hoolala ana a i ka loaa ana o kekahi mau Iapana ma kona aoao ua iho iho la lakou i kai o Makena a loaa aku la ke kane e hoomakaukau ana e kau maluna o ka moku a no Hawaii ka pahu hopu.
Ua koi ikaika loa ia aku ke kanaka i manao e holo i Hawaii e hoi hou i Kula i kuhikuhi mai ai oia i kahi o ka bebe i kuaiia ai, a no ka ikaika koi, i hoi hou ai ka Iapana, makuakane o ka bebe, i ukali pu ia e keia poe a hiki ana i kahi o ka Pake.
I ka hiki ana i kahi o ka hana ua hookikinaia ua makuakane nei e hoihoi hou i ka huina dala, ke kumukuai o ka bebe i kuaiia ai, a loaa aku la no hoi ka ka Pake hapa, a o ka hemo mai la no hoi ia o kahi bebe a noho ana iloko o ka poli o ka mama ponoi.
_____________________
Ua kokoke e piha ka huina o $800,000 Kalakaua i hoounaia aku nei no kahi hoohehee dala e ka Banako Lahui Ekahi. Ke nalowale aku nei ke dala o ka aina me ka hikiwawe.
____________________
Ua Loaa ma ka Hoopunipuni
________
Ma o ka hopuia ana o ekolu Kepani i ka Poaha o keia pule iho nei i hoike maopopoia ae ai na hana kolohe a keia poe maluna o ke komite Iapana nana e uku nei na koi pauahi a na Kepani. I ko lakou paa ana i ka umiiia, ua hoike pololei ae lakou i ko lakou hewa, a o ke dala a lakou i ohi ai mai a S. Ozaki mai, ke kahu, ua loaa mai ia ma o ko lakou hele ana aku e hoopunipuni.
Ua hanaia keia mau hana apuka me ka maalahi. O Nakamura Hikoichi, ua hopuia oia no ke apuka, a he $90 ka huina ana i ohi ai ma ke ano apuka. He hoahanau ko Nakamura, a oia ka mea nana ke koi pauahi, eia nae, aia oia ma Amerika nui i keia wa. Ua loaa no nae ka palapala koi ia Nakamura, a ua hele aku oia imua o ke komite a olelo aku oia ka mea nana ke koi, a ua loaa mai ke dala.
Mahope mai maopopo ae aohe oia ka ona oiaio, a i kona ninaninauia ana ua ae mai oia aohe oia ka ona, aka, o kona hoahanau. Ua hopuia oia.
He okoa hoi kekahi mau hihia iho. O Fukushima ame Miyamoto, ua hopuia laua no ke kokua ana e apuka i ke komite. O ka mea nana i hana maoli ka hewa, he wahine, ua haalele mai oia ia Hawaii nei, a o Nishimura kona inoa. Ua hele aku keia wahine me ka pepa kikoo a kekahi wahine okoa a olelo aku oia ka ona oiaio.
Ua ano kanalua ke komite, a i mea e hooiaioia ai, ua kii aku ua wahine nei he Kepani malama hotele o Fukushima ka inoa ame Miyamoto a olelo mai laua he mau makahiki ko laua kamaaina ana ia Nishimura. Ua ukuia mai iaia he $19.02.
He mau la mahope iho, ua hele aku ka ona ponoi e kii i kana dala a hoike aku ma ka mokupuni o Hawaii oia kahi i noho ai i keia mau mahina aku nei, a i kona hoi ana mai nei ua aihueia kona palapala koi. Ua apono ke komite i kana koi mahope o ka noii pono ana.
Ma o ka noii pono ana a Lunahooponopono Shiozawa o ka nupepa Kepani Hawaii Shinpo, ua loaa pono na mea apau a ua hopu aku oia ia Fukushima ame Miyamoto a hoike pau mai i ka laua mau hewa. Eia keia hihia ma ka aha apana i keia wa.
_________________
Ua Haunaele ka Lakou Aha
________
MAUI, Aug. 8.--Ma ka la elua i hala aku nei i ulu ae ai kekahi haunaele iwaena o na Pake ame na Iapana o ka mahiko o Paia.
Ma ka manawa o ka la aia kekahi mau Pake ame kekahi mau Iapana e noho piliwaiwai malie ana (pai kau) aka i ka manawa i ulu ae ai kekahi wahi hoopaapaa mawaena o kekahi Pake ame kekahi Iapana ua lele aku la ka Pake a hili aku la i ke poo o ke Kepani me kekahi hao a ua eha loa ke poo o kona hoa o ka hana hookahi.
Ma keia manawa ua aumeume iho la laua a no ka laua uwa o ka hoailono hakaka ua umeia mai na hoa lahui o na kanaka a elua i kahi o ka hana, he aneane ma kahi o ka elua haneri ka nui. Ua ku aku keia huina nui e like me kona lahui iho, ma ka aoao o na mea hakaka.
O ka hua o keia oia ka hailuku ana o na aoao a elua no ka paio ana, me na paukulaau, na pohaku, na kini na omole ame na laalaau a he lele huikau hoi kau iloko o ka lewa maluna o lakou iho.
Aole no i liuliu loa keia haluku ana no ka mea, ua hoea mai la na lima o ke Aupuni a pau ana kekahi poe i ka paa, eia nae, he eiwa wale no, he elima Pake a he eha Iapana.
Ma ka la 7 mai, ua hookolokoloia ua poe la imua o ka aha a ka Lunakanawai Copp o Makawao a pau i ka hoopaiia e like me ko lakou mau kulana hihia pakahi iho.
______________________
He Makana na Kona mau Hoa
__________
Ua haawi makanaia aku ke Poo Kinai Pauahi Thurston e kona mau kanaka me kekahi pihi gula e hoike ana i kona kulana ma ke ahiahi Poaha o ka pule i hala, a he makana keia i hanaia me ka malu mai ke poo mai.
Mamua o ke kani ana o ka hora 8 o ke ahiahi, ua noiia mai o Thurston e komo ma ka lumi heluhelu e hoolohe a hooholo hoi i kekahi hana hoopaapaa, a i kona komo ana aku, ua ike aku oia e nonoho mai ana na kanaka o ke keena kinai ahi.
Ua ku mai kona hope o Deering ka inoa a haawi mai ia Thurston i ke pihi, me ka haawi pu ana mai i kekahi mau olelo kupono e hoike ana i ke ohohia o kona mau kanaka iaia, a no ko lakou aloha, o ke pihi ka mea nana e hoike mai.
Ua puiwa ke poo i keia mau hana, a ua hoomaikai mai oia i kona poe hoa. He mau daimana kekahi i hookomoia i mau mea hookinohinohi no ke pihi.
____________
Ua noi aku ka Rev. Motokawa o ka Luakini Iapana o keia kulanakauhale i kanuia ke kino o Gisaburo mahope o kona make ana malalo o kana hana haipule kristiano ana.
_____________
Na Kauka Huki Niho Noeau,
____________
hana pololei a hiki i keia manawa, a he haahaa ka auhau o ka huki ana. O ko laua no hoi ke keena kauka huki niho nui hookahi iloko o ka Paeaina Hawaii nei, a lawa pono no hoi me na lako oihana o ke ano hou loa a maikai no hoi.
He hukiia kou niho me ka eha ole a iloko no hoi o ka lawelawe noeau a maiau ana no hoi e hanaia ai, a o ia no hoi ka makou e ake nei. Aohe auhau no ka nana ana. He wahine Hawaii ke kokua iloko o ke keena hana.
Keena hana ma Arlington Block, Helu 215, Alanui Hotele, ma o aku o Alanui Union.
________
Hoolaha Hooko Moraki
______________
HOOLAHA MANAO PANIKU A KUAI A KA MEA PAA MORAKI.
_______
RACHEL SHAW MEEK AME HERMAN MEEK.
_____________
I kulike ai me na manao o kekahi moraki i hanaia e Rachel Shaw Meek ame Herman Shaw Meek ia W. R. Castle, Kahu, ma ka la ewalu (8) o Augate, 1896, a i kakau kopeia iloko o ke Keena Kakau Kope o ke Aupuni ma ka Buke Helu 163, aoao 316, ma keia ke haawiia aku nei ka hoolaha ke manao nei ka Mea Paa Moraki e paniku i ka moraki i oleloia no na kumu i uhaiia, e hoike ana i ka uku ole ia o ka ukupanee ame ke kumupaa i ka manawa e uku ai.
Ke haawi pu ia aku nei no hoi ka hoolaha mahope iho o ka pau ana o ekolu pule mai ka la aku o keia hoolaha e hoolahaia aku ai ka waiwai apau loa i hoopaaia iloko o ka moraki i oleloia no ke kuai kudalaia aku ma ke akea, ma na keena kudala o James F. Morgan iloko o Honolulu ma ka Poaono, ka la iwakalua-kumamaiwa (29) o Augate, 1903, ma ka hora 12 awakea o ka la i oleloia.
No na mea aku i koe e ike ae ia W. R. Castle, loio o ka Mea Paa Moraki.
Hanaia ma Honolulu, Augate, 7, 1903. W. R. CASTLE, Kahu Mea Paa Moraki.
O ka waiwai apau i hoopaaia maloko o ka moraki i oleloia oia keia malalo iho:
1. O kela apana aina e waiho la ma Puunui, Honolulu, mokupuni o Oahu, a i hooakaka pono loa ia e like me keia malalo iho:
E hoomaka ana ma ke kihi akau o ke alanui Liliha ame ka palena pau maluna o ke alanui-mahelelua o ka Mahele (Sub-division) Mua, a holo e like me keia malalo iho:
1. Hema 52--00 Kom. Oiaio 31 kapuai holo ma ke alanui 40 kapuai ke akea,
2. Akau 38--00 Kom. Oiaio 150 kapuai holo ma ka apana 12 no Dickson,
3. Akau 52--00 Hik. Oiaio 75 kapuai holo ma ka apana 13,
4. Hema 38--00 Hik. Oiaio 130 kapuai holo ma ka apana 16, Kuea 2 a hiki i ke alanui Liliha, a mailaila aku holo ma ke alanui Liliha a hiki i kahi i hoomaka ai; nona ka iliaina o 10,800 kapuai kuea, oi a emi mai.
O ka Apana 14 keia, Kuea 2, a i hooliloia i ka Mea Moraki Mai ma ka palapala kuai aina a Wong Wa Foy, i hanaia i Augate 1, 1896, a i kakau kopeia ma ka Buke Helu 165, aoao 59.
2. O ka mahele hookahi-hapaono (1-6) mahele ole ia apau loa o Rachel Meek iloko o keia mau apana aina ma ka aoao Ewa o ke alanui Smith a i ole o Alanui Konia, ma Honolulu, Mokupuni o Oahu, nona ka huina pau o 144 anana kuea a i ole o 5184 kapuai kuea, i hooliloia ia John Shaw, mea i make i keia manawa, ma ka palapala kuai aina a H. A. Widemann, a i kakau kopeia ma ka Buke Helu 36, aoao 39, ame Keakui a i kakau kopeia ma ka Buke 28, aoao 16, pau pu me na hale ame na mea i kukuluia maluna o laila, a pela pu no hoi me kona kuleana iloko o na loaa hoolimalima ame na puka e loaa mai ana mai laila mai. 2975--Aug. 7, 14, 21.
____________________
HOOLAHA MANAO PANIKU A KUAI A KA MEA PAA MORAKI.
______________
J. T. FIGUEREDO.
____________
Ma keia ke haawiia aku nei ka hoolaha ma o ka pono o ka mana kuai o kekahi moraki i hanaia i ka la umi-kumamaha (14) o Sepatemaba, 1899, i kakau kopeia iloko o ke Keena Hoona ina o ke Aupuni, iloko o ka Buke Helu 196 aoao 278 ame 280, i hanaia e J. T. Figueredo ame Clorinda T. Figueredo, kana wahine mare, no Honolulu laua a elua, Mokupuni o Oahu, ia Cecil Brown, Kahu, o Cecil Brown i oleloia, Kahu, ke manao nei oia e paniku i ka moraki i oleloia mamuli o na kahua oloko o ua moraki la i oleloia, e hoike ana, --o ka uku ole ia o ka ukupanee i ka wa e uku ai.
Ke haawi pu ia aku nei no hoi ka hoolaha o na aina apau loa na hale ame na kuleana apau i hoakakaia maloko o ua moraki nei i oleloia e kudala ia aku ana ma ke akea e James F. Morgan, ma kona mau keena kudala ma ke Alanui Kaahumanu, iloko o Honolulu i olelo mua ia ae nei, ma ka Poaono, la elima (5) o Sepatemaba, 1903, hora 12 awakea o ka la i oleloia.
O ka waiwai i hoopaaia maloko o ua moraki nei i oleloia oia keia malalo iho:
O kela mau Apana mahele-aina, na apana a mahele o ka aina e waiho la i Kewalo, iloko o Honolulu oleloia, a i hoakaka pono loa ia ma na apana helu 7 ame 8 iloko o ke Kuea (Block) helu 3 e like me ia i hoikeia ma ka palapalaaina o na Apana o Kewalo, ma Kewalo i oleloia, Honolulu, e like me ia i hanaia no Bruce, Waring & Co., i kakau kopeia iloko o ke Keena Hoona Aina a i hooakaka pono loa ia ma ke ano he hapa o ka aina i hoakakaia iloko o ka Palapala Sila Nui Helu 5716, L. C. A. Helu 10605, a oia no hoi ka aina i hooliloia iaia e like me ia malalo iho:
O ka Apana Helu 7 Kuea helu 3, hooliloia ia J. T. Figueredo i oleloia ma ka palapala kuai a C. S. Desky, Kahu, ame kana wahine mare, i hanaia i ka la umi-kumamaiwa (19) o Novemaba, 1897, a i kakau kope ia iloko o ka Buke Helu 177, aoao 496.
O ka Apana Helu 8 o ke Kuea helu 3, hooliloia ia J. T. Figueredo i oleloia ma ka palapala kuai a Damazo de Mello ame kana wahine mare i hanaia ma ka la iwakalua-kumamawalu (28) o Sepatemaba, 1898, a i hoopaaia ma kahi o ke kakau kope. O na aina i oleloia ae nei maluna ua hiki aku ko laua iliaina i ka 10000 kapuai kuea.
Kuike a ma ke dala gula Amerika ka makemake, a ma ka aoao o ka mea kuai mai na lilo palapala apau.
Hanaia ma Honolulu, Augate 3, 1903.
CECIL BROWN, Kahu. 2975--Aug. 7, 14, 21, 28.---Sept. 4.
________________________
HOOLAHA MANAO PANIKU A KUAI A KA MEA PAA MORAKI.
_______________
M. I. SILVA.
_____________
Ma keia ke haawiia aku nei ka hoolaha mamuli o ka mana kuai iloko o kekahi moraki i hanaia ma ka la iwakalua (20) o Mei, 1901, a i kakau kopeia iloko o ke Keena Kakau Kope o ke Aupuni ma ka Buke 220, ma ka aoao 262 a hiki i ka aoao 264, e M. I. SILVA ame MARIANNA I. SILVA, kana wahine mare, no Honolulu, Mokupuni o Oahu, ia CECIL BROWN, KAHU, a ma keia ke manao nei o Cecil Brown i oleloia, Kahu, e paniku i ka moraki i oleloia no na kumu i uhaiia, e hoike ana i ka uku ole ia o ke kumupaa ame ka ukupanee i ka wa e uku ai.
Ma keia ke haawi pu ia aku nei no hoi ka hoolaha e kuaiia aku ana apau loa, ma ke ano pakahi no nae, na aina, na hale noho, na waiwai hooilina i hooakakaia maloko o ka moraki i oleloia, ma ke kudala akea ia ana e James F. Morgan, maloko o kona mau keena kudala ma Alanui Kaahumanu iloko o Honolulu i olelo mua ia ae nei, ma ka Poaono, ka la elima (5) o Sepatemaba, 1903, ma ka hora 12 awakea o ua la nei.
O ka waiwai i hoopaaia ma ka moraki i oleloia oia keia malalo iho:
O kela mau apana aina, apana a mahele o ka aina apau loa e waiho ia ma Puunui, maloko o Honolulu i oleloia, a i maopopo hoi oia na Apana Helu 15 ame 17, Kuea 3, o Puunui Aina (Tract), o Honolulu i olelo mua ia ae nei, a he hapa hoi o ka aina i hooakakaia iloko o ka Palapala Sila Nui (Grant) Helu 3050, a oia no hoi ka aina i hooliloia aku ai ia M. I. Silva i oleloia ma kekahi palapala kuai aina i hanaia ma Dekemaba 15, 1900, a i kakau kopeia ma ke Keena Kakau Kope o ke Aupuni ma ka Buke 216, ma ka aoao 221 ame 222, a nona ka iliaina o 10000 kapuai kuea.
Ma ke Kuike a ma ke Kala Gula Amerika ka makemake, a ma ka aoao o ka mea kuai mai na lilo palapala apau.
Hanaia ma Honolulu, Augate 3, 1903. CECIL BROWN, Kahu. 2975---Aug. 7, 14, 21, 28--Sept. 4.
_____________
HOOLAHA MANO PANIKU A KUAI A KA MEA PAA MORAKI.
______
MARIA G. KAHOIWAI.
_________
Ma keia ke haawiia aku nei ka hoolaha mamuli o ka mana kuai iloko o kekahi moraki i hanaia ma ka la 23 o Aperila, 1901, a i kakau kopeia iloko o ka Buke 220, ma ka aoao 177 et seq., ame ka mana iloko o kela moraki aie paku'i i hanaia ma Sepatemaba 30, 1901, a i kakau kopeia ma ka Buke 226, ma ka aoao 412 et seq., he mau moraki laua i hanaia e Maria G. Kahoiwai ame J. K. Kahoiwai, kana kane mare, no Honolulu, Oahu, ia The First American Savings and Trust Company of Hawaii, Limited, a o The First American Savings and Trust Company of Hawaii, Limited, i oleloia, ke manao nei o paniku i ka moraki i oleloia ame ka moraki aie pakui i oleloia e hoike ana i ka uku ole ia o ka ukupanee i ka wa e uku ai.
Ke haawi pu ia aku nei no hoi ka hoolaha e kuaiia aku ana apau loa, ma ke ano pakahi, na aina, na hale noho, ame na waiwai hooilina i hooakakaia maloko o ka moraki i oleloia ma ke kuai kudala akea ia ana e James F. Morgan ma kona lumi kudala ma Alanui Kaahumanu, Honolulu i olelo mua ia ae nei, ma ka Poaono, ka la 12 o Sepatemaba, 1903, ma ka hora 12 awakea o ua la nei.
O ka waiwai i hoopaaia ma ka moraki i oleloia, oia keia malalo iho:
Na Apana akahi-hapalua (1-2) o 6 ame akahi-hapalua (1-2) o Apana 7, Kuea A, e waiho la ma Kulaokahua, Honolulu, Oahu, a i hooakaka pono loa ia e like me keia malalo iho:
"E hoomaka ana ma ka ma-ka ma ka aoao makai o ke Alanui Lunalilo, 375 kapuai Akaukomohana o ke kihi komohana o na Alanui Keeaumoku ame Lunalilo a holo ma ka Meridiana oiaio:
Hema 21˚12' Kom. 90 kapuai holo ma ka hapa o Apana 6, Kuea A;
Akau 68˚48' Kom. 50 kapuai holo ma na Apana 26 ame 27, Kuea A;
Akau 21˚12' Hik. 90 kapuai holo ma ka Apana 7, Kuea A;
Hema 68˚ 48' Hik. 50 kapuai holo ma ke Alanui Lunalilo a hiki i kahi i hoomaka ai, nona ka iliaina o 4500 kapuai kuea, a he mau hapa hoi keia o ka Palapala Sila Nui (Grant) Helu 3400, a oia no hoi na apana i hooliloia ia Maria G. Kahoiwai i oleloia ma kekahi palapala kuai aina i kakau kopeia ma ka Buke 208 ma ka aoao 51.
Ma ke kuike a ma ke dala gula Amerika ka makemake, a ma ka aoao o ka mea kuai mai na lilo palapala apau.
Hanaia ma Honolulu, Augate 6, 1903. THE FIRST AMERICAN SAVINGS AND TRUST COMPANY OF HAWAII, LIMITED, Ma o kona Peresidena. CECIL BROWN, 2976--Aug. 14, 21, 28--Sept. 4, 11.
_____________________
O KA LOLI MAU o ka wai oia kekahi kumu e loaa ai i ka ma'i hi. Mamuli o keia, i hele mau ka poe kaahele honua me ka paa pu me ka omole laau kolela ame hi a Chamberlain i hiki mai ka manawa e loaa ai i keia ano pilikia alaila ua loaa no ka mea nana e hoola ae ia ino. Aohe he lua e like ai me keia laau pili i na pilikia o ka opu. Aole e hiki mai keia ano pilikia i ka manawa iluna o na kaa a maluna o na moku, a oia io no kahi i kupono loa aku ai keia ano laau. He mea pono e kuai kekahi i laau o keia ano mamua o ka hele ana. Ma kahi o Benson, Smith & Co., e loaa ai keia ano laau na Agena nui e kuai nei.
____________________
E nana akahele i na hoolaha o kela ame keia ano e puka aku nei i keia pule.
_______________________________
MA KE KAUOHA
______________
HOOLAHA HUI I HOOHUIIA.
___________
TERITORI O HAWAII, KEENA O KA PUUKU, HONOLULU, OAHU.
MA KA HANA O KA HOOPAU LOA ANA I KA WOLTERS WALDRON COMPANY, LIMITED, (KAUPALENAIA.)
Oiai ka Wolters Waldron Company, Limited, he hui i hoohuiia a i ku malalo ame ka malu o na kanawai o ka Teritori o Hawaii, mamuli o ua Kanawai la, a e like me ia i hoikeia malaila, ua waihoia mai ma keia keena he Palapala noi e hoopauia ua hui la, me ka Palapala Hooia i hoopili pu ia i kulike ai me ke Kanawai.
Nolaila, ma keia ke hoolahaia aku nei i ka mea a i ka poe apau i kuleana a e kuleana nei ma na ano apau iloko o ua hui la i oleloia e waiho mai i na kumu ku-e i ka aeia o ua noi la i oleloia ma keia keena ma ka la a mamua ae paha o ka la iwakalua-kumamawalu (28) o Sepatemaba, A. D. 1903, a o kela ame keia mea e makemake ana e loheia ma ia hana e hele kino ae ma ke keena oihana o ka mea nona ka inoa malalo iho ma ka Hale Mana Hooko, Honolulu, ma ka hora 12 o ua la la i oleloia e hoike mai no ke aha la e ae ole ia ai ia noi.
A. N. KEPOIKAI. Puuku o ka Teritori o Hawaii. Honolulu, Iulai 11, 1903.
__________________________
Teritori o Hawaii, )
)
Mokupuni o Oahu, )ss.
)
Kulanakauhale o Honolulu, )
Ma o ka hoohiki pakahi ia ana o Cecil Brown ame W. G. Cooper ua hoike e laua ma ka palapala a olelo ae he mau luna nui laua, o Cecil Brown ka Peresidena, a o W. G. Cooper ka Mea Malama Dala no ka First American Savings and Trust Company of Hawaii, Ltd., a o ka papa huahelu malalo iho nei, he hoike oiaio piha pono ia a pololei no na hana o ua hui la i oleloia ka First American Savings and Trust Company of Hawaii, Ltd., a hiki i ka la kanakolu (30) o Iune, 1903, pau pu me ua la ia i hoike mua ia ae nei.
O ke kumupaa o ka hui he $250,000 i maheleia iloko o 2,500 mahele (kea) o $100.00 waiwai io o ka mahele hookahi o ka heluna i hoopukaia he 2500 a ua uku piha ia na mahele apau.
Na loaa no na aie o ka Hui ma ka la 1 o Iulai, oia keia malalo iho:
Kumupaa........................................$250,000.00
Na Dala Hookomoia....................... 230,463.22
Na Puka ame Poho.......................... 890.14
Na loaa aie e ae............................... 12,500.65
Na waiwai e ae o ka Hui ma ka la 1 o Iulai, oia keia malalo iho.
Na Bila loaa mai $287,460.65
Na Bona.................. 76,000.00
Dala Kuike ma ka Banako.... 113,573.33
Ukupanee i pii ae a Iune 30, 1903 6,820.03
__________ ___________
$493,854.01 $493,854.01
(Kakauinoaia) CECIL BROWN, Presidena.
(Kakauinoaia) W. G. COOPER, Mea Malama Dala.
Kakauinoa a hoohikiia imua o'u i keia la--o Iulai, 1903.
(Sila)
(Kakauinoaia) W. P. ROTH.
Notari no ka Lehulehu Apana Hookolokolo Kaapuni Ekahi.
Ma keia ke hooia nei au o ka hoike maluna ae, he kope oiaio a pololei ia o ka hoike maoli a papa huahelu o ka First American Savings and Trust Company of Hawaii, Ltd., i hoohikiia imua o'u i keia la 27 o Iulai.
Hoikeia e kuu pulima ame ka sila i ka la ame ka makahiki i olelo mua ia ae nei. W. P. Roth,
Notari o ka Lehulehu, Apana Hookolokolo Kaapuni Ekahi. 2974--July 31--Aug. 7, 14.
_____________________
HOOLAHA I KA POE AIE.
WAIWAI O KILIKINA UNEA.
_______
O ka mea nona ka inoa malalo iho nei, John T. Unea, o kona hookohuia ana iho nei i Lunahooponopono Waiwai me ka Palapala Kauoha pakuiia o ka Waiwai o Kilikina Unea (w) no Kalaupapa, Molokai, mea i make, ma keia ke haawiia aku nei ka hoolaha i ka poe apau no ka lakou mau koi i ka waiwai o Kilikina Unea i oleloia, mea i make i hooiaio kupono ia me na bila a palapala hoike no na lilo, ina he mea kekahi o ia ano a ina ua hoopaaia ia mau koi me na moraki a me kekahi ano e ae, e waiho mai ma ke keena o Smith & Lewis, Lumi 206 Judd Building (Hale), Honolulu, Oahu, maloko o Eono Mahina mai ka la aku o keia hoolaha, a i ole e hoole mau loa ia aku lakou.
Hanaia ma Honolulu, Oahu, Iulai 17, 1903. JOHN T. UNEA.
Lunahooponopono Waiwai me ka Palapala Kauoha Pakui o ka Waiwai o Kilikina Unea, Mea i make.
Smith & Lewis and Louis J. Warren. Judd Building (Hale), Honolulu, na Loio o ka Lunahooponopono Waiwai.
2973----Julu 24, 31. ---Aug. 7, 14, 21.
_______________________
Ua Hoopuniia me ka Pohihihi
_______
Ma ka po Poalima nei i hanaia ai kekahi hou pahi pohihihi ma kekahi hale e ku nei ma ke kihi o na alanui Muliwai ame Hotele. Ua hele aku kekahi Iapana a olelo aku ia Makai Espinda ua houia kekahi Iapana i ka pahi, a i kona hiki ana aku ma ka lumi kuhikuhiia mai iaia, ua loaa aku kekahi Kepani i eha a e kahe mai ana ke koko. Ua laweia aku ua Kepani nei no ka Halema'i Moiwahine a ua hoomakaia ka huli ana no ke kolohe. Ua oleloia he wahine ka mea i ike i keia hana.
_____________________
Ma ka Poalua nei i holo aku ai o Lunakanawai George A. Davis no Kapalakiko. Aole paha oia e hoi hou mai ana no keia mau kaiaulu.