Ka Nupepa Kuokoa, Volume XLI, Number 33, 14 August 1903 — Ka Lunakanawai hou Lindsay [ARTICLE]

Ka Lunakanawai hou Lindsay

Ma kahi o ka hora 4 o ka auwina la o ka Poakahi nei i walho aku ai o Lunakanawai Elua Mr. Davis i kana palapala waiho oihana lunakanawai o ka Aha Hookolokolo Apana o Honolulu nei. Iloko o ke Keena Makai kahi i kakau ai o Lunakanawai Dayis i ua palapala

nei, lloko o ke keena o ke kakauolelo, a 1 ka paa ana, na kekahi makai i lawe i ke Kiaaina.

pMa ka noho ana o ka halawai a ka Mana Hooko o ke Aupuni i ke kakahiaKi o ua la nei, ua hiki kino aku no ua Ravis nel a hoike waha aku la no kona waiho aku i ka oihana lunakanawai, no kona manao e haaiele ia Hawaii nei, a ma ka noonoo ana, ua apono aku ke Kiaaina i ua noi waiho oihana la. A i ka auwina la iho i kakau ai o Mr. Davis i ka leka a hoouna ai, eia nae, I ua olelo hou ua wahi Davis nei e noho ana no oia i Hawaii nei. Ma keia waiho hakahaka ana o keia oihana ua iilo ia i mea e noonoo hou ia ai i kanaka kupono no ka hoopiha makalua ana, a ma ka panina o kēia noonoo ana, ua hookohu aku la ke Kiaaina ia Mr. Aiexander Lindsay i ka Poakolu nei, a oia iho la ka lunakanawai elua o ka aha hookolokolo apana o Honolulu. O Mr. Lindsay, he kanaka opio oia i hanau i Hawaii nei, a he kamaaina no Kona, a i hoonaauaoia iloko o kekahi kula a'o kanawai o Amerika. Ma ka hoike a ka Hon. Andrade, he kanaka makaukau o Mr. Lindsay i ka olelo Pukiki, a i kamaaina i ka olelo makuahine o ka aina nei.