Ka Nupepa Kuokoa, Volume XLI, Number 37, 11 September 1903 — Page 3

This text was transcribed by:	Kelly Murray
This work is dedicated to:	Awaiaulu

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, SEPATEMABA 11, 1903.

HOOLAHA KUMAU

_____

LEWERS & COOKE LUI A ME KUKE, Kaupalenaia

Na Mea Hookomo mai a Kuai aku i na LAKO HANA HALE

O Kela ame Kena Ano. Malaila e loaa ai na mea malalo iho.

_____

NA PAPA N.W., NA PAPA HOLE PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.

NA PENA LIKE OLE AME NA HULU PENA, NA ANIANI, NA PEPA HALE, PALE PUKA ANIANI MOENA, ETC.

O na kauoha pono hale apau loa e hiki mai ana ia makou e hooko koke ia no me ka eleu ame na KUMUKUA HAAHAA LOA.

LEWERS & COOKE

_____

Kakela me Kuke [KAUPALENAIA]

Poe Kalepa ma ke Komisina A HE POE LAWELAWE KOPAA

Poe Agena no na Mahiko Lehulehu

_____

KAUKA T. MITAMURA

Alanui Kukui Ololi Helu 68, Honolulu Na Hora Hana:

Hora 8 a 10 kakahiaka; hora 1 a 3 ame hora 6 a 7:30p.m. Sabati: Hora 6 a 8p.m.

Telepone White 152. P.O.Box 842

_____

KAUKA GEO. J AUGUR

Kauka Kuluwai Liilii.

LAAU MOMONA AOLE MULEA

Keena Hana 431 Alanui Beritania.

Telepona Helu 1851. Hora Hana 10-12a.m., 3-4 ame 7-8 p.m.

Sabati 9:30-10:30 a.m.

_____

JOHN M KEA,

He Notari no ka Lehulehu; he mea hana i na Palapala Kanawai, a he mea huli i na kuleana aiaa. O na kauoha mai na mokupuni mai e hookoia no me ka pololei.

Keena Hana: Ma ka Loio Kuhina, Hale Mana Hooko.

Honolulu, Mei 22, M.H. 1903.

_____

O KE..Koko Ino ka mea e loaa ai na Pilikia ma ke Kino.

E Heluhelu i keia mau Manao.

O KA LAAU'

AYER'S SARSAPARILLA - KA -

laau nana e hookaawale na ma'i ino mai kuu koko aku. He laau hoonoonoai, a he laau e hooikaika ana i kou mau iaia apau. O ka Laau Ayer's Sarasaparilla ka laau kaulana loa a puni ke ao holookoa. Ina e hoomau ia ka lawelawe ana i keia laau e loaa ana ka ke ola kino maikai a me ke koko maemae, hoi hou mai ka ula o kou mau lehelehe, pu'ipu'i maikai kou mau papalina, a loaa ke kulana ola kino maikai.

He loaa na pu'u paa o ke kino i ka laau Ayer's Sarsaparilla, e hoopakele ana mai ka ma'i puu paa (Brights Disease) a me na ma'i oia ano. Ke koi ikaika aku nei makou e lawe ia kela ano laau ma kahi i ike ia na ma'i Puupaa apau.

Hoomakaukau ia e Kauka J.C.Ayers. E loaa no keia mau Huaale ma na hale kuai laau apau.

_____

HALAWAI A NA AHAHUI EUANELIO AME KULA SABATI O HAWAII.

O na Ahahui i ha'lia maluna ae nei, e malama ia aku ana ma Kawaihaekai. Kohala Hema, ke hiki aku i ka hora 10a.m. o ka Poaono ekolu o Sepatemaba la 19, A.D. 1903.

Ua iini nui la na hoa o kela mau Aha, e hiki ae mamua o ka manawa i ha'i ia.

O ka ehu oia ka holomua o na hana.

DAVID ALAWA, Kakauolelo.

_____

KA MOOLELO KAAO O LAIEIKAWAI

KA HIWAHIWA O PALIULI, KA WAHINE O KA LIULA.

A ike iho la o Hauailiki, aole he kuleana hou e loaa ai o Laieikawai, alaila, hoomakaukau ae la na waa no ka hoi i Kauai, a ma ka wanaao, haalele lakou ia Keaau, a hoi aku la.

Ia Hauailiki ma i hoi aku ai i Kaua, a hiki lakou ma Wailua, ike aku la oia e akoakoa mai ana na'lii, ame na kaukaualii, o Kauakahialii, ame Kailiokalauokekoa kekahi i kela manawa.

Ia Hauailiki ma e hookokoke aku ana ma ka nuku o ka muliwai o Wailua, ike aku la oia ia Aiwohikupua, kahea akula. "Ua eo wau ia oe."

A hiki aku la o Hauailiki a ha'i aku la i ke ano o kana hele ana ia Aiwohikupua, me ka ha'i aku nae i ka lilo ana o kona mau kaikuahine i mau kiai no ke Alii, he mea olioli ia ia Aiwohikupua.

I aku nae oia ia Hauailiki, "Ua pau ka pili a kaua, no ka manawa onawa aku la no ia."

Iloko nae o ko Hauailiki manawa e kamailio ana no ka lilo ana o na kaikuahine o Aiwohikkupua i mau koa kiai no Laieikawai, alaila, ua manaolana hou ae la o Aiwohikupua e holo i Hawaii, no ke kii no ia Laieikawai e like no me kona manao mua.

MOKUNA XV.

Holo hou o Aiwohikupua i Hawaii - Papa o Waka i Laieikawai, aole e iho hou i Keaau - Kukuluia na kiai o ke Aliiwahine - Hiki o Aiwohikiupua ma i kahi o ke Aliiwahine, a loaa na pahu kapu - Halawai laua nei me Mailehaiwale.

I iho la o Aiwohikupua, "Pomaikai wau no kuu haalele ana i na kaikuahine o'u i Hawaii, a e ko auanei ko'u makemake; no ka mea, ua lohe ae nei wau, ua lilo ko'u mau kaikuahine i mau koa kiai no ka'u mea e manao nei."

I kela manawa a na'lii apau e akoakoa nei ma Wailua, alaila, ku mai la o Aiwohikupua a ha'i mai la i kona manao imua o na Alii. "Auhea oukou, e holo hou ana wau i Hawaii, aole au e nele ana i ko'u makemake, no ka mea, aiai'ku la i o'u mau kaikuahine ke kiai o ka'u mea e manao nei."

A no kela olelo a Aiwohikupua, pane mai la o Hauailiki, "Aole e loaa ia oe, no ka mea, ua ike aku la wau i ke kapu o ke Aliiwahine, a kapukapu no'hoi me ou mau kaikuahine, hookahi nae kaikuahine huhu loa, o kahi mea uuku, nolaila ko'u manao paa aole e loaa ia oe, a he uku no kou kokoke aku."

A no keia olelo ha Hauailiki, aole he manaoio o Aiwohikupua, no ka mea, ua manaolana loa kela no ka lohe ana o kona mau kaikuahine ma kiai o ke Alii.

Mahope iho oia mau la hoolale ae la oia i kona mau puali koa kiai, ame kona hanohano alii apau. A makaukau ke Alii no na kanaka, alaila, kauoha ae la oia i kona Kuhina e hoomakaukau na waa.

Wae ae la ke Kuhina i na waa kupono ke holo, he iwakalua kaulana, elua kanaha kaukahi, no na kaukaualii, ame na puali o ke Alii keia mau waa, a he kanaha peleleu, he mau waa a-ipuupuu no ke Alii ia. A o ke Alii hoi ame kona Kuhina, maluna laua o na pukolu.

A makaukau keia mau mea apau, e like me ka wa holo mau o ke Alii, pela lakou i holo ai.

He nui na ia i hala ma ia holo ana. A hiki lakou ma Kohala, ia manawa, akahi no a maopopo i ko Kohala poe o Aiwohikupua keia, ke kupua kaulana a puni na moku. A no ko ke Alii huna ana iaia ma kela hiki ana ma Kohala, i hakaka'i me Ihuanu, oia ka mea i ike oleia ai.

Haalele lakou ia Kohala, hiki aku la lakou i Keaau. I kela manawa a lakou i hiki aku ai, ua hoi aku o Laieikawai, ame na kaikuahine pu o Aiwohikupua i Paliuli.

Ia Laieikawai ma i hoi aku ai ma kela la a Aiwohikupua ma i hiki aku ai, ua ike mua mai ko lakou kupunawahine i ko Aiwohikupua hiki ana ma Keaau.

I mai la o Waka. "Ua hiki hou mai la o Aiwohikupua ma Keaau i keia la; nolaila, e kiai oukou me ka makaukau, e makaala ia oukou iho, mai iho oukou makai, e noho oukou mauka nei a hiki i ka hoi ana o Aiwohikupua i kauai."

A lohe ke koa kiai Nui o ke Aliiwahine i keia olelo a ko lakou kupunawahine, ia manawa, kauoha koke ae la o Kahalaomapuana ia Kihanuilulumoku ko lakou akua, e hookokoke mai ma ka Halealii, e hoomakaukau no ka hoouka kaua.

Ma ko Kahalaomapuana ano kiainui no ke Alii, kauoha ae la oia i kona mau kakauaana, e kukakuka lakou ma na mea e pono ai ke Alii.

Ia lakou i akoakoa ai, kukakuka iho la lakou ma na mea kupono ia lakou. A eia ka lakou mau olelo hooholo, ma o ka noonoo la o Kahalaomapuana, ke koa kiainui o ke Alii, "O oe e Mailehaiwale, ina e hiki mai o Aiwohikupua a halawai olua, e kipaku aku oe iaia; no ka mea, o oe no ke kiai mua loa, a ina e hai mai i kona makemake, e hookuke aku no, a ina i paakiki loa mai ma kona ano keikikane ana e hookuke ikaika aku iaia, a ina i nui mai ka paakiki, alaila, e hoouna ae oe i kekahi manu kiai ou i o'u la, alaila, e hele mai au e hoohui ia kakou ma kahi hookahi, a na'u ponoi e kipaku aku iaia. Ina he hele mai kana me ka inoino, alaila, e kauoha no wau i ko kakou akua ia Kihanuilulumoku, nana no e luku aku iaia."

A pau ia ka lakou kuka ana no keia mau mea, hookaawale lakou ia lakou iho e like me mamua, oiai e kiai ana lakou i ke Alii.

Ma ka wanaao oia po iho, hiki ana o Aiwohikupua me kona Kuhina. Ia laua i ike mai ai e ku ana ka pahu kapu, ua uhiia i ka oloa, alaila, manao ae la laua ua kapu ke alanui e hiki aku ai i kahi o ke Alii. Aka, aole nae o Aiwohikupua manao ia kapu; no ka mea, ua lohe mua no ia, o kona mau kaikuahine ka mana kiai; nolaila, hoomau aku la laua i ka hele ana, a loaa hou he paku kapu e like no me ka mea mua i loaa'i ia laua. Ua like no ko Aiwohikupua manao ma keia pahu kapu me kona manao mua.

Hoomau aku la no laua i ka hele ana a loaa hou ke kolu o ka pahu kapu e like me ka nui o kona mau kaikuahine.

A loaa ia laua ka ha o na pahu, alaila, kokoke laua e hiki i ka lima o ka pahu kapu, oia no hoi ko Kahalaomapuana pahu kapu. Oia no hoi ka pahu kapu weliweli loa, ke hoomaka ae la e malamalama loa. Aka, aole nae laua i ike i ka weliweli oia pahu kapu, no ka mea, e molehulehu ana no.

Haalele laua i keia pahu, aole i liuliu ko laua hele ana aku, halawai mua no laua me ke kiai mua me Mailehaiwale, mahamaha aku la o Aiwohikupua, no ka ike ana aku i ke kaikuahine; ia wa koke no, pane aku la Mailehaiwale. "E hoi olua ano, he kapu keia wahi."

Kuhi iho la o Aiwohikupua he hoomaauea, hoomaka hou aku la laua e hookokoke aku i o Mailehaiwale, kipaku hou mai la no ke kiai. "E hoi koke olua, owai ko olua kuleana o uka nei, a owai ko olua makamaka?"

"Heaha keia, e kuu kaikuahine?" wahi a Aiwohikupua, "ka i no o oukou no ko'u makamaka, a ma o oukou la e loaa'i ko'u makemake."

Ia manawa, hoouna aku la o Mailehaiwale i kekahi manu kiai ona, a hiki i o Kahalaomapuana la; he manawa ole, hoohui ae la keia ia lakou a eha ma ko Mailekaluhea wahi kiai, a malaila i manao ai lakou e halawai me Aiwohikupua.

MOKUNA XVI.

Hiki o Kahalaomapuana, hookuke mai ia laua nei, a hoi aku la a hiki i Keaau - Ka olelo kauoha a Waka - Pii ka puali koa o ke Alii e luku i na kaikuahine - Hoouna hou ia na kanaka e pii hou - Kena ke Alii i na elele.

A makaukau lakou, kii ia'ku la lakou a hiki mai la. Ia Aiwohikupua i ike aku ai ia A Kahalaomapuana e kau mai ana kela iluna o na eheu o na manu, me he Alihikaua Nui la, a he mea hou loa ia ia Aiwohikupua ma. pane mai la kiai Nui, "E hoi olua ano, mai lohi, a aole hoi e kali, no ka mea, ua kapu ke Alii, aole no ou kuleana ma keia wahi, a aole no hoi e hiki ia oe ke manao mai he mau kaikuahine makou no'u, ua hala ia manawa." O ke ku aku la no ia o Kahalaomapuana hoi, pau ka ike ana.

I kela manawa, u a ho-aia ka inaina wela o Aiwohikupua a mahuahua. Ma ia manawa, manao iho la oia e hoi a kai o Keaau, alaila, hoouna mai i kona mau puali koa e luku i na kaikuahine.

Ia laua i kaha aku e hoi a hiki i ka pahu kapu o Kahalaomapuana, aia hoi ilaila, ua hoopiiia ka huelo o na moo nui nei iluna o ka pahu kapu, ua uhiia i ka oloa, ka iaia, a me ka palai, a he mea weliweli loa ia laua ka nana ana aku.

A hiki o Aiwohikupua ma i kai o Keaau, ia manawa hoolale ae la ke Kuhina o Aiwohikupua oi na puali koa o ke alii e pii e luku i na kaikuahine, ma ke kauoha a ke Alii.

Ia la no, ike mua mai la no o Waka i ko Aiwohikupua manao, ame kana mau hana. A no ia mea, hele mai la o Waka a halawai me Kahalaomapuana, ko ke Aliiwahine Alihikaua, olelo mai la, "E Kahalaomapuana, ua ike wau i ka manao o ko oukou kaikuanane, ame kana mau hana, ke hoomakaukau la oia i umi mau kanaka ikaika, nana e kii mai e luku ia oukou, no ka mea, ua inaina ko oukou kaikunana, no ko oukou kipaku ana i kakahiaka nei; nolaila, e noho makaukau oukou ma ka inoa o ko kakou akua."

Ia manawa, kauoha ae la oia ia Kihanuilulumoku, ka moo nui o Pliuli, ke akua o lakou nei. A hiki mai la ua moo nei, kauoha aku la oia, "E ko makou akua, e Kihanuilulumoku, nanaia ke kupu, ka eu, ke kalohe o kai, ina e hele mai me ko lakou ikaika, pepehiia apau, aohe ahailono, e noke oe a holo ke i olohelohe, e ao nae oe ia Kalahumoku, i ka ilio nui ikaika a Aiwohikupua, hemahema no oe, pau loa kakou, aole e pakele, kulia ko ikaika, ko mana a pau iluna o Aiwohikupua, Amama, ua noa, lele wale la." Oia ka pule kauoha a Kahalaomapuana i ko lakou akua.

Ia laua i hala aku ai, halawai aku la laua me Mailelaulii, a e like no me ka olelo a laua nei imua o na mea mua, pela no laua i hana ai imua o Mailelaulii.

A no ka maalea loa o laua i na olelo malimali, nolaila, ua hookunia la ua mai ko Mailelaulii alo aku. A hala aku la laua, halawai aku la me Mailepakaha, ka ha o na kiai.

Ia laua i hiki aku ai imua o Mailepakaha, aole he oluolu iki o keia kiai i ko laua hookuuia ana mai e na kiai mua; aka, no ka pakela o ka maalea ma ke kamilio ana, ua hookuuia aku la laua.

A hala aku laua, aia hoi, ike aku la laua ia Kahalaomapuana, ke kiai ma ka puka o ka Halealii, e kau mai ana iluna o ka eheu o na manu, a ike la no hoi i ke ano e o ka Halealii, ia manawa haule aku la o Hauailiki i ka honua, me ka naau eehia.

Ia Kahalaomapuana i ike mai ai ia laua nei, he mea e kona huhu, alaila, kahea mai la oia me kona mana, ma ke ano Alihikaua no ke Alii, "E Hauailiki e! e ku oe a hele aku; no ka mea, aole o olua kuleana o keia wahi , ina e hoopaakiki mai oe, alaila, e kauoha no wau i na manu o Paliuli nei, e ai aku i ko olua mai i'o, me ka hoi uhane aku hoi i Kauai."

A no keia olelo weliweli a Kahalaomapuana, alaila, ua hoopauia ko Hauailiki naau eehia, ala ae la ia a holo wikiwiki aku la a hiki ma Keaau, ma ke kakahiaka nui.

Ma keia hele ana a laua iuka o Paliuli, ua nui ka luhi, a no ia luhi, haule aku la laua a hiamoe.

Iloko nae o ko Hauailiki manawa hiamoe, halawai mai la o Laieikawai me ka moeuhane, a halawai pu iho la laua, a i ko Hauailiki puoho ana ae mai ka hiamoe, aia hoi, he moeuhane kana.

Moe hou iho la no o Hauailiki, loaa hou no iaia ka moeuhane, e like me mamua. Eha po, eha ao, o ka hoomau ana o keia mea ia Hauailiki, nolaila, ua pono ole ko Hauailiki manao.

I ka lima o ka po o ka hoomau ana o keia moeuhane ia Hauailiki, ma ka pili o ke ahiahi, ala ae la oia a pii aku la iuka o Paliuli, me ka ike ole nae o kona hoa.

Iaia i pii aku ai, aole oia i hele aku ma ke alanui mua a laua i puu mua ai, a ma kahi e kokoke aku ana i Mailehaiwale, hele ae la keia ma kahi kaawale, a pakele aku la i na maka o na kiai o ke Alii.

Iaia i hiki ai mawaho o ka Halealii, ua hiamoe loa o Kahalaomapuana, alaila, nihi malu aku la ko Hauailiki hele ana, a wehe ae la i ke pani o ka puka o ka Halealii, ua uhiia mai ka Ahuula, aia hoi, ike aku la ia ia Laieikawai e kau mai ana iluna o na eheu o na manu, ua hiamoe loa no hoi.

Iaia i komo aku ai a ku ma kahi a ke Alii e moe ana, lalau aku la oia i ke poo o ke Alii, a hoolulilui ae la. Ia manawa, puoho mai la o Laieikawai mai ka hiamoe ana, aia hoi e ku ana o Hauailiki ma kona poo, a he mea pono ole ia i ko ke Aliiwahine manao.

"Alaila, olelo malu mai la o Laieikawai ia Hauailiki, "E hoi oe ano i keia manawa, no ka mea, ua waihoia ka make ame ke ola i ko'u mau kiai; a nolaila, ke minamina nei wau ia oe; e ku oe a hele mai kali."

I aku la o Hauailiki, "E ke Alii, e honi kaua, no ka mea, ia'u i pee mai ai iuka nei i keia mau po aku nei la, ua hiki mai wau iuka nei me ko ike ole; aka, ma ka mana o kou mau kiai, ua kipakuia wau, a ia maua i hiki ai i kai, a no ka maluhiluhi, haule aku la wau hiamoe. Ia'u e hiamoe ana, halawai pu iho la kaua ma ka moeuhane, aka haule iho la kaua, a ua nui na la ame na po o ka hoomau ana ia'u o keia mea; nolaila wau i pii mai nei e hooko i ka hana a ka moeuhane."

I aku la o Laieikawai, "E hoi oe, aole o'u manao i kau mea e olelo mai nei; no ka mea, ua loaa no ia mea ia'u ma ka moeuhane, ua hana no e like me ka hana ia oe, a heaha la ia mea ia'u; nolaila, e hoi oe."

Iloko o ko Kahalaomapuana manawa hiamoe, lohe aku la oia i ka haukamumu o ka Halealii, a puoko ae la oia mai ka hiamoe ae, kahea aku la me ak ninau aku, "E Laieikawai! Owai kou hoa kamailio e haukamumu mai nei?"

A lohe laua i keia leo ninau, hoomaha iho la ke Alii aole i pane aku.

A mahope, ala ae la o Kahalaomapuana, a komo aku la i ka Halealii, aia hoi e noho mai ana o Hauailiki me Laieikawai iloko o ke Halealii.

I aku la o Kahalaomapuana, "E! e Hauailiki, e ku oe a e hele, aole i kupono kou komo ana mai nei, ua olelo aku wau ia oe i kela po mamua, aole ou kuleana ma keia wahi, ua like no ka'u olelo i keia po me ka po mua, nolaila, e ku oe a hoi aku."

A mahope, ala ae la o Kahalaomapuana, a komo aku la i ka Halealii, aia hoi e noho mai ana o Hauailiki me Laieikawai iloko o ke Halealii.

A no keia olelo o Kahalaomapuana, ku ae la o Hauailiki me ka naau hilahila, a hoi aku la i kai o Keaau, a ha'i aku la i kona hoe no keia pii ana i Paliuli.

(Aole i pau.)

_____

Ua Paa Iloko o na Umii Ikaika

Ua hele aku o Ilamuku Hendry ma Iwilei ma ka auwina la Poakolu o keia pule iho nei e hopu i kekahi kepani o Fukumatsu ka inoa no ka hewa hoopae mai i na wahine o kona lahui no na hana kupono ole! I ka paa ana o ka lakou mea i hele aku ai e hopu a ia lakou hoi i hoomaka mai ai e hoi, ua lohe o kekahi hale, a a holo koke aku lakou e nana i ke kumu o kela hana, a i ke komo ana aku o Maheleolelo Gaffney, ua ike aku oia e paa ana o Makino, he Iapana maheleolelo. I ka pulii a Okoiakai, he kaeaea ma ka hana hakoko. I ka ike ana o ka Ilamuku i keia mea, ua komo aku oia e uwao, a ia manawa no hoi ua hiki mai kekahi makai a ua hopuia ua Iapana nei no ka hoeha.

Ma ka olelo, ua manao oia he kiu o Makino, a oia kona kumu i manao ai e hoeha iaia, a ina aole i komo aku na limahana o ke Aupuni Amerika, ina ua hakihaki na au o ka maheleolelo iaia.

I kona hookolokoloia ana imua o Lunakanawai Lindsay i ke kakahiaka Poaono nei, ua kopi paakai ia mai oia he $25 hoopa'i ame na koina. Awaawa no ka hoopa'i maluna o ka poe ha'iha'i kanawai i keia mau la.

_____

HOOLAHA KUMAU

_____

Hui Alahao ame Ainao Oahu

MANAWA HOLO Mei 1, 1903.

MAI HONOLULU AKU

No Waianae, Waialua, Kahuku ame na wahi hoolulu me ke alahao -

9:15a.m., 3:30p.m.

No Pearl City, Ewa Mill, ame na wahi hoolulu ma ke alahao -

7:30a.m., 9:15a.m., 11:05a.m., 8:15p.m.,

3:30p.m., 4:15p.m., 5:15p.m.,

9:30p.m., 11:15p.m.

MAI WAHO MAI.

Ku i Honolulu mai Kahuku, Waialua, ame Waianae mai

8:36a.m., 5:31p.m.

Ku i Honolulu mai Ewa Mill ame Pearl City mai -

6:50a.m., 7:46a.m., 8:36a.m., 10:38a.m., 3:06p.m.,

4:31p.m., 5:31p.m., 7:40p.m.

5:31p.m., 7:40p.m.

Kela ame keia la.

Sabati wale no.

Koe ke Sabati.

G.P.DENISON, Lunahoohana.

F.C. SMITH,

G.P. & T.A.

_____

HE Kuai Hoopau Loa

MA KO'U HALEKUAI ma Alanui Hotele

E hooliloia aku ana na PALULE, PALEILI, KIMONA, PAPALE ame na pono Iapana ma na kumukuai i loaa mai ai no ka pomaikai o ka poe paa i ka hana i ke ao a hiki ole hoi ke hele e kuai i ka lakou mau mea e makemake ai.

E hamama no i na ahiahi apau, a e hele ami apau loa e nana ina aole makou e ha'i ana i ka oiaio.

S.OZAKI,

Waverly Block Alanui Hotele.

_____

HE HOALOHALOHA NA KE KULA SABATI O LIHUE.

I ko makou makamaka aloha nui iloko o ke Kula Sabati o Lihue nei ame ke aloha o ka Haku Iesu Kristo. Mr. F.Kolohaiole. Luuluu wale!!

Oiai, ua oluolu i ka Makua Mana Loa ka lawe ana aku i ka hanu hope loa o kau wahine aloha Mrs. Kealoha Kolohaiole ma ke aumoe o ka po Poaha la 14 o Augate, ma ka hora 1pm M.H. 1903. Ma ko olua home aloha ma Lihue, mokupuni o Kauai. Kekahi haumana Kula Sabati, makaala, eleu, hoihoi, a aloha no hoi i ke Kula Sabati.

A oiai, ma o kona haalele ana mai ia oe kana kane aloha, ua ili iho maluna ou, ka olua keiki, na makamaka, na hoaloha na Kahu Kula Sabati, na kumu ame na haumana apau o ke Kula Sabati o Lihue nei, ke kaumaha, luuluu, mokumokuahua ame ka palauma aku, me ke aloha nui nona ma keia ao. E like me ka ko kakou Haku Hoola e olelo nei:

"Mai hookaumahaia ko oukou naau." "Ma ka Hale o ko'u Makua he nui loa na wahi e noho ai." Ke olelo hou nei oia penei: "Pomaikai ka poe make ke make iloko o ka Haku." No ka mea, aole e puka mai ka popilikia mai ka lepo mai, aole hoi e kupu mai ka ehaeha mai loko mai o ka honua. Aka, ua hanau ke kanaka no ka ehahea. E like me na hunaahi i lelel ae iluna" "No ka mea, ke hoe ma mai nei la, a e lapaau mai hoi, ke hahau mai nei oia, a e hoola mai hoi kona mau lima."

Nolaila, o makou o ke Kula Sabati o Lihue nei, ma o ko makou komite la, e ae mai e komo pu aku makou me oe, a e kaana pu ina haawina luuluu, me ke kaumaha ame ke aloha oiaio. A ke nonoi nei ka makou mau leo pule pakahi i ka Makua Mana Loa, e loaa iaia kela pono oi mae ole ma o kela Paredaiso nani. A no ka mea, o ke alanui a na i hele aku la, he alanui ia e loaa kau ana ia kakou apau. He oiaio nana no i haawi mai a nana no i lawe aku la, e hoomaikaiia kona inoa. O makou iho no ke Kula Sabati o Lihue. Kauai, ma o ko makou komite la i kohoia.

JAMES H.K. KAIWI.

KA HOALOHALOHA A KA HUI ALOHA O NA WAHINE O LIHUE KAUAI.

MAMULI O KE KIPA ANA MAI O ka Anela o ka make, a lawe aku la i ka hanu ola makemae o Kealoha Kolohaiole, ko makou hoaloha a hoa hooikaika pu iloko o na hana a ka Haku o ke kristiano oiaio, ma ke ano he iaia no ka "HUI ALOHA" o na wahine o ka Apana o Lihue, Kauai, ma ko laua Home aloha ma Lihue, Kauai, i ka la 14 o Augate, A.D. 1903.

NOLAILA, UA HOOHOLIA Ke komo aku nei na iaia apua o ka "HUI ALOHA" o na wahine o ka Apana o Lihue, Kauai, iloko o ke kumakena pu ana (nona) me ke kane i hooneleia i ka wahine ole; a ua.

HOOHOLO HOU LA: "E hoomaikai la o Iehova ma na Lani Kiekie Loa, he malu ma ka honua, he aloha Oia i ke kanaka." "Nana no i haawi mai, a Nana no i lawe aku." E malu pu kona uhane iloko o ka Haku Iesu.

Na Komite:

MRS. E. LOVELL,

MRS. H.K. KAHELE,

MRS. S.K. KAEO,

MRS. K. AH CHOY.