Ka Nupepa Kuokoa, Volume XLI, Number 40, 2 October 1903 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

 

Ma ke Kauoha.

 

HOOLAHA I NA MOHO NO KE KAU KOHO BALOTA NO NA OIHANA KALANA.

Teritori o Hawaii.

Keena o ke Kakauolelo.

            Ma keia ke haawiia aku nei ka hoolaha mamuli o ke kauoha o ka kanawai o na moho no ke kau koho balota no na oihana kalana no ka Mokupuni o Oahu e waiho mai i ka lakou mau palapala koho moho @e ke Kakauolelo o ka Teritori aole e emi malalo o Umi la mamua o ka La Koho Balota no na Oihana Kalana, a o ua poe palapala koho la e kupono loa e waihoia mai iloko o keia keena aole e hala mahope o ka Hora Elima o ka auwina la o ka Poalima, Okatoba 23, A. D. 1903.

            Aole e kupono kekahi mea no kekahi oihana iloko o ke kalana a apana paha ke ole i piha kona mau makahiki i ka iwakalua-kumamakahi, he kamaaina hoi no ka Panalaau, he mea koho balota o ke kalana a apana paha ana e noho ai, a he mea noho hoi no ekolu makahiki mamua koke iho o ia koho ana, a aole kekahi mea ma keia hope aku e kupono no ka oihana loio apana ke ole e ae mua ia e lawelawe i ka oihana kanawai e ka Aha Kiekie o ka Panalaau o Hawaii.

            E waiho pu mai Iwakalua-kumamalima Dala me kela ame keia palapala koho e pono ai, a e kakauinoaia ua palapala koho la e Iwakalua-kumamalima Poe Kupono i ke Koho Balota o ke Kalana o kahi o ke kau koho e malamaia ai.

            G. R. CARTER,

            Kakauolelo o ka Teritori.

C. R. BUCKLAND,

            Mea Hoopaainoa Koho Balota.

Hale Mana Hooko, Okatoba 1, 1903.

            2983—Oct. 2, 9, 16.

 

Nuhou Kuloko

 

            He $7,438.20 ka loaa puka o kela kau kinipopo iho nei.

 

            I keia mau la iho paha e holo mau aku ai na kaa uwila no Kaimuki.

 

            Ua nee ae nei ka hale hoolulu kaaahi a kokoke i ke alanui Iwilei, kona kahua hou.

 

            He mau hana pepehikanaka ano nui ka i lawelaweia i keia pule e na Iapana.

 

            Ke aleale mai nei ke kai o na hana hoeueu kalaiaina o keia kau koho balota ae.

 

            Ma ka Mauna Loa i loheia mai ai he nui ka ino ma Honokaa, Hawaii i kela pule iho nei.

 

            Ua puka ae ka lohe e hoopauia ana ke ku ana o ka Hui Poola a Jack Mansfield e noho peresidena nei.

 

            Koho ia Moses K. Nakuina ka Moho Kuokoa no ke Kakauolelo ame Luna Kakau Kope o ke Kalana o Oahu.

 

            Eia ke komo mai nei na palapala holo luna aupuni kalana i ke Keena Kakauolelo i keia mau la.

 

            Ua wehe ae nei ka Hui Hana Hao Honolulu i keena ma Hilo, Hawaii, no ke kuai ana i na pono hao like ole.

 

            Ua huli hoi mai ke kanikela Iapana Miki Saito mai Kauai mai a e noho koke aku ana oia e hooponopono i ka olohani ma ka mahiko o Honolulu.

 

            Ma ka la apopo e malamaia ai ka fea ame ka luau no ka pono o ka Home Hoohanau keiki ma ke kahua o ka Home e ku nei.

 

            Ma keia ahiahi Poaono iho, Okatoba 10, e hoikeike ia ai o "Kaala" e ka Hui Hoolealea Hawaii ma ka Hale Mele Hou.

 

            Ma ka Poalua iho nei ka piha ana o na makahiki he 25 o ke ku ana mai o ka moku Kelemania Priscilla me ka puulu Pukiki mua loa no Hawaii nei.

 

            Aohe o Lunanui o na Hana Hou Cooper i hoopau ia Kale Kalaka mai ke kulana luna alanui ae e like me ka wawa e hoopauia ana.

 

            Ma ke kakahiaka Poakolu nei i haawi aku ai ka Hui Kaa Uwila i ka lohe i ka Lunanui o na Hana Hou ua lilo mai na pono apau o ka Hui Kaa Hapaumi i ka hui mua i oleloia ae nei.

 

            Ua loaa ka pepa hoololi mai na kaa hapaumi a na kaa uwila i keia mau la. I loaa iho nei keia mea ma o ka pau ana o na pono apau o ka Hui Kaa Hapaumi i ka Hui Kaa Uwila.

 

            Ua haawi luau ae na keiki kinipono o Kamehameha i kela Poaono iho nei ma Kapalama. Ua piha lealea lakou no ka lilo ana o ka lanakila kinipopo o keia makahiki ia lakou.

 

            I kekahi kaa uwila e holo ana mawaho ae o Kapiolani Paka i ka auwina la Lapule nei, ua lele aku kekahi haole ilalo oiai no e holo ana ke kaa uwila. Ua waiho maule oia no kekahi mau Ua pa kona poo i ka pou a haule ilalo. minute loihi.

 

            Ua wawaia ae i kela mau la iho nei, ina e aponoia ana ke koi a ka Ahahui Loio i elima lunakanawai o ka Aha Kiekie, o Kiaaina Dole aku ana paha kekahi lunakanawai i kona wa e pau ae ai ma kona noho kiaaina ana.

 

            Ua hanau mai he keikikane puipui na Mr ame Mrs. John Kalaukoa o Maemae, Honolulu, i ka po Poalima, la 2@ o Sepatemaba iho nei a me ke ola maikai ia e noho mai nei ua malihini nei.

 

            He lono telegarapa ka i loaa mai i ka Poakolu nei mai Wasinetona mai e olelo ana me Peresidena Rusawela o Kakauolelo Teritori Carter kahi i paina awakea ai ia la a ua nui ka laua kamailio ana maluna o na mea e pili ana ia Hawaii.

 

            Aia i ka mokuahi Helene o ka Hui Mokuahi o Waila ka hikiwawe o ka hooili kopaa ana iwaena o na mokuahi piliaina apau, he 5495 eke i hooiliia ma ka la 26 a he 4,070 i hooiliia i ka la 28 a hiki i ka hora 11:45 o ke kakahiaka o kekahi la ae.

 

He Pomaikai

NUI KA POE E HOIKE MANAO OHAOHA NEI ILOKO O HONOLULU.

            He pomaikai nui maopopo maoli ia.

            E huliia nei e ka nui kaukani.

            O Honolulu ia e huli pauaho ole nei.

            He nui wale o na kanaka hoopilikiaia e noho hauoli nei.

            He mau po hoomaha ole me na la popilikia.

            Ola ka hana a ka ili maneo.

            Pela no hoi ka ma'i maneo.

            Ua like no ka ino o ka ma'i maneo me ka puikaika o ka hoola ana.

            Aka o ka aila hamo a Doan ka mea nana e holoi pau aku, pau pu na ma'i maneo apau o ka ili.

            He pomaikai nui maoli keia i ka lehulehu popilikia.

            Eia ka hooiaio e kakoo ana i ka makou olelo:

            O Mr. H. Ryall o ke alanui Grosvenor Helu 11, South Yarra, he kamaaina kahiko loa no Melbourne, Auseturia, eia kana olelo:

            "No kekahi manawa loihi i noho ai au iloko o ka uiha o ka ma'i maneo he ma'i popilikia nui i ike a hoomaopopoia. I kekahi manawa ua hoopilikia loa mai keia ma'i manao oi loa aku i ka po a i ka wa wela no hoi. Ua hamo iho la wau ia'u iho me ka aila a Doan a loaa koke iho la ia'u ka maha mailoko mai o keia hoopilikia nui. a'u e hauoli nui nei i ka hoike aku i ka lehulehu no keia pomaika l loaa a'u.

            He maikai a he kupono loa ka laau hamo a Doan no na ma'i maneo apau loa o ka ili, o ke nahuia e na meakolo ame na eha palahu ame na ano maneo like ole no apau Aohe he hoopilikia ma ke kau ana a he ola maoli no na ma'i kuluma o ke ano like i ike ole ia ke ola i kekahi poe laau e ae no na makahiki he nui i hala ae.

            He kuaiia keia laau hamo a Doan e ka poe kuai laau lapaau apau ame ka poe malama halekuai ma ke kanalima keneta o ke poho hookahi a i ole e loaa aku no mai ia Hollister Drug Co., Ltd., na Agena o Hawaii Paeaina ma ke ekeleka ke kauoha aku me ka hoouna pu aku i ke kumukuai.

 

KA OLELO HOOPAA A WILIKOKI.

HOIKE I NA HAWAII AOLE E HOPU I NA LEPERA.

E HOOPAU PU ANA OIA I KA PA HOOMALU.

            Ma na loheia mai ma na haiolelo a R. W. Wilikoki ua hoike aku oia i na Hawaii ke kohoia oia i Makai Nui e hoopau ana oia i ka pa hoomalu o Kalihi me ka hoopaa pu aku ina e koho ia alaila aole oia e hopu i na ma'i lepera.

            Ma keia mau mea a Wilikoki e haiolelo nei ke hoopiha nei oia i ke kalana o Oahu me na ea like ole e manaoio ai na Hawaii puni wale i na olelo o keia ano ina no he oiaio ole ame ka hiki ole ke hookoia e manaoio la ana no.

            I ka hookuku ana i keia me na manao i haawia e Makai Kiekie Brown ma kana haiolelo o ka Poakolu nei ua kulike ole na ike no ka mea ke olelo nei o Brown aole i pili aku ka hana a ka oihana makai i ka lawelawe ana i ka hana a Wilikoki i olelo ikaika ai.

            O ka hopu ana i na lepera aole ia he hana na ka oihana makai aka na ka Papa Ola ia, a me keia wahi i like ole ai na ike kanawai o keia mau moho o ka oihana hookahi e holo nei no ke kalana o Oahu a i ka nana ana he mea pololei ka Brown.

            Na ka Papa Ola ka hana aka me he la, ma ke kauoha a ka Papa e hooko ai ke kumu e ikeia nei na makai i ka hopu i na ma'i.

            Ina no e puka o Wilikoki ma ka oihana makai nui aole no ia he mea nona e noho poo ai, no ka mea, e ike ana no oia aole oia ke noho poo maluna o ka oihana makai o ke kalana o Oahu.

            Ke olelo nei ke Kanawai Panalaau na ke Kiaaina e hookohu i na luna aole he wahi o ke kanawai kalana e olelo ana e kapaeia ka oihana makai kiekie, nolaila e ku no oia e like me ka mau i ka manawa e noho ae ai ka mea e puka ana a noho ma ka oihana maka nui.

            A wahi a ka hoike manao o kekahi o na Repubalika ua olelo ae oia ina e hopu ole o Wilikoki alaila na ka Makai Kiekei e hooko aku.

 

HE HOALOHALOHA.

            Oiai ua oluolu i ka Makua Mana Loa ka lawe ana aku i ka olua mea i minamina ai a i aloha ia no hoi, Miss Victoria Kaleidaimana Lilikalani a ke komo pu aku nei e u me olua ame ka ohana ka papa Kula Sabati makuahine o Kawaiahao a he mau pauku elua o ka aoao 77 o ka Hoku Ao Nani.

            Ma o ke komite la Mrs. R. K. Anahu Sept. 30, 1903.

            Na ke Akua no i haawi mai, a Nana no i lawe aku, e Hoomaikaiia no Kona inoa.

 

KOKOKE E LIIA KE KAHUNAPULE.

            VENTURA, Cal., Sept. 30.—O F. T. Allen, he kahunapule kuonoono o ka hoomana Mekokika Kuokoa, ua hopuia i keia la no ka holokake i na kaikamahine liilii. Ua akoakoa koke ae kekahi poe ano hoohaunaele a mea ae e li i ua kahunapule nei a i pale wale ia no ma o ke komo ana mai o na makai.

 

WELIWELI KA HANA A KA BUBONIKA.

            TIENTSIN, Kina, Sept. 30.—O ka Maheleaina o Petung, kahi i noke ia iho nei e ka ma'i bubonika, ua haaleleia aku e na mana kauoha. Ke make nei na kanaka ma na haneri, o na kulana o ko lakou noho'na, oia ka mea e hiki ole ai ke pale ae i ka laha ana o ka ma'i.

 

            Ma ka oihana kakauolelo ame kakau kope o ke Kalana o Oahu ua lawe ae o Moses K. Nakuina iaia iho i moho kuokoa no ia oihana ma keia hakoko koho balota.

 

            Ua hooholoia iho nei e kukuluia i hale hoikeike no Hawaii ma ka Fea Nui e malamaia ana ma Sana Lui i keia makahiki ae.

            Ua loaa aku ke kino o kekahi bebe Iapana e lana ana iloko o ke kahawai o Kalihi i ka auwina la Lapule nei. Ma ka hoomaopopoia iho, he mau hora no ke ola ana o keia bebe mahope o kona hanau ana.

 

Ake ia o Kale Kalaka e Hoopau.

            Ina e hoolohe mai ana o Henry E. Cooper ka Lunanui o na Hana Hou i ka ke Komike Repubalika alaila e nele ana o Kale Kalaka mai kana hana ae i keia manawa. O Kale Kalaka oia ka Lunanui o ka Pahoomalu o Waiokamilo i pau iho nei a e noho hana luna hana alanui nei malalo o ke Keena o na Hana Hou ma ka hoohana ana a Kale Wilikina.

            Ua loaa aku ia Kale Kalaka keia hana luna alanui mai a Kale Wilikina aku ma ka hooiaio a hooikaika ana o ke Komike Repubalika.

            Ua ikiiki loa ke Komike Kuwaena Repubalika ia Mr. Kalaka (Clark) no ka mea he Home Rula oia i keia manawa a ua hooia io mai no oia i kona hooikaika no Kimo Boe ma ke ano Lunakiai.

            O Kale Wilikina oia ka mea e noho hana nei ma kahi i waiho hakahaka ia e Mr. C. B. Dwight he luna alanui nui, a o kekahi o na hana mua loa a Wilikina oia ka hoonoho ana ia Kale Kalaka ma ke ano luna hana alanui no Honolulu.

            Ma kela hana a Wilikina ua oleloia ua kahea mai ka Lunanui o na Hana Hou Mr. Cooper iaia e wehewehe pono aku i ke kumu nui o kona hoonoho ana i ke kanaka (Kalaka) i hoohemo koke ia aku mai ke keena aku ma o na kumu kupono ole la.

            Ma ko Wilikina aoao ua hu'e ae la oia mai kona pakeke ae he wahi palapala a hoike aku la imua o ka Lunanui o na Hana Hou a i ka nana ana iho ua ike ia iho la he palapala hooiaio ia a hooikaika a ke Komike Kuwaena Repubalika no ka hoonoho ana ia Kale Kalaka ma ke ano he luna hana alanui no Honolulu. Ma kona ike ana i keia hana i like loa me kana hookohu ana ia Wilikina a ke komike no i hooaiai ai ua ekemu leo hou ole aku oia.

            Ma ka noho ana o ke Komite i ka Lapule nei i hooholo ai lakou e waiho aku i keia manao imua o Kale Wilikina e unuhi ae i ka lakou palapala hooia a hooikaika no Kale Kalaka no kela wahi ana e noho hana la, ka hana hoi a ke komike i manao ai oia ka hana maikai kupono a ke komike e hana ai no ke kauoha aku ia Kalaka e waiho mai i ka hana.

            Ua hoounaia ke noi ia Kale Wilikina eia nae ua kanalua no ke Komike i ka hana io ia mai o ke noi.

            Ua olelo pu ia ae e noonooia aku ana ko Kale Wilikina kulana no ka mea ua oleloia ae oia kekahi e hooikaika nei no Kimo Boe.

 

He Poe Home Rula Wale No.

            E noii aku ana ke Komite Hooko o ka aoao Repubalika i kekahi mau mea e pili ana no Charley Clark (Kale Kalaka), he mea e ohi nei i kekahi uku maikai mai ke keena mai o na Hana Hou, eia nae, ke oleloia nei, eia oia ke hana oolea nei no ka pono o James H. Boyd (Kimo Boe), he moho Home Rula. Maluna iho o keia lohe ua loaa mai kekahi hoakaka e olelo ana o C. B. Wilson (Kale Wilikina) ka Luna Alanui, e noiiia aku ana e like me ka mea i hoikeia ae nei, a e waihoia aku ana kekahi apono ana e hoopauia ae keia mau kanaka mai ka noho oihana ana malalo o ka hookele aupuni Repubalika.

            Ua oleloia ae ua hoike akea ae o Wilikina i kona manaopaa e hana no Boe, ka Home Rula. Maluna o ka hilinaiia o kekahi mau kanaka o ka ahakuka Repubalika, o keia kukaiolelo malalo iho ka mea i oleloia ua puka ae i keia mau la iho nei:

            "Wilikina, o— i kau mea e kakoo aku ana ma ka balota o ka lunakiai?" ka ninau.

            "Well, e hana aku ana wau no Renton me Kimo Boe. He makemake ko'u e haawi aku i manawa kupono nona," ka pane pololei.

            Ua huhu ka poe hooikaika o ka aoao Repubalika maluna o ke kulana ua haawiia aku kekahi oihana uku kiekie i kekahi mea i manaoia he Repubalika iloko o ke Keena o na Hana Hou, a maluna hoi o ka apono ana a na kanaka koikoi o ke komite Repubalika, a ua hoopuka ae he makemake kona i kekahi Home Rula.

            Ua oleloia ae i ka manawa i hookohuia ai o Wilikina i Luna Alanui ua noiia aku oia e waiho mai i kekahi palapala waiho oihana i kakauinoaia a aole no nae i kakauia ka manawa, a e hookomoia no ka manawa e makemakeia e hookomoia iho.—Adavataisa.

 

Olohani na Iapana o ka Mahiko o Honolulu.

            No ke ko ole o ka lakou koi e hoopiiia ae ko lakou ukuhana i $20 o ka mahina, oia ke kumu i olohani ae ai he 500 o na Kepani hana o ka mahiko o Honolulu ma Aiea.

            Ma ke kakahiaka o ka Poalima o keia pule iho nei i ulu ae ai keia hooki hana ana a na Kepani. Ua hoea aku lakou ma ke keena o ka mahiko i ua kakahiaka nei a koi ikaika aku i ka lunanui e hookoia ka lakou noi. No ke ko ole, ua hoao ae kekahi o lakou e lawelawe i kekahi mau hana limanui, a ua hoounaia mai ka lohe i ke keena makai o ke kulanakauhale nei.

            Ua hoounaia aku he 5 makai kaulio i lako me na pu malalo o Lutanela Sam Leslie no ke kahua olohani hana, a i ka ike ana mai o na Iapana i keia poe ua pipika iho la ka lakou mau hooulu hoohaunaele ana.

            I ka loaa ana mai no hoi o kekahi lono i ke keena kanikela Iapana e pili ana no keia mea, ua hele aku o Hope Kanikela Yamanaka no kahi o ka hoopaapaa, a ua hui aku oia ma na hana no ka hoomalielie ana i na Kepani.

            Mahope o kekahi mau kukaiolelo ana, ua hooholo ae na aoao a i elua e kali a hoi mai o Kanikela Iapana Miki Saito mai Kauai mai, a he 12 la o lakou e hoopanee ai. Ma ka loheia mai, ua hoi hou aku ka hapanui o kela poe e hana, a ke manaoia nei e pau ana no keia mau kuee ana me ka maalahi o na hana.

 

            O KE KAHE MAU O KA HUPE, oia no ka hopena e loaa mai ana ma o ka malama i ono ole ana i ka wa e loaa ai i ke anu. Aole e hiki i ka Laau Kunu a CHAMBERLAIN ke hoola i ka ma'i kahe mau o ka hupe, aka, ua hiki iaia ke hoola i ka ma'i anu a pale aku hoi i ke kau ana mai o keia haawina ino. Aole o ka hoola ana i ka mane'o o ka puu ame na akemama kana hana, aka, e hoonoia aku no na kumu i ulu mai ai ka ma'i. E hoihoi hou ae no oia i ke kino a loaa ke kulana olakino maikai. E loaa mau no ke ola me ka hikiwawe. Benson, Smith & Co., na agena nana e kuai kukaa nei.

 

Nuhou o na Aina E

 

PAUAHI MA KA MOANA.

            ADEN. Arabia, Sept. 24.—Ua a ia ka Admiral Gueydon e ke ahi ma ka moana. Aohe he ola i poino ma keia ulia.

 

PILIKIA KA HALE WILI PALAOA.

            MENEAPOLISA, Minesota, Sept. 24.—Ua paniia ae na puka o umi-kumamaha mau hale wili palaoa maanei ma o ka puka ae o kekahi hooki hana nui.

 

HOEUEU HOU KA PELE.

            KINGSTON, Jamaica, Sept. 24.—Ke puka nui hou ae nei ka pele o Soufriere.

 

POWAIA ME KA DAINAMAITA.

            PILADELEPIA. Sept. 25.—I kekahi kanaka hana aelike o Ferguson ka inoa e holo ana maluna o kekahi kaa bake, me ka lawe pu ana i kekahi huina o $5,000 iloko o kekahi eke buke, no ka uku ana i ka poe hana, ua hoopahuia ke dainamaita iluna o ke kaa, make loa o Ferguson a eha hookahi kanaka hana.

            Ua nalowale ke dala oluna o ke kaa a ua manaoia ua hanaia keia hana haahaa no ka powa ana i keia kanaka.

 

UA HOOKIPA HANOHANOIA.

            KAPALAKIKO, Sept. 25.—O Leung Kai Cheu, ka Pake hoohulihuli ma na hana hou, ua hookipaia ma Kinataona me ka hanohano ma ka po nei.

 

LIIA E KA POE HOOHAUNAELE.

            LYNCHBURG, Tenesi, Sept. 25.—Ua wawahiia aku ka halepaahao o onei e kekahi poe hoohaunaele i piha me ka huhu a lawe mai a li i kekahi paele e kali ana no ka hookolokoloia no kekahi hewa ino loa.

            O ka poe hoohaunaele, ua lanakila lakou mahope o ka hakaka hahana ana. Ua hoao ka makai nui e hoopakele i ka paahao a ua ki pu aku oia i kekahi kanaka o ke aluka hoohaunaele. Ua paa no nae oia i ka hopuia, komo ka poe hoohaunaele maloko o ka pa a lawe i ke ola o ka paahao.

 

HOOLE I KA HANOHANO.

            LADANA, Sept. 26.—Ua hoole o Haku Milner i ka lawe ana ae i ke kulana Kakauolelo Panalaau ma kahi o Joseph Chamberlain.

 

KA HANA A NA ANAKIA.

            LADANA, Sept. 26.—Ua loheia ae maanei ua loaa ae nei maanei he hoolala no ka pepehi malu ana i ke Suletana o Tureke. Ua hopu aku na makai i ka poe i komo ma keia hana.

            GENOA, Italia, Sept. 26.—Ua hu-eia ae maanei he hoolala no ka lawe ana i ke ola o ka Moi o Sepania e na makai o keia wahi a he nui ka poe i hopuia.

 

HANEE KA HALE.

            KIKRKO, Ilinoi, Sept. 26.—Ua hanee ae kekahi hale maanei i keia la a ua make loa he hookahi kanaka hana a eha hoi he umi-kumamahiku.

 

FIVA LENALENA MA MEKIKO.

            KULANAKAUHALE MEKIKO, Sept 27—He mau tausani o na kanaka e holo mai nei mai na wahi i loaa i ka fiva lenalena no ke kulanakauhale nei a ua pioloke na kanaka. Ke pii mahuahua ae nei ka fiva ma Loredo a he 4000 poe i hookaawale ia mai ia wahi aku.

 

HAULE MA KE ALAHAKA.

            DANVILLE, Vekinia Hema, Sept. 27.—Ua haule kekahi kaaahi no ka hema i keia la mawaena o na koo o kekahi alahaka. He 75 kapuai ke keikie o na haule ana o na kaa, make loa he 9 ohua a nui ka poe i eha.

 

BUBONIKA MA KINA.

            TIENTSIN, Kina, Sept. 27.—Ke hooneoeoia nei o Peitung e ka bubonika me ke kolera. He elua tausani ka nui o na make mai keia mau ano ma'i mai iloko o na mahina he elua i hala ae nei.

 

KA IKAIKA KAUA O RUSIA MA KINA.

            TIENTSIN, Sept. 29.—He 50,000 koa ma Manakuria ame 200,000 ma Pota Ata ka nui o na koa o Rusia ma Kina. Ma kahi hope i hoikeia aku nei, he 80 papu ame 80 mokukaua malaila i keia wa.

 

HOOPA'I PAAHAOIA.

            MANILA, Sept. 29.—O Gomes, ka powa, ua hoopa'iia e hoopahaoia no 4 makahiki.

 

HE PEPEHIKANAKA WELIWELI.

            KAPALAKIKO, Sept. 29.—Ua hanaia kekahi hana pepehikanaka weliweli maanei a no ka lili mai ke kumu.

            O Marie Jordan, he wahine u'i, ua ki pu ia a make loa e Edward Delabrousee. I ka make ana o ka wahine ua kau ae oia i ka pu ma kona poo a ki iaia iho. Aohe oia i manaoia e ola mahope o kona laweia ana aku no ka halema'i. No ka lili mai no ka wahine ke kumu o ka ulu ana mai o keia hana.

 

LUKUIA NA KRISTIANO.

            SOFIA, Sept. 30.—Ke mau nei no ka hooili kaua ana ma na palenaaina o Tureke. Ua hanaino aku na Tureke i ke taona o Razlog a luku aku i na kanaka Kristiano. He mau haneri o na kanaka i hoopilikiaia i hiki mai maanei.

 

MALALO O KE KANAWAI KOA.

            ST. PETERSBURG, Sept. 30.—O ka mea i ikeia o ka hooulu ku-e Iudaio, ua hoopaaia o Gomel malalo o ke kanawai koa.

 

HE ILI NANI, LIMA A'IA'I

ME KA

LAUOHO ULIULI

KA HUA O KE

Kopa Cutikura

            HE MILIONA A OI ka nui o na wahine e auau mai nei me keia KOPA CUTICURA no ka malama ana, hoomaemae ana, a no ka hoonani ana i ko lakou ili, i pau ai ka papaa o ke poo, ka unahi-pii, a i mea no hoi kekahi e pau ai ka helelei ana o ka lauoho, a i hoopalupalu, hoa'ia'i a me a hoou'iu'i ana i ka ili o na wahi i hele a manoanoa i ka hooikaika i ka hana, e like me na lima, a pela no hoi e hoopau ai i na eha, ma ka holoi ana i na wahi eha me keia kopa, i ole oi e ike i ka aai me ka welawela; i ole no hoi e hou nui, ma ka holoi ana i na wahi pehu a palahehe; a he oi loa aku ka waiwai nui o keia kopa i na makuahine e lawelawe ana i na hana lehulehu i pili i na keiki a me lakou iho no hoi, a i na wahine a pau; a he kupono loa no hoi keia kopa no na wahi auau a pau. O ka poe i ikemaka i ka maikai o keia kopa, aole loa lakou e ae iki ana e hoao i kekahi kopa okoa aku, ke koiia mai; ina no e oleloia ana, he kupono ia ano okoa aku no na mea e pili ana i ka ili, ke poo a me ka lauoho o na bebe a me na keiki. Ua loaa mai keia waiwai nui o ke KOPA CUTIKURA mailoko mai hoi o kela laau hoola ikaika loa i kapaia, KUTICURA, oia ka laau ikaika loa ma ka hoola ana i na popilikia a pau e pili ana i na mea ika loa i ka pale ana i na mea ino, a he loaa no hoi ke ala maikai o na puailoko o keia kopa. Aole loa e hiki ke hoohalikeia mai kekahi ano kopa e nei hoohuihuiia e ke akamai -o kanaka me keia kopa, ma kana mau hana ma-lama, hoola, a me ka hoou'iu'i anai ka ili, a pela aku. Pela hoi i ka ili oke poo, ka lauoho a me na wahi e ae.

            Aole no i lihi launa mai na kopa ona aina e me keia, no ka auhau ana a me ka hana o na keiki liilii. Pela ihola i lilo ai ka waiwai o na kopa a pau i HOOKAHI no ke KUMUKUAI hoo-@, a he Helu Ekahi keia Kopa no na poino o ka ili a me kahi auau, a hehelu ekahi no hoi no na kamalii a p@ ke ao nei

            NO KA HOOLA LOA ANA I NA ANO PEHU A POHAKA PALAHU MA NA WAHI A PUNI KE KINO, e hoomaemae i ka palapu me ke kopa CUTICURA i pau ai ka paapaa lepo a ano e ae paha o ka ili, a pela hoi ke poo, i pau ai ke kepia a me ka papaa piele, alaila, e hooma-u i kahi eha me ka Aila Hamo CUTICURA i mama ae ai ka akiaki ana a ka hu'i a me ka ehaeha, a pela hoi e hoohana ai ka laau i kana hana a ooa ka eha, alaila, e inu ka Laau Inu CUTIKURA i mea e maemae ai ke koko maloko. Ke kuaiia ne keia laau ma na wahi a pau o ka honua nei. Ma Aukekulia: o R. Towa@ & Co., o Sydney, N. S. W. ko laila Agena; ma Aferika Hema Depot: Lennon, Ltd. Na "Hoakaka no ka Hoola ana i na Bebe a me ko lakou mau hinaunau," he loaa wale no me ke kuai ole.

            O POTTER DRUG AND CHEM. COMP., Boston, U. S. A., na Ona o na laau CUTICURA a pau loa.

 

Na

Mea

PAANI AME HOOIKAIKA KINO

Ma Kahi

earson & Potter Co.,

LIMITED.

ALANUI HOTELE ME UNIONA

 

HOOKAHI PA HAUKALIMA ME KA MEAONO NO : : 10 KENETA

HOOKAHI KIAHA WAIU ME KA MEAONO NO : : : 10 KENETA

MA KA HALEKUAI PUHI PALAOA

SUNRISE BAKERY

Alanui Nuuanu kokoke i Alanui Beretania.

O ka Hau Kalima (Ice Cream) e hanaia nei maanei mai ka waiu maikai a momona maoli i loaa mai ai, oiai o na meaono e hanaia nei aia ma ke ano maikai loa. He hookoia na kauoha palaoa me na meaono o na ano apau no ke kumukuai kupono. E hele nui mai.

 

Hooleia Kona Mana Holo a Koho Balota.

            I ka loaa ana mai o na palapala holo luna aupuni kalana o Geo. H. Fairchild o Kauai no ke kulana lunakiai ia C. R. Buckland, ka mea hoopaainoa koho balota, ua haawiia aku ua mau pepa nei ia Loio Kuhina Andrews, no ka mea, eia he hoohalahala na ka papa hoopaaiinoa koho balota o Kauai i ka olelo hooholo a Lunakanawai Hardy o ka Aha Kaapuni Elima imua o ka Aha Kiekie.

            I ka nana ana o ka Loio Kuhina ua mau pepa nei, ua kauoha mai oia e hoihoi hou ia ua mau pepa nei ia Mr. Fairchild, no ka mea, aole o Mr. Fairchild he mea koho balota iloko o kekahi o na mahele koho o Kauai, a aohe no hoi he mau hoike kupono i loaa mai ua noho oia malaila no ekolu makahiki i hala ae nei, a ma kona manao, he mea pono e hoihoi hou ia aku keia mau pepa iaia.

            Ua ulu mai keia hana mamuli o ko Mr. Fairchild kakauinoa ole ana i keia kau koho balota iho nei oiai oia ma Amerika no ka ma'i o kekahi o kona ohana. Eia nae, i ke kau koho o 1900, ua loaa iaia ka mana koho ma ke kakauinoa ana.

            I ka manawa i hoopukapukaia ae nei na moho holo luna kalana o Kauai, o kona inoa kekahi i puka ae no ke kulana lunakiai, a no ka paa ole ana o kona inoa, ua hoopii ae oia i ka papa kakauinoa imua o ka Aha Kiekie e noho ua papa nei no ke kakauinoa ana no ke kau koho balota e hiki mai ana i loaa ka mana koho iaia a kuleana hoi no ka holo luna aupuni ana.

            Ua waiho aku ka Aha Kiekie i keia mea imua o Lunakanawai Kaapuni Hardy o Kauai, a i kona hoolohe ana, ua hooholo oia no ka poino o Mr. Fairchild a kauoha aku i ua papa hoopaainoa nei e noho no ke kakauinoa ana.

            Aole i hooko ka papa i keia kauoha, aka, ua waiho mai i ka hoohalahala

 

Goo Kima

MALAILA E LOAA AI NA

Mea Kuai Lole ame na Mea Nani Like Ole .

Perry Block, Kihili o na Alanui Hotele ame Nuuanu.

Loaa mai na Pono Hou ma na Mo kuahi Apau.

            O na mea apau e like me ka mea i oleloia.

 

imua o ka Aha Kiekie. No ke kaawale ana aku o na Lunakanawai Galbraith ame Perry no ka aina makua, aole i noho koke ka Aha Kiekie e hoolohe i keia hihia. Ua loheia ae e noho ana ma ka Poakahi o Okatoba 5, a o na Lunakanawai Kaapuni De Bolt ame Gear ana paha na hoa o ka Lunakanawai Kiekie Frear e noho mai ai e hoolohe i keia hihia.

            Eia ke kali malie nei kekahi poe no kela olelo hooholo, no ka mea, he nui ka poe e noho nei i like ke kulana me ko Mr. Fairchild.

            Ina e hooholo ana ka Aha Kiekie ua pono oia, alaila e hemo hou ana na papa kakauinoa a puni ka Teritori.

 

NUI KA POINO.

            PILADELFIA, Sept. 30.—He kaaahi e holo mama ana maluna o ke Alahao Piladelefia, Wilmington v. Baltimore, ua holo aku iwaena o kekahi aluka kanaka e kali ana no ke kaaahi ma ka Halehoolulu o Sharon Hill, he mau mile ka mamao ma ka aoao hema mai keia kulanakauhale aku, a ua make he eha mau kanaka. He nui no hoi ka poe i eha.

            KIKAKO, Sept. 30.—Ua hooku'i ae kekahi kaaahi o ka Wisikonosina Waena me kekahi kaa uwila i piha i na kanaka e hoi mai ana mai na heihei mai a ua make he elima a he iwakalua-kumamalima i eha.

 

KO LAKOU MANAWA HOPE LOA.

            SOFIA, Bulugaria, Sept. 30.—Ua pii ae nei na luna aupuni Tureke a puni o Macedonia me ke kuahaua e haawi ana i na kipi i manawa e waiho iho ai i na mea kaua a hoi aku no ko lakou mau home. Ina aole e hookoia ana kela noi, ua olelo ae na Tureke e ikaika no ka hoopa'i e kau aku ana maluna o na kipi ma keia hope aku.