Ka Nupepa Kuokoa, Volume XLI, Number 48, 27 November 1903 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

NOVEMABA 27, 1903

-----------

KA MOOLELO KAAO O

LAIEIKAWAI

KA HIWAHIWA O PALIULI, KA WAHINE O KA LIULA.

MOKUNA XXXII

 

                He@ o Kekalukaluokewa i ke kaupuni ma na mokupuni – Na ka mailio a Kaonobiokala me Laielohelohe—Hele o Kaonohiokala e noi ia Kapukaihaoa no Laielohelohe—Hui o Kaonohiokala me me Laielohelohe a hoi o Kaonohiokala i Kahakaekaea—Holo o Laielohelohe e imi i kana kane ia Kekalukaluokewa—iho hou mai o Kaonohiokala aole nae i loaa o Laielohelohe iaia.

 

                A no ke kumu ole o kona manao ia Kaonohiokala, nolaila huna iho la oia iaia maloko o na hale kuaaina hiki ole iaia ke noho, no @ manao o hiki hou mai o Kaonohiokala, hana hou ia ka hewa @ kona makemake ole, oia kona pee ma na hale kuaaina, aole nae oia (Kaonohiokala) i hiki mai a hiki i kona hala ana i ka moana ia p@ iho.

 

                A hala o Laielohelohe i ka moana, a hiki ma Oahu, noho iho la oia ma na hale kuaaina.  Pela oia i hele ai a hiki i ko laua Lalawai ana me Kekalukaluokewa.

 

                Ia Laielohelohe paha i Oahu, a ma kekahi la ae, iho hou mai la o Kaonohiokala e launa hou me Laielohelohe; aka, i kona hiki ana mai, aole o Laielohelohe o ka hale Alii, aole no hoi oia i nanau mai i ka mea naua e mlama ka hale Alii, no ka mea, ina e ninau oia, manaoia e hana ana i ka hewa me Laielohelohe; aka, ua ha’i malu aku nae o Laielohelohe i ke kiai hale Alii i ke kumu o kona hele ana.  A no ka nele o ko ke Alii makemake, hoi aku la oia iluna.

 

                O keia haule ana nae a na’lii i ka hewa, ua nakulu aku la keia lohe i ke alo Alii, ma o na aialo wale no nae, a ua lohe pu ia no hoi ko Laielohelohe makemake ole.

 

                Ia Aiwohikupua e kuewa ana ma ke alo Alii, oia nae kekahi i lohe i keia mau mea.  A no ka lohe ana o Aiwohikupua i ko Laielohelhe kumu i holo ai e imi i ke kane; alaila i aku oia i ke kiai hale Alii, “Ina i hoi hou mui o Kaonohiokaia, a i nanau mai ia Laielohelohe, i aku oe ua ma’i ia, alaila aole e hoi hou mai; no ka mea, he mea haumia loa ia ia Kaonohiokala, ame na makua o makou, aia no apau ka haumia alaila hana aku ma ka hana o ka hoku Venuka.”

 

                Ia iho hou ana mai o Kaonohiokala ninau i ke kiai hale Alii, alaila ha’lia aku la e like me ka Aiwohikupua olelo, alaila hoi aku ia oia iluna.

 

MOKUNA XXXIII

 

                (Kamailio no ka imi ana o Laielohelohe ia Kekalukaluokewa) – Pae na waa o Laielohelohe ma i Honuaula—Hiki loa lakou i Honokalani, a loaa o Kekalukaluokewa me Hinaikamalama ia Laielohelohe—Na kamailio a Laielohelohe me kana kaue – Hoi o Ilinaikamalama i Haneoo—Kau mai o Hinaikamalama he mele no kana ipo—Hiki o Kekalukaluokewa i o Hinaikamalama la – Ka olelo a ka wahine kamaaina ia Laieiohelohe no Kekalukaluokewa ma.

 

                Ua oleloia ma ka Mokuna 27 o keia kaao ke kumu o ke Laielohelohe imi ana i kana kane ia Kekalukaluokewa.

 

                Nolaila, imi aku la oia mai Kauai mai a Oahu, a Maui; i Lahaina keia, lohe aia o Kekalukaluokewa i Hana, ua hoi mai mai Hawaii mai.

 

                Holo aku la oia ma na waa a pae ma Hounaula, ilaila lohe lakou o Hinaikamalama ka wahine a Kekalukaluokewa, aole nae i ike ko Honuaula poe o ka Kekalukaluokewa wahine keia.

 

                A no ka lohe ana o Laielohelohe i keia mea, lalale koke aku la lakou a hiki i Kaupo, ame Kipahulu.  Ilaila, hoomaopopoia mai la ka lohe mua o lakou i Ho@naula, a mailaila aku lakou a kau na waa ma Kapohue, haalele lakou i na waa, hele aku la lakou a Waiohonu, lohe lakou ua hala o Kekalukaluokewa ma Hinaikamalama i Honokalani, he nui na la i hala ia lakou ma ia hele an.

 

                Ia hele ana a lakou a hiki i Kauwiki, ua ahiahi nae, ninau aku la o Laielohelohe i na kamaaina i ka loihi o kahi i koe a hiki i Honokalani, kahi a Kekalukainokewa e noho ana me Hiuaikamalama.

 

                Olelo mai kamaaina.  “Napoo ka la hiki.”

 

                A hele aku la lakou me ke kamaaina pu, a molehulehu hiki aku la lakou i Honokalani; alaila, hoouna aku la o Laielohelohe i ke kamaaina e hele aku e nana i ka noho ana o na’lii.

 

                Hele aku la ke kamaaina, a ike aku i na’lii e inu awa ana, hoi mai la a ha’i mai la ia lakou nei.

 

                Alaila, hoouna hou aku la no o Laielohelohe i ke kamaaina e hele hou e nana i na’lii, lme ka i aku nae, “E hele oe e nana a ike i na’lii e hiamoe ana, alaila, hoi mai oe a hele pu aku kakou.”

 

                A no keia olelo a Laielohelohe, alaila, hele aku la ke kamaaina, a ike aku la ua hiamoe na’lii, hoi aku la a olelo aku la ia Laielohelohe.

 

                Ia manawa, akahi no  ha’i aku oia i ke kamaaina, o Kekalukaluokewa kana kane mare(hoao).

 

                Manua aku nae o ko Laielohelohe halawai apa me Kekalukaluokewa, ua lohe mua aku oia i ka haule ana o Lailohelohe i ka hewa me Kaonohiokala, i lohe no i kahi kahu o Kauakahialii, ka mea i lilo ai i Kuhina Nui ma ka aoao o Aiwohikupua, a no ka lohe ana o na wahi kanaka nei i ka hewa ana o Laielohelohe, oia kana mea i hele mai ai e ha’i ia Kekalukaluokewa.

 

                Ia Laielohelohe ua i hiki aku ai ma ka hale a Kekaiukaluokewa @ noho ana, aia hoi e hiamoe mai ana laua ma kahi hookahi, ua @hiia i ka aahu hookahi, e moe ana nae i ka ona a ka awa.

 

                A komo aku la o Laielohelohe a noho iho la ma ke poo o laua (Kekalukaluokewa ma) honi iho la i ka ihu, a uwe malu iho la iloko @ ; aka, ua hoohaniuiia na mapuna waimaka o Laielohelohe no ka ike ana iho he wahine e ka kana kane, aole ane e hiki ia laua ke @ ae i keia no ka mea, ua lumilumiia laua e ka ona a ka awa.

 

                Oia hoi, aole e hiki ia Laielohelohe ke hoomanawanui i kona @iuki ia Hinaikamalama; nolaila, komo aku la oia mawaena o laua, a @le aku la ia Hinaikamalama, hoohuli mai la ia Kekalukaluo@ewa a apo aku la i kana kane, a hoala aku la.

 

                Ia manawa, puoho ae la o Kekalukaluokewa a ike iho la o kana wahine; ia wa, hikilele mai la o Hinaikamalama mai ka hiamoe mai, a ike iho la he wahine e keia me laua, holo aku la oia mai o laua @ aku me ka huhu nui, me ka manao hoi aole keia o ka Kekalu@ainekewa wahine.

 

                A ike aku la o Kekalukaluokewa ia Hinaikamalama e hele ana me ka maka kuko na, alaila, i aku la, “E hinaikamalama, e holo ana oe i ke aha, me kou maka inaina, mai kui oe i kela wahine he wahine e, o ka’u wahine mare (hoao) no keia.”  Ia manawa, hookaawaleia ne le kona huhu mai ona aku a paniia iho la ka hilahila ame ka maka’u ma ka hakahaka o ka huhu.

 

                I ka wa nae i ala ae ai o Kekalukaluokewa mai ka hiamoe ona awa ae, a ike mai la i ka wahine, ia Laielohelohe, honi iho la ma ke ano mau o ka hiki malihini ana.

 

                Alaila, i mai la oia i kana wahine, “E laielohelohe, ua lohe iho nei wau noa, ua hana oe i ka hewa me ka Haku o kaua (Kaonohiokala) a nolaila, ua pono aku ia no oe me ia, a ua pono no hoi wau ke noho aku malalo o olua, no ka mea, nona mai keia noho hanohano ana, a alia no hoi iaia ka make ame ke ola; kamailio aku paha auanei wau o ka make mai kai ala; nolaila, ma kahi a ka Haku o kaua e manao ai pono no ke hook@ aku, aole nae no ko’u makemake ka haawi aku ia oe, aka, no ka maka’u i ka make.”

 

                Alaila, i aku ia o Laielohelohe i kana kane, “Auhea oe, kuu kane i ka wa heu ole, ua pololei kou lohe, a he oiaio ua haule wau i ka hewa me ua Haku la o ka aina, aole nae i mahuahua, elua wale no a maua hana ana i ka hewa; aka, e kuu kane, aole na’u i ae e haawi la’u e hoohaumia i kau kino me ua Haku la o kaua; aka, na kuu mea nana i malama ia’u i ae e hana wau i ka hewa; no ka mea, i ka la a oukou i hele mai ai oia no ka la a ua Haku la o kaua i noi mai ai ia’u he hoohaumiaia maua; aka no ko;u makemake ole, nolaila, ua kuhikuhi aku wau i ko’u ae ole iaia; aka, i ka hoi ana iluna  ahoi ou mai, nonoi ae la kela ia Kapukaihao, a nolaila, ua launa kino maua elua manawa, a no ko’u makemake ole, ua huna wau ia’u iho ma na hale kuaaina, a no ia mea no hoi, ua haalele wau i kahi au i hoonoho ai, a ua imi mai nei wau ia oe; a i ko;u hiki ana mai nei hoi, loaa iho nei oe ia’u me kela wahine.  A nolaila, ua’pai i wale kaua, aole au hana no’u aole hoi a’u hana aku ia oe; nolaila ma keia po e hookaawale oe i kela wahine.”

 

                A no keia mea, na pono ka olelo a ka wahine imua o kana kane; aka, ma keia olelo hope a Laielohelohe ia manawa ua ho-aia ke ahi euaena o ke aloha wela o Hinaikamalama no Kekalukaluokewa, no ka mea, e kaawale ana laua mai ko laua launa hewa ana.

 

                Hoi aku la o Hinaikamalama i Haneoo, a noho iho la ma kona hale mau; i kela la keia la o Hinaikamalama ma kona Hale Alii he mea mau iaia ka noho ma ka puka o ka hale, a huli ke alo i Kauwiki, no ka mea, ua hoopuniia oia e ke aloha wela.

 

                I kekahi la i ke Alii wahine e hoona-na ana i kona aloha ia Kekalukaluokewa, pii ae la oia ame kona mau kahu iluna o Kaiwiopele, a noho iho la malaila, huli aku la ke alo ia Kauwiki, nana aku la ia Kahaloaka, a o ke kau mai a ke no iluna pono o Honokalani, ia manwa, he mea e ka maeele o ke Alii wahine i ke aloha no kana ipo; alaila, oli ae la oia he wahi mele penei:

 

                                “Me he ao puapuaa la ke aloha e kau nei,

                                Ka uhi paapu poele i kuu manawa.

                                He malihini puka paha no ka hale,

                                Ke hulahula nei kuu maka.

                                He maka uwe paha – e . Oia – e.

                                E uwe aku ana no wau ia oe.

                                I ka lele ae a ke ehukai o Naualele,

                                Uhi pono ae la iuka o Honokalani.

                                Kuu Lani—e.  Oia—e”

 

                A pau kana oli ana, uwe iho la oia, a nana i uwe, uwe pu me na kahu ona.

 

                Noho iho la lakou ma ia la, a ahiahi, hoi aku la i ka hale, kena mai la na makua ame na kahu e ai, aka, aole loaa iaia ka ono o ka ai, no ka mea, ua ku pouli i ka hana wela a ke aloha.

 

                A pela no hoi o Kekalukaluokewa, no ka mea, ia Hinaikamalama i haalele aku ai ia Kekalukaluokewa i ka po a Laielohelohe i hiki mai ai, ua pono ole ka manao o ke Alii kane; a nolaila, ua hoomana wanui oia i kekahi mau l mahope mai o ko laua kaawale ana.

 

                A ma kela la a Hinaikamalama i pii-ai iluna o Kaiwiopele, a ma ia po iho, hiki oia i o Hinaikamalama la, me ka ike ole o Laielohelohe, no ka mea, ua hiamoe oia.

 

                Ia Hinaikamalama no e ala ana , e hiaa ana no kona aloha, ia hookuu iki ana iho o ka hiamoe pokole loa, no ka minute hookahi paha, puka ana o Kekalukaluokewa, me ka ike ole oloko o ka Hale Alii ia ianei.

 

                Ia Kekalukaluokewa i hiki aku ai, pololei aku lano oia a ma kahi a ke Aliiwahine e hiamoe ana, lalau aku la i ka wahine wa ke poo, a hoala aku la.

 

                Ia manawa, ua hooleleia ka oili o Hinaikamalama me ka manolana no o kana ipo; aka, i ka lalau ana ae, aia nae o kana mea i manao ai.  Ia manawa, kahea ae la oia i na kahu e ho-a ke kukui a ma ka wanaao, hoi aku la o Kekalukaluokewa me kana hanaukama (Laielohelohe.)

 

                Ma ia manawa mai, he mea mau ia Kekalukaluokewa ka hele pinepine i o Hinaikamalama i kela po keia po me kona ike oleia; a hala ke anahulu okoa o ko Kekalukaluokewa hoomau ana e hana hewa me  Hinaikamalama me ka ike ole o kana wahine; no ka mea ua uhi paauia ko Laielohelohe ike e ka ona awa mau, mamuli o ka makemake o kana kane.

 

                I kekahi la, kupu ka manao aloha i kekahi wahine kamaaina no Laielohelohe; nolaila, hele mai la ua wahine kamaaina nei e launa me ke Aliiwahine.

 

                Ia Kekalukaluokewa me na kanaka ma ka hale kahi-olona, ia ia manawa i launa ai ka wahine kamaina me Laiolohelohe, me ka i aku ma kana olelo hoohuahualau.  “Pehea ko Aliikane?  Aole anei he uilani, a kani ohu mai i kekahi manawa no ka wahine?”

 

                I aku ia o Laielohelohe, “Aole, he maikai loa maua e noho nei.”

                Olelo hou ke kamaaina, “Malia paha he hookamani.”

                “Ae paha,” wahi a Laielohelohe ; “aka, i ka’u ike aku a maua e noho nei, he oluolu ko maua noho ana.”

 

                Ia manawa olelo maopopoaku la ke kamaaina me ka i aku “Auhea oe?  O ka maua mahinaai aia ma kapa alanui ponoi; i ka wa@aao, ala aku la ka’u kane i ka mahini ma ua mahinaai nei a maua, i kuu kane nae e mahiai ana, hoi mai ana no o Kekalukaluokewa mai Haneoo mai manao koke ae la no kuu kane me Kinaikamalama no, hoi ae kuu kane a olelo ia’u, aole nae wau i hoomaopopo.  A ma ia po mai, i ka puka’na maina, ala ae la wau me ka’u kane, a iho aku la i ka paeaea aweiweo ma ke kai o Haneoo; ia maua e hele ana, a hiki i ke alu kahawai, nana  aku la maua e hoea mai ana keia mea maluna o ke ahua i hala hope ia mana; ia manawa, alu ae la maua e pee ana, aia nae o Kekalukaluokewa keia e hele nei, alaila, akali aku la mana ma ko iala mau kapuai, a hiki maua ma kahi kokoke i ka hale o Hinaikamalama, aia nae ua komo aku no o Kekalukaluokewa e hele ana, aole ana olelo ia maua, aole hoi a maua olelo iaia.  Pau ia; i keia la hoi, olelo ponoi mai la ke kahu o Hinaikamalama ia’u, he kaikuahine no kuu kane, anahulu ae nei ka launa ana o na’lii, na’u nae i hookuahuaalu aku; a nolaila, hu mai ko’u aloha me ka’u kane ia oe, hele mai nei wau e ha’i aku ia oe.”

MOKUNA XXIV

 

                Hele hou o Kekalukaluokewa i haki o Hinaikamalama, a loaa no ia Laielohelohe—Hoi o Laielohelohe i Kauai—Iho hou mai o Kaonohiokala i  o Laielohelohe Ia 00 Ka hoi hou ana o Kaonohiokala iluna, ame nu olelo a laua me Laieikawai—Hele o Kaieikawai i o Moanalihaikawaokele la, a haawila ka ike iaia –Ike o Laiekawai i ka hewa o Kaouohiokala ma—Iho mai o Moanalihaikawaokele me Laukieleula ame Laiekawai—Ka olelo a Moanalihaikawaokele ia Kaonohiokala—Hoonohoia o Laieikawai i lalo nei me ke kapaia o kona inoa o Kawahiueokali’ula—Hooliloia ke aupuni i ka Makaula.

 

                A no keia olelo a ka wahine kamaaina, alaila, ua ano e ko ke Aliiwahine manao, aole nae oia i wikiwiki i ka huhu; aka i mea e maopopo lea ai iaia, hoomanawanui no o Laielohelohe.  I aku la nae oia i ke kamaaina, “Malia i hookina ai kuu kane la’u i ka inu awa, la’u paha e moe ana i ka ona awa, hele kela; aka ma keia po e ukali ana wau iaia.”

 

                Ia po iho hoomaka hou o Kekalukaluokewa e haawi i ka awa, alaila, hooko aku la no kana wahine; aka mahope o ka pau ana o ka inu awa ana, puka koke aku la-o Laielohelohe iwaho o ka hale a hoolualua i aku la apau loa ka awa i ka lua’iia, aole nae i ike mai kana kane i keia hana maalea a kana wahine; a i ka hoi ana aku i ka hale, haawi mua iho la ua o Laielohelohe iaia i ka hiamoe nui ma kona ano maalea.

 

                A ike mai la o Kekalukaluokewa, he hiamoe io ko kana wahine ao ka ona awa; ia manawa hoomaka hou ke kane i kana hana mau, a hele aku la i o Hinaikamalama ia.

 

                A ike o Lalelohelohe ua hala aku la keia, ala ae la oia, a ukali aku l@ Kekalukalookewa me kona ike olelo.

 

                Ia akali ana o Laielohelohe, aia hoi ua loaa pono aku la kana kano iaia e hana ana i ka hewa me Hinaikamalama.

 

                Ia manawa, olelo aku o Laielohelohe ia Kekalukaluokewa, oiai aia ma ko Hinaikamalama wahi moe laua; “E kuu kane, ua puni wau ia oe malia oe e hookina nei la’u i ka awa, he hana ka kau, a nolaila, na loaa maopopo ae nei olua ia’u nolaila, ke olelo nei wau ia oe, aole e pono ia kaua ke hoomanawanui i ha noho ana maahei e pono ia kaua ke hoi i Kauai a nolaila e hoi kaua ano.”

 

                Ike mai ia kana kane i ka maikai o ka manao o ke Aliiwahine, kuko ae la laua a hoi aku la i Honokalani.  A ma ia ao ana ae, hoomakaukau koke na waa no ka hooko i ka olelo a Laielohelohe, me ka manao ia po iho e holo ai, aole nae i holo, no ka mea, ua hooma’ima’i ae la o Kekalukaluokewa, a nolaila, ua hala ia po; a i kekahi po iho hana hou no o Kekalukaluokewa i kana hana, a no ia mea, ua haalele o Laielohelohe i kona aloha i kana kane, a hoi aku la i Kauai ma kona mau waa me kona manao hou ole aku ia Kekalukaluokewa.

 

                Ia Laielohelohe ma Kauai mahope iho o kona haalele ana i kana kane; i kekahi ia, hiki hou mai o Kaonohiokala mai Kahakaekaea mai a halawai iho la me Laielohelohe, no ka mea ua hoomau paa loa ia ka iini ia Kaonohiokala, me ka manao e lawe loa a hoonoho ma ka hakahaka okona kuko ino e like me ka aoao mau o ke Alii.

 

                Ia laua e launa ana, ninau mua ae la o Kaonohiokala ia Lalelohelohe no ka pau o kona mau la haumia, ma ka aoao mau o na wahine no ka manawa ma’i.  Aka hoi, wahi a Laielohelohe, “Aole haumia i koe.”  a nolaila, lawe loa ae la o Kaonohiokala ia Laielohelohe.

 

                A hala eha malama o ko laua hui kalohe ana; he mea haohao nae ia Laiekawai keia hele loihi o Kaonohiokala, no ka mea, eha malama ka loihi o ka nalo ana.  A mahope o ia manawa haohao o Laieikawai, hoi aku ia o Kaonohiokala iluna.

 

                Ninau mai la nae o Laieikawai, “Pehea keia hele loihi ou aha malama, no ka mea, aole oe pela e hele nei.”

 

                I mai la o Kaonohiokala, “Ua hewa ko Laielohelohe manoho ana me kana kane, ua lilo o Kekalukaluokewa i ka wahine e a oia ko’u mea i noho loihi oi.”

 

                A no keia mea, olelo aku o Laieikawai i kana kane, “E kii oe i ko wahine a hoihoi mai e noho pu kakou”

 

                Ia manawa no a laua e kamailio ana no keia mau mea, haalele aku la o Kaonohiokala ia Laieikawai, a iho mai la, me ka manao o Laieikawai e kii ana mamuli o kana kauoha, aole ka!

 

                I keia hele ana o Kaonohiokala, hookahi makahiki; la manawa aole o kauamai o ka haohao o Laieikawai no ka hele loihi o kana kane.  Ua manao ae o Laieikawai i ke kumu o keia hele loihi, ua pono ole la o Lielohelohe me Kekalukaluokewa.

 

                A no keia mea, ake nui ae la oia e ike i ka pono o kona kaikaina, ia wa, hele aku la o Laieikawai imua o kona mauahonowaikane, me ka ninau aku, “Pehea la wau e ike ai i ka pono o ko’u kaikaina?  No ka mea, ua olelo mai nei kuu kane Lani, ua hewa ka noho ana o Laielohelohe me Kekalukaluokewa, a no ia mea, ua hoonua aku nei wau ia Kaonohiokala e kii aku i ka wahine a hoi mai; aka i ka hele ana aku nei, aole i hoi mai; o ka pau keia o ka makahiki o ka hele ana, aole i hoi mai, nolaila e haawi mai oe i ike no’u i like hiki ke ike aku ma kahi mamao, i ike au i ka pono o ko’u hoahanau.”

 

                A no keia mea, olelo mai o Moanalihaikawaokele, kona makuahonowaikane.  “E hoi oe a ma ko olua wahi, e nana aku oe i ko makuaonowaiwahine, ina ua hiamoe, alaila, e hele aku oe a komo iloko o ka heiau kapu, ina e ike aku oe i ka ipu ulanaia i ke i-e, a ua hakuia ka hulu ma ka lihilihi o ke po’i oia ua ipu la.  O na manu nui e ku ana ma na aoao o ua ipu la, mai maka’u oe, aole ia he manu maoli, he mau manu laau ia, ua ulanaia i ke i-e a hanaia i ka hulu.  A i kou hiki ana i kahi o ua ipu la e ku ana, wehe ae oe i ke po’i, alaila hookomo iho oe i ko poo i ka waha o ua ipu la, aliala kahea iho oe ma ka inoa o ua ipu la, ‘E Laukapalili—e, Homai he ike.’  Alaila loaa ia oe ka ike, e hiki ia oe ke ike aku i kou kaikaina ame na mea apau o lalo.  Eia nae, i kou kahea ana mai kahea oe me ka leo nui, o kani auanei, lohe mai ko makuahonowa’wahine o Laukieleula, ka mea nana e malama i na ipu ike la”

 

                A lohe o Laieikawai i keia mau mea, alaila, manao ae la keia ua ha’i pau ia mai keia mea iaia.

 

                He mea mau nae ia Laukieleula, ma ka po oia e ala ai e malama i ua ipu la o ka ike, a ma ke ao, he hiamoe.

 

                I kekahi kakahiaka, i ka wa  e  hoomaka mai ai ka mehana o ka la maluna o ka aina, hele aku la oia e makai ia Laukieleula, aia nae e hiamoe ana.

 

                A ike iho la kela ua hiamoe, hooko ae la o Laieikawai i ke kauoha a Moanalihaikawaokele, a hele aku la oia e like me ka mea i a’oa’oia mai iaia.

 

                A hiki keia ma kahi o ka ipu, ka mea i kapaia, “KAIPOOOKAIKE.” Wehe ae la keia i ke po’i o ka ipu, a kupou iho la kona poo ma ka waha o ua ipu nei, a kahea iho la ma ka inoa o ua ipu nei, ia wa ka hoomaka ana e ike i na mea apau i hanaia ma kahi mamao.

 

                Ia awakea, leha ae la na maka o Laieikawai ilalo nei, aia hoi, ua hana o Kaonohiokala i ka hewa me Laielohelohe.

 

                Iloko o keia manawa, hele aku la o Laieikawai a ha’i aku la ia Moanalihaikawaokele, no keia mau mea, me ka olelo aka, “ua loaa ia’u ka ike mai a oe mai.  Aka, i kuu mana ana aku nei, aia nae ua hewa ka Haku Lani o’u, ua hanaia kekahi hewa me kuu kaikaina, akahi no a loaa ia’u na kumu ame ke kuleana o kona noho loihi aha ilalo.”

 

                A no keia mea, he mea e ka inaina o Moanalihaikawaokele, a lohe pu ae la o Laukieleula, hele aku la kona mau makuahonowai i kahi o ka ipu ike, aia hoi, ike lea aku la laua e hana ana i ka hewa, e like me ka Laieikawai mau olelo.

 

                I kekahi la ae, akoakoa ae la lakou apau, o Laieikawai me na makuaonowai, e hele e ike i ka pono o Kaonohiokaka, a hooholo ae la lakou ia mea.

 

                Ia manawa, kuuia aku la ke alanui mai Kahakaekaea aku a ku imua o Kaonohiokala, ia wa, ua lele koke ka oili o Kaonohiokala, no ke alanui i kuu ia mai imua ona.  Aole nae i liuliu mahope iho o ko Kaonohiokala haohao ana.

 

                Ia manawa, ua hoopouliia kalewa, a hoopihaia i na leo wawalo o ka hanehane me ka leo uwe.  “Ua haule ka Lani!  Ua haule ka Lani!!”  A i ka pau ana ae o ka pouli ma ka lewa, aia hoi e kau mai ana o Moanalihaikawaokele, Laukieleula ame Laieikawai, iluna o ke alanui anuenue.

 

                A olelo mai la o Moanalihaikawaokele imua o Kaonohiokala.  “Ua hewa kau hana, e Kaonohiokala—e no ka mea, ua haumia loa oe, a nolaila, aole  e loaa hou ia oe he wahi noho iloko o Kahukaekaea, a o kou uku hoopa’i e lilo ana oe i mea hoomaka’uka’uia’i ma na alanui, a ma ka puka o na hale, a o kou inoa, he Lapu, a o kau mea e ai ai, o na pulelehua, a malaila kou kuleana a mau pua.”

 

                Ia manawa, kailia aku la ke alanui mai ona aku la, mamuli o ka mana o kona makuakane.  A pau keia mau mea, hoi uku la lakou i Kahakaekaea.  (Ua oleloia ma keia Kaao, o Kaonohiokala ka lapu mua ma keia mau moku, a ma ona la na lapu e auwana nei i keia mau la, ma ka hoohalike ana i ke ano o ka lapu, he uhane ino.)

 

                Ia lakou i hoi ai iluna, mahope iho o ka pau ana o ko Kaonohiokala oia, halawai aku la lakou me Kahalaomapuana iloko o Kealohilani, akahi no lakou a lohe aia oia malaila.

 

                A ma keia halawai ana o lakou, ha’i aku la O Kahaiaomapuana i ka moolelo o kona hoihoiia ana e like me ka kakou ike ana ma ka Mokuna 27 o keia kaao, a pau keia mau mea, laweia aku la o Kahalaomapuana e pani ma ka hakahaka o Kaonohiokala.

 

                Ia lakou ma Kahakaekaea, i kekahi manawa, nui mai ia ke aloha o Laieikawai ia Laielohelohe, aka, aole e hiki ma kona manao, he mea mau nae i Laieikawai ka awe pinepine no kona kaikaina, a he mea ha’oha’o no hoi i kona mau makuahonowai ka ike aku i ko Laieikawai mau maka, ua ano maka awe.

 

                Ninau aku nae o Moanalihaikawaokele i ke kumu o keia mea, alaila ha’i aku la oia, he maka !we kona no kona kaikaina.

 

                I mai nae o Moanalihaikawaokele. “Aole e aeia kou kaikaina e poho pu me kakou, no ka mea ua hanmia oia ia Kaonohiokala; aka ina he manao kou i ke kaikaina, alila , ehoi oe a e pani ma ka hakahaka o Kekalukaluokewa.”  Aka ua ae koke ae la o Laieikawai i keia mau mea.

 

                A ma ka la o Laieikawai i hookunia mai ai, olelo mai la o Moanalihikawaokele, “E hoi oe ame kou kaikaina, e noho malu oe a hiki i kou manawa e make ai, a mai keia la aku, aole e kapoia kou inoa o Lujeikawai; aka o kou inoa mau o Kawahineikali’ala, a ma ia inoa ou e kukuli aku ai kou hanauna ia oe, a o oe no ke akua o kou mau hanauna.”

 

                A pau keia kauoha, lawe ae la o Moanalihaikawaokele a kau aku la iluna o ke alanui, a kau pu aku la me Moanalihaikawaokele, a kuuia mai la ilale nei.

 

                Ia manawa, hooili aku la o Kawahieokali’ala i ke aupuni i k Makaula, o Laieikawai hoi ka mea i kapala o Kawahineokali’ala, @ noho oia ma kona ano akua a ma ona la i kukuli aku ai ka Makaula amekona hanauna e like me ka olelo a Moanalibaikawaekele iaia.  A ma la ano no o Laieikawai i noho ai a hiki i kona make ana.

 

                A mai la manawa mai a hiki i keia mau la, ke hoomanaia nei no e kekahi poe ma ka inoa o Kawahineokali’ula (Laieikawei.)

KA HOPENA