Ka Nupepa Kuokoa, Volume XLII, Number 2, 8 January 1904 — Page 5
| This text was transcribed by: | Karen Tschida |
| This work is dedicated to: | Puakea |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, IANUARI 8, 1904.
HOOLAHA HUI.
-----
E like me ke kauoha a ke kanawai, o ka poe no lakou na inoa malalo iho nei, ma keia ke hoolaha nei i keia mau olelo malalo iho:
Oia hoi, o Makou, Tong Ka Chung, Lai Hon, ame Leong Ping, o lakou apau ke noho nei ma Wailuku, Maui, ua kukulu hui ae ma ka la 26 o Dekemaba, 1903.
O ka inoa o ka Hui oia ka Nin Fong Company (Hui).
O kona wahi hana aia ma Wailuku, Maui.
A o kona oihana oia no ke kuai mai, kuai aku, ma ke kalepa a ma ka hana iloko o ka laiki ame kona hua, pili loa i ka waeili laiki ana a hoomaemae ana ame na mea pili ia mea.
TONG KA CHUNG,
LAI HON,
LEONG PING.
2997-Jan. 8, 15.
------
Nuhou Kuloko
-----
O William Savidge kekahi paahana o ka Aha Aina ua loaa aku kona laikini loio no na aha apana i ka Poalua nei.
------
I ke kakahiaka o ka Poakolu nei i hiki mai ai ka mokuahi Sonoma mai ka hikina mai a haalele no ia Honolulu i ke ahiahi o ia la no.
-----
I ka Poakahi iho nei no ka maopopo loa ana o ka bona o ka Loio Kalana @ Kauai ke kumu hoi ona e hiki ai ma kana oihana.
-----
Ma ka hoopahupahu ana o kekahi wahi keiki Pukiki o Manuel Aves kona inoa, ua loaa pono aku la kona lima i ka apana pauda a nui ka poino.
-----
Aia ma kahi o ka $80,000 a i ole ma kahi o ka $90,000 ka loaa o ke Kalana o Oahu no ka malama nei o Ianuari ke holopono ke ola o ke kalana.
-----
Nui ka hana a ka Papa Lunakiai i keia mau la i hala iho la o keia @ka hoopiha makalua ana i na keena hana o ke Kalana o Oahu.
-----
Maikai ka pana puhiohe a na keiki o ka moku lawe koa Sheridan i ku mai nei ianei a holo i ka Poakolu nei. I ka po Poalua iho nei ka paani ana.
-----
Ma ka papa hana a ke Kiaaina Carter ua ulu mai na hana o ke kaomi ana i na hoolilo ma ka pokepoke ana i na ukuhana kumau o na paahana o ke Aupuni.
-----
Nui na alemanaka o keia makahiki i hoopukaia e na hui nunui o ke kulanakauhale nei ma ke ano manawalea, a o ke Kuokoa kekahi e puka aku nei i keia pule.
-----
Ke ku nei na aupuni kalana ma ke ku ana ano kulanalana no nae aka, i ka manawa e maopopo mai ai ka olelo hooholo a ka Aha Kiekie e ike ia ai ka pono ame ka ole.
-----
Holopono na halawai o ka pule hoomau no keia makahiki hou ma Kawaiahao, iloko o na halawai awakea na la noa ame ko na po a e pau ana ia hana i keia ahiahi.
-----
O William H. Tell ua lilo ae nei oia i makai no na kiure nui o ka Aha Kaapuni Ekahi. Na Lunakanawai @ oia i hookuu mai kona kulana hoa kiure o ke kiure nui Federala.
-----
O ka halenoho o Mrs. Allan Herbert noho kanaka ole ia i keia mau la e ku nei ma ke alanui Vinia ua komoia e na aihue a pau kekahi mau mea makamae i ka laweia. Nui ke kolohe.
-----
Ma ka hooholo ana o na Lunakiai, ua hookohu pono la o Sol. Mahelona kokua malama buke no ke keena hooia o ke Kalana o Oahu. He oiwi Hawaii makaukau no keia i noho aku la ma ia wahi.
-----
Ma ke koho ana a na Lunakiai ua koho pono ia aku o Geo. Nawaakoa ame Oscar Cox he mau luna alanui o ka inoa mua no Ewa ame Waianae a o ka inoa hope no Waialua. Ke holopono nei keia mau Hawaii.
-----
O ka poe mahiai o na Kona iwaena o na Kelemania loaa ia lakou ka manao ikaika e kukulu a e hoonoho i agena no lakou i Honolulu nei hoouna ana mai i ka lakou mau hua o ka aina i kanu ai ame na mea like no ke kuai ana.
-----
Aia ke Kiaaina Carter i Lanai kahi i hoohala manawa ai no kona hoomaha ma ka uhai holoholona ana a malia e hiki loa aku ana oia i Kahoolawe no ka nana ana i ua aina hanai hipa nei i lilo ai ma ka hoolimalima.
-----
Ma ka po Poalua nei i ka hora umi o ke kakahiaka i haalele mai ai o Mrs. Maggie Keliipio o Kamoiliili, kekahi o na wahine opio maikai, i keia ola ana a waiho iho la i kana kane me ka laua bebe hookahi. Ma kahi o ka 22 makahiki o kona ola ana.
-----
Aole e pau ana ka manawa hookohu o ka Lunakanawai Lyle A. Dickey no ka oihana lunakanawai ekahi o ka Ana Apana Hookolokolo o Honolulu a hiki i keia makahiki ae. Eia nae ua ae aku no oia e noho hana me ka loaa ole o kona uku ame kona hoole maoli iho no ia iho.
-----
Ma ka noho ana o ka Aha kolonelo o Nuu, Kaupo, Maui, maluna o ke kino make o Hailani mamuli o kona make ana mamuli o ke pekuia ana a ku'iia e John Keawe ma ka la 3 o Okatoba a ua hoopiiia no ka hewa pepehikanaka ma ke kekele ekahi.
-----
I ka wa o ka Teritori ua nui ka ikeia o Mr. C. E. Wilson ma na alanui o ke kuianakauhale pili no i kana oihana he luna alanui nui eia nae ma ka hooholo ana a ka Papa Lunakiai o ke Kalana o Oahu i lilo aku ai ia oihana mai iaia aku a aia ia Vida i keia manawa. E pau ana kona ike hou ia ana ma ia hana ke holopono ke kanawai Kalana.
-----
O ka mokuahi kolo Makauole ka moku nana i kolo aku i ke kao lawe mea ino iwaho i ka moana i ka po Poalua nei.
-----
E paani hou ana ka Hui Popopeku Honolulu ame Punahou ma Ianuari 9, 1904, no kela paani mua i tai ai laua no ka moho o ka makahiki 1903.
-----
I na haumana kaikamahine o ke Kula o Punahou ka lilo ana o ka moho lanakila helu ekahi no ka makahiki 1903 o ka paani popohinai.
------
O ke Keena malama helu o na hale o ke kulanakauhale nei ua hoopauia a aole i maopopo ka lawe ae o ke kalana o Oahu ia hana. Aia a ikeia ia mahele iloko o ke Kanawai Kalana aole e nele ka nana ia o ia hana.
------
Ianei iho nei o Mr. Clark, ka mea i hookipa maikai ia e ko Honolulu nei poe opio o na Ahahui Hooikaika. Pono Kristiano a malama ia ka halawai nona ma Kaukeano Hou i ka Poakolu nei hora 4. Ua holo loa aku no oia ma kana huakai ma ia la no.
-----
Ke ikaika loa mai nei na unene kaua mawaena o Rusia ame Iapana a ke Ionoia mai nei ka hooleleia o na koa e na aoao no a elua, a i ka nana aku ua ikiiki maoli io no a he manawa lele kaua wale no ke ole e loaa kekahi mea nana e kaomi ami.
-----
Ua Haalele mai o Sixto Lopez.
-----
UA NINANIAU A UA IMI HOOMAOPOPO OIA E PILI ANA I KA OIHANA MAHIKO.
Sixto Lopez, kekahi o na kanaka makee aina o Pilipine, a he aliikoa hoi malalo o Aquinaldo, kela aliikoa nui o Pilipine, ua haalele iho ia Honolulu nei i ke kakahiaka Poakolu nei no kona home ma Pilipine maluna o ka mokuahi Nippon Maru. Mai kona hiki ana mai i neinei mai Kapalakiko mai a hiki wale no i knoa hoi ana aku la no kna home, ua ninaninau a ua imi hoomaopopo aku oia e pili ana i ka oihana mahiko o Hawaii nei, ame ke ano o ka hoohanaia ana ame na mea hana.
Ma kana huakai makaikai ma Maui, ua hoikeikeia aku oia i ke ano o ka hana ana i ka palau mahu ame ka hoohana ana ia o ia mikini e Lunahooponopono Barkhausen o ka hui mahiko Pioneer. Ua hele aku oia i ka hale wili ko ma Puunene e makaikai ai i ka hana o na mikini hana ko like ole. Keia hoi ka hale wili ko nui o keia paeaina, a no ka hui Hawaiian Commercial Sugar Company.
I ka Poalua nei ua laweia o Sixto Lopex i ka hale wili ame na aina ko o ka hui mahiko o Ewa e Mr. C. Hedemann, ka lunahooponopono o ka hale hana hao o Ulakoheo. Mai Ewa mai ua hele aku laua ma ka hale hana hao, a ua hoomakaikai ia oia apuni ka hale hana hao iaia i ka ike.
Ka mamo o keia makaikai hanohano kekahi o na poe waiwai o Pilipine. Mau apana aina nunui ko lakou ma ka mokupuni o Luzon. Nui ko lakou poho i ka manawa e kaua ana o Pilipine ame Amerika ma Luzon, a ua manaoia he mau haneri tausani ko ladou poho. Ka manoa nui o keia huakai holo honua ana ana, oia no ka ninaninau ana no i ke ano o ka mahiai ana o keia manawa ma na aupuni naauao. Ua nui kona makemake i ka palau mahu, a ua manao nui oia e hookomo a e hoike aku i keia palau maluna o ka aina o kona mamo, a nona pu no hoi kekahi pomaikai, a e hoopau aku i ka hana ana o na pipi wai, e hoohana is ala malaila. Ka manoa nui o keia ohana oia no ka hoohana ana aku i kela aina nui i ka mahiai ana, a no keia mau makahiki mua e hoomaemae ana lakou i ka aina. Ua manao oia e kauoha mai ana lakou i mau mikini no na hale wili ko o lakou e ku aku ana ke holo pono no nae keia manaolana o lakou.
-----
Iloko o Feberuari e ku mai ai o Mongolia.
Ke kau aku nei na maka o na agena o ka hui mokuahi, ka Pacific Mail Steamship Co., no ke ku mai o kekahi mokuahi nui iloko o Honolulu nei iloko o ka malama o Feberuari a i ole iloko o Maraki.
O Kapena Rinder, oia ka i hala aku nei iloko no ua moku nei a ua hele pu aku nei me na luina no ka nana ana maluna o ua moku nei a ua loaa ae keia ike i na agena o ka Poalima i hala ka la ekahi o keia mahina oia paha ka manawa i haalele aku ai ua moku la ia Piledelepia o Amerika Huipuia.
O kana huakai e holo mai ai mai Piledelepia mai ma ke ala aukai ae o ka Lae Hao a hiki i Kapalakiki aia ma kahi o elua mahina ka manawa e hoohalaia ai e ia, a aole i maopopo ke kuailo mua ana i ka nui o kana manawa e ku ai i Kapalakiko mamua o kona holo loa ana mai i Hawaii.
O Manachuria oiai ua hooponoponoia ae oia aole paha e makaukau kona holo mai a hiki i ka hala ana o keia hapa o ka makahiki.
------
Ka Auhau Kuala o Eono Mahina i Hala.
E like me ke kanawai ua hoopuka aku o Luna Auhau ame Ohi Pratt o ka Apana Auhau Ekahi malalo o ka Teritori he mau palapala pa'i hakahaka no na auhau kuala maluna o na loaa no ka eono mhaina i haia.
Ma keia mahele ua ikeia aole he pili o keia mahele auhau kuala i ka Luna Auhau Iaukea. O ka hoike helu makahiki o na auhau maluna o na loaa ua heluia mai Iulai i mai e like me ia iloko o ke kanawai kahiko aka no ke Kanawai Kalana i hoololi i ke kulana auhau i ka hoomaka ana o keia makahiki. Pela i ikeia ai he mahele manawa okoa ko keia auhau kuala e like me ka ke kanawai kahiko makemake.
I ka Poakahi nei i hooikaika ae ai ka Luna Auhau Mua Pratt e hoopau poho i kana mau hana pili wale no i ka Teritori.
Ma ka aoao o ka Puuku Kepoikai, ua makemake oia e hoonoho i kekahi mea nona iloko o ke Keena Auhau o Honolulu no kona keena Puuku a hiki i ka manawa e maopopo ai ka olelo hooholo a ka Aha Kiekie maluna o ke Kanawai Kalana, in nei no ka pono a pono ole pahe.
-----
Makahiki Hou ma Maui,
-----
NUI KA LEALEA MA IA LA.
-----
MAKE KA LOIO HENRY LONG MA KA HAULE ANA I KA LIO.
-----
MAUI, Ianuari 2.-O ka malamala ana o ka makahiki hou ma Maui ua kulaia ia ma o na lealea like ole e like me ka heihei @o i Kahului, paani popo ma Paia ame na luau lehulehu i hoomakaukauia no ka hookipa ana mai i ka makahiki hou.
O na hoonohonoho ana o ka Ahahui Heihei o Maui i malamaia ma Spreckel Paka aole i holopono loa mamuli o ke keakea o ke ano ino, eia nae, aole i nele ke ohohia o na makaikai i na heihei lio i malamaia.
He elima a eono heihei i holopono loa a lilo no hoi na makana i na lio i lawe haaheo ae i ka lanakila o ka la.
MAKE KA LOIO HENRY LONG.
I ka po nei i ka nora eiwa i make aku ai ka Loio Henry Long o Makawao. Ma kona huli oi ana i kauhale mai kekahi ahaaina makahiki hou i Paia e hoi ana i kona home i Kuau ua loaa iho ia kekahi ulia ke kumu o kona haule ana mai kona lio mai oiai e kau ana oia maluna o ka lio a make koke no ia manawa mamuli o ka naha ana o no iwi poo.
He hapahaole o Mr. Long i hoonaauaoia ma Iolani Kula, ma Honolulu, a ua piha no hoi na makahiki he 48 a make aku la. He kanaka oia i kamaaina nui ia e ko Maui poe a i noho hoi ma na oihana aupuni ma Wailuku ma ke ano kapena makai, no kekahi mau makahiki, a he hope makai no Hana no hookahi makahiki, he loio no Makawao a make wale aku la no.
-----
Elua Makahiki o Galagher e Noho ai i kawa.
Ma ka Poakahi iho nei i wehe ai ke kau hookolokolo o ka Aha Hookolokolo Kaapuni Ekahi ma ka noho ana ae o Lunakanawai Robinson. E like me ke ano mau pela no keia o ka piha mau no-o kekabi no na hooponopono ana o na kiure.
Iloko o ka huina o na hoa kiure kiekie o ka Teritori he iwakalua-kumn-makahi ka nui a hookahi i hookuuia a koe iho ke koena no lakou keia mau inoa malalo iho:
Edgar L. Lewis, R. L. Scott, A. S. Robertson, W. H. Babbitt; H. Z. Austin, C. F. Merrifield, H.A. Wilder, J. A. Baker, A. H. McChesney, F. P. McIntyre, Arthur Johnstone, Sol. K. Nihoa, Sam K. Paulo, John Paahulu, E. B. Hickey, F. H. Armstrong ame Douglas Kaona.
O W. H. Tell kekahi o na kapena makai o ka wa i hala oia ka makai o ka aha no na kiure.
Iloko o keia noho ana ua hooloheia ae ka hihia o Gallagher no ka aihue i na waiwai makamae o Mrs. Kuihelani Parker. He elua kulana hoopii o keia kanaka-hookahi no ka wawahi hale ma ke degere elua a hookahi no ka aihue ma ke degere ekahi.
O Hugh Rooney oia kekahi i hoopiiia no ka malama i ka waiwai i aihue ia, oia hoi, o na mea makamae o ka hale o Samuela Parker.
Geo. A. Davis ame Henry Hogan na loio ma ka aoao hoopiiia a o ka Hope Lolo Aupuni no hoi ma ka aoao o ke Aupuni.
Ma kekahi kumu o ka aoao pale ua hoike ae na loio ua hanaia ka hana e Gallagher i kona wa on a, aka ua hoike ae ka loio Aupuni i ke ku-e loa o ia manao a ka aoao pale oiai e kalaiwa ana ka mea i hoopiiia i kona mau haku iuka o Puuohia mahope koko iho o ka aihue ana.
Ma keia manawa ua puoho leo nui mai la o Gallagher no ke pale ana laia iho, ma ka hoike ana, he hoopunipuni na mea i hoikeia oiai he hana wale ana no kana i ke kaa a hoi no e hiamoe no ka ona.
Ma keia manawa ua hookau aku la ka Lunakanawai Robinson maluna o Gallagher no ka hoopaahao ana ma Kawa ma ka hana ikaika no elua makahiki. Mawaho ae o keia hihia ua nui no na hihia e ku makaukau nei no ka hooloheia a e hoolohela nei.
-----
Ka Paku'i Hou o ka Home Kapiolani.
Ma ka auwina la o ka Poaha o ka pule i hala i weheia ae ai ka hale hou o ka Home Hoohanau Keiki Kapiolani i paku'iia aku i na hale mua e ku nei ma ka malamaia ana ae o kekahi anaina hoomanao no ia mea.
He pakui nui no keia, eia nae o ka hale holookoa ua hooponopono hou ia ae a ua hoolako hou ia me na lako hou a ua maikai na mea apau.
O ka põe makaikai i hiki a i hookipa maikai ia mai ua ike lakou i keia mau hoololi ano hou-o na paia i kapiliia me ka pepa ua nalo aku ia mau helehelena a o ka hinuhinu o ka waniki ka mea e halawai ai me ka, maka.
Aia na keena like ole-o na keena hoohanau keiki, ame na keena o ka poe malama i na hana ame na keena o na hana like ole i ku la ano home, a ma ka aoao o ka poe i hiki kino akuilaila a ike i keia u'i hou o ka home ua hoike ae lakou i ko lakou mahalo nui me na hoomaikai no na hooikaika a loaa keia mau hoololi maikai. Aia na keena o keia mau home ma na inoa like ole a o kekahi o na keena ua kapaia ma ka inoa o ke kaikamahine a Mr. Dreier i make, a aia iloko olaila e kau ana kekahi loli nui no ua kaikamahine nei, a ma ka aoao o Mr. Dreier ua haawi ae oia he $200 no ka waihona mau o ia keena.
Mawaho o na hookipa ana aole i nele na makaikai i ka panaiia ana me na mea ai mama, ilaila pu no hoi ka bana Teritori i paani ai.
-----
O ka mea kuhohonu loa e loaa mai ana mai ke anu ame ka nalulu mai oia no ka ma'i numonia. Ina e malamaia keia me ka noonoo maikai a hoohana pu ia ka laau kunu Chamberlain's Cough Remedy e hoohaawaleia no keia mau pilikia apau. E hoola no keia laau i ke anu ame ka nalulu iloko o ka manawa pokole mamaua o kekahi mau ano laau e ae. He hoola mau keia laau a he hoola iloko o ka manawa pokole. E loaa no ma ka halekuai laau o Benson, Smith & Co., Ltd., na agena kuai aku, no ke kumukuai kupono.
-----
Pakele o Wright I Keia Manawa
O Walter A. Wright ka hoahanau ponoi o ka Puuku Teritori Wright i mahuka ua pakele ae oia ma ka apua no keia manawa maluna o ka hihia apuka dala o ke Aupuni ma ka olelo hooholo a ka aha o ke kau hookolokolo ma Kauai. Mamuli o ka like ole o na kiure ua hookuuia oia oiai ua ku ae ka papa kiure ma ke kulana o umikumamakahi ia akahi no ka hoahewa ana.
Ua hoopiiia o Walter no ke apuka ana i ke da la o ke Aupuni Teritori o Hawaii, nona ka huina o $2204.60 oiai oia e noho hana ana ma ke ano he hope luna auhau no ka mokupuni o Kauai, no ka apana no nae o Waimea.
He apuka keia i hoikeia ae mahope iho o ka nalowale honua ana o ka Puuku Wright ke kumu hoi i hopuia ai keia hoahanau o ua Puuku nei.
I Kauai no oia kahi i hoopaaia ai i kinohj loa aka mahope mai ua hoihoiia mai i Kawa no ka malama ana iaia. Mamuli o na kumu ua hookuuia oia e Lunakanawai Gear eia nae ua hopu koke ia mahope mai a laweia mai imua o Lunakanawai De Bolt a hookuu hou ia e ia, eia nae ua paa hou mamuli o ka hoopiiia ana e ka Aha Kiure Nui o Kauai. Ma deia ua hemo aku oia malalo o ka bona o $2,500.
Ma ka Poakolu o ka puie i haia i hooloheia ai kona hihia imua o Lunakanawai Hardy a o M. F. Prosser ka loio ma ka aoao hoopii, a oiai ua hoopiiia o Wright no ke apuka dala i ka huina o $2,204.60 ua waihoia aku la imua o ka aha ke noi aole i hewa.
O J. W. Cathcart ka loio ma ka aoao pale a o Douthitt ka Loio kokua i ka Loio Aupuni i ka manawa i kukulu mua@ia ai ka hihia i kinohi oia kekahi i ku hoike ae no ka aoao hoopii a ma ka manawa i hookuuia ai na kiure oia no ka hora elua o ka auwina la o ka Poaha ae a hiki wale i ka hora elima oia ka manawa o lakou i waiho mai ai i ka loaa ole o ka olelo hooholo lokahi, no ka mea, ua like na hoa kiure.
He nui no na like ole o lakou ma na koho ana, i ka manawa mua ua loaa ka like ole ma ke kaulike ana o na aoao a elua-ka aoao hoole ame ka ae, a i ka lua iho o ka manawa ua loaa ae la ka like ole o ehiku i ka elima no ka hoahewa a i ke kolu o ka manawa, he umi i ka elua a i ka hope loa no hoi he umi-kumamakahi i ka hookahi.
Ua oleloia o kela kanaka hookahi ua nui ino kona paakiki a hiki wale i ka manawa i pio paakiki a hiki wale i ka manawa i pio ai ka manaolana a waihoia aku la keia like ole imua o ka aha.
Ua mau aku la no ka hihia a hiki i keia kau ae iloko o ka maiama o Maraki.
-----
He Make ka Hopena o ka Luau a na Keiki H@e Waapa
Mamuli o ka paakiki ame ke ake o kona manao ikaika i kana mau mea i makemake ai ma ka papaaino luau a lakou no, na keiki hoe waapa i hoomakaukau ai, ame ka ai ana mamua o ka mea kupono, ua loaa o "Old Sam," kekahi o na keiki hoe waapa kahiko loa ma kela oihana a i kamaaina pu hoi, ua make iluna o ka uwapo o Brewer i ke kakahiaka nui o ka Poaono iho nei, i ke kanaka kiai.
O Samuela Kailiahi, a i maopopo loa ia ma ka inoa kapakapa "Old Sam," oia ke kanaka kahiko o keia hui. Iloko o na makahiki loihi ana i noho ai ma keia oihana, ma ka hale waapa no oia e moe ai me kahi palaumoena ame kahi kihei huluhulu, i lawa kupono nona hookahi. Oia kekahi o na kanaka oluolu ma na uwapo, a ua nui no hoi ka poe hele iaia no ka lawe aku ia lakou i na mokumanuwa, a i ole no ka lawe ana aku ia lakou i na wahi a lakou e makemake ai. I ka manawa o ke aumokukaua i ku iho nei i Honolulu nei, nui no na hapaha i loaa aku iaia mai ka poe mai o na manuwa ame ka poe no hoi kekahi o ke kaona nei a ua hoolilo oia no ka pono o kona kino ame kona opu.
Oia no ka mea i lulu nui no ka paina iho nei a lakou i ka Hapenuia nei, aka o na waiona no ka hapanui i hoomakaukauia. Ua inu ino oia i ka bia, gini ame ka wisike, me ka noonoo ole i ka hopena, a i kona manawa i hoi ai e moe, ua lilo oia i ka moe hooheno a niolopua, i ka moe hoi ona i ala hou ole mai ai.
Mawaena o ka hora ekolu ame ka hora eha o ka auwina la o ka la Hapenuia, ua hoi aku oia e moe maluna o kekahi paila mauu maloo ma ka uwapo o Brewer ma, a aohe no hoi he hoomanao iki o na hoa no kona moe loihi. Ma kauwahi o ka hora ekolu o ka wanaao Poaono ae, ua loaa aku oia ua make. Ka mea nae i manao ai ke kanaka kiai ua make, no kona ike ana i na manawa apau ana e maalo ae ai ma kahi a kailiahi e moe ana, e ike mau ana oia hookahi no ano o kona moe ana, aole oia i oni iki. I dona manawa i ike ai i keia mea ua hoike koke aku oia i ka oihana makai.
Ua hana o Kailiahi mamua loa me ka Pacific Hardware Company, a i kona manawa i noho ai i ka hoe waapa, aole oia i huli aku no kekahi oihana okoa ae, ma keia oihana no oia a hiki wale i kona make ana aku la.
Aohe on a ohana. I na la opiopio o Kailiahi, he sela moku oia, oia no ka manawa e okohola ana o Hawaii nei, a ua holo oia a hiki i na kai Atica (Artic) i paa mau i ka hau. Ua holo moku oia me Kapena Tripp o ke Keena Haku o na awa ku moku.
-----
Kokoke e Hooholoi na Kaa Uwi la Nunni.
O ke ano kaauwila nunui o ka Hui Kaauwila o Honolulu nei ke aneane aku nei e paa pono a i ka manawa kupono o keia mahina e hoaoia ai ua ano kaa nunui nei.
He elua mau kaauwila liilii o ke ano e holoholo nei i keia manawa ua hoohuiia ae a ke pau pono ka hana no ia mau kaa e lilo ai i hookahi kaa nui, nona hoi ka nui noho o kanakolu, ua like ia me umi-kumamalima noho o ka aoao hookahi, ua like hoi ia me kanaono ohua.
He nui loa ae leia kaa a loihi no hoi mamua o na kaa nunui o ke alanui Moi e holoholo nei nona ke ano poepoe a ma na aoao o keia kaa nui he elua anuu alapii e kau ai iluna a iloko o ke kino.
-----
HE ILI NANI, LIMA A'IA'I
ME KA
@AUOPO ULIULI
KA HUA O KE
KOPA CUTIKURA
HE MILIONA A OI ka nui o na wahine e auau mau nei me keia KOPA CUTICURA no ka malama ana, hoomaemae ana, a no ka hoonani ana i ke lakou ili, i pau ai ka papaa o ke poo, ka unahi-pii, a i mea no hoi kekahi e pau ai ka helelei ana o ka lauoho, a i hoopalupalu, hoa'la'i a me ka hoou'iu'i ana i ka ili o na wahi i hele a manoanoa i ka hooikaika i ka hana e like me na lima, a pela no hoi e hoopau ai i na eha, ma ka holoi ana i na wahi eha me keia kopa, i ole oi e ike i ka aai me ka welawela; i ole no hoi e hou nui, ma ka holoi ana i na wahi pehu a palahehe; a he oi loa aku ka waiwai nui o keia kopa i na makuahine e lawelawe ana i na hana lehulehu i pili i na keiki a me lakou iho no hoi, a i na wahine no a pau; a he kupono loa no hoi keia kopa no na wahi auau a pau. O ka poe i ikemaka i ka maikai o keia kopa, aole loa lakou e ae iki ana e hoao i kekahi kopa okoa aku, ke koiia mai; ina no e oleloia ana, he kupono ia ano okoa aku no na mea e pili ana i ka ili, ke poo a me ka lauoho o na bebe a me na keiki. Ua loaa mai keia waiwai nui o ke KOPA CUTIKURA mailoko mai hoi o kela laau hoola ikaika loa i kapaia KUTICURA. oia ka laau ikaika loa ma ka hoola nan i na popilikia a pau e pili ana i na mea ika loa i ka pale ana i na mea ino, a he loaa no hoi ke ala maikai o na puailoko o keia kopa. Aole loa e hiki ke hoohalikeia mai kekahi ano kopa e aei hoohuihuiia e ke akamai o kanaka me keia kopa, ma kana mau hana ma-lama, hoola a me ka hoou'iu'i ana i ka ili, a pela aku. Pela hoi i ka ili oke poo, ka lauoho a me na wahi e ae.
Aole no i lihi launa mai na kopa on a aina e me keia, no ka auhau ana a me ka hana o na keiki liilii. Pela ihola i lilo ai ka waiwai o na kopa a pau i HOOKAHI no ke KUMUKUAI hoo-kahi, a he Helu Ekahi keia Kopa no na poino o ka ili a me kahi auau, a hehelu ekahi no hoi no na kamalii a puni ke ao nei.
NO KA HOOLA LOA ANA I NA ANO PEHU A POHAKA PALAHU MA NA WAHI A PUNI KE KINO, e hoomaemae i ka palapu me ke kopa CUTICURA i pau ai ka paapaa lepo a ano e ae paha o ka ili, a pela hoi ke poo, i pau ai ke kepia a me ka papaa piele, alaila, e hooma-u i kahi eha me ka Aila Hamo CUTICURA i mama ae ai ka akiaki ana a ka hu'i a me ka ehaeha, a pela hoi e hoohana ai ka laau i kana hana a oia ka eha, alaila, e inu i ka Laau Inu CUTIKURA i mea e maemae ai ke koko maloko. Ke kuaiia ne keia laau ma na wahi a pau o ka honua nei. Ma Aukekulia: o R. Towne & Co., o Sydney, N. S. W. ko laila Agena; ma Aferika Hema Depot: Lennon, Ltd. Na "Hoakaka no ka Hoola ana i na Bebe a me ko lakou mau kinaunau," he loaa wale no me ke kuai ole.
O POTTER DRUG AND CHEM. COMP., Boston, U. S. A., na Ona o na laau CUTICURA a pau loa.
------
------
Na Mea
PAANI AME HOOIKAIKA KINO
Ma Kahi o
Pearson & Potter Co., Limited
ALANUI HOTELE ME UNIONA
-----
-----
_____: E KAUOHA AE I KAU MAU :::_____
MEAONO AME HAUKILIMA
KARISIMAKA
Ma ka Halehana Palaoa
SUNRISE BAKERY
Alanui Nuuanu kokoke i Alanui Beritania.
He oluolu ke kumukuai no na mea a pau, a o ka wa kupono keia e kauoha, no kau mau mea i makemake ai.
Mai Poina i Kahi, Alanui Nuuanu kokoke i Alanui Beritania.
-----
Na Puliki i ka Makahiki Hou.
-----
Ma ka Makahiki Hou i malama ae ai na Pukiki o ke kulanakauhale nei i ka piha ana i ka Hui Manawalea o Hawaii ka iwakalua-kumamalua makahiki o ke ku ana me na hoohauoli kupono.
Ma ka hora elima me ka hapa o ke kakahiaka i haawi pu aloha ae ai lakou ma ka ahle kalapu, ma alanui Alapai a oia no hoi kahi i malamaia ai ka hoohanohano ana o ka huki ana i ko lakou have.
Mai ka hale kaiapu aku ka haalele ana o na Pukiki ma ka maki ana, a ka'ihele au la a hiki i Roma no ka pule mesa, ia kakahiaka i ka hora 9:30.
A i ka pau ana o ka pule ua ku laina hou ae la ua poe Pukiki nei a make hou aku la no ko lakou hale kalapu ma ka hele ana ma na alanui Papu a huli ma Vinia, a huli ma Nuuanu, a huli ma Pauoa, a huli ma Puowaina ame ke alanui Lusitana. O ka lakou bana no ka makamua loa.
Mahope iho o ka hiki ana i ko lakou hale kalapu ua haawi ae la ka Peresidena Silva he mau olelo hoolana.
-----
PONO AAHU O KANE
o na Ano a Pau, e loaa no ma ka Halekuai o
FUKURODA
He emi loa ke Kumukuai mamua o kekahi mau wahi e ae, a e loaa no hoi o EDWARD KEALOHA malaila, nana e hookipa aku i na hoaloha a pau e kipa aku ana.
28-32 Alanui Hotele - - Honolulu, H. T.
-----
KUAI HOEMI NUI O NA WAIWAI KALIKIMAKA
E HOOMAKA ANA MAI NOVEMABA 28, 1903 : : : :
Na Lole Kinohinohi ano hou loa. Na lole Nani Wailiula. Na Kamaa o na ano a pau. Na Lako Hoonani Hale. Pale-Ili o Kane me na Wahine. Na Waiwai Kalikimaka o na ano a pau, a he nui wale aku na waiwai i koe e hiki ole ai ke helu papa aku.
Nolaila, e na makamaka, ua hamama keia mau ipuka nou e kipa mai ai. E HELE MAI NO A PAU, MOE KAOO. E HELE MAI I KA WA KUPONO, A E WAE NOU IHO.
Goo Kima
Kuina o na Alanui Nuuanu me Hotele.
------
HOOLAHA KUMAU
-----
JOHN M. KEA.
-----
He Notari no ka Lehulehu; he mea hana i na Palapala Kanawai, a he mea huli i na kuleana aiaa. O na kauoha mai na mokupuni mai e hookoia no me ka poloiei.
Keena Hana: Ma ka Loio Kuhina, Hale Mana Hooko. Honolulu, Mei 22, M. H. 1903.
-----
HUI HOOLEWA HONOLULU
-----
Ke hooiaio nei keia hui i kana mau hana kokua i kona mau lala. I keia wa ua ei mamua o 1300 lala, a ke pii mau nei i kela ame keia la.
J. H. TOWNSEND, Kakauolelo
124 Alanui Beritania Tel. Main 411.
-----
O NA WAIWAI U'I LOA
NO NA
LA -:- KULAIA
Eia ke hoikeia nei ma ko S. OZAKI Halekuai, ma Waverly Block, Alanui Hotele.
O na waiwai e laa --------
NA KIMONO, NA HAINAKA SILIKA, LEI A-I AME NA PALULE O KANE,
He ohaoha wale ia no ia mau Makana a pau . . .
I NA HE ALOHA @OU K PA MAI E IKE IA'U
S. OZAKI,
Waverly Block Alanui Hotele