Ka Nupepa Kuokoa, Volume XLII, Number 9, 26 February 1904 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, FEBERUARI 26, 1904.        8

 

KAUNAWAHINE

O KE KULANAKAUHALE O TAREVIS.

KE ALOHA I KA MAKA PAHIKAUA.

 

MOKUNA XIV.

HOOKIPA ME KA MAKO-NA.

  "Ua haawiia mai na kuhikuhi ame ke kauoha a oia ia i hookoia aku la," wahi a ua alakai nei i pane mai ai.  "E lawe aku iaia iloko o ke Keena Hookipa poepoe a o ka manao o ia e ki a paa i ka puka."

  Ua hoohalahala hou aku la ka Emepera. ma ka hoike ana aku aole oia he paahao na ke Kauna Paele aka he malihini i hookipaia a ina keia o ke ano o ka hookipa ana alaila he hookipa ana keia i ku maoli i ke ano mako-na.

  Aole nae i hooloheia mai keia mau hoohalahala a ka Emepera aka aia ia ke lohe la i ke kamumu o na kapuai-wawae o ua alakai nei e hoike mai ana iaia aia ia he iho la no lalo.

  Aka i ka manawa i pau loa ai kona lohe ana i na kamumu ua hina aku la oia ma kahi moe mauu a waiho hiamoe koke aku la no ka mai luhi.

 

MOKUNA XV.

HOOMAKAUKAU KE KAKELA E HOOPIHA ME KA AI.

  I ke kakahiaka nui o kekahi la ae aia hoi na komo mai la na kukuna o ka la iloko o ke keena poepoe a pa olino iho la maluna o ka helehelena o ka Emepera ke kumu o kona ala ana a ike koke aku la oia na wehe hamama hapa ia ae ka puka i paniia i ke ahiahi iho.

  Na ia mea i kono koke mai i kona noonoo e iho aku ilalo a komo aku la i kahi i hui ai oia me na wahine i ka la iho i hala, eia nae, aole he kanaka o ia wahi.  Ua hoomau aku no oia i ke komo hele ana i na keena na like no ke kanaka ole a i kona hiki ana iwaho aia hoi na ohua apau o ke kakela e hoohikihiki ana i na mea ai i laweia mai e ka poe mahiai mamuli o ke kauoha a ke Kauna Paele.

  Aia pu no hoi ke Kauna Paele ma ka puka-pa e noho luna ana maluna o kona poe ohua, ia lakou e hoohikihiki ai ana a hoolu-a aku iloko o ka hale-lalo o ke kekela.  Ma ia wahi hookahi no oia e hooponopono ana me ka poe mahiai no ke kumuwaiwai o ka waiwai i laweia mai ma ka uku kuike ana.

  Ma keia kulana hana i loaa ai ka hoomaopopo ia Rodolofo no ke Kauna Paele he kanaka manao nui ole oia i ka pono o ha'i aka i kona iho no. a hala kekahi hapa o ka la ua piha pono aku la ua hale-lalo nei e hiki ai ka ohana holookoa o ua kekela nei ke ola no kekahi mau manawa loihi.

  A hala kekahi manawa o kona ku ana no ka nana ana i ka hana a ua poe nei ua huli hoi ae la oia a pii aku la i ka aleo-kaua. he wahi kiekiena ia e loaa ai ka ike piha i ka aina apuni kokoke i ua kakela nei. kahi hoi i loaa ai iaia ke hooho mahalo i ka naui o ka nanaina o ka aina.

  Ma ia wahi aku ua hoohele loa aku la oia ma ka lihi-pa o ua kekela nei ke kumu i loaa ai iaia ka ike i ka manoanoa o ka pa apuni e hiki puikaika ai no ka hana a ka enemi ke hoonana mai, a ma ia hele ana no hoi i loaa ai iaia ka ike o ka hoonohonoho papa-kaua ana ina nei no ke komo aku iloko o ka paio me ka Akibihopa.

  Ua ike pu aku la no hoi oia i na kaapipi me na kahupipi e hoi ana ma ko lakou home ma ke ala e hoike ana i ke ano o ka noho ana o ia poe, a maluna hoi o ka ili o ka wai o ka muliwai Mose-le na waapa i piha me na ukana no ke Kakela Turona.

  Iaia no e ku ana malaila a hilinai aku la kona kino i ua pa manoanoa nei. oiai hoi na kukuna maikai o ka la e pa olino ana maluna ona oiai he kakahiaka maikai kela, ua hoolanaia ae la kona manao i ka lohe ana i ka leo o kona panapua ma koua pane ana mai:

  "Ke lana nei ko'u manao ua maikai kou hiamoe ana i ka po nei, e kuu Haku Rodolofo."

  "O. maikai.  A pehea oe?"

  "Aohe mea oi ae," wahi a ka panapua me ka hoomau ana, "o ke aouli nani o ka lani ka iluna a o kahi moe mauu nolunolu malalo ae o'u ua maikai maoli ka hiamoe ana.  A ia manawa no a mamua o kuu pa'uhia loa ana i ka hiamoe ua ulu mai la na hoomanao ana no kuu hoaloha nona hoi ka ike i oi loa ae mamua o ko'u ma keia mea he panapua.  Na ia mea i kono mai ia'u e noi aku i ke Kauna Paele e hookuu mai ia'u ano."

  "A hookuu a hele ihea?" i ninau aku ai ka Emepera.

  "I Tarevis."

  "Pehea oe i manao ai e ae mai ke Kauna ia oe e komo aku iloko o kahi ana e ike mai ai he poino ia nou, a i ole e lilo ai oe i koa nona a e paio mai ai i ke Kauna Paele?"

  "Ua ano like no ko'u manao nie kou e kuu Haku," wahi a ua panapana nei i pane aku ai, "a i ui aku la wau ia oe no ka pono ame ka ole o keia manao o'u.  O ka'u makemake nui ai e kono aku i ua hoaloha nei o'u e hui pu mai me kakou ma keia paio e hiki mai ana no ke kokua ana i ka Paele.  O kela ke keonimana i lehia maopopo ma ka lawelawe ana i keia mea kaua a aohe he mea e hala i kana pua."

  "Ua manao maoli wau aole e loaa ka lua e like me oe," i pane aku ai ka Emepera, "Owai keia hoaloha ou?"

  "O Roga Kenta kona inoa, he kanaka nona ka ike lehia no ka pana ame ka pua, a he haku mele noeau hoi ma na mea pili i na kahua kaua."

  "O he haku mele pu no ka oia," i hooho aku ai ka Emepera.

  "Ina he lehia oia ma ka panapua alaila ua like aku la no kona makaukau ma ka haku mele."

  "I ko'u manao." wahi a ka panapua. "aohe mea like me ia."

  "Ina pela alaila e hoao wau e ike aku i ke Kauna Paele no ka hookuu ana ia i loaa mai ai ia koa makaukau no kakou ke hiki mai ka wa o ka hana aka ke kanalua nei no wau i kona ae mai i ka hookuu ana ia oe, oiai aole i maopopo kou hiki hou mai.  "O ko'u manao pu no ia."

  "O Ioane Sure ko'u inoa, e kuu Haku," wahi hou a ua panapua nei.  "He Pelekane wau a he Olelo-e oia , a he enemi hoi laua ia laua iho. no ka mea. ua lanakila ka Olelo-e maluna o kona hoa, aka, no maua. ua ike iho wau i ka waiwai loa o ka hoohoaloha ana me Roga Kenta no maua iho pela i like loa ai maua a pilipaa loa kekahi i kekahi ke kumu i lilo ai wau i haumana nana ma keia mea he panapua."

  "E like no me ka'u i hoike aku nei ia oe," wahi a ka Emepera, e ike aku wau i ke Kauna Paele no keia ninau aole nae i nele ka loaa o ke kanalua ia'u i keia manawa no ka hooleia mai o keia misiona au."

  "Alaila, ua lilo anei au malalo o ka malu o ke Kauna Paele a aole malao o kuu Haku Rodolofo?  Ua hoolilo anei oe ia'u no kana mau hana?"

  "Aole pela," i pane aku ai ka Emepera.  "O oe no ka'u panapua, a'u e manaoio nei e hoomahuahua aku i ka heluna o na panapua ma ou la iloko o ka manawa kupono ke hiki mai ia manawa.  Aka, no keia manawa he mea pono ia kakou e komo e komo kokua aku i ke Kauna Paele."

  "E like me ka kuu Haku i pane mai la pela no wai i hauoli ai i ka hooko ana no ka pono o ke Kauna Paele, aole nae ma ke ano he kauwakuapaa aka ma ke ano he kanaka kuokoa."

  Alaila iho mai la laua mai kahi a laua e ku kamailio ana. e hooho mahalo ana hoi i ka nani o ka aina, eia nae, ua hoohauoli loa ia ka Emepera i ka lohe ana aku i kekahi loa o ka ume puuwai a i ka huli ana ae aia hoi e hele mai ana ke Kaunawahine Tekela, a ku ana imua ona me ka helehelena minoaka a ohaoha o ka hauoli i ka ike ana mai i kona puuhonua.

  I ka ka Emepera nana aku. me he anela la ke Kaunawahine Tekela i hoounaia mai no ka hoolana manao ana a he keu ka u'i i kona manaoio ia kakahiaka oiai na kukuna o ka la e pa olino ana maluna o na papalina nohea o ua u'i nei ka mea hoi nana i hoopiha hou aku iloko o ka Emepera i ka uwila ame ka ikaika o ka manao e ku paio aku nona.

  "Ua kupono anei keia hele ana mai la a'u ia oe e kuu Haku." wahi a ke Kaunawahine Tekela i pane aku ai me ka nui hauoli e hoikeia la ma kona helehelena.  "Mamuli o ka waihoia ana o ko'u koloka ma kahi okoa iloko o keia kekela nui he hana nui ia na'u i hele huli aku nei a loaa aku la no hoi. eia nae, aole paha e loaa aku kela o na lede imua o ke aloalii o ka Emepera i Palanipoka."

  "E kuu Hakuwahine," i pane aku ai o Rodolofo. "o na lede imua o ke aloalii o ka Emepera i Palanipoka. he maa lakou i ke ku imua o ka malamalama o na ihoiho kukui. aka ke ku nei wau imua o kuu Hakuwahine iloko o ka malamalama nani o ka la."

  Alaila huli ae la ua wahine opio nei a pane aku la i ka Emepera: "Ina kena he olelo o ka haawi hoomaikai no keia hui ana, alaila he mau hoomaikai ia i kupono loa no na lede o Palanipoka.  Aka hoi ina o kena mau olelo hoolana manao mamuli o ka pa olino o ka malamalama o ka la maluna ou. he haawina i loaa ole iloko o keia kakela, e oluolu e hoopau i ka noonoo no kou hele ole aku i ke kulanakauhale alii ke kulanakauhale o ka malamalama ma o ka noho ole ana iho no'u nei."

  "He mea oiaio no ia. e kuu Hakuwahine, aka aole e hooko wale ia aku ia hana me ka loaa ole mai o kekahi kono no ia hana." 

  "I ko'u manao," wahi a ua u'i nei, "ina e loaa mai ia kono ia'u e haawi i koke no wau i ko'u ae."

  "Ke manaoio nei wau e hana io aku no oe pela."

  "Malia paha o oe kekahi e hiki aku ilaila oiai au ilaila, alaila aole oe e poina ia'u.  A ina on hoi wau ike ana ia oe ilaila e hoi aku no wau ia oe nau e kuhikuhi mai ia'u i ka poe koikoi o ke kulanakauhale alii o Palanipoka."

  "E like me ia au i hoike mai la. pela ko'u iini e hana aku nou a iini loa ia hoi e a'u e hoike aku ia oe, aka. aole i loaa ia'u ka manao ikaika e hoike aku."

  "Ke makemake nei au e hoike aku i ko'u manao ia oe no kou akahele nou iho.  Ua hoike mai kuu makuakane i kau mau hoohalahala no ka Emepera.  I ka po nei kona hoike ana mai ia'u me ke Kaunawahine Henerika.  Ua ehaeha loa ia wau i kuu lohe ana i kela mau hoohalahala no ke Poo o ke Aupuni, no ka mea, he makaainana ponoi wau nona, a ina he kane wau aole loa e hakalia ka hemo o ka'u pahikaua mai kona wa-hi ae no ke kaupale ana no ka inoa maikai o kuu Emepera."

  "Akahi iho la no hoi au a ike i kou manao, e kuu Hakuwahine," wahi a ua Emepera nei, "e hoike aku wau ia oe e akahele io wau i ka'u mau olelo no ua Emepera la au.  Aka ke manaoio nei au i keia oiaio, o ka Emepera he emepera no oia, aka aole e hiki iaia ke hoole i ka maikai ole o kekahi mau hana ana e hana ai ana no e ike ai mahope iho aole i maikai a kupono, a aole no e nele kona hooia mai i ka hemahema io o ia mau hana."

  "I ko'u nana aku aole ou malama i ka'u noi ia oe no ka Emepera." i pane hou aku ai ke Kaunawahine Tekela pili no ka Emepera."

  "E huli ae no hoi kaua a nana i keia hoomakaukau kaua e hoohana koke aku ai i keia mau la iho." wahi a ka Emepera i pane aku ai.  "Ua hoopii aku anei ke Kauna Paele i keia unene imua o ka Emepera a i ole o ka Akibihopa imua o kona poo?  Aole.  Aole oia i nanaia aku, aka. i ka manawa i loaa ai keia like ole oia iho la ka manawa o ka liuliu ana me ka ui mua ole aku i ko laua poo."

  "Aka aia ka Emepera i ke kaua Hemolele i na aina e.  A ina oia ma ko'u wahi e ku nei i keia manawa a aole noi i ke kaua Hemolele, e hoao anei oia e hoopau i keia kana a i ole e komo alakai aku paha."

  "Ina pela," wahi a ua kaikamahine ui nei, me ke ano huikau ana ae o kona noonoo no ka pane kupono e waiho aku ai, "alaila heaha kou mea i hoike ole aku ai i kena ano manao au i hoike mai la ia'u imua ona?"

  "Pololei kena e kuu Hakuwahine, aka aole e nanaia mai ka'u mau hoike manao ana ina no he maikai.  He nui na hemahema o kekahi mau hana e oki pu ana i ka holomua o kona aupuni ma o ka lilo ana o kona noonoo apau maluna o kekahi helehelena u'i loa ana i ike ai no ka manawa mua loa.  He hiki ia oe ke hoomaopopo mai i ka oiaio i ia mea e kuu Hakuwahine, a'u hoi i ike maoli ai i kona hui ana ma ua helehelena u'i ia. ka wahine u'i hoi a'u e manaoio nei ua hiki iaia (wahine). ke hooi ae i ke kulana mana o ua Emepera nei ke makemake ka wahine e haawi iaia iho nona a e hana aku pela. Nolaila, ua hiki ia oe ke ike mai i ka hiki ole loa ia'u ke hoohuli i ka noonoo o ua Emepera la."

  "E hana aku kela ide ppla, oiai i ko'u manaoio he hana kupono loa ia nana e hana ai a he pomaikai nui ia no ua lede la i ka loaa ana iaia ia manawa."

  "Pela paha.  Owai ka mea e hiki ke ike i ka hana a ka wahine i manao ai e hana.  Ua loaa nae ia'u ka manaolana poho ole no kona hooko aku."

  "He  lede u'i maopopo anei ia?"

  "O, me he mea la.  Ae, pela no e like ma kau i ninau mai la." 

  Ma keia mau kukai olelo ana o laua ua hauoli loa ke Kaunawahine Tekela no ke kamailio ana no kona Emepera ana i manaoio ai aia i ka aina Hemolele.  Alaila pane hou aku la oia:

  "Aole ana kakou e noho iloko o ka pololi, koe wale no a loihi loa ka manawa o keia liuliu kaua e komo aku ai."

  "Aole i maopopo ia'u ka loihi ame ka nui o ka ai i hoomakaukauia, oiai aole au i ai i ko'u aina ahiahi o ka la i nehinei e hiki ai ai'u ke hoomaopopo, a aole no he mea nana i kono mai ia'u i kahi o ka lumiaina i keia kakahiaka e ike ai au no ia mea."

  "Alaila, ke hoike mai nei anei oe aole oe i ai i kou aina kakahiaka?  Ua maikai oi loa keia hoonahili ana a'u i kahi kanaka pololi. He hoike ana no hoi keia ia oe i ka nana ole o ko makou ohana i ka pono o ha'i."

  "Aole he loaa oia ano noonoo ia'u.  Aka no kau hoohaili ana mai nei no ko kakou pololi ole no ka nui o ka ai pela hoi au i hoopuka aku nei ia mea.

  "Alaila, e hahai mai oe mahope o'u no ka lumiaina a ua hauoli nui au e kuene aku nau."

  Alaila hahai aku la ka Emepera i ke Kaunawahine Tekela a noho iho la ma kona noho i haawiia mai nona e noho iho ai kokoke i ke pakaukauaina a o ke Kaunawahine Tekela no hoi ma kekahi aoao mai, oiai o Hilda e kuene mai ana no ka Emepera.

  Ma keia noho ana o ke kanaka opio ma ke pakaukau no kona aina kakahiaka ua nui loa kona olioli i keia noho pu ana mai o ka wahine i lilo maopopo ai kona puuwai ma na kukaiolelo maikai ana no ka manawa.

  I kela ame keia manawa aole i nele kona alaalawa iwaho o ka Mose-le a o na nanaina maikai e halawai ana me kona mau maka oia iho la kekahi o na hooaiai ana o ka hoohialaai e hoohala manawa ai.

  Ia lakou e hoohala manawa ana oia no ka manawa a lakou i lohe aku ai i ka ikuwa leo nui a na ia mea i ume aku i ko lakou noonoo ilaila.

  Eia nae, i ka manawa o keia kupikipikio na loaa io aku no na pi-o-o aka no ka Emepera ua kauoha koke aku la oia i ka panapua e huli aku i ke kumu o ka uwa a me he ia.  i ka nana aku a kona mau hoaloha a oi loa aku ke Kaunawahine Tekela. he ikaika kona luna manao i ka hoomalu ana iaia iho mai ke ano pi-o-o ana.

  "Ke manao nei wau o ka Akibihopa kela ame kona mau koa." wahi a ka Emepera, "aka aole nae e hiki ke hooiaio aku mamua o ka ike ana."

(Aole i pau.)

 

Makai Kiu

KALOKE HOME

:AME KA:

Hihia i Huliia me ka Noeau

 

MOKUNA IX.

(Ka Kauka Wakekona Hoike Elua.)

KA HOAILONA KUKUI MA KE KULA.

  Lalau aku la wau i ko'u papale a hoomaka aku la e hahai mahope one me ka awiwi, a hiki aku la wau i kahi e mana ana ke alanui a nana aku la wau. aole he wahi mea a ike ia aku o ko kaua hoaloha.  Komo mai la ka manao hopohopo iloko o'u, malia paha ua huhewa ka'u hele ana mai, nolaila, pii aku i ke kula e waiho mai ana mamua o'u.  Ike aku la wau iaia e hele ana mamua o'u. ma kahi paha o ka hapaha mile mai ko'u wahi aku e ku ana a ma kona aoao e hele ana kekahi lede, a komo koke mai la no hoi ka manao iloko o'u aole ia he lede okoa aka o Miss Sepeletona no ia.  Ua maopopo ae la ia'u ua hololike na manao o na opio, a ua halawai ae iaua mamuli o kekahi  aelike i hanaia e laua.  Eu haele malie ana laua a ma ka'u koho aku aia laua ke kukai kamailio ia. me he mea la e kikonikoni like ana ko kaua mau puuwai.  He manawa mahope mai ike aku la wau i ke kaili ana ae o ka opiowahine i kona mau lima, me he mea la e hooiaio ana oia i kana mea e kamailio ana, a ike pu aku la no hoi wau i ko Sir Hanale poo e luliluli ana.  Pee iho la wau mahope o ka puu pohaku, a nana aku la wai i ka laua la hana mai, e noonoo ana hoi i ka'u mea e hana aku ai.  O ko'u hoomau ana aku i ka hahai mahope o laua a komo pu aku iloko o ko laua huina, he mea maikai ole ia. aka aole i haalele mai ko'u mau noonoo no ka'u hana i hoounaia mai ai a na ia mea i kono mai ia'u e hoomau aku i ko'u kiai ana aku i ka laua mau mea e hana mai ana.  O ke kiu ana aku i ka hana a kekahi hoaloha, he keonimana ole ia. eia nae aole a'u hana okoa e hana aku ai o ke kiai ana aku ia laua mai kahi mamao aku, a i ko'u wa e hui hou aku ai me ia e ha'i aku ana wau i ka'u mau mea i hana ai.  He mea oiaio ina i ala koke mai kekahi ulia iaia ua mamao io no wau e loaa ole aku ai na kokua ana mai ia'u aku, ak, ke manaolana nei wau e huipu mai ana oe me a'u ma keia manao, o ka hana a'u e hana ana oia kekahi o na hana paakiki loa, e ka'u mea e hana ana oia iho la ka mea pono e hana aku ai.

  Ua ku iho la ko kaua hoaloha me kona hoa papaleo no kekahi manawa, me he mea la, ua hiki loa aku la ka laua mau kamailio ana i kahi a laua i iini ai, a ia manawa no hoi i loaa iho ai keia ike ia'u. aole owau wale no ka mea e ike nei i keia mau hana a laua nei, aka aia kekahi mea ke ku mai la ma kekahi aoao o ke kula.  O ka mea a ko'u mau maka i ike aku ai oia ka pulelo ana mai o kekahi mea me he upena la, a mahope mai ike aku la wau i ke kino o kekahi kanaka e holo ae ana no kahi o na opio e nanea ana i ke kaunu olelo, a hoomaopopo aku la wau, aole keia he mea e aka o Sepeletona no.  Ua oi aku kona kokoke i kahi o na opio mamua o'u.  Ia manawa pu no hoi i ike aku ai wau i ko Sir Hanale puili ana aku ia Miss Sepeletona, eia nae ma ka'u ike aku e hoao ana ua opio wahine la e kaawale mai ia Sir Hanale aku.  Kulou iho la ko Sir Hanale poo ilalo me he mea la e honi iho ana i ka opio wahine. a ia manawa pu no hoi i ike aku ai wau i ka hapai ana ae o ka opio wahine i kona lima iluna me he mea la e hoopale aku ana.  Aole i liuliu iho ike aku la wau i ko laua kaawale ana ae me ka hikiwawe a huli hikiwawe ae la no hoi no kahi a Sepeletona e holo aku ana.  Ike aku la wau ma ke ano o ka Sepeletona holo ana. na piha oia i ka huhu. a iaia i hiki aku ai ma kahi o na opio e ku ana, iho @  o na mau ino la a e puupuu aku ana hoi ia Sir Hanale.

  Heaha la ka manao o keia mau mea apau.  Ma ko'u koho wale aku e hailiili ana o Sepeletona i ko kaua manao o na mea a laua  i hana ai mamua iho. eia nae aole he mea a hoolohe aku o ua Sepeletona la.  O ka lede opio hoi, ua ku aku la oia ma kahi mamao a nana aku la i ka laua nei mau kukai kamailio ana.  Mahope mai ua huli ae la o Sepeletona a kauoha aku la i kona kaikuahine e hahai aku iaia, a oia no hoi ka ua opio wahine la i hooko aku ai me kona huli ana mai a nana ia Sir Hanale me na maka pupuka.  Ua ku iho la ka barona opio he mau minute mahope iho o ka laua la haalele ana mai iaia, e kulou ana hoi kona poo, a ma ka'u ike aku, ua luuluu kona mau manao no keia hookuiaia ana o ka laua mau kukai ana a ua pono ole hoi kona manao mamuli o kekahi mau mea a ka opio wahine i hai aku ai iaia.

  O na mea oiaio no keia mau mea a'u e ike nei. aole ia i maopopo ia'u, a ua komo mai ka hilahila iloko o'u no keia hana a'u i hana ai no ko'u hoaloha me kona ike ole mai.  Haalele iho la wau i kahi a'u i pee ai a holo aku la wau no kahi e ku ana ua hoaloha la o kana.  I ko'u hiki ana aku, ike aku la wau aia ka inaina ke halii la maluna o kona helehelena, a me he mea la ua poina kona noonoo maikai.

  "Halo, Wakekona! Mahea mai nei hoi oe i hele mai nei?  Ua kauoha aku hoi wau ia oe mai hahai mai oe mahope o'u," wahi ana i pane mai ai i ko'u wa i hiki aku ai.

  Hahai aku la wau i na mea apau iaia: ka hiki ole ana ia'u ke noho, ko'u hahai ana aku iaia. ame ko'u ike ana i na hana apau a laua i hana ai.  Ia manawa i kau mai kona mau maka huhu maluna o'u. aka no ko'u nana oluolu aku iaia ua pau ae la ia huhu, a hoomaka mai la oia e akaaka me ka leo nui.

  "Ea. aole paha i loaa mua aku keia manao iloko ou e lilo aku ana keia kula i wahi na'u e hooipoipo ai.  Ma ka'u nana ana i keia mau mea apau e ku mai nei imua o ko kaua alo. me he mea la o lakou na hoike oiaio o ka'u mea i hana iho nei. a ua maikai ole maoli no keia.  Mahea hoi oe i noho mai nei?" wahi a Sir Hanale.

  "Iluna wau o kela puaa i noho mai nei a ike i ka olua mau mea i hana ae nei." wahi a'u i panai aku ai.

  "Kahuhu! hala loa no ka ihope. a o kona kaikunane ka mea i kokoke iki mai ia maua.  Ua ike anei oe iaia i kona holo ana mai i o maua la?"

  "Ae, ua ike aku wau i kona holo ana mai."

  "Aole anei i loaa aku kekahi manao iloko ou ua pupule ia keia kaikunane o ua opio wahine la?"

  "Aole e hiki ia'u ke hai aku ua pupule ia oia."

  "Aole no hoi he hiki ia'u ke olelo ae pela.  Ua manao mau wau he kanaka noonoo maikai oia a hiki iho la i keia la, aka nau ia e noonoo mai, owau anei a i ole oia ka i pupule.  Heaha no la hoi ko'u ano?  Ua noho pu oe me a'u e Wakekona. no kekahi mau pule. E hai mai oe me ka oiaio ano!  He mau mea anei kekahi nana e kaua mai ia'u mai ka lilo ana i kane maikai na keia opio wahine?

  "Ke hai aku nei wau ia oe, aole loa he mau mea nana e hookuia mai i kou lilo ana i kane maikai na keia opio wahine?

  "Ke ku-e mai nei kona kaikunane ia'u mamuli o ko'u ano.  Heaha la kana mau kumu kue ia'u.  Aole loa wau i hoeha aku i kekahi kane a wahine paha mai ko'u manawa i hanaia mai.  Eia nae he keu aku hoi ko ia la hoohuhu loa, o ka hoohuhu no hoi ia ke ae ole mai la i ko'u hoopa ana aku i na manamanalima o kona kaikuahine."

  "Pela anei oia i hana mai ai ia oe?"

  "Oia iho la a oia aku no hoi.  Ke hai aku nei wau ia oe e Wakekona. aole i loihi loa ae nei ko'u ike ana i keia opio wahine, a mai ka manawa mua loa o ko'u ike ana iaia, ua komo mai la keia manao iloko o'u.  Ua hanauia mai ua opio wahine la i wahine na'u, a no ua opio wahine la hoi. na hauoli oia i kona manawa e noho pu mai ana me a'u. a oia ka'u e hooia aku nei ia oe.  Aia he wahi malamalama iloko o na maka o ua opio wahine la, me he mea la he mau hopuna