Ka Nupepa Kuokoa, Volume XLII, Number 9, 26 February 1904 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, FEBERUARI 26, 1904.

 

olelo kana; aka aole he ae mai o kona kaikunane ia maua e hui olelo me ka maikai, a i keia la iho la no ka loaa ana ia'u o ka manawa kupono e hui kamailio pu ai me ia.  Ua hauoli oia i kona halawai ana me a'u, aka ia mana i hui ai, aole he mau huaolelo o ke aloha aua i hoopuka mai ai, a ua hoao mau mai oia e pale ae ia'u e hoomaka aku ai e hai aku i ko'u aloha iaia.  O kana mau olelo e pili ana no ia no keia wahi, a e hai pinepine mai ana no hoi oia ia'u he wahi pilikia keia o ka noho ana, a aole loa oia e hauoli ana a hiki i kona ike ana mai ia'u e kaawale ana mai keia wahi aku.  Ua hai aku wau iaia, oiai ua ike iho ia wau iaia, aole loa wau e haalele ana i keia wahi, a ina ua makemake i'o oia e hele wau, alaila o ka hana pono e hana ai oia ka hoomakaukau ana ia maua a e hele pu oia me a'u.  O keia iho la ka'u hana i hana ai me ka haawi ana aku he mau huaolelo e hoopaa aku ana ia'u e male i'o aku no wau iaia, aka mamua o ka loaa ana mai o kana haina, ua hoea koke mai la kela kaikunane ona me kona mau maka huhu o ke kanaka pupule.  Heaha la ka'u hana e hana ana me ua opio wahine la?  Pehea hoi wau i hana aku ai i kekahi hana i ku ole i kona makemake?  Ua loaa anei keia manao, no ko'u lilo ana i barona ua hiki ia'u ke hana aku e like me ka'u i manao ai?  Ina aole oia he kaikunane no keia opio wahine ina paha ua hiki ia'u ke huhu aku iaia.  No ia mea ua hai aku wau iaia o ko'u mau manao no kona kaikuahine aole ia he mea na'u e hilahila ai, a ua manao hoi wau e hoohanohano mai ana oia ia'u ma kona lilo ana mai i wahine na'u.  O keia mau mea a'u i hai aku ai iaia aole loa ia i maikai ma kona noonoo ana, a ia manawa i nalowale aku ai ko'u mau noonoo maikai a pii mai la ka inaina iloko o'u a haawi aku la wau i mau huaolelo ikaika loa, me ka nana ole ae i kona kulana me ka opio wahine.  O keia iho la ka hopena o ka makou kukai olelo ana a huli aku la no hoi laua a hoi aku la mai o'u aku, e like hoi me kau i ike mai nei, a eia hoi wau ke ku nei me ka maopopo ole ia'u o ka'u mea e hana aku ai.  E hai mai oe, e Wakekona i kau mea i manao ai no keia mea, a e aie nui hoi wau ia oe no kau mau mea e hoike mai ai no keia mea."

          Ua hoao wau e hai aku i kekahi mau mea a'u i manao ai, aka, ua pohihihi pu no me a'u ma keia mea.  O ke kulana o ko kaua hoaloha, kona waiwai, kona mau makahiki, kona ano, ame kona uanaina ua maikai ma ko lakou mau aoao iho, a aole hoi a'u mea e ku-e a e hoohalahala aku ai nona, koe paha keia mea kupaianaha a pohihihi e kau nei maluna ona ame kona ohana.  O kona hookuiaia ana mai aole ma ka manao o ua lede la, a e haawi mai hoi ua lede la i kona ae he mau mea ano nui no keia.  Eia nae ua hoopauia ae keia mau huhu ana a maua mamuli o ko Sepeletona hoena ana mai i kauhale nei ia auwina la a mihi mai no kana mau hana i hana ai, a mahope o ko laua kukai kamailio ana no kekahi manawa loihi, iloko o ko Sir Hanale keena heluhelu buke, ua pau ae la na manao huhu, a e hele aku ana maua i ko Sepeletona ma hale no ka paina ana i keia Poalima ae.

          "Ke i nei wai i keia manawa aole i pupule o Sepeletona," wahi a Sir Hanale i i mai ai ia'u, i ko maua wa i hui ai, mahope o ka pau ana o ka laua mau kuka ana o ia la. "I keia manawa ua hiki ia'u ke hoopoina iho i kona nanaina huhu i kau mai ai maluna o'u, a ke hai aku nei wau ia oe, aole he kanaka i oi aku o ka maikai o kana mau olelo mihi e like iho la me ia."

          "Ua hoike mai anei oia ia oe i ke kumu o kona hana ana pela?"

          "Wahi ana, o kona kaikuahine oia kana i milimili loa ai.  Ke manao nei wau he mea oiaio keia i na mea apau, a ke hauoli nei wau i ka loaa ana o keia manao iloko ona.  Ua pili mau laua kekahi i kekahi, a e like me kana i hai mai nei, he kanaka kino hookahi wale iho no oia a ina aole kona kaikuahine ina ua mehameha kona nohona, a o kona kaawale ana aku mai iaia aku he mea ia nona e maikai ole ai kona mau manao.

          Wahi hou ana, aole ka oia i maopopo eia wau ke makemake nei i ua kaikuahine la ona, a iaia i ike ai me kona mau maka, a malia paha o lawe ia aku oia mai iaia aku, nolaila i komo mai ai na noonoo ano e iloko ona a poina oia i ka hana maikai e hana ai ame kana mau huaolelo kupono e panai mai ai.  Ua kaumaha loa ia oia no na mea i hanaia, a ike pu iho la no hoi i ka hewa o kona manao ana ua hiki @@@@@@@@@@@@@ kona oia ana.  Ina e lawe ia aku ana oia, alaila ua manao oia he mea pono na kekahi mea e noho ana maanei e like me a'u nei.  A ma na ano apau he puupuu ikaika loa keia i loaa aku iaia a no ia mea e lilo ana kekahi manawa mamua o ka loaa ana iaia o na manao maikai.  Wahi hou ana, e hoopau no ia i kona mau manao ke ae aku wau e waiho malie i keia manao noi aku i kona kaikuahine no ekolu mahina.  O keia ka'u i ae aku ai iaia, a pela iho la keia mea e waiho nei."

          Ma keia e ike mai ana oe, ua maopopo ae la keia mea pohihihi.  Ua maopopo ae la oia iho la ke kumu o Sepeletona e hana mai nei me ka maikai ole ia maua.  I keia manawa ke makemake nei wau e hai hou aku i keia lopi e paa mai nei, oia hoi kela huakai hele mau a Baremoa i ka po; ka mau o kela mau waimaka maluna o Mrs. Baremoa, a ke mauaolaua nei wau e haawi mai ana oe i na hoomaikai ana a nui ia'u ma ke ano o kou agena maanei,--a aole hoi oe e hoopau ana i kou hilinai ana mai maluna o'u e like me kau i hai ae ai i kou wa i hoouna mai ai ia'u no keia wahi.  O na hana apau i hanaia i ka po hookahi ua pau loa ae nei i ka moakaka.

          Ua hai aku nei wau ia oe he "hana keia no hookahi po," aka o ka mea oiaio no na po elua, no ka mea i ka po mua ua hoopahua ia mana.  I ka lua mai o ka po, na noho iho la maua me Sir Hanale iloko o kona lumi a, ia aneane paha ma kau wahi o ka hora ekolu ia manawa, aka aole maua i lohe iki i kekahi wahi nehe wawae a ano okoa ae paha.  He hana molowa maoli no keia o ke ala ana e kali a no ia mea ua pauhia iho la maua i ka hiamoe.  Eia nae hoi aole mana i uiha i ka haule pu ana o keia hana a maua.  I kekahi po mai, ua kali hou aku la maua, me ke puhi ana hoi i ko maua mau paka kikalika, me ko maua walaau ole hoi.  He mea uiha maoli no kek ali ana, aka ua loaa mai na manao iloko o maua e hoohala hou ole i ka manawa ma keia mea, a huli aku hoi i ka mole o keia mau mea nana e nunu nei ia maua.  Kani mai la ka uwaki o ka hola ekahi ia, kani hou o ka hora elua ia, a ua aneane hou maua e hoopau i ko maua noho kiaia ana a ia manawa i lohe iki aku ai maua i ka uina o ka papahele.

          Aole i liuliu iho, lohe aku la maua i ka nehe mai o kekahi mau kapuai wawae a hala ko maua wahi e noho ana, a ia manawa no hoi i wehe aku ai ka barona i ke pani-puka a puka aku la no hoi maua a hahai aku mahope o ka maua mea e makemake nei e ike i kona hana.  Ua hala mua aku ka maua mea e uhai nei ma kekahi aoao o ka lanai, a waiho pouliuli mai la no hoi ko maua alahele.  Me ka malie maua i hele aku ai a hiki i ko maua hoea ana aku ma kekahi aoao, a maanei no hoi maua i ike aku ai i kekahi kino pouliuli e kaalo aku ana ma kekahi o na kihi o ke alahele, e hele ana hoi me ka malie a me ke akahele loa hoi ma kana hehi ana.  Mahope mai komo aku la oia iloko o ka lumu a'u i ike mua ai, a hana aku la no hoi e like me ka'u i ike mua ai ma ka po a'u i hahai aku ai mahope ona.  Ua hele aku la no hoi maua me ke akahele, e hoao ana i na papahele a maua e hehi aku ai.  Ua wehe mua maua i ko maua mau kamaa mamua o ko maua hele ana aku, eia nae ua uina ae la no ka papahele i ko maua wa e hele ana, a ua manao maua e lohe mai ana la oia la i ko maua hele ana aku.  Ua laki loa no nae maua oiai ua kuli maoli no keia kanaka a i ole ua lilo loa no kona noonoo ma kana hana e hana ana.  Ua hiki aku la maua mawaho o ka puka a kiei aku la maua iloko o ka lumi a ike aku iaia e nana ana e like me ka'u i ike mua ai.

          Aole a maua papahana i hooholo ai mamua aku, eia nae o ka barona oia kekahi o na kanaka hikiwawe loa o kona noonoo ma kana mea e hana ai, nolaila, ua komo loa aku la oia iloko o ka lumi.  Iaia i komo aku ai oia no hoi ka manawa a Barona i lele mai ai mai ka puka aniani mai me kona hanu nui ana iho, a ku mai la e like me kekahi kia mabala, me kona helehelena haikea.  Ua kakaa ae la kona mau onohi maka me ka piha pahaohao ame ka makau no hoi ia maua.

          "Heaha kau hana maikai, e Baremoa" wahi a Sir Hanale i ninau aku ai.

(Aole i pau).

 

HAWAII AME KONA LAHUI.

 

MOKUNA XV.

 

KE AU IA KAMEHAMEHA I.

 

NO KA MAKE ANA O KALANIOPUU AME KA LILO ANA O KAMEHAMEHA I.  I ALII NO HAWAII.

         

          A i na la i hoouka ai, o Keeaumoku ka i hoouka aku i ko Kiwalao poe kaua, a hina iho la o Keeaumoku ilalo, no kona hihia ia ka pololu, hopu iho la ko Kiwalao poe kao, a moku ke kua i ka pahoa, a iho la kekahi i ka pololu me ka i ana iho, ku aku la ka laau i ka aama kua lenalena.  A ua na waliwali o Keeaumoku, kokoke e make.  Aole nae i make loa.

          Ia wa, lohe aku la o Keeaumoku i ko Kiwalao leo, i ka i ana mai, "e malama i ka niho palaoa, aole e mala iaia."  Alaila, manao iho la o Keeaumoku i kona make loa.  A ike o Kamanawa i ko Keeaumoku nawaliwali, hoouka aku la ia.  A lohe o Kamahoe, maha poko iho la ia, a pa iho la o Kiwalao i ka phaku, a hina ilalao, ala ae la o Keeaumoku me ka hooikaika, a uumi la Kiwalao, me ka lei o inanu ma kon lima, a moku ko Kiwalao ai, a make no ia.

          Alaila, hoouka nui iho la o Kamehameha, o ka hee iho la no ia.  Alaila, lilo ke aupuni ia Kamehameha, o Mokuohai ka inoa o ia kaua, oia no ke kaua mua i lilo ai ke aupuni ia Kamehameha.

          A ma keia kaua ana, lilo o Keoua, ma ke kai kana hoi ana mai, a lilo no ia i alii no Kau, a la mau la iho, mahuka malu o Keawemauhili ma ka mauna, a lilo ia i alii no Hilo ame Puna paha, a o laua no na hoa kaua o Kamehameha mahope iho.  A noho alii iho la o Kamehamehaa maluna o Kona, a o Kohala ame Hamakua, akolu okana iaia, a noho alii no hoi o Keawemauhili ma Hilo, a noho alii o Keoua ma Kau.  Akolu aupuni o Hawaii, akolu no hoi alii ia manawa.

 

NO NA KAUA I KOE O KAMEHAMEHA.--KAUA ELUA.

 

          Mahope iho o ka lilo ana o ke Aupuni no Kamehameha, kipi ae la kekahi alii o ko Keawemauhili Aupuni, o Kanekoa ka inoa, a kaua me Keawemauhili, a hee Kanekoa ia Keawemauhili, a mahuka o Kanekoa a noho me Keoua.

          A mahope iho, kipi hou iho la o Kanekoa a kaua me Keoua, a hee o Kenekoa, a pepehiia iho la ia e Keoua a make loa.

          No ka make ana o Kanekoa, kue ae la kona hoahanau o Kahai ka inoa, a wehe ae la i kona malo, a hele aku la ia me ke koa aai i o Kamehameha la ma Kona.  A ike aku la o Kamehameha iaia, e hele mai ana pela, aloha ae la ia, a hoolalelale ae la ia i kona mau Kuhina e hele ma Hilo e kaua, a ae mai no kona poe Kuhina iaia.

          Eia ka inoa o ua mau Kuhina la, o Keeaumoku, o Keaweaheulu, Kameeiamoku, o Kamanawa, o lakou no ko Kamehameha mau hoa olelo no kela mea keia mea ni o ke

Aupuni; nolaila, ua mau no ka olelo ana o ka lakou mau keiki, a mau moopuna, i ka Kamehameha mau keiki, a mau moopuna.

          A liuliu iho lakou, a hele aku la e kaua i kela mau aupuni ia Hilo me Kau.  Ma ka mauna o Kau ka hele ana.  Ua kapaia ka inoa o ia kaua, o Kauaawa.  O ka lua keia o ko Kamehameh kaua ana i kona Aupuni.

          Aole i hee o Keawemauhili ame Keoua ia kaua ana.

          Hoi e ae la o Kamehameha a Laupahoehoe, a mahope iho, hele hou aku o Kamehameha ma Hilo e kaua a hakaka ai me ka poe lawaia ma Keaau i Puna, a pa iho la ko Kamehameha lae i ka hoe a ka poe lawaia, a no ka nui o kona ikaika i pakele ai oia, mai make ia la.

          A ia wa, loaa ia Kamehameha ma Hilo na koa o Kahekili i hoouna malu ai mai Maui mai o noho me Keawemauhili e kaua mai ia Kamehameha, a ike o Kamehameha i ko Kahekili hewa.

 

KAUA EKOLU.--O KA PANIWAI.

 

          A ike o Kamehameha, ua hewa o Kahekili, holo mai la o Kamehameha e kaua ia Kalanikupule, i ke keiki a Kahekili, i Oahu no o Kahekili ia wa.  A kaua iho la laua ma Wailuku i Maui, a hee o Kalanikupule ia Kamehameha, a pakele o Kalanikupule, a holo i Oahu.  Ua luku nui ia ko Maui kanaka ia kaua ana, ua paa ka wai o Iao, aole kahe no ka nui o kanaka, a ua kapaia i ekolu inoa o keia kaua ana, o Kapaniwai, o Kauapali, o Iao. O ke kolu keia o ka Kamehameha kaua ana i kona aina.

 

KAUA AHA.

 

          Ia manawa, kaua o Keawemauhili me Keoua, a make o Keawemauhili i ka pepehiia e Keoua, a hooke loa mai la o Keoua me ka manao e kii mai e lawe i ko Kamehameha mau okana nona, ame ka pepehi i ko Kamehameha makaainana.  Hele mai la ia a Kokohiku i na kalo o Waipio.

          A lohe ae la o Kamehameha ma Kaunakakai i Molokai i keia hana hewa ana o Keoua, alaila, aloha o Kamehameha i na makaninana o Kona, o Kohala ame Hamakuan nui ke kaumaha o kona naau no ko lakou luku wale ia. 

          Alaila, hoi o Kamehameha mai Maui aku, e kaua me Keoua, a kaua iho la laua ma Koapapa ma Hamakua i Hawaii, a hee o Keoua ia Kamehameha.  O kona hee loa ana no ia, i noho pio wale iho no ia ma Kau, a hiki i kona make ana ma Kawaihae.  O ka ha keia o ka Kamehameha kaua ana.

 

KAUA ELIMA.

 

          A ma ia hope iho, holo mai la ke alii o Kauai, o Kaeo kona inoa, a hui pu me Kahekili ma Oahu, a holo mai laua ma Hawaii e kaua me Kamehameha.  A halawai lakou me Kamehameha ma Kohala, a kaua iho la lakou ma ka moana, a hee laua ia Kamehameha, a pakele laua, a pae i Maui, aka, o ka nui o ka auwaa, ua pau i ka lukuia, a ua kapaia ua kaua la i elua inoa, o Kawai, o Kepuwahaulaula.  O ka lima keia o ka Kamehameha kaua ana.

 

KAUA AONO.

 

          A ma ia hope iho, make o Kahekili ma Oahu, a noho iho la kana keiki o Kalanikupule, ame na 'lii no hoi ma Oaho, e kaua me ka Kahekili mau keiki, e hoopai aku no ke kaua wale ana mai o Kahekili iaia.

          Alaila, hoomakaukau iho la o Kamehameha no ka holo i ka malama o Feberuari, o Kaulua ka inoa o ua malama la i ka olelo a Hawaii.

          A holo aku o Kamehameha a Oahu, kaua me Kalanikupule ma Nuuanu, a hee o Kalanikupule ia Kamehameha, a puni o Oahu ame Molokai, ame Lanai, ame Maui, ame Kahoolawe, a haawi wale mai o Kaumualii ia Kauai no Kamehameha.  O ke ono keia o ka Kamehameha kaua ana i kona aina.

          A noho alii iho la o Kamehameha ma Oahu hookahi makahiki, holo aku ia ma Kauai, a no ka nui o ka makani, aole i pae i Kauai, hoi mai ma ka moana o ka Iieiewaho, a ua kapaia kela holo ana o ka Ieiewaho.

 

KAUA EHIKU.

 

          A ma ia hope iho, lohe o Kamehameha, ua kipi kahi alii ma Hilo i Hawaii, o Namakeha kona inoa, alaila, hoi mai o Kamehameha mai Oahu mai e kaua me Namakeha.

          A kaua o Kamehameha me Namakeha a make ia ma Kaipalaoa ia Kamehameha.  O ka hiku keia o ka Kamehameha kaua ana i kona aina, pau ke kaua, lanakila, hui pu ia keia paeaina e Kamehameha i hookahi aupuni mai Hawaii a Niihau.  O ke Aupuni o Hawaii nei no ia.

 

MOKUNA XVI.

 

NO KEKAHI MOKU I KU MAI MA HONUAULA I MAUI.

 

          O kekahi moku i ku mai ma Maui ia mau makahiki o Eleanora ka inoa, o Olohana kekahi maluna.  I ka malama o Feberuari ke ku ana mai o ia moku, i ka makahiki hoi 1790.  Ma Honuaula kahi i ku mua mai ai ka moku.

          A lohe iho la na alii e noho ana ma Oloalu, o Kalola, ame kana kaue o Kaopuiki, ua ku mai la ma Honuaula ka moku haole, makemake ae la o Kaopuiki e holo e ike ia mokuhaole.

          Alaila, holo aku la ia a hiki i Honuaula, aole nae ia i holo a pii iluna o ka moku, pae no ia mauka o Honuaula.  A po iho, kii aku la ia i ka waapa e aihue, oia ame kona mau kanaka.  Holo aku la a kokoke i ka moku, e naua ana i ka waapa o ka moku, na nakinakiia, ua hiamoe ke kiai waapa, ooki ae la lakou i ke kaula o ka waapa, aole i ike mai ka moku.

          A i ko lakou hoe ana, ala ae la ke kiai waapa a kahea aku la oia i ko lakou kanaka, aole lohe mai, alaila, lalau o Kaopuiki i ka haole e pepehi, a pepehi iko lakou a make iho la ua kiai waapa la.  Wawahi ia no hoi ka waapa, pau ae la ke kui i ka ohi ia, i makau, a i kui houhou kekahi.

          Alaila, hoi mai o Kaopuiki ma i Oahu, me ka manao pomaikai i na mea a lakou i aihue ai.  Alaila, lohe aku la lakou na kaua ia o Honuaula no ka lilo ana o ka waapa, ame ka make ana o ka haole.  A make iho la kekahi kanaka o Wailuku i hele i Honuaula i ka piele ia, ku e i ka pu, o Keoho ka inoa, a elua kanaka i paa ma ka moku, no Honuaula kekahi, no Oloalu kekahi.  Oia paha ka mea nana i kuhikuhi i ka poe aihue waapa, ame ka pepehi ana i ka haole.

          A pau ke kaua ana, alaila, holo mai la ua moku la, a ku iho la i Oloalu i ke ahiahi.  A kakahiaka ae, kapu iho la o Kalola, kau iho la i kanawai, aole auwaa holo iki, o ka mea e holo i ka moku, e puhiia i ke ahi, oia ka uku o ke kanawai, he Mauumae ka inoa o ke kanawai. Ekolu la i kapu ai, a i ka ha o ka la, noa ke kanawai, alaila, holo aku na waa he nui loa i ua moku la e kuai, no Lahaina kekahi, no Lanai kekahi, no Kaanapali kekahi.  Paapu o lalo o ka moku i ka auwaa, aole lakou i ike ke hooakaukau nei na haole e ki i ka pu, eia ka lakou i ike ai, ina e holo ka wau mamua a mahope pehi lakou i ka pohaku.

          Alaila akoakoa loa ka auwaa mawaena, nana ae lakou i ke kuai.  Alaila, holo mai la o Oakake a pii aku la iluna o ka moku, a ku iho la ma ka palekai.  Alaila, ki iho la ka pu o na moku la, pau loa iho la kanaka i ka make, a pau i ka holo ilalo o ka moana na kino.  E mai o Olohana, he mea ike maopopo ia, nui loa ka poe i make.

          Alaila, holo aku la ua moku la, o ka aina awakea ia.  I hooloa ia i ka makau kekahi poe i holo ilalo, a pae aku iuka, ahu iho la i kahakai, hu ae la ka lolo, oia ka lolo pahu.

          I ka la hookolokolo e halawai ke Kapena o ua Eleanora la me ka poe i make iaia.  Na ka Lunakanawai Kiekie loa e hoomaopopo mai i ka pono, ame ka hewa o ia hana.

          Holo ua moku la ma Hawaii, a hiki pu aku malaila me kahi moku kiakahi uuku.  Malaila ka hele ana o Olohana mauka a i kona makemake ana e hoi i ka moku, aole e hiki, ua paa ia Kamehameha.

          Eia ka mea i paa ai oia, o ko Kamehameha makemake ana i ke kanaka ili keokeo kekahi, a o kona makau ana kekahi o hai aku o Olohana i ka pio ana o ka moku kiakahi, no ka mea, ia la no, ua make ia moku ia Kameeimoku.  Ua malama no o Kamehameha iaia me ka lokomaikai.

 

NO KA MAKE ANA O KA MOKU KIAKAHI IA KAMEEIAMOKU.

 

          O ka hoomaau, oia ke kumu i make ai ka moku.  I ko Kameeiamoku pii ana i kekahi moku haole, hahau ia kona kua i ke kaula e ka haole, oia kona mea i hoomaau ai.  I iho la ia, ina e loaa ia'u kekahi moku haole, alaila, make.

          Ma Kaupulehu no, kona wahi i noho ai, a ike aku la ia i ka moku, he wahi kiakahi, alaila, manao ae la ia e pepehi.  Kena ae la ia i kona mau kanaka, hapai ia ae ka waa o kakou, e kii kakou e pepehi i ka moku haole.

          Hapai ia ae la na waa, alaila, holo aku la lakou a pili i ka moku.  O na inoa o ka poe kanaka, o Mauki, o Kuaiwa, o Kuahiku, o Manohili, o Naluhi, o Ahuole, o Pee, ame kekahi poe e ae he nui wale, a he mau hoahanau no kekahi no ke alii, o Kalaukoa, o Maunukoa, o Kanuha, o Kekaokalani.  Na lakou no i pepehi i na haole, elima no haole, o ke alii moku no ke ono.  Kena ae la ke alii e lalau i ua poe haole la, ame ke kena aku e make.  O ka make iho la no ia o ua poe haole la.  Ola mahunehune ae la o Aikake mai ko lakou lima ae.  Malama ia o Aikake e Kamehameha.  Malama no hoi oia i ka moku me ka manao e hoihoi ia ke kii mai na haole.

 

NO KE KU ANA MAI O VANEKOUWA.

 

          Hiki mai o Vanekouwa i Hawaii nei i ka la a o Maraki, i ka makahiki 1792, he umikumamaha makahiki ia mahope mai o ke ka ana mai o Lono.

          Ma Kealakekua kahi i hiki mai ai, aole nae i ku ka moku, kalewa wale no.  Ninau o Vanekouwa ia Kalaniopu, ua make a e Kamehameha no ke Alii mahope ona.

          Holo aku o Vanekouwa ma Oahu, a ku ma Waikiki, a malaila aku a ku ma Kauai.  Ike oia ia Kaumualii, he kamalii wale no oia ia manawa.

          Hoike oia malaila i ke ahi kaulele, a mahalo nui na kanaka me ka makau.  Holo oia malaila aku a i ka aoao komohana akau o Amerika.  I keia ku ana mai o Vanekouwa, aole laua i halawai me Kamehameha.  Elua mau mea a Vanekouwa i loaa mai i keia ku ana mai ona, he mau lole ula elua, ua mahalo nui ia kela mau lole e ko Hawaii nei.  Ua kapaia kekahi lole o Kekupuohi, a na kapa ia kekahi lole o Keakualapu, no ka ula o ka lole kela inoa i kapaia aku ai.

          Olelo o Vanekouwa i keia ku mua ana mai ona, ua emi loa na kanaka ame na alii, aole i nui e like me lakou i ka hiki ana mai o Lono.

          I ka holo ana o na moku o Vanekouwa, mai Hawaii aku a Oahu, holo oia a ku ma Waikiki, aka, o kekahi moku ona, holo aku la ia ma ka aoao akau o Oahu, a malaila i pepehi ia ai ke alii moku ame ka mea aohoku.  Eia ka moolelo no ka make ana.  I ka holo ana mai o ua moku la ma Koolau, Oahu, ike ae la na kanaka i keia mea nui e holo ana ma ka moana, makahehi aku la na kanaka i keia mea kapaianaha loa, kapa aku la na kanaka penei, "Ka pukoa nui e nee ae nei e."  Holo ka moku makai, hele no hoi na kanaka mauka, e hooho hele ai, "Ka mea nui e, ka mea nui e," a hiki kokoke i Waimea, aia ia wahi ma ka akau o Waialua.

          A hiki ae la iwaho o Waimea, hoomakaukau iho la na kanaka o ka moku i na pahu wai, a i mau mea eha kekahi na lakou, i mau pahi, a hookuu iho la i ka waapa pelupelu o lakou i ke kai, a holo mai la iuka o Waimea.  O ka wai ka mea i manao nui ai lakou e holo iuka, ua kokoke paha e hapa mai ka wai.

          Aole i kuu ia ka heleuma o ka moku, e kalewa wale ana no.  Holo mai lakou, a pae iuka o Waimea, aole i pepehi ia i ke kau ana mai iuka, papu nae na kanaka.  Ukuhi ua poe haole la i ka nuku o ka muliwai; a no ka awaawa o ka wai hookoni hele aku la lakou i kahi e ono ai ka wai.

          Hoau hele aku la lakou i na pahu a lakou, pela no ka hana ana, a hala loa iuka o ka muliwai.  Ukuhi iho la lakou a piha na pahu, hoau ae la kekahi poe haole ma ka muliwai i na pahu a lakou, haole ae la hoi kekahi mau haole mauka, ma kapa o ka muliwai, a o na mau haole la mauka ka i make.

          Hele ae la ua mau haole la a hiki i kahi paapu o kanaka, alaila, manao iho la na kanaka e pepehi.  Hikau ae la na kanaka i ka pohaku.  O kekahi kanaka o Kapaleaiuku ka inoa, nou aku la ia i ka pohaku a pa i ka auwae o kekahi haole a hina ia ilalo.

(Aole i pau.)