Ka Nupepa Kuokoa, Volume XLII, Number 10, 4 March 1904 — Page 2
| This text was transcribed by: | Sally Vrana |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, MARAKI 4, 1904.
2.
KA
Nupepa Kuokoa
NO KA MAKAHIKI $2.00
NO EONO MAHINA 1.00
SUBSCRIPTION RATES
ONE YEAR $2.00
SIX MONTHS 1.00
O NA OLELO HOOLAHA APAU E HOOUNAIA MAI ANA NO KA HOOLAHA MALOKO O KEIA NUPEPA, E HOOUNA PU MAI ME KA AUHAU, A INA AOLE, AOHE NO E HOOKOMOIA. E HOIKEIA AKU NO KA AUHAU OLELO HOOLAHA KE UI MAI I KE KEENA NEI.
O na Dala apau o ka Pepa e hoouna pololei
mai i ka HAWAIIAN GAZETTE
COMPANY, LTD.
HOOPUKAIA E KA
Hawaiian Gazette Co., Ltd.
Hookomoia ma ka Hale Leka o Honolulu,
Panalaau o Hawaii, ma ke ano
Mea o ka Papa Elua.
DAVID L. A-I, Lunahooponopono
S. K. NAWAA, Kokua Lunahooponopono
A. W. PEARSON, Lunanui
HONOLULU, OAHU.
POALIMA MARAKI 4, 1904.
----------
KE KOA RUKINI AME IAPANA
O ke kaua e hahana mai nei mawaena o na lahui Rukini ame Iapana, oia no ka hana e hoike ai i ke kulana ikaika a koa o ia mau lahui—o ka Iapana i kona a o ka Rukini i kona, eia nae a hiki i keia manwaa o na Iapana no ia e nee mua nei—ma ka nana aku, he ikaika ame ke akamai ame ka wiwoole na haawina i ke koa Iapana, eia nae aole i hiki ke kaua i ka hopena.
Ma ka nana ana i na moolelo kumu o keia mau lahui, ua hiki ke hoomaopopo iho i ka lawa like o ka ikaika ame ke kulana koa iloko o keia mau lahui, iwaena nae o kekahi mahele, me he la ua oi aku ke koa Iapana maluna o ka hoohana noeau a kona noonoo oiai hoi kona hoa paio Rukini i nele ia mahele.
KE KOA IAPANA.
Ma na mea i maopopo aia he mau mahele o ka lahui Iapana a i kapaia hoi ma ko lakou mau inoa pakahi iho, a iloko o ko lakou ano ame na kulana, me he la, he mahele lahui no kela ame keia i lako me kona mau haawina ponoi o ka nohona, pela hoi i ano like ole ai kekahi mahele mai kahi mahele ae o ia lahui hookahi no nae.
Me he la mai ka hookumuia ana o keia lahui, a no 2,000 makahiki i hala o ka mahele Samurai, o lakou ka poe i aiai loa ma ka moolelo kumu o Iapana, o ka hakaka ame ke kaua ko lakou haawina ikaika loa, me he la ua hanauia mai lakou no i mea. Ma na hana hoowaiwai aina e kuonoono ai ke kanaka aole he paulele nui o ko lakou iini paa ma ia mau mea mamua o ko lakou aloha i ka oihana hakaka.
Pela no a hiki i keia manawa i ka nui iini a manaoio maoli no o na keiki o keia mahele—ia lakou he hana ka oihana kalepa a imi waiwai na ka poe haahaa loa, a aohe ia he koa o ke kahiko ana a nani no ka hoomakaleho ana i na wahine, a no ka hoou’iu’i ana, aka o ke ano pakiko ame ka hooikaika kino oia na haawina i aloha nui ia a lakou i manaoio ai o na a’o pauaho ole ia a ko lakou mau kupuna, nolaila i oi loa aku ai ko lakou aloha i ka lakou pahikaua mamua o na mea e ae.
Mailoko mai o keia mau mea i hanauia mai ai na ano apau o ke kulana koa i holo aku ai ka maka’u, a oia na haawina i loaa i na koa Iapana o keia la. O na aliikoa e komo kaua mai nei i keia manawa he poe lakou e holo la ke koko Samurai, a o ka hapanui o lakou ua lawa me na ike kaua o na aina naauao, o ke komohana na keia mea i hoopii loa ae i ke kulana o na aliikoa Iapana.
Mawaho ae o keia, aia he mau kula koa iloko iho o ka aina, kahi e hoomakaukauia nei na Iapana a aia mawaena o 17 ame 40 makahiki o na kane apau i nele ole i ke kaheaia no ke komo koa ana maloko o ke kaua moana a aina. O keia kekahi mau ano mawaho ae o na ano a kakou e ike nei o na Iapana iloko o Hawaii aka i keia kaua e hakoko mai nei ua huli nui mai kekahi mau mahele lahui Iapana e ae a komo iloko o keia kaua mamuli o ke kuahaua, a ke ike nui ia nei ko lakou wiwoole a makaukau maoli ma ka oihana kaua.
KE KOA RUKINI.
O ka nee ana o na pualikoa Rukini, ua hiki i kela ame keia koa ke lawe maluna o kona kino no kona mau lako ponoi iho ma na mea aahu, mea ai e lawa ai no elua la ame na lako kaua i hiki aku ke kaumaha ma kahi o ke kanaono paona a oi. Aia me ia ka aahu manoanoa puhuluhulu o ke ano oma’oma’o he waihooluu i aloha nui ia e lakou. O ko ke koa helewawae keia a no na pono o ke koa kaulio ua hiki ma kahi o 119 paona ke kaumaha.
He kanaka nunui pulunulunu ke koa Rukini, a o ka hele ana ma na wahi loihi e nele ole ai ke kau aku o na haawina maluhiluhi i kekahi koa o kekahi lahui e, i ke koa rukini nae he mea malihini loa ia o ka maluhiluhi. He kanaka oia nona ka umauma lahalaha, kino nui maikai o ke kulana o ke kanaka mahiai, kino nunui a maikai.
Ua oleloia ua hiki ke koa Rukini ke helewawae no kanakolu mile me ka hoomaha ole a komo no i ka hakaka me ka puhalu ole iho. He kanaka hoohalahala ole oia maluna o na mea ai a he hiki hoi ke ola ma na mea ai ano ole, a ina e hele loa i ka poino na pono kino aole oia e hoohalahala.
O keia iho la kekahi mau ano o ke koa Rukini a ike nui ia hoi iwaena o na Cossack, Tchechkesses ame na Turkoman. O ke Cossack he Rukini maopopo oia ma kona kulana ame kona ano, a he kanaka nanaina ikaika a maka’u ole a puni hakaka, a o keia no ka mahele ikaika loa iloko o na pualikoa o ka Za ma ke kaua moana ame aina. He aloha loa oia i kona ano lio, aole no ka nani a hiehie aka no ka holo palanehe me hikiwawe ame ka eleu, a he kuha’u ole iho hoi ke Cossack i ke ku ana imua o ka enemi ke hui aku.
O ka Tchehkesses hoi he mahele Rukini no ia aka o ke ano puni koko no nae a he hana ma ka limakoko waie no o ke ano maalea i hoohalikeia e like me na koa bashibazouks o Tureke, a o ke kolu iho hoi he mahele hou ia, a i maopopo loa ole kona kulana a akahi no a komo iloko o ka hana e ikeia aku ai kona ikaika.
O keia iho la kekahi mau ano o na koa Rukini, e hiki ai ke ike iho i ka nui ano koa io no aka ma ko lakou kulana malamalama ua maalo ae ia mai ka hapanui mai o na koa o na lahui naauo o ke kukulu komohana o ka honua, ke kumu hoi i emi iho ai kona kulana koa ano malamalama i ko Iapana.
He kanaka maka’u ole ka Rukini, ike ole i ka maluhiluhi o ke alaloa he aholoa me ka haawi pio ole a he hiki ke ku aku iloko o ka ino me ka ohum@ ole, eia nae, he ikaika iloko no nae o ke ano kumumu.
-----
I ka manawa e hoea mai ai na hao o ke alahao o Hilo-Kohala a pau i ka hoomoeia oia ka hamama ana he alanui hoowaiwai i ka poe kalepa a mahiko o Hilo, Hamakua ame Kohala, a he pomaikai pililaula no hoi ia no ka lehulehu holookoa.
O ke kauoha ana aku nei a Mr. Philip Peck no na pono alahao o keia hui a e holo mai nei hoi ka moku no Hawaii nei me ia ukana, ame na hooponopono paeli ala no ka hoomoe ana i na hao huiia me na hoolala ana, a i manaoioia hoi e paa ana iloko o ka manawa kupono o keia mua koke iho mai Hilo kaona aku a Honomu, oia ka mea nana e hooaiai loa ae ia kakou no ka holopono io o ua hana la a he pomaikai hoi no ia mau kini.
I ka poe na lakou i hoala i keia kumuhana nui o lakou ka i ike a hoomaopopo e i na pomaikai e loaa mai ana ke pukapono, aka aole e hiki ke alo i ka ike iho o ke kanaka e noho ana ma ia ma na wahi e moe ana ua alahao la i ka nui o ko lakou pomaikai.
O ka poe nohopaa ma ia mau wahi, o keia ana ka mea nana e paipai i ko lakou hooikaika mahiai ma na mea kanu kupono i ka ai ia no ka mea, ua loaa iho la ke alanui e laweia ai ka lakou mau waiwai no ke kuai aku ma na wahi e nele ole ai ke kuaiia mai.
Mawaho ae o keia, he alanui maalahi loa hoi no lakou ke hele ma na wahi mamao, me ka nui loa ole o ka lilo a ina nei no ka moe loa o ke alahao a hiki i Mahukona, he hoomaalahi loa ana ia no ka poe e manao ana e holo ma na wahi mamao e kau ai ma na mokuahi.
Aole wale keia o ka poe e pomaikai ana aka o ka poe apau o keia Paeaina, no ka mea a hakalia a hoomahele ae ka lakou huakai no Hawaii o keia ana ke alanui e hiki mua ana iloko o ka noonoo no ka mea he alanui maalahi.
Alaila, i ka manawa o ka holomua o na hana o ua alahao la, aole e nele ke komo aku o ke Aupuni no kona mau mahele auhau ke kumu hoi e pomaikai puu ai ia, a ke hoohuihui ae i na mea apau, ua hiki aku la ka makou hoomaopopo ana he hana hoowaiwai aina keia.
------
Aole wale o keia alahao ka mea e ikeia nei ma Hilo aka o ka manao e kukulu i hale hana kini kele kuawa a halakahiki ame ka ohelo e like me ka Mr. Kirchberg i hoolala ai a e hele la i Amerika no ka hoomaopopo ana no na pono o ua hana nui la.
O keia kekahi hana hoowaiwai aina, a e like no me ko keia alahao pela no ko ianei ma na mahele like ole nae. Ke hoomaopopo iho e hoowaiwaiia ana na aina o Puna ame Olaa i paa nui i na kuawa, he mau aina hoi e waiwai ole ai no na mea kanu, e like me na wahi pahoehoe, a no ka mea aina ia pomaikai, alaila e paipai pu ia ana na kini o ia mau wahi e kanu nui i na halakahiki, a o ka poe e hana ana maluna o na ohelo aole lakou e poho, no ka mea, ua maopopo e kahi e lilo ai.
-----
Makemake o Sumner e noho hookahi
O John K. Sumner o Oahu nei ua hookaawale ae oia iaia iho mai kona poe pili mai oonei me ka manao e hoihoi mai i kona pili o Tahiti, kona mau hoahanau Tahiti ame na keiki Tahiti a noho pu me ia i Hawaii nei, a pau ka noho pu ana me na pili Hawaii.
Ua lawe mai oia i aina hoolimalima nona ma ke Koolau aku nei o Oahu me ka manao e kukulu i kona home ilaila, a ilaila oia e noho mau loa aku ai. Ke holopono i keia pule ae e kukulu ai oia i kona home.
Ua manao pu no hoi oia, i ka manawa e loaa mai ai ke kauoha mai na hoahanau Tahiti ona ame na kaikamahine Tahiti ame na keikikane ana oia no kona manawa e holo ai i Tahiti a hoihoi mai i ua poe pili Tahiti la ona i Hawaii nei no ka noho pu ana me ia me ka manao e hoolilo aku i kona mau pono apau o Tahiti a ianei wale no na pono apau.
Wahi ana aole ona noho pu hou me Wally Davis, aka, e hoi ana oia i na Koolau e noho ai nona iho ma keia mua aku. He kanawalu-kumamaha ka nui o kona mau makahiki eia nae ke hele iho oia ma na alanui o ke kulanakauhale nei me he la aole ia o ka huina o kona mau makahiki, a aole hoi ke kookoo me ia no ke kakoo ana iaia ma ka hele ana.
-----
Hopuia o Vida ame Schmidt.
Ma ka hookahua ana i ka hoopii maluna o ka olelo ike a William C. Vida ame Louis Schmidt i hoike ai i ka aha ma ka hihia o Finn, e olelo ana i ko laua komo ana a lawelawe i ka piliwaiwai ma ke keena pahupahu o Kubey, ua hopuia iho la laua e ka makai. Ua hoopiiia laua no ka lawelawe i ka hana piliwaiwai.
Aia nae na ka aha e hooponopono mai, i ke ku io i ka hewa ame ka ole, a i ka hora 9 o ke kakahiaka o ka Poalua iho nei ka hooloheia ana.
-----
AOLE OU HOALOHA E LIKE ME KOU HOALOHA O KA WA I HALA. E kokua mau ana oia ia oe i kou manawa e poino ai. Ua like no ia me ka laau Chamberlain’s Cough Remedy. He hoaloha ia iloko o na tausani home, a e like me kou hilinai ana i na hoaloha e ae, pela hoi oe e hilinai ai iaia i kou wa o ka pilikia. Ke kuaiia nei e na Halekuai Laau apau. Benson, Smith & Co., Ltd., na Agena ma Hawaii nei.
----------
He Eha i Hunaia
Koho o Mr. Cole e ma-
ke mamua o kona
Ehaehea ana.
EKOLU MAKAHIKI O KE KAAMA’I LOLOKAA ANA OLA NAE MAHOPE O K LAWE ANA EONO PAHU O KA HUAALE AKALA A KAUKA WILLIAMS.
Ua nui na kanaka i loaa i na haawina ehaeha o na ma’i ikaika a oia poe aole a lakou huaolelo e hoopuka ai no ia mau haawina i loaa aku ia lakou o ka “lapuwale” ame ka “ino” wale no he mae e hoala mai ana i na noonoo no ka wa e noho naaupo ana na kanaka.
O ka moolelo o James B. Coyle, he kanaka hana iloko o kekahi halehana mikini, e noho ana hoi ma ke alanui Pond, Helu 9, Amesbury, Mass., oia kekahi hooia kupono no na mea i hoikeia ia ae nei maluna. “Iloko o na makahiki ekolu i kaahope ae nei,’ ‘wahi a Mr. Coyle i pane aku ai i kekahi mea kakau nupepea, “e kaama’i ana wau me ka ma’i lolokaa iloko o ko’u poo. He lehulehu na manawa i hiki ole ai ia’u ke hoomanawanui mamuli o ka loaa ana o keia haawina lapuwale ia’u a ua komo mai keia manao iloko o’u e aho ka make ana mamua o ko’u ehaeha ana mai keia ma’i mai. Ua hoomaka mai ka eha mai ko’u mau maka mai a hoomaka aku la e holo iloko o ko’u poo. Ua nui maoli no ka eha i loaa mai ia’u me he mea la e hooponiuniu ana i ko’u poo, a ma ko’u hoomaopopo ana ia’u iho me he mea la ua hele wau ma kekahi huakai loihi a ua luhi hoi a maule.
“Ua hui aku wau me na kauka lehulehu a ia lakou i nana mai ai i ke ano o ko’u ma’i a ike mai no hoi he lolokaa, me ka haawi pu ana mai i ka lakou mau laau, ua loaa mai ia’u ka maha no ka manawa wale no nae. Mahope mai o keia ua hoomaka iho la wau e lawe i na laau e hoolahaia ana no ka ma’i lolokaa eia nae aole he wahi mea a loaa mai ia’u o ka oluolu. He eha mahina i hala ae nei ua ha’i mai la kekahi o ko’u mau hoaloha ia’u no ka laau Dr. Williams’ Pink Pills for Pale People, a hooholo iho la wau e hoao i keia laau. Mahope o ko’u lawe ana i hookahi pahu hoomaka mai la wau e ike i ka loli ae o ko’u ma’i a hoomaka mai la no hoi e akakuu mai ka eha iloko o ko’u poo. No ia mea ua lawe hou wau i pahu hou a pii mai la no hoi ko’u maikai, a mahope o ko’u lawe ana eono pahu huaale o ka pau loa no ia o ko’u ma’i, a no elua mahina, i keia wa, aole loa i hoi hou mai ua ma’i lolokaa nei o’u. Ua hiamoe iho wau me ka maikai i ka po a aole hoi he mau haawina hoehaeha mai ia’u i ke ao. Ke hoomaikai ae nei wau i ka laau a’u i lawe ai i ka laau Huaale Akala a Kauka Williams.”
O ke ola ua like no ia me ka pau pono ana o ka hana a o ka mau o ka haawina ola i ke kanaka oia na mea a keia laau e apo nei iloko o na ma’i poniuniu o ke poo, lolo o na lala, hulahula hapopo o na maka, uluahewa o ka noonoo, na haawina mahope mai o ka loaa ana i ka ma’i la garipa, kapalili o ka puuwai, haikea a halepolepo o na helehelena ame na ano nawaliwali apau o ke ano wahine a kane paha. Ke kuaiia nei ka Dr. Williams’ Pink Pills for Pale People e na halekuai laau lapaau apau, a i ole e hoouna ia aku no ke hoouna pololei ae i na kauoha ia Dr. Williams Medicine o., Schenectacy, N. Y., ke loaa ae ke kumukuai o Kanalima keneta o ka pahu hoopahi; eono pahu no na dala elua me ka hapa, me ka auhau ole no ka hoouna ana aku ma na ekeleta.
-----
O ka hoopii elua a Kapiolani Estate ku-e ia C. J. Hutchings, Waterhouse Trust Co., ame E. E. Conan ua hoopau ia e Lunakanawai Edings i Kailua mamuli o ka hemahema. He hoopii keia e koi ana e hoihoi mai i ke kuleana o na aina o ka hui mahiko o Kona e ku nei.
-----------
HOOLAHA HOOKO MORAKI.
HOOLAHA MANAO E HOOKO A KU-
AI A KA MEA PAA MORAKI.
Mamuli o ka mana kuai i hoopaa ia iloko o kekahi palapala moraki mai ia Charles S. Desky mai a ia C. W. Booth, i hanaia ma ka la 22 o Sepatemaba, 1900, i kopeia hoi iloko o ke Keena Kakau Kope, Oahu, iloko o ka Buke 217, aoao 9 a hiki i 11, ma keia ke haawiia aku nei ka hoolaha ke makemake nei ka mea paa moraki e hooko i ka moraki i oleloia no ke kumu i uhaiia, oia hoi, ka uku ole ia ana o ke kumupaa ame ka ukupanee i ka manawa e hookaa ia ai, a ma ka Poakahi, la 28 o Maraki, 1904, ma ka hora 12 awakea o ia la e haawiia aku ana ma ke kuai a e kuaiia aku ana ma na keena kudala o Will E. Fisher, No. 180, Alanui Kalepa, Honolulu, i na aina ame ka waiwai i hoakakaia iloko o ka moraki i oleloia, i hookuu ole ia hoi mamua aku o keia manawa mai ka moraki ae. O na aina ame ka waiwai e kuai ia aku ai pela, ame na mahele aina pu hoi i hookuu ia ua hoakakaia no ia iloko o ka papa helu waiwai i hoopili pu ia me keia a e nana ia aku ai ma keia.
O ke kumukuai ma ke dala kuike no ia ma ke dala gula hoi o Amerika Huipuia. O na palapala kuai ma ka lilo no ia o ka mea e kuai mai ana.
No na mea aku i koe ame ka nana ana i na kii aina e hoike ana i kahi i waiho ai o ka waiwai i oleloia e like me ka mahele ia ana ma na apana, e ninau aku ia J. Alfred Magoon, keena hana ma ke kihi o na Alanui Kalepa ame Alakea, ma ka Hale Magoon, Honolulu, a i ole ia Will E. Fisher, mea kudala.
C. W. BOOTH,
Mea Paa Moraki.
Hanaia ma Honolulu, Feberuari 24, 1904.
PAPA HELU WAIWAI.
O ka waiwai e kuai ia aku ana oia no keia malalo iho:
O kela mau apana aina a pau loa e waiho la mawaena o ke awawa o Pauoa ame ke awawa o Nuuanu iloko o ka Apana o Honolulu, Mokupuni o Oahu, Teritori o Hawaii, penei:
EKAHI: O ka Apana ekahi apau loa o ke Kuleana Helu 10,605 ia Kamakee Piikoi, nona ka ili o aiwa eka ame 9.39 kaulahao kuea, e like me ia i kopeia ma ka Moolelo o na Kuelana ma ke Keena Aina o ka Lehulehu ma Honolulu ma ka Buke 10 o na Kuelana i oleloia ma ka aoao 60.
ELUA: O ka Apana ekahi apau o ke Kuleana Helu 273 ia Joseph Booth, i kopeia ma ke Keena Aina o ka Lehulehu ma Honolulu iloko o ka Buke 1 o na Kuleana ma ka aoao 457, a i hoopukaia ai hoi maluna olaila ka Palapala Sila Nui Helu 302 ma ka la 14 o Mei, 1851, e like me ka mea i hoikeia ma ka Buke ekahi o na Palapala Sila ma ka aoao 302; nona ka ili o 208.3 eka.
EKOLU: O kela mahele apau o ka Palapala Sila Nui (Grant) 524 ia Joseph Booth, i kopeia iloko o ka Buke 5 o na Palapala Sila Nui (Grants) ma ka aoao 524, e waiho la ma ka aoao ma Ewa o ka palena ma Waikiki o ke kahua o ka pa pohaku ma ka palena ma Waikiki o ke alanui Kaiulani; oia no hoi ke alanui kaa nui mai ke alanui mai ma ke awawa o Pauoa a hiki i na aina palahalaha maluna aku i ike ia ma ka inoa o “Pacific Heights.”
EHA: I kela apana aina uuku e pili ana i ka apana ekahi o ka palapala hoona kuleana 273 Palapala Sila Nui 302 a ma ka aoao Hikina mauka o ka aina o B. P. Bishop ma kekahi aoao Hema o ke Alanui Aupuni ma ka aoao Komohana a makai o ka aina o Laika, koe kekahi apana uuku no Holani.
ELIMA: I kela apana aina i hoike ia ma ka Palapala Sila Nui 5634, Kuleana 1661 ia Waiwaiole i ike ia keia wahi ma ka inoa o Waimapuna Punananoio, me keia nei e hoomaka ana ma ke kihi Akau o keia apana malalo o ka puka wai i kameki ia e pili pu ana me ka paipu nui H. 53 deg, 05 min. K. mamao 46.2 kapuai e holo pololei ana.
1. H. 26 deg. 55 min. E. 33.0 kapuai a hiki i ka laau;
2. H. 65 deg. 50 min. K. 49.5 kapuai a hiki i ka laau;
3. A. 23 deg. 30 min. K. 36.8 kapuai a hiki i ka laau;
4. A. 71 deg. 05 min. H. 47.5 kapuai a hiki i kahi i hoomaka ai—ka nui he 1,680 kapuai kuea, oi iki a emi mai paha ame kuleana o ka Mea Paa Moraki o keia ano ame kela ano iloko o ka Waimapuna i hoike ia maluna ma ka Palapala Sila Nui Helu 5634, Kuleana 1661 i ike ia ma ka inoa o Punananoio ame ka wai e hu mai ana malaila mai.
EONO: He kuleana alahele maluna o na aina apau o C. S. Desky e holo ana ma kahi o na paipu wai e ku nei i keia wa i wahi e hooponopono ai i ka wai o keia waimapuna i hoike ia maluna no ka hooholo ana o ka wai o keia mapuna a hiki i ka aina i hoikeia ma ka pauku elima a maluna o na aina mai ka pauku akahi a hiki i ka pauku eha oia no a Pakipika Hila.
O kekahi hapa o keia aina i hoike ia maluna ua ana ia a ua okioki ia iloko o kekahi mau pa he 98 ka nui a o keia mau pa aole i wehe ia mailoko ae o ka moraki, a oia no ke kuai ia aku ana. O ka aina holookoa apau loa me keia mau pa he 98, oia no ke kuai ia ana, koe na apana i wehe ia a i oike ia malalo:
EKAHI.
(Pa 30) Ili 28,400 kapuai kuea i lilo ia Mary Castle.
(Pa 13) Ili 19,225 kapuai kuea i lilo ia Cordelia F. Allen.
(Pa 12) Ili 45,000 kapuai kuea i lilo ia A. S. Parke.
(Pa 38) Ili 18,900 kapuai kuea i lilo ia Sila B. Pratt.
(Pa 39) Ili 21,800 kapuai kuea i lilo ia H. L. Kerr ame Martin L. Smith.
(Pa 41) lilo ia J. M. Atherton.
(Pa 48) lilo ia F. E. Nichols; o keia mau pa elua 41 ame 48 he 34,000 kapuai kuea ka nui.
Ka aina i lilo ia T. Clive Davies he 6 10-100 eka ka nui.
Ka aina i lilo ia C. W. Booth he 1 37-100 eka ka nui.
He palapala mai ia Chas. W. Booth a ia Charles S. Desky i hana ia i ka la 22 o Sepatemaba, 1900, a i kopeia ma ke Keena i oleloia iloko o ka Buke 217, aoao 9 a hiki i ka 11, a e hoike ana i na apana ekahi a hiki i ka apana ewalu i hookoe ia maluna.
ELUA.
(Pa 5) Ili 12,400 kapuai kuea.
(Pa 6) Ili 14,400 kapuai kuea.
(Pa 11) ½ Ili 1 ame 43-100 eka.
(Pa 14) Ili 15,760 kapuai kuea, lilo ia John T. Moir.
(Pa 18) Ili 24,500 kapuai kuea, lilo ia E. O. White.
(Pa 19) Ili 20,000 kapuai kuea, lilo ia E. O. White.
(Pa 20) Ili 23,400 kapuai kuea, lilo ia H. P. Baldwin.
(Pa 21) Ili 28,500 kapuai kuea, lilo ia H. P. Baldwin.
(Pa 23) Ili 19,300 kapuai kuea, lilo ia G. P. Castle.
(Pa 24) Ili 18,400 kapuai kuea, lilo ia G. P. Castle.
(Pa 34) Ili 20,200 kapuai kuea, lilo ia W. J. Lowrie.
(Pa 35) Ili 25,320 kapuai kuea, lilo ia W. J. Lowrie.
(Pa 36) Ili 24,150 kapuai kuea, lilo ia W. J. Lowrie.
(Pa 37) Ili 22,400 kapuai kuea, lilo ia W. J. Lowrie.
(Pa 42) Ili 17,900 kapuai kuea, lilo ia Juliette M. Atherton.
(Pa 49) Ili 26,500 kapuai kuea, lilo ia Percy M. Pond.
(Pa 54) Ili 24,500 kapuai kuea, lilo ia Frederick J. Amweg.
(Pa 55) Ili 23,400 kapuai kuea, lilo ia Frederick J. Amweg.
(Pa 63) Ili 23,500 kapuai kuea, lilo ia Thomas E. Wall.
(Pa 92) Ili 25,000 kapuai kuea, lilo ia John Cassidy.
(Ka Aina o Ripley) Ili 2 ame 4-10 eka.
A oia no hoi na apana aina i hookoe ia a weheia mailoko ae o ka moraki i oleloia, i hanaia i Sepatemaba 22, 1900, a kopeia iloko o ka Buke 214, aoao 218 a pela aku, a oia no hoi na hookoe ana i hoakakaia maloko olaila a i heluia mai ka ekahi a hiki i ka iwakalua-kumamakahi hui ia.
EKOLU.
(Pa 28) Ili 24,383 kapuai kuea, i lilo ia P. A. Parmalee.
(Pa 22A) Ili 66,258 kapuai kuea, i lilo ia G. P. Castle.
(Pa 22) Ili aneane 23,000 kapuai kuea, i lilo ia G. P. Castle.
(Pa 33) Ili 84,707 kapuai kuea, i lilo ia Alexander Young.
(Ka hapa Komohana o ka Pa 40) Ili 9,850 kapuai kuea, i lilo ia Juliette M. Atherton.
(Pa 21A) Ili 51,200 kapuai kua, i lilo ia H. P. Baldwin.
(Pa 52) Ili 20,600 kapuai kuea, i lilo ia G. T. Kluegel.
(Pa 7 ame Pa 8) Ili aneane 36,000 kapuai kuea, i lilo ia C. M. Walton.
(Pa 1 ma ka aoao Hikina o ke Awawa o Pauoa) Ili 10,485 kapuai kuea, i lilo ia Heinrich Voss.
(Pa 28 ma ka aoao Hikina o ke Awawa o Pauoa) Ili 6,360 kapuai kuea, i lilo ia S. Fowler.
(Pa 4 ma ka aoao Hikina o ke Awawa o Pauoa) Ili 6,075 kapuai kuea, i lilo ia F. De Melio.
EHA.
O ka aina e ku nei ka hale uwila o Pakipika Hila nona ka ili o 2500 kapuai kuea, ame ke kuleana alahao o na kaa uwila i hoike ia maloko o ka palapala hookuu moraki i hanaia ma ka la ekolu o Dekemaba, 1902, Buke 239, aoao 157.
O na aina i hoikeia maluna e kuai ia ana me ka hookoe i ke kuleana alahele i hana ia ma kekahi palapala e C. S. Desky ame kana wahine mare ia C. W. Booth ma ka la 22 o Sepatemaba, 1900, a i kopeia iloko o ka Buke 21@, aoao 284-5, a oia no hoi ke kuleana alahele no ka hooomoe paipu wai ana ma ka aoao e huli ana i ke Awawa o Pauoa.
Ina e lawa ole ana ke dala no ka hookaa ana i ka huina i aie ia mai ka aina i hoakakaia maluna ae, ame na lilo o ka hooko ana i ka moraki, alaila o na apana aina malalo iho i hoakaka mua ia ae nei, a i kuai ia hoi mamua aku nei, aka aole nae i hookuuia mai ka moraki ae, e kuai ia aku no e like me ka papahelu malalo iho:
(Pa 22)
(Hapa Komohana o ka Pa 40)
(Pa 21A)
(Pa 52)
(Na Pa 7 ame 8)
----------
HOOLAHA AINA AUPUNI.
Ma ka Poaono, Aperila 2, 1904, ma ka hora 12 awakea, mamua iho o ke alo o ka Hale Hookolokolo, e kuai ia aku ana ma ke Kudala Akea he elua Pa-hale Aupuni, e waiho nei ma Kalokohanahou, Kaneohe, Koolaupoko, Oahu, e like hoi me keia malalo iho nei:
Pa-hale 1, nona ka iliaina o 1.04 eka: kumukuai haahaa $200.00
Pa-hale 2, nona ka iliaina o 0.16 eka: kumukuai haahaa $50.00.
Ma ke dala kuike ka makemake a ma ke dala gula Amerika no hoi.
No ke kii aina ame na mea aku i koe, e ninau ae ma ke Keena Aina Aupuni, Honolulu.
JAS. W. PRATT.
Komisina o na Aina Aupuni.
Keena Aina Aupuni, Honolulu, March 2, 1904.
3005-Mch. 4, 11, 18.
----------
HOOLAHA AINA AUPUNI.
Ma keia ke haawiia aku nei ka hoolaha i na lala o na Ahahui Home Hookuonoono D. McKenzie ame D. K. Manuhoa, o na palapala noi no ko lakou mau apana pakahi iho iloko o ka aina o Kamaee, Hilo, Hawaii, e hanaia no ma ke keena o Geo. H. Willliams, Hope-Agena Keena Aina, iloko o Hilo, Hawaii, ma a mahope iho o ka hora 9 A. M. o ka Poaono, Maraki 19, 1904.
JAMES W. PRATT,
Komikina o na Aina Aupuni.
Keena Aina Aupuni.
Honolulu, Feberuari, 16, 1904.
3003—Feb. 19, 26.—Mar. 5.
-----------
HOOLAHA I KA POE E NOHO NEI
MA KAPIOLANI TRACT, KALIHI.
Ke haawi ia aku nei ka hoolaha mamuli o kekahi palapala hoolilo Kahu Malama Waiwai i hanaia i Dekemaba 4, 1903, a i hoopaaia ma ka Buke Helu 254 a ma na aoao 175-182, ma ke Keena Hoona Aina, o W. C. Achi o Honolulu, ua hoolilo aku i ka mea nona ka inoa malalo iho nei ma ka palapala hoolilo Kahu Malama. Waiwai i na mea i hoikeia iloko o ua palapala la, kona mau pono apau, kuleana a mahele iloko o kela mau aina e waiho la ma Mokauea, Kalihi, Oahu, a i ikeia ma ka inoa Kapiolani Tract, a o ka poe apau e paa nei i na aelike kuai ame na pa-hale ma ua aina la i hoike mua ia ae nei mai ia W. C. Achi i oleloia ke hoike ia aku nei e uku ae i na hookaa liilii e hookaa ia a e hookaa ia aku ai malalo o na olelo aelike i oleloia i ka mea nona ka inoa malalo iho nei ma kona keena ma Alanui Kaahumanu, Honolulu.
JAS. F. MORGAN,
Kahu Malama Waiwai.
Honolulu, T. H., Ianuari 15, 1904.
3001—Feb. 5, 12, 19, 26.—Mar. 4.
----------
HOOLAHA PONOPONO WAI-
WAI.
Ma ka hana o ka waiwai o Keawe Kailua, o Kalaupapa, Molokai, i make, ua hookohuia ka mea nona ka inoa malalo iho, i lunahooponopono i ua waiwai la e Hon. J. W. Kalua, L. K. Kaapuni o Maui; nolaila, ma keia ke kauoha ia aku nei ka poe apau he koi ka lakou e waiho mai ia mau mea iloko o na mahina eono mai keiea la aku, ma ke Keena o Henry Smith ma Aliiolani Hale, Honolulu, Oahu, o hoole loa ia auanei.
A o ka poe i aie i ka mea i make, ke kauoha ia aku nei e hookaa koke mai lakou i ko’u hope ia Henry Smith, ma Aliiolani Hale, Honolulu, Oahu.
Kakauia i keia la 4 o Feberuari, M. H. 1904.
MALA KAILUA,
Lunahooponopono Waiwai o Keawe Kailua.
3001—Feb. 5, 12, 19, 26—Mar. 4.
----------
HOOLAHA AINA AUPUNI.
I ka Poaono, ka la 26 o Maraki, 1904, ma ka hora 12 awakea, a ma ke alo iho o ka Hale Hookolokolo e kuai ia aku ai ma ke kudala akea ka hoolimalima o ka aina kula ame ka loko i’a e waiho la ma Kanohouluiwi, awa o Kaneohe, Koolaupoko, Oahu, nona ka iliaina ke huiia apau loa he 6.25 eka oi iki a emi mai.
Manawa: 10 makahiki mai Aperila 1, 1904 aku.
Uku hoolimalima kaupalenaia: $50 no ka makahiki hookahi e uku mua ia i kela ame keia hapa-makahiki.
No na mea aku i koe e ike ae i ke Keena Aina Aupuni, Honolulu.
JAS. W. PRATT,
Komikina Aina Aupuni.
Keena Aina Aupuni, Honolulu, Feberuari 24, 1904.
3004—Feb. 26; Mch. 4, 11.
----------
HOOLAHA KUMAU
LEWERS & cOOKE
LOI AME KUKE, Kaupalenaia
Na Mea Hookomo mai a Kuai aku
i na
LAKO HANA HALE
O Kela ame Kena Ano.
Malaila e loaa ai na mea malalo @
NA PAPA N. W., NA PAPA @OL@, PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.
O na kauoha pono hale apau loa e hiki mai ana ia makou e hooko koke ia no me ka eleu ame na KUMUKUAI HAAHAA LOA.
LEWERS & COOKE
----------
Hui Alahao ame Aina o Oahu
MANAWA HOLO
Mei 1, 1903.
MAI HONOLULU AKU
No Waianae, Waialua, Kahuku ame na wahi hoolulu ma ke alahao--*9:15 a.m., *3:30 p.m.
No Pearl City, Ewa Mill, ame na wahi hoolulu ma ke alahao--*7:39 a.m., *9:15 a.m., *11:05 a.m.,
*8:15 p.m., *3:20 p.m., 4:15 p.m., *5:15 p.m., 9:30 p.m., 11:15 p.m.
MAI WAHO MAI.
Ku i Honolulu mai Kahuku, Waialua, ame Waianae mai *8:35 a.m., *5:31 p.m.
Ku i Honolulu mai Ewa Mill ame Pearl City mai—6:50 a.m., 7:46 a.m., *8:36 a.m., *10:38 a.m.,
*2:05 a.m., *4:31 p.m., *5:31 p.m., *7:40 p.m.
*$5; 3@ p.m., *7:40 p.m.
*Kela ame keia la.
Sabati wale no.
Koe ke Sabati.
G. P. DENISON,
Lunahoohana.
F. C. SMITH,
G. P. & T. A.
----------
Kakela me Kuke
(KAUPALENAIA)
Poe Kalepa ma
ke Komisina
A HE
POE LAWELAWE KOPAA
Poe Agena no na Ma-
hiko Lehulehu.
----------
KAUKA T. MITAMURA
Alanui Kukui Ololi Helu 68, Honolulu.
Na Hora Hana:
Hora 8 a 10 kakahiaka; hora 1 a 3 ame hora 6 a. m. 8:00 p.m. Sabati: Hora @ a 8 p.m.
Telepone Blue 2366 P. O. Box @42.
----------
Ina He Makemake
Kou i Ka
Lauoho Maikai
E HELUHELU I KEIA.
Malia paha ke pau nei kou lauoho ka helelei, a koe kakaikahi. E kau i ka laau mamua o ka pau loa ana i ka helelei, e hana i laau e ulu hou ai. O ka laau
“Laau Hooulu Lauoho a Ayers”
ka mea e ulu hou ai. He nani ka lauoho ke ulu mai, a he nui hoi.
Ina he nawali ka ulu ana o kou lauoho, o ka
“Laau Hooulu Lauoho a Ayers”
ka mea e manoanoa ai ka ulu ana, a ke loaa i keia laau pau loa ka helelei ana. I na he piha kou poo ke Kepia, o ka
“Laau Hooulu Lauoho a Ayers”
ka laau e pau ai a maemae kou poo. Ke loaa i keia laau e hoi hou ana ka ulu ana o kou lauoho a like me ko kou wa bebe.
Hoomakaukau ia e Kauka J. C. Ayer & Company, Lowell, Mass., U. S. A.
E loaa no keia mau Huaale ma ka Hale Kuai Laau o Hollister, alanui Papu.