Ka Nupepa Kuokoa, Volume XLII, Number 11, 11 March 1904 — HE MANAO I KAKAUIA MAI. [ARTICLE]

HE MANAO I KAKAUIA MAI.

Mr. Lunahooponopono, Aloha oe:—Ua ike iho lu au he manao iloko o ke "Aloha Aina" o kela pule aku nei na D. A. Mahuka o Wailuku, Mokupuni o Maui, e paipai ana i ka lahui Hawaii 'e komo aku ma ka aoao kalaiaina Demokarata, oiai wahi ana ke kakali mai la ia aoao o ka hoea aku o ke kanaka Hawaii ilaila. He mea oiaio, e ka lunahooponopono he hoaloha maikai o D. A. M. no ka mea kakau nei, aka aole no nae ia he mea e ke'ake'a" mai ai ia'u i ka hoike ana aku i ko'u manao imua o ko maua lahui, a hookahi wale iho no o'u manao, a oia no hoi keia: I ka manawa o Demokarata e paonioni ana me ka aoao Repubalika, ihea la o D. A. Mahuka kahi i ku ai ? Home Rula. I ka manawa o Demokarata e hakoko a«na maluna o kona mau kumuhana me na Repubalika, ma ka aoao hea la o D. A. Mahuka kahi i paio ai me kona ikaika apau? Home Rula. I ka manawa o Demokarata e paio ana me ka hahana nui i ka Repubalika ma ke kahua 0* ke koho balota, ihea la o D. A. Mahuka kahi i kalele ai? Home Rula. Nolaila e kuu makamaka ke paipai nui nei au ia oe e komo i ka aoao Repubalika me a'u i o'u mau makaainana ame o'u mau makuahine o ka aina, e noonoo ke akahele a mai puiale, aka, e hoala i ka noonoo maikai a e hoopaa i ko kakou puuwai ma ka aoao Repubalika no ka manawa pau ole. .. Me ka «iaio, BERNARD KELEKOLIO.