Ka Nupepa Kuokoa, Volume XLII, Number 13, 25 March 1904 — WEHEIA KA HOME O NA I'A He Wahi Hoonaauao a Hooluana no ka Poe Makaikai. HE HANA NA KO HONOLULU NEI POE WAIWAI NO KA PONO O NA KANAKA APAU. [ARTICLE]

WEHEIA KA HOME O NA I'A

He Wahi Hoonaauao a Hooluana no ka Poe Makaikai.

HE HANA NA KO HONOLULU NEI POE WAIWAI NO KA PONO O NA KANAKA APAU.

Ma ka Poaono o ka pule i hala i weheia ai ka Home Hoikeike o na Iʻa o Hawaii nei, e ku nei ma Waikiki, makai ae o Kapioiani Paka, no ka makaikai ana. Aole o ia weheia ana, ua weheia no ka lehulehu, aka ua weheia i ka poe wale no i konoia e hele aku e makaikai. O ke Sabati ae oia ka la i hookuuia ai no ka lehulehu. Mamua, hoolahaia aku ma na kolamu Kilohana e hanaia aku ana he home e malama ia ai o na i'a o Hawaii nei, a o ka hopena oia ka hooiaioia ana oia hoolaha ana ma ke komoia ana o ua hale la e na makaikai i konoia ame ko Honolulu nei poe ma ke Sabati nei. He mau makahiki loihi i hala ae nei ua loaa mai no he manao e hana aku i home no na i'a ma Honolulu nei, a o Kauka Dorn oia ka mea nana i hoala i mua i keia manao; aka nae mamuli i o ko ke Aupuni punuku ana i kekahi mau pono ua haule wale ka hana a keia kauka, a ua moe malie keia mea a hiki i ka wa i hoala hou ia ai e ka Hui Kaauwila. Ua lilo keia mea i mea e noonoo nui ia ai e keia hui a hiki wale ke komo ana aku o Mr. Kimo Kakela a me Mr. ame Mrs, C. M. Cooke a hoohoihoi i keia hana. Ua haawi ae o Mr. Kimo Kakela i kekahi hapa o ka aina o Kapiolani Paka, ana hoi e paa ana ma ka hoolimalima, i wahi e kukulu ia ai o keia home. I ka wa hoi i komo pu ae ai o Mr. C. M. Cooke ame kana wahine ma keia hana, oia ka manawa a ka Hui Kaauwila i ike ai e ko ana ka moeuhane i moeia ai e ia hui, a na Mr. ame Mrs. C. M. Cooke, ma ko laua lokomaikai, i lawe ae i na lilo o ke kukulu ana i ka hale. Nolaila o ka hana ma ka aoao o ka Hui Kaauwila oia ka houluulu ana i na i'a Hawaii no keia hale hoikeike, a pela iho la i loaa ai keia home no na i'a ma Oahu nei. He hana keia i ikeia ma na aina nui e waiho mai nei ma keia poepoe honua, a ua ikeia ka waiwai o keia hana. O kekahl waiwai i loaa mai ma keia, oia ka loaa ana o ka ike i ka poe e makemake ana e imi i na mea i pili i ke ola ana o na i'a, a he haawina hoonaauao hoi keia e kulaia nei ma na kula kiekie, a ua hookuu maikai ia mai na kula kiekie mai he mau tausani o na kanaka i loaa ka ike i na mahele o na aina nui e ikeia ana na i'a o ka moana, oia hoi ke kohola, ka mano ame na i'a o ka papaku, a mawaho ae o keia na i'a liilii pili kahakai. Ma ka hale hoikeike hoi o Hawaii nei hoikeia ae nei, aia malaila na i'a like ole o Hawaii nei; ua hookaawaleia hoi ko ke kai ame ko ka wai, a ma ka hoike a ka poe i hele ae e ike i keia mea hou, a i ike hoi i na hoikeike o na Aina

E, ua olelo ae lakou o ko Hawaii nei ka helu ekahi ma ka maikai o na waihooluu o na i'a, a wahi a lakou e lilo ana ko Hawaii nei home o na i'a i wahi e hele nui ia ai e makaikai.

Ma ka la i weheia ai o keia home o na i'a, ua malamaia ae he mau haiolelo hoomanao no ka wehe ana, a o ka poe na lakou i ha'i ae i na manao, oia o L. A. Kakina, Prof. W. T. Brigham, o ka Hale Hoikeike o Kamehameha, Mr. Peck, Lunakanawai Amerika. Sanford B. Dole, ame W. R. Kakela.

Ma ka hoike a Kakina i ikeia ai he $8,000 o ia ka nui o na dala i hooliloia no ke kukuiu ana i keia home o na i'a; o ka waiwaiio hoi o ka aina a Kimo Kakela i haawi ai he $7,500, a o ka lilo o ka Hui Kaauwila ma ka houluulu ana i na i'a ame ka hana aha i ko lakou mau wahi e holo ai he $3,233: nolaila o ka huina lilo no ka home o na i'a ua hiki aku i ka $18,733. Ua hoike hou ae o Kakina he umi-ku-mamahiku makahiki oia ka loihi o ka manawa hoolimalima o kahi e ku nei o keia hale hoolimalima, i hooliloia aku hoi e Kimo Kakela, a e like me ka loihi o kela manawa e ku ai ka hoolimalima pela no hoi ka loihi o ka manawa e kaa ai na hoolilo o keia hale malalo o ka Hui Kaauwila, a ua manaolana oia mahope aku o ia manawa e kaa aku ana keia wahi malalo o ka malama ana a ke Aupuni a komo hoi iloko o na haawina hoolilo o ke Aupuni.

E hamama ana na puka o keia home o na iʻa i na la apau o ka pule, mai ka hora 10 a hiki i ka hora 9 o ka po o na la noa, a mai ka hora 1 auwina la a hiki i ka hora 9 o ka po, o na la Sahati. O ka Poakolu, o ia ka la e hookuuia ai me ka uku komo ole, aka o na la e ae e auhauia ana he kenikeni no ke kanakamakua a he elima keneta no na keiki. E lilo ana kela mea i mea nui ma Honolulu nei i keia mau la, nolaila aole pono e hookuukuu i ka manawa aka e pono no e hele ae i ike i keia mea hou. Wahi a kekahi poe ua like no ka ka hele ana ma ia wahi e like me kou hele ana i ka makeke kuai i'a e ike ana no oe i na i'a Hawaii. Pololei no keia manao, aka ua oi ae keia, no ka mea e ike ana oe i ka holo ana o ka i'a ma kona kino ola, aole hoi e like me ko ka makeke he kinomake kau mea e ike ana.

AOLE OU HOALOHA E LIKE ME KOU HOALOHA O KA WA I HALA. E kokua mau ana oia ia oe I kou manawa e poino ai. Ua like no ia me ka laau Chamberlain's Cough Remedy. He hoaloha ia Hoko o na tausani home, a e like me kou hilinai ana I na hoaloha e ae, pela hoi oe e hillnai al iaia i kou wa o ka pilikia Ke kuaiia nel e na Halekual Laau apau. Benson, Smlth & Co., Ltd., na Agena ma Ha■wali nel.