Ka Nupepa Kuokoa, Volume XLII, Number 21, 20 May 1904 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, MEI 20, 1904.

 

KE

KAUNAWAHINE

O KE

Kulanakauhale o Tarevis.

KE ALOHA I KA MAKA PAHIKAUA.

MOKUNA XXVI.

HUI NA PANAPUA HOALOHA A ELUA.

 

            Ua kakau iho la oia e hoike ana i kona hoaloha i ka hiki ole iaia @@ @@le iwaho no ka ike ana iaia, aka, ina he manawa kona e hele mai ai mawaho o ke kakela, alaila, o na hora o ke aumoe oia na hora maikai no ka mea ua waihoia mai ke kauoha o kana uwaki kiai ia a @@ki i ka wanaao, ka manawa hoi o laua e hui ai mawaho o ka pa ma ke kukulu akau o ka aleo o ke kukulu akau.  Ua hoike pu aku @ia aole e hoea mai kekahi pilikia koe wale no he pilikia kuwaho e @@@@ mai ai me ka maopopo ole – a i ka pau ana o na manao ua opiopi iho la oia a hoopaa aku la i kekahi o kana pua a me ia oia i hookuu aku ai iloko o ka lewa, ana no hoi i ike aku ai i ka haule ana iho ma kahi kokoke i kona hoaloha.

            Ua ike pu aku no hoi oia i ka lalauia ana iho a mahope i ka ianei @ana aku e heluheluia ana ua leka nei, aka mahope iho ua ike aku la oia i ke kowiliwili ana mai o ke kanaka loihi i kona papale-kapu a ianei i hoomaopopo koke iho ai ua loaa pono aku kana leka a hoike aku la no hoi keia i ka hoailona o ko ianei olioli ma ka peahi ana me na lima iloko o ka lewa.  Me ia ano oluolu o kona noonoo ua hoi aku la oia iloko o kona lumi a moe aku la iluna o kona wahi moe no ka hoomaha ana i makaukau ai no ke ku kiai aku i ke aumoe ke hiki mai ia manawa.

            Iloko o ka manawa kupono ua liuliu koke ae la no ua panapua nei a i ke aumoe aia oia maluna o ka pa manoanoa kahi i holoholo ai no ka makaala ana i kona manawa o ka hana, ke kiai ana hoi i ke kukulu akau o ka aleo ma ka aoao akau, a mahope o ka hakilo makaala ana ua hoomaopopo loa iho la oia ua hamau na mea apau a aole he pilikia i koe no kana huakai hui me ka hoaloha.

            Alaila, me ka eleu nui ua loaa aku la iaia na pono e hiki ai iaia ke iho a hoi mai ke makemake oia no ka hoi ana, ma ka loaa ana iaia kekahi mau kaula i poina i ka poe koa no ka hoihoi ana i kahi o ia mau mea i hoomakaukauia.  Aole mo hoi i hoohakalia iho ua panapua nei ua hehi aku la oia i ka lepo mawaho o ka pa no ka manawa mua loa mahope iho o kona hoopakele ana ia Konorado, ame ka makaala loa no hoi oia i hoohele aku ai ma ka hoolohe ana i ka hoea mai o kona hoaloha.

            Ua hiki aku no oia ma kekahi wahi i ulu nui ia e ke kowali a pee iki iho la oia ma ia wahi no ka hoolono ana, aia hoi, ua lohe io aku la oia i ka nakeke hele ana mai o kekahi mea ana hoi i hoomaopopo koke iho ai o kona hoaloha io no ia, a hiki wale i kona ike ana aku e hele mai ana a ku pono mamua o kona alo oiai nae aole he ikeia mai ona no kona noho iloko o ke kowali, alaila me he popoki la ua lele aku la oia iwaho a pa’i ikaika aku la ma ke kua o ka malihini loihi ke kumu i huli hikiwawe ae ai ua kanaka loihi nei a kula’i ikaika iho la i ka panapua o ke kakela a hina ana ilalo, eia nae ua eleu koke ae la ua panapua nei a paa ana kona hoa iaia me ka umii ikaika ia ana o kona pua-i e hiki ole ai ke uwa ae, ina nei no ka umia make loa ana, a pela iho la na hoaloha panapua i hui ai, mahope iho o ke kaawale ana no kekahi mau la loihi

 

MOKUNA XXVII.

 

NO KONA ALOHA I MAUNA AI O KONORADO I KONA OLA.

 

            Ia Hilda, ka wahine opio ukali o ke Kaunawahine Tekela i haalele iho ai i ke Kakela Turona no ke kauhale i kuhikuhiia aku ai oia a i laweia ai ilaila ua hoonohoia aku oia me kekahi poe, a he mau manawa kaumaha nui hoi ia nona aka aole no nae i liuliu loa ma ia kulana kaumaha oiai ua komo nui ae na koa eha o na Akibihopa mamuli o na kaua i hooili koke ia a lilo aku la o Hilda i mea kokua nui i keia poe ma ke ano he mea malama i ka poe ma’i, a ma keia hana no hoi oia i noho hana ai me ka makemake nui ia e na koa no ka makaala ame ka mikioi o ka lawelawe ana, a nui no hoi kona kamailio nui ia no ka maikai a oluolu a ano lede maopopo, he mau haawina hoi i loaa ole i ka nui wahine opio o ia kauhale hookahi a Hilda i noho aku ai no ka mea o lakou no kekahi poe i komo aku iloko o keia oihana malama ma’i iwaena o ka poe koa o na Akibihopa.

            I kekahi manawa ana e lawelawe ana i ka poe nawaliwali e like me ka mau ua hoopilihuaia kona noonoo a paa ae la oia i kona mau lima ma kona umauma no ka nui hikilele i kona lohe ana e hele ae ana na Akibihopa e ike i ka poe ma’i e ike pu hoi ia Hilda ka wahine opio i kamailio nui ia no ka nui o kana mau hana maikai i ka poe nawaliwali, no ka mea ua hoomaopopo koke iho la oia e ikeia ana oia e ka Akibihopa Iseneboga no ka mea he hala ole iaia ke ike aku i ka poe ana i ike ai a i kamaaina ai, a oiai he wahine o Hilda imua o ke alo o ka Akibihopa ua nui ino loa kona maka’u no ka manao aole e nele kona ikeia mai.  A iaia no e hoomau ana ma kana hana me ka nui pilihua ua komo io aku la no na Akibihopa – ko Tarevis ame ko Kolone, aka ua huli kua koke ae la o Hilda me ke kulou haahaa loa ana ilalo no ka mea aia oia ke hoomaopopo la i ke kulou haahaaloa ana o ka poe apau e kuku ana imua o na Akibihopa.

            “E hoomaikaiia ka poe hana aku i na hana o ke aloha, e kuu keiki,” wahi a Akibihopa Iseneboga me ka malie loa a me ka leo koikoi no hoi.

            “Pololei,” i pane ae ai o Akibihopa Hokedana ma ia ano leo no.

            “E hoomanao,” wahi a Iseneboga i pane ae ai i na aliikoa, “maluna o kona poo ke kau nei wau i na hoopomaikai o ko kakou ekalesia.”

            A no ke kulou o na mea apau e like me ke ano o ka haawi hoomaikai ana, pela i kulou loa iho ai o Hilda ilalo loa, a iaia e noonoo ana ua kokua nui ia keia kulou loa ana ona ilalo ma ka loaa ana iaia o ka noonoo o ka hana maikai ia ma kona aoao, he hoike ana aku hoi ia i kona hoohaahaa maoli no ka mea oia ka mea i haawi hoomaikaiia mai nei a no ka mea aole ia he mea liilii, a o kekahi no hoi oia ka mea e hoomaopopo ole mai ai ka Akibihopa Iseneboga i kona helehelena, ke kumu hoi i olu loa iho ai o kona noonoo, me ka loaa pu ana iho iaia he noonoo hou, oia hoi, aole e aa ka Akibihopa e kauoha aku iaia e ea ae kona poo i ikeia ai kona helehelena.

            A mahope mai o ia manawa i ike nui ia ai oia he wahine opio i hoomaikaiia ke kumu ona i lilo ai i mea nui loa iwaena o ko ke kauhale a iwaena o na ohua o na Akibihopa, a i maopopo loa ka makee ia o ke kulana lede o keia wahine opio e na aliikoa ame na koa nona ina nei no ka hoopoinoia o ua wahine opio nei aole e hoohakalia lakou i ka paio aku me ka lakou mau pahikaua i ka enemi no ka pono o Hilda.

            I ka hooaumoe loa ana iho i kekahi ahiahi ua hoea aku la kekahi wahi keikikane imua o Hilda i ka hale ona e noho mau ai, a hoike aku la aia he koa e noho la ma ka’e o ka muliwai i hiki pono ole ke hele no ka eha o kona wawae a ua makemakeia oia e hele aku i ke kanaka poino no ke kokua ana iaia.  E like me ka mau ia Hilda ua hahai aku la oia mahope o kahi keiki, a oiai aia ke hooaumoe loa iho la, aole e hiki ke hoomaopopo i ke kanaka aia wale no a kokoke loa aka aole he hoohalahala ana no Hilda no ka mea ua maa oia i ka hana pela a aohe ona maka’u i na poino no ka mea aole no he poino e hiki ma ia mau wahi, oiai ua paa pono i ke kiaiia e na koa a he poe hoaloha wale no na koa nona.

            Ua ike io aku no oia i ke kanaka a i ka hiki ana aku ua haawi mai la ke kanaka he apana dala i kahi keiki ke kumu i olioli nui ai ke keiki a holo aku la me ka mama nui me ka haalele ana iho i ka wahine opio me keia kanaka wawae eha, a holo pololei aku la a hui me kona mau hoaloha no ka hoike ana i ka apana dala i loaa iaia no kona uku ame ka olioli no hoi oia e haanui ana.  Ua huli ae la no hoi o Hilda no kahi keiki e holo ana i kona manawa i holo ai, a kahea aku la he ole nae ka hooloheia mai, alaila huli ae la oia i ke kanaka wawae eha a ninau aku la i kona pilikia.

            “Aia mahea kou wahi eha?”

            “Aia iloko o ka puuwai, e Hilda,” wahi a ke kanaka wawae eha, i hawanawana aku ai, a aohe mea hiki ke hoola o oe wale no, a piha olioli koke ae la ka wahine opio.

            “O, e Konorado, o oe anei ia,” i hoohoo olioli ae ai o Hilda.  “Maihea mai kau hele ana mai nei?”

            “Mai ke Kakela Turona mai nei wau, mahope iho no nae o kuu kaama’i ana mamuli o na palapu i loaa ia’u mai ka huakai a’u i hele ai a hoi hou i ke kakela, aka i keia manawa ua pau ia mau palapu ke kumu o ko’u hele ana mai i ou la i keia po, ma ka pii ana maluna o ka pa a iho mai iwaho ma ke kaula i hoomakaukau mua ia no ka iho ana, a mailaila mai la wau o ka helenihi ana me ka ike ole ia e na koa o na Akibihopa a hiki mai la wau i ou nei.  O kekahi mea i maikai loa ai keia hele ana mai nei a’u oia keia lole o ka poe o Tarevis, a’u e aahu nei, aka o ka hana nui a’u i noonoo ai ma ko’u hiki ana mai nei ma keia wahi, o ka mea e hiki ai ke hui me oe, aka no kuu lohe ana i kou lilo i mea nui iwaena o keia poe a i ike nui ia ua manao iho la wau e hoolimalima i kahi keiki i holo aku nei a i kona hooko io ana aku nei ma ka’u a’oa’o ana iaia e hoike aku ia oe i ka makemake o ke koa wawae eha, aole no i liuliu loa ua hooiaioia ko’u iini.”

            “Aka aohe ou eha i keia manawa?” i ninau hou aku ai o Hilda.

            “Aole,” wahi a Konorado, “ua hoi hou mai kuu ikaika mahope iho o kela mau palapu i loaa ia’u.”

            “A’hele wiwoole mai nei oe iloko o keia pilikia nui no ka ike ana ia’u?”

            “Ae, a kuu aloha,” wahi a Konorado, he poino ko’iko’i io na paha ia aka he wahi lihi lahilahi loa kona ikaika iloko o kuu puuwai no ka mea aia ke aloha iloko olaila ke loku la nou e ake ana e ike ia oe, a’u hoi e ike powewehi nei ia oe iloko o keia wa poeleele aka – “i ke kanaka opio i oki pu iho ai i kana olelo ua apo aku la oia i ka wahine opio me kona mau lima a honi malie iho la i kana ipo me ka loaa ole o kekahi ke’ake’a ma ko Hilda aoao no keia aloha io o ke kanaka opio a Hilda i aloha’io ai.  He hiki anei ia oe ke hoi hou i ke kakela me ka ike ole ia mai?” i ninau aku ai o Hilda.

            “Aohe he pilikia o ka hoi ana.  Mai ke aumoe aku o keia po a hiki i ka wanaao e ku kiai ai ka panapua, a aole he pilikia o ka hui ana me ia no ka mea he mau hoaloha maua kekahi i kekahi, e hana lokahi pu ana hoi no ka Haku Rodolofo, aole no ke Kauna Paele.  Aole au e hoi koke a hiki i ke aumoe.”

            “Aka aole e hiki ia’u ke noho maanei a aumoe,” wahi a ka wahine opio, “mamuli lakou ha’oha’o no’u e helehuli mai ai e nele ole ai ko kaua loaa pono.”

            ‘E noho mai no hoi paha oe me a’u e like me ka loihi au e ike ai ua kupono, aole anei oe e hana pela e kuu aloha?  A i kou manawa e hoi ai wau e hoi ai, e aloalo aku ai i na koa o na Akibihopa a hiki aku i ke kakela.”

            “Aole au i makemake loa i keia mauna ana mai nei ou ia oe iho iloko o keia poino no ko’u pono, e Konorado,” i pane hou aku ai o Hilda.

            “He ma-ua loa ia o’u ia’u iho i ko’u noonoo iho,” wahi a Konorado.”  Ua hele mai nei no wau e ike ia oe no ko’u pono iho – no ko’u aloha ia oe, a ma ia pane ana ua hopu hou aku la oia i kana ipo a honi hoomau iho la no ka hoike ana i kona aloha io.

            “Pehea kuu Hakuwahine?  He maikai no anei ia e noho mai nei?” i ninau aku ai o Hilda.

            “He kakaikahi loa ko’u mau manawa e ike ai iaia, eia nae he oia mau kona maikai.”

            Ma keia kukaiolelo ana o na ipo no laua iho, ua hoopuiwa loa ia laua i ke nehe ana mai o kekahi poe koa ma kahi o ka umi a oi ka heluna e alakaiia ana e ko lakou lutanela a hikilele ae la laua ma ka pane leo ikaika ia ana mai e ke aliikoa.

(Aole i pau.)

 

MAKAIKIU

WETE DETONA

 

Ke Ahi Lalapa Pio ole i na Nihiliti

Ke Kanaka Amerika Koa lua ole

 

MOKUNA I.

 

“O OE KA’U E HULI NEI.”

 

            “E kala mai ia’u.  Aole wau e noi aku ana i kau hana na’u e hana,” wahi a Wete.

            “Alaila,” i puana ae ai ua malihini la me kona uluhua i keia mau luaiele e halawai nei me ia.  “Ke makemake nei oe e noi aku wau ia oe e lawe aku i kau hana e waiho aku ai nau e hana mai?”

            “Ua lalau hou no oe ma ia mea,” wahi a Wete me ka hookoikoi ana i kana mau olelo, “e pono ia oe ke ike iho aole loa wau e lawe mai ana i kau hana, aia wale no a manao oe pela, a ike pono hoi oe owau kau mea e huli nei no kau hana.”

            “Alaila, e hiki ana ia oe ke hooia mai imua o’u ia manao au i ha’i mai la.”

            “Me kou oluolu mai.  Ke makemake nei anei oe e hoike mai ia’u i kau hana e manao nei e lawelawe ia aku?”

            “Ae.  Ke makemake nei wau e ha’i aku i ka’u mea i ike ai.”

            “Alia.  Aole anei oe i hoike mua mai nei ia’u i kekahi mau mea e pili ana no kau hana?”

            “Aole loa.”

            “E noonoo mua oe me ke akahele.”

            “Aohe he mea e noonoo mua ai.”

            “Alaila, ua pono iho la ia; ke i aku nei no nae wau ia oe ua ha’i mai oe ia’u i kekahi hapa o kau hana.”

            “Ea, he mau hana kamalii wale no keia au,” i panai aku ai ka malihini me kona uluhua nui.

            “Aka nae, ina paha wau e ha’i aku ana ia oe i na mea au i ha’i ole mai ia’u, heaha hoi kau e panai mai ai ma kou aoao?”

            “Alaila, e i aku wau ia oe e Mr. -----?”

            “O Wete Detona kou inoa, a ina he mea oluolu ia oe, e kahea mai oe ia’u ma ia inoa.”

            “E Mr. Detona, e i aku no wau ia oe, o oe ua kanaka la a’u e huli nei, ke ha’i mai oe ia’u a kulike me kau i olelo mai nei.”

            “A mahope aku, e noi mai ana paha oe ia’u e hana aku wau i kau hana?”

            “He mea oiaio, e noi aku no wau a e hooikaika aku no hoi e lawe ae oe i ka’u hana,” wahi a ka malihini me ke kuoo nui.

            “He kanaka Rukini oe i hanauia ma Rusia, aka ua kipakuia mai oe mai kou aina mai mamuli o ke akea o kou mau manao,” wahi a Detona i pane aku ai, e hoomaka ana hoi a e hooko ana i kana mau olelo i hoopuka mua ai.

            “Alaila, ua ike mua no oe ia’u?” wahi a ka malihini me ke paha’oha’o.

            “Aole loa wau i ike mua ia oe a lohe paha nou,” wahi a Wete Detona.

            “Alaila, ua maikai maoli no kena koho ana mai nei au.”

            “Pololei kau i pane mai la,” wahi a Wete Detona, me kona mino aka ana iho.

            “Well, pehea hou aku?”

            “He ohana pilikoko kou, hoaloha, a i ole o kau keiki ponoi” – wahi a Detona me kona hakilo ana aku i ka nanaina o kana malihini – “ae, he keiki kau e noho mai nei i Rusia.”

            “Ehoomau aku,” wahi a ka malihini me kona hoao ana ae e uumi i kona mau manao ano e, eia nae ua hiki ole.

            “Eia ua keiki nei au iloko o ka pilikia, a ua hoounaia mai nei ka lono ia oe no ia mea,” i hoomau aku ai o Wete Detona.

            “A pehea hou aku?”

            “O, maanei wau e hoopau iho ai i ka’u mau olelo, no ka mea, ina wau e kohohewa ole, aole no hoi oe i maopopo pono loa i keia mea.”

            Haka pono aku la na maka o ka malihini maluna o Detona me ka hoohuoi, a pane aku la me ka pioo o kona naau:

            “Ke maopopo ole nei wau i kou ano.”

            “Ke maka’u mai nei oe ia’u me kou manao ke poholalo ia aku nei oe.  Aole, aole loa pela.”

            “Aka hoi, pehea -----?”

            “Pehea la i loaa mai ai ia’u keia ike?  Mamuli no ia o ka lawe ana mai i na noonoo maikai ana.”

            “Ke maopopo ole aku la no wau.”

            “Eia nae hoi he mea mama wale no.”

            “Ka, ia oe paha.”

            “A pehea hoi ina wau e i aku ana ia oe, ua ike maopopo aku wau he kanaka Rukini oe ia oe i komo mai nei, heaha kau pane.”

            “E hooia aku ana wau a e manaoio aku ana hoi ia oe.”

            “A ma kou kulana hoi, ke ike nei wau o oe kekahi o na kanaka koikoi.”

            “Pololei kau i ha’i mai la.”

            “O ke kanaka koikoi i makemake i makaikiu, i kana Amerika hoi, a i hiki ke olelo ma ka olelo Rusia e like me ko laila poe, he mea maopopo ke makemake nei oia i ka makaikaiu e holo aku no Rusia.”

            “A ina he makemake kona i kekahi mea okoa e hele aku a hana aku nona oiai no nae ke ake nui loa nei oia e hele aku no ia, eia nae aole e ko ana, alaila mamuli no ia o kona ae ole ia mai, a i ala mai paha hoi mamuli o kekahi mau kumu pili kalaiaina, i pili mai iaia.”

            “Ke manao mai nei paha oe he nihiliti hoi wau?”

            “Aole loa.  Ke lawe nei wau ia oe he kanaka manao laula.”

            “He mea pono ia oe e hooki iho i kau wehewehe ana.  Ke noi aku nei wau ia oe e kala mai oe ia’u no ka’u mea i pane aku nei me ka hoohuahualau.”

            “Aole loa he mea nau e noi mai ai i kou kala ia aku.  O kou nanaina opiopio oia kekahi o na kumu maikai loa ma ko’u aoao.  Ina aole e hilinai mai ana ka mea nana ka hihia maluna o’u, aole e lilo mai ana ka’u oihana i mea na’u e maka’u ai.”

            “Alaila, e lawe ana anei oe i ka’u hana?”

            “Ina ua manao paa oe e haawi mai na’u e hana, a ina no hoi ma ka’u huli ana e maopopo ana ia’u he mea pono ia’u ke lawe ae.”

            “E uku no wau ia oe e like me kau i manao ai.”

            “Aole wau e hoole ana i ka uku; aka, o ka’u e makemake nei, ina paha he mau mea ano nui kekahi iloko oia hana e makepono ai ka hoolilo ana aku i ka manawa malaila.”

            “Ina ia he mea oluolu ia oe.”

            “He oiaio, ua pololei kau i koho mai nei, he kanaka koikoi io no wau – owau o Kauna Ivana Horawiki.”

            “I ahewaia mamuli o ka loaa ana aku o kekahi mau buke manao laula malalo o kona malu, a i hoopiiia hoi no ka manao e pepehi i ka Emepera.”

            “Alaila ke hoomanao nei oe i ko’u hihia?  He mau makahiki loihi i kaahope ae nei oia ka manawa o ua hihia nei o’u.”

            “Ua lohe wau i ke kamailio nui ia.  Oia wale iho la no.”

            “Ua haalele aku wau ia Rusia i pakele mai ka lawe ia ana aku no Siberia.  Maanei i hui mai ai ka’u wahine me a’u, a he iwakalua makahiki i kaahope ae nei ua hanau mai la he keikikane na maua.  Ia manawa he kupa Amerika wau, a pela no hoi ua keiki la a’u mamuli o kona hanauia ana ma Amerika nei.

            “He mau palapala no anei kekahi me ia e hiki ai iaia ke hooiaio i keia mea?”

            “Ae.  Ua hele pu aku oia me ia mau palapala.”

            “Alaila, e hoomau aku.”

            “Ua holo aku oia no Rusia he hookahi makahiki i hala ae nei no ka lawe ana mai i ka lima o ke Kaunawahine Alazamofa.  O laua ua hoopalauia i ko laua manawa bebe e ka makuakane o ua Kaunawahine la ame a’u i ka hiki ana mai o kona makuakane ianei ma kekahi huakai makaikai honua.”

            “A pehea hoi na manao o na opio no ia hana a olua?”

            “Aole laua i hoopuka mai i na manao ku-e no ia mea.  He mea oiaio aole loa laua i hookonokono ia.  Ina he mau manao ku-e ko laua, ina ua hoopau koke ia ko laua hoopalau.”

            “Alaila, i holo aku oia no Rusia i hookamaaina aku oia i kana wahine hoopalau?”

            “Ae, a i ko laua hui ana ae i kinohi hoomaka koke no ko laua aloha kekahi i kekahi.”

            “A pehea hou aku?”

            “Ua loaa mua mai ka maka’u iloko o’u e kau mai ana he mau poino maluna o ka’u keiki mamuli o ka’u mau hana.”

            “Oiai no nae he kupa Amerika oia?”

            “Ae; pela io no.  Ua maopopo ia oe ke ano o keia aupuni hookaumaha nui wale.”

            “Ae; aka nae, ina ia he kanaka Amerika, alaila ua palekana no oia ke malama pono oia iaia iho.”

            “E heluhelu iho oe i keia telegarama,” wahi a Kauna Ivana Horawiki, me kona haawi ana aku i kekahi palapala ia Wete Detona, a maluna hoi o keia na huaolelo penei:

            “Ua hopuia kau keiki Ivana no ka pepehi kanaka.”

            “Aole i kakauinoa ia keia palapala,” wahi a Detona.

            “O keia kau e makemake ole nei.”

            Eia nae hoi o ke kakauinoa ana he mea maalahi loa ia, ma ia aina o ke ino nui wale e alakai aku ai i na manao hoohuoi maluna o ka mea nana i hoouna mai i keia lono.”

            “Aka hoi, he mea pono ia oe ke hoomaopopo iho, aole loa e hoounaia mai keia lono me ka ae ole o ka oihana makai”

            “Aole i loaa mai ia noonoo ia’u.  Alaila ke manao nei oe he maunu hoowalewale keia no’u e holo aku ai no Rusia?”

            “O, aole pela.  Ke manao nei wau ua ike no ka oihana makai i ka mea nana i hoouna mai i keia lono, a mamuli hoi o kekahi mau kumu a lakou i ike ai, nolaila lakou i ae ai e hoounaia mai.”

            “Ua loaa ia’u keia manao na Kaunawahine Alazamofa i hoouna mai i keia telegarapa.”

            “O kena ke koho i ioaa he wahi lihilihi o ka oiaio.”

            “Aka, ke maopopo nei anei ia oe ke kumu a’u e makemake nei i makai-kiu no ke kokua ana mai ia’u?

            “Ke kaumaha nei oe ua lilo aku kau keiki malalo o kekahi poholalo i maa i ko Rusia poe.”

            “Pela io no.”

            “A ke makemake nei oe e huli ia a loaa kona hala ole, i mea e hiki ai i na Mokuaina Huiia ke lawe ae i kau hihia a hoonee aku imua me ka ikaika.”

            “Ae, ae.  E lawe ana anei oe i ka’u hana?  Mai hoole mai oe.  Ua loaa iho la ia’u kau mea-i huli mai nei a ‘O OE KA’U E HULI NEI.’”

            “E lawe ana wau i kau hihia.  E hoi aku oe ano a hoomakaukau iho i na hoike kupono apau e hooiaio ana i kona kupa Amerika.  Mawaho ae o keia e haawi mai oe i palapala e hoike aku ana i kau keiki owau kou agena.  E haalele iho ana ka moku ia nei he hookahi la mai ka la apopo aku.  E hiki aku ana wau i kou home i ka la apopo no ka ninau ana i kekahi mau ninau a no ka lawe ana mai hoi i ua mau palapala la.

(Aole i pau.)