Ka Nupepa Kuokoa, Volume XLII, Number 44, 28 October 1904 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

2          NUPEPA KUOKOA, POALIMA, OKATOBA 28, 1904.

 

Laha ka Ma'i Puupuu.

 

NA MANAO ULUKU I LOAA MAI MAMULI O KA LOAA ANA O KEKAHI PUU EHA.

 

KA PUHILI ANA O NA KAUKA MA KEKAHI MA'I KOIKOI LOA A ME KA HOOPAUIA ANA O NA ULUKU MA KEKAHI IKE ANO NUI I LOAA AE.

 

            O ka maka'u i ala mai ma ka oili ana ae o kekahi ma'i me na haawina popilikia e like me ka puupuu, e hoopauia no ke ike i ke ola i loaa koke iho nei.  Ua hoike ae nei o Mr. Thomas F. Brown, o ka Hui Hanakaa Hume, o Amesbury, Mass., penei:

            "Ma kahi paha o elua makahiki i hala ae nei ua loaa iho la wau i ka ma'i puupuu apuni ko'u kino.  Ua loaa koke mai la ka manao pioloke iloko o'u a hui koke aku wau me na kauka ma Amesbury ame Newburyport.  Ua hoike mai lakou he ma'i puupuu ko'u e kupono loa ai ia'u ke malama pono loa i ole e ili mai na haawina popilikia maluna o'u.  Ua hoike mai lakou i ka maikai ole o ko'u koko a e lilo ana hoi he manawa loihi ma ka lapaau ana mamua o ka loaa ana mai o ke olakino maikai ia'u.

            "Ua puni ae la ko'u kino holookoa i keia mau puupuu; he manawa no e puka mai ai ka wai lena ma kahi e poha ae ai o ka ili a puka ae la ka eha malaila.  I kekahi manawa e maloo ana keia mau eha a mahope koke iho e puka hou mai no a kahe aku hoi keia wai lepa.

            "O na laau a ke kauka i waiho mai ai po'u aole loa he wahi pono iloko o lakou a aole hoi he manawa a keia mau laau i kaupale aku ai i ko'u ehaeha a ua waiho hoi wau iloko o ke kulana kupilikii maoli no.  I kekahi la ua ha'i mai la ke kauka ia'u e hiki mai ana no ka manawa e huli ae ai keia mau puupuu o'u a lilo i ma'i akepau.  I keia wa hoomaka mai la wau e hopohopo no ko'u pono iho.

            "I kekahi la ia'u e waiho ana iluna o kahi moe e heluhelu ana hoi i ka nupepa, ua heluhelu iho la wau i kekahi manao e hoike ana no ka laau Dr. Williams' Pink Pills for Pale People, e hoike ana hoi he laau maikai loa ia no na ma'i i loaa mai mamuli o k@ koke ino, a oiai aole iho la i loaa ia'u he wahi pono mai na laau a ke kauka i haai mai ai ia'u no na mahina ekolu i kaahope aku nolaila ua hooholo iho la wau e hoao i keia mau huaale a e waiho aku hoi i ka laau a ke kauka.

            "Mahope o ko'u lawe ana ekolu pahu huaale o keia ano ike iho la wau i ke kaawale aku o ka eha mai ko'u kino aku a koe kakaikahi iho la keia mau puupuu.  Hoomaopopo iho la wau eia wau ke maikai ae nei a nolaila hoomau hou aku la no wau i ka lawe ana i keia mau huaale a hiki i ka pau ana o na pahu ewalu ia'u.  Alaila ola loa iho la wau.  I keia manawa eia wau ke noho nei me ka hauoli, ono maikai mai hoi ka'u mau mea ai, a ua hiki hoi ia u ke hana e like me na la i hala aku, a ke paa nei ko'u manaoio ua aie wau i ke ola maikai i loaa mai ia'u i keia manawa mai ka Huaale Akala a Kauka Williams no ka Poe Haikea."  Eia keia laau hoomaikai nui i ke koko ke kua@a nei ma na halekuai laau lapaau apau apuni ke ao holookoa.

 

HOIHOIIA MALALO O HOOKAHI POO.

 

            Ma ka Poalima, Oct. 14, i hala aku nei i malamaia ae ai he kukakuka ana mawaena o Kiaaina Carter ame ka Lunanui o na Hana Hou, ame ke Komisina o na Aina Aupuni e pili ana i na aina aupuni e paaia ana e ka oihana Kalaiaina.  O ka hopena o keia kukakuka ana, oia ka hoihoi ana aku o Holloway, ka Lunanui o na Hana Hou i na aina apau e paaia ana e ia a kaa aku malalo o ka malama ana a ke Komisina o na Aina Aupuni.

            Me he mea la aole no paha i maopopo i na makaainana pela iho la e paaia nei kekahi mau aina aupuni, a ola ka Kiaaina Carter i noonoo ai e hoopau a e hoihoiia na aina aupuni apau malalo o ka malama ana o hookahi poo, aole hoi e like me na wa i hala aku nei.

            Ua manao ke Kiaaina he hana houuku mai keia i ka hana, a he mea pono hoi e hoi kela ame keia hana o ke aupuni iloko o ko lakou mau keena ponoi, aole hoi e mahelehele a hoonui aku i ka hana maluna o kekahi oihana wale no.  Aole wale oia, aka o ka hoihoi ana i keia mau aina aupuni apau malalo o hookahi poo he mea ia no ia poo e ike ai i kana mea e hoike ai i na mea e pili ana no na aina aupuni ke hiki mai ka manawa e konoia aku ai oia e waiho mai i na hoike e pili ana no na aina aupuni e paaia ana e ke aupuni

 

ELUA MOHO HOU A NA DEMOKARATA.

 

            Ma ka po Poakahi, Oct. 4, akoakoa ae ai na Demokarata ma Waverley Hall no ka wae ana i elua moho hou no lakou, hookahi e pani ana i ka hakahaka o C. J. Hutchins, i haalele mai i kona kulana, ame Wolter i haalele mai i kona kulana moho Senatoa.

            Ma ke koho lokahiiia ana ua lilo ae o Gilbert J. Waller, ka haole nana e paa nei i ka monopole o ka makeke kuai bibi o Honolulu nei, James F. Langston, kela haole poo kamana hooemiemi i na uku-hana o na kamana Hawaii e hana ana me ia a e noi ana paha i hana iaia.

            Ua haiolelo ae keia mau moho iloko o ia halawai, e hoike ana i ko laua mau manao maluna o na aoao kalaiaina e ku nei i keia manawa.  Wahi a Langston, ina ke ola nei o Linekona a hiki i keia manawa, ina ua lilo oia i kanaka Demokarata, no ka mea o ka manao iloko o Linekona aia me ka poe ilihune a he kanaka hoi oia i paio no ka pono o ka poe ilihune.  Pela no hoi me Garfield, kekahi o na Peresidena i kukuniia ka pono ame na pomaikai o na poe ilihune iloko o kona puuwai.

 

MAKAIKIU

WETE * DETONA

Ke Ahi Lalapa Pio ole i na Nihiliti

Ke Kanaka Amerika Koa lua ole

 

MOKUNA XXIX.

 

KO GERENIGOFA HOALOHA.

 

            "Ina oe e hoike mai ana ia makou i kekahi mau mea e pomaikai ai makou, he mea oiaio e kokua aku no makou ia oe ma ka hoomahuka ana ia oe ame keia opiowahine mai nei aku, ina no nae e hoohiki mai ana oe aole loa oe e hoike ana i kekahi mau mea au i lohe ai e pili ana no na Nihiliti."

            "O keia anei ka manao iwaena o oukou apau?" i ninau koke aku ai o Wete.

            "Ae; a o ka makou mea e hooholo like ai, oia ke apono ia mai e ke anaina holookoa."

            "E ha'i mua mai oukou i ko oukou manao, ke hooiaio nei anei oukou na'u i hoohamani aku i ka papahana a oukou no ka pepehi ana i ka Emepera?"

            "Owau kekahi," "A owau no hoi kekahi," i puana like mai ai na poe Nihiliti.

            "Ina pela e hoolohe mai oukou.  Mahope o ko'u hoouna ana mai i ka lohe ia Generala Gerisa, ua maopopo ia'u ua kupono e uku ia mai wau no ka'u hana, a e hookuuia mai hoi keia opiowahine.  Aole anei oukou e manao mai ana ua pono ko'u manao ana pela?"

            "Aole he mea e hoopaapaa aku ai malaila."

            "Eia nae ua loaa ae ia'u ka lono mai ia Generala Gerisa mai e hoike ae ana ia'u ua hiki ole iaia ke hoopakele ae i keia opiowahine, no ka mea aole e hiki iaia ke ku aku imua o ka mana ume o Kaunawahine Alamazofa."

            "O ke@a au e ha'i mai nei, mahope iho ia o kou hoouna ana mai i ka lono o ka hana karaima i manaoia e hana?"

            "Ae.  Ia manawa pu no hoi ua ha'i aku o Gerenigofa ia Kaunawahine Alamazofa i ke komo ana o kekahi kiu iloko o ka lakou halawai."

            "Alaila ua loaa pono oe?"

            "Ae; a ua paio aku wau i hemo ai wau iwaho me ka lilo ole aku o ko'u ola, a e ike no oukou i ka oiaio o keia ina oukou e kukai aku ana me Gerenigofa."

            "He mea paakiki ka hoouna ana aku i na kukai ana ma keia aina o ka hookaumaha nui."

            "Pela io no.  Well, o keia kaunawahine, e makemake wale nei no no kona pono, a i hoomaopopo loa hoi o ka'u e makemake nei e huli oia na mea oiaio e pili ana i ka pono o keia opiowahine a'u e hoomahuka nei - oiai ua ike pono o Gerenigofa i ko'u helehelena a ua ha'i aku hoi ia Kaunawahine Alamazofa i ka'u hana - oia hoi ke kokua ana kau i keia opiowahine, ua hooholo iho la ua kaunawahine la e hana i na hana apau e ko ai kona lili makaewaewa maluna o keia wahine ina no ia he mea e poino ai kona pono ame ka pono o na Nihiliti."

            "Pehea i maopopo ai ia oe keia mau mea au e ha'i mai nei ia makou?"

            "Ua lohe wau i ka laua kukai kamailio ana."

            "Me wai?  Me kona wahine lawelawe anei?"

            "Aole; aka aole e hiki ia'u ke ha'i aku i ka inoa o kona hoa i kukai ai ma keia oiai oia ka'u meahuna.  E ha'i aku no nae wau ia oukou ua hoike ae o Kaunawahine Alamazofa e kumakaia no ia i kana mau hana huna a aole wale hoi oia aka o na mea huna apau a Gerenigofa e pulama nei."

            Maanei i huli aku ai o Wete a nana aku la i ko Gerenigofa hoaloha, me he mea la e hoike aku ana o keia mau olelo ana i hoopuka aku ai, ua pili ia i kona hoaloha.

            "Alaila, ina he oiaio kau mau mea i ha'i mai nei, he kipi oiaio ke kaunawahine, ma kana hana."

            "Ke manao nei wau ua oi aku ke ino mamua o ia."

            "No keaha hoi?"
            "Ua hoike mua aku nei wau ia oukou ua holo mai oia no keia kulanakauhale a kii aku i ka palapala kauoha no ka pepehi ana i keia opiowahine?"

            "Pela io no, aka pehea oia i hana ai?"

            "Ua haalele like aku maua ia Parisa maluna o ke kaaahi hookahi.  Ma Belina i hana aku ai wau i ka hana e haule ai oia mai ke kaaahi aku, a ua haule io no oia; eia nae ua hiki mai la oia i St. Petersburg nei mahope koke iho o ko'u hiki ana mai ianei, a ma keia me he mea la ua hai aku oia i kekahi kaaahi okoa no ka lawe ana mai iaia ianei.  Ua hele koke aku la wau no ka halealii me Generala Gerisa, me ka manao e hoike aku i ka Gerenigofa hana e hana nei, aka mamua o ka hiki ana ia maua ke hui aku me ka Emepera, ua puka mai la ua kaunawahine nei mai kona hui launa ana me ka Emepera, hoike mai la i kekahi pepa ia maua, a pane mai la he palapala kauoha ia no ke oki ana i ke poo o kona enemi, oia no hoi keia opiowahine."

            "Ke manao nei oe ua loaa mai keia palapala i ua kaunawahine la mamuli o kona kumakaia ana i keia ahahui?"

            "Me ka hoopaapaa ole ua kumakaia aku oia ia Gerenigofa."

            "O ka pau anei keia o kau mau mea e hoike mai ai ia makou?"

            "Ae."

            Maanei i haawi hoailona hou ae ai ka hoaloha o Gerenigofa ia Wete, a huli aku la oia a pane aku la i kona mau hoaloha:

            "E o'u mau hoaloha, ua ike no oukou aole wau he kanaka e hilinai awiwi ana maluna o kekahi moolelo e hahai ia ana; aka e olelo ae wau ua komo mai ka iini iloko o ko'u puuwai no na mea a keia kanaka i ha'i ae nei ia kakou.  Ma kana mau mea i ha'i mai nei ia kakou ua hiki ia kakou ke ike iho ua ike oia i ka hapanui o na mea e pili ana ia kakou ame na mea e pili ana ia Kaunawahine Alamazofa."

            "Ua pololei kau mau mea apau i ha'i mai la." wahi a kona mau hoa Nihiliti i puana like ae ai.

            "Ua ike no hoi wau," i hoomau aku ai ua kanaka la, "i ka inaina o Kaunawahine Alamazofa ia Vera."

            "Pela anei?"

            "Pela.  He wahine hoopalau oia na Ivana Horawiki, a na Ivana i haalele ia Kaunawahine Alamazofa no kona aloha i keia wahine."

            "Aole pela ka oiaio," i panai koke aku ai o Vera, "aole i haalele aku o Ivana i ke kaunawahine no kona aloha ia'u, aka mamuli o kona ike ana aole ia he wahine maikai a oiaio hoi ma kana mau hana, a aole hoi maua i lilo i mau hoaloha mamua aku a hiki wale mahope mai o ko Ivana haalele ana i ke kaunawahine."

            "Me ka nana ole ae i na kumu, he hookahi a'u mea i ike oia hoi aia kona inaina maluna ou," wahi hou a keia hoaloha o Gerenigofa, "a he inaina hoi a'u i ike ai aole ona lua e like ai o ka inaina wale no o ka holoholona hihiu.  A ke manaoio nei wau, e kuu mau hoaloha, ua hiki io no ia Kaunawahine Alamazofa ke hana aku i ka hana a keia kanaka i hoopii mai nei imua o kakou."

            "Ke hiki ole nei ia'u ke hoole aku i ka oiaio o kau mau mea i ha'i mai nei," wahi a kekahi o na Nihiliti i puana ae ai.

            "Owau no hoi kekahi."  "Pela no hoi me a'u," i puana ae ai na Nihiliti.

            "Ina he oiaio keia," wahi a kekahi o na Nihiliti i puana ae ai, mahope no nae o kona noonoo akahele ana no kekahi manawa, "alaila o keia hoahanau o kakou i paa aku nei mamuli o ka ianei (Wete) kauoha ia kakou, oia kekahi o na hoahanau hou o kakou."

            "Aole pela," i pane aku ai ko Gerenigofa hoaloha, "ua like no

 

            HE POINO ke hoohemahema wale i ke anu.  O ka ma'i numonia kekahi o na ma'i poino loa a he ma'i hoi e make ai.  Ua loaa mai keia ma'i mamuli o ke anu.  O ka laau kunu a Chamberlain oia ka mea nana e hoola koke i ke kunu ame ke anu a kaupale aku hoi i ka loaa ana mai i ka numonia.  Ma ke ano oiaio ua hanaia keia laau no ia ma'i a ua lilo mai keia laau i mea kaulana mamuli o ke ola iloko ona i ikeia iloko o keia poepoe honua kahi hoi i noho hoonaauaoia.  O keia ka laau e hui koke ana me na haawina e loaa ai ke kanaka i ka numonia a paio aku me lakou a kipaku aku mai ke kino aku o ke kanaka.  E hoohemahema ana anei oe i kou loaa anu oia no nae eia he laau nana e hoopakele ae ia oe?  Ke kuaiia nei ma na halekuai apau.  BENSON, SMITH & CO., LTD., na Agena ma Hawaii nei.

 

HOOLAHA HOOKO MORAKI.

 

HOOLAHA MANAO PANIKU A KUAI A KA MEA PAA MORAKI.

 

ANTONIO P. C. R. SPINOLA.

 

            Ke haawiia aku nei ka hoolaha ma ka pono a ma ka mana o ke kuai i paa iloko o kekahi moraki i hanaia e Antonio P. C. R. Spinola, no Honolulu, Oahu, Teritore o Hawaii, ia THE PORTUGUESE MUTUAL BENEFIT SOCIETY OF HAWAII, he hui i hoohuiia a e ku nei malalo o na kanawai o Hawaii, i hanaia hoi i ka la 4 o Iune, 1901, a i kakaukopeia ma ke Keena Hoona Aina iloko o Honolulu i oleloia, iloko o ka buke 226, aoao 38, 39 ame 40, a o ka mana o ke kuai iloko o kekahi moraki i hanaia e Antonio P. C. R. Spinola i oleloia i ka The Portuguese Mutual Benefit Society of Hawaii, he hui i olelo mua ia ae nei, i hanaia i ka la 25 o Novemaba, 1903, a i kakau kope ia iloko o ke Keena Hoona Aina i oleloia iloko o ka Buke Helu 251, aoao 328, a ka aoao 331, o ka mea paa moraki i oleloia, ka The Portuguese Mutual Benefit Society of Hawaii, ke manao nei e paniku i na moraki pakahi i oleloia no na kumu i uha'iia i hoikeia iloko nei, oia hoi e like me ka ka moraki mua i oleloia, o ka uku ole ia o ke kumupaa ame ka ukupanee i ka manawa e uku ai, a e like me ko ka moraki elua i oleloia ka uku ole ia o ka ukupanee i ka manawa e uku ai.

            Ke haawi pu ia aku nei no hoi ka hoolaha o ka waiwai i hoopaaia iloko o na moraki i oleloia a e hoakakaia nei malalo iho nei, (o na moraki a elua aia maluna o ka waiwai hookahi) e kuaiia aku ana ma ke kudala akea ma na keena kudala o James F. Morgan, Alanui Kaahumanu, Honolulu, i olelo mua ia ae nei, ma ka Poaono, ka la 12 o Novemaba, A. D. 1904, ma ka hora 12 awakea o ka la i oleloia.

            O ka waiwai e kuaiia aku ai i hoakakaia maluna ae nei, oia keia malalo iho nei:  O kela apana a mahele o ka aina e waiho la ma Kamakela i Alanui Liliha, nona ke alo e huli ana i ke alanui Vineyard, iloko o Honolulu i oleloia, o ka hapa o ka aina i hoakakaia iloko o ka Palapala Sila Nui Helu 1985, L. C. A. Helu 6245, Apana 1, a i hoakaka pono loa ia e like me ia malalo iho:

            E hoomaka ana ma ke kihi komohana o keia apana ma ke anahuina o ke alanui o iwakalua-kumamalima kapuai akea a holo;

            (1)  Akau 53 deg. 30 min. Hik. oiaio 102 kapuai holo ma ke alanui;

            (2)  Hema 36 deg. 10 min. Hik. oiaio 75 kapuai ma Koiuiu;

            (3)  Hema 53 deg. 50 min. Kom. oiaio 102 kapuai ma ka apana 2; a malaila aku

            (4)  Akau 36 deg. 10 min. Kom. oiaio 75 kapuai holo ma ke alanui a hiki i kahi i hoomaka ai, a oia no hoi ka aina i hooliloia ia Antonio P. C. R. Spinola i oleloia ma ka palapala kuai o Elizabeth K. Nahaolelua ame Kia Nahaolelua, kana kane mare, i hanaia i Iune 27, 1891, a i kakau kope ia iloko o ke Keena Hoona Aina i oleloia, iloko o ka Buke Helu 141, aoao 196, e hookoe ana, mai ua aina nei i oleloia i hooliloia i ka mea moraki mai i oleloia, a i hoakakaia hoi maluna ae nei, ma o na helu ame na palena he hapa o ka aina nona kailiaina o 1597 1/2 kapuai kuea i hooliloia e ka mea moraki i oleloia i ke Kuhina Kalaiaina ma ka palapala kuai i hanaia i Mei 13, 1900, a i kakau kope ia iloko o ke Keena Hoona Aina i oleloia, iloko o ka Buke 209, aoao 385, a iloko i oleloia kahi i hoakaka piha loa ia ai.

            Ma ke dala kuike ka makemake a ma ke dala gula Amerika no hoi a ma ka aoao o ka mea kuai mai na lilo palapala apau.

            No na mea aku i koe e ike ae ia Antonio Perry, Loio no ka Mea Paa Moraki, Lumi 611, Stangenwald Building (Hale), Honolulu, i olelo mua ia ae nei, a i ole e ike ae ia James F. Morgan, Lunakudala i olelo mua ia ae nei.

            Hanaia ma Honolulu, Oahu, Okatoba 13, 1904.

THE PORTUGUESE MUTUAL BENEFIT SOCIETY OF HAWAII,

Mea Paa Moraki.

Ma o kona Loio.

ANTONIO PERRY.

3037 - Oct. 14, 21, 28 - Nov. 4, 11.

 

HOOLAHA AINA AUPUNI.

 

HOOLAHA AINA AUPUNI.

 

            Ma ka Poaono, Novemaba 5, 1904, ma ka hora 12 awakea, ma ke alo iho o ka Hale Hookolokolo, Honolulu, e kuaiia aku ana ma ke kudala akea keia mau Aina Aupuni e hoakakaia nei malaio iho nei:

Apana 1, he hapa o ka aina o Kaipapau, Koolauloa, Oahu, nona hoi ka iliaina o 282 eka, oi iki a emi iki mai paha, paupu me kekahi wai, ka hahai holoholona ana ame ka pono e mahi ma ke koena aku o ka aina i hoikeia ae nei maluna.  Kumukuai haahaa, $1000.

            Apana 2, he hapa o ka aina o Puako, S. Kohala, Hawaii, nona ka iliaina o 3.91 eka, oi iki a emi iki mai paha.  Kumukuai haahaa, $196.

            Ma ke dala gula o Amerika ka makemake, kuike.

            No ke kii aina ame na mea aku i koe e ike ae ma ke Keena o na Aina Aupuni, Hale Hookolokolo, Honolulu.

JAS. W. PRATT,

Komikina o na Aina Aupuni.

Honolulu, H. T., Oct. 4, 1904.

3036 - Oct. 7, 14, 21, 28. - Nov. 4.

 

HOOLAHA MA KE KAUOHA

 

KEIKI NALOWALE.

 

            Mai Niolopa, Honolulu, Oahu, Sept. 28, 1904, ua hele auwana aku o Simeona Kane he keiki no 12 makahiki a oi aku.  He malihini oia no Kalaoa, Papaikou, Hilo, Hawaii mai.  O ka mea e loaa ana e oluolu e hoike mai ia J. S. Kalakiela ma "Kalakaua Hale" Honolulu.

Honolulu, Oct. 21, 1904.

3038 - Oct. 21, 28. - Nov. 7.

 

HOOLAHA PONO WAI.

 

IMUA O KE KOMISINA O NA ALANUI LIILII AME NA PONO WAI, MOKUPUNI O OAHU, E HOOHUI ANA I NA APANA LUNAMAKAAINANA EHA AME ELIMA.  HOOLAHA HOOPONOPONO WAI.

 

            Ma ka pono o ka mana i hookauia mai maluna o'u ma ke ano he Komisina o na Alanui Liilii ame na Pono Wai no ka Mokupuni o Oahu nei, e huipu ana na Apana Koho Lunamakaainana Eha ame Elima, Teritore o Hawaii.  Ma keia ke haawi aku nei wau i ka hoolaha ma ka la 21 o Novemaba, A. D. 1904, ma ke Keena Hookolokolo o Lunakanawai J. T. De Bolt iloko o ka Halehookolokolo ma Honolulu, Mokupuni o Oahu, e hoolohe ana wau a e hooholo ana hoi i ka hoopaapaa pono wai i hoomakaia e Harriet E. Wight, mea hoopii, vs. (ku-e) i ka The Dowsett Company, Limited, Ah Chong, Ah Sam, Chun Loke, Mrs. Kaluka Elekula, John Hookano Manuia ame Geo. Kawahalama Manuia, na poe ma ka aoao pale no ka hooholo ana i ka mea i kuleana i na pono wai apau loa e kahe nei a i ole i loaa ka pono e kahe iloko o kekahi auahawai kahiko a auwai i ikeia ma ka inoa "Auwai o Kukuiholiilii" i loaa hoi kona wai e kahe ana mai ke Kahawai o Nuuanu, a oia kahawai hoi i oleloia ke holo nei ma ke Awawa o Nuaanu, Mokupuni o Oahu, ma ka aoao hikina o ua awawa la, a no ka hooholo ana no hoi i ka mahele kaulike ana o na wai i oleloia, a no ka hooponopono ana i na loina e loaa mai ai ua pono wai la i oleloia ame ka noho mana ana i kona wai e kahe ana no a ma ka aoao o na mea kuleana ia mea.

            Ke haawi hou aku nei no hoi wau i ka hoolaha i kela ame keia mea kuleana aina, mea e noho ana iluna o ka aina, a i ole i kekahi mea okoa i loaa ka pono iloko o keia hoopaapaa i hoikeia ae nei e hele ae ma ka manawa ame kahi i olelo mua ia ae nei no ka hooiaio ana i ko lakou mau pono i na wai o ua auwahawai kahiko la i hoikemua ia ae nei, a o na mea e ae i pili iloko o keia ninau hoopaapaa wai i oleloia e like me ia i olelo mua ia ae nei, a i ole o na pono o ia ano hooponoponoia aku ana me ka hiki ole ae o kekahi mea iloko o ua aha la, e hooleia no lakou a e papaia hoi no ka wa mau loa mai ke koi ana a hoohalahala ana iloko o keia hooponopono i oleloia.

            Haawiia mai maloko o ko'u lima i keia la 12 o Okatoba A. D. 1904.

EMMA M. NAKUINA,

Komisina o na Alanui Liilii ame na Pono Wai iloko a no ka Mokupuni o Oahu, e hoohui ana i na Apana Koho Lunamakaainana Eha ame Elima.

3037 - Oct. 14, 21, 28. - Nov. 7.

 

HOOLAHA A KA LUNAHOOPONOPONO WAIWAI.

 

WAIWAI O AMARA.

 

            No ka mea ua hookohuia ka mea nona ka inoa malalo iho, i Lunahooponopono i ka waiwai o Kekie Amara w o Waialua, mokupuni o Oahu, i make, nolaila ke hoike ia aku nei ka lono i ka poe apau ina he koi ka lakou, e waiho mai ia mau mea i ka mea nona ka inoa malalo iho, ma kona keena ma Aliiolani Hale, Honolulu, mokupuni o Oahu, iloko o na mahina eono mai keia la aku, o hoole loa ia auanei.

            A o ka poe i aie i ka mea i make, ke kauoha ia aku nei lakou e hookaa koke mai i ka mea nona ka inoa malalo iho, ma Aliiolani Hale i hoike mua ia ae la.

            Kakauia i keia la 24 o Sepatemaba, 1904.

HENRY SMITH,

Lunahooponopono Waiwai i hoikeia ae la.

3035 - Sept. 30 - Oct. 7, 14, 21, 28.

 

HOOLAHA I NA MOHO NO KE KOHO ANA I KA AHAOLELO.

 

            Ma keia ke haawiia aku nei ka hoolaha, oiai ke koiia nei ma ke kanawai o na moho no ke koho ana i ka ahaolelo, o ka Mokupuni o Oahu, e waiho ae i ko lakou mau palapala i waeia ai i moho me ke Kakauolelo o ka Teritore aole e emi iho malalo o Umi la mamua o ka la Koho Nui, nolaila he mea pono no o na palapala wae moho i oleloia e waiho ae ma keia keena aole e haule aku mahope o ka hora Eha o ka auwina la o ka Poaono, Okatoba 29 1904.

            I hiki ai ke kupono no ke koho ana ma ke ano Senatoa o ua moho la i kane ia a makaainana o na Mokuaina Huiia, i hiki aku kona mau makahiki i ke kanakolu; i noho hoi ma ko Hawaii Paeaina aole i emi iho malalo o ekolu makahiki a i kupono hoi no ke koho ana i na Senatoa iloko o ka Apana ona i kohoia ai.

            I hiki ai ke kupono no ke koho ana ma ke ano he hoa o ka Hale o na Lunamakaainana, a ua mea la i ka manawa no i kohola ai, e loaa iaia na makahiki he iwakalua-kumamalima; i kane hoi a kupa o na Mokuaina Huiia; i noho hoi ma ko Hawaii Paeaina aole i emi iho malalo o ekolu makahiki; a i kupono hoi e koho no na lunamakaainana ma ka Apana ona i kohoia mai ai.

            O na palapala waemoho apau e hoouna pu ia mai me na dala hoopaa he iwakalua-kumamalima, a e kakauinoa ia hoi e na poe kupono i ke koho aole e emi iho malalo o iwakalua-kumamalima mai ka Apana nona ua koho la e malamaia aku ana.

A. L. C. ATKINSON,

Kakauolelo o Hawaii.

Hale Aupuni, Honolulu, Sepatemaba, 29, 1904.

3035 - Sept. 30 - Oct. 7, 14, 21.

 

HOOLAHA KUMAU

 

Kakela me Kuke

[KAUPALENAIA]

 

Poe Kalepa ma ke Komisina

A HE

POE LAWELAWE KOPAA

 

Poe Agena no na Ma hiko Lehulehu.

 

Hui Alahao ame Aina o Oahu

MANAWA HOLO

Oct. 6, 1904.

MAI HONOLULU AKU

No Waianae, Waialua, Kahuku ame na wahi hoolulu ma ke alahae - *9:15 a. m., *3:20 p. m.

No Pearl City, Ewa Mill, ame na wahi hoolulu ma ke alahao - +7:30 a. m., *9:15 a. m., *11:05 a. m., *2:15 p. m., *3:20 p. m., *5:15 p. m., ++9:30 p. m., +11:15 p. m.

 

MAI WAHO MAI.

Ku i Honolulu mai Kahuku, Waialua ame Waianae mai *8:36 a. m., *5:31 p. m.

Ku i Honolulu mai Ewa Mill ame Pearl City mai - +7:46 a. m., *8:36 a. m., 10:38 a. m., *1:40 p. m., *4:31 p. m., *5:31 p. m., *7:30 p. m.

 

*Kela ame keia la.

++Sabati wale no.

+Koe ke Sabati.

 

G. P. DENISON,

Lunahoohana.

F. C. SMITH,

G. P. & T. A

 

Na Papale I-e Nunui.

 

O na Lede ame na Keonimana o k@ ano hou e loaa no ma kahi o

FUKURODA

Helu 28-32      Alanui Hotele

 

            $1.00 i ka pule e hoahu ai, iloko o @ pule e loaa ana i ka mea hoahu he $150.00 ke hoahu iloko o ka

Fidelity Funding Co

O KAPALAKIKO.

            Ua hoihoi aku keia hui i ka makahiki i hala, no hookahi makahiki i ka poe i hoahu he $275,000.00 a oi.  @keneta uku-panee i ka poe apau i hoahu mai i ka lakou mau dala malalo @ o elua makahiki.

            E loaa no na mea apau ke ninau ae ia

R. D. HIGHTOWER,

Agena ma Hawaii, Teritori nei.

41 ame 52 Young Block, Honolulu.

 

HUI HOOLEWA HONOLULU.

            Ke hooiaio nei keia hui i k@ hana kokua i kona mau lala.  I k@a wa ua oi mamua o 1300 lala, a ke pi mau nei i kela ame keia la.

J. H. THOWNSEND. K@

 

Ina He Makemake

-KOU I KA-

Lauoho Maikai

E HELUHELU I KEIA.

Malia paha ke pau nei kou lauoho ka helelei, a koe kakaikahi.  E kaa i ka laau mamua o ka pau loa ana i ka helelei, e hana i laau e ulu ho@ ai.  O ka laau

"Laau Hooulu Lauoho a Ayer's" ka mea e ulu hou ai.  He nani ka lauoho ke ulu mai, a he nui hoi.  Ina he nawali ka ulu ana o kou la@oho, o ka

"Laau Hooulu Lauoho a Ayer's" ka mea e manoanoa ai ka ulu ana a ke loaa i keia laau pau loa ka @lelei ana.  I na he piha kou poo ke Kepia, o ka

"Laau Hooulu Lauoho a Ayer's" ka laau e pau ai a maemae kou poo Ke loaa i keia laau e hoi hou ana ka ulu ana o kou lauoho a like me k@ kou wa bebe.

Hoomakaukau la e Kauka J. C. Ayer & Company, Lowell, Mass., U. S. A.

E loaa no keia mau Huaale ma ka Hale Kuai Laau o Hollister, alan@ Papu.

 

            Ma ka la 29 o kela mahina e pau ai ka manawa no na moho o ka Mokupuni o Oahu nei e nookomo ae ai i ko lakou mau palapala holo moho.