Ka Nupepa Kuokoa, Volume XLII, Number 47, 18 November 1904 Edition 02 — Page 6
| This text was transcribed by: | Toni Ka'a'a |
| This work is dedicated to: | Makuahine, Esther Kalino (Kauaulalena) Campbell |
Ka Nupepa Kuokoa
KE KILOHANA POOKELA NO KA LAHUI HAWAII.
5 NUPEPA KUOKOA, POALIMA, NOVEMABA 18, 1904.
O ke Koko ka Hoike.
HE HOIKE OIAIO I LOAA MAI A I KAKOOIA E NA MEAHOU I LOAA KOKE IHO NEI.
O KEIA HOI KA HOIKE NANA I HOOIAIO MAI AIA KE OLA MAIKAI O NA WAHINE MA KA LOAA ANA O KE KOKO MAIKAI
I ka manawa e maikai ole ke koko o ia no ka manawa e inoino ai na lala apau o ke kino a hiki ole ia lakou ke hoohana aku i ka lakou mau hana pakahi i hookaawaleia ai. No na wahine apau ua hookaawaleia mai no he manawa no lakou a na mea mau a Ke Akua i hana mai ai i ola no lakou a e hoomaemaeia ai ko lakou koko, a e like me ka loihi o ka hana ana a keia mau mea maluna o ke kino wahine pela no hoi e mau ai ke kino wahine a i ole o ka loaa ana paha he wahi anu uuku maluna o ke kino wahine a i @le o ka loaa ana paha he wahi mea nana e hoinoino i kona noonoo, oia no kekahi mea nana e hookomo aku iaia iloko o na pilikia i ke kino a aia wale no a hiipakeleia ae oia mai keia mau haawina popilikia mai e loaa ai ka palekana iaia. O ka laau nana e hoola a hoopakele i na wahine mai na nawaliwali mau i pili i na wahine oia no ka laau nana i hoola ia Miss Mattie Griggs, e noho nei ma ke alanui Indiana, Helu 807, Lawrence, Kansas, a o keia hoi kana i hoike ae ai:
"Ma ke kau hooilo o 1902, mamuli o kekahi mau kumu maopopo ole, ua loaa mai la wau i kekahi haawina maopopo ole ia'u a'u hoi i ike iho ai mahope mai he haawina maa mau keia i na wahine, a no eha mahina ko'u waiho ana iloko o ka nawaliwali i hiki ole ia'u ke pili iluna o ke alapii me ka loaa ole mai o kekahi kokua ia'u. Ua molohai iho la ko'u helehelena a ehaeha hoi a nalulu ma ko'u poo. No ekolu mahina i noho ai wau malalo o ka malama ana a ke kuka, eia nae aole loa i loaa mai he oluolu ia'u. Mahope mai ua ha'i mai la kekahi o ko'u mau hoaloha wahine ia'u i na ea e pili ana no ka laau Dr. Williams' Pink Pills for Pale People a keia wahine hoi i hoao ai iloko o kona ohana a nana i kona mai ia'u e hoao i keia mau huaale a iloko mai o ka mahina o Iune i loaa ai ke ola ia'u, a mai ia manawa mai a hiki i keia manawa ke noho nei wau me ke olakino maikai."
Ma na ma'i apau nana e hoomailo mau ana i ke olakino maikai o na kaikamahine opiopio, e like me ka anaemia a i ole nawaliwali paha i loaa mai mamuli o ka maikai ole o ke koko a e hoike mai ana hoi na hoailona mamuli o ka haikea o na helehelena, hoihoi ole, haupuupa amena ano apau e pilikia ai ke olakino i loaa mai i ka manawa e loli ae ai ke au i ko ke kanaka ola ana, o ka laau Huaale Akala a Kauka Williams no ka Poe Haikea oia ka laau maikai loa no na wahine no lakou hoi ke olakina maikai e hilinai ana maluna o ke koko maikai. Ke kuaiia nei keia mau huaale ma na halekuai laau lapaau apau. E hoounaia aku no me ka auhau ole i kela ame keia mea e makemake mai ana he buke i kakauia maluna o ke kumuhana. "He Mau Olelo Maalahi Imua o na Wahina," [Wahine] e kuhikuhi ana i ke ano o ka malama ana o na opiowahine i ko lakou mau ola. E hoounaia aku no ua buke la me ka paa i ka wa-hila ame ko'u inoa ponoi ke ike ae ia Dr. Williams Medicine Company, Schenectady, N. Y.
E Aho ka Lohi ana.
Ke olelo nei ke kanaka naauao aia no he manawa e hiki mai ana iloko o ka noho oia ana o ke kanaka i ka manawa e "maka'u ai lakou ia mea o ka mea kiekie; i ka manawa e haulehia ai o ka iini makemake a lilo hoi ka uhini i puolo kaumaha." Iloko o keia mau la ua kahea aku makou i keia, he ma'i haalulu; aka o keia no ka mea kamaaina kahiko mau, a i laweia mai hoi ma ke alahele like loa i kaulana me Solomona, ke kanaka pookela o ka naauao. Ua opaha pu na aa loo a o ka ikaika ame ke ahi iloko o ke kanaka ua make aku ia mailoko aku ona. O keia ka hoopa'i no ke ku-e i ke kanawai kumu a no ka hewa uhauha wale a oi aku mawaho o ka pa o ka maikai.--ame na "hana oi wale aku" o na ano like ole.
Me ka hapanui ke manao nei lakou o keia mea aole ia he kanawai kumu, aka, ua pololei no paha lakou.
Iloko no o na kanaka elemakula [elemakule], i ka manawa e hooliloia ae ai keia mea iloko o ke kino onawaliwali, he mea oiaio e mau ana no ka mana ikaika e like me ka haulehia ole ana o kekahi paahana kuloko o kakou. E hooki koke ia no ka uhini mai ka lilo ana aku i ukana kaumaha a e hooholoia hoi na akua lapu iloko o ka ea mama me ia poe e kalele nei maluna o keia mea hoomaemae kaulana a hoihoi ikaika hou no hoi. O ka
WAMPOLES PREPARATIONS
Ma ke ano he laau hooikaika kino, ua oi aku kona kelakela mamua o kekahi an e ae. He laau e hoomaikai koke ana i na paahana hoowali kuloko, he hoomaemae i ka wai ula o ke koko a he ai a hooikaika no hoi i na aa lolo ame na wahi e ae a pau o ke kino; he kiolaia na mea ino iwaho ma ke Ake Mama, ka Naau, ka Puupaa ame ka Ili--o keia na ipuka hoopuka e-ha--a huli hoi mai ke ola kino maikai. He momona keia laau e like me ka hone meli i awaiaulu pu ia me na mea hooulu a hoola o ka Pure Cod Liver Oil i laweia mai e makou mai ke akepaa o ka i'a Cod makamaka hou mai a pa'i, pa'ipa'iia me ke Compound Syrup o ka Hypophophites ame ka Extracts o ka Malt ame ka Wild Cherry. Aole keia he laau i hookuleanaia e like me ka formula e pa'iia nei maluna o na omole: Aole oe e pono e hookuihe i ke kuai ana a hooiaio hoi maluna ona. He loaa ka oluolu ma ka oolopu mua.
"Aole he mau hoohoka ana." Kuai ia ma na hale kuai laau apau maanei, a pune ke ao nei.
KO KANIAHIKU MANAO HOPE.
HE HOOPAU NEI O KANIAHIKU I KA PAIO PU ME OE E ALOHA AINA.
Ua manao o Kaniahiku ua hiki mai ka hopena o kona paio ana me oe e "Aloha Aina," oiai ua piha wale na kolamu waiwai o ke "Kuokoa" i na manao pane waiwai a ua ike ia kou opa pu ia i ka paia, a nolaila, o ka'u e hoike aku ai i keia manawa, oia ke a'o ana aku i ka lahui, e nana mai mawaena ou e Aloha Aina ame na hoike pololei a Kaniahiku, i hiki i ka lahui ke hoomaopopo, owai o kaua ka i hoike i na mea oiaio, a i ku ai ka'u olelo ia oe e Aloha Aina, he alakai hewa a lalau kau i ka lahui a kaua iloko o keia mau mahina i hala iho la, a ina e hoomau oe ia alahele e like me ko kawa i hala iho la mahope o ka paa ana o ka maka i na dala bila alualu a Demokarata ma, alaila e loaa ana ka hopena lapuwale ia oe e like me ka haawina make i loaa i na pepa i nalo iloko o ka opu o ka honua.
Eia kau hoopunipuni mua ma ka la 17 o Sept. 1904, "Ua ike ia e loaa ana ia Paka he 253 balota Peresidena ma na mokuaina malalo iho, e oi ana he 14 balota mamua o Rusawela a penei e ike ia ai.
(Na Mokuaina o ka Hema, 151)
Nu Ioka, 39
Nu Ieresi, 12
Merelana, 8
Virgina Komohana, 7
Konetikuta, 7
Delaware, 7
Iniana, 15
Colorado, 5
Montana, 3
Newada, 8
Aole wale keia o na mokuaina e lilo ana no Paka, aka o Ilinoi ame Wisconsin a me kekahi mau mokuaina okoa aku." E Aloha Aina hapuku wale ua ike no oe aole loa he oiaio o kau i hoike ae ai ma ia la i puka ai o kau nupepa, aka, ua ae aku oe e hoolilo ia oe iho i mea lawe a hoopuka i na olelo wahahee no ka mea, o na mokuaina au i helu ai no Paka, no Rusawela wale no ia i ka la 8 iho nei. Nolaila o kau i hoolaha ai he alakai hewa ia.
Pehea hou aku. Hoolaha pinepine ana oe i ka puka o ke Demokarata ma Hawaii nei, a ke nana aku, me he mea la ua pau loa o Hawaii i ke Demokarata, aka i ka helu ia ana o na balota ma ka la 8 iho nei, eia ka aole he wahi Demokarata hookahi i kokoke mai i ka hope waa o ka Repubalika. Nolaila hoopunipuni elua ia au, a he nui wale aku.
E auhea oe e ka Lahui Hawaii, ina pela iho la ke ano o ka nupepa Aloha Aina e walaau ai ma ke ano e a'o mai ia kakou, a maopopo kona ano hoopunipuni, pehea, he nupepa no keia e hiki ke hilina'i ia? E pane mai ana oukou?
E "Kuokoa," mai pane au i ka manao o Aloha Aina o ka la 22 o Okatoba, aka, ike au ua opa pu ia a e lalau hele ana na manao kukulu ana oia la, nolaila, hoopau ole au i ko'u manawa ma ka pane ana iaia, aka, hoi, hiki ole ia'u ke noho malie me ka hoike ole aku imua o ke akea, i na hana alakai hewa a Aloha Aina i ka lahui i keia mau mahina aku nei, a oiai ua ahuwale kona ano i keia manawa, he manao ko'u e akahele mai ana ka lahui i ka lawe i kana mau a'o ana. E like no me ka'u i olelo aku ai iaia, "aole loa e puka ana kana Elele, a ke hiki mai ka la koho o PUEHU ana kona ina," pela wau i ike iho ai i kahi mele i haku ia no e Aloha Aina penei, ma ka pepa o ka la 5 o Novemaba 4.
P--Piha hauoli na mokupuni.
U--Ua lanakila o Kalanianaole.
E--Eia mai ka Elele Lahui.
H--Hanohano ai oe e Hawaii.
U--Ua kohu pono ma ia kulana.
Aole paha he mea i koe, o ka haawi aku i na mahalo kiekie i ko ke Akua alakai ana i ka lahui Hawaii e ike i ka pono ame ka hewa, a i ka ike i ka pono ame ka hewa, a i ka ike ana pela, ua kohi i ka pono o ia ka aoao Repubalika, a i ka hoomaopopo ana i ka hewa, ua kiola i ka aoao a Alona Aina Aihue Aina. Hele pela e ke Demokarata, e like me kou ike ia he hookae ili ma na Mokuaina o ka Hema, pela no i hookae ai ka lahui Hawaii ia oe, a ma na kau koho apau e like mau la ana o PUEHU mau ana kou inoa, no ka mea, "ua palapala ia ma Kaniahiku Mok. 11 pauku 1."
Hu nohoi ka aka ia oe e Aloha Aina. Kahe ka hou o ka lae i ka hooikaika ia Puehu ame Hawela ma, a kahe ka hu'a o ka waha ma ka hoopii ana ia Nokie, Umauma ame Nokookoo me ka manao he pono keia, eia ka, ke ahu mai nei "ka hoka i kapakai." Alona no. Heaha no la kau o ka pipili ana me Demokarata ma, ua ike no e Hoka ana anee wale aku no oe. Aloha no! Aloha no!! Aloha no!!!
KANIAHIKU.
Alanui Hotele.
HEIHEI AU.
O ka heihei au oia kekahi o na hana lealea o keia mau la e nee nei, a ua hoomakaia ae ma ka auwina la o ka Poaono i hala iho la. Ma ka auwina la o ka la apopo e malama hou ia ana keia no heihei, a o Komokeo, ke kae'ae'a Hawaii ma ka au ana oia kekahi e komo pu ana ma keia heihei. He hookahi haneri i-a ka loihi o ka pahu e heihei ai, a o keia hoi ka heihei no ka mea e lilo ana iaia ka inoa moho heihei au o Hawaii nei.
O Kimokeo ka mea nana i hoohaule ia Renear ma ka heihei au i ka makahiki 1897, a mai ia manawa mai i upu loa ai o Renear e heihei hou a kaili ae i ka hanohano mai ia Kimokeo ae. He nui ka poe e manao nei o keia kekahi o na heihei a akelekele ai ua keiki Hawaii la, a ke upu mau ia aku nei o ka hoea koke mai o keia heihei au.
E hoomaka ana ka heihei ma ka hora 4 o ia auwaina la ma ka uwapo o Bihopa, makai ae o ka Halehana Hao. He kiaha kala ka makana o keia heihei, a o ka mea e lilo ana iaia ka lanakila he makana hanohano loa keia ana e hiipoi ai.
Ka Hookiekieia ana o Wm. Kamana.
(Mai ka aoao 1 mai.)
nai mai ai o Kamana i na hoomaikai i kauia aku maluna ona.
O keia malalo iho nei ka Palapala Hoomaikai a na hope lunapaahao ame ka poe no apau e noho ana ma Kawa. ame ka pane a ka Lunapaahao hou:
PALAPALA HOOMAIKAI.
E Mr. William Kamana, Lunapaahao Nui o ka Halepaahao o ka Panalaau o Hawaii nei, Aloha oe:
O makou o ka poe no lakou na inoa malalo nei, na luna ame na kiai hoi o ka Halepaahao o ka Panalaau, me ka hauoli a me ke ohohia nui makou e haawi aku nei i na hoomaikai palena ole no kou hookiekie ia ana ae a hookohuia i Lunapaahao Nui no ka Halepaahao o ka Panalaau. He mea ano nui loa keia o ka loaa ana o kekahi kulana hanohano kiekie i kekahi kanaka Hawaii oiaio iwaena o na oihana apau i haawiia i na kanaka o keia Panalaau.
Ke manaoio nei makou o kou lawelawe loihi ana i ka hana iloko o ka Oihana Makai iloko o ka Panalaau o Hawaii nei me ka hoopono ame ka hoomanawanui me kou hookiekie ia ana ae i na anuu like ole, e lilo ia i pulakaumaha a i kumu hoohalike hoi i mea e loaa ai ka pomaikai nui i na Hawaii olelo. O kou hookiekie ia ana ae ma keia oihana ano nui o ke Aupuni au hoi e paa nei me ka haaheo i keia la ua pili pono loa ia makana me kou ano hoopono, kou makaukau ame kou malama pono i ka hana. Oiai oe he lala no ka Oihana Makai no kekahi manawa loihi, a he Hope Lunapaahao Nui hoi no keia Halepaahao no umi-kumamakahi makahiki i hala ae nei, ua hooia mai oe ia oe iho he mea e haaheo ai kou lahui a no Hawaii nei.
Ke manaolana mau nei makou o kela launa hoaloha ana ame kela mau manao aloha pili paa i hookumuia iwaena o kakou o ka wa i hala, e hoomau ia aku ana me ka mawehe ole ia no ka wa mau loa. Oiai makou e hoopaa ana ia makou iho e lawelawe i na hana apau o ka Halepaahao malalo ou me ka malama pono, ke nonoi nui nei makou i ka Mea Mana Loa e hooloihi ia kou mau la a e noho loihi aku hoi oe i mau makahiki lehulehu me ka ohi ana i na pomaikai ame ka aahu ana i ka hanohano i hoolei ia mai maluna ou.
KA PANAI MA KO WILLIAM KAMANA AOAO.
Ke loaa ole nei ia'u na huaolelo kupono e ha'i aku ai ia oukou e lawa piha ai ko'u manao hoomaikai no keia hana a oukou i hoike mai nei imua o'u, a he mea oiaio o keia kekahi o na hana e hooikaika ana a e hoike ana i ko oukou mau manao maikai no'u. Ke haawi aku nei wau i ko'u hoomaikai nui ia oukou apau loa.
Ke hauoli loa nei wau i ka ike ana aku iwaena o kakou i keia la i na lala o ke Komite o ka Ahahui Opiopio Imipono o na Paahao. E na keonimana no na makahiki lehulehu i kaahope ae nei ua loaa ia'u ka hanohano o ka hookipa ana aku ia oukou maanei i kela ame keia la Sabati, a ke ha'i aku nei wau ia oukou, ua mahalo nui wau i ka oukou hana ma ka aoao o na kanaka e paa nei maloko nei. E ae mai ia'u e hoike aku ia oukou he hauoli nui no'u ka hookipa mau ana ia oukou maanei ma keia mua aku e like hoi me na la i hala aku, a e hana ana hoi wau i na hana apau ma ko'u aoao no ke kokua ana aku ia oukou ma ka oukou hana.
Ia oukou hoi e ko'u mau alii makai o Kawa nei, ke haawi aku nei wau i ko'u mahalo piha ia oukou no ka oukou palapala i heluheluia mai nei. Me ka loaa ole mai o ka oukou mau kokua he mea hiki ole i kekahi lunapaahao ke hooko pono i kana hana. Oiai ua hoike mai nei oukou me ka oluolu ma ka oukou palapala, ke manaolana ae nei wau e like me ka mau ana o kela nohona oluolu mawaena o kakou pela hoi ia e hoomauia aku ai ma keia hope aku, a e kokua mai ana hoi oukou ia'u i lilo ai na lawelawe ana ia Kawa nei i mea maalahi, hoakanaka a pololei hoi e like me ka mea hiki. E hana like kakou no ka malama ana i ka lawelawe hoopono a maikai a ko kakou Lunapaahao i hala, Makai Nui William Henry.
O oukou hoi, na kanaka e noho nei iloko o ka pilikia a i hoonohoia mai hoi maanei no ka manawa, ua like no oukou aia me oukou ko'u mau manao aloha. O ko'u noho hana ana maanei ka mea nana i a'o mai ia'u o ka noho pio ana oia kekahi o na nohona kaumaha, aka nae he hiki no ke hoomamaia ke ae oluolu mai oukou e noho me ka maluhia. E hoolohe oukou i ko oukou mau luna, hooko pono me ka mikiala i ka lakou mau kauoha, e malama a hoolohe i na rula i hanaia no ko oukou nohona a e ike no hoi oukou he mea hauoli loa ma ko'u aoao ame na luna ka hoomana ana aku ia oukou.
Ke haawi hou aku nei wau i ko'u hoomaikai palena ole ia oukou e na keonimana, na luna paahao ame na paahao, no ka oukou mau olelo hoolana manao a manao aloha hoi.
PAU I KE KAKAUINOAIA.
Ma ka Poalima o kela pule aku nei i pau ae ai na Palapala Hooiaio o ke koho ponoia ana iho nei o na moho i lanakila ma ka la 8 o Novemaba iho nei, i ke kakauinoaia e Makai Nui Henry. Aia iloko o ka huina o ia mau palapala na palapala o ka Elele Keikialii Kalanianaole ame na moho Senatoa o ka mokupuni o Oahu nei.
Aia maluna o keia mau palapala hooiaio ua kauia i ke kuni me na huaolelo moakaka a maikai i hiki ke hookomoia iloko o na laau kii a kau aku ma na paia i mea hoomanao no keia mua aku. O keia iho na olelo i p@a PALAPALA HOOIAIO O KE KOHOIA ANA.
Owau William Henry, Makai nui o ka Teritore o Hawaii, ke hoola nei o, ma ka la 8 o Novemaba, A. D. 1904, ua koho ponoiahe, no ka apana koho Lunamakaainana Eha (a i ole Elima) no ka manawa e pau ana ma ka la eono o Novemaba, A. D. 1905.
Hooiaioia me ko'u pulima i keia la 10 o Novemaba, A. D. 1904. (Kakauinoaia) WILLIAM HENRY,
Makai Nui o ka Teritore o Hawaii.
PAINA LA HANAU.
Ma ka po Poaono, November 5, ma Pauoa, Honolulu nei, ua malama ae ia or Mr. ame Mrs. Ben J. Wright, i ka hoomanao lahanau o ka laua kamalei Ellis Kaleiopuulani Wright. O keia ka piha ana o hookahi makahiki o ka hanu ana o ke kamalei i keia ao mauleule. Ua kipa ae na hoaloha o keia mau opio Hawaii a hookahi ka hauoli pu ana me na makua o ke kamalei. Malaila ae ke kalapu himeni o Pauoa, a na lakou i hoohauoli i ka poe i kipa ae malaila a hiki wale i na hora wanaao o ke Sabati.
Ma ke awakea Sabati ae i malama ia ae ai ka paina nui a o keia ka paina i hiki pau loa ae ai na hoaloha o na makua, a ua hoomauia a hiki wale i ka po ana o ia la. Malaila ae he mau kalapu himeni kahi i hoohauoli ai i ka poe i kipa ae malaila, a ua malamaia na hana hoohauoli a hiki wale i ke aumoe ana.
Ma ka aoao o ke Kilohana, ke haawi nei i na leo nonoi i ka Makua Lani i hooloihiia aku na la o ke kamalei Ellis Kaleiopuulani, a maluna hoi o na makua o ke kamalei na hoopomaikai he nui.
LUNAMAKAAINANA J. D. LEWIS.
(Mai ka aoao 1 mai.)
noho oia ma ke ano Lunahoomalu kuikawa.
I ka makahiki 1903, ua lilo i Luna nui no ka hooikaika balota no ka apana 1 no ke koho Kalana, mamuli no o ke kaa ana o ka hapanui o na mana koho ma ka aoao Home Rula ua hooikaika no a ua puka ae kekahi mau mono i wae ia.
Ke kau e mai nei no ka weli i ko Hilo poe i ka haole makaikiu a Kiaaina Carter i lawe mai nei ianei. Ua loaa mai he lono telegarapa ia R. H. Trent e ninau mai ana i ke ano o ua kaaka la i hiki i ko Hilo poe ke hoomaopopo, ina paha aia oia iwaena o lakou. Mai hopohopo oukou, eia no ua haole la i Honolulu nei.
He Panai Kupono
HE KAUA HOU, MA KAHI O KEKUA KAHIKO, MA HONOLULU NEI E HANAIA AI.
I kahi wa e loaa ana i keia kikala haneenee, ke ano naluea, hoihoi ole; kahi wa holo ae la ka eha ma ka iwikuamoo, e kokoke ana ma kahi o ka puupaa, a me na hookuina, a he ano maui la, aole i kana mai ka eha ke kulou. Makehewa ke kau ana i ka makeke, a anaanai ana i ke kua. Aohe loaa kahi o ka eha. No ka loaa ana he kua hou a ikaika, e oluolu e hoao e hahai i na kuhikuhi ana a keia makaainana o Honolulu nei:
Mr. A. J. Cahill o ke alanui Papu, ma keia kulanakauhale, kiai po kana hana ma kahi o Messrs. T. H. Davies & Co., Kaupalenaia, wahi ana: He sela moku au i ko'u mau la opio, a i kahi manawa, ua hana au no ka Hui Moku Piliaina. Mamuli o keia loaa ana o'u i ke kikala haneenee me ka ma'i ma ka puupaa ua haalele au i ko'u hele ana i ke kai.
No keia kumu ua hoao au i na ano laau apau, a o ka laau nana au i hoomama keia mau luuluu i loaa ia'u, oia no kela Huaale a Doans no ke Kikala Haneenee me ka Puupaa. Eia ke kuai ia nei ma ka halekua laau o Holisters. Ola loa ko'u ma'i, pau na ehaeha i loaa ia'u. Ina e manao ana kahi mea e like ia'u, e loaa no au ma kahi kuai lako moku, o Van Dorn's, alanui Papu.
E loaa no ia oe ka laau i ola ai o Mr. Cahill, me ka nana pono ana i ka inoa piha like me keia ma ka wa-hi:--
Doan's Backache Kidney Pills, ke kuai ia nei ma na hale haawi laau a pau ma ke 50 keneta o ke poho, 6 poho $2.50, a i ole e leta mai no i ka halekuai laau o Hollister Co., ma Honolulu, Agena no ka Paeaina Hawaii.
E HOOPAU I NA KANAWAI INO.
Ua hoike ae o Kiaaina Carter i kona manao maluna o ke kauoha a Makai Nui Henry e papa ana e panikuia na hana lealea ame na hale kuai liilii e hamama nei ma na Sabatai, penei:
"No ka hooko ana i na kanawai he mea pono no ia kakou ke hana i na hana apau i kulike me ke kanawai. He like ole no na manao o kekahi poe maluna o ka hooko ana i na kanawai. Ke makemake nei makou e hana me ka pololei. He mea pono no hoi i na makaainana ke ike mai aole o na luna aupuni ka poe na lakou e unuhi pololei i ke ano o na kanawai. Ina he mau kanawai maikai ole ko keia Teritore, alaila he mea pono e laweia ae ia mau kanawai ino mai na buke kanawai ae. Aole o makou makemake e komo aku iloko o ke kulana a makou e olelo ae ai he mea pono paha, e hookoia na kanawai a aole paha. Ke manao nei wau oia no ko Mr. Henry manao ma keia. O ko'u manao hookahi no ia. He nui ka poe i manao o ka Oihana Makai e pono e lilo ia i buro nana e hoike i na manao alakai a hoike e aku hoi i ka lehulehu i ka manawa e ha'iha'iia ai na kanawai a e ha'i pu aku no hoi ia lakou i na mea i kau kanawai ia. O ka ike ole ana i na kanawai aole ia he kumupale kupono. Aia no he hana na na makaainana e hana ai no ka hooko ana i na kanawi [kanawai]. Ma kekahi olelo ana ae, ua ike no lakou e like me ka ike ana o ka oihana makai i ka ha'iha'iia o na kanawai.
HE MAKEMAKE NA KAMAIKI E LAWE IAIA.--O ke kopaa maemae loa oia kekahi o na mea i hanaia ai ka laau Kumu a Chamberlain, a o ke aa laau i hoohanaia kona wai momona oia ka mea nana e hoola i ano like aku hoi me ko ka hu laau a na keiki e ai mau ai. He makemake na kamaiki e lawe i kela ano laau a aole hoi he mai poino e loaa mai ana mahope aku. He ola kana a he ola hikiwawe hoi. Ke kuaiia nei ma na halekuai laau lapaau apau. BENSON, SMITH & CO., LTD., na Agena ma ko Hawaii Paeaina.
HOOLAHA HOOKO MORAKI.
HOOLAHA MANAO PANIKU A KUAI A KA MEA PAA MORAKI.
THOMAS E., BERNICE P. AME ELLEN A. COOK.
Ma keia ke haawiia aku nei ka hoolaha i kulike ai me ka mana o ke kuai i paa iloko o kekahi moraki, i hanaia i Feberuari 28, 1902, e Thomas E. Cook, o Hilo, Mokupuni a Teritore o Hawaii, Ellen A. Cook ame Bernice P. Cook, o Honolulu, Mokupuni o Oahu, a Teritore i olelo mua ia ae nei, (o Kimi Cook wahine mare a Thomas E. Cook i olelo mua ia ae nei ua huipu iloko no ka hookuu ana i kona kuleana wahine mare), ka Poe Moraki, ia The Bank of Hawaii, Limited, he hui Hawaii, mea paa moraki, a o ua moraki la i oleloia ua kakaukopeia ma ke Keena Hoona Aina iloko o Honolulu i oleloia iloko hoi o ka buke 232 a ma na aoao 304 et seq., o ka mea paa moraki i oleloia ke manao nei e paniku i ka moraki i oleloia no na kumu i uha'iia oia hoi: no ka uku ole ia o ke kumupaa ame ka ukupanee i ka manawa e uku ai.
Ke haawiia aku nei no hoi ka hoolaha o ka waiwai i hooliloia e ua moraki la i oleloia e kuaiia aku ana ma ke kudala akea ma na keena kudala o James F. Morgan, Kaahumanu Alanui, ma Honolulu i oleloia, ma ka Poaono ka la 10 o Dekemaba, 1904, ma ka hora 12 awakea o ka la i oleloia. O ka waiwai i hooliloia e ua moraki la i oleloia, a e kuaiia aku ana oia no keia pa-hale apau loa, apana a mahele o ka aina e waiho la ma Kalihi, ma Honolulu i oleloia, a i ikeia hoi na Pa-hale Helu 11, 12, 13 ame 14 e like me kii aina a S. M. Kaaukai, a oia no hoi ka hapa o ka Apana 1 o ka L. C. A. 6450, a i apoia a hoakakaia hoi e like me keia malalo iho nei:
E hoomaka ana ma ke kihi Hema o keia aina ma ka aoao hoi mauka o ke alanui (25 kapuai ke akea) ma ke kikowaena o ka pa-pohaku a 99 hoi kapuai ma ke komohana-akau mai ke Alanui Kalihi, a e holo ana;
1. Ak. 36 deg. 00 min Hik. Mageneti 194.0 kapuai e holo ana ma ka aina o Schnack e pili ana i ka pa-pohaku;
2. Ak. 47 deg. 00 min. Kom. Mag. 174.0 kapuai a hiki i ke Alanui 20 kapuai;
3. Hem. 38 deg. 30 min. Kom. Mag. 192.0 kapuai e holo ana ma ke alahui a hiki i ka aoao mauka o ke Alanui 20 kapuai.
4. 47 deg. 00 min. Hik. Mag. 180.0 kapuai e holo ana ma ke alanui a hiki i kahi i hoomaka ai.
Nona hoi ka ili-aina o 34,150 kapuai kuea. O keia no hoi ka aina i hoakakaia ma ka L. P. Helu 8120 ma ka L. C. A. 6450, Apana 1, a oia no hoi ka aina i hooliloia ia Thomas E. Cook i oleloai ma ka palapala kuai a George R. Grau ame Edward Lofquist, i hanaia i ka la 15 o Iulai, 1896, a i kakaukopeia ma ke Keena Hoona Aina iloko o Honolulu i oleloia ma ka buke 164 a ma na aoao 46 ame 47 pakahi, a hoakaka hou ia no hoi ma ka palapala kuai a Thomas E. Cook i oleloia, ia Ellen A. Cook ame Bernice P. Cook i oleloia, i hanaia ia ka la 14 o Iulai, 1898, a i kakaukopeia iloko o ke Keena Hoona Aina i oleloia ma ka buke 183 a ma ka aoao 219, paupu me na pono apau, na kuleana apau ame namea apau e pili ana a i kuleana ia ma keia aina.
Ma ke kuike ka makemake a ma ke dala gula o Amerika, a ma ka aoao o ka mea kuai mai na lilo palapala a i hoomakaukauia e na loio o ka mea paa moraki.
No na mea aku i koe e like ae i ka The Bank of Hawaii, Limited.
Hanaia ma Honolulu, T. H., Novemaba 14, 1904.
THE BANK OF HAWAII, LIMITED,
Mea Paa Moraki.
Ma o C. H. COOKE,
Luna Ohi Dala.
3042--Nov. 18, 25--Dec. 2, 9.
HOOLAHA MANAO PANIKU A KUAI A KA MEA PAA MORAKI.
KOPAEA AME KAPAKI.
I kulike ai me na manao o kekahi moraki i hanaia e Kopaea ame Kapaki o Honolulu, Mokupuni o Oahu, Teritore o Hawaii ia Samuel C. Allen o Honolulu, i oleloia, i make i keia manawa, i hanaia i Iulai 12, 1902, a i kakaukopeia iloko o ke Keena Hoona Aina, Honolulu, Oahu, ma ka buke 237 a ma na aoao 242 ame 243, ke haawiia aku nei ka hoolaha o ka poe hooko ame na kahu waiwai malalo o ka palapala kauoha a ka mea paa moraki i oleloia ke manao nei e paniku ia mea, i kulike ai me na mea i aelikeia ma ka moraki i oleloia ame na kanawai Hawaii, no na kumu i uha'iia, oia hoi, ka uku ole ia ana o ke kumupaa ame ka ukupanee.
Ke haawi pu ia aku nei no hoi ka hoolaha mahope o ka pau ana o na pule neepapa ekolu mai ka la mua aku o ka hoolahaia ana o keia hoolaha, o na poe hooko ame na kahu waiwai o ka mea paa moraki i oleloia ua manao e a e paniku aku i ka moraki i oleloia a e hoolaha aku no ke kuai ana i ka waiwai i paa a ihooliloia [i hooliloia] ma ua moraki la a e kuai aku ana hoi ia mea na ke kudala akea ma na keena kudala o Jas. F. Morgan ma alanui Kaahumanu iloko o Honolulu i oleloia ma ka Poaono, Dekemaba 3, 1904, ma ka hora 12 awakea o ka la i oleloia.
O keia malalo iho nei na kuhikuhi ano o ka waiwai.
O kela Apana a mahele apau loa o ka aina e waiho la ma Puunui, Honolulu, Oahu, oia no hoi ka hapa o ka R. P. 3050 ia H. A. Widemann, a i hooakaka pono loa ia hoi e like me keia malalo iho nei:
Na Apana 43 ame 45 Kuea 3: E hoomaka ana ma ke kihi komohana o ka Apana 43: o keia no noi ke kihi hikina o ka Apana 41 a e holo ana.
1. Ak. 53 deg. Hik. 100 kapuai e holo ana ma Alanui Puunui:
2. Hem. 38 deg. Hik. 100 kapuai e holo ana ma ka Apana 47.
HOOLAHA HOOKO MORAKI.
3. Hem. 32 deg. Kom [content unreadable] hele ana ma ka Apana [content unreadable].
4. Ak. @@ deg Kom [content unreadable] lo ana ma ka Apana [content unreadable] i hoomaka ai, nona [conrent unreadable] kapuai kuea a oia no hoi [content unreadable] hooliloia i na mea moraki [content unreadable] mua ia ae nei ma [content unreadable] kuai a W. C. Achi i [content unreadable] raki 18, 1902, a i kakaukopeia [content unreadable] Keena Hoona Aina, Honolulu, [content unreadable] iloko o ka buke 2#4, a ma na aoao [content unreadable] ame 180.
E loaa aku no na mea i [content unreadable] Kinney, McClanahana ame [content unreadable] Kauka Hale, Honolulu.
Hanaia ma Honolulu, T. H. [content unreadable] 1904.
BATHSHEBA M. ALLEN,
MARK P. ROBINSON,
JOSEPH O CARTER.
PAUL MUHLENDORF
Na Poe Hooko a Kahu Waiwai [content unreadable] o ka Palapala Kauoha [content unreadable] Waiwai o Samuel C. Allen, [conrent unreadable] make.
3041--Nov. 11, 18, 23:--Dec. 2.
HOOLAHA MANAO PANIKU [content unreadable]
KAPIOLANI ESTATE LIMITED
Malalo a i ole ma ka pono o ka [content unreadable] o ke kuai i paa iloko o kekahi [content unreadable] i hanaia i ka la 10 o Iune, A. D. [content unreadable] i hanaia hoi e Kapiolani Estate Limited, he nui i kukulu pono ia a e ku nei malalo o na kanawai o ka Teritore o Hawaii a e lawelawe hana ana ma Honolulu iloko o ka Teritore i oleloia ma ke ano he mea moraki, ia Allen ame Robinson, Limited, he hui i kukulu pono ia a e ku ana hoi malalo o na kanawai o ua Teritore la o Hawaii i [content unreadable] loia a e lawelawe, ma ke ano he [content unreadable] paa moraki, a i kakau kopeia iloko o ka buke 236 a ma na aoao 261 a hiki i 265, ko Hawaii Keena Hoona Aina [content unreadable] like hoi me na mea i hoakakaia ma ka Mokuna XXXIII o na Kanawai Ahaolelo o 1874, e pili ana i ke "Kanawai i hanaia no ke Kuai o ka waiwai morakiia me ka hoopii ole ame ke Kauoha o ke Kuai" ame ke Ka@@@@@ (Mokuna IX o na Kanawai Ahaolelo 1890) e pakui ana ia mea hookahi o Allen ame Robinson Limited i oleloia ma keia ke haawi nei i ka hoolaha k@ manao nei e paniku i ka moraki oleloia no ke kumu i uha'iia oia, hoi: [content unreadable] ka uku oleloia o ke kumupaa ame ka ukupanee i paa ma ua moraki la oleloia i ka wa e uku ai.
Ke haawi pu ia aku nei no hoi ka hoolaha o ka waiwai i hooliloia ma [content unreadable] moraki la i oleloia e kuaiia aku ana ma ke kudala akea ma na keena kudala o James F. Morgan, Alanui Kaahumanu, Honolulu i olelo mua ia ae nei ma ka Poaono ka la 26 o Novemaba [content unreadable] 1904, ma ka hora Umi-kumamalua [content unreadable] awakea.
O ka waiwai i hooliloia ma ua m[content unreadable] la i oleloia oia no keia mau moraki malalo iho nei ame na palapala [content unreadable] hoaie e pili pu ana ilaila, oia hoi:
1. O kela moraki i hanaia o S[content unreadable] Angus ia Kapiolani Estate Limited, [content unreadable] ka la 13 o Iune, 1900, a i kakau kopeia iloko o ke Keena Hoona Aina ma ka buke 207 a ma na aoao 280 ame [content unreadable] pau pu me ka nota no Kanakolu[content unreadable]mamahiku Haneri dala ($6,700) [content unreadable] pu ana me ia.
2. O keia moraki i hanaia [content unreadable] Crane ia Kapiolani Estate Limited [content unreadable] ka la 19 o Iune, 1900, a kakau kopeia ma ke Keena Hoona Aina iloko o ka buke 207 ame na aoao 305 a hiki i [content unreadable] 309, pau pu me ka nota o Umikumamalima Haneri Dala ($1,500) [content unreadable] ana me ia.
3. O keia moraki i hanaia e J [content unreadable] Makainai ia Kapiolani Estate Limited ma ka la 11 o Augate, 1900, a i kakau kopeia iloko o ke Keena Hoona Aina o ke Aupuni iloko o ka buke 2@@ [content unreadable] na aoao 72 a hiki i ke 74 pau pu [content unreadable] ka nota no Elima Tausani Dala ($5,000) [aia hoi iloko olaila he Kanakolu-kumamalima Haneri Dala ($3,500) ma ke [content unreadable] he kumupaa e ku nei i ukuoleia] [content unreadable] pu ana me ia.
N. B. Okela mau mahele o ka [content unreadable] hooliloia ma ka moraki hope i [content unreadable] ae nei i hoakakaia ma ka palapala hoolilo a Kapiolani Estate Limited ia J. P. Makainai i hanaia i ka la @@ o Sepatemaba, 1901, a i kakaukopeia iloko o ka buke 226 ma na aoao [content unreadable] 376 (2) ka palapala hoolilo i h[content unreadable] la 29 o Sepatemaba, 1901, mai ia Kapiolani Estate Limited a ia J. P. Makainai i kakau kopeia hoi iloko o ka buke [content unreadable] a ma ka aoao 385 ame (3) palapala [content unreadable] lilo i hanaia i ka la 21 o Sepatemaba 1903, mai ia Kapiolani Estate Limited ia J. P. Makainai, i kakau kopeia o ka buke 252 a ma na aoao 11@ a hiki i 115 ua hookuuia mai ka hanaia [content unreadable] ka moraki i oleloia.
ALLEN AND ROBINSON, LIMITED,
Mea Paa Moraki.
Ma ke kulike a ma ke dala gula Amerika ka makemake a ma ka a[content unreadable] mea kuai mai na lilo palapala [content unreadable].
No na mea i koe e like ae ia [content unreadable] ame Stanley, na Loio o ka M[content unreadable] Moraki.
hanaia i kela la 31 o Okatoba [content unreadable].
3040--Nov 4, 11, 18, 25.
NANA ANA AOHE AUHAU
Na Kauka Huki Niho Noeau
He hanaia ka hana me na Auhau haahaa loa.
F. L. FERGUSON,
Lunahoohana.
Helu 215 Alanui Hotele, mamua iho o Young Building.