Ka Nupepa Kuokoa, Volume XLIII, Number 4, 27 January 1905 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, POALIMA, IANUARE 27, 1905.

 

-----

MAKAIKIU

 

WETE DETONA

 

Ke Ahi Lalapa Pio ole i na Nihiliti

Ke Kanaka Amerika Koa lua ole

 

MOKUNA XLIII.

KO VERA MANAO PAA.

 

            O keia na mea i loaa iaia a hoomaopopo iho la o Wete o keia mau mea apau i loaa iaia ua lawa no ka hookau ana i na hoahewa aha maluna o Kaunawahine Sofia Alamazofa, a oiai o keia kana mea @ nei, na olu iho la na manao o ua Wete nei a kaua.

            O ka papainoa o na alakai Nihiliti ame ko lakou mau wahi halawai, ua paa iho la ua Wete nei a o na pepa e ae oia kana i hooholo @ haawi aku ia Generala Gerisa, a ua hooko aku oia mahope mai.

            Mamuli o ko Wete hoomaopopo ana i ko Kaunawahine Sofia manao paa no Ivana Horawiki, nolaila ua ike maopopolea oia aole e loaa mai ana iaia he wahi pono ke hele aku oia e hoomaka'uka'u ia Sofia me keia mau mea i loaa iho la iaia a kau aku la kona mau manao ana no ko Ivana loaa ae ke halawai oia me Kauna Gerenigofa a hoi ikaika aku iaia e hoike ae i na mea apau i pakele ai oia mai ke kanawai ae.

            Huina iho la oia i keia mau mea apau iloko o ua lumi la, ma kahi hoi e loaa ole ai ina e huliia mai ana, alaila puka aku la oia a hoi pololei aku la no ka hotele ana i haalele ai ia Vera me kona manao e hoike aku i ka oiaio o na mea apau ana i ike ai no Ivana.

            Ua ala mai o Vera i kela manawa, a e kali mai ana oia me ka hoomanawanui o ka hoea aku o u Wete la a kaua, a ia Wete no hoi a komo pa ana ka Vera ninau.

            "Aia ihea o Ivana?"

            "Mai puiwa oe," wahi a Wete i pane aku ai.

            "Aole oia i make?" i ninau hou ai o Vera me kona hoomaka ana ae e haikea.

            "Aole loa pela. Ua hele aku oia no kekahi wahi, a aole oia i loaa aku nei ia'u, oia wale iho la no.

            Haikea ae la ko Vera helehelena a apo ae la kona mau lima mamua iho o kona umauma, me he mea la e hooikaika ana oia e kaomi iho i kona mau manao uluku.

            "Ke maka'u nei oe i ka ha;i ana mai ia'u i na mea apau, no kou manao o hana wau i kekahi mea e poino ai ko'u ola," wahi a Vera i pane aku ai me ka leo nahenahe. "Ke hoopaa aku nei wau ia oe aole loa wau e hana i kekahi mea o ia ano. Heaha kau mau mea i loaa aku nei ma kau huakai?"

            "Ua ikaika kupono anei oe e hoolohe mai ai i ka'u mau mea e hoike ai ia oe?"

            "Ae, a e ha'i koke mai oe ano."

            Hoomaka koke aku la o Wete e ha'i i na mea apau e like no hoi me ia a kaua i ike mua ae nei, a noho mai la no hoi o Vera e hoolohe me kona hookuikui olelo ole aku a hiki i ka pau ana, koe wale no he mau ninau no na mea ana i pohihihi ai.

            "Ke manao maoli nei anei oe aole i kauoha aku o Kaunawahine Sofia e pepehiia oia?" i ninau mai ai o Vera mahope o ka pau ana o ka Wete ha'i ana i na mea apau.

            "Aole loa he wahi kanalua iloko o'u no ia mea. Aole loa oia e aa e hoomake i kana mea e aloha nei."

            "E ae mai ana anei oe e ha'i mai i ko'u manao ma na mea i loaa aku nei ia oe?"

            Ma keia ninau a Kaunawahine Vera ua ike aku la na Wete nei a kaua aia kana milimili i kela manawa ke luaieleia la e na manao anoe no kana aloha a hoomaopopo aku la o Wete i ko ke kaunawahine hiki pono ole ke paa iho i kona mau manao anoe.

            "Penei ko'u manao koho wale ma keia." wahi a Wete i pane aku ai, "i ka manawa a Sofia i ike ai ua palekana oe, ua telegarapa mai la oia i aGerenigofa ianei e lawe aku ia Ivana no kekahi wahi okoa a malaila oia e hunaia ai a hiki i kou loaa ana a hookoia hoi kona manao lili ia oe."

            "He ano oiaio no kau i ha'i mai la, ina no nae he wahi paakiki loa kana i huna aku ai ia Ivana e loaa ole aku ai ke huliia."

            "Aole ia he mea hiki ole ke hanaia, a ke manao nei wau, ina o kana wahi i huna aku nei ia Ivana a iluna o ka ilihonua aole ia e nalowale mai ko'u mau maka aku."

            "O, aole o'u kanalua i ka loaa io ia oe o kuu Ivana aloha, oiai ke hilinai wei wau maluna o kou ike ame kou maalea. Ina o keia iho la ka papahana a keia wahine punikoko, alaila ke manao nei oe e huli mai ana oia i ko'u ola?"

            "Ae; ke make oe o ko Ivana manawa ia e hoikeia ae ai, nolaila he mea pono nou e noho malie."

            "Alaila, he mea pono ia'u ke pee iho?"

            "O ka hana pono wale no ia ma kou aoao."

            "Ke ike nei wau i ka'u wahi e hele ai a pee iho," wahi a Kaunawahine Vera i hooho ae ai, me ka uwila pu ana ae o kona mau maka.

            "Ihea oe e pee ai?" i ninau koke aku ai o Wete me kona pihoihoi, oiai ua ike aku la oia i ko Vera anoe.

            "E pee no wau iloko o ko Sofia hale e noho nei," i pane mai ai o Vera me ka leo kuoo.

            "E kuu kaunawahine maikai, he keu aku no kou a o ka manao olalau. Pehea oe i manao ai e hana aku pela?":

            "Ke manao nei anei oe e noho wale iho no wau pela me ka hana ole i kekahi hana? Aole. E pono ia'u ke hana i kekahi hana, a e ike no kela wahine puuwai uahoa o ke aloha o ka wahine pono ua hiki no ke ku aku imua o ka wahine hana ino."

            O ko Vera kulana iaia i pane ai i na olelo a kaua i ike ae nei, ua pihoihoi maoli no oia, a Wete e hoomaopopo la i ka paakiki o kana hana e hoomalimali ai a hoopauia ae keia mau manao ulu a pihoihoi o ke kaunawahine.

            "Heaha kau hana e hana aku ana?" wahi hou a Wete i ninau aku ai.

            "E hana no wau i na hana apau i ole wau e mana-ka i ka noho wale iho no!"

            "Aka, e kuu Vera maikai," wahi a Wete i pane aku ai me ka leo ku i ke aloha, "aole no hoi oe e kali loihi loa ana. Ua hilinai piha mai hoi oe ia'u mamua. Ua pau anei kou hilinai i keia manawa?"

            "Aole loa i pau ko'u hilinai ia oe, aka aole anei oe e hoomaopono mai he mea pono no ia'u ke hana i kekahi hana ma ko'u aoao?"

            "Pehea oe e manao nei e hana?"

            "E hoololi no wau i ko'u helehelena - nau no hoi ia e hana mai no'u, oia o oe ka mea makaukau ma ia ano hana - alaila e hele aku no wau imua o Sofia ma ke ano he kauwanana, i wahine lawelawe paha nona."

            "Pehea e loaa ai ia hana ia oe?"

            "E hiki no ia oe ke hana no'u. Mai hoole mai oe aole e hiki ia oe ke hana mai ia hana no'u, no ka mea ua maopopo no ia'u he hiki ia oe ke hana mai pela."

            Minoaka iho la o Wete i keia hoike oiaio o ko ke kaunawahine hilinai piha ana maluna ona, a pane aku la:

            "Ina paha e hiki io ana ia'u ke huli aku i hana nau a hookoia hoi kau papahana e manao nei, heaha iho la ka pono o ka kaua hana ma ia hana au e manao nei?"

            "E kiai makaaia no wau i kana mau mea apau e hana ana, a malia paha o loaa mai ia'u ka ike i ko Ivana wahi i hunaia ai."

            "A ina paha oia e ike e ana ia oe mamua o ke ko ana o kau mea e manao nei e loaa mai?"

            I ko Vera loha ana i keia, ua uwila koke ae la kona mau maka, a pane koke aku la oia:

            "A heaha iho la?"

            "Ke manao nei oe, mamuli o ke koa ana o kou manao, ma ia ano e kaulike ana olua me Sofia ma ka papa hookahi, a e lanakila ana oe maluna ona. Ma ia ano ke ike nei wau ua hewa kou manao ana pela," wahi a Wete i pane aku ai me ka luliluli pu ana o kona poo.

            "Aole loa o'u maka'u iaia."

            "Pela no; aka o ka mea e aa aku ana e paio me keia wahine he mea pono no e loaa iaia ka ike e paio aku ai i na ino apau i hiki ai iaia ke ike mua aku ai i kana mea e hana mai ai. Oia ano ike aole i loaa ia oe."

            "Alaila e hoole mai ana oe i ka'u mea e manao nei e hana aku?"

            "Ae, a e ha'i pololei aku ana no wau ia oe i ke kumu."

            "E oluolu oe e ha'i mai."

            "No ka mea ke heie nei a ke ake nei oe e hiki aku imua ona me kekahi manao ponoole iloko ou."

            "Heaha ka manao o kau mau olelo?" a ia manawa no hoi i haikea ae ai ko Vera helehelena.

            "Eia, ke manaoio nei no oe, me ko'u ha'i ana aku no nae ia oe, ua make o Ivana a mai na lima mai no hoi ia o kou enemi."

            Me ko Vera mau lehelehe e po'i paa loa ana ua pu a iki mai la no he hooia ana, a ua kakooia keia hooia me ke kunou pu ana mai o kona poo, a hoomau aku la no o Wete:

            "A ke paa nei hoi kou manao e hoopa'i no oe i kou enemi me kou mau lima ponoi ina e ike maopopo ana oe ua oiaia kau mea e hoohuoi nei."

            "Ae, ae, ua pololei kau i koho mai la, a e hooko io ana no wau ia manao."

            Ma keia pane a Vera ua hoopukaia me ke ano inaina, me he mea la ua nalowale kona noonoo maikai a ua uhi iho ke koloka eleele o ka punikoko maluna iho ona. Hoomau aku la no o Wete ma kona aoao, e paio ana hoi i na manao uluahewa o kana milimili, nee aku la oia imua a hopu aku la i na lima palupalu o Vera, a pane aku la:

            "E ke kaunawahine, mai hookaumaha oe i kou mau manao a haawi i kou mau noonoo maikai i uluhiaia e na manao pono ole e like iho la me keia. Aole i make o Ivana a he manawa no e hoohuiia ai olua a'u hoi e manaolana nei e hookoia ana iloko o na la pokole. Aka, ke hooko ole ia ka'u e manaolana nei, ke hoopaa nei wau e kii no wau ia Sofia a waiho mai iaia iloko o kou mau poholima nau e hana aku e like me kou makemake. Aole anei e hilinai mai ana oe ia no kekahi manawa pokole?"

            Hoholo iho la o Vera iluna o ka noho a hoomaka iho la oia e uwe. Ike koke aku la o Wete ua hei mai la ke kaunawahine i kana mau olelo i kuu aku la, a hoomau hou aku la no oia:

            "E noonoo, e ke kaunawahine, o ka huli ana ia Ivana he hana palai-e loa ia ke hookuku aku me na hana mua a'u i hana ai au no hoi i ikemaka ai."

            Maanei i pau iho ai ka hiolo makawalu ana mai o na waimaka, a kau ae la kona mau maka maluna o ka kaua Wete, he mau maka hoi i kiponaia me na haawina o ka hauoli, a pane mai la:

            "Aole anei ke ha'i mai nei oe i keia mau mea me ka manao e hoolanaia ae ko'u kaumaha me ka oiaio ole no nae iloko olaila?"

            "E ke kaunawahine, mai ko'u manawa i hoomaka ai e hookauwa ia'u iho nou ame Ivana a hiki iho la i keia manawa ke hoomanao nei anei oe i kekahi hana hoopunipuni a'u i hana aku ai ia oe?"

            "Aole loa! Alaila, ke manaoio nei no oe e loaa ana no o Ivana ia oe?"

            "Ke manaolana nei wau e loaa ana oia ia'u."

            "A heaha hoi ka'u hana e hana ai ia oe e huli ana iaia?"

            "Ke manao nei wau e nui ana na mea au e hana ai ke ike mai o Sofia i kou wahi e noho nei a ia manawa oe e noonoo ai i kau hana e hana ai."

            "Heaha hoi kana e hana mai ai?"

            "Iloko o kana ino i hana ai ke ike nei oia i kona hawawa, a ke manao nei wau aole oia e kuha'u iho ana ma ka hoao ana mai e hana i mea e make ai oe, oia hoi aole oia e kanalua ana i ka pepehi ana iho ia oe i kaawale ai oe mai kona alahele ae."

            "Heaha hoi kau e manao nei na'u e hana aku?"

            "E noho oe maanei, a kali aku nana ka hana mua. Aole loa oe e puka mawaho o kou lumi koe wale no me a'u; aole loa hoi oe e ae i kekahi mea e komo mai iloko nei."

            "Alaila, aole oe e hookuu mai ana ia'u e hoao aku wau i ka'u papahana? Ke manao nei wau e hiki ana no ia'u ke hana me ka holopono."

            "Aole he pono e loaa mai ana ma ia manao ou, a he mea hoi ia nana e alalai mai ana ia'u; no ka mea aole e hiki ia'u ke hana oiai oe ma kahi i maopopo loa ka loaa mai o na popilikia. E hiki no ia oe ke kokua ia Ivana ma kou noho malie ana."

            "Eia nae ke hiki ole nei ia'u ke noho malie oiai na manao hakukoi ke hapai mau mai nei ia'u e pono no e hana pu kaua."

            "E nohoalii iho ko'u mau manao maikai, no ko Ivana pono. E hoomaha iho, a e hoihoi mai i kou mau helehelena nohenohea i nalowale a e makaukau hoi no ko Ivana ike ana mai i kou u'i o na la i hala," wahi a Wete i pane aku ai me kona helehelena hoihoi.

            "O, ua pau ae la no kou mau la i pupuka ai ko'u helehelena."

            Me ko Wete ike maopopo ana aia no he haawina kaumaha maluna o Vera, aia hoi ua hiki ponoole iaia ke uumi iho i kona aka.

            "Ina pela mai kaumaha oe, no ka mea ke hoopaa aku nei wau ia oe, iloko o na minute he umi mahope koke iho o kou ike ana ia Ivana e hoi hou mai no kou helehelena u'i, a e mohala mai no auanei kou nani e huai mai ana i ka mea huna iloko o ka punawai o ke aloha."

            Minoaka iho la ua kaunawahine la, a pane mai la oia me ka leo waipahe:

            "E huli oe a loaa kuu Ivana a ia manawa e hiki no ia oe ke hoohenehene mai ia'u e like me kau i manao ai."

            "E loaa no oia ia'u ina nae oe e hoopaa mai ana aole loa oe e haalele iho i keia lumi a hiki i ka manawa a'u e kii mai ai ia oe."

            "Ke hoopaa aku nei wau ia oe. Aka hoi, e awiwi mai no hoi oe i ka huli ana a loaa, oiai ke hele mai la oloko a nae iki i ke aloha. Ua ike no wau i ka waiwaiole o ka'u i manao ai e hana, aka e pono oe e kala mai ia mau manao uluahewa."

            "E kala aku no wau ia oe ma na ano apau, oiai ua hoopau ae la oe i kau hana i hapaiia mai e ka inaina nana i uhi iho i kou manao kanaka maoli."

            "Ke manao nei wau he wahi hana maikai no hoi ia ina i hoaoia aku, eia nae hoi ua pau ae la keia."

            Hene iho la ka Wete aka, a puka aku la oia a hoomau aku la i ka huli ana ia Ivana.

 

-----

MOKUNA XLIV.

 

KOMO O WETE I KA UPENA KUU A KA LAWAIA.

 

            I ko Wete haalele ana aku ia Vera hele huli aku la oia me kona manao e loaa aku iaia he wahi meheu o Kauna Gerenigofa, a mamuli o ko Wete hoomaopopo i ka pilipaa o Kaunawahine Sofia me Gerenigofa, ua manaolana iho la oia o ke kiai ana aku i ko Kaunawahine Sofia wahi e hele ai oia ko Ivana mea e loaa ai iaia, nolaila ua huli aku la oia a hele holoholo aku la no ke kakela o Sofia.

            Aole i hala ae ekolu a eha paha kuea hale aia hoi hoomaopopo iho la oia eia kekahi mea ke hahai nei mahope ona. He hana maa mau keia iwaena o ka poe punikoko, a poe paha i uku dala ia no ka hana ana i kekahi hana karaima. Ua maopopo mua ia Wete o keia ana na haawina e loaa mai ana iaia ma keia hana ana e hana nei: nolaila aia no oia ke kiai makaala loa la iaia iho. O keia mea e hahai nei mahope ona ma ka Wete ike aku, aole i makaukau loa ma kana hana, oiai o ka poe loea maoli he mea paakiki ka ike koke ia.

            Maanei i komo koke mai ai ka iini i ua Wete la e ike pono i ke ano o keia kanaka e hahai nei mahope ona; nolaila ua komo koke aku la oia iloko o ka huikau o na kanaka, a iloko o ka imo ana o ka maka, ua loli ae la kona helehelena, a aia kekahi umiumi nui puhuluhulu ke paa ia ma kona auwae, a he papale ipu kiekie kona. Ma kona lima e paa ana oia i kekahi kookoo, a e hiolo ana na mea nani ma kona umauma. Ua lilo koke ae la ua Wete nei a kaua i duke kiekie i kela manawa, e puhili maoli ai no ka mea e imi ana iaia.

            O kahi kanaka i hahai ai mahope o ka kana Wete, i kona ike ana ua nalo kana mea e hahai nei iloko o ka huikau o na kanaka, ua holo mai la oia me ka awiwi me kona manaolana e halawai mai ana ka ike a kona mau maka me ua Wete nei a kaua; oia nae ua hoopuhiliia oia, a aia oia ke pahaohao la me kona ike ole aku o ke kanaka e ku aku ana mamu ona me ke kookoo ma kona lima, oia no kaua kanaka i makemake ai, a o ka kaua Wete no hoi.

(Aole i pau.)

 

-----

KALE O LEONA

 

Ka Naita Puuwai Hao Wiwoole

 

KA HOOPAKELE O KE KAIKAMAHINE ALII I LAWE MALUIA.

 

MOKUNA XVIII.

 

PAIO HOU MA KE ALA.

 

            Ua ike koke o Pidero i ke ano o kona haku he hooko ma ka hana ana ke puka kana kauoha nolaila ua hoohakalia ole iho oia no kahi o na lio e kuku ana iloko o ka halelio.

            "E lawe mai anei au i lio nou?" i hoomaopopo aku ai o Pidero i kona haku.

            "Na'u no e nana i ko'u aka e hoohakalia ole oe ma kau hana."

            "Ina e hoao ana oe e ku-e aku i ka mana o ka moi e kau aku no na poiino he nui maluna ou," wahi a ka elele i pane aku ai me ka unuhi pu ana ae i kana pahikaua.

            "Ua ike au ia mau mea a na'u e hooholo i ka'u mea e hana ai," wahi a Kale o Leona me ka hoomakaukau ana ae i kana pauku laau.

            "E na keonimana, e oluolu aole e hanaia kekahi hookahe koko maanei," wahi a ka ona hokele, iaia e ku ana me ka haalulu nui o na kuli.

            "Ho, o oukou apau loa, ke kuahana aku nei wau ma ka inoa o ka moi, e kokua mai oukou ia'u," i ikuwa leo nui ae ai ka elele. "E hookaawale koke ae mai kahi ae o na lio, ke hana oe pela e hoohana koke no wau i ka'u pahikaua maluna ou," wahi a ka elele i pane aku ai ia Pidero oiai iaia oia i huli kamailio aku ai.

            Aole i nana mai ka ukali i keia mau olelo a ka elele oiai aia oia i kahi o na lio e hooko ana hoi i ke kauoha a kona haku. Ua loaa aku la he lio ana maikai ma ke kino, a aia ka noho ke hoaia la a ma ka manawa a Pidero e hookomo ana i ke kaulawaha oia ka manawa i pa-e aku ai ka leo o ka elele iaia.

            "Emi aku i hope," wahi a Kale i pane aku ai me ka leo ikaika me kona hapai ana i ka paukulaau iluna no ka uhau ana. "E hele aku no maua mai keia wahi aku ma ka maua hooholo ana no a he poino hoi ia ia oe ke hoao oe e ke'ake'a."

            "Ma ka inoa o ke kaula nui ua hana mai oe i ka ino. E aa anei oe e ke'ake'a a e ku-e ia'u, kekahi lunakoa o ka Mea Kiekie ka Moi Mahomeda VI? E waiho aku i keia lio."

            Aka, aole ia he mea e kuha'u ai ka olelo hooholo a ka naita opio.

\           "E hoomanao," wahi a Kale, "He hoopakele mau wau ia'u iho, i mea e hiki ai - i kekahi manawa he komo aku wau iloko o na hakaka no ka make; a ke lawe hou mai nei wau ia haawina."

            "O, e na keonimana," i hooho ae ai o Selima.

            "E kokua mai ia'u," wahi hoi a ka elele iaia i huli hope ae ai a ike aku la i ka makaukau o kekahi poe kanaka me na paukulaau me he la ua makaukau no ka paio ana; "ke noi nei au ia oukou ma ka inoa o ka moi e kokua."

            "A ma ka inoa o Kale o Leona ke noi nei au e ku aku i hope," i kahea leo nui ae ai o Kale me ka hooniniu ana ae i ka paukulaau.

            "Ha! alaila o oe io no o Kale o Leona?"

            "Ae."

            "Alaila o olua maoli na kanakia e--"

            Aole i pau pono ka hopunaolelo a ka elele, no ka mea iaia e hele ana no kahi o Pidero e hana ana i ka lio, ua loaa pono aku la oia i ka ha-una hookahi ana o ka paukulaau a ka naita kristiabno a waiho malie ana i ka honua.

            O ka poe i lawa me na paukulaau no ka paio ana ua kuemi hope aku lakou i ka ike ana i ka ikaika lua ole o ke kanaka opio. Aole hookahi o lakou i aa e ku mai imua o ka naita, a i ka nana aku me he la ua hoopau lakou i ka manao paio a e kuu hamama ae i ka puka no na kamahele mamuli o ko lakou ike ana i ka waiho a make ana o ke aliikoa.

            "E ee, e kau i kou lio," wahi a Kale ia Pidero e alakai mai ana i ka lio.

            "Aka, pehea oe e kuu haku?"

            "Ua lawa no wau i ka lio o ka elele Mahomeda."

            "O, e Alahe, e kokua mai ia'u," wahi a Selima i leo nui ae ai me ka puliki ana ae i kona mau lima e hoike ana i ka nui ehaeha. "O, e hoahewa mai ana ka moi ia'u. E na keonimana kristiano, e ae mai ia'u e noi aku ia olua e noho iho. Aole pono olua e hele. E ahewa mai--"

            "Mai maka'u e Selima," wahi a Kale i hoolana manao aku ai oia me kona unuhi pu ana ae i kana hipuu mai kona ekeeke ae. "Eia na wahi kenikeni e hoolawa ana i ke kumuwaiwai o ko lio ame na mea e ae no hoi."

            "Aole, aole he waina ka i haawiia ai ia olua."

            "Alaila o ka wai o ka hua waina ka i loaa mai i maua," i hooluolu 'ku ai o Kale. E lawe aku ikeia, a e hoike aku i ka elele ina e pohala ae oia, ina nae na haawina pomaikai me ia, e loaa no ka lio ona ma ke alaloa ke hookolo ae a e huli hoi aku no kahi ana i hele mai ai."

            "Ma ka inoa o Alahe," i hooho ae ai ka nui kanaka e kuku ana, "o ka naita kristiano kela i hoohaule ai i ka lunakanawai ma ke kahua hakoko."

            Mamuli o keia hooho manao o keia poe i hooholoia aku ai ka lia o ka maka'u maluna o ka poe i lohe. Eia nae he elua o na Mahomeda o ka hokele i mea mai e paio no ke'ake'a ana a i ka lohe ana ua kuemi koke aku laua me ka hikiwawe loa. Ma ka nana aku i ka naita iloko o kona wa o ka huhu no ka hakaka aole io no e nele ke kau o ka weli, a o ka poe apau apuni oia aole i nele ko lakou hoomaopopo a hooiaio i ke kau io no o ka make maluna o ke kanaka a e komo ke'ake'a aku ana iaia.

            Emoole ua kau ae la o Pidero maluna o kona lio a holo aku la iwaho o ka pa o ka hokele. Ua eleu koke aku la no hoi o Kale ma ka aoao o ka aliikoa Mahomeda e waiho a make ana i ka maopopo ana iaia he maule wale no, ua wehe ae la oia i ka pahikaua a pa a lilo iaia. Ua oni ikaika ae no ke kanaka maule me ke kaakaa ana ae o na maka me ka mea ana ae e kamailio, aka ua haalele koke iho la ka naita iaia. Aia ka lio o ka elele mawaho o ka hokele a mahope iho o ke kau ana o Kale o Leona maluna o na lio la, a pili no hoi o Pidero ma kona aoao o ko laua hoomaka aku la no ia ma ko laua aia no ka Akau.

            Ua kahea leo nui aku o Selina ia laua no ka hoi hou mai a i ka nana aku me he la ua ano hilahila kekahi poe Mahomeda mamuli o ko lakou ano hohewale aka ua waiwai ole ia mau upu ana no ka mea ua hala ka manawa o ka hana a nele pu hoi me ke kahea leo nui wale ana a ka ona hokele; a i ka nalo ana o na hiohiona o na kamahele mai ka nana aku a ko ka hokele oia ka ikaika loa ana ae o ka elele me ka hoi hou ana mai o ka noonoo pono, eia nae ua nele oia i ka lio ole.