Ka Nupepa Kuokoa, Volume XLIII, Number 5, 3 February 1905 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, POALIMA, FEBERUARI 3, 1905.

 

MAKAIKIU

WETE DETONA

Ke Ahi Lalapa Pio ole i na Nihiliti

Ke Kanaka Amerika Koa lua ole

MOKUNA XLIV.

KOMO O WETE I KA UPENA KUU A KA LAWAIA.

 

            Ma keia i kilo pono aku ai ua Wete nei a kaua.  O ke kanaka i hahai mai ai iaia @a like no me na kanaka e ike mau ia ana ma na alanui.  Aole no oia e kanaka o ke kaluna lapuwale, aole no @ he keoni@ana, aka nae ua ike koke aku la no ka kaua Wete aole i nele kona komo ana iloko o kekahi mau hana hoopilikia aku ia ha’i mamuli o kona huli pomaikai ana nona iho.

            Mamuli o keia ike i loaa aku i ka kaua Wete, ua pahaohao iho la oia i ka manao o ka hahai ana o keia kanaka iaia, a hooholo iho ia oia iloko ona e ike pono i ke kumu ame ka hana a keia kanaka e hana aku ai nona; nolaila ua komo koke aku la oia iloko o kekahi halekuai, a i kona huli hoi ana mai, aia no ua kanaka la ke ku la @@awaho e kiei ana hoi ma o a maanei.  Maalo iho la ua Wete @@i a kaua mamua o ke alo o ua kanaka la, a iaia i hala iho ai lohe iki aku la oia i ka hanu nui ana iho o ua kanaka la me he mea la ua @aha iho la oia i kona ike ana mai i ke kanaka ana e huli ana.

            Aole i nana iho ua Wete nei a kaua i na kanaka la, aka hoomau aka la no oia i ka hele ana, a aole i liuliu iho ike koke aku la oia i ka hahai mai no o ua kanaka la mahope ona.  Hiki aku la oia i kekahi haleaina a komo aku la iloko.  Hele loa aku la oia a ke pakaukau mamao loa mai na pakaukau i piha mua i na kanaka, alaila noho iho la oia a kali aku la o ka hoea mai o keia kanaka @ hahai nei mahope ona.

            Aole i liuliu iho maalo ana ua kanaka la mawaho a kie mai la iloko o ka haleaina, a ike mai la no hoi i ko ianei noho aku, nolaila komo loa mai la oia iloko a hele loa ae la no kahi a Wete e noho aku ana a noho mai la ma kekahi aoao o ke pakaukau.

            No ka kaua Wete hoi, nana wale aku la no oia i ua kanaka la, alaila huli aku la kona alo i kahi e.

            Kihe iho la ua kanaka la a hoopahupahu iho la oia i kona mau wawae iluna o ka papahele, he hoailona hoi na ua Wete nei a kaua i hoomaopopo aku ai ke makemake mai la ua kanaka la e huli aku ka kana Wete, nolaila huli aku la ua Wete nei a kaua a kau aku la kona mau maka oi maluna o kana malihini.

            “E kala mai oe ia’u,” wahi a ua kanaka la i pane mai ai, “eia auei wau ke hui nei me Monikiu Detona?”

            “Ae,” i pane aku ai ka kaua Wete.

            “O oe anei ko Monikiu Ivana Horawiki hoaloha?”

            “Oia no keia e kukai nei me oe.”

            “@aki maoli no!” alaila kulou mai la ua kanaka la imua, me kona aloalo ana ae ma o a maanei o ka lumi, alaila hawanawana mai la, “e hiki no ia’u ke ha’i aku i kekahi mea e pili ana nona.”

            “Pela anei?” i ninau koke aku ai ua Wete nei a kaua a me kona hoihoi pu no hoi.

            “Hamau! Mai kamailio nui oe o loaa mai paha auanei he pilikia ia’u ma ko’u hai ana aku ia oe nona, eia nae ua haawi aku wau i ka’u olelo hoopaa i kekahi mea.”

            “Ia wai kau haawi ana i kau olelo hoopaa?”

            “Ia Horawiki.”

            “I ka wa hea?”  Ihea hoi kou wahi i ike ai iaia!  Aia oia ihea i keia manawa?  E hai koke mai oe ia’u.”

            “Alia paha hoi oe e pulale mai.  Aole oia maanei, a aole hoi wau e hai aku ana ia oe.”

            “Aia oia ihea, a ihea hoi oe e ha’i mai ai nona?”

            “E hele pu mai oe me a’u.”

            “Ihea?”

            “E hahai mai oe mahope o’u a e ike no oe naou iho.”

            “Aka mae, he mea pono no no’u e lohe mua i na mea apau mamua o ko’u hahai ana aku mahope ou.”

            “Aole anei ou makemake e ike i na mea e pili ana no kou hoaloha?”

            “O ia maoli ko’u makemake; aka nokeaha e hiki ole nei ia oe ke hai mai ia’u oiai kaua e noho ana maanei?”

            “No ka mea he nui na mea nana e hoohihia nei i keia mea.”

            “Aka aole anei ou ike iho he mea hiki no ia’u ke hookonokono aku ia oe e hoike mai oe i na mea apau ia’u i keia manawa no?”

            “Nau e hookonokono mai ia’u?” i hooho ae ai ua kanaka la me ka hoholo ana ae o ka inaina maluna o kona helehelena.

            “Ae.  He hiki ia’u ke kahea aku i ka makai a hoopaa aku ia oe iloko o ka halepaahao mamuli o kou huikau pu ana iloko o kekahi hana lapuwale.”

            “Pela io no; aka aole ia he mea e kokua ai i ko hoaloha, no ka mea aole wau i ike i kekahi mea e pili ana i keia mea,” wahi a ua kanaka la i pane mai ai me ka pihoihoi nui.

            “Alaila, heaha iho la kou manao o ka hele ana mai imua o’u me kekahi moolelo e like iho la me kau i hai mai mua mai nei ia’u?”

            Ua hoopuiwa nui ia aku ua kanaka la no keia mau olelo a ua Wete nei a kauna, oiai ua manao mua oia e puni aku ana ua Wete nei i kana mau olelo a e ae hikiwawe aku ana oia ke lohe i na mea e pili ana no kona hoaloha.  Ua hehihehi iho la oia iluna o ka papahele me kona kunukunu ana iho, alaila pane mai la oia:

            “E ike mai oe, he hoaloha no’u—a he mea pono no paha ia’u ke h@i aku ia oe no ka mea he kanaka oe i kaulana ma kau hana e hana nei, oia hoi ne makaikiu, eia ua hoaloha nei ou ke pee nei no kekahi manawa—oia ka ike i na mea apau, a uana i noi mai ia’u e huli ia oe a e ha’i aku ia oe i kona makemake e ike ia oe maluna o keia mea.”

            “Ke maopopo aku la ia’u.  Alaila oia kekahi i komo aku iloko o keia hana a nana hoi i lawe aku i ko’u hoaloha, a ke makemake nei oia e loaa aku he wahi uku mawaho ae o kana i uku@a ai no ka lawe ana aku i ua hoaloha la o’u.  Oia anei ka manao maoli?”

            “Malia paha oia iho la: eia nae aole e hiki ia’u ke hooiaio aku no ka mea aole oia i hai mai ia’u i na mea e pili ana no kou hoaloha ame ka hana i hana ia aku ai maluna ona.”

            “Pololei,” wahi a Wete i puana ae ai.  “Ano ke manao nei wau e kii ae wau i makai a lawe mai a haawi aku ia oe iloko o kona poholima no kou huipu ana iloko o kekahi hana ekaeka maluna o ko’u hoaloha.”

            “He puapuahulu maoli no oe.  Aole anei ou ike mai o kou hana ana aku pele aole ia hea mea e kokua ana i ua hoaloha la ou?  Aole wau i ike i kahi o ua hoaloha la ou, oiai ua like ko’u kulana me kekahi elele lawe o@elo wale iho no.”

            “Ke ike maopopo aku la wau i kou ano i keia manawa.  Ano oiai ua maopopo iho la ko kaua mau kulana i keia manawa, e hai mai oe ia’u i kahi a kaua e hele aku ai a loaa aku keia hoaloha ou i ike i ko’u hoaloha.

            “E hoike no wau i kona wahi e loaa aku ai ia oe, ina no nae oe e hahai mai ana mahope o’u.”

            “Aole a’u hoohalahala no ia mea.  E hele koke aku kaua i keia manawa ano.”

            “Owau ke hele ae mamua, a e hahai mamao mai hoi oe ia’u, i mea e loaa ole ai na hoohuoi ana i kekahi mea aia kaua ke hele nei no ka hana hookahi.”

            “Ke maopopo aku la ia’u.  Aole ou makemake e ikeia mai oe me a’u.”

            Me keia mau kukai olelo ana mawaena o laua, puka aku la ua kanaka la, @ hahai aku la no hoi o Wete mahope e like me ka laua i aelike ai.

            “Ke ike nei wau he maunu keia a keia kanaka i hoolei mai nei no’u,” wahi a ua Wete nei a kaua i hoopu-a wale ai iaia iho no ia laua e hele ana.  “Pehea la, ke manao maoli nei anei keia kanaka e hei ana wau i kana upena.  Ke ike maopopo nei wau eia keia mau kanaka elua ke manao nei e hana mai i kekahi hana maluna o’u.  Ina pela iho la ko laua ma’u manao alaila e hoike aku ana wau ia laua i kekahi mea hou a laua i ike ole ai mamua.”

            Hana iho la ua Wete nei a kaua i kana mau pu panapana a ike ua makaukau, aliala hoomau aku la oia i ka hahai ana mahope o keia kanaka ana i ike maopopo ole ai i kana hana e hana mai ai maluna ona.

            Alakai loa aku la ua kanaka la ia laua a hiki aku la i na wahi ino o ke kulanakauhale o Farani, a mamuli o ke kamaaina o ua Wete nei i ka hele ana iloko o na wahi ino e like iho la me keia, aole ana mea e hopohopo iho ai, a hele aku la oia me he mea la aole he wahi hoohuoi iloko ona no ka hana a keia kanaka e lawe nei iaia; aka aole i nele kona makaala i na manawa apau no kona ola iho, oiai ke hoomaopopo la oia aia oia iloko o kahi pilikia, a oiai ua loaa mua iaia ka ike ua ikeia oia he makaikiu a o na makaikiu apau ke ikeia ma na wahi e like me keia ana e hele nei, ma ka apua wale no ko lakou pakele ae.

            Mamuli o ka manaolana iloko o ke alakai o ka kaua Wete ma keia huakai ana e hele nei, ua nei ka kaua Wete i kana upena, nolaila aia oia ke hele la no mamua me kona minoaka mau i na manawa apau ana e huli aku ai mai ka kaua Wete aku a hoomau aku la i kana alakai ana.

            Aia laua i kela manawa ke hele la ma na alanui liilii o ua kulanakauhale nui la o Parisa, kahi hoi i oi aku ka pupupu o na hale, a i kekahi manawa e komo ana laua iloko o na alanui haiki o hookahi kapuai wale no ke akea, a ma kekahi mau alanui liilii a laua i hele aku ai he mea ike ole ia ka la ma ia mau alanui apuni ka makahiki, a e like me ko laua komo loa aku iloko o keia mau wahi, pela no hoi ka oi aku o ke koa o na alakai la o ka kaua Wete.

            No ka kaua Wete hoi aole ona mea a hoike ae i kona makau n@ keia wahi ona e alakaiia nei, oiai he huluaa loa ia na ua Wete nei a kaua i aloia e ia me kana kumu, ka Makaikiu Nikoloka Kaaka, ma na wahi apuepue loa o ke Kulanakauhale Nui o Nu loka; nolaila iaia e hele nei aole he wahi hiohiona o ka makau iluna ona, a aia hoi kona noonoo ke hana mao ole la i kana papahana e hana aku ai.

            Hoike aku la o Wete i kona ae ma ke kunou ana, a aole i liuliu iho aia laua ke pii la ma kekahi alapii loihi.  Aole i ku iho ua alakai la a hiki wale i ko laua hoea ana aku ma kekahi lumi o ka hale e pili ana i ke kaupoku, a ia manawa kona alakai i kikeke aku ai, a weheia mai la ka puka no laua nei, a hookipaia aku la ua Wete nei a kaua iloko.

 

MOKUNA XLV.

NOHAE KA UPENA I KUUIA.

 

            I ko Wete komo ana aku iloko o ka lumi ua leha koke aku la kona mau maka oi ma kela ame keia o ka lumi, a ike aku la ua Wete nei a kaua ua paa na puka aniani i ka paku papa ia.

            Iloko o ua lumi la e noho ana kekahi kanaka nui a ua Wete nei i iken@ @opo aku ai aia ke ino iloko ona.  He kanaka punikoko, i makaukau paha o kekahi poe e aku e uku ana iaia i  kekahi uku kiekie.

            I a manawa koke no i ke ai ko Wete alakai ua komo kana i’a iloko o ka upena, ua pani koke ae la oia i ka pukaa ia manawa pu no hoi i nakeke ae ai ka laka a paa ana ua Wete nei a aua iloko.

            I ka ike ana mai o kahi kanaka i loaa aku ai ia laua iloko o ka lumi ua paa ka kaua Wete, ua minoaka iho la oia me ka hoohenehene ana, me kona manao mamuli o ka nui ana o kona kino e hiki ana iaia ke opa i ka kaua Wete iloko o kona poholima hookahi.

            Ma ka aoao o ka kaua Wete, ua panai aku la oia i ka minoaka, me he mea la aole he wahi hoohuoi iloko o kona maau no ka @an@ e @anaia nei nona.  Malia paha e loaa ana no na paio ikaika ana mawaena ona ame keia kanaka, aka aole loa ia he mea nana e hoi hope ai a e hopohopo iho ai, oiai ke hilinai la no oia i ka ikaika o kona mau olona ame kaua mau pu panapana.

            O ke kanaka nana i alakai mai ia Wete, oia ke kanaka mua loa i pane mai iaia nei ma kona hoolauna ana aku i ka kaua Wete me keia mau olelo:

            “O keia ke keonimana hoaloha o Ivana Horawiki.”

            “O keia anei ke kanaka i ike i na mea e pili ana no ku@ hoaloha?” wahi a Wete i ninau aku ai.

            “Owau no ia.” Wahi a kekahi o laua i pane mai ai, me kona hookoikoi loa ana iho i kona leo.

            “Heaha kau uku e noi mai ai ia’u no kou hai ana mai i na mea e pili ana i ka lawe hu-naia ana o kuu hoaloha?” wahi a Wete i huli aku ai a ninau aku la i ke kanaka i pane hope mai ai.

            “Heaha la hoi ka uku?” i huli ae ai ua kanaka la a ninau aku la i kona kokoolua a kanaka hoi nana i alakai aku i ua Wete nei a kaua.  “E hai ae hoi oe e Kepa.”

            “Heaha hoi kau e hoolalau nei e Keaka?  E pono ia kaua he hoololohi ole iho.  E hoike ae oe i ka makaikiu i ka mea e hanaia aku ana nona.”

            “Na’u ka e hai aku iaia?  He kanaka ike ole wau i ke kalaimanao ana, nolaila nau hoi ia e hai ae iaia nei.”

            Kau aku la ko Wete mau maka maluna o kona mau hoa papa leo, me kona hoike ana aku i kona pihoihoi, a pane aku la oia me ka leo koikoi:

            “Aole o’u makemake i keia hana a olua.  E pono ia ollua e hai mai i ke kumu o ko olua lawe ana mai ia’u ianei, a i ole e puka aku no wau iwaho a haawi aku ia olua i ka makai.  Aole wau he kanaka liii wale ke hoopunipuniia mai.”

            “Ha. Ha! ho, ho!” i aka ae ai o Keaka me ka leo nui.  “Pehea kau i pane mai la?  E haawai aku ana oe ia maua i ka makai.  E ahu ana kau!”

            A ia manawa no hoi i kuwala poo aku ai o Keaka me ka hoohenehene ana mai i ka kaua Wete, a pahu ana iluna o ka moe, he mea hoi e hoonaukiuki mai ana i ka kaua Wete.

            “Ua hala ka manawa no ia hana, e kuu wahi keiki ai waiu.” Wahi a Ke-pa i pane mai ai.  “Maanei pau kou ike hou ana i na maka o ka Ilamuku, nolaila he mea pono no ia’u ke hai ako @ oe i na mea apau e hanaia aku ana maluna ou.”

            “Heaha? E aa ana anei oe e paa iho ia’u iloko nei i pio mau?” i hooho ae o Wete.

            “Ke manao mai nei paha oe e hiki ana ia oe ke hoomaka’oku’u mai ia maua.  Aole a maua hana i koe i keia manawa o ka hooko aku no i ka hana i waiho ia mai na maua e hana,” i pane mai ai o Keaka, me kona aka hoohenehene pu ana mai no hoi.

            “Aole olua e pepehi iho ana ia’u?” wahi a Wete i ninau aku ai me kona hoike ana ae i kona ano makau, he mea hoi na Wete e hana nei i manaoio mai ai keia mau kanaka ua makau io no ka kaua Wete ia laua.

            “O, pela anei kaua e hana aku ai iaia nei?” wahi a Keaka me ka hoohenehene nui ana.  “E pono oe e hoopau iho i kou mau manao lana apau, a o kou manawa keia e pule ai no kou uhane i komo aku ai iloko o ke aupuni o ka lani.”

            Ma keia e maopopo ai ia kaua, e ka mea heluhelu, ka oi hoonaukiuki loa o Keaka i ka kaua Wete, he hoonaukiuki hoi e pii ai ka ena o ua makaikiu Amerika nei a kaua: eia nae ia Wete @ hoolala ana i kana mea e hana aku ai maluna o Keaka, ia manawa i pa mai ai ka Ke-pa mau olelo, a huli aku la o Wete a hoolohe aku la i kana mau olelo e pane mai ana.

            (Aole i pau.)

 

KALE O KEONA

Ka Naita Puuwai

Hao Wiwoole

KA HOOPAKELE O KE KAIKAMAHINE ALII I LAWE MALUIA

 

MOKUNA XIX.

KA LUAPAAHAO O KA HALEPAAHAO POOKANAKA.

 

            He kamahao maoli no ka hana o ka puuwai o ke kanaka.  Ia Kale e noonoo ana i kana Zira aia ke hoi hou mai la ka wela o ke aloha me ia me he la, he haawina i pilipaa mau ia me ia @o na ma kahiki lehulehu.

            Ma keia manawa ua hiki aku la na Kristiano i kekahi wahi mohaha o ka aina a i ka huli ana i hope no ka nana ana i ka poe uhaiaholo ua hiki ole ia laua ke manao ae e holo iloko o ka laau e ku mai ana mamua pono o laua.  Eia ke kokoke loa mai la na koa Mahomeda mahope o laua, a i ka oomaopopo ana @ Kale he ihe loloa ke kekahi mau koa ua emi iho la ka ikaika paio o kona noonoo, oiai he mea makehewa wale no ka paio ana imua o na mea kaua loloa.

            “Ua oi aku ka maikai e ku kana ma ke kumu o kela kumulaau nui e ku mai la, ke hiki nae kaua ilaila i ka wa kupono mamua o ka hoea ana mai o na enemi o kaua.” Wahi a Kale ma ka manawa i ike aku ai oia i kekahi kumulaau nui ma ka lihiwaho o kahi ulu laau uuku mamua pono o laua.

 

KA HOME O NA PA OLA.