Ka Nupepa Kuokoa, Volume XLIII, Number 8, 24 February 1905 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, POALIMA, FEBERUARI 24, 1905.     3

MAKAIKIU

WETE DETONA

Ke Ahi Lalapa Pio ole i na Nihiliti

Ke Kanaka Amerika Koa lua ole

MOKUNA XLVII.

KA AELIKE PEPEHI KANAKA.

"He oiaio kau ; eia nae aole wau mea ike i ka hoohalikelike ana i ka limakakau o ke kane."

E kii aku oe i pepa ame ona inika, a e hoao ae hoi wau.  Ua hoao wau no na manawa lehulehu i ka hoohalikelike ana i ko ha'i limakakau.  Eia nae hoi aole o'u manao e hiki pono loa ana ia'u ke hoopunipuni aku iaia.  Ke manao nei anei oe ua ike maopopo keia wahine i ka limakakau o keia makaikiu?"

"Aole o'u manao pela."

"Ina pela e hiki ana ia'u ke hoowalewale aku iaia, a o ka mea wale no i koe, e hole mai anei oia keia kakau leta ana aku iaia?"

"E hiki no ia oe ke ike ma ka hoao ana."

Kii aku la ua kauna wahine la i na pono kakau, a noho iho la ua Wete nei a kaua e kakau e hoao ana hoi e hoohalikelike iho no i kona limakakau.  He mau apana pepa lehulehu i pau wale ma keia hoolikelike ana mamua o ka loaa ana o kana i manao ai ua kulike loa me kona limakakau, alaila hoike aku la oia i ke kaunawahi ne.

"Helu ekahi kela !  Ina e hoounaia ka leta me kena limakakau i n amakaikiu la aole e hiki iaia ke hoohewahewa ae, no ka mea o kona limakakau no ia."  wahi a ua kaunawahine la i pane aku ai me ka uwila ana ae o kona mau maka me ka hauoli.

"Pela io no ko'u manao," wahi a Wete i pane aku ai.  "Heaha la ka'u manao e kakau ae ai?"

Hoike aku la ke kaunawahine i kona manao a pela no hoi o Wete, a mawaena iho o laua i loaa ae ai keia manao:

"I ke Kaunawahine Radoliniskiki:

"Kuu Madame Aloha:  Eia wau ke uhai nei ma na meheu o Ivana.  Ina he mea oluolu ia oe e hui ae me a'u ma kahi halekuai rama liilii, he ekolu hale mai ke kihi o Ru de Apela ma Ru de Aubegiseta, e alakai aku no wau ia oe imua o Ivana i keia po.  Eia wau ke kiai nei i kekahi mea, a ina aole ia ina no owau no ke hele aku e kii ia oe.

"Me ka awiwi, kau kauwa hoolohe,

"WETE DETONA."

"Pehea iho la keia?  Ke manao nei wau aole oia e noho aku i kauhale ke loaa aku iaia keia leta," wahi a Wete i hooho ae ai mahope o ka pau ana o kana kakau ana i na manao a kaua i ike ae nei maluna.

"Nui loa paha ka poe i ike ia wahi au i kauoha aku nei iaia e hele ae?"  i ninau aku ai ke kaunawahine.

"Aole loa.  Aole mea e ike ana i kona komo ana iloko o na hale la, a he mea pono no hoi ia oe ke hoomaopopo iho aole loa e ike ana kekahi mea i kona puka ana aku iwaho."

"Pela io no-paha; aka pehea e hiki ai ia oe ke huna aku i kona --kona--"

"Ke huna aku i kona kino?  Aole loa he pilikia malaila.  Aia he lua malalo o ka hale, a ua hiki ia'u ke kanu aku iaia iloko olaila, a ke manao nei wau he wahi maikai keia.  E hiki ana no paha iaia ke kahea ae, eia nae e hana wale no oia pela a hiki i ka pii ana o ka lena, aole loa he mea e lohe ana i kona leo."

I ka lohe ana o Sofia i keia pane a Wete, na komo koke ae la ka manao iloko ona, a hoike aku la oia na manao la i kaua Wete:

"E hiki ana anei ia'u ke ike aku iaia me ko'u ike ole ia mai a mamua hoi o kou pepehi ana aku iaia?"

"Aole he hoopaapaa ana malaila.  E hele hou mai no wau a ha'i aka ia oe mahope iho o ka manawa a'u e ike ai iaia ua komo iloko o ka kaua upena."

"Ina pela, e hele koke aku oe ano a e hooko aku."

"Mamua o ko'u hooko ana aku, he makemake nei wau e ike mua i ko'u uku no keia hana."

Ua kuha'u iki iho la ua kaunawahine la i kona lohe ana i keia mau olelo a Wete, alaila pane aku la oia:

"E papalua aku kou uku i ko kela o ka makaikiu."

"Aole anei oe e uku hapa mua mai ana mamua o ko'u hooko ana aku i ka kaua aelike hana?"

Me ka pane ole, na puka koke aku la ke kaunawahine mailoko aku o ka lumi, a iloko o ka manawa pokole hoi mai la oia me kekahi pu-a pepa dala nui a haawi mai la i ka kaua Wete, a o keia ka Wete i hookomo iho ai iloko o kona eke, me kona kunou haahaa ana aku, a me kona hoao ana no hoi e honi i ka lima o ke kaunawahine.

Huki awiwi aku la na kauanwahine la i kona lima, a haka mai la kona mau maka o ka inaina maluna o ka kaua Wete, e make ai no ke kanaka ina he make kekahi ma ka nana wale ana no.

Haalulu iho la na kuli o na Wete nei a kaua, a me ka hoomau ana i ke kulou imua o ua wahine la i nee hope aku ai oia a hiki i kona puka ana aku mailoko aku o ka lumi.

MOKUNA XLVIII.

HOOMAKAUKAU I ANAINA HUI KAMAHAO.

Mai kahi aku o Kaunawahine Sofia, hele mua aku la oia no kona wahi keena uuku maluna ae o ka haleinu rama, alaila kakau iho la oia i telegarapa a he leta no hoi na kona hoaloha, Generala gerisa.

Ma ka unuhi ana ae i ka telegarapa e loaa ana ia kaua keia mau olelo:

"Ke hoouna nei wau ia oe ma ke ekeleta i na pepa e pili ana i kekahi hana kipi kuloko nui.  Ua oia aku keia mamua o ka'u i aelike ai me oe mamua.  Ma kou aoao, i panai hoi no ka'u i hana aku ai nou, e hooponopono iho oe i ko Kaunawahine Radolinisiki waiwai a e hoihoi hou ae iaia, a e hana ia no hoi i palapala kuahaua e hoike ana aole oia i hewa.  E hoomakaukau oe nou iho no ka'u haina no na mea apau i keia ahiahi."

O ka leta hoi ana i kakau ai, aole no i loihi loa, a penei na mea ana i kakau ai malaila:

"I kuu Gerisa Aloha:  E like me ka'u telegarapa, ke hoouna aku nei wau i ua pepa pili i ke kipi kuloko nui.  Ua loaa aku keia mau pepa iloko o ko Kaunawahine Sofia Alamazofa pahu.  E hana aku oe e like me kau i manao ai e pili ana no keia mau pepa.  E uku mai oe, ia'u e like me ka'u i telegarapa aku nei ia oe.  Mamua o ka loaa ana aku o keia leta ia oe, e ike ana oe i ko'u manao ma ka'u telegarapa e pili ana i ka haina."

Mahope o kona hookomo ana i ka leta iloko o ka haleleta, a mahope hoi o kona hoouna ana i ka na telegarapa, hele loa aku la o Wete e hui me Ke-pa ma, a haawi aku la iaia i ke dala i loaa mai ai no ka hana pepehi i manaoia ai e hanaia mai maluna ona.

"Heaha la hoi ka'u i ha'i mua aku ai ia oe?" wahi a Keaka i pane aku ai ia Ke-pa.  "Ua ha'i mua aku no wau ia oe, ua hilinai wau aole keia he kanaka hoihope ma kana ma olelo, a ke ike nei kaua i ka oiaio."

"Aole wau he kauaka alelolua," wahi a Wete i pane aku ai.  "O ka'u mea e olelo ai e hana no wau, a i keia manawa ke olelo hou nei wau ia oe e Keaka, ina oe e paa ana i ko wahi ilio liilii a hiki i ke kakahiaka o ka la apopo, e haawi aku no wau ia oe i elima haneri farani."

"E paa aku ana wau iaia, a ke manao pu nei no hoi wau aole oia e haalele i ho ana i keia lumi a hiki i kou manawa e kauoha maoli mai ai iaia.  Aole anei pela, e Ke-pa."

"O, aole wau e haalele iho ana i keia lumi a hiki i kou kii ana mai ia'u," wahi a Ke-pa i pane mai ai, me kona nauki no nae.

"Ina pela, e kuu hoaloha Keaka, oiai ua hilinai mai oe ia'u, no keaha hoi wau e hilinai ole aku ai ia oe?  Eia mai ka huina dala a'u i hoopaa aku nei nau.  A ina e loaa ana kekahi ulia i kuu hoaloha Keaka nei, ke ha'i aku nei wau ia oe, e Ke-pa, ina oe e loaa ana ia'u ma kekahi wahi okoa mamua o ke kakahiaka o ka la apopo, pau ko mau a-u ia'u i ka ha'iha'iia.  E ninau ae oe ia Keaka ina aole e hiki ia'u ke hana aku pela.

"O, na hiki io no ia oe ke hana mai pela, e kuu keiki hiki ke wa'uwa'u," wahi a Ke-pa i pane mai ai.

Me ko Wete hilinai e hooko io ana no o Ke-pa i kana i ae mai ai iaia, puka aku la o Wete a haalele iho la i kona mau hoa, a hele loa aku la i o Vera la.

Mahope o kona hoike ana aku ia Vera oia no ia, ua ha'i aku la oia ia Vera e hele ae no kahi lumi uuku ona maluna ae o ka hale inurama ia ahiahi, a komo aku iloko olaila.  Olelo aku la no hoi oia e hui ae ana oia me kana Vera malaila, nolaila aole ana mea e hopohopo ae ai no ka hele ae.

Oiai aole he hana hou aku ma kona aoao a hiki i ka manawa e kokoke aku ai i ka wa ana i aelike ai me Kaunawahine Sofia, nolaila, ua hele aku la oia e kiai i ke kakela o ua kaunawahine la e noho ana me kona manao e ike aku i na hana e hanaia ana ma ua kakela la e ke kaunawahine:  eia nae aole i loihi loa kona noho ana e kiai, hoomaopopo iho la oia aole he mau mea hou aku e hoea ae ana, a me he mea la ua hooholo ua Kaunawahine Sofia la e hoomalolo i kana mau hana apau a hiki i ka manawa e pau ai kana hana me Kaunawahine Radolinisiki.

Mamuli o keia ike, ua haalele iho la oia i kona wahi e pee ana a hele loa aku la e hui me ke poo o ka oihana makai o Parisa, he kanaka hoi na ua Wete la i kamaaina no na makahiki lehulehu i hala aku, ana no hoi i lawelawe hana ai nona mamua.

Iaia i hiki aku ai i ka halewai, a ninau aku no ua hoaloha la ona, ua ha'i mai la ke kiai puka, me kona minoaka ana mai:

"O ke poo wale no anei ka mea e hiki ke hana aku nou, e Ke-pa?  Ua powaia anei oe me kekahi miliona dala?"

"O ka'u mea e makemake nei e ha'i aku iaia he mea nui ia, a ke ha'i aku nei wau ia oe, ina aole wau i manao pela, aole loa wau e hele mai ianei a ninau aku nona."

Ua komo koke aku loa ka hiaai iloko o ke kanaka kiai puka no na olelo a Wete i pane aku ai, nolaila ua hele koke aku la oia e hoike i kona haku.

He mau minute mahope mai, ua alakaiia aku la oia iloko o ke keena o ke poo o ka oihana makai.

"O oe ka ia e Ke-pa, aka o Wete Detona, ka Makaikiu Amerika," i pane aku ai o Wete me kona wehe pu ana ae i kona mau umiumi hoonalonalo.

"Auwe, kuu hoaloha!" i panai mai ai ua poo la me kona lulu lima ana mai me ke aloha oiaio.  "Heaha kau hana o onei, a me he ano hoi o kekahi kanaka lapuwale i kamaaina ia makou?"

Me ko Wete hoonalonalo ole iho, ua huaipau aku la oia i na mea apau e pili ana no kana hihia, a hoike pu aku la no hoi i kona manao o ka hiki ana aku imua o keia kanaka hanohano.

"Ke makemake nei wau e haawi mai oe i elua o kou mau kanaka i hilinai nui ia i mau hoike no'u, hookahi o laua he hiki ke kakaupokole a hiki ke lawe ae i na olelo maoli e hoopukaia aku ana, a o kekahi no ka hoolohe wale ana no; o laua a elua i mau kanaka hiki ke kamailio ma na olelo Farani ame ko Rusia, no ka mea ke manao nei wau aole e nele ko ke kaunawahine kamailio m aka olelo Farani."

"Ua loaa kau i noi mai nei, aka e hoomaopopo pu iho no hoi oe aole e hiki ia'u ke hopu aku iaia."

"Aole no o'u makemake nau e hopu, i keia manawa."

"Ihea e hui aku ai na kanaka au e makemake nei me oe?"

Hoike aku la o Wete i kahi haleinu rama, me kona pane pu ana aku:

"E hiki ae lakou i ke ahiahi okoa no, ina oe e oluolu mai ana."

"E hiki io aku ana no lakou ilaila, a e hiki ana no ia oe ke hoomaopopo mai ia lakou hookanikani ana iluna o ke pakaukau i kou manawa e komo aku ai.  E mau ana anei oe me kena hoonalonalo ou?"

"Ae."

"Ina pela, aole lakou e haule hope ana."

MOKUNA XLIX.

HOIKE KA MEA HEWA I KONA HEWA IO.

I ka hiki io ana no o ka manawa a Wete i kauoha ai i ke poo o ka oihana makai o Farani e hiki ae ai na kanaka ana i makemake ai i kahi haleinu rama, aia hoi me ka hoohewahewa ole ae, komo ana na poe, la, a oia no ko Wete manawa i hoonoho aku ai ia lakou ma kekahi lumi okoa e hiki ai ia lakou ke lohe i na olelo apau e kamailioia ana iloko o kahi lumi uuku ona.

Aole no hoi i liuliu mahope iho o ka pau ana o keia mau hoonohonoho ana ana komo ana o Vera, a akahi no ua Wete la a ha'i aku i na mea apau a Vera e hana aku ai.

A'oa'o aku la oia i ka Vera mau olelo e hoopuka aku ai, a pela no hoi me kona ano ana e ku aku ai imua o ka inaina o Kaunawahine Sofia, a mahope o ko Vera hoao ana e like me na kuhikuhi ana ame na a'oa'o ana a Wete, aole he kanalua i koe iloko o ua Wete la a kaua i ko Vera hiki io ke hooko aku i na kuhikuhi apau i haawiia aku iaia.

Mahope iho, haalele iho la oia i kana milimili e noho ana, a kamoe aku la kona mau kapuai wawe no ke kakela o Sofia, a haawi aku la no hoi i na kuhikuhi ana i ole e lalau ua wahine la ke hele ae oia, a haalele iho la a hoi awiwi aku la no kahi keena ona maluna ae o ka haleinu rama.

Ua hiki io ae no o Kaunawahine Sofia, aole nae me kona aahu ponoi, aka ua hoonalonalo iho oia iaia iho me ka lole o kona ukali i uhi paa ia hoi me kekahi koloka eleele nui.

Ua hookipa koke ia aku oia e Wete no kahi lumi uuku ona io ka lua o ka hale, a me ke ani ana a kona lima, i pane aku ai oia:

"Ano, e na lede, ua hiki ia olua ke hoike i ko olua mau manao, a e noho aku hoi wau maanei a kiai aku ia olua o hana kekahi o olua i ka hana kimopo."

Noho iho la ua Wete nei a kaua iluna o ka noho, ame kona kulana kanaka noonoomaikai i kau aku ai kona mau maka maluna o na wahine e ku aku ana he alo a he alo.

Iloko hoi o ko Sofia noonoo he manao e noi aku iaia e haalele iho ia lana iloko o ka lumi, eia nae na hoike mai la oia i kona hoololi ana ia manao ona i ka manawa a Vera i hoike mai ai i kona ano maka'u ia laua nei i komo aku ai iloko o ua lumi la, a i ka wa hoi ana i pane mai ai me ka leo inaina:

"Owai oe, e keia kanaka?  Owai hoi oe, e keia wahine?  He lumi hoolimalima keia."

"E hoomalu ia oe, e ka wahine, a e ae mai ia'u e ha'i aku ia oe, aole he waiwai e loaa mai ana ia oe ma kou hookiekie ana i kou leo," wahi a Wete i kahamaha aku ai.

"Owai au? i panai aku ai o Sofia.  "E nana!"

Ia manawa oia i wehe ae ai i kona uhimaka, a kau pono aku ia kona mau maka maluna o Vera i hoomaopopo pono mai ai ua Vera la a kaua i kona enemi.

"O oe?  O oe?  O oe anei ia?" i hooho ae ai o Vera me ka leo nui.

"Ae, Owau, Owau no keia.  A aole anei ou ike iho i kou wahi e ku nei i keia manawa?"

"O, e na lani, e kokua! e kokua mai ia'u!" i hooho hou ae ai o Vera me ka leo nui

(Aole i pau.)

KALE O LEONA.

Ka Naita Puuwai

Hao Wiwoole ---

KA HOOOPAKELE O KE KAIKAMAHINE ALII

I LAWE MALUIA

MOKUNA XXI.

OIAIO OLE KA MAKUA I KE KEIKI

"Alaila aole au e hooko."

Ua pii koke ka uluku iloko o ka lunakanawai aka ua kaomi koke iho no oia ia haawina mamuli o kona makemake ole e hoea aku ke kaikamahine imua o ka moi me na maka pulu waimaka, nolaila, ua hamau wale iho la no oia no kekahi manaa, a haalele iho la i ka wahine opio no ka hoomakaukau ana iaia iho.

Aole no hoi i piha ka hora hookahi ua makaukau ae la ka wahine opio no ka haalele ana i kona home i noho mau ai a i nui ai hoi iloko o kona mau paia, a me ia pu hoi he elua mau wahine loawelawe nona.

"Ua oi loa ae kou u'i i kekahi." wahi a Beni Hame i pane aku ai iaia e alakai ana i ka wahine opio mai ka lumimoe aku ona (Zira).  E hoohihi loa ana ka moi ke ike mai ia oe, a piha hoi i ka olioli."

"A me ke kaumaha ma ko'u aoao," wahi a Zira.

"Aole pela e Zira.  O kou nani ka mea e lilo ai oe i mea nui i ka moi."

"A ina mae ia nani, pehea aku?"

"Aole e mae kou nani," wahi a Beni Hame," e mau ana kou nani a make wale ka moi."

"O, he kanaka kumakaia maoli keia ia'u," wahi a Zira i nalu wale iho ai no iloko ona," e mau aku ka kona nani a make wale kana kane.

Mai kamailio hou mai oe ia'u no ia mea--he mea hoouluku wale no ia i kuu noonoo."

A me na manao i waihoia aku e ka wahine opio oia hoi he hoolohe wale no ka ka lunakanawai, a me ia ano i alakai aku ai oia i ka wahine no ke kaa e kali mai ana no ka hooko hana ana.  Ia Zira i a'e aku ai iluna o ke kaa ua hu koke ae kona kaumaha a u wale iho la a Beni Hame nae i lohe ole mai ai, a mahope o ka uhiia ana iho o ka uhikaa, o ka hoomaka aku la no ia o ke kaa i kana hana a no ka Halealii ka pahuhope.

I ka wa i hoea aku ai o ke kaa a ku mawaho o ka Halealii ua lele iho la o Beni Hame a me kona mau lima ikaika i hii mai ai oia i ka wahine opio no ka hookuu ana i ka honua oiai na elele a ka moi e kuku aku ana no ka hookipa ana mai i ko lakou hakuwahine hou no ke keena i hoomakaukauia nona.  Alaila haalele iho la o Beni Hame a hele aku la e hoike iaia iho i ka moi Mahomeda.

I ka manawa a Zira i hoea aku ai i kahi o kona mau keena i haawiia ai nona he mea e kona puiwa i ka nanai nui oloko--o ka weleweta o ka papahele he nani wale no o ke ano maikai loa ame na hookinohinohi i kakauia apuni ka paia ame ka huihui kukui nui e lewalewa ana mai ke kilina iho iwaena o ke keena ona i hookipa ia aku ai, eia nae, he mea ole keia mau nani apau i ka wa i hoi hou mai ai kona hoomanao ana i kana kane naita kristiano a hina aku la oia iluna o kekahi ko-ki me na noonoo kaumaha.

Ua noho iho oia wale no me na wahine lawelawe elua i ukali aku iaia a pau aku la na eleel ma ko lakou wahi o ka hana i hookohuia aku lakou, a i ka pau ana o ka lole o Zira i ka wehewehe a domo i kona lole noho kauhale ua hoi aku la na wahine lawelawe iloko o ko laua keena i haawiia no laua.  O ka nalo ana aku no hoi ia o na wahine lawelawe mawaho aku o ka lumi a Zira e noho ana oia no ka wa i makili ae ai kekahi wahi puka uuku ma kekahi aoao o ka paia o ka lumi o Zira a komo ana o Emina i ka hamama loa ana o ua wahi puka nei.

"Hamau!" wahi a Emina i kona komo ana aku me ka alaaiawa ana ma o a maanei o ka lumi.  "A ua hiki io mai oe i ka Halealii."

"Na lakou wau i lawe mai," wahi a Zira i pane aku ai me ke ano-e iloko o kona noonoo.

"O, ua manao ae wau aole oe e laweia mai ianei," wahi a Emina i pane aku ai me ka leo ikaika.

"O, ua hiki mai au ianei no ka hoopakele ana i ke ola o ka mea a'u i aloha io ai.  Ua ike anei oe ia mea he aloha?" ninau aku ai o Zira.

"Ae,--aneane aku i kahi o ka pupule," wahi a Emina.

"Alaila o oe mai la kekahi iloko o ka'u mea huna."

"A owai keia mea au e makemake nei e hoopakele--a pehea e hanaia ai i pakele ai?" i ninau hou aku ai o Emina.

"O Kale o Leona ," i hoohoia mai ai e Zira me ka wiwoole.

"Nawai i ha'i aku ia oe i kona hoopakeleia?"

"Na Beni Hame no.  Wahi ana ina e hiki mai au ianei alaila e hookuu ia no kuu haku kristiano, a ina wau e hoole alaila e make no oia."

"O, e hoino, e hoino aku ia lakou apau.  Ua hoopunipuniia mai la oe e Zira.

"Ke kumakaia!" i hooho ae ai o Zira.

"Hamau.  E loheia mai auanei kaua."

"E ha'i mai ia'u ina io wau ua hoopunipuniia.  E pepehiia anei o Kale a make?" wahi a Zira i ninau aku ai.

"Ae," wahi a Emina, "a i keia po e hoko ai ka moi ia hana."

"Aole e hiki.  He kumakaia maoli keia.  Aole e hiki ke lawelaweia ia mea weliweli."

"Ua ha'i mua aku wau i kuu manao no ia mea," wahi hou a Emina.

"A no ka hoopakele ana i kona ola wau i hoopaa ai i kuu manao e mohai aku i kuu ola ame kuu hauoli no ka mau loa.  E apo aku no wau i ke kino o ka moi me kuu mau lima nei oiai nae kona hanu e pa iho ana me ka hanu o ka laau-make."

Ma ka lohe ana o Emina i keia mau olelo i puka aku mai ia Zira aku ua nui ino loa kona puiwa me ka ha 'oha'o nui a uluku nui ae la kona noonoo me ka uumi ana iho no nae o ka wahine a hala kekahi manawa me ka pane leo ole, alaila hoi hou mai la ka noonoo maikai me ia a me ia kulana oia i pane aku ai:

"He kakaikahi loa ka poe e hanu ana i ka laau make a ola no."

"Alaila ina ia he mea no'u e make ai i pakele ai kuu kristiano alaila e hooko no wau.  O, e hele aku e Emina a hoike aku i ka moi e lilo no wau nona ma na ano apau ina e hoopakele oia i ke ola o Kale o Leona."

"Aole e hanaia mai ana e like me kau noi.  Ua hoopunipuniia mai oe.  He alehe ia e hoohihia wale ai no ia oe," wahi a Emma i hoomaopopo aku ai.

"O, e ka make!" wahi a Zira i puan@ ae ai.

"E lilo anei oe i wahine na ka moi ano, pela anei kou noonoo?" i ninau aku ai o Emina.

"A e make Kale o Leona?"

"Ae."

"Aole hiki.  He Kane oi ae ka'u o ka maikai i aloha io mai ia'u i mare mai ia'u.  He kane ka'u i manaoio ai ua lilo kuu puuwai nona.

Ia Zira i hoopau ae ai i kana mau olelo ua unuhi ae la oia he wahi pahikaua pokole mai kona poli ae.