Ka Nupepa Kuokoa, Volume XLIII, Number 16, 21 April 1905 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, POALIMA. APERILA 21, 1905.

 

Holo ka Bila Waiona i na Hale.

Mti ka aoao eha mai.

A maluna o keia kumuhana i hapaiia mai ai o ka noonoo ana i ka leta a ke Kiaaina maluna o kana vito ana i ka bila kalana aka ma ke nei ua waihoia ka noonoo ana i ua leta nei a ka Poalima ae, oiai nae ua hoopaaia ae ka loaa ana mai o ua leta vito nei ma ka moolelo. Mai ke Kiaaina mai no he leta e hoike mai ana i kona kakaumea i ka bila Senate 68, a na ke Kakauolelo Teritori i hoihoi mai i ka oleio hooholo a Lane e noi ana no ke kaupalena ole i na aina hoomana i ke kaukani e like me ia i kaupalenaia iloko o na hui e ae e hooaiaiia mai ana e heluhelu ekolu ia ke olelo hooholo e pono i mamua o ka hooko ana o ke Kiaaina i kana oihana, a pau no hoi ke kumuhana i ka heluhelu elua ia. Na ka Hale he hoike i ka a’ekuia ana o ka vito a ke Kiaaina maluna o ka bila kalana, a no ka hemahema o na olelo o ka leta ua hoihoi hou ia ka leta no ka hooponopono ana. Ma ka noonoo ana i ka bila Hale 176 ua hooholoia ae la ma ka heluhelu ekolu, a ia manawa i hoea mai ai ka vito a ke Kiaaina maluna o ka bila Senate 57 a kakooia no hoi ka vito. Noonooia ka bila a Dickey pili i na auhau, mai ka hoike komite hakawa mai a ma ka noonoo ana me na hoololi ua hooholoia ae la ua leia nei ma ka heluhelu elua, a mahope koke iho i hoea mai ai ua leia na ke Kiaaina pili i na koi a na makaainana Pelekane. – e hooaiai mai ana ke Kiaaina e hookomoia i itamu iloko o ka bila haawina. Na ka Loio Aupuni mai he leta e pane ana pili i ka olelo hooaiai i aponoia e ka Senate no ka ui ana aku iaia ina paha ua loaa ma laia he kuleana holo wale iluna o na kaauwila ame na mea like, a ua Kalama i hookomo mai he bila e pakui ana i ke kanawai o ke aupuni nui a pau no hoi i ka hooholoia ma ka heluhelu ekahi. Hapaiia ka bila Senate 48 pili i ka laikini a hooholoia ma ka heluhelu ekolu a hoopanoe no hoi ka Aha.

 

KA HALE.

 

 

La Hana 49, Aperila 13. – O ka hana ano nui ma keia la hana o ka Hale oia no ka vito a ke Kiaaina maluna o ka bila kalana, a iloko o ka wa koke no i noonooia ae ai ua vito nei ua a’eku ae la ka Hale, a ke uhai mai ka Senate i ka hana a ka Hale o ka make no ia o ka vito a holo no hoi ka bila. – a he ekolu wale no i kakoo ae i ka vito oia o Kaniho, Pali ame Pulaa. Ma ka noonooia ana o na hoololi o ka Senate maluna o ka bila waiona ka mea nana i hooikaika ae i ka noonoo o na hoa no ka noonoo ana, a mahope o ke kamailio nui ana ame na hoao’e hoololi ua hooholo ae ia ka Hale e lokahi maluna o na hoololi a ka Senate maluna o ua kumuhana nei. Na Coelho i hookomo vila mai mahope iho o ke kapae ana i na rula, he bila hoi e noi haawina ana no na hana o ke Aupuni e pau ana i Iune 30, 1905, a pau no hoi ka bila i ka heluhelu ekahiia, a na ke komite pa’i i waiho mai he mau bila a pau no hoi lakou i ka wahoia i na komite kumau e ae. Mahope iho o ka hoomaha ana ua hoea hou mai la he leta vito mai ke Kiaaina mai maluna o ka bila Senate 57. a hoopaneeia no hoi ka noonoo ana i ka vito a ka la-apopo. a hoopanee no hoi ka Hale.

 

KA SENATE.

 

La Hana 49, Aperila 14. – Ma keia la hana i piha ai na la hana he kanalima i ka Ahaolelo, oia hoi na Hale Kaukanawai a elua – eia nae, o na la hana i hana maoli ia e ka Aha Senate he 49 oiai ua haule hookahi la hana ia Aha a o ka Hale no o na Lunamakaainana ka i piha pono kona mau la hana he 50. eia nae, ua heluia no ke kanalima la hana maluna o na Hale a elua, ma kekahi olelo ana, he mau ia hana ia no ka Ahaolelo, a o keia la i piha iho la ke kanalima eia ka la i holo a lilo ae ai ke Kalana i kanawai ma ka a’ekuia ana o ka vito o ke Kiaaina maluna o ua bila kalana nei, oiai ua a’eku mua ae ka Hale ia vito hookahi; a o kaia poe keonomana ka i haawi ae i ko lakou a’eku – Achi, Brown, Dickey, Dowsett, Hayselden, Hewitt, Isenberg, Kalama, Lane, McCandless, Woods – II.

Hoole – Bishop, Gandall, Paris – 3.

Hiki ole mai – Wilcox – I.

Mahope koke iho no o ka a’ekuia ana o ka vito a ke Kiaaina maluna o ka bila kalana ua hookomo koke mai la o Dickey he alua mau bila – he hookahi e hoolako ana i haawina no na kalana o kekahi pili i ka hoololi i kekahi mau pauku o ke kanawai kalana, oiai hoi e kapae ana i na pauku ame na olelo pili i na lunahelu auhau a ohi auhau a pau no hoi i ka heluhelu ekahiia. Na Achi i hookomo olelo hooholo pili i ke pa’i ana i ke kanawai kalana ame ka haawi wale ana i 1500 kope ma ka olelo Beritania ame 3000 ma ka olelo Hawaii, a na Bishop mai hoi i pakui mai i ka olelo hooholo, oia hoi, e waihoia ke pa’i ana a hookuu na hana o ka Ahaolelo i pau pono ai na mea apau o ke kalana i ke pa’i pu ia, a holo ka olelo hooholo ma ka heluhelu ekahi ana. Na ke komite hookolokolo i waiho mai he hoike maluna o ka bila Hale 146 pili i ke kukulu oihana kinaiahi iloko o Wailuku ame Kahului, e hooaiai ana ke komite e loaa ia haawina hookahi ma na wahi apau o ka Teritori e makemake ana a i kupono e kukuluia i oihana kinaiahi, a e hooholoia aku ka bila o ia ano. Hapaiia ka noonoo ana o ka olelo hooholo a Lane pili i ke kaupalena ole i na eka aina kuleana o ka Hoomana Kakolika a holo ma ke heluhelu elua, a holo no hoi ka bila Senate 113 ma ka heluhelu ekolu. Holo na bila Senate 114 ame 117 ma ka heluhelu ekolu me ka loaa ole o na hoohalahala i ka bila mua a hoohalahalaia hoi ka bila hope mamua o kona hooholoia ana eia nae ma ke koho ana aole he mea i koho ku_e. Holo na bila Senate 118, 119, 121 ame na bila Hale 107. ame 133 ma ka heluhelu ekolu, aka ua waihoia ka bila Hale 160 i ke komite hooponopono ma kona wa i noonooia ai no ka heluhelu ekolu. Ma ke noi a Lane e noonoo hou ia ka bila Senate 176 i hooholoia ai ma ka heluhelu ekolu, ua aponoia ae la ke noi a mahope o ka noonooia ana e kapae ana hoi i kekahi mau wahi i kupono ole ua hooholoia ae la ka bila. Ma ka noonoo ana i ka bila Senate 169 ma kona heluhelu ekolu ua hoopanee hou ia ae la a ka Poakahi e noonoo hou ia ai i loaa ai i manawa no ka heluhelu elua o kekahi mau bila Senate, a ia manawa hookahi no hoi i hoea mai ai he mau leta na ke Kiaaina mai e hoike mai ana i kana mau vito maluna o ka bila pili i ke kula hiekie o Hilo, a o ka lua o na vito maluna no ia o ka bila Hale 103. Hooholoia ka bila Senate 122 ma ka heluhelu elua, a pela no hoi na bila Senate 124, 125, 127, 128, 129, 130 ame 131 ma ka heluhelu ia ana no nae ma na poo. Ua heluhelu elua ia ae ka bila Senate 2 pili i ke koho laikini waiona me ka hoike lokahi maluna olaila a hoopanee hou ia ka noonoo ana no kahi la ae. a waihoia no hoi ka bila Senate 132 i ke komite o na ala me loaa ma kona heluheluia ana. Holo ka bila Senate 133 ma kona heluhelu elua a waihoia i ke komite aina aupuni. a waihoia no hoi i ke komite hookolokolo ka bila Senate 134 ma kona wa i heluhelu elua ia ai. Noonooia ka bila Senate 135 pili i ke kaupalena i ka holo nui o na kaa otomobila ame na kaa o ia ano like i ka ewalu mile i ka hora a hooholoia ma ka heluhelu elua a ma ke noi a Achi no ka noonoo hou ia o ka bila Senate 126 ua aponoia ae la ke noi a hooholoia no hoi ka bila ma ka heluhelu elua. Holo ka bila Senate 136 ma ka heluhelu elua a waihoia i ke komite huikau a pepehiia hoi ka bila Hale 117 ma ka hoike ku-e a ke komite a waihoia hoi i ke komite o na ala me loaa ka bila Hale 31 ma kona wa o ka heluhelu elua ia ana. Waihoia na bila Hale 123. 130, ame 186 i ke komite aina aupuni, a o na bila Hale 167 ame 180 i ke komite hoojolokolo, a o ka bila Hale 68 i ke komite ola. Holo ka bila Hale 169 me na hoololi liilii ma ka heluhelu ekolu, a pau no hoi i ka heluhela ekahiia na bila Hale 96. 183. 185 ame 188, a hole no hoi ka bila Hale 94 ma ka heluhelu elua, a hoopanee no hoi ka Aha mahope iho o ka hoea ana mai o ka leta a ka Hale e hoike mai ana i ka lokahi maluna o ka bila Lazareto.

 

KA HALE.

 

La Hana 50, Aperila 14. – O kekahi kumuhana i kamailio nui ia oia no ka olelo hooholo hui i hookomoia e Broad pili ia Iwilei, e noi ana e hoomana ana i ka Makai Kiekie e hoonoho i eha mau makai ilaila no ka malama ana i ka maluhia a aponoia ka olelo hooholo. Na ke Kiaaina mai he mau leta e hoike mai ana he elua ana vito maluna o na bila Hale 103 pili i ka uku o na kiure ame ka bila Senate 23 pili i ke kukulu halekula kiekie no Hilo, a hoopaneeia ka noonoo ana o na vito a ka Poakahi. Mahope o ka hoike komite hoolilo pili i kekahi mau itamu no ka uku aku, ua heluhelu ekolu ia ae la kekahi mau bila e like me ia malalo iho: Bila Hale 148, bila Senate 100, ame 74 a lokahi hoi ka Hale i na hoololi o ka Senate aluna o ka bila Hale ma’i lepera. Mahope o ka noonoo ana i ka bila e haawi mana ana i ka Lunanui o na Hana Hou pili i na aelike a noonoo hou ia i Aperila 24, ua waiho mai la ke komite hookolokolo i kana hoike lokahi pili i ka mahele ana i ka Apana Senate Ekahi iloko o elua mahele e kohoia ai i elua mailaila mai, a waihoia ka hoike ma ka papa. Na ia komite hookahi no he hoike maluna o ka bila a Smith no ke kanawai hoopanee, a ua hooaiai pu mai no hoi ke komite maluna o ka bila a Fernandez pili i na aina, a pau pu no hoi ka bila pili i ke koho komisina hooponopono kanawai auhau me na hoololi liilu. Na ia komite hookahi no he hoike maluna o ka bila pili i na alahao a pau pu ka bila pili i ka auhau ukukula o $1, o na keiki i hanau mawaho o Amerika Huipuia mai na makua Asia mai. Ua hooaiai pu no hoi ke komite ia ka bila pili i ka paniku ana i na inomamuli o ka hookamakama. Ua hooaiai pu ke komite hookolokolo e hooholo loa ia ka bila pili i ka hooiaio a hoapono ana i na palapala aelike ame na ano like. pau pu me ka bila kukulu papa limahana ame ka bila Senate 104. Na ke komite waiwai keia mau hoike malalo iho: E waihoia ka bila Hale 214 i ke komite hookolokolo no na hooponopono, a e hooholoia ka bila Hale 201 a e ukuia aku ia T. L. Holloway i $31.90 no ka auhau i uku papalua ia. Hooaiai ke komite i ka bila a Long pili i ka ohi ana i na hoolimalima, a e uku aku ia Kakauolelo Avery i ka huina o 240 dala no kana mau hana no ka bila kalana, aka ua waiho mai o Nakuina i kana hoike hapauuku e ukuia no ka huina holookoa o $476.29, a waihoia na hoike ma ka papa ho ka noonoo pu ana me ka bila. Na ke komite waiwai i waiho mai he mau hoike hapanuiame hoike hapauuku a waihoia na kumuhana ma ka papa no ka noonoo pu ana me ka bila. Na ke komite aina aupuni i waiho mai he hoike maluna o ka haawina no ka hoomoe paipu wai no ke alanui Paahao a hiki i alanui Iwilei, a hooaiai hoi ke komite i ka haawina o $100 no ka hana o ke alanui o Lanai. Na ke komite hoonaauao he hoike maluna o ka haawina kukulu halekula no Naalehu, e hoike mai ana ke komite ua waihoia aku ia kumuhana i na hoa o Hawaii, a na ia komite hookahi no he hoike maluna o ka hana hou ana i kekahi mau halekula o Maui no ka haawina o $1200. Na ke komite hoonaauao no i waiho hou mai he hoike maluna o ka haawina no ka halekula o Waihee, e hoike ana i ka waihoia o ke kumuhana i na hoa o Maui. Hapaiia ka noonoo ana o ka vito o ka bila Senate 39 a aponoia ka vito, a na ka Peresidena Papa Ola i waiho mai i ka pane maluna o ka makemake o ka Hale pili’i ka halekuai o Kalaupapa a hoopanee no hoi ka Hale.

 

KA SENATE.

 

La Hana 50, Aperila 15. – Ma keia la hana i hoea pau pono ae ai na hoa i ka wa i hoomaka ai na hana a pau i ka heluhelu elua ia na bila a Dickey no ka hoolawa kupono ana i na hoohalahala a ke Kiaaina maluna o ka bila kalana ana i vito ai a i a’ekuia ai e na Hale Kaukanawai. Mai ke komite huikau mai he hoike maluna o ka bila Senate 136 a waihoia ka hoike ma ka papa no ka noonoo pu ia me ka bila, a o ka heluhelu ekolu wle aku no koe oiai ua pau mua ka heluhelu elua o ka bila. Mai ke komite hookolokolo mai he mau hoike maluna o ka bila Hale 183, bila Senate 134 ame ka bila Hale 75 a aponoia ka hoike o ka bila mua a waihoia hoi ka hoike o ka bila elua ma ka papa no ka noonoo pu ana me ka bila a pela no hoi ka hoike o ka bila hope. Ma ka noonoo ana ia o ka vito a ke Kiaaina maluna o ka bila pili i ke kukulu halekula kiekie no Hilo, ua a’ekuia ae la ka vito me hookahi wale no hoole ma o Dickey la ka mea i kakoo i ka vito. Na Bishop i hookomo palapala noi no ka hooholo loa ana i ka bila Hale 45 a waihoia ke kumuhana i ke komite o na ala me loaa, a he palapala noi mai no hoi i hookomoia e ia no e kokua nui ana i ka bila Hale 180 pili i ka hoopii ae i ka ukupanee o 6 pa-keneta a i ka ewalu a waihoia ke noi ma ka papa a noonoo pu ia me ka bila. Mahope o ka heluhelu elua ana i ka bila a Dickey pili i ka haawina no na kalana, a mahope iho no hoi o ka hooholoia ana o ia bila ana pili i ka hoololi ana i kekahi mau olelo o ke kanawai kalana pili i na luna auhau ame luna ohi, ua waiho mai la ke komite hookolokolo he hoike lokahi maluna o ka bila Senate 134 a aponoia ka hoike komite. Na ke komite hookolokolo no i waiho mai he mau hoike maluna o na bila Hale 167 ame 185 a aponoia ka hoike mua no ka hoomoe ana i ka bila ma ka papa, a waihoia hoi ka hoike elua ma ka papa no ka noonoo pu ana me ka bila. Na ke komite hookolokolo he hoike lokahi ole maluna o ka bila Hale 180 a waihoia ka hoike ma ka papa no ka noonoo pu ana me ka bila a hooholo loa ia ka olelo hooholo a Lane pili i ke kaupalena ole i na aina o ka Hoomana Kakolika i ke kaukani wale no ma ka heluhelu ekolu me ka hoohalahala ole: a holo no hoi ka olelo hooholo 6 ma ka heluhelu elua oiai he olelo hooholo hui ia. Na ke komite hookolokolo mai he hoike lokahi maluna o ka bila Hale 108, a hooholoia no hoi ka bila koho laikini waiona a Dickey, i hookomo ai ma ka heluhelu ekolu, a hoopaneeia hoi ka noonoo ana o ka bila Senate 123 a kahi la ae a holo hoi ka bila Senate 126 ma ka heluhelu ekolu. O ka bila Senate 135 pili i na kaa otomobila ua hooholoia ma ka heluhelu ekolu a pela no hoi ka bila Hale 94 aka ua ku-e nae o McCandless a hooholo loa ia hoi ka bila Hale 146 pili i ke kukulu oihana kinaiahi no Wailuku ame Kahului ma ka heluhelu ekolu a hoopanee no hoi ka Aha.

 

KA HALE.

 

La Hana 51. Aperila 15. – Ma keia la hana o ka Hale aole i loia loa ka noho ana o ka Hale a hookuu na hana. a o kekahi kumu paha oia no ka liuliu ana no ka paani kinipopo i malamaia ia auwina la mawaena ona ame ka Senate. Na Coelho i hookomo olelo hooholo pili i ka nana ana i na mai lepera a ia Mrs. Makanui. A mamuli o na rula hou i lokahiia ae ai e ka Peresidena Senate ame ka Lunahoomalu Hale ua hooholoia ao ua olelo hooholo nei ma ka heluhelu ekahi a he elua heluhelu ana i koe oiai he olelo hooholo hui ia. Ma ka hooholo ana ua lokahi ae la ka Hale maluna o na hooloo o ka Senate maluna o ka bila Hale pili i na laikini. a na ke komite aina i waiho mai he hoike lokahi maluna o ka bila pili i na palea hoomoe paipu o Honolulu. Na ke komite makai i waiho mai he hoike lokahi mahuna o ka bila pili i ka hoopa’i o ka holonui maluna o na uwapo, a na ia komite no he hoike pili i ke kupono i ka uku ana aku ia Ah Man i ka huina o $25 he huina bela ana i uku ai i ka aha. Ma ke kauoha ua weheia mai la na bila Hale 188 ame 199 ma ke komite hookolokolo mai no ka waiho ana maloko o na hana o ka la o kahi la hana ae, a na ke komite hoolilo i waiho mai he hoike e hooaiai ana i ka maikai o ka waiho ana i ka olelo hooholo noi e uku ia Shaw i huina dala no ka lio i poino ai. – e waihoia ia kumuhana ma ka papa, a na ia komite hookahi no he hooaiai e waihoia ka olelo hooholo pili i ke kumukuai o na buke kanawai. Hooponoponoia ma ka papa, oia hoi, he olelo hooholo e noi ana i $5 ma kahi o $10. Na ke komite hoonaauao i waiho mai he hoike maluna o ka bila pili i ke kukulu kula mahiai. e hoike ana ke komite ua lawa no ia Lahainaluna ina e lawelaweia ia mau mahele iloko olaila, a hoopanee no hoi ka Hale.

 

KE NEE LA NA MOKU –

KAUA O RUSIA.

 

MANILA, Aperila 14. – Ua loaa mai nei ka hoike ia Adimarala Train mai Saigon, Cochin Chinal i ka hiki ana aku o ka moku lawe ma’i o na Rukini Orel me ka nui o ka poe i eha.

TOKIO, Aperila 15. – O ko na Rukini pualikoa maoli ua hiki aku nei ma Kirin. O ka pualikoa kiai o hope o 12.000 koa aia no ke halawai la me ko na Kepani pualikoa kiai omua.

SAIGON, Aperila 15. – Ua hoopiha lanahu ame na mea ai iho nei ka moku lawe ma’i Orel o na Rukini a holo aku no.

TOKIO, Aperila 16. – Mamuli o ka hoea ana mai o ko ka enemi aumokukaua ma na kai o ka Hikina eia ke hoonohonoho nei ka hui mokuahi o na Kepani e holo nei no Amerika e hoomalolo iho i ka lakaou hana a ke manaolana pu ia aku nei no hoi e hoomalolo pu ana me ko Fomosa.

ST. PETERSBRURG, Aperila 16. – Ke manao ia nei e kaua akea ana o Adimarala Togo. Ua manao ia aku eia oia ke hoolala nei o lelekaua i ka po me na moku topido, a ma ia ano e hoopuehu ai oia i ko na Rukini aumokukaua a mahope aku e lelekaua pakahi aku ai oia.

HONGKONG, Aperila 17.- Ua hoikeia mai ka loheia ana o ke kani o na pu ma ka la 12 o Aperila nei, ma kahi he hookahi haneri ma kanalima mile ma ka akau o ka Mokupuni Natuna.

SINGAPORE, Aperila 17. – He umi-kumamawalu mokukaua Rukini i ikeia aku nei ma ke Kaikuono Kamranh.

PARISA, Aperila 18.- Ua hoike ae kekeahi lono i hooiaio ole ia ua ikeia aku ko Adimarala Rojestversky aumokukaua mai Hongkong aku e holo ana no ka hikina akau.

LADANA, Aperila 19. – He hapa o ko na Rukini aumokukaua ka i hoopiha lanahu ae ma Kamranh ma ka la 16 nei. Ke manao ia nei ua mahele ae ua aumokukaua la. Ua hoike ae o Kuhina Hayashi i ka manao aole e lelekaua aku ana o Adimarala Togo i ko na Rukini aumokukaua holookoa aka e kii pakahi aku ana kona mau moku topido i ko na Rukini.

MANILA, Aperila 19.- He ekolu mokukaua i ikeia aku mawaho ae o Batangas, aole nae i maopopo ko lakou aupuni.

SINGAPORE, Aperila 19. – Ua oki ae na agena o na Rukini i ka uwea telegarapa o Fomosa–Foochow.

PORT LOUIS, Apr. 19. – Ua papaia aku nei ka hoopiha lanahu ana a ka mokuahi Geremania Juliette ma keia awa i keia la. Ua hoohuoiia ua hoopiha lanahu keia mokuahi no ko Rusia aumokukaua.

TOKIO, Apr. 19. – Ke manaoia nei e na Kepani e noho ana o Rojestvensky ma ke Kaikuono o Kamranh a hiki i Mei, e hoouna ana hoi i na mokukaua holo mama no ka hopuhopu ana i na moku kalepa o na Kepani. Ua oleloia ae ua waiho aku nei ke Aupuni o Iapana i ka hoohalahala e kue ana i ke ku ana o ko Rusia aumokukaua ma Kamranh.

TOKIO Apr. 20. -  Ua waiho aku nei o Iapana i ka hoohalahala ia Farani e kue ana i ko na Rukini hoolilo ana i ke Kaikuono o Kamranh i kahua no lakou. Ua makaukau ko Iapana aumokukaua e holo aku ilaila.

NEWCHANG, Apr. 20. – Mamuli o ka hiki ana mai nei o ko ke Kai Balatica aumokukaua ke manao ia nei e hoopilikiaia ana ko Iapana oihana halihali ukana a koa hoi no Manukuria. Eia nae hoi ua nui ka lako o na pualikoa.

 

He Pane no ka Ninau.

 

Mr. Lunahooponopono o ka Nupepa Kuokoa; Aloha oe: - E ae mai I ko oluolu e hoolauna aku ia’u me ke Kula Sabati Mamona o Kalaoa, Kona Akau, Hawaii, no ka nonau Baibala ana I waihoae nei I ke “Aloha Aina,” o Aperila 1, A. D. 1905, oia keia, “Heaha ka mea I oi ai o Ioane Bapetite, mamua o na Kaula apau a ka Haku e olelo nei. Haina. O Ioane Bapetite ka mua loa o na Kaula i ike maka, I ke kino maoli nei, a hooia hoi. Ioane 1:29-30; 1:35-37. Matt. 3:13-16. Ke hoike nei keia mau Mokuna me na Pauku i ka oiaio o ka haina maluna ae; Oia ka mea i oi ai o Ioane Bapetite mamua o na Kaula apau.

 

Kou oiaio.

DANIAL A. K. HAUMANA.

Kula Sabati o Kamoiliili, Aperila 11, A. D. 1905