Ka Nupepa Kuokoa, Volume XLIII, Number 17, 28 April 1905 — Hoomanao Ala Hou ana o ka Haku. [ARTICLE]

Hoomanao Ala Hou ana o ka Haku.

O ke Sabati i hala oia ka la i ala hou mai ai ka Haku mal ka make mai, a ma ia la i malama ae ai kela ame keia halepule ame ya hoomana like ole o ke kulanakauhale nei i na hoomanao ana. Ua hoowehiwehiia ae na paia o keia mau halepule me na lau nahele uliuli ame na pua aala, a ua piha ae no hoi na anaina i malamaia ae, o ka oi loa aku no nae oia ka halepule Katolika Roma. Ua piha ae keia halepule mai ke kakahiaka a hiki wale i ka po ana, a ua malama pu ia ae no hoi he mau halawai ma kela ame keia mau hale halawai like ole o ia hoomana. Ma Kawaiahao ua malama ia ae na hana e like me ka mea mau, aka nae 0 na haawina e pili ana i ka la o ka Haku oia na haawina i malamaia ae ma ke anaina kula Sabati ame ke anaina haipuie a peia no hoi na mele i mele ia ae. Ma ka halepule o Central Union (Kaukeano Hou) ua piha ae no mailoko a waho i ka poe i hele ae, a ua malamaia ae kekahl papa kuhikuhi i hoonohonohoia ai no ia la, na himeni ame na haiolelo. a he ku no i ka nani ame ka ihiihi na hana i hanaia no ka Haku. Ua malama pu ia ae no hoi he anaina hoomanao ma ka Halepaahao o Kawa 1 alakaiia e ke poo kumu o KamehamehaT a na ka papa himeni o ia kula i alakai ae i na leo mele. Ua inalamaia na hana me ka maluhia, a ua hoomanaoia ae hoi ka la me na manao hou e iini ana e hookokoke mau aku i ka Haku o na haku.