Ka Nupepa Kuokoa, Volume XLIII, Number 19, 12 May 1905 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

MAKAIKIU

PETERIKA MAFE.

Ke Kolopa Uneune I na Nihiliti,

Ka Hoopakele o ke Duke Kiekie

 

MOKUNA V.

KA MANAMANA UUKU O PETERKA.

 

 

            Hoomaha iki iho la oia, a oia no hoi ka Manawa a na Nihiliti i huli ae ai a nana aku la kekahi I kekahi, me ka ano pihoihoi.

            “Aole wau e hoohewahewa ae i ke kumu o ko oukou pihoihoi,” i hoomau hou aku ai o Ivana.  “I ka Manawa i kikoo loa mai ai na lima o ka Za a hala loa maluna o keia kai nui a hiki loa mai i keia repubalika, ka aina o ka lanakila, o ka manao nui ma keia oia hoi ke ku nei kakou imua o kekahi poino nui ma o keia Aloveka la.

            “E na hoahanau, aole he Manawa e ku iho ai a noonoo no keia mea.  He mea pono e lawelaweia kekahi hana, a e hooko koke ia ano.”

            “Heaha ia hana?” wahi a kekahi i ninau ae ai.

            “He mea pono e hookaawale koke ia keia Oloveka.”

            “Ua pono.” Wahi a ua mea la nana ka ninau.

            “Pehea hoi ko oukou mau manao, e na hoahanau?” i ninau ae ai o Ivana i kona mau hoa.

            Ua olowalu like ae la na leo e apono ana, e hookoikoi loa ana hoi i ka wa i hoopuka ae ai “ua pono,” a e kunokunou ana hoi na poo.

            “Ua maopopo no ia’u aole a kakou mau hoopaapaa ana no ka kakou mea e hana aku.” wahi hou a Ivana. “aka e loaa ana paha ia kakouka ninau i ka mea nana e hana aku.”

            Ua apono mai la kekahi poe i keia mau olelo a Ivana.

            “E hoike aku ana wau i ko’u manao a’u hoi e manao nei e apono mai ana oukou.”

            Puu ae la ka nuku o ke kanaka nana i ninau mua ia Ivana, a noho malie loa iho la oia oiai kona mau hoa e kau aku ana ko kaou mau maka maluna o Ivana me ko lakou iaai nui.

            “Eia me kakou i keia po,” wahi hou a Ivana, “he hoahanau hou.  Ua hoike mai oia ma kana hana i kona hoolilo ana iaia iho i mea e ku ana me ka oiaio ma ka kakou hana.  Ke makemake nei oia e komo mai a lilo i lala, a hoao aku hoi i kona manaoio maoli e hooko i na kaumaha apau o ko kakou ahahui.  Pehea ko oukou manao i keia?”

            “Aole wau e hana aku ana i kekahi hana hupo  e ku-e aku ai, e Ivana,” wahi a kekahi o na poe i pane mua kau, “aka ma ko’u noonoo iho eia kakou ke hana nei i na hana i maa ole i keia po.”

            “He kulana maa ole no hoi keia,” wahi a Ivana i pane mai ai, me ka leo kakana.

            Mahope o keia pane, hapai ae la o Ivana i kona lima iluna, me he mea la e haawi hoailona ana, a i maopopo ole hoi i ka makaikiu ke ano; eia nae ua hooiaio iho oia i kana i manao ai he hoailona ia no kekahi mea, oiai ua ike koke ae la oia i ke apono ana ae o na mea apau e noho ana iloko o ka lumi, a e kunokunou ana hoi ko lakou mau poo no na mea a Ivana i hoike ae ai.

            “O ko kakou kulana i keia manawa ua like me ka’u i hoike aku nei,” i hoomau aku ai o Ivana.  O ka ninau ano nui wale no i keia manawa oia ka hookaawale ana aku ia Oloveka.

            “E Hana,” wahi a Ivana, me kona huli awiwi ana ae i kahi a Peterika e noho ana, “ke makemake nei oe e lilo mai i lala a i mea hoi e ku ana ma ka aoao o ka makou hana ano nui e hana nei.  Ua pono iho la.  Ehookauia aku ana ka olelo hoohiki maluna ou ma keia hope aku.  He mea pono ia’u e ninau aku ia oe i kekahi mau ninau.”

            Kunou aku la o Peterika, e ae aku ana hoi i ka Ivana mau mea i ha’i mai ai iaia.

            “He enemi anei oe no ka Za?”

            “Ae,” wahi a Peterika i pane aku ai me ka hoihoi.

            Haka pono loa mai la o Ivana maluna o ka Makaikiu, a ike koke ihho la o Peterika ua heewa kana i hana mua ai mamuli o kona hookoikoi ole ana i kana mau olelo.  I ka wa i ninau hou ia mai ai oia ua hoopololei ae la oia iaia iho a hookuoo loa ae la.

            “Ua makaukau anei oe e haawi i kou ola ma ka hana a makou e hana nei?”

            “Ae,” wahi a Peterika i pane aku ai; e hookoikoi ana hoi i kona leo.

            “Ke ike nei anei oe i mea e hiki ai ke hoohaule aku i keia mana anunu o Rusia, he mea pono ia kakou apau ke hoolahe pono i na kauoha a ko kakou mau alakai?

            “Ke ike maopopo nei wau ia mea.”

            “Ua makaukau anei oe e hoolohe me ka ewaewa ole ame ka ninau ole hoi i na kauoha a ka ahakuka?”

            “Ae.”

            “E hoolohe mai ano, e Hana.  Ke kauoha nei ka ahakuka ia oe e hookaawale aku ia Paulo Oloveka, a e hana hoi i hana me ka holopono e hoole ole ia ai ka oiaio o ia me.”

            He kauoha hoomaka’uka’u keia, a ia manawa no nae ma ka Peterika hoomaopopo aku he mea ia e alakai aku ana iaia e komo kuhohonu loa kau iloko o na hana ma-lu a keia ahahui o na Nihiliti.

            “Ua aeia anei wau e waiho aku i hookahi a i elua paha ninau? wahi a Peterika.

            “I mau ninau kuhikuhi nou, ae.”

            “No na kuhikuhi ana keia a’u e manao nei e ninau aku.”

            “Ua pono, e ninau mai oe.”

            “Heaha ke ano o ka hooia a ka ahakuka e manao nei ma’u e lawe mai?”
            “Ke waiho aku nei makou mau ia e hana mai,” i paneia mai ai.  “Aole i lawa ma kou hoike waha maoli ana mai.  Ina e hanaia ana e hiki ai i ka lehulehu ke hooia e, malia o aponoia no, eia nae he nui no na alahele e ae.  E waiho aku ana no makou nau no ia e hana mai.”

            Kuemi hope aku la o Peterika, me he mea la ua makaukau oia e hele aku e hooko i ke kauoha i haawiia mai iaia.

            “E kali iho!” wahi a Ivana i kauoha mai ai.

 hoihoi hou ia mai i ko makou manawa e ike ai aole i lawa kou oiaio no ka hana i haawiia aku nei.  E hele mai oe maanei.”

            Aia o Ivana i keia manawa ke noho la iluna o ka noho e huli pono ana hoi imua o kekahi pakaukau laau.  Hookokoke aku la o Peterika iaia.  Kauoha aku la o Ivana i kekahi mau kanaka iloko o ke anaina, a nee mai la no hoi laua imua me ka awiwi.

            “Ma na mea pili i ka lala hou i hookomo piha ole ia,” wahi a Ivana, me kona hookoikoi ana i kona leo, “e noi no makou iaia e haawi mai i mea hoopaa ma kona aoao, aole ma ke ano i mea nona e hana mai ai i ka hana i waihoia aku iaia aka i mea na makou e ike aku ai iaia me keia mua aku ke ike makou ua hoopunipuni mai oia ia makou.  E hookau mai i kou lima akau iluna o ke pakaukau.”

            Hookau iho la o Peterika i kona lima akau iluna o ke pakaukau.

            “Aole oia lima,” wahi hou a Ivana.  “E waiho mai i ka lima hema a e hoomanana ae i na manamanalima.”

            Hooko aku la o Peterika e like me ke kauoha.

            “Ke hoomaopopo hou aku nei wau i kau i ae mua mai nei,” i pane kau ai o Ivana.

            Ia manawa i kunou aku ai oia i na kanaka elua ana i kauoha aku ai, a hooko mai la no hoi laua i ke kauoha.  Wehe ae la kekahi o laua he kila oki laau oi loa mai kona pakeke ae a hookau iho la i ka oi maluna o ko Peterika manamanalima nuku.  O kekahi hoi o laua ua lawe ae la i kekahi hamare laau a hapai ae la iluna me ka makaukau e uhau iho maiuna o ke kuau o ke kila.

            “O ka manamanalima nuku o ka lima hema aole ona waiwai i kekahi kanaka,” i puana hou ae ai o Ivana me ka malie ame ka lohi no hoi o kona leo, “aku he makemake makou e malama ia mmea i mea na makou e hoomanao aku ai iaia.”

 

MOKUNA VI.

 

KA HOOPA ANA A KA NIHILITI.

 

            Ha-lo ae la o Peterika ma o a maanei o ka lumi e hoolei ana hoi i kona lena ike maluna o kela ame keia kanaka.  Ma kana nana ana loaa iho la iaia ka ike, aole loa kekahi o lakou i nele i na manamanalima nuku.

            Me he mea la aole paha o Ivana i hilinai i ka makaikiu a ke manao nei oia e hoomaka’uka’u i ka makaikiu i mea nona e maka’u ai a ike ole ia ka lakou hana e hana nei, aka ua hooholo paa iho la o Peterika, ina o ka lilo ana aku o kona manamanalima nuku he mea ia e loaa ai na hana ino a keia poe Nihiliti alaila ua makaukau oia e haawi aku ia mea a e kila paa loa aku hoi i na manao hoohoaloha o keia poe iaia; nolaila kau aku la kona mau maka maluna o Ivana me ka oluolu, alaila pane aku la:

            “Aole wau e hookuli ana i ke kauoha a ka ahakuka, a ina ua makemake oukou ia mea, ua hiki ia oukou ke oki iho.”

            “Aka nae, aole i nele ka manao iloko ou he mea pono no e malama iho oe i kou manamanalima”—wahi a Ivana i pane mai ai.

            “Pela io no.  Ua oi aku ka pono o ke kanaka holookoua mamua o ka muumuu he mea ia e pono ai ka hana a oukou e makemake nei ia’u e hana aku.  Ke makemake nei wau e ninau hou aku mamua o kou kauoha ana aku e iho iho keia hamare.”

            “Ua loaa ia oe ke kuleana e ninau mai.”

            Aia no o Peterika ke waiho la no i kona luma iluma o ke pakaukau me ka onioni ole.  He mea oiaio ua hiki no iaia ke kaili mai no ka mea aole no i paa loa kona manamanalima i ka oi o ke kila, kaka nae ua manao oia he mea pono loa nona e hana ole pela, a e ku aku hoi imua o keia mau hana hoomeamea a na Nihiliti e hana nei maluna ona.

            “Aole anei ou manao ina oe e hoailona ana i kekahi kanaka ma ke oki ana ae i kona manamanalima uuku he hana ia nau e hana ai i mea e hiki ai i na makai ke ike maopopo iaia?” wahi a Peterika.

            Aole he pane ma ko Ivana aoao, aka kau pono loa mai la kona mau maka maluna o ka makaikiu.

            “Aole anei ou manao ua hiki no ke hanaia ia hana ke hiki ole ia’u e hookaawale aku ia Paulo Oloveka?  E oki ae i kuu manmanalima i keia manawa, a hapope aku e paa no wau  i ka wa-hi, a ma ia ano e lilo ana ka’u hana i mea ulolohi----------“

            “Ua lawa,” wahi a Ivana i kahamaha mai ‘ai, “o ka’u wale no i makemake ai oia ka hoao ana aku i ko’u maka’u ole.  Aole kaua e hoopaapaa no ia mea.”

            “Ina pela ua pono iho la,” wahi a Peterika i pane aku ai, a ia manawa pu no hoi i kaili mai ai oia i kona lima, oiai ua haalele iho la na kanaka elua i hoomakaukau ai e oki ae i kona manamanalima, “he hookahi a’u ninau i koe.”

            “E ninau mai me ka hakalia ole.”

            “Ihea wau e lawe mai ai i ka hooiaio ana ua ko ko oukou makemake maluna o Oloveka?:
            “Maanei no.”

            “Heaha ka hua?”
            O keia paha kekahi ninau nana i hoike ae i ko Peterika maka’u ole.  Ua maopopo mua ia Peterika aia no he papahana o na hana a keia poe e lawelawe nei, a o ka hua e komo ai iloko o ka halawai oia kekahi iwaena o ia mau hana, e like no hoi me na ahahui e ae, a o ka loaa koke mai iaia oia mea, he mea ia e maalahi loa aku ai kana huli ana maluna  o kana hana e hoohanaia nei.

            Me kekahi aoao hoi ua hiki ke ikeia aku aia no na manao kanalua iloko o Ivana, a ina i puiwa ae oia i kela manawa ina no paha ua loaa koke ae na mea nana e akeakea aku hana a ka makaikiu.  Pupuka iho la na maka o ua Ivana nei i kona manawa i pane mai ai:

            “Aia a pau na hana e pili ana i kou hookomo lala ana e loaa aku no ia oe ka hua.  Mai keia manawa aku a hiki i kou hoolilo maoli ia naa i lala, e hiki ana no ia oe ke komo mai me ka loaa ole o na akeakea.”

            “Alaila, ua pono iho la.  E hiki mai ana wau i ka po o ka la apopo.”

            Kaakaa ae la na maka o Ivana me ke pahaohao, a pane mai la:

            “Ke manao nei oe, e Hoahanau Hana, e hoonee koke aku i kau hana imua.”

            “Heaha hoi ka mea e hoopau manawa wale ai no?” i panai aku ai o Peterika, “he kanaka hoopilikia keia a o kona kaawale koke aku mai ko kakou alahele aku, o ka oi loa aku ia o ka maikai.”
            “Ua pololei kau, e Hoahanau Hana.”

            “Ina pela, i ka po o ka la apopo.”

            “Ua ike anei oe i kona wahi e loaa aku ai ia oe?”
            “Kokoke loa no wau  e ninau ake ia oe ia mea.”

            “Aia oia ke noho nei ma ka Hotele Waladofa.”

            “Maika kela!”

            “Iloko o kekahi hotele nui e like me keia he hana maalahi loa ka hooko ana kau i ko kakou makemake.”

            “Kanalua ole no oe, e Hoahanau Hana.”

            “He kumu no ko’u o ka manao ana pela.”

            “Heaha kau kumu?”
            “Eia oe ke paa mai nei i kekahi mau mea mi ia’u aku.  O ka pololei maoli keia no ka mea aole wai i hooliloia i lala.  Aia a hiki mai i ka manawa e lilo ai wau i hookahi me oukou, alaila hoike aku wau i ke kumu o ko’u manao kanalua ole ana.”

            “Alaila aole keia okau hana mua loa no keia kupuino a kakou e manao nei e hookau aku i ka hoopa’i maluna ona?”

            “Malia paha pela,” wahi a ka makaikiu i pane aku ai.

            I keia manawa e malamaia nei keia mau papalei ana aia no o Ivana ke haka pono loa la maluna o ka kakou makaikiu, a o ke koena iho o na poe iloko o ua keena la aia no lakou ke noho mumule la me ka hoolohe pono ana mai i na mea e kamailioia ana.

            Hoomaopopo iho la no hoi o Peterika ua komo na manao iiai iloko o na poe apau e noho ana, a o Ivana wale no paha ko lakou mea e hoohuoi nei.  Aia iloko o Peterika ka makemake e hookomo aku i na manao ana iloko o kela mae keia mea, he kanaka no oia i komo iloko o kekahi hana ano nui mamua aku, a ma ia manao ana o ka makaikiu ua holopono maoli.

            “Malia paha.” wahi a Ivana i pane mai ai me ka malie, “o oe no kekahi haohanau kahiko o makou, a o oe o---aole wau e hoike kau ana i ka inoa.  Ina o oe io no ua mea la a’u e manao nei, alaila e loaa ana ia oe ka noonoo ana i ke kumu o ko;u ano hoohuoi.”

            “Ke maopopo aku la ia’u ia mau mea,” wahi a Peterika i pane aku ai.

            “Ina ua pololei ka’u koho, alaila e hauoli no makou i ka ike ana o oe io no kekahi o ko makou hoahanau.  Aole anei oe e hoike maoli mai ana i kou helehelena ia makou?”
            “Aole, e Ivana.  Ua hele mai wau imua o oukou ma ke ano he malihini.  Make ano he malihini e hooiaio aku ai wau i ko’u kuleana e lilo i hookahi me oukou.”

            “Ua pono iho la.  I ke aumoe anei o ka po o ka la apopo kau manawa i ha’i mai nei?”

            “I ke aumoe o ka po o ka la apopo.”
            “Ina pela, aloha oe.”
            Nee mai la-o Ivana imua a hopu mai la i ko Peterika lima a lulu ima iho la laua e like me ke ano mau aole hoi he mau mea e ae a ka makaikiu e pahaohao ai.

(Aole i pau.)

 

 

NA. WARENA

--OPIO—

ILOKO O KA ENAENA O KA LUKUWALE.

            He Moolelo o ka Lukuwale Ana ia o na Pele kane ma Inia.

MOKUNA IV.

 

PIULA A WAIHO MA’I MA KE ALA.

 

            “Mahalo,” wahi a Dike, “aka aole no hoi kana i nele loa i ka meaai, a oiai e mo’a ae ana ka kaua laiki ua maona no ka @@@@@@ ia mea.”

            Ua like aku la no ko’u manao me kou.” Wahi a Nede a oiai @a mamo loa kaua mai kanaka mai, oia hoi, mamo mamuli o ko k@@@@ noho iloko o keia wahi e ike ole ia mai, ua hiki ke hoomanawawa ka pololi a mo’a pono ae ka kaua meaai.  E@ e hoolohe e kaina@@@ ke kani mai la he pahu o ka hana puhi ohe.”  Alaila noho m@@@ a hamau walaau’ole iho la laua no kekahi mau minute no ka l@@@@ loha pono ana.  “Oia io no, aia ke kana mai la ka pahu ma kekahi wahi aole i mamao loa mai a kaua aku nei.  Ina kaua e pii aia i kela wahi ahua, manao wau e ike ana kaua i ka poe no lakou @@@@ pahu e paani mai nei a aole no hoi kaua e ike ia mai.”

            I ko laua hiki ana iluna o ua wahi ahua nei, ua ike io aku L@@@ i kekahi puulu kanaka nui, he poe koa e hoomoana ana ma kekahi aoao o ke alanui aupuni.

            “He poe kipi anei lakou, e Dike a i ole he poe ko@ Pelekane paha?” i ninau aku ai o Nede.

            I ka nana io maoli aku no aole e hiki ke hoohewahewa i ho lakou kulana koa io, a aia na aliikoa kaulio ke holoholo la no ka haawi kauoha ana, a he pualikoa nui no hoi, i ka nana aku he mahele i na helewawae kekahi a he mahele koa kaulio kekahi.

            “E hoi hou kaua no ka laiki a kaua no  ka mea he hana naaupo loa ia o ka nana ole akku a papaa mai ka laiki e waiwai ole ai no ka ai ana, e Dike.  A i ka pau ana o ko kaua paia e nihi@@@@@ ae no kaua a me ka hookokoke ana e hiki ai ia kaua ke ike pono aku i na hana a lakou a ike pu no hoi i ko lakou mau helehelena,, ilaila, a ia manawa hoi kaua e maopopo ai i ke ano o keia poe k@@ ina he pualikoa Pelekane a he poe kipi paha.”

            A hala kekahi manawa o ka hoi ana ua hiki aku la laua i ko laua kahua mua a mahope o ka paina ana ua nihihele aku la laua a hiki i kahi a laua i makemake ai e ike pono i ke ano o ka pualikoa e hoomoana ana, kahi nae e ike ole ia mai ai laua.  Eia nae aole i liuliu ka laua noho ana ma ko laua wahi e pee ana ua pii koke ae la kekahi laina pualikoa kokkoke loa ia laua.

            “Maikai maoli ka lakou pikau ana,” wahi a Dickey i pane aku ai i kona kaikuaana,” manao anei oe e mau keia haka-li paikau o lakou mahope iho o ka pau ana o keia lukuwale?”

            “Aoel i maopopo ia’u e Dike aka aia a hui ae lakou me ko ka@@ poe kou ilaila e ikeia ai ka makaukau paikau o lakou.  Aole no hoi ia kaua ka ike mua i ka hopena o kakou apau, a malia o kaua paha na Pelekane e koe nei iluna o ka lepo o Inia; aka e hoomanao oe aia a lohe o Enelani i keia nuhou inoino alaila e olowalu no ka leo apuni ka aina a na ia mea e hoala i ka manao ikaika iloko o na makaainana, ame ka hoohakalia ole e piha ai keia aina ma kahio ka miliona o na koa Pelekane.  A, aia he elua mau aliikoa aka aole e hiki pono ia’u ke ike maopopo aku i na hoailona, aka ke manao nei wau aole laua he mau haole.”

            “Pela no ko’u manao.  Ke manao nei wau aole lakou he p@@ haole wahi a Dike i hoike manao lokahi pu aku ai,” alaila he mea maopopo he poe koa Inia lakou.  E, e nana, e nana aku oe, aole anei oe e ike aia he ekolu mau pio mawaena o papa no ia” Alaila poina koke iho la ka noonoo maikai o ke keiki opio o pioo koke ae la no ka nui loa o ka olioli i ka ike ana i konna mauakane ma ke ano pio no nae, a me ia ano noonoo ua hoomaka aku la oia e anehe e holo aku ua makaala loa o Nede i ka paa ana mai i kona pokii.

            “Hamau e Dike a e noho malia hoi,” wahi a Nede i pane oluolu aku ai.  “Ae, o papa io no kela, a o Danalope ame Mena kona mau kokoolua.  E hoomaikai nui ia ke Akua.” wahi hou  a Nede me ka hoomaikai iloko o kona uhane no keia meahu nui i loaa ia laua me ka upu e ole mamua i loaa ia laua no keia hui ana.

            “Alaila e pono kaua e hele ilaila e kuaana, ua oi aku ka maikai o ko kaua hui a noo pio pu me ko kaua makuakane.”

            “E hamau iki,” wahi a NEde, me kona hopu oluolu ana aku i kona kaikaina a kaohi iho la  e malie.  “Ina kaua e hooko i kau alaila e loaa ole ana ia kaua ka manawa kupono e hana ai i ka maikai e like no hoi me lakou e noonoo la o ka loaa ia lakou @@ manawa kupono e pakele ai.”  I ko’u manao he mea pono ia kaua e hoopakele ia lakou e like me ka hiki.”
            “Pehea e hiki ai e Nede?”
            “Aole no i maopopo loa ia’u i keia manawa, aka he mea po@o no ia kaua e noho malia a e kali iki; a e hoao no hoi kaua ke loaa ia kaua ke alanui e hoopakele ai.  A, aia ke kani mai la ka ole e hoika ana ua pau ka lakou paikau ana a’u hoi e manao nei e ho@ maha ana lakou no ke koena o keia la.  Nolaila he mea pono ia kaua e kaawale koke aku mai keia wahi a kaua e pee nei.  Aia i ka manawa o lakou e kukulu ai i na halelole, amahope o ka pau ana @ hookuu ai a hoomaha na mea apau, alaila oia no ka manawa e hookunia ae ai e nele ole ai ka hele-holoholo mai o kekahi poe o lakou a komo mai maanei, a he poino hoi ia no kaua.”
            Alaila hoomaha iho la na koa mahope iho o ke kukulu puukiuki ana i na pu e like me ka mau i na koa, a kali aku la o ka hoea mai o ke kaapipi a lakou e nee malie mai ana; a hiki iio mai la no a o ka hoomaka no ia i ke kukulu halelole.  Ia manawa koke no na wehe koke ia ae la na halelole a emoole ua kukuluia ae la a lilo ae la ia wahi he kulanakauhale halelole, a mahope koke no o ka makaukau na kukuluia ala kekahi poe koa ma ke ano kiai me ka waiho pu ia aku o kka wa hookuu o ko lakou manawa ku kiai a e noho kiai aku ai hoi kekahi poe.

            Aia ma kahi kokoke o kekahi halelole, he halelole hoi o na o@-hana hooponopono a noonoo i ka hooko ana i na hana e hoolalaia ai, aia he wahi halelole ano huina-ha e ku kokoke mai ana a iloko olaila i hoonohoia aku ai keia poe pio ekolu.  Ua hauhoaia na lima o na paahao, a hoonohoia ae la he mau kiai mawaho o ka hale ma na puka no nae elua o na wahi halelole nei.

            “Ano e Dike,” wahi a Nede, “ua loaa iho la ia kaua ka ike no lakou a e haalele kaua i keia wahi a e hoomamao aku ma kahi kupono e maluhia ai ko kaua kuka pu ana.”

            O ka manao o na opio oia no kekahi o na puikaika a kaomaha no hoi, aka ua hooholo laua e hoao e hooko ina e loaa ia laua ka papahana kupono e lanakila i laua, a he manawa loihi no hoi ia o laua i noonoo ai.  Ma kalaua hoomaopopo ana he puikaika loa ka aa ana e komo iloko o ka halelole ano huina-ha kahi o na paahao i hoopaaia ai, oiai aia he elu mau kiai, he hookahi ma kekahi puka a he hookahi no hoi ma kekahi—he mau ipuka ma na kala o ka hale.

            Mai maikai loa ina he hookahi kiaia, aka aia he elua aka ua hoomaopopo pu laua i ka nui o kahi a na koa e hele-holoholo ai e hele ana hoi i ka akau a huli hoi hou no ka hema.  Eia nae ia laua e holoholo ana, a ina e huli no ka akau he hookahi no ko laua huli like ana aole hoi he hele kike.

(Aole i pau.)