Ka Nupepa Kuokoa, Volume XLIII, Number 19, 12 May 1905 — Page 5
This text was transcribed by: | Aki Astrid Dinda |
This work is dedicated to: | To Kepa |
Ka Nupepa Kuokoa
KE KILOHANA POOKELA NO KA LAHUI HAWAII.
Kanawai Kalana o 1905 a me na Kanawai Pakui a Hoololi.
---
KANAWAI 39.
HE KANAWAI.
E Kukulu ana i na Kalana Maloko o ke Teritori o HAwaii ame ka Hoomaopopo ana ia Aupuni.
E Hooholoia e ka Ahaolelo o ka Teritori o Hawaii:
MOKUNA 1.
Na Palena o na Kalana.
Pauku 1 . E maheleia ke Teritori o Hawaii iloko o na Kalana Elima, penei:
1. O ka Mokupuni o Oahu ame na Mokupuni e ae apau o ke Teritori i komo ole iloko o kekahi Kalana aku, ame na kai e hoopuni ana ia lakou, mai keia, ke hoolilo ia nei ke Kalana o Oahu, me kona Kahua Hale Poo Oihana Aupuni ma Honolulu.
2. O ka Mokupuni o Hawaii ame na Mokupuni e ae apau e moe ana maloko o ekolu mile ana moana mai ko lakou kapakai aku, ame na kai e hoopuni ana ia lakou, ma keia ke hoolilo ia nei ke Kalana o Hawaii, me kona Kahua Hale Poo Oihana Aupuni ma Hilo.
3. O na Mokupuni o Maui, Molokai, Lanai ame Kahoolawe, ame na Mokupuni e ae apau e moe ana maloko o ekolu mile ana moana mai ko lakou kapakai aku, ame na kai e hoopuni ana ia lakou, koe nae, kela mahele o ka Mokupuni o Molokai i kapaia o Kalaupapa, Kalawao ame Waikolu, a i hoomaopopoia hoi o ke Kahua Ma’i Lepera, ma keia ke hoolilo ia nei ke Kalana o Maui, me kona Kahua Hale Poo Oihana Aupuni ma Wailuku.
4. O na Mokupuni o Kauai ame Niihau ame na Mokupuni e ae apau e moe ana maloko o ekolu mile ana moana mai ko lakou kapakai aku, ame na kai e hoopuni ana ia lakou, ma keia ke hoolilo ia nei ke Kalana o Kauai, me kona Kahua Hale Poo Oihana Aupuni ma Lihue.
5. O kela mahele apau o ka Mokupuni o Molokai i kapaia o Kalaupapa, Kalawao ame Waikolu, a i hoomaopopoia hoi o ke Kahua Ma’i Lepera, ma keia, aole ia e lilo a e manao ia he mahele no ke Kalana o Maui; aka hoi, ma keia, ke hooliloia nei i Kalana nona iho a e loaa wale no na mana iaia e like me ia i haawiia ma ka Mokuna Elua o keia Kanawai, a e ikeia ke Kalana o Kalawao, koe nae, na mea i hoomaopopo ia maloko o ka Mokuna Elua i oleoia, aole kekahi o na kuhikuhi ana o na olelo o keia Kanawai, a i ole ia, o kekahi Kanawai okoa e ae paha, e pili ana i na Kalana, e manao ia ua pili a e pili hoi i ke Kalana o Kalawao i oleloia.
MOKUNA 2.
KE AUPUNI O KE KALANA O KALAWAO:
Pauku 2. E kaa no ka hoomalu hooponopono o ke Kalana o Kalawao malalo o ka Papa Ola Teritori, a e hoomalu hooponoponoia hoi e na kanawai, na rula ame na kuhikuhi e mana nei i keia manawa, a i ole ia, e hooholoia aku ana ma keia hope aku a i ole ia ku i ke kanawai i hanaia e pili ana i ka Papa Ola i oleloia me ka malama a hookaawale ana i na ma’i lepera, koe na mea i kaupalena ia maloko nei.
Pauku 3. Aohe he Luna Kalana no ia Kalana i oleloia mawaho ae o ka Lunamakai a he mea oia e noho ana malaila, a e kohoia maloko o ia Kalana i oleloia ma ke Koho Balota Nui mua e malamaia ana malalo o na kuhikuhi o keia Kanawai, a mahope aku ma na wahi i kuhikuhiia ma ke kanawai, a e paa hoi i ka oihana no na makahiki elua.
Pauku 4. O ka uku o ka Lunamakai e hoomaopopoia no ia a e uka ia aku hoi e ka Papa Ola i oleloia mailoko ae o na dala i hookaawaleia a i aeia e ka Ahaaolelo no ka malama a hookaawale ana i na ma’i lepera.
Pauku 5. Na ka Lunamakai o ke Kalana o Kalawao e malama i ka maluhia o ka lehulehu, e hopu, a e lawe aku imua o ka Lunakanawai Apana no ka hookolokolo ana i na poe apau i hoao e hahaki a e hana paha e keia hana ku-e i ka pono o ka lehulehu a e hoopii aku ia lakou e like me ka naauao i loaa iaia.
Pauku 6. E loaa ka mana i ka Lunamakai i olelo e hookohu aku a e hoopau aku, a e hookohu hou aku ma kona manao ana he kupono elima makai no ia Kalana, a no ka lakou mau hana ma ke ano makai; e uku ia aku no lakou e ka Papa Ola i na haawina a ia Papa e hooholo ai he kupono, a e lawe ia ae no ia mailoko ae o ka haawina i hookaawaleia e ka Ahaolelo no ka malama ame hookaawale ana i na ma’i lepera, a e loaa hou ae na mana e ae iaia ame na hana e like me ia i hoakakaia ma ke kanawai no na Lunamakai o na Kanalana pakahi.
Pauku 7. I ka wa e make ai, haalele i ka oihana, a i ole ia, kupono ole paha o ka Lunamakai o ke Kalana i oleloia iloko o kona wa e noho oihana ana, e hookohu aku no ka Papa Ola i oleloia i pani nona, a oia hookohuia ana e paa no ma ka oihana a hiki i ke Kau Koho Balota Nui e hiki mai ana a hiki i ka wa e hookupono ia ai o kona pani.
MOKUNA 3.
NA PALENA O NA APANA.
Pauku 8. E maheleheleia na Kalana o Oahu, Hawaii, Maui ame Kauai iloko Apanna, e like me ia ano e hoomaopopoia ana a e kukuluia ana e ke kanawai, koe nae ka hoololiia ana maloko nei, penei:
Ke Kalana o Oahu iloko o Eono Apana: ---
1. Mai Maunalua a hiki i Moanalua i huiia, e kapaia ka Apana o Honolulu;
2. Ewa, e kapaia ka Apana o Ewa;
3. Waianae, e kapaia ka Apana o Waianae;
4. Mai ka Lae o Kaena mai a e komo pu ana me ke Ahupuaa o Waimea, e kapaia ka Apana o Waialua;
5. Mai Waimea mai a i ka Lae o Kaoio; e kapaia ka Apana o Koolauloa;
6. Koolaupoko, e kapaia ka Apana o Koolaupoko;
Ke Kalana o Hawaii iloko o Eiwa Apana; ---
1. Puna, e kapaia ka Apanao Puna;
2. Mai ke Kahawai o Hakalau a i ka palena o Hilo
Hema me Puna, e kapaia ka Apana o Hilo Hema;
3. Mai ka palena o Hamakua ame Hilo Akau, a i ke Kahawai o Hakalau, e kapaia ka Apana o Hilo Akau;
4. Hamakua, e kapaia ka Apana o Hamakua;
5. Kohala Akau, e kapaia ka Apana o Kohala Akau;
6. Kohala Hema, e kapaia ka Apana o Kohala Hema;
7. Kona Akau, e kapaia ka Apana o Kona Akau;
8. Kona Hema, e kapaia ka Apana o Kona Hema;
9. Kau, e kapaia ka Apana o Kau.
Ke Kalana o Maui iloko o Elima Apana: ---
1. Mai Hopokohau a i Ukumehame i huiia, a e komo pu ana me ka Mokupuni o Lanai, e kapaia ka Apana o Lahaina;
2. Mai Kahakuioa a i Kihei i huiia, a e komo pu ana me ka Mokupuni o Kahoolawe, e kapaia ka Apana o Wailuku;
3.. Kahikinui, Kaupo, Kipahulu, Hana ame Koolau, e kapaia ka Apana o Hana;
4. Hamakualoa, Hamakuapoko, Haliimaile, Makawao, Kula ame Honuaula, e kapaia ka Apana o Makawao;
5. O ka Mokupuni o Molokai, koe nae, kela hapa o ka Mokupuni i oleloia i kapaia o Kalaupapa, Kalawao ame Waikolu, a i hoomaopopoia hoi ke Kahua Ma’i Lepera, e kapaia ka Apana o Molokai.
Ke Kalana o Kauai iloko o Elima Apana: ---
1. Mai ka Lae o Puanaaiea mai a i ka Ili o Eleele, e komo pu ana o Mokupuni o Niihau, a e kapaia ka Apana o Waimea;
2. Mai, a e komo pu ana me ka Ili o Eleele, a e komo pu ana o Mehaulepu, e kapaia ka Apana o Koloa;
3. Mai, a e komo pu ana me Kipu, a hiki a e komo pu ana me Wailua, e kapaia ka Apana o Lihue;
4. Mai Wailua mai a i Kealaakaiole, e kapaia ke Apana o Kawaihau;
5. Mai, a e komo pu ana me Kealaakaiole, a i ka Lae o Puanaaiea, e kapaia ka Apana o Hanalei.
MOKUNA 4.
NA MANA LAULA, NA KOIKOI AME NA KAUPALE O NA KALANA.
Pauku 9. E loaa i kela ame keia Kalana na mana mahope ae nei, a e kaa hoi malalo o na koikoi ame na kaupale mahope ae nei:
1. E hoopii aku a e hoopiiia mai ma kona inoa hui Aupuni
2. E kuai a ma kekahi ano e lawe ma ka hoolimalima a e paa i ka waiwai-paa ame ka waiwai-lewa maloko o kona mau palena i hoomaopopoia a e hooponopono a hoololi aku hoi ia mau mea ma ke ano he mau pono o na kanaka e like me ka mae i manaoia;
3. E kukulu ae, e kuai mai, ,e hoolimalima mai a ma kekahi ano e ae paha e loaa mai ai na Hale Oihana no na hana o ke Kalana, na paipu lawe mea ino, na kahua paumawai, na lako wai, e komo pu ana hoi na ki’owai, na luawai, na laina paipu ame na hawai e ae no ka hookahe ana i ka wai no ka lehulehu, na oihana kukui hoomalamalama, na mea paahana ame na lako no ka hoomalamalama ana i na alanui ame na Hale Aupuni; e hoolako mai, me ka malama ana i na mea paahana kinai ahi; e wehe, e kukulu me ka malama a e pani i na alanui aupuni Kulanakauhale, na alaloa , na alanui, na ala liilii, na kuamoo ame na alahaka maloko o kona mau palena, aka, aole kekahi alanui Kulanakauhale hou, alaloa, alanui, a i ole ia, alahaka e hanaia ke ole e apono mua ia kahi e moe ai a e hana ia ai ia mea, pela hoi kona mau mea hana e hoohanaia ai no ke kukulu ana ia mea e apono mua ia e ka Lunanui o na Hana Aupuni;
3a. E ohi i na auhau o ka wai i hoolakoia aku a i ole mai na kahua paumawai a oihana wai; a no ka hoohana ana i na paipu lawe mea ino.
4. E hana i na aelike a e lawelawe aku hoi i na hana apau i kupono a i pono e hooko ia aku na mana i hoikeia ae la, ame na mana e ae apau i haawiia iloko o ua Kalana nei i oleloia, a i ole ia, maluna paha o kekahi o kona mau Luna Aupuni;
5. Aole kekahi Kalana, ma kekahi ano e haawi aku a e hoaie aku i kona inoa maikai no ke kokua ana i kekahi kanaka a ahahui i hoohuiia paha, a o kela ame keia aie a koi paha i hanaia ma ke ano ku-e i na olelo o keia pauku e lilo no i mea mana ole;
6. Aole kekahi aelike i komo ka huina hoolilo o na dala o ka lehulehu i ka huina o Elima Haneri (500) Dala a oi aku, e haawiia, aka, i ka mea koho haahaa loa wale no mahope iho o ka hoolaha akea ia ana no na koho, aole hoi kekahi hana aupuni, a i ole ia, kauoha paha i na lako e pono ai ua hana la, e maheleheleia a i ole haawi apana ia paha i mea e kapae ia ae ai na olelo i keia Pauku, a, aole hoi he hana hou i komo ka huina hoolilo o Elima Haneri (500) Dala a i ole oi aku, e hanaia aia wale no mamuli o ka aelike e like me ia i hoike ia maluna ae nei; aka nae o ka manao o keia Pauku aole ia e pili aku i ka hana alanui;
7. O na aelike apau, na hoomana ana, na haawina, na uku ana ame na aie i hooholoia, aeia, hanaia, a i ole hoohanaia ma ke apo ku-e i keia Kanawai e lilo i mea ole, a, aole loa ia mea e lilo i kumu e koi ai i ke Kalana;
8. O kela ame keia o ua mau Kalana nei i oleloia, no na manao ame na hana o keia Kanawai, he kino ahahui a kalaiaina no ia, a ma ia ano, e loaa no na mana ame na pono i hoakakaia ma keia Kanawai, a o ia mau mea hoi e haawiia no ia iloko a e lawelaweia e kekahi Papa Lunakiai o ke Kalana, e like me ia i hoakakaia mahope ae nei. O ka manawa e ku ai a e nee aku ai o ua mau Kalana la e mau no ia, a i ole ia, a hiki i kekahi wa e ae e hoakakaia ai ma ke kanawai.
MOKUNA 5.
NA KAHUA HALE POO OIHANA AUPUNI O NA KALANA.
Pauku 10. E hiki no ke hoololi ia, a i ole ia hoonee ia paha kekahi Kahua Hale Poo Oihana Aupuni o ke Kalana ma ke koho ana aole e emi iho malalo o elua hapakolu o na poe kupono i ke koho balota o ke Kalana, e koho ma ia ninau ma kekahi koho balota nui a e koho ana hoi ma ka aoao apono no ka hoololi ana a i ole hoonee ana.
Pauku 11. Ma ka wa e waihoia ai imua o ka Lunakiai kekahi noi i kakauinoaia e na poe kupono i ke koho balota o ke Kalana, i like ka heluna me kanakolu (30) hapa-haneri o na balota i hookomoia ma ke koho balota nui i hala, e noi ana e hoonee i ke Kahua Hale Poo Oihana Aupuni o ke Kalana, alaila, e waiho aku no ka Papa Lunakiai ma o kekahi olelo kuahaua i ka ninau e pili ana i ua hoonee ana la i ke Kahua Hale Poo Oihana Aupuni o ke Kalana ma ke koho balota nui e hiki mai ana imua o na poe kupono i ke koho balota o ua Kalana nei. E lawelaweia ke koho balota ana a e hoomaopopoia na hoike koho balota ma na ano apau i like me ka mea i hoakakaia ma ke kanawai no ka lawelawe ana i na koho balota nui ame ka hoomaopopo ana i na hoike koho balota.
MOKUNA 6.
NA LUNA OIHANA KALANA.
Pauku 12. O na Luna Oihana o kela ame keia Kalana oia no ka Papa Lunakiai, i Lunamakai, a ma o kana oihana la (ex-officio) oia no hoi ka Luna Koronero, i Kakauolelo Kalana, a ma o kana oihana la (ex-officio) oia no ke Kakauolelo no ka Papa Lunakiai, i Lunahooia, i Lunahelu ame Lunaohi Auhau, i Loio Kalana a i Puuku; o lakou apau, koe na hoa o ka Papa Lunakiai e koho ia no lakou e na poe kupono i ke koho balota o ke Kalana.
Pauku 12a. O ka Papa Lunakiai o kela ame keia Kalana, koe nae na Kalana o Oahu ame Hawaii, e loaa iloko o ua mau Papa Lunakiai la he hookahi lala mai kela ame keia Apana mai.
O ka Papa Lunakiai o ke Kalana o Oahu e loaa no iloko o ia Papa i ehiku mau lala e kohoia hoi lakou e like me ia mahope ae nei; 3 mai ka Apana mai o Honolulu; 1 mai ka Apana mai o Ewa; 1 mai na Apana mai o Waianae ame Waialua; 1 mai na Apana mai o Koolauloa ame Koolaupoko; 1 holo lauia.
O ka Papa Lunakiai o ke Kalana o Hawaii e loaa no iloko o ia Papa i ehiku mau lala e kohoia hoi lakou e like me ia mahope ae nei: 1 mai na Apana mai o Kohala Akau ame Kohala Hema; 1 mai na Apana mai o Kona Akau ame Kona Hema; 1 mai ka Apana mai o Kau; 1 mai ka Apana mai o Puna; 1 mai ka Apana mai o Hamakua; 2 mai na Apana mai o Hilo Akau ame Hilo Hema.
O na Lunakiai pakahi apau i mea oia e noho ana iloko o ka Apana a i ole ia mau Apana paha i lilo mai ai oia moho, a e kohoia e na poe i kupono i ke koho balota o ia Apana a mau Apana paha.
Pauku 13. Maloko o kela ame keia Apana pakahi o na Kalana o Oahu, Hawaii, Maui ame Kauai, e koho ia no e na poe kupono koho balota i Hope Lunamakai ame Hope Lunahelu ame Lunaohi Auhau.
Pauku 14. O na Luna Oihana Kalana apau, koe hoi e like me na hoakaka maloko nei, e kohoia no ma ke koho balota nui e malamaia no ke koho ana i na Senatoa ame na Lunamakaainana o ke Teritori, a e noho hoi lakou ma ka oihana ma ka hora umi-kumamalua awakea ma ka Poakahi mua o Ianuari mahope koke aku o ko lakou kohoia ana.
Pauku 15. O na Luna Oihana apau, koe nae e like me ia e hoakakaia nei maloko nei e noho no lakou ma ka oihana no elua makahiki a hiki i ka wa e kohoia ai ko lakou mau pani hakahaka, a hookuponoia hoi.
Pauku 16. O na Luna Oihana apau, koe nae, na Hope Lunamakai, na Hope Lunahelu ame Lunaohi Auhau e noho ko lakou mau Keena Oihana ma ke Kahua Hale Poo Oihana Aupuni o ke Kalana, a e wehe hoi ka Lunamakai, ke Kakauolelo, ka Lunahooia, ka Puuku ame ka Loio Kalana i ko lakou mau Keena Oihana pakahi no ka hana ana i kela a i keia la hana ku i ke kanawai, mai ka hora eiwa A. M. a hoea i ka hora eha P. M., koe nae, na Poaono ma ka hora umi-kumamalua awakea e paa ai ma ia la. E malama no hoi ka Papa Lunakiai i ko lakou Keena Oihana ma ke Kahua Hale Poo Oihana Aupuni o ke Kalana.
MOKUNA 7.
NA MEA HOOKUPONO I NA LUNA OIHANA.
Pauku 17. Ua kupono no kela ame keia kanaka e noho ma kekahi o na oihana koho balotaia i hoonohoia e na olelo o keia Kanawai ina oia he kupa no na Mokuaina Huiia o Amerika ame ke Teritori o Hawaii, a he mea kupono hoi ia i ke koho balota no ua Teritori nei i oleloia a no ke Kalana hoi e koho balotaia ai oia i hookahi makahiki mamua ae o kona koho balota ia ana; a, ma ka mea hoi e pili ana i na hoa o ka Papa Lunakiai e pono no e loaa ia mau mea hookupono, a mawaho ae hoi o ia mau mea, he poe noho paa lakou maloko o ka Apana i kohoia mai ai lakou, ioai ko lakou manawa e noho oihana ana; aka nae hoi, aole e kohoia kekahi i Loio Kalana ina aole i loaa iaia mawaho ae o na mea hookupono oihana i hoikeia ae nei, ke Kulana Loio Laikiniia no ka lawelawe ana imua o ka Aha Kiekie o ke Teritori o Hawaii, a ua lawelawe oihana loio hoi iloko o ke Kalana ana e holo Moho ai, no ka manawa i emi ole iho malalo o hookahi makahiki.
Pauku 18. Aole oi aku mamua o hookahi oihana a ke kanaka e paa ai i ka wa hookahi, koe wale no ma ke ano i hoakaka maopopo ia maloko nei.
Pauku 19. Mamua o ka lawelawe ana o kekahi mea i na hana o kana oihana, e kakauinoa kela ame keia Luna Oihana i koho balotaia a i hookohuia i ka olelo hoohiki a olelo hooia hoi mahope ae nei imua o kekahi Luna Oihana i hookupono ia no ka lawe ana i na hoohiki.
“Ke hoohiki (a i ole ia, ke hooia) laahia nei au imua o ke Akua Mana Loa e kakoo hoopono no au i ke Kumukanawai ame na Kanawai o na Mokuaina Huiia o Amerika ame na Kanawai o ke Teritori o Hawaii, a e lawelawe hoi i ka’u mau hana me ka hoopono ame ka ewaewa ole ma ke ano ……………………………….no ke Kalana (a i ole ia ka Apana o ………………o ke Kalana) o ………………….. Territori o Hawaii.
MOKUNA 8.
NA BONA.
Pauku 20. Mamua ae ka lawelawe ana o kekahi mea i na hana o kana oihana, e haawi aku kela ame keia Luna Oihana Kalana i bona i ke Kalana, no ka huina dala i hoakakaia ma keia Kanawai, no ka lawelawe pono ana i na hana o kana oihana. Ma kela ame keia o ua mau bona la i oleloia aole e emi malalao o elua mau hope hoopaa i hookupono like ia laua no ka huina piha i hoomaopopoia ma ka Bona.
Pauku 21. Ma na mea apau i pili i ka lawa piha o ka bona o kela ame keia Luna Oihana o ke Kalana, koe na hoa o ka Papa Lunakiai, na ka Papa Lunakiai e apono. No ka lawa pono hoi o ka bona o na hoa o ka Papa Lunakiai e apono ia e kekahi Lunakanawai o ka Aha Hookolokolo Kaapuni i loaa ka mana hookolokolo maluna a maloko hoi o ke Kalana.
Pauku 22. E waihoia na bona apau me ka Puuku o ke Kalana, koe ka bona o ka Puuku, e waihoia no ia me ka Loio o ke Kalana.
Pauku 23. O na Hope Luna Oihana apau i hookohuia e haawi no lakou i bona i ko lakou mau mua, a maluna o na Mua ma ka Oihana na koikoi apau no ka lakou mau hana, a o ke kupono ame ka huina o ia bona e aponoia no ia e ka Mua i olelo ma ka Oihana.
Pauku 24. O ka huina o na bona o na Luna Oihana o ke Kalana e like no me keia malalo iho nei:
O ka Lala o na Papa Lunakiai: Elima Tausani (5000) Dala; Lunamakai Nui, Kalana o Oahu, Umi Tausani (10,000) Dala; Kalana o Hawaii, Umi Tausani (10,000) Dala; Kalana o Maui, Elima Tausani (5,000) Dala; Kalana o Kauai, Elima Tausani ($5,000) Dala;
Ke Kakauolelo Kalana: Kalana o Oahu, Elima Tausani (5000) Dala; Kalana o Hawaii, Elima Tausani (5000) Dala; Kalana o Maui, Elua Tausani Elima Haneri (2500) Dala; Kalana o Kauai, Elua Tausani Elima Haneri (2500) Dala;
Lunahooia: Kalana o Oahu, Elima Tausani (5000) Dala; Kalana o Hawaii, Elima Tausani (5000) Dala; Kalana o Maui, Elua Tausani Elima Haneri (2500) Dala; Kalana o Kauai, Elua Tausani Elima Haneri (2500) Dala;
Lunahelu ame Lunaohi Auhau: Kalana o Oahu, Iwakalua-kumamalima Tausani (25000) Dala; Kalana o Hawaii, Iwakalua Tausani (20,000) Dala; Kalana o Maui, Umi-kumamalima Tausani (15,000) Dala; Kalana o Kauai, Umi-kumamalima Tausani (15,000) Dala;
Loio Kalana: Kalana o Oahu, Elima Tausani (5000) Dala; Kalana o Hawaii, Ekolu Tausani (3000) Dala; Kalana o Maui, Elua Tausani Elima Haneri (2500) Dala; Kalana o Kauai, Elua Tausani Elima Haneri (2500) Dala;
Puuku: Kalana o Oahu, Iwakalua-kumamalima Tausani (25,000) Dala; Kalana o Hawaii, Iwakalua Tausani (20,000) Dala; Kalana o Maui, Umi-kumamalima Tausani (15,000) Dala; Kalana o Kauai, Umi-kumamalima Tausani (15,000) Dala;
Hope Lunamakai: Na Apana iloko o ke Kalana o Oahu, Elima Tausani (5000) Dala; Na Apana iloko o ke Kalana o Hawaii, Eha Tausani (4,000) Dala; Na Apana iloko o ke Kalana o Maui ame Kaui, Hookahi Tausani (1000) Dala;
Na Hope Lunahelu ame Lunaohi Auhau: Na Apana o Honolulu ame Hilo, iloko o na Kalana o Oahu ame Hawaii, pakahi, Umi Tausani (10,000) Dala; a o na Apana e ae apau, Elima Tausani (5000) Dala;
Pauku 25. E hanaia na bona hoopaa e ukuia i ke Kalana a e like hoi me keia mahope iho nei:
E IKE AUANEI NA KANAKA APAU, O makou (hookomo i ka inoa o ka Luna Oihana maanei) ka Mua, ame (maanei na inoa o na Hope) ua hoopaaia a ua paa i ke Kalana o ……………………… o ke Teritori o Hawaii no ka huina o …………… Dala, dala maikai o na Mokuaina Huiia o Amerika, a no ka uku pono ana a kaa ia mau dala, e hanaia hoi me ka pono ame ka oiaio, ke hoopaa nei makou ia makou iho, na hooilina na hooko kauoha ame na lunahooponopono waiwai, hui a pakahi hoi me ka paa loa ma keia palapala.
(Aole i pau.)