Ka Nupepa Kuokoa, Volume XLIII, Number 21, 26 May 1905 — Page 1
| This text was transcribed by: | Punahele Todd |
| This work is dedicated to: | Na ku`u kupuna wahine...Winona Lonohonuakini Tollefson Kakaio |
Ka Nupepa Kuokoa
KE KILOHANA POOKELA NO KA LAHUI HAWAII.
HOOPUKAIA I NA KAKAHIAKA POALIMA APAU.
BUKE XLIII, HELU 21 NUPEPA KUOKOA, POALIMA, MEI 26, 1903. NA HELU APAU 3069
KA AHAOLELO KUIKAWA.
-
Mau no ka Like Ole o na Hale Kau Kanawai Maluna o na Bila Haawina.
-
Lilo nui na Noonoo ana no ia mau Bila Iloko o na Komite Hui-Hoomahuahua hou ka Hale i ka Bila Hoaie.
-
KA SENATE.
La Hana 13, Mei 15.-He la hana pokole loa keia o ka Aha a i ka hoopanee ana na hooholoia e noho hou ka Aha i ke kakahiaka Poakolu la 17, aole e noho i ka Poalua ae no ka mea aole he hana i makaukau no ka Senate e noho hana ai, a oia no hoi ke kali ana aku i hoouna mai ka Hale i kekahi mau bila haawina no ka noo@@ aku e ka Aha.
Mai ko Hilo Akau mai he palapala noi e noi mai ana e hoo@@ia no o Kauka Irwin i kauka aupuni o ka Apana, oia o Hilo Hema ame Hilo Akau a hoopaaia ka palapala hoopii ma ka moolelo, a mai ko Hakalau poe mai he palapala noi e noi mai ana i haawina dala no ka hana i alanui e moe ai iloko o na aina hookuonoono oiai he poe homehookuonoono ka poe noi a hoopaaia no hoi ko lakou palapala noi ma ka moolelo.
Na Brown mai he elua olelo hooholo mai ko Hilo mai poe-o na Repubalika no nae,-o kekahi olelo hooholo e noi mai ana e hoopiiia ae na uku o na kumukula a o kekahi iho pili ia i ke noi e hookaawaleia i haawina dala no ke kukulu ana i ka halekula kiekie o Hilo.
Mahope iho o ka noonoo ana i ka bila haawina Senate 8 nona ka huina o $2000 no na uku o na hoike iloko o na aha kaapuni ua hooholoia ae ma ka heluhelu ekolu me ka loaa ole o na hoohalahala.
Ma ka noonoo ana ua waihoia aku ka olelo hooholo hui helu 2 pili i ka haawi mana i ka Lunanui o na Hana Hou no ka hoolaha ana no na koho no ka hana ana o kekahi mau alanui o Maui i ke komite hookolokolo maluna o ka ninau kanawai. Ua hookoia aku keia waiho ana ia o ke kumuhana iloko o ke komite hookolokolo ma ka manawa o ka heluheluia ana o ka bila, a hookuu no hoi ka Aha.
KA HALE.
La Hana 13, Mei 15.-I ka hoihoi ana mai o ka Aha i ka bila haawina kuikawa oia hoi ka bila Hale 4, i hoihoiia mai ai i ka la hana i hala iho, me na hoololi, ua hapaiia ae la ua kumuhana nei a lokahi ole ka Hale me ka Senate maluna o na hoololi a ma ke noi a Holstein e kohoia i komite hui a kohoia e ka Lunahoomalu ma ke aponoia ana o ke noi-o Harris, Rice, Copp. Kaleiopu ame Shipman.
Ma ka loaa ana mai o ka bila Senate helu 8, he bila haawina no na keena ua heluhelu ekahiia ae me ka loaa ole o na hoohalahala.
Ma ka noonoo ana i na hoololi o ka Senate maluna o ka bila haawina Hale helu 6 pili i na bila i uku ole ia, ua hoole ae ka Hale i ka lokahi pu ana me ka Senate maluna o ua mau hoololi la a ma ka hooholoia ana e koho i komite hui ua koho aku ka Lunahoomalu ia Waterhouse, Fernandez ame Pali i mau hoa no ke komite hui.
He mau palapala noi mai na kalapu Repubalika mai o ka Apana Ekahi, mahelekoho ekolu ame eha e noi mai ana e hoihoi hou ia ka uku o na kumukula ma ke kahua mua a waihoia na noi ma ka papa no ka noonoo pu ana me ka bila haawina uku-hana.
He mau palapala noi mai ko Hilo Akau poe mai e noi mai ana e weheia i mau alanui iloko o na ai na hookuonoono o lakou oiai he poe home hookuonoono lakou a waihoia ke kumuhana i ke komite holookoa ma ka manawa i noonooia ai o ka bila Senate 3.
Ma ka hooholo ana ua noho ae la ka Hale ma ke ano he komite hale ma ka lilo ana o ka hanohano noho lunahoomalu ana ia Lunamakaainana Nakuina no ka noonoo ana i ka bila haawina kuikawa a hoomaha koke no hoi ka Hale.
Ma ka noho hou ana ae o ka Hale i ka auwina-la mahope iho o ka hoomaha ana a noho hou ae la ka Hale ma ke ano he komtie holookoa no ka noonoo ana maluna o ka bila helu 3 ua hoomaha @@@ ae la ka Hale mahope iho o ka noonoo ana i ke kumuhana.
Ma ka wa o ka noonoo ana a ma ke noi a Rice e waihoia ka kumuhana iloko o ke komite kuikawa nona na lala e waeia ai mai na apana pakahi mai a i hookahi pililaula a ma ke apono ana o ke komite hale ua hookuuia ae la ua komite nei a noho hou ka Hale a kohoia no hoi o Rice, Harris, Waterhouse, Haia, Holstein, Smith ame Long, a o ka hooko ana no hoi i ke koho ana i ke komite kuikawa a ke komite hale i hoike mai ai i ka Hale, a hoopanee no hoi ka Hale.
KA SENATE.
La Hana 15, Mei 17.-Ma keia la i hoouna mai ai ke Kiaaina L@@@a pili i ka papainoa o na luna alanui apuni ka Paeaina.
Na ka Hale i hoike mai i ke kohoia e ia o Waterhouse Fernan @@@ ame Pali, i mau ho no ke komite kuka ma ka aoao o ka Hale no ka hui mai me kela o ka Senate e noonoo ai maluna o ka bila Senate 6.
Na ka Hale mai no he hoike i kona lokahi ole i na hoololi a ka Senate maluna o ka bila haawina Hale 4 a kohia ai o Harris, Rice, Shipman ame Kaleiopu i mau hoa no ke komite ma ka aoao o ka Hale, a koho no hoi ka Peresidena Isenberg ia Dowsett, Achi, Hokey, Hewitt ame Wilcok i mau hoa no ke komite kuka ma ka aoao o ka Senate.
Na ke komite hookolokolo mai he hoike pili i ka olelo hooholo hui helu 8 e noi ana e hoomoeia ke kumuhana ma ka papa a aponoia ka hoike.
Na ka Peresidena i hookohu aku i na lala o ke komite kuka hou a oia o Achi, Brown, ame Paris.
Ma keia manawa ua hapaiia ae la ka papainoa o na hookohu a ke Kiaaina no ka oihana lunanana koho balota a ma ke kuka ana ua waihoia ua kumuhana la i ke komite hookolokolo, a hoopanee no hoi ka Aha a noho i kahi la ae.
KA HALE.
La Hana 15, Mei 17.-O kekahi la hana pokole loa keia i lawelaweia e ka Hale maloko o kona mau hana ponoi, a o ka mea wale no nana i hooloihi ki aku i ka manawa oia no ka heluhelu ia ana o ka bila haawina ma na olelo a elua-ka olelo Hawaii ame Beritania a pau no hoi i ka heluhelu elua ia ka bila.
E nana ma ka aoao eha.
Noho ka Aha Euanelio.
-
Piha ke Kanawalu-kumamakolu o Kona Makahiki o ka Malama ia Ana.
-
Huipu o Kauka Ostrom ma na Hana-Hoike Kula Sabati o ka Mokupuni o Oahu i Keia Poaono-Ka Papa Kuhikuhi Hana.
-
Ma ka Poakahi nei i malamaia ae ai na hana mua loa o ka Ahahui Euanelio Paeaina Hawaii o keia makahiki, a o keia no hoi ka halawai kanawalu-kumamakolu ana oia aha. Ma ka luakini o Kawaiahao i malamaia ae ai na hana, a e hoomau aku ana a hiki i ka la hope o keia mahina. Ua hiki mai na kahu o na Ekalesia like ole ame ko lakou mau elele, a pela no hoi me kekahi poe kahukula Sabati ame ko lakou mau elele, a ua hui pu mai ma keia na Peresidena ame na elele o na Ahahui Hooikaika Pono Karistiano.
O na hana o ka Ahahui Euanelio i keia manawa ua loli ae mai ko na makahiki loihi i malamaia ai na hana oia aha, a i kela manawa ua o-aia na hana mau me na haiolelo hoolana, a ua hookomo pu ia o Kauka Ostrom, ka haole haiolelo hoohulihuli oia kekahi e malama ana i na hana haiolelo. Ua manao ia he mea maikai ka malama ana i keia aha mamua ae o ka manawa i hooholoia no kona noho ana i mea e kaawale ai na hana hooikaika balota Kalana a lawelawe koke ia iho i keia mau la. A o kekahi no hoi i hiki mai na kahu Ekalesia ma Honolulu nei e hoolohe ai i na haiolelo a Kauka Ostrom, a hoi aku lakou a ma ko lakou mau kihapai haiolelo aku e like me kana.
I keia Poaono ae e malamaia ana ka hoike makahiki o na kula Sabati o ka Mokupuni o Oahu nei ma Kawaiahao no. O keia malalo iho nei ka papa kuhikuhi o na hana o ka aha a hiki i ka pau ana:
POAKAHI, MEI 22. HALAWAI HANA O KA AHA.
9:30-10:00 A. M. Halawai haipule-e alakai ia ana e ka Lunahoomalu.
10:00-12:00.
Haiolelo Hookipa-Hon. Edward Lilikalani.
Olelo Pane-na ka Lunahoomalu Rev. H. H. Parker.
Hoomaopopo ana i na Lala o ka Aha-Kakauolelo, L. K. Kakani.
Wae ana i na Komite Mau-na ka Lunahoomalu: (a) imihana, (b) na Palapala Noi a Hoopii, (c) Hoike o na Ekalesia ame na Aha Mokupuni, (d) no na Olelo Hoalohaloha.
Ma ka hora 11:00 A. M. Halawai o ka Papa Hawaii ma kona keena.
2:00-4:30 P. M. Na Hoike a: (a) Komite Imi Hana, (b) ka Puuku, (c) Kakauolelo, (d) Komite Kaahele.
Koho ana i: (a) Puuku, (b) Kakauolelo, (c) na Hoa o ka Papa Akahi o ka Papa Hawaii.
Hoike a: (a) Komite o na Noi a Hoopii paha, (b) Komite o na Hoike Ekalesia ame Aha Mokupuni, (c) Komite o na Olelo Hoalohaloha.
7:30-9:00 P. M. Na Hana e ae
POALUA, MEI 23. POALIMA, MEI 26. KULA BAIBALA.
POALUA, MEI 23.
8:00 A. M. Halawai haipule iloko o na Home a puni ke kulanakauhale.
9:30-10:00. Na halawai haipule.-
Ma ka Olelo Hawaii, na Rev. S. L. Dehsa e alakai.
Ma ka Olelo Enelani ame Pukiki, na Rev. C. F. Shields, o Hilo e alakai.
Ma ka Olelo Pake, na Rev. Icho Ping o Kohala e alakai.
Ma ka Olelo Iapana, na Rev. T. Okumura o Koloa e alakai.
Ma ka Olelo Korea, na Mr. K. H. Moon o Waialua e alakai.
10:00-11:30. Kula Baibala.
Manao Nui: Na Manao Baibala no ka Uhane Hemolele.
Haiolelo-Rev. Wm. Kincaid, D.D.
Haiolelo-Ka mana-Wawahi ame ke kukulu ana. Rev. Henry Ostrom, D.D.
2:00-3:00 P. M. Halawai Hana, ina he pono ia.
3:00-4:00 P. M. Kula Baibala.
Haiolelo-Ke Kahu Haleuanelio. Rev. Henry Ostrom, D.D.
4:00-5:00 P. M. Na halawai kaawale no na mea i kakauia o na Wehewehe ana a Dr. H. Ostrom.
7:30 P. M. Halawai Hoeueu Nui ma Kaukeano.
POAKOLU, MEI 24.
9:30-10:00 A. M. Na Halawai Haipule.-
Ma ka Olelo Hawaii, na Rev. J. Kauhane o Waiohinu e alakai.
Ma ka Olelo Enelani ame Pukiki, na Rev. A. S. Baker, M.D. o Kona e alakai.
Ma ka Olelo Pake, na Rev. I. Man Ming o Hilo e alakai.
Ma ka Olelo Iapana, na Rev. T. Okamura o Koloa e alakai.
Ma ka Olelo Korea, na Mr. P. K. Yoon o Honolulu e alakai.
10:00-11:45: Kula Baibala
Na Manao Baibala no ka Uhane Hemolelo.
Haiolelo-Ka pule e lilo ai i pule waiwai. Rev. J. W. Wadman.
Haiolelo-Na Kristiano mua loa, ko kakou moolelo ame ko lakou. Rev. Henry Ostrom, D.D.
2:00-3:00 P. M. Hawalai Hana, ina he mea pono ia.
3:00-4:00 P. M. Kula Baibala.
Haiolelo-Ka Ekalesia Euanelio. Rev. Henry Ostrom, D.D.
4:00-5:00 P. M. Na halawai kaawale no na mea i kakauia o na wehewehe ana a Dr. H. Ostrom.
7:30 P. M. Halawai Hoeueu ma Kaukeano.
POAHA, MEI 25.
9:30-10:00 a. m. Na halawai haipule.
Ma ka Olelo Hawaii, na Judge H. K. Kahele o Lihue e alakai.
Ma ka Olelo Enelani ame Pukiki, na Rev. C. D. Milliken o Waimea e alakai.
Ma ka Olelo Pake, na Rev. C. How Fow o Keokea e alakai.
Ma ka Olelo Iapana, na Rev. T. Miya Mori o Makaweli e alakai.
Ma ka Olelo Korea, na Mr. S. Hyen o Kahuku e alakai.
10:00-11:45. Kula Baibala.
Na Manao Baibala no ka Uhane Hemolele.
Haiolelo-Rev. Curtis F. Shields.
Haiolelo-Ka I`o o ka Hoola ana i huna ia. Rev. Henry Ostrom, D.D.
2:00-3:00 P. M. Halawai Hana, ina he mea nono ia.
3:00-4:00 P. M. Kula Baibala.
Haiolelo-Ka Baibala ame kona waiwai. Rev. Henry Ostrom, D.D.
4:00-6:00 P. M. Paina Inu Ti no na kahunapule ma Kaukeano mamuli o ke kono a ka Papa Misiona o na Wahine
7:30 P. M. Haiolelo Hoeueu ma Kaukeano.
POALIMA, MEI 26.
9:30-10:00 A. M. Na Halawai Haipule.
Ma ka Olelo Hawaii, na Rev. s. Kapu o Lahaina e alakai.
Ma ka Olelo Enelani ame Pukiki, na Rev. R. A. Buchanan o Kohana e alakai.
Ma ka Olelo Pake, na Rev. Tin Ah Lin o Wailuku e alakai.
Ma ka Olelo Iapana, na Rev. K. Komuro o Kona e alakai.
Ma ka Olelo Korea, na Mr. P. K. Yoon o Honolulu e alakai.
10:00-11:45. Kula Baibala.
Na Manao Baibala no ka Uhane Hemolele.
Haiolelo-Rev. D. Scudder, D.D.
Haiolelo-“Ka Makana a ka Uhane. Rev. Henry Ostrom, D.D.
2:00-3:00 P. M. Halawai makahiki o ka Papa Hawaii ma Kona Keena.
3:00-4:00 Kula Sabati.
Haiolelo-Ke kulana kupilikii i keia wa-Ka Ekalesia ame ke Ao nei.
4:00-5:00 P. M. Halawai kaawale no na mea i kakauia o na wehewehe ana a Dr. Ostrom.
7:30 P. M. Halawai Hoeueu ma Kaukeano.
(E nana ma ka aoao 5.)
Kauhana a ka Aoao Repubalika no ke Kalana o Oahu.
-
E hooholoia e na Repubalika o ke Kalana o Oahu ma ka Ahaelele e noho nei:
1. Ke kukala nei makou i ko makou kui o a pili hoi i na kumu alakai o ka aoao Repubalika o keia Territori e like hoi me ia i hoikeia ma ke kahuahana i hooholoia e ia aoao ma ka halawai ahaelele i malamaia ma Hilo ma ka la 1 o Sepatemaba, 1904.
2. Ke hoomaikai nei makou i ko kakou Elele i ka Ahaolelo Nui, Hon. J. K. Kalanianaole, maluna o ka holopono ana o kana mau hooikaika ana ma ka aoao o keia Teritori ma Wasinetona.
3. Ke hoike nei makou i ko makou apono hololea ana i ka hana i hanaia me ka maikai e na poe kau Kanawai Repubalika ma na kau Ahaolelo i hala ame ko keia e noho nei o ka makahiki 1905, e ike aku ana hoi ma ke anuu kiekie loa i na hooikaika pauaho ole a ko kakou poe hana kanawai o ke Aupuni i kohoia no ka laweana mai a kokoke ia kakou nei i ko Amerika manao hana ma ka haawi ana mai ia kakou i aupuni kalana.
HAULE O CRABBE IA BROWN.
-
Wae ka Ahaelele Repubalika o Oahu i na Moho no na Oihana Kalana.
-
Kau ia he Rula Hoohaiki i ka Wae Moho ana o Haule o Senatoa Achi Mamuli oia Rula-Paio Ikaika no na Lunakiai.
-
Na Luna Kalana o Oahu.
-
Arthur M. Brown-Lunamakai.
D. Kalauokalani, Jr.-Kakauolelo.
James Bicknell-Lanahooia.
Chas. W. Booth-Puuku.
E. A. Donthitt-Loio.
E. R. Adams-Lunakiai holo laula.
Geo. W. Smith. John Lucas ame J. C. Quinn-Lunakiai no Honolulu.
R. A. Woodward-Lunakiai no Ewa.
Andrew Cox-Lunakiai no Waialua.
Dick Lane-Lunakiai no Koolau.
J. Kalakiela-Hope Lunamakai no Honolulu.
J. Fernandez-Hope Lunamakai no Ewa.
H. H. Plemmer-Hope Lunamakai no Waialua.
Frank Pahia-Hope Lunamakai no Koolau.
-
O keia maluna ae nei ka hua i loaa mai ka Ahaelele Repubalika i noho ai ma Progress hale ma ka po Poaono i hala. O keia kekahi Ahaelele i ulu nui ae na paio balota ana mawaena o na moho i waihoia ae ai ko lakou mau inoa, a ma kekahi hoi ua hele me ka malaelae.
O ka heihei no nae i kau nui ia ai na noonoo no ka hopena e loaa mai ana oia no ka heihei no ke kulana Lunamakai, a o ka hopena i loaa ae oia ka ike lea ia ana o ka ikaika io o na moho i nunui iho ai na hauwawa ana no laua, oia hoi o Brown ame Crabbe. Ua haule o Crabbe ma o na balota oi he 10 o Brown.
Na Robertson, ka lunahoomalu o ke Komite Kuwaena o ka aoao Repubalika i kahea ae i ka halawai, a mahope o ke kahea inoa ana i kohoia ai o Hon. W. W. Harris i lunahoomalu no ka manawa. Nana i wae ae ia-Andrew Cox, R. A. McKeague, A. S. Kaleiopu, T. P. Cummings,
W. I. Emory, Chas Hustace, Jr., J. Mana, i komiteno na hookohu.
Komite o na Rula ame Kukulu Aha ana-Andrew Adams, N. Fernandez, John Bell, George F. Renton, C. H. Clarke, J. Kupihea, George Smithies, J. W. Cotheart, G. P. Wilder, C. K. Quinn, R. N. Boyd.
Komite o na Olelo Hooholo-A. F. Judd, C. J. Holt, J. J. Fern, C. H. Cooke, A. D. Castro, W. F. Drake, J. J. Belser.”
Mahope o ka hoomaha ana no ke kali ana i na hoike, ua hui hou ae ka Ahaelele, a hoolohe i na hoike malalo iho nei:
HOIKE KOMITE O NA RULA.
-
I ka lunahoomalu ame na lala o ka Ahaelele o ke Kalana o Oahu.
E na keonimana: O kou komite o na rula ame ke kukulu pono ana i ka Ahaelele ke noi nei e waiho aku i keia hoike, e nooia ana hoi i keia mau rula malalo iho nei no ke aponoia mai e ka Ahaelele.
1.-O na lunanui maoli o keia Ahaelele i Lunahoomalu, Hope Lunahoomalu, Kakauolelo, Puuku, ame Makai-o-ka-Hale.
2.-Penei ka lawelawe ana i na hana:
(a)-Kahea inoa.
(b)-Koho ana i na lunanui maoli.
(c)-Hoike a ke Komite o na Olelo Hooholo.
(d)-Ka waiho ana mai i na inoa moho o na luna Kalana a like me keia: Lunamakai, Kakauolelo Kalana, Lunahooia, Lolo Kalana. Puuku ame ka Luna-kiai-holo-lauia.
(e)-Mahope koke iho o ka wae ia ana ae o na inoa moho no na kulana i oleloia, e hoomaha ka Ahaelele, a e hoi aku kela ame keia elele o keia ame kela apana a e wae ae i na moho no na lala o ka Papa Lunakiai ame na Hope Lunamakai.
(f)-Mahope o ka hui hou ana ae o ka Ahaelele, e kukalaia ae ia wae ana e ka lunahoomalu o kela ame keia mau elele. Ma ke kulike ole ana o kekahi elele a hiki ole ke loaa ka moho no kekahi oihana iloko o kekahi manawa kupono, e nee aku no ka Ahaelele ma ka wae ana i moho.
(g)-Ke koho ana i ke Komike Kalana. Na kela ame keia mahele koho e hoike ae i ka lakou i koho ai i Hoa Komike Kalana i aela ma ka Pauku 1A o na rula o ka aoao Repubalika.
(h)-Na hana e a`e e laweia mai ana imua o ka ahaelele.
(i)-Ka hookuu ana.
3.-Ma na wae ana apau no na luna kalana o ke koho ana ma na wahi i oi aku mamua o hookahi inoa ma ka balota no ia ma ke kaheaia ana o na inoa.
4.-I mea e loaa ai ka waela ana no ke kulana e pono e loaa i na moho la ka hapanui o na balota i hookomoia.
5.-Aole loa kekahi mea i waihoia a`e kona inoa no kekahi kulana e kolila aku e waiho mai i kona inoa mai ka noonooia ana.
6.-Ina mahope o na koho balota ana no ekolu manawa me ka loaa ole o ka wae ana ua hiki no i kekahi elele ke koho i kekahi mea i kupono me ka nana ole a`e ina no ua paniia ka puka no ka hookomo inoa ana.
7.-O kela ame keia moho e wae ia ana no kekahi kulana kalana mamua o ka balota ana e ku a`e oia a hoopaa iho iaia imua o ka ahaelele e ae a e ku mahope o ka hopena e loaa mai ana ma ka balota ana.
8.-O ka hapanui o na lala o ka ahaelele oia no ke koramu no ka lawelawe ana i na hana o ka ahaelele.
9.-E hiki no ke kapaeia keia mau rula ma ke koho ana o ka ekolu-hapaha o na elele i hiki mai.
Mahope o ka aponoia ana o keia hoike ua hoomaka koke ke koho ana i na lunanui e like me keia: W. W. Harris, Lunahoomalu: Harry Murry, Kakauolelo: William Isaacs, Hopehoomalu: John Waterhouse, Puuku a o S. M. Kanakanui i Makai-no-ka-Hale.
Hapaiia mai ka hoike a ke komite o na olelo hooholo, oia no hoi ke komike o na olelo hooholo, oia no hoi ke komike hana kahuahana, a oia kela e ikeia aku ana ma kekahi wahi o keia pepa.
Hapaiia mai ka wae ana i na luna kaiana e like me ka hoike a ke komike, o na rula, a hoomaka koke ka waiho inoa ana no ka Lunamakai Kalana.
Na A. D. Castro ma ka haiolelo pokole ana i waiho mai i ka inoa o Kalalena Papai i moho no ia kulana, a na S. W. Logan hoi i waiho mai i ko A. M. Baraunu inoa. Na Anaru i haiolelo pokole a`e e kokua ana ia i ka inoa o Papai, a na O. Cox o Waialua i haiolelo ae e kakoo ana ia Baraunu i kokua pu ia mai hoi e John Cathcart, a noiia e pani i ka puka a hoomaka koke ke koho ana. O ka hopena i loaa mai oia ko Baraunu kohoia ana i Lunamakai ma o na balota he 73 ia 63 wale no o Papai.
Aole he hoopaapaa ana no ke kulana kakauolelo kalana, a oiai o ko D. Kalauokalani Opio inoa wale no ka i waihoia a`e, an ke kakauolelo o ka ahaelele i hookomo a`e i balota nona.
No ke kulana Lunahooia he ekolu inoa i waiho ia ae, oia ko Bicknell, Solomona Mahelona, ame E. Woodward, a o ka hopena o ka balota mua ana, aole he mea i waeia. He 60 balota no Bicknell, 43 o Mahelona, a he 37 o Wodward. Waiho o Mahelona i ka holo ana a koe elua wale no inoa, a ma ia koha ana ua lilo ia Bicknell ka hanohano.
Aole he hoopaapaa ana no ke kulana Lolo Kkalana, a oiai o ko E. A. Doutbitt inoa wale no ka i waihoia ae, ua kauohaia ke kakauolelo e hookomo iho i balota nona.
He elua inoa i waihoia mai no ke kulana Puuku o ke Kalana, oia ko Kale Keopu ame ko G. Walia, a ma ka balota ana ua kohoia o C. W. Booth (Keopu) i Puuku ma o na balota he 76 a he 63 wale no Waila.
He elua inoa i waihoia ae no ke kulana Lunakiai-holo-laula, oia ko W. C. Aebi ame ko E. R. Adams, aka aole
(E nana ma ka aoao 5.)