Ka Nupepa Kuokoa, Volume XLIII, Number 46, 17 November 1905 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, POALIMA, NOVEMABA 17, 1905.  @

 

KULIANA

Ka Weli o Damaseko.

KA HOOKO MOEUHANE A KA U’I ULINA.

MOKUNA 1V.

KE KANAKA MALIHINI

 

            “E hoike no wau ia oe, e ka lede. Ina aole ka Moi o Damaseko ina i keia la he kanaka lanakila a hauoli o Kuliana malalo iho o ka la: aka i keia manawa he malihini oia a he kuewa maluna iho o ka ilihonua. He mea oia e auwana ana, aole ona home, a o kona mau hoaloha oia no na poe i hui pu mai me ia ma keia hana ku i ka weliweli e ikeia nei. He manawa no – he mau makahiki i kaahope ae nei, he mau makua kona a aia hoi imua o kona alo na ouli nani e waiho mai ana; aka iloko o ka hora o ka hauoli ua kau mai la ka pouli ame ke kaumaha. O Horama, iloko o kona ino, liilii makaewaewa, na kaili ae la oia i ka ouli malamalama e kau ana imua o Kuliana. a huna aku hoi mai kona mau maka aku i ka hoku o ka manaolana no ka manawa pau ole. O, e ka lede maikai, aole e hiki ia’u ke hoehaeha aku i kou mau pepeiao me na hana a Horama i hana aku ai no Kuliana. Ina wau e hoike pau loa aku ana ia oe, e manao no auanei oe i ka moi he ino a he lapuwale e papani koke ai oe i kou puuwai mai iaia mai, a e haalulu auanei kou uhana i ka manwa e puka ai kona inoa. E like me ka oiaio o keia mau aouli maluna o kaua. pela no hoi ka oiaio aole loa he manao ino iloko o ko Kuliana puuwai. I kona manawa e huli aku ai ihope a nana aku i kona mau la kamalii i kailiia aku ai ke aloha o ka makua mai iaia aku. a ike maopopo aku hoi na ka moi o Damaseko i hana hilahila ole a i hookau mai hoi maluna ona i ke kaumaha, aole anei e hiki ia oe ke ike koke iho i ke kumu i oni ai kona uhane e kau aku i ka panai kupono no ka hana i hanaia mai maluna o kona kino opio?”

            “Aole l@a wau i lohe iki i keia moolelo,” i pane aku ai o Ulina. e haalulu ana hoi kona leo. “Ina he oiaio keia au i hoike mai nei, alaila a@@ loa wau e hoahewa ana ia Kuliana.”

            “Eia nae, ua maka’u oe iaia, e ka lede.”

            “Aole e hiki ia’u ke alo ae mai ia mea ae. Ua hele mai nei oia ianei @@ kona makaukau kaua, a kaua ku-e mai nei ia’u.”

            “Aole pela, e kuu lede maikai. Ua kuhihewa oe i kana mea i manao ai. Ua hiki ia’u ke hoike aku ia oe i kona kumu o ka hele ana mai nei ianei. Ua lohe oia mai kekahi elele mai i halawai hoi me ia ma ke kula o Matala. ua hoopaaia kekahi wahine u’i maanei -  he opiowahine hoi na ka moi i manao ai e lawe ae i wahine nana. Malia mamuli o kona makemake e hoohoka aku ia Horama i ka wahine; aka nae ua oi aku kona hauoli e hookuu aku i ua lede ia mai kona nohopio ana. ua ike oia i na hana a ka moi o Damaseko i hana aku ai i kana mau wahine. Ua lohe no hoi oia aole i mamao loa aku mai ka rumimoe aku o ua moi la na ka’e o ka muliwai o Papa, a malalo o ia kumu i hele mai nei oia e hoopakele ae i kekahi mea e halawai aku ana me kekahi hopena mai ka moi mai mamua hoi o ke ino e hoin@ia nei ka WELI O DAMASEKO. Ua hana anei oia i kekahi hewa ino loa ma keia, e ka lede maikai?”

            “He mea oiaio, aole loa i maopopo ia’u ka’u mea e ha’i aku ai.”

            “Aole anei oe e ae ana e ike aku ia Kuliana? Mai maka’u oe. Ke hoike aku nei wau ia oe he kanaka oluolu oia.Ua ike no hoi wau na makemake oia e kamailio pu me oe – a e lohe hoi mai kou waha ponoi mai aole oe i manao he kanaka ino oia, a he makemake pu no hoi oia e lohe i kau mea e makemake ana nana e hana mai @ou.”

            “I ka manawa hea oia e hele mai ai?”

            “I ka la apopo, ina nae ia he mea oluolu ia oe. Ke kokoke aku nei @ po.a aole hoi e hoopilikia ia kou hooluolu ana. Ua hiki ia oe ke moe iho i keia po me ka maalahi i loaa mua ole ia oe a i like aku hoi me ka manawa au e moe ana iluna o na lima aloha o kou makuahine, a pela hoi oe e moe ai oiai wau e ku kokoke ana no ke kiai ana ia oe. E ike anei oe ia Kuliana i ke kakahiaka?”

            “E hele pu mai ana anei oe me ia?”

            “Ina oia kou makemake, e ka lede.”

            “O ia ko’u makemake, no ka mea o oe iho la ka’u mea i kamaaina ai: a mawaho ae no hoi o ia, a he mea pono ia’u ke hoike e aku, ua hilinai wau ia oe.”

            “Ina pela e hele mai ana no wau.”

            Mahope o keia mau papaleo ana, ku ae la ua opio la iluna, a nee aku la no ka puka. Huli mai la oia me kona mau lima e paa ana i ka laka. a pane mai la:

            “Ke manaolana nei wau he mau moeuhane maikai kau e moe iho ana i keia po. Ina e hiki mai kekahi mau kupuino ma kou mau uluna, aole lakou no Kuliana. Aia he mea okoa ae au e kau ai ka weili – he mea hoi i kau na makahiki manao poo paa maluna iho ona a i makaukau e omo aku i ka nani mai ia oe ae. E kala mai ia’u, no ka mea ke hele nei wau me na hoomaikai ana he nui maluna ou.”

            Iloko o ka manawa pokole ua nalo aku la ua opio nei mai ko laua nei alo aku, a no Ulina hoi aia no kona mau maka ke kau la ma kahi i ku iho ai ka opio, e noonoo ana hoi no ka opio kanaka u’i i papaleo ai me ia i na sekona mamua iho, a na ke kaomi ana o kekahi lima maluna iho o kona poohiwi i kaili ae i kona mau maka mai kahi ana e nana ana me ka puiwa, a ike ae la oia ia Alabia e ku ana ma kona aoao.

            “E kuu hakuwahine, aole anei keia he mea kamahao?”

            “He mea kamahao loa keia,” wahi a Ulina me kona kaulono pono hou ana aku i kona mau maka i kahi a ka opio i ku ai.

            “Heaha kou manao no keia kanaka malihini,” i hoomau hou ai o Alabia, a ia manawa pu no hoi i noho iho ai oia ma ka aoao o kona haku.

            “Heaha hou kou manao?” i pakui aku ai o Ulina.

            “Ke manao nei wau he kanaka u’i maoli no keia. O keia kekanaka nanaina keouimana hookahi a’u i ike ai.”

            Ma ko Ulina aoao ua hoike aku la oia i kana pane e ka nanaina hoihoi. O kona hauoli ia, aka nae aole paha oia i homaopopo ia mea.

            “O ke kanaka e like aku me kela aole ia he kanaka ino,” wahi a ua Ulina nei i pane aku ai. “Aole e hiki i ka hoopunipuni ke noho iho ma kekahi helehelena e like me kona.”

            “Pela io no ko’ manao,” i panai aku ai o Alabia. oiai ua hoopuka mai kona haku i na huaolelo maluna’e ma ke ano he ninau.

            “A heaha hoi kou manao no kana moolelo i hoike mai nei e pili ana no Kuliana?”

            “Ke manao nei wau ua hoike mai oia ia kaua i ka mea oiaio. e kuu haku, oiai iaia e hahai ana i kana moolelo. hoomanao ae la wau ua lohe no wau ia mea i kekahi manawa i hala ae nei, a ua like no kana i hoike iho nei ia kaua me ka’u mea i lohe ai.”

            “Alaila, he kanaka paakiki a inoino o Horama?” i ninau mai ai o Ulina, me kona iini e lohe aku i ka haina a kana kauwa.

            “Aole he pono ia’u e ha’i aku i haina no ia ninau au, e kuu haku. O Horama oia aku ana kau kane, a he mea maikai ole nou ka hookonokonokonokono ana mai ia’u e kamailio ku-e aku iaia.”

            “He mea oiaio, e kuu Alabia maikai, aole wau i ninau aku nei ia oe i m@a nou e hoopuka mai ai i na olelo lapuwale no Horama.”

            “Ina pela, alaila, he mea maikai ole ka ninau ana mai ia’u i ko Horama ano. Ua oi aku ka pono ia’u e kamailio no ke kanaka ia haalele koke iho nei ia kaua. No’u iho, he wahi kauwa wale iho no wau, aka nae ua hiki ia’u ke aloha aku i ke kanaka i like me ko keia opio i ku iho nei imua o kaua.”

            Hapai ae la o Ulina i kona lima a kau iho la ma kona puuwai. a kaomi iho la malaila me he mea la na helo ae kekahi mea huihui iloko o kona puuwai. a i ua Ulina la e noho ana pela, komo ana kekahi o na kauwa a ninau mai la iaia ina paha he makemake ko laua e paina i ka aina ahiahi.

            “Aole i keia manawa, e Kaleiopa.” wahi a Ulina. me kona ku pu ana ae iluna. “Ua hiki nae ia oe ke lawe mai i huihui waina hou. ame ona mau hua waina maloo. Aka nae e hoike mai ia’u i ka hana a keia poe malihini e hana mai nei. Ehia ko laikou nui iloko nei?”

            “Aole i oi aku mamua o umi o lakou iloko nei o ka halealii, e kuu haku; aka nae he mau kaukani o lakou mawaho aku o ke awawa nei.”

            “Pehea oe i manao ai pela?”

            “Ua lohe au i ka olelo ana a kekahi o na koa o ke ‘lii, a ina he kakaikahi wale no lakou, aole e haulehia na pukonako@a a Horama.”

            “Alaila aole oe i ike i ka huina nui maoli mawaho ae o kau i ike

            “Aole, e kuu lede maikai; aka nae ua hiki no ia oe ke noonoo iho aole e haalele na koa o Horama i ka paio ana ina lakou i ike mua he kakaikahi wale na hoa o Kuliana.”

            Aole he manao hoopaapaa iloko o Ulina no keia mau olelo a ua kauwa la; nolaila ninau aku la oia i ka hana a na powa e hana ana.

            “Mahope mai o ko lakou nakinaki ana i na koa o ka moi. aole a lakou hana no ka noho wale iho no iloko o ka malapua a kamailio. O ke kanaka e noho pu la me lakou, a i pii mai nei hoi e ike ia oe, ua olelo mai nei oia ia makou e hoomau aku no ma ka makou mau hana.”

            “Ua ike anei oe ia Kuliana?”

            “Aole, e kuu lede; aole oia i komo iki mai, a ke manaolana nei wau aole oia e komo mai ana. Me he mea la ina paha oia e komo mai ana e kau e ana ko kakou weli mamua o kona kokoke ana mai.”

            “Eia nae hoi, o kekahi o na kauwa i hele mua mai nei. ua olelo mai oia ia maua na Kuliana oia i hoouna mai. Pehea iho la hoi ia?”

            “Ke maopopo ole nei ia’u ia mea. Malia paha ua komo io mai no oia aole no nae wau i ike iaia. Aole no wau i ike ia lakou apau loa,” wahi a ua kauwa la. a haalele iho la oia ia Ulina ma.

            “E Alabia,” wahi a Ulina i ka manawa i hala aku ai ua kauwa la. “aole o’u manao he kanaka nanaina weliweli keia Kuliana. Pehea la kou manao?”

            “Ua manao wau he kamailio wale iho no kela na ka poe i ike ole iaia, a mamuli o ko lakou maka’u wale iho no i kapa aku ai iaia he kanaka ku i ka weliweli ke nana aku.”

            “O ko’u mnao no ia,” wahi a Ulina. a kau hou aku la kona mau maka ma kahi i ku ai ua opio malihini la. alaila pane hou aku la: “E ike aku ana wau iaia i ka la apopo. a ke hoike e aku nei no wau ia oe, aole o’u maka’u i ka hui aku me ia. no ka mea ke manaoio nei wau aole ona manao e hanaino mai ia kaua.”

            “Eia nae hoi,” wahi a Alabia me na hoailona pahaohao e halii ana maluna o kona helehelena. “he kupaianaha ka noonoo ana o keia kanaka e kii mai a hookuu ae ia oe mai na lima ae o ka moi. Malia paha aole ia kaua ia wahi.Malia paha ua manao oia he wahi opiowahine hoaloha ole oe i ike ole ---.”

            Kau aku la na lima o Ulina e papa ana i kana kauwawahine, me ka pane pu ana aku:

            “Aole kaua e kamailio no ka moi, e Alabia: a no na mea e pili ana i keia Kuliana i ka la apopo kaua e ike ai i kekahi mau mea e pili ana nona.”

            Me he mea la ma keia mau kukaiolelo mawaena o Ulina ame kana Alabia ua komo mai kekahi mana kupaianaha a kailiia aku mai iaia aku i na manao maka’u no Kuliana, e like hoi me ia a kaua ike mua ae nei. Iaia i hoi aku ai e hooluolu ma ia po aole loa he wahi maka’u iloko ona. Aole wale oia, aka iaia i moeuhane ai ike aku la oia i ka powa ana i maka’u ai e ku mai ana imua o kona alo – aole e like me kaua i manao mua ai. aka he opio kanaka u’i a kulana keonimana, i okomoia kona mauma me ka oluolu ame ke aloha. He elua moeuhane mawaho ae o keia, a o keia na moeuhane nana i hoohikilele ae iaia me ka maka’u oiai ua ike aku la oia ia Horama e ku mai ana imua ona me kona nanaina makona. a e kuhikuhi ana kona mau lima i ka wai e kahe ana iloko o ka muliwai o Papa, me he mea la e i mai ana iaia, ua makaukau ka muliwai o Papa e ale aku iaia.

 

MOKUNA V.

 

HUI MEKULIANA.

 

            He kakahiaka nani a malaelae ka hoea ae i kekahi la ae, a e ko ana hoi ka makani aheahe a pehei iho maluna o na pua aala o ua awawa la, a lawe aku i ko lakou aala kupaoa ma na khi eha o ua awawa la. Ua pau iho ka Ulina ma ai ana i ko laua paina kakahiaka, a e noho ana hoi o Alabia ma ka aoao o kana milimili ma kekahi puka aniani, e nanea ana hoi i ka nana ana i ka lelehune mai o ka wai iloko o ke ki’owai e uluia ana e na pua lilia. Ia laua e noho ana pela, hemo ana ka puka o ko laua nei rumi a komo ana o Kaleiopa, a hoike mai la ua makemake ke kanaka powa e ike ia Ulina.

            “Owai keia powa i makemake e ike ia’u?” i ninau aku ai o Ulina.

            “O kela kanaka no hoi i kipa mai ai e ike ia oe inehinei.”

            Aole i ku iho o Ulina a noonoo ae ina paha he halawai pono a pono ole paha keia. Ua hoike mua aku ua opio la i kona manao, a oiai aia ia wahi malalo o na powa. aole loa oia i manao e ku-e aku. Puka aku la o Kaleiopa iwaho. a aole no hoi i liuliu iho komo ana ka opio iloko o ka rumi. Ua komo aku la ua opio la me kela kulana keonimana a oluolu e like no me ia ana i komo aku ai i ka la mamua iho; a me kela nanaina maikai no i haawi aku ai oia i kona aloha i na opiowahine e noho mai ana.

            “Ke manao neiwau ua moe iho oe i ka po nei me ka maikai,” wahi a ua opio nei me ke kuoo maoli.

            “Ua moe wau me ka maikai.” i pane aku ai o Ulina.

            “Maikai. Ke hauoli nei wau no ia mea Ua anoe ko’u noonoo malia paha ua loaa ia oe he mau moeuhane inoino.”

            “Aole no hoi i nui loa,” i pane aku ai o Ulina, me na minoaka e papahi ana maluna o kona mau papalina.

            “A – alaila ua loaa no ka he mau moeuhane inoino ia oe?”

            “Aole no he nui loa.”

            “Alaila ua moeuhane oe he diabolo o Kuliana. pela anei?”

            “Aole, aole e keonimana. – o ka’u mau moeuhane aole nona.”

            “Ke manaolana nei wau, e ka lede maikai, o kau mau moeuhane inoino aole hoi no’u.”

            “Aole, e ke keonimana maikai. He mau moeuhane ka’u no –“

            Ua kuha’u iho la o Ulina maanei. a me he mea la ua hoinoinoia aku kona noonoo: eia nae ua hoopau koke ia ae ia mau haawina i ka manawa a ka opio i pane aku ai:

            “Mai nana oe ia mea, e ka lede maikai. Ua pau ae ia no. Aole wau i manao e nieniele aku i na mea huna au e hiipoi nei O ka’u wale no i manaolana ai e lilo ole ko’u hiki ana mai imua ou i mea e hoinoinoia ai kou moe maikai ana.”

            I ua opio la i pane akau ai i keia mau olelo.. aia na minoaka oluolu ke papahi la ma kona mau papalina, a ia manawa pu no hoi aia oia ke hookokoke loa aku la i kahi a ka U’i Ulina e noho ana, a hoomau hou aku la oia:

(Aole i pau.)

 

TISIA-O-ATICA

 

Ka Wiwoole o na Wiwoole

 

Ke Ahikanana Nana i Ulaa ke Kanawai o ka Make o Cirelia.

 

MOKUNA 1.

 

NA HANA KUPAIANAHA A TISIA.

 

            Ma ka aoao hikina hema o Agolisa, ma ke kai kuono o Saroni@a. ma ke kulanakauhale o Torena, e noho hoomalu ana kekahi alii kahiko loa o Pitiasa kona inoa. He kuleana hoomalu kona ia ma @ la; aka nae, ua nui a lehulehu wale na Aupuni liilii e ae ana e noho hoomalu ana malalo o kona malu ia mau la poliuliu o ke Au kahiko loa.

            Ia Pitiasa e noho alii ana maluna o keia mau Mokupuni liilii o ka aoao hikina-hema o Agolisa ua lawe ae la oia i kona kulanakauhale poo Aupuni o Greece. Ua hoopuniia hoi me na pa -kaua o ke au-kahiko keia kulanakauhale me ke kulana i pii mahuahua ae ai kona mana alii e pahola ana ma o a maanei nei o ka aina

            He nui a lehulehu wale na makahiki o ko Pitiasa. noho hoomalu ana maluna o keia mau mokupuni liilii i oleloia ae la; a ua kaulana hoi kona hooponopono aupuni. he aupuni hoopono ame ka nohona maluhia

            Ua hanau mai nana he hookahi kaikamahine. a na kapaia kona inoa o Atira. He kaikamahine keia i loaa iaia i kona mau la a oo; he wahine hoi o ke kulana maikai, maemae. a piha @e ka u’i. Ua kaulana ae iloko o ia mau la ma ke kulanakauhale o Torene. ua mare o Atira i ke kane i maopopo ole; aka, ua malama no nae oia iaia iho ame kona makuakane.

            Ua kaahele mai oia he hookahi manawa iloko o ka makahiki e makaikai i kona home aloha i hanauia mai ai; aka, oiai oia e manao ana pela, ua alakai pu ia kona lunaikehala e loaa pu iaia ka ike ana aku i kona ohana ponoi no kekahi manawa pokole.

            Ua hele mai oia ma ke alahele moana maluna o kekahi wahi moku pe’a ma ke ano malu loa o ke kulana lede me na poe luina oluna o ka moku no ke Kulanakauhale o Torene. Iaia ma ke alahele moana maluna o ka moku na puni ia iho la ko lakou nei wahi moku @ kekahi kikiamakani ikaika loa e paialewa ia ana e na ale ahiu o ka moana i o a ianei.

            Iloko o keia manawa kupilikii o ka popilikia e @ekau iho ana maluna o ko lakou nei wahi moku, i nana maikai ia mai no e ka u’i Atira me ka noho hamau ana iho no kekahi manawa pokole, a i ka ea ana ae o kona poo iluna, aia hoi, ua noho hamau iho la na ale o ka moana.

            I ka manawa o na luina oluna o ua wahi moku nei i ike mai ai i ka lana malie o na kai huhu o ka moana, ua hooloho like mai la lakou me ka puana ana ae i keia mau huaolelo: “Kupaianaha o na kupaianaha ka U’i Atira. i hanau kupaianaha ia mai no @a hoi oia e kona makuakane alii Pitiasa, a e lilo aku ana oia i wahine alii kaeaea kupaianaha nana e rula aku na ale ahiu o ka moana.”

            Mamuli o na hana kupaianaha a Atira i hana ai, a noho malie na ale kupikipikio o ka moana, ua hoomaka iho la kekahi o na kela moku e inu nui i ka waina, homaka mai la e kamailio i na poe lawa i’a ekolu e hookuu iho i ka lakou mau upena ma kahi e hookuu ai o ka heleuma o ko lakou nei moku.

            Ua hoouna ia aku ia na kela moku me na poe lawai’a ekolu oluna o ua wahi moku nei, e ke aliiwahine Atira e lele iuka o ka aina; aka, ma ia hope iho, aole lakou i ike hou ia aku e na kaikamahine alii la.

            E na makamaka heluhelu. e haalele iho kakou i ke kamailio ana no ka U’i Atira. oiai, ua le-go iho la ka heleuma o ko lakou nei wahi moku i ke one hanau o kona kino alii. a e huli ae hoi kakou a nana i kona makuakane alii Pitiasa i noho aku la ihope.

            Oiai ke kaikamahine alii i kaawale mai ai mai ka poli pumehana mai o kona makuakane alii Pitiasa, a hala ae la ua makahiki lehulehu. na piha hauoli iho la kona makuakane alii i ka pii ana ae o ke kaulana o kana moopuna alii Tisia, ka wiwoole o na wiwoole. Ke Ahikanana nana i ulaa ke kanawai o ka make o Ceritia. Ka mea hoi nona keia Nanea a kakou e hoohiainai nei, a o ke keiki ponoi hoi a ke alii wahine Atira.

            I ka la opiopio loa o ke keiki alii Tisia, ua hoouna ia aku la oia e kona kupunakane alii Pitiasa i ke kula ma ke kula kiekie Pitiasa, e a’o i ka ike ame ka naaao, ma ke kulana o na alii o ke AU kahiko iloko o ke apo o ke aloha ame ke kuikahi like.

            I ka hiki ana mai o ke kau-hooilo, oiai na mauna kiekie o Agolisa e haawi mai ana i na waihooluu like ole o ke kulana maikai o ka aina ke nana aku, ua hele aku la na kane e kanu i na huaai o na ano like ole maluna o ka lepo momona o ia mau wahi, a hiki wale no i na hora li’ula o ke ano ahiahi o ia la.

            A i ke kakahiakanui o kahi la ae e hoomaka ae ana na ao opiopio ka ilikai e halii iho maluna o ka moana. ua ie ia aku la kekahi mokupe’a e hekau mai ana mawaho pono ae o ke awakumoku o Torene: ua ala like mai la na hoomanao ana iloko o na makaainana o ia aupuni, ame ke alii Pitiasa o ke kaikamahine alii Atira no keia.

            Ua kamoe aku la ke alahele o ke alii Pitiasa ame na makaainana o na lahui like ole no kai o ka uwapo. Ia wa i hookuu ia mai ka waapa, ua kau iho la ke aliiwahine Atira. a no ka aina ka ihu o ko lakou nei waapa e holo nei. I ka aneane ana e pili mai ko lakou nei waapa i ka uwapo. ua hi-hi-hi-huro aku la na makaainana aloha o ke alii Pitiasa i ko lakou haku aliiwahine Atira. a hui ae la lakou iloko o ke apo aloha alii me na makaainana.

            I ka wa a ke alii Pitiasa ame na makaainana i ike mai ai i ke kulana ola maikai o ke aliiwahine ame ke kulana nohenohea o ka wahine u’i e puapuai mau mai ana ka ula wena o kona mau papalina ma kna helehelena ke nana aku, ua hoi aku la lakou no ka hale alii o kona makuakane Pitiasa.

            Ia lakou i hiki aku ai i ka hale-alii e haiamu mai ana no ke ala kupaoa o na pua like ole oloko o ka pa alii. ua hooluana iho la lakou no kekahi manawa. a ku mai la ua kaikamahine alii nei a hoakaka mai la he moolelo pokole no kana huakai aumoana i hele ai me ka pilikia. a ku wale no i ka aina me kona mau luina moku. I ka pau ana o kana mau hoakaka. ua noho like iho lakou e ai a e inu ana i na mea ai kiekie loa o ke Au Kahiko oia mau aupuni liilii o ka hema i huila.

            Ma ka auwina la o ia la, ua hui pu ae @a ia me kona makuakane alii Pitiasa maloko o kekahi rumi kapu o na hale-alii nei.

(Aole i pau.)