Ka Nupepa Kuokoa, Volume XLIII, Number 49, 8 December 1905 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, POALIMA, DEKEMABA 8, 1905.

 

ALEMANAKA O DEKEMABA, 1905.

 

[CALENDAR]

 

            Mahina piha Dekemaba 11, ma ka hora 0:45 p. m.

            E puka ana ka la i Dec. 4, hora 6:23; Dec. 5, hora 6:24; Dec. 6, 7 ame 8, hora 6:25; Dec. 9, hora 6:26; Dec. 10, hora 6:27; Dec. 11, hora 6:28; a e napoo ana mai Dec. 4 a hiki i ka 8, hora 5:18; Dec. 9, a hiki i ka 11, hora 5:19.

 

KAI PII.

Peakalu, Dec. 4. hora 9:42 a. m.; 11:54 p. m.

Poalua, Dec. 5, hora 10:47 a. m.

Pakolu, Dec. 6, hora 0:35 a. m.; 11:45 a. m.

Poaha, Dec. 7, hora 1:12 a. m.: 12:32 p. m.

Poalima, Dec. 8, hora 1:50 a. m.; 1:12 p. m.

P@, Dec. 9, hora 2:21 a. m.; 1:53 p. m.

S@, Dec. 10, 2:52 a. m.; 2:30 p. m.

Poakahi, Dec. 11, hora 3:24 a. m.; 3: 08 p. m.

 

KAI EMI.

Hora 4:50 p. m.; 3:50 a. m.

  "      5:28 p. m.; 3:25 a. m.

  "      6:00 p. m.; 6:43 a. m.

  "      6:33 p. m.; 7:42 a. m.

  "      7:08 p. m.; 8:34 a. m.

  "      7:42 p. m.; 9:18 a. m.

  "      8:12 p. m.; 9:55 a. m.

  "      8:41 p. m.; 10:27 a. m.

 

Nuhou Kuloko.

 

            No ka Hoolaha ana: - Ina he mea maikai kau aole paha ole e hoopaa ana i kou waha.  Mai kaii no na mea e akeakea mai ana E noonoo oe no ka hopena e loaa mai ana.  Ina aole oe i hoao e hookomo hoolaha iloko o keia nupepa, aole no hoi he hewa ka hoao.  Hewa ia la?

 

            E hoalu iki iho ana ka mokuahi Mauna Loa a o Mikihala ke holo aku ana ma kona makalua i keia la.

 

            Maikai na hana o ka po Poaono nei ma ka luakini o Kaumakapili a ua mahuahua no na wahi okeni i loaa ae.

 

            Mai poina i ke naue ana ae e hui pu ma na hana hoomanao no ka piha ana o ke kenekuria o ko Makuahine Paleka ola ana e malamaia ana ma ka luakini o Kawaiahao.

 

            O ka laau Puupuu Maneo Aeto he maikai no ka ili.  He elua ano omole; $1.00 ame .50 keneta.  E loaa no ma kahi o MAKINO DRUG CO., kihi o na alanui Hotele me Nuuanu.

 

            Eia na halekuai o ke kulanakauhale nei ke hoomaka mai nei e lihau me na makana Kalikimaka maikai.  O oe ane kekahi e kuai nei ma ia mau halekuai? O ka wa emi no keia.

 

            Ma ka mokuahi Mikahala o keia la huli hoi aku ai o Mrs. O. M. Kekue@ a no kona home ma Honoaunau @ o Hema, mahope o @ hala ana kekahi mau pule kole maanei.

 

            I ka la inehinei iho la i hoomaka ai na hana hoikeike moa a na poe hanai manu o ka Teritori nei.  Mai poina i ka naue ana ae, oiai e hemo ana no ka puka i keia la a hiki ka la apopo.

 

            Ua noi aku nei o Louis Kenake, ka hope lunaleta maanei i noho hana hoi ma ko Honolulu nei haleleta no umi kumamakolu makahiki, e hoihoi aku laia no kekahi o na haleleta o Kaleponi Hema.

 

            He hookahi haneri ohana Pukiki e laweia mai ana no kakou nei ma ke ano limahana no na mahiko, a ke pau ae ko lakou makemake e hana ma na mahiko o ka hookawowo iho no ia ma na lepo o Hawaii nei.

 

            Ikaika na olelo a Peresidena Rusawela maloko a kana palapala i ka Ahaolelo Amerika e noho mai nei, e pili ana i na poe mahiko e ake nui nei e hookomo mai i na Pake ma Hawaii nei.  Me he mea la aole paha e nele ka iho o na puna a lakou nei no la mau olelo.

 

            Ma ka Poaha iho nei, ka La Hoalohaloha, i lele pauki aku ai kekahi mau opio o ko makou nei keena ma ka pii kuahiwi.  Mauka o Pauoa ka pii nui ana, a kiei ma o o Manoa; i ka hoi la ae ua mauluulu na au, ua kaumaha ke kino: eia nae aole lakou i ana mai a kauhale, a ala ae i kekahi haule hope ma na hana o ko makou keena nei.  Nana no keia poe keiki la!

 

            O keia iho na komite kumau o ka Papa Hoonaauao i kohoia ma ka halawai o ka pule i hala Komite Kumu, Mr. Farrington, Mrs. Jordan ame Mrs. Wilcox.  Komite o na aina ame na halekula.  Mr. Wight ame Farrington, Komite Waiwai, Mr. A-i ame Mr. Von Holt, Komite Kula Hoopololei o na Kaikamahine, Mrs. Jordan ame Mrs. Wilcox.  Komite Kula Hoopololei o na Kekikane, Mr. A-i ame Mr. Wight.  Komite o ka hana lihilihi, Mrs. Wilcox, Komite no Lahainaluna, Mr. Von Holt ame Mr. Wight.

 

UA NALOWALE.

 

            Ka Buke Banako Helu 4784.  O ka mea e loaa ana e hoihoi ae i ka The Bank of Hawaii, Ltd.

3095 - Nov. 24: Dec. 1. 8.

 

HALE INU RAMA

PAUOA

 

E NA OIWI O PAUOA!

                        "Kaua i ka uwahi polua,

                                    Puia e ke aia o ke KINI,

                        Ilaila hooheno ka WAINA:

                                    Pehea kaua i ka WAIKEKE.

                        Pahee i ka puu ke moni.

                                    Kamau kiaha BIA no noi."

            O ko mau ipo keia o na ia kulaia, ke Kalikimaka ame Hape Nuia!  Naue mai a e loaa no me ka makepono loa ma

THE PAUOA WINE CO.

Frank Correa, Lunanui,

Pauoa, palena o ke alahao.

 

HE HOALOHALOHA NO MRS. JENNIE KAUWALU PUA MAI NO IA ME HE PUA ALA, A MAE IHO MAALO AE IA ME HE AKA LA A NALO IHO.

 

            O makou o na lala a pau o ka Ahahui Manawalea o na wahine Imipono Kristiano o ka Ekalesia o Waialua.

            Mamuli o ka oluolu ame ka lokomaikai o ke Akua Kahikolu ka mana Ihiihi nona na kanawai luli ole, ke kii ana mai a lawe aku i ke ola makamae o Mrs. Jennie Kauwalu ma ka la 18 o Nov. M. H. 1905, ma Waialua, Oahu.

            Ua lii iho maluna o keia Ahahui ke koikoi o na haawe kaumaha o na hoomanao ana i ko makou hoa paahana pu iloko o na hana pili i ka makou Ahahui.  He lala a he hope Kakauolelo o Jennie Kauwalu no keia Ahahui; nolaila, E Hooholoia mamuli o ka make ana o Jennie Kauwalu. Ke komo pu aku nei na lala apau o keia Ahahui me olua na kupuna, ke kane o hoonele ia i ka Wahine ole ka ohana ame na hoaloha apau. E auamo pu me oukou i na ehaeha ame na kaumaha.  A na ka mea kiekie loa e hoomaha mai ia kakou iloko o kana lokomaikai palena ole.  A e hoomaikai mau loa ia aku oia no ka mea, Nana no i haawi mai, a nana no i lawe aku.

            Ma o ko makou mau Komite la.

                        MRS. MARYANN PLEMER,

                        MRS. L. AWAI,

                        MISS KUEWA WAKEU.

            Waialua, Novemaba 22, 1905.

 

D. KAWELA PUNOHU UA HALA.

 

            E Mr. Lunahooponopono o "Ke Kilohana Pookela no ka Lahui Hawaii"  Aloha oe: - E loaa ana anei hoi he wahi kaawale o kou Nupepa Kaulana no'u? i hiki ai hoi ia'u ke hoike ae i na mea e pili ana i ka'u keki i aloha nui ia - i ike mai ai hoi kona mau Hoaloha.  Oiai, ua oluolu i ke Akua Mana Loa iloko no Kona lokomaikai, ka lawe ana aku ia Kawela Punohu, ma @ Waiehu, Maui.  Ua hanauia o Kawela, ma Waiehu, Maui i ka malama o Oct. 31, 1887; na Punohu (k) ame Kaimi (w). Ua piha na makahiki he 17 a oi.

            Ua hoonaauao ia oia ma ke kula apana o Waihee malalo o ka noho Kuma kela mau makahiki aku nei ua mu Poo ana o Hon. Sam. Keliinoi, a hoounaia, oia i ke Kula o Kamehameha.  Ma ia Kula Kamehameha oia i noho ai no Elua makahiki, a no ka loaa ana i ka nawaliwali ma ke kino.  Ua waiho aku i ke kula.

            Aneane elua makahiki kona noho pilikia ana.  Hookahi pule mamua ae, iho aku wau e ike iaia, kuka pu no ka pono o kona uhane.  Wahi ana ia'u.  Aole ona hopohopo no ia mea.  Ua lana loa kona manao no ka @aku, pule au nona a hauoli no kuu manao i ka loaa ana o ia mea iaia, a makaukau wau e hoi ana no oia e noho aku no mea ia, a whai ana, aole paha kaua e halawai kino ana, haawi aku wau iaia i na olelo hoolana.  Me ka paipai ikaika ana.  E kau na maka ia Iesu; ka Hoola.  "Aloha ino kuu keiki."  He keiki oia i pipili nulia e kona mau hoaloha o ka aina hanau.  He oluolu, he aloha makua a he pipili loa kona manao i kona mau wahi kupuna.

            Ma ke kelepona i ha'i ia mai ai ia'u kona pilikia, a i ko'u hiki ana aku e waiho mai ana kona kino kupapau.

            O kuu manaolana nona ua haule wale, oia hoi, ua noonoo wale ae no wau e noho oia ma ke Kula o Kamehameha a puka pono mai, alaila he mea pono no ia'u ke hoomahele a hoomaikeike aku iaia no ka Oihana Kahunapule, eia nae he okoa loa ka manao o ka Mea Nana i hana.  "O ke kanaka i hanauia e ka wahine he hapa wale no na ia, piha no nae i na popilikia."  Nana no i haawi mai a Nana no i lawe aku.  E hoonani nui ia kona inoa. 

            Minamina!  Aka, O ko ke Akua makemake no nae ke hookola.  "Mai ka lepo mai oe, a e hoi aku no oe ilaila" "O ka uhane, e hoi aku i ke Akua."

Owau no me ka walohia,

JNO. KALINO.

            Paia.  Oct. 31, 1905.

 

He Mau Menehune Iho Nei me Kakou.

 

            Ma ka mokuahi lawekoa Amerika Logan i ku mai ai maanei i ka Poaono i hala mai Kapalakiko mai i hoea mai ai na kanaka liilii loa malalo iho o ka la maanei mai Amerika mai.  He mau Pilipine keia, he kaikunane a he kaikuahine, a e hoi ana no ko laua aina mahope o ka lawae hoikeikeia ana ma kahi hoikeike o Sana Lui.

            O ke kiekie o keia mau mea he 35 iniha o kekahi a he 28 iniha o kekahi a o ko laua kaumaha he 38 o kekahi a he 44 paona o kekahi.  He like loa ko laua kulana ke nana aku me na kii hii a na bebe: aohe nae laua he mau bebe: aka. he mau kanakamakua. oiai ua oi ko laua mau makahiki maluna o ke kanakolu.

            Ia laua ma kahi hoikeike o Sana Lui. ua kipa nui aku a makaikai e ike ia laua. a ua oleloia o ko laua hoikeike wale no kahi nui o na loaa iwaena o na mea hoikeike i lawela aku mai Pilipine aku.  O Mr. Mark H. Evans ka mea nana i lawe ia laua no Amerika. Ua loaa no hoi ka hanohano i keia mau menehune ka lululima pu ana me Peresidena Rusawela.

            Ua malama kole ia ae na launa ana maanei no ko laua hoikeikeia ma Kaimuki Zu, a ua wehia ae ka hoikeikeia ma ka Kaimuki Zu, a ua weheia ae ka hoikeike ma ka Poakahi nei, a  ka poe i hele aku e makaikai ia laua he hapalua ka uku, no kanakamakua; he hapaha ko na keiki i hiki na makahiki i ka umi kumamalima; he 10 keneta ko na keiki malalo mai.  Ua weheia ae kahi hoikeike mai ka hora 10 o ka po; a oiai o ko laua ikeia ana iho la no ia, a kau hou laua iluna o ka moku ma ka Poalua nei, ua piha ae kahi hoikeike i ha makaikai.

            Ua hiki i keia mau menehune ke himeni a ke hulahula ma ka olelo ame ka hula o ko laua aina, a ua hoike ae laua ia mau talena ike i loaa ia laua.

            Kupainaha ka ke Akua hana maluna o keia mau kanaka liilii.

 

Ku-e i ka Mar Lehulehu.

 

(Hoomauia.)

            I ka Lunahooponopono o ke "Kuokoa," Aloha oe: - Mamuli o ka nui o na kono ohohia i hoea mai imua o'u no ka hoomau ana aku i keia kukulu manao i malamalama no ka poe Kristiano nolaila au e noi hou aku nei i kou oluolu i kahi kaawale o kau pepa, no ka lua o ko'u manawa.

            Aka nae, mamua ae o ko'u hoomau ana aku, e ae ia mai au e hoomaopopo aku i kou poe heluhelu, o ka mare lehulehu, aole ia na na makualii i hookumu mai, aka, na Lameka ponoi ia ke kanaka pepehikanaka, he mamo hoi na Kaina ka makamua o na poe pepehikana, Kinohi 4:17-24.  O keia hana nae a ke kanaka pepehi kanaka, @ hilinai loa ia nei 'e kekahi poe ma ke ano he hana Akua.  He hilinai keia a he kakoo i ka hana hewa a nei kanaka hewa.  He hana pono anei ia?

Ano, maanei e hoakaka ai au no na mea i kuhikuhi ia no Mose, e like me ia ma Pukaana 2:21; Nahelu 12:1-2, oia hoi na mea e pili ana i Zipora ke kaikamahine a ke Kahuna Midiana, a me ka wahine a Aitiopa.  Ke olelo nei ka poe mare lehulehu ma keia, he elua wahine a Mose.  He hookahi no Midiana a he hookahi no Aitiopa, nolaila ua mare lehulehu o Mose ke kaula.  Pela ane ka mea pololei?

            O na poe i hoakea ia ko lakou mau noonoo no na hoike a ka poe kakau moolelo palapala Hemolele, ua maopopo ia lakou na mea e pili ana ia Midiana ame Aitiopa.  O Aitiopa, he mahele aina ia ma ka hema o Aigupita ma Aferika ma ka akau o ka muliwai Nile, a o kona mau palena ua nee aku ia o komo ma Arabia ma ka hema, oia no hoi o Kusa ma ke kapakai o ke Kai Ula.  A o Midiana hoi, aia no ia ma Arabia e pili pu ana ma na kapakai o ke Kai Ula, ao kona mau kanaka ua nee ku ma o a maanei o ka aina ma ke ano hanai holoholona.  Ua kapaia na kanaka o keia mau wahi he Aitiopa, mamuli o ka ohana a Kusa (Kusana) na lakou i noho mua o Aitiopa, aka, mahope mai ua kapa wale ia no o Kusa mai Arabia a hoea i Aitiopa ponoi ma Aferika.  O Abusinia ka inoa hou.  (E nana o keia mau inoa ma ka Buke Wehewehe Huaolelo Baibala a ka Ahahui Teraka a me ka E. W. Kalaka m aka olelo Hawaii, A. D. 1871.)

            O ka manao laula o na poe kakau moolelo hoano no ka wahine Aitiopa @ a Mose @ oia no Zipora, he hookahi no wahine, aole elua.  Ua hiki no o Zipora ke kapaia he Aitiopa oiai, oia no Kusa ma kekahi olelo ana, a i ole, he Araia a Midiana paha, aka, aole ia he mea e lehulehu ai na kino wahine mamuli o ka nui o na ino aina i hoopii ia aku.  Ina kakou e nana aku ma Pukaana 18:1-6, ike kakou o Zipora wale no ka wahine i hele aku i o Mose la iaia ma ka waonahele.  Aole loa he wahi ma (ka Baibala @ hoike mai ana no kekahi wahine hui kau hou aku a Mose.  Aole loa! Ua nele na hooia kupono e kakoo mai ana i keia manao koho wale.

            No ka mea hoi e pili ana no ka wahine a ka hoahanau make i oleloia ma Kanawailua 25:5-10, e mare aku no ia i ka hoahanau o kana kane, aole i ka malihini oka.  Wahi a ka poe mare lehulehu, he kakoo keia ia lakou.  Ua pili no keia mau olelo i ka hoahanau i noho wahine mua, a hui aku me keia wahine, alaila, elua wahina.                                   (Aole i pau.)

 

Na Leala o ka Poaono Nei.

 

            Ma ka Poaono i hala i malamaia ae ai na hana hooikaika kino a hookuku mawaena o na hui Kamehameha, Daimana Hila.  Kalapu o na Keiki ame Y. M. C. A., a o na keiki i komo ae ma na hana o ia la i papahiia aku me ka lanakila ua loaa ae he mau makana ia lakou.   O na hana hooikaika kino i hanaia ae ma ia la oia ka heihei kukini, lele-pa hoolei hamare, ame kekahi mau hana hooikaika kino e ae.  E hooikaika ana hoi kela ame keia keiki i komo ae a loaa ka hanohano nona ame kona hui.

            Ua lilo ka aumeume o na hana o keia la mawaena o Kamehemeha ame Daimana Hila a he kamau wale aku no ka Y. M. C. A. ame ka Kalapu o na Keiki.  Ua lilo ka hanohano o keia ia i ka hui Daimana Hila, he hui hou i kukulu koke ia iho nei, a o ka hapanui o na keiki oia hui i komo ae ma na hana e ia la he poe keiki Kamehameha no: nolaila, ua paio ae no he Kamehameha i ke Kamehameha, a oia no paha ke kumu i haule ai o Kamehameha, oiai e kau mau ana no oia i ka heke i na makahiki apau ma keia mau hana hooikaika kino.  O ka nui o na puni ma ka aoao o Daimana Hila he 63, a he 58 ma ko Kamehameha aoao, he oi hoi o 5 wale no puni.

 

Noho Nui i ke Puhi.

 

            I ka po Sabati iho nei i paa ae ai he iwakalua-kumamakolu poe Pake piliwaiwai, ma ke kihi o na alanui Kamika ame Hotele.  O keia iho la ka makamua o na hihia piliwaiwai i hopuia malalo o ke kanawai piliwaiwai a Lunakiai Adams a o keia iho la no hoi ka hooko pono loa ia ana o ua kanawai la mahope o ke ku wale ana me ka hoohana ole ia no kekahi manawa, mamuli o ke kali ana i ka olelo hooholo a ka Aha Kiekie e pili ana i ka mana o na Lunakiai o ke Kalana e hana i kanawai.

            E nanea ana no keia poe i ka piliwai wai i ka manawa i hoea aku ai na makai malalo o ke alakai ana a Kapena Leslie.  I mea e hiki ai i na makai ke komo aku ma kahi e malamala ana ka piliwaiwai ua wawahiia aku na paku paa i hanaia no ka pale ana i kahi piliwaiwai.  Ua paa mua iho ke kiai o kahi piliwaiwai i ka hopuia me kona ike mua ole, nolaila, aole i lohe ka poe e piliwaiwai ana i ka hiki ana aku o na makai.  Ua hoounaia ae he kaa no ka halihali ana i na pakaukau ame na lako piliwaiwai no Kuapapanui, a o ia mau mea kekahi o na hoike e hooiaio ana i ka piliwaiwai ana o keia poe, i ko lakou manawa i kukuluia ae ai imua o ka Aha Apana i ke kakahiaka Poakahi nei.

            Ua pau ae keia poe i ka peiaia e ke keiki a Y. Anin, no $25 pakahi.  Ua kii ae keia poe ia F. Chillingworth i lole no lakou.  Ua olelola ae o Y. Anin, oia kekahi o na Pake waiwai o keia kulanakauhale, a oia kekahi o na poe a ka poe e piliwaiwai nei e launa pu nei, a i ka wa kipa aku ai keia poe i hopuia e ike iaia no ka pela ana ia lakou, e hiamoe ana oia ia manawa, a na kana keiki i hooko mai i ko lakou makemake.  Ua oleloia ae o ka papahana a keia poe piliwaiwai e hana nei oia ka hookuu ana i kekahi hana piliwaiwai ma i ka hora 7 a hiki i ka hora 10 o ka po, alaila, mai ka hora 11 a hiki i ka hora 2 o ka wanaao.  O ke ano o ka piliwaiwai e hanaia he fantan, a pau ia alaila hoomaka ma kekahi ano piliwaiwai e ae.

 

KE ALOHA I PILI IA, UA HALA.

WALOHIA WALE HOI AU.

 

I ka Nupepa Kuokoa:

            E oluolu mai kou ahonui ia'u e hoaiai ae ma kou mau kolamu i ka'u wahi ukana luuluu o ke kaumaha i ike mai ai na kini, na makamaka ame na hoaloha o Hosea Kahoolealii Kahele, e noho ana ma na kaiaulu aloha o Hawaii nei, i ka nuhou no "Ke Aloha i pili ia, ua hala o Hosea Kahoolealii Kahele."

            I ka pawa e moku ana i ka pili o ke ao ma ka hora 3 o ke kakahiaka o ka Poakahi, la 20 o Novemaba i hala, i haalele mai ai o Hosea Kahoolealii Kahele i keia ola ana a hoi aku la ia no kahi mau o ke kino mai kna home aku ma Nawiliwili, Lihue, Kauai, a waiho iho la la'u ame ka maua keikikane ame na kaikamahine, ame na hoaloha e hoomanao aku nona iloko o ka luuluu.

            Ua hanau ia o H. K. Kahele ma Kipahulu, i ka Uakea o Hana, Maui, i ka la 24 o Iulai, A. D. 1859; a i ka umi o kona mau makahiki ua holo mai la kona makuakane no Kauai a noho ma Nawiliwili.

            Iwena o ka 1870 ua koho ia ae la kona makuakane i lala no ka oihana makai o Lihue, a i ka make ana aku ona iloko o ka 1881, ua hookohuia ae la oia ma kona makalua ma ka la 2 o Augate oia makahiki no.

            Ua paa oia ia kulana a hiki i ka 1896, ua hookohu ia ae la oia i Hope Makai Nui o Lihue, no ka manawa, a ma ia makahiki no ua hookohu ia ae la oia i Lunakanawai Apana no Lihue, i ka malama o Sepatemaba.

            He makahiki mamua aku nei, ua hoomaka mai la ka emi hikiwawe ano e o kona kino, a lilo ae la kona kino nui ohaoha ikaika i mea pililahi a nawali wali.  A i ka hooikaika loa ana mai o ka ma'i, ua kahea ia ke kauka, a ma kone ike, ua loohia ia oia me ka ma'i O ka Puupaa, (Bright's Disease of the Kidney) a pela i hoomailo ia ai kona kino me ka ehaeha a hiki wale no i ka "wehe ana mai la i ke aloha i pili ia a @ ke hooko-o nei ia loko." Walo-@ maua ma @ hia wale ekahi @ la no i maneleia aku

            Ma ia auwin@ ke alawai-o@ ai kona kino no ka ilina ma ka halepule o Lihue, a mahope o ka malama ia ana o ka haipule maloko o ka halepule e na Revi Mr. Lidgate me Hanaike, ua hapai ia ae la kona pahu e eono makai no kona home mau loa, iwaena o kona mau hoaloha he lehulehu e u ana a hookuu ia aku la oia e hoomaha mau loa iloko o ka Haku.

            Owau no iloko o ka luuluu,

                        MRS. MILEKA KAHELE,

            Lihue, Kauai, Dec 5, 1905.

 

Mokukaua Kikako a Hoea Mai.

 

            Ua haalele aku ka mokukaua holomama Kikako o Amerika ia Kapalakiko ma ka Poaono nei, a e ku mai ana paha ianei i keia Sabati a i ole Poakahi paha.

            Aia iluna o keia mokukaua o Hope-Adimarala Caspa F. Goodrich, ke alakai nui ko ke Kai Pakipika Aumokukaua.  Me he mea la e holo pu mai ana keia mokukaua me ka mokukaua lawe pu Princeston a i ole Concord.  O ka mokukaua Marblehead ke holo mai ana me Kikako, aka mamuli o kona hooku'i koke ana mai nei me ka mokuahi lawehau Cletic o Amerika, nolaila aia oia ke hooponopono hou ia la.

            Eia i Honolulu nei o Mrs. Goodrich ame ka laua kaikamahine, o a laua kekahi o na ohua o ka moku lawekoa Logan, i ku mai ai ianei ma ka Poaono i hala, a eia laua ke noho mai nei ma ka Hotele Hawaii.  Ua manao ia e ku ana keia mokukaua maanei a hiki iwaena o ka mahina o Ianuari.

 

O Papai kekahi Hooilina o Pelekane.

 

            Mamuli o kekahi meahou i hoikeia aku ma ka helu i hala e pili ana i ka loaa ana mai nei o ka palapala mare ame na hoike e ae e hooiaio ana i ko Keoki IV mareia ana me Mrs. Fitzherbert, ma Ladana, ua hoike ae o Senatoa C. L. Crabbe (Papai) oia kekahi pilikana o ka Moi Eluene VII e noho mai nei i ke kalaunu o Pelekane.

            Ma ka Papai hoike, o kona kupuna-wahine, ola kekahi o na keiki a James Ord. Keiki a Keoki IV me Mrs. Fitzherbert: nolaila, he hoahanau oia no Eluene VII, eia nae aole paha oia e ikeia mai ana, no ka mea, he mare ia i ku-e ia ma na kanawai o Pele@ kane no ka mea, he kane ka mea i mare aku i ka wahine haahaa.

 

He Kalaiaina Hawawa.

 

            Ua malama ae ke komite o ka Apana Elima o ka aoao kalaiaina Repubalika ame kekahi poe e ae he halawai ma ka po Poakolu i hala, a hooholo iho la e apono i ka papahana a Waterhouse, e pili ana i ka malama ana i hookahi halawai ahaelele no ka apana ame ke kalana.

            Ua wahoia ae he pauku hou, a aponoia e ka poe aole he lala no ua komite la, e olelo ana ua pauku hou la o ke kanaka Repubalika e ku oiaio ole ana ma ia aoao, e kipakuia aku no mai ia aoao aku.

 

LAAUILINONABEBE

O Kona Paa ame Kona Lauaha kekahi mea

ana nui loa a na Makuahine e naanaa nui ai

 

            UA HANAUIA KELA A ME KEIA KEIKI ILOKO O KA HONUA NEI me ke ewe o na mai lehulehu e ulu mai ana iloko o ka ili, ke poo a e ilio ana hoi ke koko ia wa i mea nui loa no ka panee ana i keia popilikia, a pela @ ai ia i mea nui loa e hookaumaha mau ai i ka noonoo o keia a me keia mea oohia i ka nali ana a na ma'i lehulehu.  Aole kela mea i hookaumaha ia me kekahi ano e ae, aka, mamuli no ka hoopalalehaia ana e ka mea i kupono e malama a makaala i keia poino.  Nolaila, ua lili i kumuhana na keia ame keia makuahine maikai e mkaala mau ai i ka lokou mau keiki e loohia ana i na popilikia lehulehu e ulu mai ana mamuli o ke koko ino, e hookamahine mau lakou me na mea a pa ue hiki a ke pale aku i keia mau popilikia lehulehu, i mea hoi e loaa ai ke ola maikai, malalo o na lapaau noeau ana me ka hikiwawe a me ke ola loa no hoi.

            Ua olelo ia o k aauau me ka wai pu mehana a me ke KOPA CUTIKURA no ka hoomaemae ana i ka ili no ka papaa i ka lepo a me kahi mau ino @ ae, a pela hoi no ka unahi-pii, a pela hoi, ina ka e kapili malie i ka A Na Hamo CUTIKURA no ka hooki koke ana i ka maneo o ka ili, ke eeke ano manene o ka ili ame ka pehu a pela hoi no ka hoomalielie ana i ka hu'i a me ka hoola ana i na paiapu, a mahope aku oia wa, ina ka e inu i ka Laau Hoohainu CUTIKURA, oia wale ae la no ka na mea a pau e hana ai no ka pale ana aku i keia mau kinaunau o na keiki liilii i na wa apau e hoomaha mai ai, a ina no ua loaa mua, he mea pau wale no ia i keia mau laau @ la, ke malama pono ia na kuhikuhi.  Ma keia hana ana pela, e loaa ai i @ makuahine hoomanawanui ka maha a me k oluolu o ka naau, a he mea @ hoi ia no lakou e hookaumaha ole ia ai i na wa a pau.  Ua hooiaia keia @ haawina pomaikai ma na home lehulehu a puni ka aina.

            Mamuli o ka momona, ka maemae, ame ka hikiwawe o ke ola o kela laau, i makemake nui ia ai e na lahui kanaka a pau i hoao a ikemaka i kona waiwai nui ma ke ano hoola, a pela no hoi hilinai nui ia ai kona waiwai no ka hoopakele ana i ka luhi a me ke kaumaha o na makua lehulehu ma na wahi a pau, a pela no i malama nui ia ai maloko o na home.

 

HE HOOLA MAOPOPO NO NA MA'I MALOKO A MAWAHO O KE KINO.

            Oia hoi ke KOPA CUTICURA e hoomaemae ai i ka ili a me ke kepia e ke poo a hoowaliwali i ka alualu, o ka AILA CUTICURA HAMO no ka hoopau koke i ka maneo a hooluolu a hoola, a me ke CUTICURA RESOLVENT no ka hooluolu a hoomaemae ana i ke koko.  Ke kualia nei ma na wahi a pau o ka honua nei.  Keena Kuai ma Auseteralia, R. Towns & Co., Sydney, N. S. W. Keena ma Aferika Hema, Lamron Ltd., Cape Town.  "I loaa ai ka ili pahee maikai, ka lauoho a me na lima," POTTER DRUG AND CHEM COMP., Boston. U. S. A., na Ona o n@laau CUTICURA a pau loa.

 

Poino ma ka Hoopanee.

 

HE MEA PONO E LAWELAWE KOKE I KA MALAMA ANA I KE OLA.

 

            O ka pilikia o na puupaa he mea maikai ole ia ke hoohemahemaia, no ka mea he kolo malie kana hana a hiki i ka manawa e paa ai ke kanaka malalo o kona malu mamua o ka hoomaopopoia ana.  Ua hiki ia lakou ke hoololi i ko lakou mau ano a like me kekahi mau ma'i e ae a ma ia ano i kuhihewa nui ia ai lakou.

            Mai kuhihewa oe!

            Mai hoopalaleha!

            Ano e lapaau i kou mau puupaa!

            Ke ma'i na puupaa aole lakou e oluolu ana aia wale no a lawe oe i ka laau no na puupaa.  O ka Doan's Backache Kidney Pills oia wale no @ loaa kupono loa e loaa koke ai ke oia i na puupaa.  He hoola kana.  Ua hoola oia i kekahi poe ma Honolulu nei.

            Mr. A. J. Cahill o ke alanui Papu, ma keia kulanakauhale, kiai po kana hana ma kahi o Messrs. T. H. Davies & Co., Kaupalenaia, wahi ana.  He sela moku au i ko'u mau la opio, a i kahi manawa, ua hana au no ka Hui Moku Piliaina.  Mamuli o keia loaa ana o'u i ke kikala haneenee me ka ma'i ma ka puupaa ua haalele au i ko'u hele ana i ke hoi.

            No, keia kumu, ua hoao au i na ano laau apau, a o ka laau nana au i hoomama keia mau luuluu i looa ia'u, oia no keia Huaale a Doans no ke Kikala Haneenee me ka Puupaa.  Eia ke kuai ia nei ma ka halekuai laau o Holister Ola loa ko'u mai pau na ehaeha i loaa ia'u.  Ina e manao ana kahi mea e ike ia'u, e loaa no au ma kahi kuai lako moku o Van Dorn's alanui Papu.

            E loaa no ia oe, ka laau i ola ai o Mr. Cahill, me ka nana pono ana i ka inoa piha like me keia ma ka wahi: - Doan's Backache Kidney Pills, ke kuai ia nei ma na hale haawi laau a pau ma ke O keneta o ke poho, 6 poho $2.50, a i ole e leta mai no i ka halekuai laau o Hollister Co., ma Honolulu, Agena no ka Paeaina Hawaii.

 

I Pa Hookaawale i ka Poe Hele Aku.

 

            Ma ka auwina la o ka Poakolu i hala i hele aku ai o Kauka L. E. Coper o ka Oihana Hoomalu, Lunanui o na Hana Hou Holloway, ame kekahi poe e ae, e nana i ka uwapo o ka Hui Mokuahi Ocianica no ka manao e kukulu ae i pa hookaawale i na poe e hele aku ana malaila i ka la holo o na moku Kaleponi.  Ua manao ia e hanaia i pa nui ma ka aoao mauka o ka uwapo, a malalia e ae ia ai na hoaloha am na makaikai e ku aku a nana i k a poe e holo ana.  He mea maikai keia, oiai mamua iho nei i ka la no kekahi poe, e kuku aku ai, a i na la huhu o koluna poe, i haia iho nei, iwaho no kahi poe a peno ana.

 

Pau ka Manawa Aelike.

            O ka la 14 iho nei o Okatoba ka manawa i aelikeia e Lord ame Belser me ke aupuni e pau ai ka eli ana i ka uwapo hou ma Ainahou ae nei, ma ke poo o alanui Alakea, a mahope aku o ia la he $50 ka hoopai no ka la hookahi.

            Ma ka hoike i loaa ae, aole e pau ana keia hana a komo iloko o Ianuari ae nei: nolaila e hiki ana paha ka hoopa'i i ka $3,900 ke pau ae ka hana, ua like no hoi ia me ke poho ana o na mea i lilo ai ka aelike.

            He umi mahina ka aelike, aka mamuli o ka ulolohi o ka hoea ana mai o na meahana, ua panee loa ka hana ihope.

 

LOAA I KE ANU A PAINA PAHA O KA IHU.

            O keia nawaliwali i hoikeia ae la ma ke poomanao e hooia koke ia no ma ka wa e ikeia ai kona mau hiohiona ma ka lawe ana i ka laau kunu a Chamberlain.  He mau kaukani o ka poe i lawe i keia ano laau i ka makahiki aku nei i hala a ua loaa mai ia nakou ka ike a lohe no kekahi nawaliwali i nele ole ka loaa o na manao hanoli no ka ikaika hoola o ka laau kunu.

            No ke kuai ana e loaa no ma kahi o Benson, Smith & Co., Ltd, na Agena no ka Paeaina Hawaii.

 

Aole e Holo Mai Ana.

            Vallejo, Nov. 19. - Ua hoole ka Oihana Kaua Moana i ke noi e hoounaia aku na moku wawahi topido Paul Jones ame Perry no ka holoholo ana ma Honolulu.  Mai haalele keia mau moku i ka Mokupuni Mare iloko o na la pokole; aka oiai ua hoopauia ae ke kauoha, noialila e ku iho ana no laua ma ia kahua a hiki iloko o Dekemaba, alaila e holoholo aku ana laua ma keia aekai a hiki i ke kaikuono o Magdalena no ka hoomaamaa kikipu ana.  Ua hauoli loa na aliimoku ame na luina no ka hoopauia ana o keia kauoha e holo no Honolulu, oiai aole o lakou hauoli no ia huakai.

 

HOOLAHA AINA AUPUNI.

 

HOOLAHA AINA AUPUNI.

 

            Ma keia ke haawiia aku nei ka hoolaha, ma ka hora 12 awakea.  Poaono, Ianuari 6, 1906, e kuaiia aku ai ma ke kudala akea malalo o na manao o ka Hapa 4, Pauku 17, Kanawai Aina, 1895, ma ke alo iho o ka Hale Hookolokolo, Honolulu, na Apana Aina Kahakai malalo iho nei e waiho la ma Hauula, Koelauloa, Oahu.

 

@[cost schedule]

 

            E loaa aku no na hoomaopopo kupono ana no keia mau apana i ka poe apau i makemake i na aina kahakai no na home no na wa kau la.  O keia mau apana he mau alo ko lakou mai ke kanahiku-kumamalima (75) a ka elua haneri (200) kapuai ma ke alaloa e moe ana apuni o Oahu, a oia no ka huina kapuai e huli la i kahakai.

            Ma ke dala kuike ka makemake a ma ke dala gula Amerika no hoi.

            No na palapala kii-ana ame na mea e ae noi ae i ke Keena o na Aina Aupuni, Hale Hookolokolo, Honolulu.

                                                                                                JAS. W. PRATT,

                                                                        Komikina o na Aina Aupuni.

                        Honolulu, Dekemaba 6, 1905.

            3097 - Dec. 8, 15, 22, 29:  Jan. 9.

 

HOOLAHA MANA HOOKOLOKOLO

 

            ILOKO O KA AHA KAAPUNI O KA APANA KAAPUNI ELIMA.  TERITORI O HAWAII. - MA KE KEENA HOOPONOPONO WAI.

            KAUOHA NO KA HOOLAHA ANA I KA HOOLOHE ANA I PALAPALA NOI NO KA PONO HOOPONOPONO O KA PALAPALA KAUOHA.

            Iloko o ka Hana o ka Waiwai o Hosea Kahoolealii Kahele o Lihue, Kauai, i Make.

            He Palapala i manaola oia ka Palapala Kauoha ame Hoike Hope loa a Hosea Kahoolealii Kahele i make, a ma ka la 1 o Dekemaba, A. D. 1905, ua waihoia mai i ka Aha Hooponopono Waiwai i oleloia ame ke Palapala Noi ne ka hooponopono ana ia mea, a no ka hoopuka ana i mau Leta Hoike ia Mileka Kahele wahine kanemake o ka mea i make, i hookomola mai hoi e Maleka Kahele i oleloia.

            Ua kauoha pu ia hoi o ka Poaha ka la 11 o Ianuari, A. D. 1906 ma ka hora umi a. m. o ka la i oleloia, ma ke Keena Hookolokolo o ka Aha i oleloia, ma Lihue, Kalana o Kauai, T. H., oia ka manawa ame kahi i hooholoia, no ka hooiaio ana i ka Paiapala Kauoha i oleloia ame ka hoolohe ana i ka palapala noi i oleloia.

            Ua Kauoha hou ia no hoi he Hoolaha o keia mea e haawiia ma ka hoolaha ana hookahi manawa o ka pule no eha pule neepapa iloko o ke "Garden Island" ame "Ka Nupepa Kuokoa" he mau nupepa i hoolahaia - o ka Nupepa Kuokoa H iloko o Honolulu a @ ke "Garden Island" iloko o Lihue, a o ka hoolaha hope loa aole ia e emi malalo o umi la mamua o ka manawa i hooholoia no ka hoolohe ana.

            Hanaia ma Lihue, Kauai, T. H., Dekemaba 2, 1905.

NA KA AHA.

(Kakauinoaia)  JNO. A. PALMER.

            Kakauolele.

30@ - Dec. 8, 15, 23, 29.