Ka Nupepa Kuokoa, Volume XLIV, Number 2, 12 January 1906 — UA OKIIA MAI KA HOOMANA MOREMONA AKU O KULA, MAUI. [ARTICLE]

UA OKIIA MAI KA HOOMANA MOREMONA AKU O KULA, MAUI.

E Mr. Lunahooponopono o ka Nupepa Kuokoa:— E hookomo iho oe i keia mau hua e kau kehakeha ae la maluna i ike mai ai ka poe e hahai nei i ke alakai a na haole Moremona me ko lakou mau Kumumanaoio he 13. Ma ka la 16 o Dec. nei ua okiia o E. H. Kekapai ame Geo. Cockett mai ka hoomana Mamona aku, no ka like ole o ke a'o ana a na alakai Mamona me na mea i kakauia ma ka Baibala. Ua hele laua ma kahi o Kahoouuna ma ka la 10 o Dec., e hoolohe i ka Ha'iolelo a D. H. Aukai, e pili ana i kela olelo a Iesu ia Petero ma Mataio 16:15, hapawaena. A maluna o keia pohaku ke kukulu nei au i Ko'u Ekalesia. Ua weheia ka manao iloko o na mahele 3, Akahi.—O ka mea e olelo nei. Alua—o ke Kahua. Akolu—o ka mea e kukuluia aku ana. O ka mea e olelo nei o Iesu no ia. O ka pohaku, oia ka Mesia. Petra ma ka olelo Helena, oia hoi kela (Rock). O ke ano o keia pohaku he hiki no ke hele ma kahi ana e makemake ai, aole keia he Stone (Kepa) Ekalesia. Oia ke Aupuni o ka Lani, (Church), aole keia he Halepule. (House of prayer.) Ua weheia mai ka ha'iolelo ma kahi o ka pohaku, ame ka Ekalesia, ke olelo nei ka poe Mamona o ko lakou ka Ekalesia o Iesu Kristo, a pehea la lakou i kukulu ole ai i ka Ekalesia maluna o ka pohaku (Petra. Rock) ke kukulu nei lakou i ko lakou Ekalesia maluna o ka pohaku (Daimana Gula, Dala) oia Mamona, he puni i ka waiwai ke ano o ia huaolelo i ka poe Iudaio. E nana i ko lakou Kahua, oia ka Mahiko o Laie, ka waiwai hapaumi a Moremona, oia ka mole o ka hewa. Ina ua kukulu o Iesu i Kona Ekalesia maluna o ka pohaku Rock ua kukulu pu no anei oia i ka Mahiko? a me ka hookupu i ka waiwai hapaumi. Ke hoole aku nei au, no ka mea ke olelo nei o Iesu. Auwe oukou na Kakauolelo na Palisaio, na hookamani. Ke hookupu nei oukou i ka hapaumi o ka mineta, ame ka aneto, a me ke Kumino, a ke haalele nei i ke kanawai o ke Akua, i ka hoopono ame ke aloha, a ke haalele pu nei i ka Baibala me ko lakou olelo ana aole i unuhi pololei ia, a o ka puke a Moremona oia ka ka olelo a ke Akua, he kuhihewa nui keia o na alakai Moremona e alakai hewa nei i ka lahui Hawaii e iho i ka luaaahi o Kehena, oia hoi ko lakou hoole ana i ka Baibala aole ia he olelo na ke Akua, ka Anela Moroni, oia ka Anela kiekie loa nana i lawe mai ka Euanelio i ka honua nei, wahi a na Moremona, ua piha loa ia ko lakou poo me na Manao hehena. O na olelo o ka Euanelio i kakauia e Mataio, Mareko, Luka, Iane, na Iesu ia. Aole na Moroni, he kanaka no o Moroni, oia kekahi mea nana i kakau i ka buke a Moremona, nolaila e na keonimana ame na lede i akoakoa mai nei ke noi aku nei au i ko oukou lokomaikai e huli nui kakou i ka Palapala Hemolele (Baibala) aia iloko olaila ko kakou ola. Meakakau, oia ae la na wahi mea i paa iau i ke kakauia, hookahi hora ame ka hapa ka loihi o keia ha'iolelo ana a D. H. Aukai. Ua huli aku la mahope o D. H. Aukai he 24 mau hoahanau, a haalele i ka hoomana Moremona, ina huiia me ka poe mawaho 30 ka huina. Ua kukulu ia ka Ekalesia o Iesu ka Mesia. He kanaka kupono maoli o D. H. Aukai i ke Kahunapule, ua lohe pinepine au i ka oleloia o ka halepule ma ka olelo Enelani he (Church) eia ka aole oia ka mea pololei, o ka Luakini he Temple ka. E ka mokupuni o Maui, oiaio, ua loaa iloko ou he mea nana e hoonaluea i ka noonoo o na Moremona. Kou Oiaio, MAMONA. Waikoa, Kula, Dec. 26. 1905.