Ka Nupepa Kuokoa, Volume XLIV, Number 8, 23 February 1906 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

TISIA-O-ATICA

Ka Wiwoole O na

Wiwoole

Ke Ahikanana Nana i Ulaa ke Kanawai o ka Make o Ciretia

MOKUNA VII.

KAIKAMAHINEALII ARIENDA.

 

“A, e kuu Kalia maikai,” wahi hou a ke kaikamahinealii i pane ae ai me ka hanu nui ana iho, “mai ka make ana o kuu makuahine a hiki wale i keia manawa, peia hoi la ka ha’o ana o ke aloha makua mai a’u aku. Eia nae, aole au i poina i kuu aloha no kuu makuahine maikai a oia wale no ka’u i aloha ai.”

                “He mea oiaio no—o Moi Mainosa kuu makuakane,” wahi hou a Arienda i hoomau aku ai, “eia nae. Aole oia i hana mai i na hana aloha i ku i ke ano makua a hiki wale i keia manawa. E like no me kona aloha ole i kuu makuahine a i kupono i ke kane i maleia e aloha aku e pono ai, pela no i loaa ole ai ke aloha kupono iloko ona no kana kaikamahine.

                “Ina he aloha i’o kona i kuu makuahine, a hana aku oia i ka maikai nona aole no oia e make koke, ke kumu no hoi ona i kaawale koke aku ai mai kona alo aku. A no’u iho, ke manao nei wau ua oi aku ko’u kaawale mai iaia aku e like me ka kaawale ana aku o kuu makuahine mai ona aku.”

                “Alaila,” wahi a Kalia i pane aku ai me ka piha o kona uhane i ke aloha no kona hakuwahine opio, “e haawi ana wau i kuu kokua ana apau no ka hoopakele ana i kuu hakuwahine.”

                Kuu iho la ka hanu nui ana o ke kaikamahinealii, mamuli o na olelo kuka hoolana, a manaoio iho la oia ia manawa aole i’o no oia o lilo i moepuu na ka papahana a na moi, aka, iloko o ka manawa kupono e kaawale ai oia mai kona makua aku a no ka mau loa hoi. A i ka noonoo ana ia mea, aole ka maka’u ame ke kaumaha iloko ona, a wahi no ana, aole oia e mihi ke mahuka oia mai kona makua aku.

                He nui no na manawa i ku aku ai o Arienda imua o na moi a hui no hoi me ka Moi o Aikupika, eia nae, aole he loaa iki he wahi hoohuoi no ka hoowahawaha o ke kaikamahinealii, oiai, he hoike mau aku o Arienda i kona hookipa maikai ana ame ka launa maikai ana, iaia no nae e uumi ana i kona hoowahawaha nona.

                A o ka mea i ikeia, ua oi loa mai ke aloha o ka Moi Sarepisa i ka wahine opio o Ciretia, a no ia haawina i loaa kukonukonu aku iaia, ua noi ikaika aku la oia ia Moi Mainosa e hooko koke ia no ko iaua male ana me ke kali ole aku a hoea mai na pio. O kona makemake @ @ no kona ike koke iho, oia ke kulana o ka wahine u’i hookahi ana i ike ai, a e hookoia hoi me ka hoohakalia ole.

                A ua maka’u no hoi oia o hiki mai kekahi mea e ano-e ae ai, a o ka haunaele no ia o ka moekahi o ka pana ana o na noonoo o laua.

                Aka, ua ha’i aku o Moi Mainosa i kona hoa moi i ka hiki ole iaia ke hana aku pela, no ka mea, us hoopaa aku oia i kana olelo i kana kaikamahine, no ka wa e hoea mai ai no pio o Atenai e hookoia aku ai ko laua male, a he mea pono iaia e ku ma kana olelo i hoopaa ai.

                “Aole no ka maka’u o Arienda i kona lilo aku i wahine nau,” wahi a Moi Mainosa i hoolana aku ai i kona hoa moi, “aka no kona aloha maoli no i kona makuakane nei. Nolaila, e oluolu e kuu hoa e hoomanawanui a ka wa kupono. Mai maka’u oe i ka lilo ole mai o keia makana nui nau. E hoomanao iho oe, nau ia.”

                I kela ahiahi mahope iho o na kukaiolelo ana o na moi, ua hui hou ae la ka moi o Aikupika me ke kaikamahinealii,a no ka nui loa o ke aloha o ka moi, a iaia e kau mau ana na maka maluna o ua u’i ahai puuwai nei, ua lalau okoa aku la ua moi nei i ka lima o ka wahine u’i a paa iloko o kona mau lima pepeekue a hapai ae la no ka honi ana; a muki iho la i ka lima palupalu o ka wahine u’i.

                Ma keia hana ana, ua aneane loa ka wahine opio e huki mai i kona lima a uwa ae, aka, ua hoomanao koke ae la oia i na kuka ana ana me kona wahine ukali, alaila, uumi koke iho la oia i kona ulupuni ano-e.

                A i ke kakahiaka o kekahi la, i laukanaka ae ai ko ke kulanakauhale o Ciretia. O ka mea nana i hoala mai i no kanaka o ka aina, oia no ka ikeia ana aku o kekahi moku eleele e hookomo mai ana ma ka manawa i wehe ae ai ka pawa o ke alaula, a ike moakakaia aku la kona ano kanikau i ka wa i o ae ai na kukuna o ka la, a hoomanao koke ae la na makaainana o Ciretia, he moku ia no na pio o Atenai e lumaiia aku ai iloko o ka make.

                A ke nana aku i ka hiohiona laula o na makaainana, aole ka hoihoi, ame ka iini me lakou no keia hana weliweli, pela i pu-a ae ai ka nanaina haiamu o ka lehulehu. A aole no hoi lakou i hoike ae no ka manao e hookuuia na pio.

                Ua ike no na makaainana o Ciretia i ke kumu o ka hanaia ana o keia mohai weliweli, oia hoi, ka panai ana no na ola makamae o Ciretia i lukuia e ko Atenai, a hoomanao pu ae la no hoi lakou i ka haawi ana o Moi Igiasa o Atica i kona ae no ka hooko ana i ke kanawai make o Ciretia.

                Aka, aia no he poe makaainana i makemake nui e papaluaia iho ka hoopa’i no na Atenai, oiai hoi kekahi poe e kau nui aku ana, o ka pau ae o keia ino weliweli. A no keia poe makaainana no hoi o Ciretia, aole lakou apau i ike i ke kaumaha ame ka ehaeha maopopo o na haawina i kau aku maluna o ka poe i kiolaia iloko o ka lua liona, no ka mea, aole lakou i ikemaka i na hoomainoino o ka lua ame ka hiki ole ke puka hou iwaho ke haule iloko o ia wahi. O na kiai wale no ka poe i maopopo loa ia mau anoai.

                Ua hookomo mai la ka moku eleele o Atenai a mo-ku mai la ma ka nuku o ke awa ma ka hookuu ana iho i ka heleuma, alaila, hoonua aku la o Moi Mainosa i kona mau moku liilii i kai i ka moku kanikau no ka lawe ana mai i na pio.

                A kau na pio iluna o ka uwapo, alaila, ma-ki aku la lakou na opio kane ehiku ame no wahine opio ehiku, i paa i na aahu eleele me ka hoopuaiia ana e na koa o Ciretia. E hele ana ko lakou huakai no ka halealii, kahi o Moi Mainosa e kali mai ana o ka hiki aku, a ia lakoi e @ malie ana, aia he mau kaukani o na makaainana o Ciretia o paapu ana ma na alanui.

                Aka, heaha ka mea i ano-e ae ai ka nana ana o na kanaka maluna o keia poe, he haawina hoi i loaa ole ia lakou mamua? Heaha hoi @ mea nana i hooulu ae i na hawanawana ana iwaena o lakou?

                “Owai kela? Ea, owai hoi kela?” wahi a ka nu-ne laula o ka lehulehu o Ciretia.

                Ae, owai i’o hoi kela. He kanaka u’i o ke kulana hanohano ke nana aku, aka, ke hele nei no ka molia aku i ke ola iloko o ka make. A mai mua mai o ka mooanaia ana mai o na pio o Atenai o keia paha k@ loa o ka hehi ana o kekahi kanaka opio kulana hanohano m@ la he koko alii ka iloko ona, he opio hoi e lumaiia aku ai loko o @ lua liona a ka moi o Ciretia a o Mainosa kona inoa.

                “Ma kuu ola nei,” wahi a kekahi kaikamahine opio o Ciretia i h@ ae ai iaia e ku ana ma ke kihi o ke alanui, “aole loa he pono iki o ka lawe ana i kela poe opio no ka make. He kumakaia maoli keia.”

                “Aole oia e make,” wahi a kekahi kaikamahine, a oia no hoi kekahi o na kaikamahine u’i o ka aina. “Aole e nele ka iho mai o kekahi o na a@ i piha i ke aloha a lawe hoopakele ae iaia mai ke komo ana aku iloko o ka make. Aole e popo e @ ke ola o kela kanaka opio, a o lakou @ hoi apau.”

                A hala kekahi mau minuke ua kaalo ae la ma huakai kanikau nei o no opio o Atenai mamua pono o ka aleo o ka halealii, kahi o Moi Mainosa e noho nana m@ ana. Me ia pu o Moi Sarepisa, ka Moi o Aikupika, ame kekahi mau aliikua ano nui o ke a@. A malaila pu no hoi ke Kaikamahinealii Arienda ame kona poe haiawahine.

                “Ma kuu manao,” wahi a Moi Sarepisa i hoo@ ae ai ma ka manawa i kaa pono ae ai ka huakai mamua pono o lakou, “aole i kupono kela kanaka opio e hookomoia iloko o ka make. E ae anei @ e lilo mao oia na’u no ekolu kaukani dala. Aole i kupono ka make nona i keia manawa. Ma kuu manao he koa wiwoole oiaio oia, a he pomaikai nui ia o’u ke lilo mai oia i koa na’u.”

                Hoole aku la ka Moi Mainosa ma ka luliluli wale ana no o kona poo, no ka mea, ua ike oia he hana hiki ole ia iaia ke hana e uhaki ai i ke kanawai.

                A no Arienda hoi, ua pau loa kona noonoo maluna o na wahine opio e ka’i ae ana, a hu mai la kona aloha no lakou, a iaia e loku ana no na wahine opio, ua lohe aku la oia i na olelo a Moi Sarepisa, a na ia mea i huki ae i kina mau maka, a kau aku, la maluna o na kanaka opio.

                Aka, aole i liuliu au mokio pololei loa aku la kona ike maluna o kekahi kanaka opio oloko o ka huakai, a oia no hoi ke kanaka opio a Moi Sarepisa i hooho ae ai i koa nana, a ia Arienda e hakapono ana maluna o ka opio kane malihini, ua halawai aku la kona ike me ko ua opio nei oiai e nana mai ana no ua opio nei iluna i ka aleo, pololei loa nae ia Arienda. A hui ae la ko laua nana ana, kekahi i kekahi no ka manawa mua loa.

                Alaila, holopuni ae la ka lia iloko o ka nui kino o ke kaikamahinealii o Ciretia i ka ike i’o ana aku i ke kilakila ame ka wiwoole o ke kanaka opio. Aole mamua aku i loaa ai iaia ia ano haawina a o ka mua loa keia. Iloko o kona mau hoomanao ana, ma na manawa apau ana i noonoo ai no ke ano o kona hoapili o ia mua aku, ua loaa no na hiohiona o na ano o ke kanaka opio malihini ana e ika la i keia la i ku hoi i kana li’a ana, aka, aole oia i moeuhane e ike ana oia i kekahi hiohiona o ia ano ma keia la.

                Iwaena o na opio o ka huaka’i aia ka hapanui o ko lakou mau maka ilalo o ha honua ame na nanaina haikea no hoi, e hoike ana i ko lakou kaumaha, aka, no keia kanaka opio hoi, aia kona helehelena iluna, aia kona mau maka ke nana la iluna me ka maikai, me he la, aole he mau pilikia no ka huakai e nee ana, a maluna o kona mau papalina na hiohiona o ke kanaka u’i.

                Ike pu aku la no hoi ua wahine u’i nei o Ciretia i ke kulana lahalaha o ke kanaka opio malihini, a i kana noonoo wale aku, me he la e waiho mai ana oia i mau olelo hoolana no Arienda popilikia, a no ka pihoihoi loa o kona noonoo i ka inu ana i ka makemake no ke kanaka malihini, ua haki pu ae la ka moekahi o kona hakukoi ana ma ka lou iki ana mai o Kalia, kona wahine ukali, e ku kokoke ana no mahope pono ona, a mamua o ka pane ana mai o Kalia iaia ua hooho koke aku la ka hakuwahine:

                “Ea, ina kaua.”

                “Hamau! E kali iki kaua e kuu lede. Ke ike la wau i na mea apau. Aneane e hele ko makuakane, a aia na maka o ka lehulehu ke kai mai la maluna ou, nolaila, e haawi aku oe i na minoaka.”

                Alaila huli hou ae la oia imua o kanaka a kau aku la kona mau maka maluna o ka opio malihini no ka lua o ka manawa ame na minoaka no hoi ka haawiia ana aku, a no ka piha loa o kona uhane ua hiki ole aku ia iaia ke hoomanawanui. Aole oia i aa e nana hou aku, no ka maka’u o ano-e loa ae oia a kaa mawaho o ke kupono e komo ai na hoohuoi ana.

                A i ka manawa i pau ai ka nana ana o Moi Mainosa i kana mau pio, mahope iho ka imi pono ana i ko lakou mau makahiki, i maopopo ai ko lakou oo loa a opiopio loa ole, ua haawi aku la oia i kana kauoha e hoopaaia no pio iloko o ka lua-paahao, malolo pono o kona halealii, kahi e hoopaaia ai no kahi la ae no ka hoolei ana ia lakou iloko o ka lua liona.

                Ma keia nana ana o ka Moi ua hoi iho la kona noonoo a ka maikai mamuli o ka hooko ponoia ana o ka manao o ke kanawai, e koi ana i mau opio u’i, i kaa ole ma o aku o ke kulana elemakule, a kaa ole i ka opiopio loa.

 

MOKUNA VIII.

HUI MALIHINI MA KA LUAPAAHAO

 

He mau manawa mahope iho o ko Arienda hoea ana aku iloko o kona keena moe, ua noho hoomaha iho la no oia me he la nae, e moeuhane ana, a o Kalia no kahi me ia, aole nae oia i hoeueu aku i kona hakuwahine. A hala kekahi manawa, ua pane okoa aku la ka hakuwahine:

“E Kalia, ua hoomaopopo anei oe iaia?” Ua waiho aku oia i keia ninau i kana Kalia me ke ea ole ana ae o kona poo iluna, oiai, aia oia ma ke kulana me he la e noonoo nui ana.

“Iawai kau e manao nei e kuu hakuwahine?” i ninau aku ai o Kalia no ke pahaohao.

Alaila, ea ae la ke poo o Arienda iluna me he la h hoike mai ana ua puiea oia i ka loaa ole o ka manao o kana ninau i kona wahineukali.

“Iwaena o lakou apau, he hookahi mea i maopopo loa i ka umeia o ka noonoo o ka lehulehu. Aole anei o oe kekahi i umeia?” wahi a Arienda i pane aku ai.

“O, o ka opio kane o Atenai kau e manao nei. Oia aku la.”

“Ae,” i hooia aku ai o Arienda.

“Pehea no la e hiki ai ia’u ke alo ae?” wahi hou a Kalia. “No’u iho, aole au i ike i kekahi kanaka u’i e like me kela, a he keu kona kulana a ka hiwahiwa nui wale. Aole anei ou hoomaopopo i ke ano wiwoole maluna o kona kino, ame ka hanohano o kona kulana? Aole anei ou hoomaopopo i na hooho mahalo ana o ka Moi o Aikupika, nona? Aole anei ou hoomaopopo aku i na onohi o kona mau maka?”

Alaila apo ae la na lima o ke kaikamahinealii a kaomi iho la maluna o kona umauma me ka hanu nui ana iho.

“O, e Kalia, manao anei oe aia no ka iini o kona puuwai me kekahi o na lede o Atenai e noho mai la ihope?”

Ma keia hoike manao o ke kaikamahinealii, ua hoopuiwa loa ia ka wahineukali no ka lohe ana i keia hoike manao moakaka loa, he meahuna hoi iloko o ka puuwai o kona hakuwahine. Eia nae, no ka pili mau ana o Kalia i kona hakuwahine, aole oia i hoike aku i kona ano hikilele no ia mea.

Aka, no Arienda, ua ike no oia us hiki loa iaia ke hilinai i kona wahineukali, alaila, ku ae la o Kalia a hele mae la a ku ma ka aoao o kona hakuwahine.

“E kuu hakuwahine,” wahi a Kalia i pane aku ai me ka leo oluolu, “e pane aku ana wau i kau ninau, aka, malia paha he koho kuhihewa wale no keia, no ka mea, he mea maalahi loa ke komo ana mai o na kuhihewa, a he nui no hoi na hemahema i hanaia e a’u. Aka, o ka’u e hoike aku ana ia oe, ua manao no hoi wau ua kakooia lakou e kekahi mau kumu kupono i loaa ia’u. O ko’u manao, aole he mea a ka opio Atenai i haule i ke aloha, a aohe no ana aloha o Atenai e noho mai la.”

“Pehea oe i manao ai pela?”

“No ka mea, ina he aloha kana ohope aole e kaulono loa kona mau maka maluna ou. Ua ike au ia mea, no ka mea, ua hakilo loa au i kona nana ana iluna o kakou, a i ka nana aku, me he la aia ka pana o kona puuwai ma kahi o ka nana ana o kona mau maka e o ana.”

Pii ae la ka ulupuni iloko o ke kino o Arienda a hanu nui iho la me ke ano pihoihoi, aka, aole i liuliu ua ku koke ae la oia iluna a hope aku la i ka lima o kona hoa me ka pane ana aku:

(Aole i pau.)

 

KULIANA

Ka Weli o Damaseko.

KA HOOKO MOEUHANE A KA U’I ULINA.

 

MOKUNA NIII.

MA NA KA’E O PAPA.

 

I ka wa i poha aku ai kela inoa i weliia ma Damaseko apuni, haalulu iho la na kuli o ua Aia Abasa la, no ka mea us maopopo iaia aole loa he kanaka i oi loa aku kona inaina ame ka hookuke ana aku i na poe powa mai na kula aku o Damaseko elike me ka kaua Kuliana. Aka nae, aole i liuliu iho, hoi mai la kona mau noonoo maikai, a ua ike mai la oia he eha wale no keia poe a he lehulehu hoi lakou nei, heaha hoi ke mea e maka’u aku ai?

“Ina o oe keia o Kuliana,” wahi ana i pane aku ai, “alaila ua hele mai nei oe me na wahi kanaka kakaikahi me oe. Heaha mai nei kau?”

“I hele mai nei au e kaili mai ia oe a’e i kela mau pio au e paa mai la. E haawi mai oe ia lakou iloko o ko’u mau poholima, a aole au e hana wale aku ia oukou.”

“A ina hoi e hoole aku ana wau i kau?”

“Alaila, e kaili mai ana au ia lakou me ka limanui. Ia’u e papaleo pu nei me oe ke ike aku la au ia oe. Ina aole au i hewa ma ka’u koho ana, o oe no o Ala Abasa, ke kanaka Arabia – he kanaka puuwai koko e ola nei hoi ma ka powa ana i na wahine ame na elemakule,” wahi a Kuliana i pane aku ai me ka leo kalakala o ka inaina.

“Ae, o kau ka ia!” i hoeho a’e ai o Ala Abasa, me ka huki ana a’e i kana pahikaua a hookonokono aku la i kona lio e nee aku imua, “e hoike aku ana wau ia oe i kekahi mea i hiki i ke kanaka Arabia ke hana aku! E, e o’u mau hoa! E make keia poe lapuwale!”

Iloko o ka manawa pokole ua makaukau a’e la ua poe Arabia la no ka lele mai, a holo mai la lakou imua no ke kahua kaua, kahi hoi a ko lakou alakai e hele la.

I ka wa a Subala i ike ai i ke kaawale ana aku o kona mea nana e kiai ana, kahea aku la oia ia Alabia e hele mai e hookuu a’e iaia.

“E oki a’e i keia mau kaula,” wahi a Subala i kauoha aku ai, “malia o hiki hoi ia’u ke kokua aku. Ea, aole anei keia he hana na na uhane maikai o ke aloha?”

Aole i loihi loa ko Alabia wehewehe ana a’e a hemo o Subala mai kona noho a’e a i ka wa no i hemo ai o Subala oia no kona manawa i lele aku ai iloko o ka huikau o no kanaka e hakaka ana, e o ana hoi ka leo o ka lakou mau meakaua, a e hulali ana hoi i ka onohi o ka la.

Me ka nanaina hoohenehene i ike aku ai o Kuliana i ka nee ana mai o ke alakai o na poe Arabia imua ona, oiai o Hobadana, e ku ana hoi ma ka aoao o kona haku me ka nanaina huhu a e haka pono ana kona mau maka i na enemi. Lele aku la no hoi o Selima ame Oma imua, a i ka manawa i haawila a’e ai ke kauoha no ka ulele ana, ia manawa i ikeia aku ai laua e noonoo akahele ana, me ka ikaika hoi o ka manao e paio aku, he mau hiona hoi e ike maopopo ia aku ai aole laua he mau kanaka hiki wale no ke hoopaaniia.

Holo pololei loa mai la o Ala Abasa imua o Kuliana, me kana pahikaua i makaukau e inu aku i koko o kona enemi; aka na’e ua kuhihewa oia no Kuliana, ina ua manao oia e loaa ana kahi e make koke ai o Kuliana, ina ua manao oia e loaa ana kahi e make koke ai o Kuliana, alaila, ua hoohokaia aku oia i keia manawa, no ka mea i ka haunapahi mua no a Kuliana, koheoheo ana ka pahi a ua Ala Abasa nei i ka lewa, a ia manawa me ka hoohakalia hou ole iho, hoopili ana o Kuliana ma ka aoao o ka lio o ua kanaka la, a inu aku la kana pahikaua i ke koko o kona enemi, a walawala aku la ke kino o ua kanaka Arabia la ilalo, kaawale ka pauku kino, he lauhi na ko Kuliana inaina.

Aia Subala malaila i ka wa i haule ai o Ala Abasa, a me kona hookaulua ole iho, hopu iho la oia i ka pahikaua a ua kanaka la, a lele koke aku la i ka manawa a kekahi mau kanaka ekolu e hoohoa ana ia Kuliana. Hahau aku la o Kuliana i kekahi o lakou ma ka oniu ana o kana pahikaua, a lele ana ke poo oia kanaka i kahi e, aka na’e mai oi papalua aku kona luhi ina aole i hoea koke aku ke kokua nona; no ka mea, he mau kanaka ikaika laua, a o ka make ana o ko lakou alakai ka mea nana i haehae a’e i ko lakou inaina a hooikaika ia lakou e lanakila. Aole me ka manao e panai aku. Aole, aole loa. O ka make ana o Ala Abasa he mea ia e koe iho ai na waiwai makamae, ke dala ame ke gula, a lakou i aihue ai, i ka poe e ola ana. Aka, o ka hoea ana mai o Subala ma kahi e hakaka ana me ka maopopo mua ole, ka mea nana i hoololi a’e i ke kulana pilikia o ka kaua Kuliana. Mahope mai o ke kua i hahau mai ai o Subala i kekahi o na Arabia e paio nei me Kuliana, a o kekahi iho hoi o laua ua like me ka opala imua o no lima konahao o ka kaua Kuliana.

I keia manawa no hoi aia o Hobadana, Selima ame Oma ke hakaka la me ke koena aku o na Arabia. He elua i make ia lakou, a he elua i “a’o i ke koa a’o pu i ka holo.”

Pela iho la i hanaia ai keia mea; a he mea no hoi keia e pahaohao ole ia ai. Ua loaa no na mano koa i keia poe Arabia, aka ua nele lakou i ka ikaika ame ka huki like i loaa i ka aoao o Kuliana ma. He mea oiaio, ina no i kaa ka paio ma ke ku ana he alo a he alo iluna o ka lepo, a paio aku ma ka lawelawe lima maoli ana, ua hiki loa ia Kuliana hookahi ke ku aku imua o keia poe ewalu i hoonana mai ia lakou.

“Aole he waiwai ka hahai ana aku mahope o kela mau lapuwale e holo la,” wahi a Kuliana i pane aku ai, i kona manawa i ike aku ai ia Hobadana e kaulono pono loa ana kona mau maka maluna o na kanaka hoohewale. "E h“okuu aku no ia laua e holo ana. Ua loaa iho la no ka kakou mea i kii mai nei.”

Mahope o keia mau olelo a ua Weli la o Damaseko, huli a’e la oia ma kahi e noho mai ana no opiowahine. Ike aku la o Ulina i ka hele ana mai o Kuliana i ona la, ame ka noonoo hou ole a’e no kekahi mea okoa, koe wale no na manao e hoomaikai aku i kona puukalahala, nee mai la oia imua no ka hui ana me Kuliana.

“E hoomaikai mai na lani ia oe, e ke keonimana maikai!” wahi a Ulina i pane aku ai, me kona haawi ana aku i kona lima no ka lulumi ana.

“E ka lede maikai,” i panai aku ai o Kuliana, “mai hoopuka i ka hoomaikai ana mai ia’u. E pono owau o kaua ke kahea a’e i na hoomaikai ana nou. Ua ike au i ka mea a’u i aie ai i ko’u ola ame ko’u hele lanakila ana, oiai ua hoike mai no o Hobadana ia’u. O, e ae mai ia’u e lawe a’e a hipuu polena iho i na hoomanao ana nou iloko o ka’u mau pule imua o ke Akua, e hoopomaikai ia mai oe iloko o kou mau la e ola ana!”

Hiolo iho la no waimaka a kiheahea a’e la maluna o no papalina palupalu o ka kaua Ulina, a haalulu a’e la no hoi kona mau lehelehe; a iaia i hoomaka hou ai e kamailio, na kona leo i kumakaia i kela manao e pe@ ana iloko o ka puuwai o ua kaikamahine la a Aboula Casema.