Ka Nupepa Kuokoa, Volume XLIV, Number 8, 23 February 1906 — NUHOU KULOKO O KAUAI. [ARTICLE]

NUHOU KULOKO O KAUAI.

He mau la malie keia o ka mokupuni kaili la; malia no nae hoi paha o haule wahi ua hou iho i keia mahina iho o Maraki. Eia o Mr. L. Mitchell i Waimea nei i keia mau la, no ke a'o ana i ko Waimea nei mau keiki i ke puhi bana a ke lohe ia aku nei ke kani nakulu mai o na ohe a ua mau keiki la o ka Waiula Iliahi o Waimea. Hoomau ia i loaa ka ike ma ia hana. He oki loa hoi ka noho wale iho no i ka uluniu. Ke hiu a wela mai nei na keiki o Niihau i keia mau la, a he nui ke akule e laweia mai nei mai Niihau mai. He i'a hoi i kaulana ma kona moolelo: "Wehe ke akule i ka hohonu." Eia nae he loaa wale no i ka upena hoolei, e hei ana he mau kaau i ka hoolei hookahi ana; aia no ka hohonu o ke kai i ke kuli. Eia no na Iapana ame na Pukiki, ame na lahui e ae, ke hoomau nei no i ka heihei lio ma Hanapepe i na auina la Sabati anau. O kahi e malamaia nei o keia hana a ia ma kahi e kokoke ana i ka uwapo a Hon. G. W. Mahikoa i hana iho nei, a malaila na mea ai a na Pake ame Iapana, e lawe ai e kuai. J. W. Kawailiula.