Ka Nupepa Kuokoa, Volume XLV, Number 32, 10 August 1906 — KA BUKE MOOLELO KOU KALUAIKOOLAU. [ARTICLE]

KA BUKE MOOLELO HOU KALUAIKOOLAU.

Ua pau i ka pa'iia ka buke moolelo Kaluaikoolau a ua makaukau hoi no ke kipa ana aku ma na ipuka hale o oukou e na poe puni heluhelu moolelo. He buke keia i hooponoponoia a i hoopukaia me ka noeau e kekahi o na loea kakau moolelo, Kahikina Kelekona. He wahi buke keia nona ka loa o 9 iniha, o kona laula he 6 iniha, a o kona manoanoa he 5-16 o ka iniha, a maloko o keia buke moolelo ua piha i na mea oiaio ame na haawina o ke aloha walohia. Ua maheleheleia keia buke moolelo

iloko o na mahele ekolu, o ka mua oia no ka moolelo o ke kanaka i lohe nui ia kona kaulana a puni o Hawaii nei ma ka inoa o Koolau, a o kona inoa piha kae o Kaluaikoolau, ke Kae'ae'a o na pali Kalalau ame na pali o ahi o Kamaile. O ka mahele elua ua pili no ia no Piilani, ka wahine mare a Kaluaikoolau, ka mea i molia i kona ola mahope o kana kane aloha, a o ka mea hoi i kapaia ke kiu alo ehu poka. O ke kolu o na mahele, ua pili no ia no ka laua kamalei, Kaleimanu, Ka hua hoi a ko laua opu iloko o ka inea.