Ka Nupepa Kuokoa, Volume XLV, Number 34, 24 August 1906 — E HOI MAI ANA KA BANA HAWAII. [ARTICLE]

E HOI MAI ANA KA BANA HAWAII.

Memphis, Tenn., Aug. 7. 1906. I kuu makamaka maikai Mr. David A-i. Aloha nui: I ko makou hiki ana ma keia kulanakauhale o Tennessee, mai Kansas City mai, he mau kaukani ka nui i hele mai e nana ia makou me ka ninau ana heaha la makou; ua pane ia aku he Bana Hawaii helu ekahi o ke akamai ame ka maikai: aole he hilinai mai o na kamaaina o keia wahi ia makou, aka, i ka manawa mua loa a lakou i lohe ai i ka makou puhi ana ame na himeni ana a makou, ua kaena mai lakou ka bana helu ekahi keia a lakou i lohe mua loa ai. Eia kekahi, he nui loa na wahi a makou i au'a ia mai e noho hou i Amerika nei a hiki i ka pule hope loa o Dekemaba nei: ua ae ka lunanui o makou, oia o J. C. Cohen. aka, ua hoole makou, e hoi aku ana makou no ka aina i Okatoba 11. Ua lawa au maanei me ke aloha ia oe anui loa ame na hoaloha o kaua apau. Owau no me ka oiaio, o kou makamaka nei. D. K. NAONE.