Ka Nupepa Kuokoa, Volume XLII, Number 18, 3 May 1907 — HE MELE NO KAAHUMANU. [ARTICLE]

HE MELE NO KAAHUMANU.

I ka lunahooponopono o ke Kuokoa, Aloha oe: Ma ke Kuokoa o ka 1a 26 o Aperila, 1907, ua ike au i ke Mele Kanikau o ke Aliiwahine Kaahumanu i kakauia e David Malo, 1834, ua puka keia kanikau o ke alii ma "Ka Hae Hawaii" 1856. O David Malo ponoi no i haku. He uluna o Kaahumanu kahi mea i loaa ia'u, o Papohaku ka wahine haku Mele, ua haku ia e ia na Uluna o na alii e ae apau, koe ko Kaahumanu. Nolaila, ua nui ka huhu o ke alii. Hoouna aku la o Kaahumanu i kona Elele e hele aku ia Papohaku. "E hoike aku i ka makemake o ke Alii." I Uluna nona, a ina e loaa ole, alaila, he make ka hope. Hana Uluna i ka lani ka paka a ka ua, Napele Kalalau owali i ka Makani Nawali lua i ka nahua ia e Mahamoku. Moku Mamalahoa li-e i ke anu, Kaka i ka onohi hemo o ke Koolau I na pane onohi o ka Ua o Mana Ho'olai ka mahu Elele i ka pohu Nopu Wailua i ka Waihalau i ke kai—e Makemake loko i ka moe a ke Aloha, E aloha e. SIMON PAALUHI. Kapalama, Aperila 30, 1907.