Ka Nupepa Kuokoa, Volume XLII, Number 23, 14 June 1907 — HUIPU KA PAANI ME KE KALAIAINA. [ARTICLE]

HUIPU KA PAANI ME KE KALAIAINA.

O ka paani kinipopo i malamaia ma Aala Paka i ka Lapule nei me he mea la aole ia he paani, aka he huina o ke kalaiaina pu, 110 ka mea, ma ia kahua 1 ka manawa e paani ana aia na ikiiki o ke kalaiaina e nee pu ana iloko oia huina. O kekahi inoa e lohe mau ia ana iwaena o keia hakoko paani kinipopo ana oia no ka inoa o Mr. Hustace. Mai ka wa i ku ae ai k'eia hui kinipopo ma Aala Paka e paani ai hoi ma na Sabati ua ikeia ka holole'a oiai nae aole he auhau e kauia ai maluna o na makaikai e like hoi me ko Kamoiliili, a nolaila, aohe he wahi alainui e komo mai ai na loaa ma ia ano. Aka, aole no i hemahema loa keia hui kinipopo, no ka mea ua niakaala no lakou i ka imi ana i wahi alanui e loaa ai kahi kenikeni. a mahope iho o ka hooikaika ana ua hooholoia ae la e lioolimalima aku i na noho lie 180 ko lakou nui ma ka auiiau nunui kupono i ka mea hookahi e makemake ana e loaa i noho nona e noho ai mahope iho 0 ke ku ana a maloeloe maoli. Ma ka hana ana ia pela, ua komo mai na loaa nui kupono a oiai aole no he nui loa o na hoolilo ua inanaoia aia no he wahi koena loaa ma ka waihona no ia paani ana aku. Eia nae ka mea hilu loa ua laweia ae la ia hoolimalima noho o lakou a o ka nele no hoi ia o ka loaa ana o ia mau loaa ma ke kauoha e papa ana ia alanui i hoomahuiia ae e lakou. A ma keia nele ana ua ike oleia na noho hoolimalima ma kc Sabati i hala iho nei mamuli o ka loaa ana aku o kekahi kauoha ma ka leka a ka Lunahoomalu Hustace o ka Papa Lunakiai o ke Kalana 0 Oahu ia Peresidena Kelekolio, e papa ana aole e hoolimalima hou 1 na noho maluna o ka Paka. A o keia no hoi ke kumu o ka noiia ana ae e hookupu ma ua Sabati la ke knmu o ka lulnia ana ae a piha ka huina o $22. a ua oleloia ina aole e mau ana ka loaa o na kokua no ka uku ana i na hoolilo) o kela ame keia Sabati e paani ai alaila e hiki niai ana ka manawa e hiki ole ai ka paani kinipopo hou. Iwaena nae o kekahi mea i ikeia ma ia la oia no ka huhu nui o kekahi kanaka mamuli o ka loaa ana aku o kana wahine ame na keiki pu e nonoho ana iluna o ka mauu o ka Paka mamuli o ka lepo o na lole keokeo o na keiki. Ua nui loa kona'hoohalahala, a wahi ana aia maluna o ka Papa Lunakiai kona hoohalahala aole maluna o kana wahine, a ua oleloia ae e laweia ae ana he palapala kakauinoa iwaena o na makaainana o ka Apana Elima a waiho aku i ka Papa no ka haawi ana ia Aala Paka! iloko o ke kulana e waiwai ai no ka lehulehu puni lealea.