Ka Nupepa Kuokoa, Volume XLII, Number 32, 9 August 1907 — KANALIMA TAUSANI DALA NO KA HALEMA'I O NA KAMALII. [ARTICLE]

KANALIMA TAUSANI DALA NO KA HALEMA'I O NA KAMALII.

Ma ka nana ak« me he mea la e hooiaio loa ia ana kela manao a Alabati Wilikoki o Kauai, i lawe mai ai e kukuluia maloko o keia kulanakauhale i halema'i no na kamalii. Ua hoakakaia ae, ua hooholo oia e haawi i ka huina o $50,000 no ka lioohana ana a e kukuluia i halema'i no na kamalii, ina e hiki ana e lawa pono ka waihona e hoolakoia ae i ke $50,000. Ua hoakaka pu ae oia ua makaukau mau oia e lulu hou a e noi aku hoi i na kokua no ka hoolako ana i keia wailiona. He nui na kauka o keia kulanakauhale no kekahi manawa i hala ae nei i akenui e kukuluia i halema'i no na kiamalii, a mamuli o |ka lakou hoeueu mau me na hooikaika pu ana ua hiki mai la lakou i ka pahuhopu o ko lakou mau iini, ke hiki mai i ka la e hookoia ai keia kumuhana. Owai ke pomaikai nui ana ma ke kukulu ana i keia halema'i? E lapaau.wale ia ana anei na keiki a ka poe ilihune me ka uku ole, e like me ka halema'i Moiwahine?