Ka Nupepa Kuokoa, Volume XLII, Number 39, 27 September 1907 — HANA ALOHA A KEKAHI MAKAI [ARTICLE]

HANA ALOHA A KEKAHI MAKAI

Seattle, Sept. 15. —Ua hopuia i keia la kekahi wahine o Mrs. Mary Woodcock ka inoa, he wahine kuai laau; no ka hewa kuai rama me ka laikini ole oiai aole i kauia ka ke kauka hoakaka mawalio o ka omole e like me na laau e ae. He eono hora a keia wahine i paa ai iloko o ka halepaahao me ka bela ole ia, oiai nae kana mau keiki elima e noho makuaole ana no kela mau hora, a o kahi i laki ai na kekahi wahine mahope aku o ka halekuai laau o keia wahine i malama a hiki i kona hemo ana mai. A i ka wa i lohe ai ke kapena makai ua kauoha koke oia e hookuuia keia wahine mamuli o kana bela ana. O ka makai lokoino nana i hopu, ua hele aku oia a i keia wahine a noi aku la 1 omole rama e kuai ia mai iaia me ka hoakaka aku he ma'i loa kana wahine a o ka rama ka laau e oluolu koke ai a kuai koke aku no hoi kela wahine no ka manao e kokua i kela pilikia a eia nae, no la hana maikai, ua hopu kokeia iho la oia a laweia i ka halepaahao. He halekuai laau ko keia wahine a oia kana hana no kona ola ame kana mau keiki mai ka manawa mai i laweia ai kana kane i ka halepupule no ka ma'ipupule, he mau mahina loihi mamua aku; ano keia hana imihala a keia makai paa wahine ana oia i ka halepaahao.

Kapalakiko, Sept. 17. —O ka nui o na ma'i bubonika maanei i keia la he kanakolu kumamakah*. He umikumamaiwa i make.