Ka Nupepa Kuokoa, Volume XLII, Number 41, 11 October 1907 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

LEDE ANOLA

 

Ka U’i Hookalakupua Nana i Hoehaeha

aku i na Puuwai Elua

A I OLE

Ka U’i i Molia Iaia Iho Iloko o ka Haawina

Laahia o ka Mare ma ke Ka’e o ka Moe Make

AOLE MA KE KUAHU.

 

MOKUNA XXX.

KA PAIO ANA NO KONA PONO.

He meha wale no ke halii ana maloko o ka rumi no kekahi mau minute, a o na u no ke kaumaha a ke keiki me na makua ka mea e haiamu ana.

Na ka nakeke ma kekahi aoao mai o ka rumi i hoohikilele ae i ka lede opio, a i kona alawa ana aku, ike aku la oia ia Fonatana e nana mai ana iaia me na maka ua hele a ulupuni i ka huhu.

Ua palaka maoli no kona noonoo nona no ka lilo loa i ka uwe me kona mau makua, a i kona ike ana aku, akahi no oia a hoomanao ae nona, a ia wa ua hoala koke ia mai la kona ukiuki no Fonatana.

Ku ae la oia iluna a pale ae la i na lima o kona makuakane, a hele aku la oia a imua pono ona, a i aku la me ka leo mako-na:

“Ua poina loa wau me ka noonoo ole ae nou,” wahi ana, “aka, i keia wa e hele koke aku oe, aole o’u makemake e ike hou aku ia oe maanei.”

“Ua uhaihele mai nei oe ia’u i ko’u home nei me ke ku-e loa i ko’u makemake, nau no oe i hahaihele wale mai nei no ia’u, me kou hana ana i kekahi hana lapuwale loa e hookomo ai ia oe iho a ia’u pu iloko o ka pilikia nui, aka, e hoopauia ana ia mau ano hana au mai keia minute aku.

“E papa,” me ka huli ana ae i kona makuakane me ke ake e hooloheia aku kana noi, me kona mau papalina ua hele a nonoula i ka huhu, a e lele ana hoi kona mau maka me he hehena la, “o kela hana lapuwale me ka hilahila ole loa i hanaia i keia kakahiaka e kela kanaka aole ia e pono e hoomanao hou ia --- ua hiki loa ia ke hoopauia me ka nui ole o ka hana, aole anei?”

“Ua heluhelu no au no kekahi mau mea i mareia pela mamua aku nei --- ua heluhelu no au i kekahi poe i mare hookikinaia a i hoopau wale ia me ka nui ole o ka hana, iloko o na nupepa, he mau la pokole wale no i hala ae nei, a aole loa wau e ae iki ana e kauia ka inoa o kela kanaka maluna o’u no hookahi minute, a i ole e ikeia mai paha e ka lehulehu he wahine au nana a he kuleana koi kekahi ana maluna o’u. Aole loa wau e ae iki aku ana e o ia kona inoa maluna o’u e like ka loihi me ka nui o ko’u mau la o ke ola ana.”

“E kuu keiki,” wahi a Mr. Anola i olelo aku ai, me ka hoomalielie ana aku iaia, no ka mea ua kahu kaena maoli ka Lede Anola ia minute, “e waiho mai oe iaia na’u e hooponopono aku; e hoi oe iloko me mama.”

“E Mrs. Anola, e lawe aku oe iaia nei iloko o ka rumi,” wahi ana i kana luahine, “a e hoao iho oe e hoonana iaia a e hoopau ae i keia mau ano noonoo kaumaha, ina he hiki, a na’u hoi e hooponopono ae me keia kanaka lapuwale ka mea nana i hana a i hookomo hoi ia kaua iloko o ka pilikia i na la i hala ae nei.”

Ku ae la oia iluna a ka’i aku la i ka Lede Anola a hiki i ka puka a honi iho la iaia me ke aloha a haawi aku la iaia i kona makuahine, @ pani aku la i ka puka mahope o laua, huli hou mai la oia me na maka hulili i ka eepa e haka pono aku ana iaia me he liona la, ka mea hoi nana i hookomo aku i ko laua mau kino hapauea iloko o ke kumakena no ka laua lei a-i i na la ia aui aku.

 

MOKUNA XXXI.

KA HOOHOKAIA ANA O FONATANA.

O kela halawai i kukaiia mawaena o Mr. Anola ame Fonatana he okaikai maoli.

A mahope loa i aku la o Mr. Anola:

“Aole loa e ikeia kuu kaikamahine he wahine nau --- aole loa e kapaia ma kou inoa; a nou hoi, e kena lapuwale, i kou wa e haalele mai ai i keia hale, e hoomanao oe o ka hope loa ia o ka hehi ana o kou mau kapuai wawae maloko o keia hale no ka manawa pau ole --- aole oe e hoomaalo hou mai ma keia wahi ma keia hope aku.”

“Alaila, e manao ana oe e hanaia na mea apau mamuli o kou manao iho, me kou nana ole ae i ka pono o hai, ea, pela paha?” wahi a Fonatana i pane mai ai me ka haikea o kona helehelena no kela mau olelo papa uahoa a Mr. Anola.

“No ka pono o ka’u kaikamahine he pono ia’u ke hoomalu iaia. Ua nonoi mai oia ia’u i ka’u mau kokua nona. Wahi ana i olelo mai nei, ua hookikinaia oia e oe e lawe i kela kulana poino mamuli o kau hooweliweli ana iaia ma ke ano hohewale a e lilo ai i mea hookaeia.

“Aole ona manao iki nou, a ke hooikaika nei oia ma na ano apau e kaawale mai na hoohihia mai apau i hauhoaia ai maluna ona; a e makaala aku ana wau no kona pono i ole ai oe e holapu ae ma kona alahele.

“A no laila, ke hooki nei au i ka’u kamailio ana me oe, a o ke aloha no kou,” wahi a Mr. Anola, a ani aku la oia i kona lima me ke kuhikuhi ana aku ia Fonatana i ka puka, me he mea la e i aku ana e hele koke aku oe.

No kela mau olelo hoohilahila a Mr. Anola, pii ae la ka wela iloko o Fonatana, a aole ona makemake iki ia wa e hoopau wale i kona manao a hiki i ka ulu ana ae he paio hahana mawaena o laua.

“Aole loa wau e hookaawale ana ia’u mai keia hale aku,” wahi ana me ka huhu nui, “ma ke ano he kuleana ko’u i ka’u wahine, i @@na kino ame kona waiwai ma ke kanawai, he kuleana ko’u e noho @i maanei me ia, a e paio aku ai i mea e loaa mai ai ko’u pono.”

“o oe io ka ke kahu malama waiwai ma ke kanawai! Hu! manao au oia maoli no kou manao, a o ke kumu nui no ia o kau hana hoolauwili ana i mea e ko io ai ia manao lapuwale ou, no ko manao nui i ka waiwai o kuu kaikamahine; e loaa io ana ia ia oe,” wahi a Mr. Anola me ka piha inaina.

Pii hou ae la ka ula ma na papalina o ua lapuwale nei a kakaa @@ la kona mau maka poopoo makaleho i kona wa i nana mai ai i na maka hulili o Mr. Anola e haka pono aku ana iaia me he uila la.

“Malia ua koho hewa wale oe e haawi aku ana kuu kaikamahine nau e hooponopono i kona waiwai?” wahi a Mr. Anola i pane hou aku ai, me kahi minoaka pahene, iaia i noonoo iho ai he hana mamao @a ia mai ka hiki ana iaia ke kikoo mai.

“E ae mai ana paha ia aole paha, eia nae ua lilo na ko’u mana ma ke kanawai e lawelawe i ka hana apau no kona pono, mai ka minute mai o’u i lilo ai i kane mare nana,” wahi ana, ma ke ano hoooioi, @ia nae e kokolo hele ae ana no ka manao hopohopo iloko ona no ke @@ a ko ole paha o kona makemake.

“Aole loa pela, e Mr. Fonatana, aole loa pela; ua hana oe me ke kuhihewa loa,” wahi a Mr. Anola me ka leo ko’iko’i, “ina oia kou manao o ka hookikina ana i kuu kaikamahine e mare me oe me kau hooweliweli ana iaia no kou manao nui i kona waiwai, ua kuhihewa maopopo loa oe, a e hoka oe e pono ai.”

“Malia paha ua poina oe i ka’u oihana, e Mr. Anola, aka, e kaa aku no au ia oe ma ia mea; he loio wau, e hoomanao oe, a ua oi aku ko’u ike kanawai i kou,” wahi a Fonatana i pane aku ai ma ke ano hoonana, me ka hele ana ae o kona helehelena a haikea no kona hoohokaia.

O keia maoli no ka manao o Fonatana i hoolala ai e noho mana oia maluna o ka waiwai o ka Lede Anola mai ka manawa mua mai o kona hoinainau ana me ka lede opio, a i ka hiki ana mai i ka manawa hope e hookoia ai o kona makemake, ua halawai maopopo loa oia me na manao hoohoka.

Ua lilo loa keia hoohokaia ana ona i mea na kona noonoo e naluea ai; ina e komo ana kela waiwai nui o ka Lede Anola iloko o kona mau manamanalima, e like maoli ana ia me kekahi keiki kolohe e alualu hele ana i ka hu’ahu’a kopa e puhiia ana e ka makani, a e ike aku no oia me kona mau maka i ke poha ae o ia mea i ka lewa iaia e aneane aku ai e hopu.

“Aohe no i lawa loa ko’u makaukau ma ke kanawai e like aku me kou,” wahi a Mr. Anola, “aka nae, ua hiki iki no ia’u ke hoomaopopo i kekahi mea, i ka wa e hanaia mai ai kekahi hana lapuwale e like iho la me keia, e like no hoi me ka ike a hoomaopopo ana a kekahi poe kanaka noonoo maikai e ae.

“I ka wa i hana ai o Roe i kana palapala kauoha, a hookohu mai la ia’u i lunahooponopono no kona waiwai, a hoomana pu mai no hoi ia’u e hoohanaia ka waiwai o ka’u kaikamahine ma kahi a’u i ike ai he pono --- me ka ae pu mai o ka’u kaikamahine; a oiai o na dala he elua haneri ame kanalima tausani a kona kupunawahine i hooili mai a@ nona, ua loaa ia’u ka mana e noho kahu ai nona a hiki i ka piha ana o kona mau makahiki i ka iwakalua-kumamakahi, oia hoi he makahiki okoa koe mai keia la aku.”

Namunamu iho la o Fonatana i kekahi mau olelo hailiili no keia mau hoakaka a Mr. Anola.

O kona manaopaa maoli oiai oia ua lilo oia he kanemare na ka Lede Anola, e kaa ana malalo o kana hooponopono ana ka hoomalu ana i kona mau waiwai apau --- o keia maoli no ka manao makee waiwai o keia kanaka, a oia no ke kumu nui o kona ake loa e lilo ka Lede Anola iaia; aka i keia wa ua ike maopopo loa oia i kona hoka.

He hana pono ole loa nona ke kakali ana a hala he makahiki o koa i koe, alaila, loaa iaia i wahi keneka mailoko mai o ka waiwai o ka Lede Anola, ana i kuhihewa loa ai e loaa koke ana no iaia. A kulou iho la oia me ka noonoo kaumaha me ka mihi ana no kana mau hana kuhihewa apau i hoolala ai.

“A nolaila i keia manawa,” wahi a Mr. Anola, me ke kuhikuhi ana aku i ka puka, “ua lawa ko’u kamailio ana me oe, a e pono kaua e hoopau koke i keia wa; aka, e hoomanao oe i ka’u i olelo mua aku nei ia oe, ina oe e hoao e hou poo mai me ka manao e launa hou me kuu kaikamahine, a e hana mai paha oe i kekahi mea e poino ai ma keia hope aku, e auamo ana oe i ka ehaeha o ia hana au.”

Huli aku la oia e hele iaia i hooki iho ai i kana kamailio ana, a noho iho la iluna o kona noho, e hoike aku ana hoi ia Fonatana ua hiki mai i ka hopena o ka laua papaleo ana. A no Fonatana hoi me na manao kaumaha he ano hoi i hooku’i ole ia me ia mamua --- ua hoohokaia mamuli o kana pahele ponoi no i hana ai, me na huaolelo hailiili no kona poino, puka aku la oia iwaho me ke kukule, me ke poo e luliluli ana a nalowale aku la mai ka ike ana aku a ko Mr. Anola mau maka.

I kekahi la ae, ua hele aku la ka olomana Mr. Anola e halawai me kekahi loio kaulana o Rochester, e kuka me ia no na mea e pili ana i ka hihia a ka Lede Anola a kakou e mea heluhelu ma i ike ae nei ma na helu i hala, oia hoi, ka mareia ana o ka Lede Anola me Fonatana.

O ka pane a ka loio, ina he hiki ia lakou ke hooiaio ua hookikinaia ka Lede Anola e mare me ka hooweliweli pu ia, alaila, ua hiki loa ia ke hookaawaleia me ka nui ole o ka hana; a ua hoikeike pu mai oia i kekahi hihia i hanaia iloko oka Aha Hookolokolo ma ke kulanakauhale o Nu Ioka, i like loa iho la me kela hihia a ka Lede Anola e manao nei e hoopii.

Ua hookikinaia ka wahine e mare a ua mare io mamuli o ka maka’u i ka make; ua haawi aku oia i kona ae e mare me ke kanaka ana i makemake ole ai. A o kahi i pono loa ai kana hoopii he mau hoike kona ma kona aoao i ike pono i na hana i hanaia ai me ka hooweliweli pu, he hooiaio ana ia i ka pono o kana hoopii, a nolaila, ua haawi ka lunakanawai i kana olelo hooholo ma kona aoao.

A ina e hoomanao iho ana ka mea heluhelu ma kekahi mau heluhelu i hala e ike ana no lakou i ka ka Lede Anola mea i kamailio ai i kona makuakane, a o keia moolelo a ka loio e kamailio nei ia Mr. Anola, oia no ka ka Lede Anola i heluhelu ai iloko o na nupepa oiai oia e hoopaa pio ia ana maloko o ka halepaahao a Mrs. Agnew ma Nu Ioka.

Aka, ma keia hihia a ka Leed Anola e makemake nei e hoopii, aohe hoike e ae mawaho ae o kana huaolelo ponoi e hiki ai ke hooiaio mai ua hanaia kela hana karaima puuwai eleele; ina ana no o kela kahunapule ka hoike e laweia mai ai e hoike ma ka aoao, ina e hiki ana e loaa kela kahunapule, aole ana no e hiki iaia ke hoike mai ua ike oia i kela hana karaima i mea e holo ai ka pono ma kona aoao, oiai aole oia i aa e paio no kona pono imua o Fonatana e ike ia mai ai e kela kahunapule.

I ka wa i hoikeia aku ai imua o ka Lede Anola ka ka loio mau hoakaka no kana hihia, ua pili kaumaha loa oia, me ka honaku i kahi e pono ai.

“Aohe a’u mea e hiki ke hooiaio,” wahi ana me ke kaumaha, no ka mea, o Mrs. Agnew ame ka wahine malama hale he kanalua ole ke olelo ae aia laua a i elua malalo o Fonatana, a e hoohiki ana laua ma na mea apau ana e makemake ai.

“He oiaio, aohe mea kino e ae malaila, o maua wale no, i ka wa ana i hooweliweli mai ai ia’u me ka pu panapana, a ua lawelaweia ia hana e ia i hiki ole ai ia’u ke oni aku ma na alahele lehulehu.

“No keaha no la hoi i hupo loa ai au ia manawa me ka hiki ole e paio aku imua ona no kekahi mau minute?”

“Mai hookaumaha kakou i ko kakou mau noonoo no keia mea, e kuu lei?” wahi a kona makuakane i pane aku ai me ka hoohauoi pu ana aku; “e hoao mau kakou e hoolana mau i ka manao, a na ke au o ka manawa e hoopomaikai ia kakou.”

He manaya loihi loa mahope mai, ua hookoia keia wanana a Mr. Anola.

“E papa, e haalele kakou ia anei, a e hele kakou ma kekahi wahi mamao,” wahi a ka Lede Anola, “i ole ai e hiki iaia ke huli ae ia kakou.”

“Ihea auanei kakou e hele aku ai?”

“He makemake wau e holo kakou i Parisa,” wahi a ka Lede Anola i pane aku ai me ke kani ana iho o kana uhu me ka walania.

“He makemake ko’u e ike i ko Roe wahi i kanuia ai, a ia kakou e hoi mai ai, alaila, hoihoi pu mai kakou i kona mau iwi a hoomoe iho iaia i ka aina paa nei, kona aina hanau.”

“Ina ia nei kona kino kupapau. Ina e hiki ia’u ke ike aku i kona HE a e hele mau aku ilaila i kela ame keia la a e uhi hoi i kona HE a paa me na pua ana i makemake nui ai, alaila hiki ia’u ke hooiaio iho he wahine kanemake au a o ko’u aloha ua make; aka, nou iho i keia manawa eia no au me ke ano hoomauia o na manao pilihua, me he mea la aia no o Roe ke ola la no, aohe i make.”

“Ua hiki no ia oe ke hele ma na wahi apau au e makemake ai, e kuu lei,” wahi a Mr. Anola, me ka aneane o kona puuwai e naha i ka lohe aku i kana kaikamahine e kaukau ana.

“E lawe no au ia oe i Parisa a ma na wahi e ae paha apau au e makemake ai e hele maluna o ka ilihualala o ka honua.”

“Owau no kekahi e makemake nei e holo ilaila, alaila, e nukuia ana e a’u kela kauka o Parisa, no kona huna loa aole hoike iki mai ia kakou i kekahi mea e pili ana no Roe.

“Aka, manao nae au o ke kumu no ka nui no hoi paha o ka poe make oloko o kela halema’i i kela i keia la me he hipa la ma kahi e lukuia ai ka nui hewahewa, nolaila, aole e hiki ke hoomaopopoia ae.”

No ka Leed Anola aole e hiki koke iaia ke hele ma kela mau wahi manao e like me kana e makemake la me kona ike iho no i kona poino, aole i ola kona wawae; a he manawa loihi no ia ana e kali ai a @ uiha ai, oiai, aia iloko ona na mano nui elua kahi i hookikina ae ai ia manawa.

O ka mua, he akenui kona e hiki i parisa i ike aku oia i ka HE o Roe, a o ka lua, he ake loa kona e hele a mamao mai ka hiki ana ia Fonatana ke ike hou mai iaia.

Ua hoomakaukau koke iho la lakou no ka hele ana, me ka manao e hele koke aku lakou mahope iho o ko Lede Anola hoomaha iki ana iho, aka, me ka maopopo mua ole ae, ua loaa iho la oia i ka ma’i nawaliwali loa.

“He ma’i pihoihoi no ka pilihua,” wahi a ke Kauka Southwick, iaia i hele mai ai e ike i ka ma’i o ka Leed Anola i kekahi la; ua loaa iaia kela ma’i mamuli o ka nui loa o kana mau mea i noonoo ai no ka pilikia, ame ka loihi loa o kona nohopaa loa ana iloko o ka hale o

Mrs. Agnew ma Nu Ioka.

A no keia ma’i hou o ka Lede Anola, he mau mahina loihi hou kona o ka waiho ana ma kahi moe, me ke kiai mau o kona mau makua iaia, me na manao pilihua a hopohopo aole paha oia e ala hou mai ana mai kona wahi moe mai.

Nawai e oe ka ma’i ua hele a puai nawele o ke ahe wale la no, e pa no ka makani e hina; aka, o ka manao he uahoa, a o ka u’i he waianuhea pali ke kua mahina ke alo i ke ku a ka wahine u’i.

MAHELE ELUA.

MOKUNA I.

HE NINAU I HAWANAWANAIA.

E na hoa kauna o keia moolelo, maanei e waiho iki ana kakou i ke kamailio ana no ka Lede Anola, a e hiamoe malie no hoi ia iluna o kona wahi moe ma’i, aia a hiki i ka wa pono, alaila, hoala hou mai.

Malia paha ia wa a kakou e kamailio hou ai nona ua mama loa oia i ka hele.

Mai pihoihoi mai no hoi oukou no Roe me ke ake nui e lohe i kekahi mea e pili ana iaia. E hoomanawanui aia a hiki aku kakou ilaila, alaila, ike kakou i kona alahou ana e like me ko Lazaro mai ka make mai.

 

He umi-kumamalua makahiki mamua aku o ka wehe ia ana o ka kakou nei moolelo aia hoi ma kahua o waho loa o kekahi wahi ulanakauhale uuku a e hoopuniia ana hoi e na puu uliuli o ka mokuaina o Veremona, e ku ana kekahi wahi pupupuhale, he ano kahiko no, aka nae, he maemae kona kulana e hoopuni ia ana me ua kihapai pua a e haiamuia ana e ke onaona.

Ma kekahi kakahikaka laelae o ke kupulau, ka wa hoi a na pua e popohe ana, a e hoopiha ana i ka lewa me ke ala kupaoa o na pua a oia no hoi ka manawa i kakauia ai keia moolelo, he meha wale no maloko a mawaho o ua wahi hale nei.

A o na hoaloha e maalo ae ana, ua hookokoke mai la lakou i ua wahi pupupuhale nei me na kaina wawae e mihi hele ana me ka uumi o ka hanu me na manao paha’oha’o, “pehea la ka loihi a kaahope ae na kuaua eloelo o ke kaumaha,” oiai lakou e kaukolo aku ana na maka iluna me ke akenui e ike aku i kekahi mea ma ka puka aniani.

Maloko o ua wahi pupupuhale nei, e waiho ana kekahi kaikamahine opiopio maluna o kona moe me ka nawaliwali loa, iloko o kekahi rumi o ka hale iluna --- he kaikamahine u’i nohea oia, a he ku no hoi i ke aloha ka ike aku a ka poe i ikemaka i kona kino mailo, a nona hoi ke ola makamae e aneane loa nei e omuoia --- a e hele aku hoi ma ke ala laula no ka aina o Kanehunamoku.

Aia hoi ma ka aoao o kona moe e noho ana kekahi wahine aoo nona paha na makahiki he kanalima, e kiai ana me ka naau paumako i ka hanu ailiili ana a ka mea ma’i oiai e hapai pu ana kona hanu.

No kekahi mau pule lehulehu he moowini loa kona wahi ola, aia ma ka aoao o ka make ka hapanui; a i kela manawa ua hiki mai ka wa no ka hookolo ana, e loaa hou ae ana paha iaia ka ikaika, a i ole e kii mai ana paha ka Anela o ka make a hii aku iaia ma @kela aoao o ka muliwai eleele o ka make.

Aohe no he lako loa o ka rumi i ka nana aku; a pela no ma na wahi apau o ka hale, a o na mea apau e ikeia aku ana, e hoike maoli mai ana no i ke ano hemahema o ka noho ana, aole nae he ilihune maoli.

He ano hemahema ka noho ana i ka nana aku, aka nae, ke nana aku i ke kulana o kela lede aoo e noho la ma ka aoao o ka mea ma’i, he kulana hiehie kona o ka poe waiwai a ko’iko’i o ka aina.

O kona lole e aahu ana, he lole maikai loa ia nona ke kumukuai nui; ma kona mau manamana lima e anapu ana na komo pohaku momi like ole, na lihilihi nahenahe e kuwelu ana ma kona a-i, a ma kona mau pulima na kupee gula, a ma kona poo he papale kapu muouou Farani o ke ano maikai loa, a na ia mea i huna iho i ka nani o kona lauoho hina aeae i like ke a’ia’i me ka hainaka lilina e waiho ana maluna o kona uha.

He wahi ano helehelena like no me kona ko kela opio ma’i e waiho malie ae la iluna o ka uluna, aka, no kona opiopio paha he u’i maoli no kona helehelena ke nana aku i oi ae i ko ka lede aoo, koe wale no kona hohoma mamuli o ka ma’i, ke kumu o ko ka opio loli loa ana ae.

Ua pili kona mau maka, aka, ma ka nana ana aku i kona mau lihilihi maka, ame kona wili oho ehu e waiho ana me he owili gula aeae la ma kona mau papalina, e loaa ana no ka manao i ka mea e nana aku ana iaia he hoohalike me he Anela la e hiamoe malie ana.

Ua like kona ili me ka mabala aiai i hoohinuhinuia, a o kona mau papalina hohoma, me na kaha ma kona lae kona waha, ame kona ihu, me he mea la he opio u’i maoli no oia mamua aku o ke poipu ana a ka ma’i maluna o kona kino ame ke ola maikai e popohe ana ma kona mau papalina.

Aole i hiki aku kona mau makahiki i ka umi-kumamahiku, a he mea kaumaha ka ike ana aku iaia e moe oni ole ana ma kona moe me ka manao i kela ame keia hora ua kokoke loa mai kona hopena.

Aka, oiai e noho ana no ka wahine aoo ma kona aoao me ka pilihua, ua kakaa ae la na maka o ua opio nei a hawanawana ae la oia i ka wahine aoo me ka hoopuka ana ae i kekahi inoa. Ma ka hoomaopopo aku he inoa nana i hoihoi ole ai.

Hikilele ae la ka wahine aoo a i kona hookokoke ana iho no ke ake e lohe pono, haka pono ae la na maka o ka opio ma’i a pane ae la me ka leo hawanawana:

“E mama Madelena, heaha keia o’u?”

“Auwe,” wahi a kona makuahine, “he ma’i nawaliwali loa kou, e kuu lei, a eia au ke noho nei maanei me ke kaumaha nui nou.

“E manao ana anei oe e kuu lei la he pono kekahi.”

“Eia paha kaua la iloko o ka pilikia nui me ke kaumaha no kou nawaliwali e noho nei.”

Kani iho la ke uhu a ka opio ma’i no ka hoakaka a kona makuahine; owiliwili ae la oia i kona wili lauoho huli hou iho la oia i kona uluna, a haule hou aku la no e hiamoe --- he hiamoe kulipolipo o ke ano maha kona i kela manawa. Ku kiai iho la kona makuahine iaia a hiki i kona ike ana ua kaia loa ia kana lei i ka hiamoe; a me na wahi huaolelo kaukau o ka minamina ku ae la oia me na waimaka nunui e hiolo ana a komo aku la iloko o kekahi rumi okoa aku e pili kokoke mai ana me ka palanehe, kahi hoi a kekahi wahine aoo e humuhumu ana.

Aole i pau.