Ka Nupepa Kuokoa, Volume XLII, Number 47, 22 November 1907 — HAKIHAKI NA KIA IKE KAI HOEE Hoea Mai he Mokuahi Norewai i Honolulu Nei me ka Nui Poino. [ARTICLE]

HAKIHAKI NA KIA I KE KAI HOEE

Hoea Mai he Mokuahi Norewai i Honolulu Nei me ka Nui Poino.

Ma ke kakahiaka o ka poalua nei i hoea mai ai kekahi mokuahi Norewai ma ka inoa o Adimarala Borreson i ke awa la'i o Kou nei, ua pau hoi kona mau kia i ka hakihaki, a ua koe mai o ka mokuahi wale no e holo olohelohe ana kohu moku kia ole. Ma ka hoike a ke Kapena o ua mokuahi la ua manao loa oia ua loaa kona mokuahi i ka poino mamuli o ke kai hoee i ukalila mai e ke ola'i ma ka moana ma ka hora 12:40 o ka po o ka la 2 o Novemaba oiai lakou ma ka lonitu akau 47:38 ma ka lakiku komohana 177-12. Ua haalele aku keia mokuahi ia Seattle me ka piha papa, a e holo ana hoi no Taku, Kina, a mamuli nae o ka loaa ana o keia pilikia i ka mokuahi, ua kipa mai la oia no Honolulu nei, no ka hana hou ana i kona mau hemahema e hiki ai ke hoomau aku ma kana huakai. Ua piha iaia na la holo he kanakolu-kumamahiku a hiki wale i kona ku ana mai no keia awa. Oiai ua mokuahi poino la e ku ana i ke awa ae nei, ua ike ia ua haki kona kia mua ma kahi kokoke loa i ka oneki, a o kona kiahope hoi ma kahi o iwakalua-kumamalima paha ka puai mai ka oneki ae. Ua hele kona mau lako oluna o ka moku, a pau i ka nahaha, a pela no hoi kona mau aoao ua manumanu i ka analia e ke kia i ka wa i haki ai, a i ka manawa e hoaoia ana e oki i kaawale aku ai mai ka mokuahi aku. I keia manawa i loaa ai ka poino i ka mokuahi, aole he wahi noonoo ae o ka poe oluna o ka moku e kau maluna o na waapa a holo aku no ko lakou palekana, oiai he makehewa wale no ka hoao ana e hoaano aku iloko o ka ino e haluku ana iloko o ia manawa. Ua huli aoao aku ka mokuahi i keia manawa i haki ai na kia, a he hana nui hoi ia na na kanaka o k moku e okioki ai i na kaula i hoopaaia ai i na lapa papa oluna o ka oneki, a i ke ao ana ae, akahi no a maopopo pono na mea e hana aku ai no ka pono o ka mokuahi. I ka haalele ana aku o ka mokuahi i kona awa o ka holo ana mai, ua loaa no oia i ka ino, aka he ino nae e loaa ole ai na poino, a eia no ka pilikia ana a i ke kokoke ana e kani ka hora ekahi o ka po o ka la elua o Novemaba, he hookahi no nalu o ia uhi ana mai maluna o ka oneki, o ka lilo aku la no ia o kekahi hapa o kona mau ukana, me ka u-ke puia ana aku i ke kia, a o ka haki iho la no ia me he wahi laau la no ke kukaepele. Aia no ke kapena me kana wahine mahope ma ka rumi kapena, e hoike aku ana hoi ke kapena i ka wahine, e loaa ana lakou i ka poino, o ka manawa no ia o ke kia i haule mai ai maluna o ka hale o hope a mamuli o keia ikaika o ka haule ana mai o ke kia, ua pa aku la ke poo o ke kapena i kekahi mea, a waiho malie ana me ka oni ole, a na ke kuene ame kana wahine i opa iaia a hiki i ka pohala ana. He hookahi mea laki loa ma keia loaa ana o keia mokuahi i ka ulia poino, aole he hookahi mea maluna o keia moku i loaa i ka poino, a koe wale no ke kapena me kahi eha uuku.