Ka Nupepa Kuokoa, Volume XLIII, Number 9, 28 February 1908 — HE HOALOHALOHA. [ARTICLE]

HE HOALOHALOHA.

He mauu no na kanaka apau. Mimino ka mauu, mae wale ka pua, pela no na mea ola apau maluna iho o ka Honua; a oiai, o ko makou hoa alo o ka inea, ke anu ame ka wela o ka la, e uhai a holo ai i ka ua me ka makani no na hana Kula Sabati, hana Hooikaika Kristiano ame na hana pili Ekalesia no apau; a oiai, o Hon. William James Wright, he haumana oia no ke Kula Sabati o Ponomau, a he lala hoi no ka Ahahui Hooikaika Kristiano, a he hoahanau no hoi no ka Ekalesia o Pukaana, a oiai, no hoi, oia kekahi mea kokua nui i na hana pili Ekalesia, nolaila, e hooholoia, O makou o na haumana o ke Kula Sabati o Ponomau, na lala hoi o ka Ahahui Hooikaika Kristiano o Ponomau, e noho ana ma Honaunau, Keokea ame Kiilae hapa o ka Ekalesia makua o Pukaana, ke komo pu nei makou apau, e auamo like me ka ohana o ko makou hoahanau i haalele mai ia makou i na ehaeha, na kaumaha ame na luuluu, a e hapai ae i ka makou mau leo nonoi i ka makua mana mau loa, e hoomama mai i na naau walohia, a e waiho aku ia mau ehaeha apau ma ka poli o kona mau wawae a Nana no e hoomaha mai. Ma o ko makou mau Komite, CHAS. PAWAI, PETER KAEO, H. K. KEKUEWA, MRS. MINNIE P. KAEO, MRS. HATTIE KANUHA, MRS. ANNIE PAWAI, Honaunau, Kona Hema, Feberuari 9, 1908.