Ka Nupepa Kuokoa, Volume XLIII, Number 21, 22 May 1908 — HE HOALOHALOHA. [ARTICLE]

HE HOALOHALOHA.

Mamuli o ka hiki ana mai o na ulia o ka popilikia, maluna iho o ke kino o Fred Roback ke kane mare a ko makou hoapaahana iloko o na hana a ke Akua ma ka Ekalesia o Keanae, Maui, T. H., oia hoi o Mrs. A. F. Roback, a ua hala aku oia ma o; a ua noho iho kana wahine, na keiki ame na ohana apau iloko o ka nohona kaumaha, ehaeha, luuluu i na la o keia noho kanikau ana. Nolaila, e ka hoaloha i aloha nui ia, e hoolana i kou ma'u manao, e nana aku i ko kakou Haku aloha i kaulia ia ai ma ka laau Ke'a, e like me kana i olelo mai, e hele mai oukou apau i o'u nei e ka poe luhi ame ka poe kaumaha, Na'u oukou e hoomaha aku. E hooholoia, O makou o ka Ekalesia, Kula Sabati ame ka Ahahui Hooikaika Kristiano, ke komo pu aku nei makou me oe ka wahine i hoonele ia i ke kane, ame na keiki i hoonele ia i ka makua; e kaana pu i na kaumaha, na ehaeha ame na luuluu i na la o keia nohona kanikau ana. Ke pule nei makou i ke Akua, e hoomamaia ae kou mau manao kaumaha ame ka olua mau keiki. E hoounaia i hookahi kope i ka Nupepa Ka Hoku o Hawaii ma Hilo, Hawaii, i hookahi i ka Nupepa Kuokoa ma Honolulu, i hookahi kope i ka wahine kanemake ame na keiki ma Piihonua, Hilo, Hawaii. O makou iho no me ke aloha, REV. S. K. KAAILUA, D. N. NAPIHAA, A. NAPIHAA, JNO. P. LEAHI, MISS T. KEOHOKAPU, MISS ANNIE K. HALEMANO.