Ka Nupepa Kuokoa, Volume XLIII, Number 25, 19 June 1908 — HAAHEO O KONA HEMA I KONA LUNAKANAWAI HOU. [ARTICLE]

HAAHEO O KONA HEMA I KONA LUNAKANAWAI HOU.

0 ka hookohu ana mai a Lunakanawai Kiekie Hartwell ia Robert Makahalupa i lunakanawai no-ka Aha Apana o Kona Hema ma ka Poakahi aku nei o ka pule i hala, oia no ka waeia ana ae o kekahi kanaka Hawaii makaukau a kupono no ia noho, ka mea a na kanaka 0 ia Apana e haaheo ai no ka loaa ana ia lakou o ka lunakanawai hoopono a kaulike. Ua ike mua ia kona hōoponō ame kona kaulike iaia e noho lunakanawai ana no ka Apana o Ewa, a i ka ninau ana i kekahi poe kamaaina o Kona Hema e noho nei ma keia kulanakauhale i keia mau la, he hookahi no a lakou olelo, oia no ke kupono o keia kanaka Hawaii ma na ano apau. Mamuli o kana mau hana ame kona ano maoli i loaa mai ai ka ike ia lakou a i ka lehulehu nona, a mamuli no hoi o ia mau kumu i loaa mai ai na apono ana no kona kupono ma keia kulana hou ana e hoi aku ai a hoopiha. a kekahi o na keiki kamaaina o Hookena i olelo ae ai, aole 1 nele maoli ka apana i na kanaka naauao na lakou e hoopiha aku i na kulana o keia ano ae la, aka no ka hookupono ole ae ia lakou e hiki ai ke heluheluia aku ko lakou ano me he mau nupepa la. Ke manaoio nei ke Kuokoa i keia mau olelo, a pela no i loaa ole ai keia kulana i kekahi poe e ae i alualu like mai nei i keia hanohano. O keia wale no ka mea nui na kela ame keia kanaka maloko o na apana e nolio mai nei, oia no ka hookupono ana ia lakou, a lilo i poe e hiki ai ke loaa aku na hilinai ana no ka malama ponoia o ka hana mc ke kupono, aole i pili wale no keia i na kulana hookohuia aku, aka pau pu no me na kulana i kohoia aku e ka lehulehu. 1 ka nana ana i keia au o ka nee ana 0 ka manawa, eia na kulana ame na oihana ke alualu nei i ke kanaka kupono, oiai ua kaa mai ka hapanui o ke koho ana ame ka hookohu ana ma na oihana iloko o ka lima o ka lehulehu, aole hoi iloko o ka mea hookahi e like me ka wa i hala. • Ma keia ano iho la, ua konoia aku kela ame keia kanaka e alualu ana no kekahi kulana e lilo oia i kanaka kuppno, e hiki ai ke loaa n'iai na hilinai ana a ka lehulehu. No ka lunakanawai hou o Kona Hema, me ia pu na kalokalo ana a ke Kuokoa no ka holopono, ke kaulike ame ka maemae o kana lawelawe ana aku i keia kulana hou i kau aku maluna o kona hokua, a e alakai ia hoi na hana apau i pili i kana oihana me ka noeau ame ka naauao e kaupaona a e hookaokoa ana i ka hewa mai ka pono mai.