Ka Nupepa Kuokoa, Volume XLIII, Number 33, 14 August 1908 — PAAIA KA EMEPEHA O KELEMANIA E KE KOA KIAI. [ARTICLE]

PAAIA KA EMEPEHA O KELEMANIA E KE KOA KIAI.

SWIMUNDE, Aug. 4—Ua lilo ka lioololi ana o ka Emepera Uilama .i ke ano o kona umiumi i kumu nona e hooleia ai kona komo ana iloko o kekahi 0 na pukapa o na papu maanei mamua koke iho o kona holo ana aku nei no Suedena. Ua ukaliia ka Emepera e na aliikoa lie nui a he mau aahu maka ainana ko lakou me na papale Panama 1 ka wa a lakou i hookokoke aku ai i ka puka komohana o ka papu, i ka ike ana mai o ke koa kiai puka ia lakou ua paaia mai la lakou iwaho. Mamuli o ka ike o ka Emepera i ko lakou hoohokaia, ua hoao aku la oia e komo aku. Ua pane aku la oia i ke koa kiai, "E ae mai oe ia'u e komo aku. Aohe ka paha oe i ike ia'u?" Owau no hoi keia o ka Emepera. Nana pono loa mai la ua wahi koa nei i ka Emepera a loihi, aohe no nae i ano maopopo loa iaia, aka ua ano hiki nae iaia ke ike mai i ka helehelena o ka Emepera, koe nae ka umiumi, ua lawe ae la oia i ka pu ma ke alo, he hoailona o ke aloha a hookuu aku la iaia e komo. Ua hoike aku la ka Emepera i kela mea i ka Lunakoa e kiai ana i ka papu, me ka mahalo i ka malama pono o kela wahi .koa i kana kauoha a ua noi aku la e hookiekieiia ae kahi koa hoopono ma kekahi kulana hou ae.