Ka Nupepa Kuokoa, Volume XLIII, Number 38, 18 September 1908 — UA HOOMAHA ILOKO O KA MALUHIA. [ARTICLE]

UA HOOMAHA ILOKO O KA MALUHIA.

I ko makou hoahanau aloha, Kev. E. S. Timoteo, me ka naau luuluu, me na waimaka e hiolo ana, me na lima haalulu keia maka peni e kakau nei. Ma ka ike ana ma ka nupepa Buletina, ua kipa ae ka Anela o ka make ma ko olua Home aloha ma ke kulanakauhale o Honolulu ma ka hora 10 a. m. o ka Poakahi, Sepatemaba la 7, 1906. Ua haalele mai kau mama i aloha nuiia ia oe, Mrs. Mary Kealoha pau ole, Timoteo. He oiaio no, O ke kanaka i hanau ia e ka wahine, he hapa kona mau la, a ua piha hoi i ka popilikia. Ua kulu ka waimaka uwe ka Opua, he waimaka pua ia na ke Kehau. Aole o kakou kulanakauhale e mau ana maanei aka, ke imi nei kakou ia wahi maha mau ma o kahi e ola mau ai. Ka Lani kuu Home e maha mau ai. Pokole paa ole kuu noho inaanei. No keaha e ohumu ke kau paapu mai Na eha, na luhi na kaumaha e. Poinaikai ka poe make iloko o ka Haku. Hooholoia, Ke komo aku nei makou e auamo pu me oe i na ehaeha i kau iho maluna ou. Hooholoia, Ke komo pu aku nei makou me oe, me na naau kaumaha a luuluu, a na ke Akua aloha e hoomama mai ia kakou iloko o kona lokomaikai. Hooholoia, E haawiia i hookahi kope i ka nupepa Kuokoa, a i hookahi i ke Aloha Aina. O makou iho no me ka walohia. SIMON PAALUHI, ROBERT PUUKI, E. McCORRISTON. Anahola, Kauai, Sept. 12, 1908.