Ka Nupepa Kuokoa, Volume XLIII, Number 39, 25 September 1908 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

Honolulu, T.H. Poalima, Sepatemaba 25, 1908

 

HE MOOLELO NO

Hakawela Reminakona

-A I OLE-

 

Ka Momi i Loaa Aku Iluna o ka Wai, a o ka Mea

Huna Pili i ka Moe Bebe

------------

MOKUNA XVII

 

            “Heaha kau e hele aku ai ua hiki no i kou kaika mahine lawelawe ke hele aku e kokua iaia, a i ole no hoi ia na’u e hele aku e kokua iaia i keia manawa,”  i pane aku ai o Lora, i ole ai e ikeia kana hana lokoino no Akeneki.

 

            Iloko nae o ko Hakawela noonoo ia manawa, o ke kumu lohi loa paha o Akeneki, mamuli no ia o kela hui ana o laua he mau minute helu wale aku n o maua, a ke hoomalielie la paha oia i kona mau manao pihoihoi, mamua o kona iho ana mai no ke keena hookipa.

 

            Ua makaukau loa o Lora i kela manawa e holo aku noloko o ka rumi o Akeneki, aka ua kahea e aku la nae o Mrws. Reminakona iaia i ka i ana aku:  “Ua makemake au ia oe e Lora e noho pu mai me a’u a hookipa mai i na malihini,”  a ia wa i komo nui mai ai na malihini, e hiki ole ai ia Lora ke hele hou aku e hoohaehae ia Akeneki.

 

            He oiaio aia ua Akeneki la maloko o kona rumi, kahi i hoomaalili ai i kona mau manao pono ole apau, a o kana i hooholo ai, aia a hiki i ka wa e aluka mai ai ke komo ana a na malihini, o kona wa ia e iho mai ai, a he hookahi kona komo pu ana aku me lakou.  Ke lohe aku nei no keia i ka noke mai o ka bele i ke kani, aka aole nae ona wahi mea a eu ae, a e kakali malie wale ana no oia, komo ana no kekahi o na kaikamahine lawelawe a i mai la:

 

            “I hoounaia mai nei au e Mrs. Reminakona e hele mai e ninau aku ia oe, ina paha he plilikia kekahi i halawai me oe, kou kumu o ka lohi loa ana i keia po?”

 

            “Aole he pilikia, ua makaukau hoi au, a o ko’u hele aku no ia e komo me ka lehulehu o na malihini e hele mai nei.”

 

            Mamuli o ko Hakawela nauki loa no ko Akeneki hele koke ole aku noloko o ke keena hookipa, ke kumu o ka hoounaia ana mai o kela kaikamahine e ninau iaia nei.

 

            Mahope o ka hala ana aku o ke kaikamahine lawelawe, o ko Akeneki ijo aku la no ia, a oiai e pohaiia ana o Mrs. Reminakona ma e na malihini, ua loaa he manawa maikai loa no ia nei e komo aku ai me ka ike oleia mai, a o kona palamimo aku la no ia a ku mai la mahope pono aku o Mrs. Reminakona.

 

            Ke ike aku la keia i ke ku pu mai o Hakawela me Lora, ua hele hoi o Lora i kana nana aku a he minoaka wale no kana hana, a mano loa iho la keia, ua paa ka laua la hoopalau e like me na mea a Lora i hoike aku ai iaia.

 

            Ia huli ana mai a Mrs. Reminakona i hope a ike mai la ia Akeneki, ua kamailio mai la oia i ka i ana mai:  “Lohi maoli ka hoi oe i keia po, a loaa ole he manawa no’u e hoolauna aku ai ia oe imua o kekahi ehluna nui o na malihini i kipa e mai nei.”

 

            Aia o Hakawela ke nana mai la ia Akeneki, eia nae aole o Akeneki nana aku iaia, a mano iho la o Hakawela, o kona kumu paha o ka nana ole mai iaia, mamuli o kona hilahila, a mamuli o kona manao o ahuwale mai kona ano imua o ka lehulehu, no na mea a laua i hana ai ma ia po.

 

            “I ka loaa ana nae ia Hakawela he manawa kaawale nona e hele mai ai e hui pu me Akeneki, ua hele mai la oia a i mai la:  “E kuu aloha, pehea oe i lohi loa mai nei?”  no ko Akeneki manao ua pulapuia mai oia e keia kanaka opio, ana i hilinai kuhihewa aku ai, aole ona hoolohe mai iaia, aka ua huli aku la no oia ia Mrs. Reminakona a pane aku la i kana ninau:

 

            “Ke kaumaha loa nei au, ina ua hoopilikia ia aku oe mamuli o ko’u hiki hope ana mai nei.  Ua nanea loa ia au i ka hiamoe, a i kuu puoho ana mai nei, eia ka ua ahiahi loa, a o ko’u hoomakaukau mai nei no hoi ia a iho mai la e halawai pu me oukou.’

 

            “Ualuhi maoli no oe mamuli o ka nui loa o nahana a’u i hoouna uana ai i keia la, aka nae hoi ua loaa iki ia oe ka maha mamuli o ia hiamoe liilii ana mai nei au.  He hookahi nae a’u mea kaumaha loa o kuu hoouna ole ana aku i mau pua maikai nou, aole paha o kena mau pua, ka mea kupono a kekahi kaikamahine e like la me oe ke ano e komo mai ai i keia po laukanaka o ko kakou home nei!”

 

            Eia no o Hakawela ke ku kokoke loa nei ma keia wahi, a ke lohe nei oia i na olelo apau e kamailio ia la mawaena o laua, aka ke minoaka wale la no oia, me kela mau manao kuhihewa no iloko ona, mamuli o ka haule ana o kela pua rose a pepe ai i kona mau kamaa, ke kumu i nele ai o Akeneki i ka pua, a omou mai ai i keia mau pua inoino.

 

            He manawa momoku loa mai nae keia o na malihini i kono ia, a lilo aku la o Mrs. Reminakona ame Hakawela ma ka hookipa ana mai ia lakou oiai hoi o Akeneki e ku malie aku ana no nana i ua mau malihini la.

 

            Iloko nae o kona nanea, ua hikilele ae la oia i ka ike ana aku i kona hoaloha elemakule e kuo’e mai ana me ka lehulehu, a akahi no a hoomamaia mai kona mau manao kaumaha, oiai o kona wahi hoaloha hookahi wale iho la no ia ana e hoomanao la iloko o keia mau minute o kona hoehaehaia.

 

MOKUNA XVIII

 

            Komo mai la o Akibolo me kela mau lole ano-e no i maa iaia i ke komoia iloko o na makahiki lehulehu, a ke au hele la kona mau maka ma o a maanei, no ka nana ana i ka nani o na kukui uwila, ame na mea i hoohiwahiwaia iloko o ke keena hookipa, a no ka hakilo ana hoi kekahi no Aleneki.

 

            Maopopo aku la no paha ia Akeneki ka manao o ke ku loihi ana a Akibolo ma kekahi wahi no ka nana ana mai o ka ike mai iaia nei nolaila, ua hele aku la oia no ka halawai pu ana me ia, me ka hilahila ole no ke ano o ka lole o kona hoaloha.

 

            “He keu maoli ko’u hauoli no kou hele ana mai nei e Akibolo i keia po,” i pane aku ai o Akeneki, me ka haawi ana aku i kona lima imua o Akibolo, me ka pa’ipa’i pu ana aku ma ka poohiwi o ua elemakule la.

 

            “Owau no hoi kekahi i hauoli i ko kaua halawai hou ana, aka pehea ana la ka manao o keia anaina hanohano ke ike mai ia’u e ku pu ana me oe, e manao mai ana paha lakou he kupunakane au nou.”  Wahi a ua Akibolo hookolohe la, me na maka hoihoi e nana mai la ia Akekeki.

 

            Me ko Akeneki kamailio hou ole aku, a me kona nana ole aku i ke kekahi poe e kamailio mai ai nona, ua pe’a mai la oia i ka lima o Akibolo malalo o kona poaeae, alaila i aku la:  “E lawe aku ana au ia oe e ike ia Mrs. Reminekona, a haawi aku hoi oe i kau hoomaikai ana i ka ona nona keia home, mamuli o ke kono ana i hoouna aku ai ia oe ma o’u nei, pehea ia i kou manao e Akibolo?”

 

            “Heaha auanei hoi, e hele aku no hoi paha au e ike iaia, a peha aole anei ou hilahila i ka hele pu mai me a’u?”

 

            “Heaha auanei ko’u mea e hilahila ai, hele mai paha kaua,”  a o ke alakai aku la no ia o Akeneki i kona hoaloha imua o Mrs. Reminakona, a aole no hoi o Mrs. Reminakona i hoohakalia iho i kona haawi ana mai i kona lima i keia elemakule ano e, a nana hoi i hoolauna aku ia Lora, a kunou haahaa mai la ua kaikamahine, nei imua o Akibolo, me he mea la aole oia i halawai mua me ia nei, ka makuakane ana o ka au ana mai o ke kai loa, me na kuko palaualelo.

 

            Pau ae la no ko Lora leha ana mai maluna o ua makuakane nei ona, a huli aku la oia me ka poe opiopio, a ke hele la kana aka, a ke haawi la i na minoaka hoohie ana, oiai hoi kona kua e haawi mai ana i koina makuakane.

 

            I ko Hakawela ika ana mai i ua o Akibolo ua hele mai la oia a haawi mai la i kona lima me ka pane ana mai:  “Hauoli malo ka hoi au o ka hui hou ana me oe, a ua hoohauoli ma oe ia mama, ma o keia kipa ana mai nei ou i keia po, a aole no hoi au i manao o keia ka hope loa o kou hele ana mai.”

 

            “Ke manaoio aku nei au i kau mau olelo e kuu hoaloha opio, a me he mea la, e ko no okoa mai ana no oe ia’u e hele mau mai e kipa ma ko olua home nei, oia anei kou manao e Hakawela,”  wahi a Akibolo.

 

            “Oia maoli no ko’u makemake o kou hele mai no hoi paha i ko maua wahi nei e nanea ai no kekahi manawa.”

 

            Ia laua nei nae e noke nei i ke kamailio, aia ka lehulehu ke noke mai la i ka aka pahaenehene no keia kanaka a no Hakawela hoi kekahi i ke ku aku a kamailio me keia kanaka ano e i kulike ole aku kona ano me ko ka lehulehu.

 

            He mau manawa a Akibolo i makemake ai e kamailio pu me Lora, aka no ka hoahiu loa o ua kaikamahine la, no kea mea aole loa ona wahi hoih oi e ike i keia kanaka, a o kekahi no hoi aole oia i makemake e loaa aku ka hoohuoi i kona mau hoa, he pili oia a i ole kamaaina mua paha ia Akibolo mamua pela i hiki ole ai iaia ke kamailio.

 

            No ko Akeneki ike ana mai hoi i ke ku hookahi aku o kona hoaloha elemakule, a no ka makemake ole e lilo i mea kamailio ia mai e ka lehulehu, ua kii mai la oia iaia, a lawe aku la e hoomakaikai ialoko o ke keena hookipa nui, me ke kuhikuhi ana i na kii like ole e kau mai ana ma na paia, a lawe aku la oia e hoolauna i kekahi poe ana o ke kamaaina mua ana, he poe hoi ana i manao ai e hookipa aku ana i kona hoaloha me ke ohaoha.

 

            I ka hala ana o kekahi manawa lohi o ko laua nei hele pu ana, a mamuli o ka ike ana aku o Akeneki i ko Mrs. Reminakona manao ua i aku la oia ia Akibolo “Ua makemake o Mrs. Reminakona e kamailio mai ia’u i kekahi mea i keia manawa, a i hiki mai aunei i ko kakou wa e hele ai e ai, e oluolu ana anei oe o kaua like ke komo iloko i ka wa hookahi a noho pu ma kahi hookahi?”

 

            “Aole o’u pololi, o ko’u ai ana mai nei no ia i ko’u aina ahiahi la a hele mai nei, o oukou no hoi paha ke komo aku e ai,” wahi a ua o Akibolo, no kona makemake ole no e launa aku me kela anaina o ka poe hanohano a ko’iko’i.

 

            “Mai hookuaaina loa mai hoi paha oe, ina no ua maona oe ea, e lawe aku no oe ia’u iloko o ka rumi aina, no ka mea ua hoomakaukau maoli no oa Mrs. Reminakona i na mea ai no na malihini apau i hele mai nei i keia po, nolaila aole au mea e hilahila ai, a ina no hoi paha aole ou makemake i kekahi mea, alaila noho malie mai no hoi oe ma kuu aoao a hiki i ka pau ana o ka’u ai ana, alaila puka hou mai kaua nowaho nei.”

 

            “Aole paha owau kou hoa e kohu ai o ke komo ana aku iloko o ke keena aina, he keu no o ka poe opiopio kou poe e kohu ai?”  i ninau aku ai o Akibolo ma ke ano hoomaoe.

 

            “Aole o’u makemake ia lakou, o oe wale no ka’u i kaunui ai, me oe au e hauoli ai, a o ke kumu no hoi ia o ko’u ake nui ana aku e hele mai oe no keia anaina hoolaulea o keia po,” oiai no nae ke uumi wale la no o Akeneki i kona pihoihoi, mamuli o na manao ahku’iku’i e lolii la iloko ona.

 

            O ke kumu no hoi o ua kaikamahine la e makemake loa nei e hookololohe a komo pu ;me Akibolo, no kona manao o keia wale no ke keonimana e hiki ai iaia ke hoopipili aku, i hiki ole ai ia Lora ke hookokoke mai me ia nei a hoike mai no kona hoopalauia ana me Hakawela.

 

            “In hoi ha pela, ua pono a na’u ponoi no e lawe aku ia oe noloko o ke keena aina, a i hoike aku no nae hoi au ia oe e kuu Akeneki ea, o ko’u iini maoli no ia o ko kaua komo aku no iloko a noho ma kahi hookahi, i ole ai no hoi au e hilahila i ka nanakee mai a ka poe malihini i ko’u mau lole ano-e e nele ole ai ka hu o ko lakou aka,” oiai nae aia ka manao hoohuoi iloko o ua elemakule la, aia kekahi mea @ hanaia mawaena paha o na kamaaina ame kona hoaloha opio, e like me kana e hoomaopopo la ma ka helehelena o Akeneki, ame ka eueu mau o kona mau lehelehe.

 

            “Ke hoomaikai aku nei au ia oe e Akibolo no kou ae ana mai la e hele pu me a’u, a mai hoao oe e kii aku i poe kaikamahine okoa aku, i mau hoa nou e komo pu aku ai iloko o ka hale aina, “ wahi a Akeneki me ka minoaka ana mai, a me ke kamailio ana mai no hoi ma ke ano hookolohe.

 

            “Mai hopohopo oe no’u e kuu hoaloha, owai auanei ke kaikamahine makemake mai i ka elemakule e like la me a’u nei, o oe wale no paha ke kaikamahine nana au i koi okoa mai e hele pu aku me oe, nolaila e hoolana i kou mau manaok ina ua hookaumahaia oe ma o keekahi mea ano e au i ike ai, a i ole i h anaia mai paha maluna ou,”  i pane aku ai o Akibolo me ke kilohi ana aku ia Akeneki mai luna mai o kona poo a hiki i kona mau wawae.

 

            Akahi no o Akibolo a hana i keia kaikamahine e like pela, ka nana pono loa ana aku i ko ia nei ano, a huli kunihi ae la o Akeneki me ka i ana mai:  “He keu ka hoi ko’u poina loa, aole au i ninau aku nei ia oe no mama, pehea kuu makuahine?”

 

            “Malia paha he kumu kou mea o ka hoopoina ana no kou makuahine?”  wahi a Akibolo, me ka mau ana no o kana nana ana maluna o Akeneki.  “I haawi mai nei no oia i ke aloha ia oe, a ke kau mai la kona mau maka o kou huli hoi aku i ka la apopo, a i ole ia i kela la aku paha.”

 

            “Pehea hoi paha kona olakino?”  wahi a Akeneki o ka pane ana aku ma ke ano hoolalau, aole hoi he pane pololei aku i ka Akibolo ninau.

 

            “No ka hoike ana aku ia oe eAkeneki i ka mea oiaio ea, aole he maikai o ke ola kino o kou mama.  Ua loaa oia i ke ano e i kela mau la aku nei, a ke maka’u nei au, ua komo loa aku kela anu iloko o kona akemama, no ka mea e kunu mau ana oia i na manawa apau, a haalele aku nei no au iaia me kela ano ma’i no.”

 

            Ua hikilele maoli o Akeneki no ka loha ana mai i keia kulana kupilikii i loaa aku i kona makuahine, a oia kana o ka ninau hou ana mai ia Akibolo; “Aia nae paha oia iluna o kona wahi moe e waiho nei ea?”

 

            “He hiki no iaia ke hele ma o a maanei, aka no keia la nae, he uuku loa ka manawa a’u i ike ai iaia e holoholo ana, maluna wale no o kona wahi moe ka hapanui o kona manawa.”

 

            “Ina pela e Akibolo, e hoi pu aku ana au me oe i keia po, no ka mea aole he pno mai la o ko’u manao no ko mama pilikia,” wahi a Akeneki me kona hauoli no ka loaa ana o keia kumu kupono loa nona e hoi koke ai no ko lakou home, a pau hoi ka ike ana aku i ke kanaka nana oia i pulapu mai e like me kana e manaoio la.

 

            “Aole kela he pilikia nou e hoi koke ae ai, ua hiki ia’u ke nana i na mea apau e kaawale mai ai oia mai na pilikia mai apau a ka ma’i a aia no hoi paha a pau na la au i koho ai no ka noho ana maanei nei, alaila hoi mai oe, o lilo aku auanei keia hoi awiwi ana ou me a’u i mea hookahaha aku i ka manao o kou mau kamaaina,” wahi a Akibolo ma ke ano hoolana?

 

            “Aole he m@  nana e kaohi iho ia’u mai ko’u huli hoi ana aku imua o ke alo o kuu makuahine, nolaila aole au e noho hou ana, e hoi aku ana kaua i keia po me ka hakalia ole,” a hoomaka ae la o Akeneki e hanu nui, me ka haalele ana aku i kona hoaloha elemakule, a hele mai la oia no ka hui pu ana me Mrs. Reminakona.

 

            Iloko nae o keia manawa a laua nei e kamailio pu ana, aia ke kau mau mai la na maka o Hakawela maluna o Akeneki, me ka manao e ike mai i na hiona hiki mua o ka hauoli e hekau ana maluna o ka helehelena o ka mea ana i aloha ai, eia nae he nanaina kaumaha kana e ike mai ana maluna o Akeneki ka mea nana i hookomo aku i na manao hoohuoi iloko ona, aia paha kekahi mea pono ole i halawai aku me Akeneki.

 

            Mai kahi mamao mai kona nana ana mai ia laua nei, a hiki i kona pili loa ana mai ma ka aoao o Akekneki, eia nae aole ua kaikamahine la i ike aku iaia, a i kela wa a ua Akeneki la e hoao aku ana e hele aku no ka halawai pu ana me Mrs. Reminakona, o ka wa ia a @  wela i hawanana mai ai ma kona mau pepeiao i ka i ana mai:

 

            “He hapaha hora wale no koe alaila makaukau na mea ai no @  paina o keia ahiahi, e makaala ae oe no ko’u hele mai e kii ia oe no ka lawe ana aku noloko o ke keena aina.”

 

            Pa pono mai la kela mau huaolelo waimeli mai na lehelehe mai @ Hakawela ma na pepeiao o Akeneki, a me he ao opua la kona @ manao kaumaha i hoauheeia ae ai iloko o kela mau sekona, aka @ halii hou iho la no  kela ehaeha i loaa aku i kona puuwai maluna @ me he kepau la.  Ala mai la na manao lehulehu iloko ona, me ka manao maoli no e hoopuka okoa aku imua o Hakawela ia wa, no kana mau haha apuhi iaia, aka kaohi malie iho la no nae oia i kela maj@ manao e okuku ana iloko ona, alaila pane aku la ma ke ano maikai no i ka i ana aku:

 

            “Aole e hiki ia’u ke hele pu aku me oe, ua haawi aku nei au i ko’u ae ia Akibolo me ia wale no au e komo pu aku ai noloko o @ keena aina i keia po.”

 

            Me he kui la e hou okoa aku ana no i ka puuwai o Hakawela keia mau huaolelo i pane ia aku iaia, ke mea ana i mahu’i mua ole @ o keia ana ka pane e loaa aku ana no kana noi, a he hookahi wale no mea ana e haohao la, oia no ka nana ole aku o Akeneki iaia, aka @ wale no kona mau maka ke nana la iluna o ka papahele, a he ano @ ka-na hoi ke ano o kana kahamilio ana aku.

 

            Ua i mai la no nae o Hakawela i ka pane ana mai:  “Ke kaunaha loa nei au no ko’u hoko pu ole ana aku me oe i keia po, he @  no hoi oe o ka noonoo ole ae ia’u, a hoole aku no hoi oe i kou @  pu ana me Akibolo.  Aole anei he maikai o kou ola kino i kea@  e hoike mai ia’u e Akeneki, a e hana aku no au i na mea e hooluo@   aku ai oe!”  iaia ia ike mai ai i ka hele o ka helehelena o Akeneki a @  kea.

 

            Na kela mau olelo oluolu a Hakawela ame kela kulana ke@  mana o ua kanaka opio la i hoolulu hou mai i ka manao o ua kaikamahine la, a ke hakoko la oia me ka hoomalielie ana i na manao hakukoi ana iloko ona no na hana apuhi a Hakawela iaia, e like @  kana e kuhihewa la, eia nae ua hiki ole iaia ke hoomaalili i kela @ wina kaumaha i kau aku maluna ona, a o ia kana i pane mai ai @  pihoihoi:

 

            “Ua hoke mai nei o Akibolo i’au ua ma’i ia kuu makuahine,”  a no ka hele e ana mai o kekahi mea e kamailio ia Akeneki, ua huli aku la ua kaikamahine nei, me ka pau ana mai o ka noonoo ana no Kakawela.

 

            Me ka maikai ole o ko Hakawela manao, no keia mau hana hoohoka a Akeneki iaia, ua hele aku la oia no kekahi aoao o ke keena hookipa, me ka noonoo nui ana iloko ona heaha la keia kumu an@  o Akeneki iaia i keia po.

 

            Ua maopopo loa iaia, o ka loaa ana o kona makuahine i ka ma@  e like me ka Akeneki o ka pane ana aku iaia , aole ia he kumu lawa pono no ke ano e ana o kona helehelena ame na mea e pane aku  ana no ka ia nei mau ninau, nolaila ua hoopohihihi loaia aku o Hakawela no ke ano o Akeneki ma kela po.

 

            Mai kela manawa mai a Hakawela o ka hookaawale ana aku ma@  ia Akeneki aku, ua hoomamao loa mai la ua kaikamahine nei iaia iho a i ka hiki ana mai i ka wa no ka paina ahiahi, ua imi mai la oia a hiki i ka loaa ana o Akibolo, o ko laua nei komo aku la no ia, a noho ma kekahi wahi kaawale loa mai ka nui mai o ka poe a laua i kamaaina ai.

 

            Ke noke mai la no o Akeneki i ka hoolana i kona hoaloha @  me na olelo e hauoli ai ua elemakule la, a iwaena konu o keia wa a @ lehulehu e ai nei, ua  hele mai la o Habaki Aboka a noho mai la@  ko Akeneki aoao, a oiai no hoi ua ike mua no o Akeneki i keia k@  nimana, ua haawi aku la oia i kona lima no ke aloha ana , a hoolauna mai la i ke keonimana opio ia Akibolo, a ia manawa i ioli ano e ae @ ka helehelena o ua elemakule la, me he mea la, ua loaa aku i kekah@  haawina ano e.

 

            “O Aboka anei kou inoa?”  wahi a ua elemakule la, me ka kaa ana ae i kona mau makaaniani, a ke hoopuka mau la i kela inoa @ elua a ekolu manawa.

 

            “O ko’u inoa ia a Akeneki i kamailio aku la ia oe,”  me ke @ ana ae o ua kanaka opio la a maloeloe, me ka noke ana i ka akaaka.  “Ua lohe paha oe no ka inoa o John Aboka, kela kanaka kalepa waiwai o ke kulanakauhale nei?  Owai ke keiki ponoi a ua kanaka la.”

 

            “O oe io ka ke keiki a kela kanaka e kapaia nei ka moi o ke @lala.” I namunamu liilii iho ai o Akibolo.  He lehulehu wale na manwa a’u  i lohe ai i kela inoa, eia nae aole paha au i halawai mua me ia.”  Me ke kau no o ka makaaniani maluna o ua elemakule la.

 

            Ua hoomaopopo aku la nae o Aboka opio, ma ke ano-o ka leo o keia elemakule ana e kamailio mai nei, aia kekahi mea ano nui i pili i kona makuakane, aka aole nae oia i kamailio hou mai ia Akibolo alaila, ua huli aku la oia ia Akeneki, me ka noke ana i ka hoohulihuli i ke ano o ka laua kamailio ana ma na mea e pili wale ana no ma na mea no laua e hauoli ai.

 

            Ke noke mai la o Aboka opio i ka hoolu’a i ka Akeneki mau pa a luluu i na mea ai like ole, aka aole nae he ai aku o Akeneki i keia mau mea, no ka mea, ua like ka ai iaia iloko o kela po me he mea ole la, a he wahi apana hala kahiki hookahi kana mea o ka ai ana i hooma-uia aku ai kona mau lehelehe i hele a maloo.

 

            I ka wa i pau ai ka ai ana a na mea apau, ua oi loa mai la ka hoopipili ana a ua Aboka opio la ia Akeneki, a no keia ike ana mai hoi a Akibolo i ka lilo loa o kona hoaloha opio me kela keonimana, ua palaminmo aku la oia a nalowale iloko o ke aluka o na kanaka, me ka hoaiki mai no nae i kona mau maka no Akeneki, heaha ana la ka loli ana e ike mai ana no ua hoaloha opio la ona, me keia keonimana ma lihini.

 

            Iloko o keia manawa e kamailio kokoolua pu nei o Aboka opio me Akeneki, aia ua kanaka opio la ke kuupau la i na hana pahele e punihei aku ai o Akeneki iaia, a hiki i kona i okoa anamai, i ke ko@ hia ana aku he ola hou iloko ona mamuli o keia hui kuka ana o laua.

 

            Ua lilo nae keia mau olelo a Aboka i mea e hooi ia aku ai ke pihoihoi ame ka luuluu o na manao o ua kaikamahine la, o ke kaumaha hoi mamuli o kona pulapuia ana mai e Hakawela, a o ka hoike ana mai hoi o keia keonimana i kona paulele maluna o ia nei, a ua hiki hou ole iaia ke hoomanawanui hou iho i kela mau manao kaumaha e paila la iloko ona, ua i okoa mai la oia ia Aboka:

 

            “E ae mai ia’u e hoike aku ia oe, eia oe ke hoike mai nei i na@  i oi aku imua o kou kulana keonimana, a ke nonoi aku nei au ia oe e hookuu mai ia’u, no ka mea ke nana mai la o Akibolo, me he mea la ua makemake oia ia’u,”  a o kona haalele mai la no ia ia Aboka a holo aku la a pili ma ka aoao o Akibolo, i ua elemakule la e noke ana no i ka nana i na kii nunui kauhale.

 

            “E Akibolo, he keu mai la ka hoi kuu makemake loa e ike, pehea aku nei la o mama, e hoi koke ana nae paha oe i keia manawa ea?”

 

            “Ua makaukau mau au e huli hoi aku no kauhale i na wa apau, aka mai hopohopo oe no kou makuahine, aole ona pilikia.”

 

            “Owau kekahi e makemake loa nei e hoi pu aku me oe,”  a no ke ake ole o ua kaikamahine nei e loaa aku na hoohuoi ana ia Akibolo no kona mau ano, ua i hou mai la oia:  “E holo ae au iluna o kuu rumi e kakau ai i leka ia Mrs. Reminakona, no ka hoike ana aku i keia kumu hoi awiwi o’u me oe i keia po, oia hoi no ka hoike ana aku iaia, i ka loaa ana o mama i ka ma’i.”

 

            “Ina pela ua pono, o heloe a hoi mai huli hoi aku kaua no ko kakou home,”  a o ko Akeneki holo awiwi aku la no ia no ka hale oluna, oiai hoi ua elemakule la, i ku aku ai a nana aku i ka helehelena haikea o Akeneki, me he mea la i kana hoomaopopo aku, e maule iho ana ua kaikamahine nei.

 

                                                                        Aole i pau