Ka Nupepa Kuokoa, Volume XLIII, Number 44, 30 October 1908 — Ka'u Leo Uwalo Imua o Kuu Lahui Oiwi. [ARTICLE]

Ka'u Leo Uwalo Imua o Kuu Lahui Oiwi.

E O'u mau Hoa Makaainana Aloha: E na Mamo a ka I! E na Pua a ka Mahi! E na hanauna a ka Palena! E hoolono a e maliu mai i ka leo o ka oiwi o ka aina! He malihini au imua o ko oukou mau maka, ma neia hana he noi baloka. Ua ike a hoomaopopo ka hapanui o oukou e o'u mau hoa oiwi o ka aina, o ka oihana Kupakako no luna o ko kakou mau moku holo piliaina, ka'u hana mai ko'u mau la opiopio mai, a i keia wa, ua o mai na hulu elemakule ma ko'u poo; a ua kani moopuna no hoi. He ewe ponoi au a he kama nau e Hawaii Lahui; ka lahui hoi i hookaulanaia ma na kaiaulu o ka honua nei apau: "Aohe lahui malalo iho o ka malamalama o ka La, i like me ka Lahui Hawaii, ka oluolu, ka heahea ame ka puuwai hamama." O oe, e kuu lahui aloha, i noi aku au: "Ho mai kou aloha no'u nei, no ka oiwi o ka aina." Ua wae pono ia au, e ka iwi o kuu iwi, ame ka i'o o kuu i'o, i moho au no ke kulana Puuku no ke Kulanakauhale a Kalana o Honolulu nei, ke Aupuni hou a kakou e nee aku ai ma keia mua aku. A i ko'u ae ana aku i keia lei hanohano a kuu lahui aloha i papahi mai ai maluna o'u, i hoike aku au ia oukou me ka maopopo aole au i waeia ae no keia Oihana e na aoao kalaiaina i houia na ihu me na kaula aha. Aole aka, ina oukou e koho mai ana ia'u a noho au ma keia oihana, aole loa o'u makemake e hoopaaia malalo o kekahi mikini politika, a pohai politika paha o kekahi ano; aka, he lima hooko au no ke kanaka nui ame ke kanaka iki, e nee ana iluna o ke kaulike no na mea apau. Na ka Hawaii au i wae ae no keia kulana; na ka Hawaii au e hoonoho ma keia kulana; a nolaila, o na Hawaii ka mua a'u e hoomaopopo ai. Ekolu makou e holo baloka nei no keia oihana ano nui o ka lehulehu. Elua mau haole, hookahi no ka aoao Repubalika, a hookahi ma ka aoao Demokarata, a owau no hoi ma ko kakou aoao, ko na Hawaii. Ae—owau nei o ko oukou koko, ka i'o ame ka iwi. He malama dala ka'u hana no na moku o na poe ona moku ko'iko'i o loko nei o ka aina i na wa i hala ae, a ua elemakule au ma ia hana. Ua haalele aku au i ka hana ana no ia poe ona moku, a i keia wa ke huli aku nei au ia oukou e ka lahui aloha, e ae mai oukou, owau ka oukou Puuku malama dala, no ka moku aupuni hou o kakou; oia hoi, ke Kulanakauhale a Kalana o Honolulu. E aho hoi au, ano la, i na la ohohina o ko'u ola ana, e hana au i pono akea, laula a kaulike no ka i'o o kuu i'o, ka iwi o kuu iwi ame ke koko hoi o kuu koko, oia oukou e ka lahui, i makana hiwahiwa na'u ia oukou. E Hawaii Aloha! E hoike ae no hoi kakou, he moho no ka Hawaii ponoi i lawa ka makaukau, ka ike ame ka hoopono, e malama a e kiai i ka pahuhao waiwai o ko kakou aupuni hou. Nolaila, ke nonoi aku nei au ia oukou e o'u mau hoa makaainana, i hookahi a kakou wai o ka like, e pupukahi mai kakou ia'u i ai puupuu no ke kaulu hale laukoa hou o kakou; a loaa no ia kakou ka lanakila hanohano. A noho aku au ma ia oihana, e ike ana au i ka pua mauu nui, me ka pua mauu iki, mai na lehua i ka hapapa a i na liko lehua i ka wekiu. E hoolilo mai oukou ia'u, e o'u mau hoa makaainana, i kiai loko oia hoi ko kakou waihona dala ma keia makahiki ae, a e ike auanei oukou e ka lahui oiwi, e hooko pono ia ana na iini o ko oukou mau puuwai, aohe ipu ulili e piha ole i ka wai mapuna ono. A i ka hooki ana i keia wahi manao imua o oukou, hoomanao ae la au i keia mau wahi lalani mele a kahiko: "Haa Kaipuhaa, Haa i ka malie; Haa ka ipu makai o Kapaa, Haa ka ipu mauka o Kapaa, Mai paa i ka leo, He ole ka heahea mai— * * * E hea i ke kanaka, E komo maloko, E hanai ai i ka malihini A maona i ko Aloha, Ola ia kini, ke a mai la ke ahi." GEO C. BECKLEY, (Mooheau.)