Ka Nupepa Kuokoa, Volume XLIII, Number 49, 4 December 1908 — HOEHAIA E KA MAKAI O KA HALE PUPULE [ARTICLE]

HOEHAIA E KA MAKAI O KA HALE PUPULE

No ka ike ana o kekalii kanaka nona ka inoa o J. G. Branco, he paoahi noluna o kekalii o na mokuahi holo pili aina i ka hoeha ana a kekahi o na makai o ka hale pupule i kekahi pupule, na hele okoa mai oia no ke keena o ka Nupepa Advertiser ma ka po o ka la Sabati nei me kona makemake e ike mai ka lehulehu i ke ano 6 ka mea ana i ike ai, i ko lakou manawa e heluhelu ai maloko o ka nupepa. Ma ka olelo a kela kanaka, aia kona •wahi e noho nei mauka o ke alanui Kula e kokoke ana i ke alanui Liliha. Ua ike oia i ka hemo ana mai o kekahi Kepani pupule mailoko mai o ka pa o ka hale pupule a hele ma ke alanui Kula e hoea mai ai no ke Liliha. I ka ike ana nae o kekahi mea i kela Kepani, ua hele aku la oia a kuikui lima pu me ia a he hookahi ko laua hoi like ana noloko 'o ka pa. Ia laua nae i hiki ai ma ka pukapa, ua hoea mai la he makai, a huki aku la i ke Kepani ma ka pepeiao, me ke ku'i pu ana mai iaia ma kā maka. A i kulike ai me ka olelo a Mr. Brancho, ua piha maoli ka ka poe e ku kokoke ana ma kela wahi a i ike hoi i na hana a kela makai maluna o ke Kepani i ka hoonaukiuki, a o konakumu ia o ka hele ana mai e hoike i ka hana a kela makai maloko o ka nupepa. Ua ae okoa ae ua makai la i kona hewa e like me kana i hana aku ai maluna o ke Kepani pupule, a o ka

hopena o ia hana hewa ana, oia no kona hoopauia ana aku mai kona noho makai ana no ka hale pupule, ma ka Poakahi nei.