Ka Nupepa Kuokoa, Volume XLVI, Number 6, 5 February 1909 — NUI KA INO O KA MOANA. [ARTICLE]

NUI KA INO O KA MOANA.

Ma ke ku ana mai o ka mokuahi Manchuria ma ka auwina la Poalima aku nei he elua haneri a oi ohua maluna o kona oneki; he hookahi haneri ame umi-kumamakahi no Honolulu nei a o ke koena aku no na awa e aku. He kualana ka moku i keia hoi ana mai nei mamuli o ka nui ole o ka ukana, a ma ka hoikeia mai o ka hapalua o kana mau ukana maa mau e holo nei o ia kana i hoi mai nei. Nui ka ino o ka moana. Ekolu la mahope o kona haalele ana ia Kapalakiko ua loaa mai la ia i ka ino, ka ua ameka makani. Pii mai na ale a uhi pu iluna o kona mau oneki, lola ka moku i o a ia nei me ka ikaika, a he ino i ike mua oleia iloko o kona moolelo. Ua haule mai ka hua hekili me ka hau maluna o kona oneki ma na manawa like ole. Ua lilo i hana lealea na na ohua ma'i ole ka nounou ana aku i kekahi maluna o ka oneki, me na popo hau, oiai ka hau e mokaki ana iluna o ka oneki. He ino puni no keia i ikeia ma na moana like ole ma keia manawa o ka makahiki.