Ka Nupepa Kuokoa, Volume XLVI, Number 13, 26 March 1909 — KA HEI O KA WA I HALA. [ARTICLE]

KA HEI O KA WA I HALA.

O kona ano, he wahi kaula 2 a 3 kapuai ka loa, ua hui ia na piko elua i kahi hookahi, hookomo ae la i na manamanalima; hoomaka ka hei ana, a ku ae la ke kii; heluhelu aku la. Po e kau mai ka Hoku, Ao le helelei wale iho. Hana hou, pela e ku mau ai a helelei mau ai apuni na moku aina o Hawaii, e loli mau ana nae ke ano o ka hei ana; penei ka heluhelu ana, Kueheapio ka La Ka La komo i ke kula o Ahuena; Komo i ka la'i o Kailua la - e - o Kona. O Kona ia o ke kai malino, hele ana iwaho ka pulau, kani ka A'o i Waiulaula la—e—o Kau. O Kau Kuamakani, lele iwaho ka lepo o Kaumaea la—e—o Puna. O Puna ia o ke kai Koloa, e nui ana i ka ulu hala, ke kai o Puna i Keaau la —e —o Hilo. O Hilo ia o ka ua kinai, kinai mao ole ka ua o Hilo—la—e o Hamakua. O Hamakua ia o ke ala uliuli, e nahu ana ka niho i ke kaula, i ka pali o Koholalele la —e —o Waipio. O Waipio laua o Waimanu, o Kohala iki o Kohalanui, o Kohala ua Apaapaa; o Pili o Kalahikiola o na puu haele lua, o ke kanaka no ke hele ana. Hele i ke alo o Haiku, aniani mai kahi makani, malalo mai o Awilipou, kai pii wale i ka pali, kai auau a ka mea Aloha, kona aloha ka lawalawa, oni ana i ka manawa me he ipo la. Me ka mahalo i ke kapena o ke Kuokoa me na keiki ku hoe ke aloha. Aloha i ka La ma Lehua e kau nei, Ua puni o Lehua i ka hao a ka Naulu. Kuu wahine mai ka ale huli lua la o ka moana, Mai ke kapa ulu mai la i Kahiki, Hiki mai ana ua makani kaili aloha nei, E kaili no oe nau kau waiwai, He ai pala maunu aku hoi au na ko aloha e noho nei, I halawai pu ai kaua me ke keiki kuipua o Niolopa Auwe ke Aloha e! GEORGE B. PANAEWA, Nuuanu Valley, Malaki 22, 1909.