Ka Nupepa Kuokoa, Volume XLVI, Number 36, 3 September 1909 — Nuhou Kuloko [ARTICLE]

Nuhou Kuloko

Eia mai no ke Kuokoa me kona mau kuhinia e haupa iho ai a lawa kai makemake! Ma nehinei i piha ai i ka Moiwahine Liliuokalani na makahiki he kanahi-ku-kumamakahi. He aha hulahula ka i haawiia ma ka lana Hokele i ka po -nei no ka hanohano o na malihini a ke Teritore. Ma ka hapalua o ka hora ehiku o keia ahiahi e hoomaka ai ka ai ana o ka ahaaina lrfau a ka Meia Fem ma Waikiki. Ma ka po o keia Sabati iho, e holo makaikai aku ai na hoa o ka Ahaolelo Lahui maluna o ka Mauna Kea no Manokalanipo. Ke loaa mau nei no ke dala hapalua o ka la i ka poe e paa mau nei ka hele ana i ka hana o na mahiko iloko o keia mau la. Ma keia Poalima ae e kapalulu mai ai ke aumokukaua o ka Pakipika no Honolulu nei, ma ka lakou huakai/no ke kai o Manila. Mai poina i ka hele ana ae i ka hulahula maloko o ke K. P. Hall ma ke ahiahi o ka ]a apopo, ilaila e ike ai i na u'i o Kamehameha. Nui ka makemake o malihini Ahaolelo i ka auau kai ma Waikiki, he mea ka iia lakou i ike ole ai ma ko lakou mau wahi o ka hele ana mai. Ma ka Poakahi ae nei ka la kulaia o na Limahana (Labor Day) e panikuia ana na keena aupuni ma ia la ame na hale hana oloko nei o keia kulanakauhale. Piha pono ka Hoaloha i ka moolelo o na hana a na elele C. E. o Hawaii nei o ka hele ana aku nei ma ka hui nui o na C. E. i malamaia mai nei ma St. Paul, Minesota. A keia Poaono'ae e malamaia ai he heihei kukini wawae o 10 mile maloko o ka pa kinipopo hou e kokoke la i ke alanui Liliha. He nui na moho i hookomo ae i ko lakou mau inoa no ia heihei ma kela la. I Ua hoole mai nei o Jas. H. K. Kaiwi o Lihue i ka hoihoi hou ana i na mea ana i hoolaha ai maloko o keia pepa e pili ana i na hana hoonoho kahu o Lihue, Kauai, e like me ke noi a ke Kahu S. K. Kaulili o Koloa. Ma kekahi wahi o keia pepa e ikeia ai ke kono akea a ka Elele Kalanianaole i na Hawaii apau e hoea aku ma kona home ma "Waikiki ma ke ahiahi o ka Poaha, Sepatemaba 16 no ka ike ana i na hoa o ka Ahaolelo Lahui. Hoea kino aku ka o Mrs. Mary Atcherley imua o na kanaka kau kanawai o Amerika i keia mau la iho nei, no ka imi ana i wahi e huli ponoia ae ai ka hana koloheia o kana kane e paa mai nei iloko o ka halepupule.